| همس للقصص وحكايات وروايات خاص بشتى انواع القصص الواقعيه والخياليه |
ليه عمري مالقى لبرده دفى الا دفاكي للكاتبه ذكرى نجديه همس للقصص وحكايات وروايات
ليه عمري مالقى لبرده دفى الا دفاكي للكاتبه ذكرى نجديه السلام عليكم ورحمة الله وبركاته صباحكم ورد وفل ونرجس بدون مقدمات راح ادخل مباشرة بالموضوع لاني احب 
 | |
   
30 - 12 - 2014, 07:03 AM
| | | | عزيزي الزائر أتمنى انك استفدت من الموضوع ولكن من
اجل منتديات شبكة همس الشوق يرجاء ذكر المصدرعند نقلك لموضوع ويمكنك التسجيل معنا والمشاركة معنا والنقاش في كافه المواضيع الجاده اذا رغبت في ذالك فانا لا ادعوك للتسجيل بل ادعوك للإبداع معنا . للتسجيل اضغظ هنا . | |
30 - 12 - 2014, 07:22 AM
|
#2 |
 
 |  عضويتي
» 2730 | | جيت فيذا
» 23 - 12 - 2012 | آخر حضور
» 28 - 1 - 2018 (10:26 AM) |
فترةالاقامة »
4133يوم
| مواضيعي » 7626 | | الردود » 27690 | | عدد المشاركات » 35,316 | | نقاط التقييم » 3126 |
ابحث عن » مواضيعي ❤
ردودي | تلقيت إعجاب » 1 | الاعجابات المرسلة » 30 |
المستوى » $95 [ ]
|
حاليآ في » | دولتي الحبيبه »  | جنسي »  | | العمر »
سنة
| | الحالة الاجتماعية » | مشروبى المفضل »  | الشوكولاته المفضله »  | قناتك المفضلة »  | ناديك المفضل »  | سيارتي المفضله »  | | 
رد: ليه عمري مالقى لبرده دفى الا دفاكي للكاتبه ذكرى نجديه
 الــــجــــزء الأولــــ
صحت من النوم مفزوعه و العرق يتصبب من جبينها
أنتبهت لها اختها الي كانت تذاكر في نفس الغرفه توجهت لها تركض
نوف :: ساره وش فيكي اسم الله عليكي
كانت تلتفت بارجاء الغرفه المتواضعه كأنها تدور على شي
نوف :: ساره حبيبتي ردي على لاتخوفيني عليكي ... وقعدت تقرا عليها
بدئت تحس بالامان وتستوعب الوضع وتيقن انها كانت تحلم
ماتدري ليش حست ان هالحلم شي مرعب وليه تحس انه وراه تاويل لايعلمه الاالله
ساره ...اعوذ بالله من الشيطان الرجيم الظاهر شفت كابوس الله يكفيني شره
نوف...خوفتيي على بالي بتموتين وتجهزت ابي اسمع الوصيه واخذ نصيبي من التركه
ساره .. ياشين خفت الدم لاصارت بغير وقتها
نوف..وش اسوي هالامتحا نات ماخلت فيني مخ
ساره ..لاماعليك هانت بكره تخلص الامتحاانات وتروحين للجامعه ويرجع مخك وتروقين وتفكينا
نوف..الله يمضي هالسنه على خير وانجح واجيب نسبه
ساره ..بس لو تطيعين شوري وتتركين عنك هالعذاب
نوف... ايه تبيني زيك مريحه راسي وماخذه الدراسه لعب
ساره ... الدراسه ياحبي بالنسبه لي وناسه روحه ورده
نوف...انتي الكلام معك ضايع اقول قومي بس صلي ترى اذن الفجر
ساره انسانه مرحه صاحبة قلب ابيض وتمتلك لسان سليط بيضا وجسمها مليان قصيره نسبيا وشعرها اسود متوسط الطول ملامحها حلوه عيونها كبار وفمها صغير ورموشها ظليله
نوف.اختها الكبيره ونصفها الاخر عمرها19تشبه ملامحها بس نوف سمرا متوسطة الطول شعرها اشقر لتحت كتفها شخصيه هاديه بس المواقف الصعبه تبين قوتها
السبت 6\45صباحا
.....ساره ساره ساره سسسسسسسسساره
...عمى وش فيك فجرتي اذني
....احسن لي ساعه اقومك
.....خير وش تبين؟
....سلامتك مافيه شي مهم بس الساعه قربت على السبع وانتي نايمه قومي ياماما
....يوه متى تخلص هالامتحانات وتجي العطله وانام على كيفي
....هانت مابقى الاهالاسبوع وتفتكين وتنامين على كيفك الحين قومي سلمان وابوي يستنونك
في مكان ليس ببعيد
....اخيرا قمت ..انا ابي اعرف متى تصير رجال وتقوم لحالك
...نايف الله يرحم والديك اتركني بحالي
نايف ..طيب قم ترى راح عليك الوقت انا طالع خالد يستناني برى
نواف ...زين يالله قمت
نايف ..يالله سلام
نواف ..سلام
نايف ونواف شخصيات رئيسيه في قصتنا
نايف الاخ الكبير عمره 29انسان عصامي وجدي كون نفسه بنفسه وهبه الله الذكاء والجمال والشخصيه القويه والمركز المرموق يمتاز بطوله وجسمه الرياضي والشعر الكثيف والنظره الحاده
نواف الاخ الاصغر عمره 22سنه انسان يظهر على شخصيته الاستهتار لكن يضمر في داخله انسان قوي صاحب موقف معروف بمرحه جماله يتعدى الوصف متوسط الطول يمتلك عيونه كحيله دائما مبتسم وبشره سمراوانف كالسيف يمتاز بابتسامته الرائعه سريع الغضب لكن طيب القلب وبسرعه يتبخر غضبه......
نايف ونواف ساكنين بالرياض بحكم وظايفهم ومستاجرين شقه والدتهم متوفيه من سبع سنوات بسبب مرض
ووالدهم ساكن برى الرياض متزوج وحده غير امهم وله منها 3بنات وولدين
ولهم اخت من امهم وابوهم لطيفه عمرها 25سنه متزوجه وساكنه في الرياض
عندها ولد واحد عمره 5سنوات جابته بعد علاج 4سنوات واحتمال ماتنجب غيره
خوفها بس زوجها يتزوج عليها
.................................................. .................................................. ............
يوم الثلاثاء الساعه 11ونص الظهر في احد الشركات الكبيره
جالس على مكتبه الفخم ومقابله صديق عمره خالد
خالد...انت ماتقولي لمتى وانت كذا لازواج ولاشي
نايف ...لاحق على الهم اللحين خلني اكون نفسي واشوف وش يصير على نواف
خالد ...نواف؟؟؟ وش بيصير عليه ماشالله عليه موظف مو ناقصه شي
نايف... بس مادري يعني صعبه اتزوج واجيبه عندي وصعبه اخليه لحاله
خالد ...ليش صعبه تخليه لحاله انت قعدت 4سنوات ماعندك احد
نايف .... والله مادري انا للحين افكر كيف باتصرف معه
خالد ..توكل على الله يانايف انت مانت صغير ونواف سنه سنتين ويتزوج
نايف .. ...ان شالله بس مو نواف السبب الوحيد
خالد صديق نايف وزميله في العمل يعتبره اخو له كبر نايف متزوج وله ولد عمره سنتين
.................................................. .....................................
الاربعاء الساعه 10ونص الصباح
اخيرا خلصت
سلمان... الحمدلله ارتحنا من حالة الاضطراب الي مسببتها بالبيت
نوف ...انت ماتقول لي انت ليه حاقد علي
سلمان ...غيران منك يا فلتت زمانك
نوف ...اكيد غيران بكره بكمل دراستي بصير شي ثاني
هجوم كاسح على المكان وازعاج وصراخ
.....نويفه اخيرا خلصتي مابغيتي
نوف ....هههههههههه انت ماتعرفين تدخلين بركاده؟
ساره.... اسفه ماعرف ,,,,,الاماقلتي لي متى تطلع نتيجتك على الله بس ماتفشلينا وتجيبين نسبه تفشل مثل العاده
نوف ....لا ان شالله راح اجيب نسبه زينه وسواد الوجه مخليته لك الي كل سنه تنجحين بالدز
قبل لاتهجم ساره بالكلام
سلمان ... لاعاد كل اش ولا سارونه اختي حبيبتي لاحد يتكلم عليها هي حره تنجح ترسب ماحد يناقشها
ساره بعد مالانت ملامحها وابتسمت ابتسامة شكر لاخوها الكبير
ساره ..ياعمري ياخوي فديت عمرك ماحد عارف قيمتي غيرك ....التفت على نوف ..بعدين مخلين النحاح لك يالمصريه
نوف ...مصريه بعينك يالفاشله
وابتدت حرب الكلمات الى رح تتحول الى حرب المخدات بعدين الى شي اخر
نتركهم في حربهم الطاحنه ولكن مو قبل لانعرفكم على سلمان
سلمان الاخ الكبير لساره ونوف عمره 26سنه انسان هادي وجميل يشتغل برى الرياض ومملك على بنت عمه نوره
في نفس الوقت وفي مكان ثاني
...فهد الله يخليك ساعه ا ترجاك ماكأني اختك
فهد ...والله انا ماقلت لك ترجيني و للسوق ماوديك
بدت علامات الغيض تظهر على وجهها البرئ
...تدري الشرهه على الي معطيك وجه ويترجاك
كأنه اعجبه الوضع يحب قبل لاينفذ لها أي طلب يلعب باعصابها لكن ابدا ماتهون عليه
فهد ....طيب نواره وش رايك تدقين على سلمان تطلبين منه يوديك للسوق
اجتمعت على وجهها علامات الحياء والغضب
نوره ...فهيد انت هوايتك تنزفزني اقولك ودني السوق تقول دقي على مدري من يوديك للسوق
فهد .... ههههههههههههههههه مدري منه ؟ اول مره اعرف واحد بهالاسم
نوره .. خلاص ماعاد ابي منك شي كثر الله خيرك
توجهت لباب غرفته ناويه تجمع خجلها الي غطته بوشاح من الغضب وتطلع من الغرفه
لكن يد اخوها كانت اقرب ليدها ومسكها
فهد ... امزح معك يالخبله انتي تهونين علي تدقين على مدري من وانا موجود
حست ان كلمات اخوها بخرت كل الي فيها
نوره ...الله يخليك لي ياخوي
فهد .. اقول بسرعه لاتكثرين الهرج البسي وان تاخرتي باروح واخليك وانتي عاد كيفك تروحين بتكسي ولا تدقين على سل
ماكمل كلامه الانوره برى غرفته حتى لاتتعرض لكم تعليق من اخوها الكبير
فهد شاب خلوق مملوح مع ان ملامحه عاديه ولد عم سلمان وصديقه ونسيبه عمره 26
نوره بنت حبوبه بس اكثر صفه تمتاز فيها الحيا جميله بمعنى الكلمه عمرها 20وهي خطيبة سلمان
اكثر انسان تعشقه اخوها فهد وهو الي اقنعها بسلمان ابوهم متوفي وهم صغار
والي ربتهم امهم وطبعا عمهم ابو سلمان ماكان يقصر عنهم بشي
بعد عشر ايام
....الحمد لك يارب ماخيبت تعبي واستجبت دعاي
....الف مبروك يابنتي عقبال ان شالله الزوج الصالح يارب
..يارب يبه الله يسمع منك وتزوج واتوسع بالغرفه
احمر وجه نوف ليس من الحيا ولكن من الغيض
نوف ...سويره انتي ماتخلين اللقافه عنك وبعدين اشدراك يمكن تتزوجين قبلي وانا الي اتوسع بالغرفه
ساره وهي تأشر بيدها بمعنى النفي
ساره .. لا ياحبي انا بكمل دراستي واكون نفسي وبعدين افكر اتزوج
نوف ...هههههههههه والله ضحكتيني من الي بتكمل دراستها ,,,وهي تاشر بيدها عليها من فوق لتحت ,,,,لايكون انتي ؟
ساره اغتاضت منها نوف هاديه ولاتتقن فن الاستفزاز
ساره ...نويفه لاترفعين ظغطي ترى مانتي قدي
نوف رمقتها بنظرة عدم الاهتمام وجت بتطلع من المكان
........نوف ........
التفت لمصدر الصوت وهي تكتم ضحكتها ......نعم
ساره .... انا ماقلت لك مبروك؟
نوف اعلنت ابتسامتها وبدت خطوتها تجرها لاختها ببطئ
هزت راسها بالنفي
بينما ساره اسرعت اليها الخطوه
ساره .....مبروك يالمصريه
قربن لبعض تعانق بالايدي ثم الاجساد ثم الارواح
نوف ...الله يبارك فيك
ساره ..عقبال الرجال السنافي الي في بالي
كانت تقصد شي وصل نوف وكانت تقصد ترسم ابتسامه على شفاة تؤام روحها
لكن بدت الدموع تلمع في عيونهاالواسعه وتعاندها لتتدحرج على خدها الناعم
ساره ارتسمت على وجهها نظرة استفسار
نوف ..تدرين ياساره انتي قلتي هالكلام وابوي قاله قبلك ...
لحظة صمت اوبالاحرى مقاومه لدمعه تجاهد حتى تتبع اختها
كملت ...بس باقي انسان ادفع كل عمري واسمعها من فمه او على الاقل اشوفها بعيونه
صمت ساد المكان
ساره .....اااااااااامي ؟؟؟؟؟؟؟؟
نزلت نوف راسه للارض واعلنت دموعها الانتصار على هدبها
وبدت الدموع تغزو وجنتها البرونزيه
نتركهم يفرغون الحزن المكبوت داخلهم
.................................................. .................................................. ..........................
.....هاه وش قلتي يام فهد
ام فهد ...والله يابو سلمان الولد ولدك والبنت بنتك انت تفصل وحنا نلبس
ابوسلمان ....يام فهد اذا البنت جاهزه خلاص ليش التاجيل
ام فهد ..البنت جاهزه لكن بناديها لك تسئلها
ابو سلمان ..لايام فهد نوره لو باسئلها بتضيع علومها بنت اخوي واعرفها ماتنسئل
ام فهد.. خلاص يابو سلمان انا اشاور البنت والي نتفق عليه بقوله لفهد يوصله لسلمان
ابو سلمان ..اجل الله يكتب الي به الخير
ام فهد ...آمين
ابو سلمان ..يالله في امان الله
ام فهد ..مع السلامه
سكرت منه وكانت تناظر بنتها الي ملتهيه بجوالها وظلت تراقبها حتى انهت مكالمتها
ام فهد ..انتي ماتهدين الجوال ابدا؟
نوره ..يمه انتي تدرين جديد ومستانسه عليه
ام فهد...الله يهدي اخوك مدلعك مدري ليه هالجوال
نوره ..الله يخليه لي واشوفه عريس واشوف عياله وازوجهم واشوف عيالهم وافر.................
قاطعتها امها ..بس بس خلينا من اخوك الحين بتفرغ له بعدين اللحين بكلمك بموضوع ثاني
نوره ...خير يمه
ام فهد وهي تشرب القهوه
ام فهد ....نوره انتي تدرين من الي كلمني قبل شوي
نوره ..لا من يمه ؟
ام فهد ببتسامه ..عمك ابو سلمان
نوره حست باظطراب بجسمها ورعشه تحولت الى مغص كأنها فهمت وش السالفه
نوره ...خييييير وش عنده عمي ؟
ام فهد ..نوره انتي عارفه عمك وش يبي وماله داعي اقولك
نوره... يمه الله يخليك اجلوها لبعد العيد
ام فهد ...ليش يابنتي ؟ الرجال اجل بما فيه الكفايه واظن خلاص مابقى لنا عذر
نوره ..بس يمه
ام فهد ...لابس ولاغيره الناس كثر الله خيرهم اصبرو علينا ومانبي نزودها معاهم ولهم حق يحددون العرس باي وقت
نوره ....خلاص يمه الي تشوفونه
ام فهد ...الله يوفقك والخوف الي داخلك شيليه سلمان رجال وماعليه
تركت نوره امها وتوجهت لغرفتها حتى تنفرد بنفسها
بنفس اليوم الساعه 8مساء
جالس بشقته ينتظر اخوه على العشا
دقايق دخل عليه وهو يشمر عن ذراعه
..شوي شوي الاكل ماهو طاير
عارف ماهو طاير بس بتعشى بسرعه وراي صياعه مع الشباب
يقلده... وراي صياعه مع الشباب ماتستحي انت ؟
بكل برود ,,,,,لا.........
نواف ترى السهر وملاحق بنات الناس بيضيعك ولاتنسى انت عندك خوات
نواف ...نايف ياخوي لاتخاف على اخوك ماعشت الي تضيعه انا صحيح اسهر بس مالي بملاحق البنات ماهي هوايتي
نايف ...اتمنى... الله يهديك
في هاللحظه يدق الجرس
نواف وهو مندمج بالاكل من هذا الي حماته بتحبه
نايف ..قم وشف من الي حماته بتحبه عل قولتك
قام نواف وهو رافع يدينه المليانه بالدسم فتح الباب
كان وراه مره ومعاها طفل عمره 5سنوات على طول انحنى عليه وشاله
هلا والله بريان والتفت للمره.. وام ريان
......هيه انت... وسخت ملابس ولدي
نزل الولد
نواف ....آسف آسف مانتبهت
والتفت لاخته ...وهو يضمها هلاهلا باختي حبيبتي
لطيفه ....نواف ابعد عني وسختني الله يقطع ابليسك
نايف ...اتركها يانواف ,,,حيالله ام ريان تفضلي
لطيفه ....هلابك ياخوي وشلونك
نايف وهو يقوم لها
نايف ... الحمدلله تمام ...حيالله خالي
ركض ريان لخاله الي كان فاتح يدينه له وضمه بقوه
لطيفه ...ذبحت ولدي وبعدين يوم انك تحب الاطفال ليه ماتتزوج اتضم عيالك بدال مانت ذابح ولدي
نايف ....عن قريب ان شالله
نواف ...لاوالله وانا وين رحت ماتزوجونه الاانا معه
لطيفه...وانت على طول قاط وجهك انت صغير على الهم
نواف ..انتم بس زوجوني وانا راضي بالهم
نايف ....اقول نواف وش رايك تروح لشغلك الي وراك
نواف...اي والله انك صادق وراي هياته
لطيفه ...اي والله رح لربعك ترى الصياعه ماتحلى بدونك
نواف ....تسلم لي اختي الي عارفه قيمتي,,,, وقام يضمها من جديد
نايف ....هههههههههههههههه حسبي الله على ابليس بتحرم تجينا والسبه انت
لطيفه ...نواف اتركني ولا مازوجك
نواف ....لا لا الا العرس تكفين يالله انا رايح لخوياي.
لطيفه ...نواف انا مالحق اشوفك من اجي تروح انت
نواف ...وش اسوي اشغالي لفوق راسي
نايف ...الله والاشغال الله يسمعك يقول وزير
نواف ...يعني ماينشغل الاالوزير ؟..اروح لشغلي احسن لي
نايف ...تسوي خير
نواف ...مع السلامه
الطيفه ...في حفظ الرحمن
طلع نواف وترك نايف ولطيفه ليبدو حوارهم المعتاد
.................................................. .................................................. ....................
ثاني يوم في احد المقاهي
...انت تتكلم من جد يافهد
فهد ...وليش اكذب عليك
سلمان.... محشوم بس ماني مصدق اخيرا وافقت على تحديد يوم الزواج
فهد ...هل المره الوالده تدخلت
سكت سلمان ونزل راسه مده وبعدين رفع راسه
....فهد
فهد ...سم
سلمان ....نوره مغصوبه علي؟؟
استغرب فهد من كلام سلمان
فهد ...ليش تقول هالكلام ؟؟
سلمان ...فهد لما كانت نوره تاجل الزواج كنت احيانا افكر انها ماتبي الزواج يتم
فهد ....مافي شي يخلينا نجبرها عليك اوعلى غيرك
سلمان ...احيانا اخاف يكون موافقتكم علي نوع من رد الجميل لابوي
فهد بدون تردد ...لا لا ياسلمان مواحنا الي نجبر بنتنا على رجال ماتبيه ولاهو انت الي الرجال الي ينرفض
سلمان ...طيب ليش سنتين وهي تاجل الزواج وماخلت بينا أي اتصال وترفض تكلمني او تقابلني
فهد ...سلمان نوره من النوع المتردد الخواف واكثر من كذا نوره خجوله لابعد حد يعني التاجيل بس عشان كذا
سلمان..متاكد يا فهد ؟؟
فهد ..افا ياولد عمي يعتي ماتثق فيني بعدين انت غلاتك مثل غلاة نوره ولايمكن ارضى عليك تتزوج وحده رافضتك علشان عيب تشوفه فيك
سلمان ...طمنتني الله يطمنك ويرزقك ببنت الحلال الي تسعدك
فهد...آمين ..واللحين يالله انا بروح بكره وراي دوام وانت روح بلغ الاهل وسو تجهيزات العرس
سلمان ...يالله في امان الله
فهد ..في امان الله
وتفرق الاثنين وهم يحملون فرحه لاتوصف فهد لانه قدر يبدد الحيره الي كانت ساكنه ولد عمه وصديقه وفرحه لاخته الي رزقهاالله برجال يستحقها
وسلمان فرحته لاتوصف ان الله اراد يقرب اجتماعه بالانسانه الي تستحوذ مكان كبير داخله
ولان همه الي كان يثقله انزاح مع كلام فهد
الف الصلاة والسلام عليك ياحبيب الله محمد ككككككككلللللللللووووووووشششششش
ههههههههههه لا لالا مانتي صاحيه
ليش ان شالله ماني صاحيه؟ فرحانه بعرس اخوي بعدين مخليه العقل لك
.... بدري على العرس بعد شهر و بدال هالهبال خلينا نشوف وش نسوي
ساره ....اي والله صادقه ماعاد يمدينا لازام من اليوم نبدا الدواره بالاسواق
نوف ...انا قلت لسلمان يودينا بعد العشا
ساره ...وامي ؟؟؟؟؟
نوف ....تطمني بتجي خالتي وتجلس عندها لحد مانجي
ساره ...نوف لمتى بنسكت على حالة امي لها اكثر من اربع سنين على هالحال
نوف ...الله يشفيها الصدمه هزتها الى جاها ماهو قليل
ساره ...امين يارب تتخيلين يجي يوم تفتح لي امي يديها وتضمني؟
نوف ....الله كريم ادعي لها ياساره
.................................................. ....................................
...انا اليوم كلمته بالموضوع وقال دوري لي
...توكلي على الله و دوري له قبل لايغير رايه
...الله يهداه بس كن الدنيا وقفت على هالبنت
....قولي ان شالله ان الله يرزقه ببنت الحلال الي تنسيه اياها
...آمين
...السلام عليكم
...عليكم السلام ياهلاوالله بوليدي
...هلابك يمه
...وشلونك ياناصر ؟
.ناصر ...بخير يبه
ابو ناصر ...انت معزم ياولدي
فهم قصد ابوه لان هو الحديث المتداول بينهم
ناصر ...ان شالله يبه
ابو ناصر ...اسمع ياولدي ترى بنات الناس ماهي لعبه لاتظلمهم بشي مالهم ذنب فيه والي ماترضاه لاهلك لاترضاه لناس
ام ناصر ...ناصر ياولدي لاتحرق قلبي عليك وخلني افرح وانا رايحه اخطب لك
ناصر ...افرحي يام ناصر ماهو ناصر الي يحرمك الفرحه وهو يقدر عليها
ام ناصر ...انت تدري ان فرحتي يوم اشوفك مبسوط واشوف عيالك حولك
حب راسها ,,,,ناصر ....بتشوفينهم ان شالله
ابو ناصر ...اجل نتوكل على الله وندور
ناصر ....توكل على الله
ناصر ...شخصيه جديد في قصتنا .شاب وسيم من عائله ميسورة الحال وحيد امه وابوه عمره 29سنه كان ميال لبنت خالته لما خطبها رفضوه اهلها لانها محيره لولد عمها وقعد فتره رافض فكرة الزواج انسان غامض
بعد صلاة العشاء
...يالله ياساره سلمان ينتظرنا بالسياره
ساره ...يالله يالله نزلت
طلعو وهم قدام الباب مدت نوف يدها لباب تفتحه كانت ساره موطيه تزين ربط الصندل
نوف ...يالله خلصينا بيروح سلمان ويخلينا
ساره وهي ترفع جسمها وتنزل البرقع على وجههها ....ترى ازعجتيني سلمان سلمان يالله امشي قدامي ودفعتها بقوه حتى تطلع مع الباب الي كان مفتوح وبحكم نحفها ماتملكت نفسها وضربت بباب السياره الي كانت مقابله الباب مباشره
نوف ...حسبي الله على ابليسك يالدبه
ساره ...هههههههههههههههه اقول بس قدامي يالعصلا
نوف كانت بترد لكن انتبهت للرجال الي كان واقف مع سلمان ويخفي ابتسامته
هالنظره ماهي غريبه عليها تعرفها عز المعرفه وجه من زمان ماشافته كانت تحس بشعور ماتعرفه غض النظر عنها
...يالله انا استئذن ياسلمان
.سلمان ...اذنك معك وخلنا نشوفك
.....ان شالله... يالله سلام
سلمان ..مع السلامه
توجه سلمان لسيارة وهو الثاني توجه لسيارة وركبها وحركها وعيون نوف تتبعها
ركب سلمان السياره وانطلق الى مشواره
 | | |
 | |
30 - 12 - 2014, 07:25 AM
|
#3 |
|
30 - 12 - 2014, 02:45 PM
|
#4 |
|
30 - 12 - 2014, 02:48 PM
|
#5 |
|
30 - 12 - 2014, 02:51 PM
|
#6 |
|
30 - 12 - 2014, 02:53 PM
|
#7 |
| | | عضويتي
» 2730 | | جيت فيذا
» 23 - 12 - 2012 | آخر حضور
» 28 - 1 - 2018 (10:26 AM) |
فترةالاقامة »
4133يوم
| مواضيعي » 7626 | | الردود » 27690 | | عدد المشاركات » 35,316 | | نقاط التقييم » 3126 |
ابحث عن » مواضيعي ❤
ردودي | تلقيت إعجاب » 1 | الاعجابات المرسلة » 30 |
المستوى » $95 []
|
حاليآ في » | | دولتي الحبيبه » | | جنسي » | | العمر »
سنة
| | الحالة الاجتماعية » | | مشروبى المفضل » | الشوكولاته المفضله » | | قناتك المفضلة » | | ناديك المفضل » | سيارتي المفضله » | |
رد: ليه عمري مالقى لبرده دفى الا دفاكي للكاتبه ذكرى نجديه
في بيت ام سلطان
انتي تدرين اني ادور زوجه لناصر بزواج سلمان اعجبتني بنت اختك
....نوف ؟؟؟
.....ايه نوف ماشالله عليها شيخة البنات ابيك تتحددين لي موعد من اهلها نابي نزورهم
....ابشري بس لو تاجلينه كم يوم
....ليه ناجله
...ابو سلمان تعبان وتنوم بالمستشفى وانا اقول اجليها كم يوم
...ان شالله مايشوف شر خلاص ناخرها حتى يطيب ابوها
...الله يتمم على خير
.................................................. ......................
في بيت ابو سلمان
كانت نوره ونوف بالمطبخ يجهزون العشا
نوف ...نوره روحي ارتاحي انتي عروس مايصير تتعبين
نوره ...انا بخلص الي بيدي واطلع واخليك تحوسين لحالك
نوف ...انا اللحين ادور راحتك وانتي تبين تعبيني صدق مالك امان
نوره ...انتي قلتي اني عروس ولازام ارتاح واخلي الكرف للعوانس
نوف ...اقول نويره ترى موب بس انتي بس الي اعرستي يمكن اتزوج عن قريب واتدلع مثلك
دخلت عليهم ساره ....لكم ساعتين بالمطبح ماخلص البعير ذبحنا الجوع
نوره ...ليه خدم عندك ؟؟
ساره ...لا بس مسويا ت فالحات وانتن الله اعلم
نوف ...ادخلي ورينا ابداعك
ساره ببرود...انا ماطبخ انا بس اكل
في هاللحظه كان سلمان راجع من صلاة العشا
..وش عندكن صوتكن واصل لبرى
نوف ..اختك المدلعه تبينا نطبخ لها وهي تاكل
سلمان ...وانتي ليه ماتساعدينهم ؟
ساره ...انا ساره بنت محمد اطبخ ؟؟؟
سلمان ...وليه ان شالله ماتطبخين ؟؟
ساره ...لاني لايق علي الدلال والراحه
نوره ...واحنا الي لايق علينا التعب؟؟
قبل لاترد ساره
سلمان ...وانتي وش تسوين ..؟؟؟؟
نوره ...صلحت عشا لعمي
سلمان ..خلصتي ؟؟؟
نوره ...ايه
تقدم لها سلمان ومسك يدها وهو طالع ...تعالي ابيك
ساره ..وين .؟؟؟؟؟
سلمان ...وش دخلك يالملقوفه
ساره ..الباب
سلمان ...هههه ضحكتيني
ساره وهي تمشي بسرعه ...سلوم لاتطنز .....طرااااااااااااخ زحلقت ساره وطاحت على ظهرها
هههههههههههههههههههههههههههههههههههههههههتعورتي ههههههههههههههههههههههههههههههههههههههههههههههه
...هين يا نويره تضحكين على
والله شكلك يضحك هههههههههههههههههههههههبس عسى ماتعورتي
ساره بعد ماتغيرت ملامحها من الم الطيحه ...لا ماتعور
نوره ...ههههههههههههههههههههههههههههههههههههههههههههههه هههههههههههه
سلمان ...تدرين احسن شي سويتيه انك طحتي
ساره ...ليه ان شالله
سلمان وهو يقومها... خليتي نوره تضحك وتستانس
ساره بغيض ..لاوالله صرت مضكحه لمرتك
نوف ...خلاص ياسلمان توكل على الله ورح اذا بتبتدي انت وياها ماراح تنتهون
سلمان ...على رايك
اخذ نوره وراحو لغرفتهم
.................................................. .................
في شقة نايف
كان في حيره وامرين اسهلهم صعب
ان سكت ساعد لطيفه على اتمام خطتها
وان تكلم هز صورة اخته في عين نايف ونايف شخص صعب ان جرحه يطيب
وفي عز تفكيره
التفت له اخوه الي كان يتابع برنامج معروض على التلفزيون
شافه يناظر للفراغ وكان فيه شي منكد عليه
نايف ...الي ماخذ عقلك
انتبه لصوت اخوه وابتسم ابتسامه بارده
نواف ..ابد ياخوي افكر بهالدنيا
نايف ...وش الي مضايقك يانواف ؟؟لك يومين متغير وانا كنت ملاحظ لكن كنت استناك تفتح لي قلبك
نواف ...سلامتك لاتشغل بالك فيني بس متضايق شوي
نايف ...نواف انت اخوي واعرفك زين فيه شي متعبك افتح لي قلبك وانا اخوك
نواف ....اه يانايف وش كثر صعب انك تنصدم بغالي تعتقد انه احن عليك من نفسك وتكتشف انه يتأمر عليك
نايف ...وليه ومن الي انصدمت فيه ؟؟
نواف ....لاتهتم هذا واحد وثقت فيه وعرفت انه ماهو قد الثقه يالله ماحد يتعلم بلاش
نايف ...على رايك حتى تتعلم من يستاهل تعطيه ثقتك
نواف كان يناجي نفسه >> اه بس لوتدري من الي يخطط عشان يحرمك من البنت الي انفتح قلبك لها
انتبه لنفسه
نواف ....ماعلينا من هالكلام انت ماودك تتزوج ؟؟؟
نايف ...صراحه انا حطيت عيني على وحده وماصار نصيب بس لطيفه قالت على وحده وبفكر فيها
نواف ....ماشاالله تخططون وانا اخر من يعلم
نايف ....كله كلام وتفكير ماصار منه شي
نواف ...ومن البنت الي كنت حاط عينك عليها ؟؟؟
نايف .. بنت عمي محمد
نواف ....ساره ؟؟؟؟؟؟
نايف ....اسم الله الرحمن الرحيم وش فيك اخترعت ساره صغيره لا نوف
نواف ....اشوى
ابتسم نايف ...وانت وش يضايقك اذا كانت ساره
نواف ....بصراحه انا ابي ساره
نايف ....من جد ؟؟؟
نواف ...من جدين بس استناك تتزوج واخطبها
نايف ....نواف انت صغير
نواف ...انا الحمد لله ماناقصني شي وانت بتتزوج وانا وش اسوي
نايف ....انا ماقدر اقولك الافكر واذا علي انا بفكر بالبنت الي رشحتها لطيفه
نواف ....ومن الي رشحتها لطيفه ان شالله ؟
نايف ....نوال بنت خالتي
نواف بعصيه ...انت مجنون تتزوج هذي
نايف ....وش فيك عصبت لاتكون حاط عينك عليها بعد
نواف وهو يحرك اصبعه ويتجه لاخوه ....اسمع يا نايف لو تنطبق السما على الاراض ماتتزوج نوال واليوم الي تكون نوال زوجتك انا غريب عنك
عجزه الكلام وماعرف وش يقول اكثر من انه يعترض
طلع من البيت مثل المجنون وترك اخوه xxxxx بحاله مستغرب من تغيير حاله والافكار توديه وتجيبه
لكن لان نوال ماتعنى له أي شي ماكان خايف انه يخسرها
.................................................. .................................................. ...................................
في غرفة سلمان وبعد ماخذ نوره وتعشو برى
سلمان ...عسى استانستي بالطلعه؟؟
نوره ....الحمدلله
سلمان كان ينتظر تعبير ابلغ وردة فعل اسخن من كذا او حتى كلمة شكر أي شي غير هالفتور المبالغ فيه
كان يتمنى يكسر الحاجز الي بناه خجلها المتعدي لحدود المعقول
لكن عنده امل ان العشره تولد الحب والحب كفيل انه يكسر كل الحواجز
طلع من الغرفه وتركها
.................................................. .
في جهه ثانيه من البيت كانت نوف تجهز نفسها لمقابله بالجامعه الصباح وفي عز اندماجها انتبهت لصوت جوالها رفعت جوالها الي كان مرمي على سريرها وابتسمت ابتسامه عريضه للرقم
...هلا والله ام ريان
لطيفه ...السلام عليكم
نوف ....وعليكم السلام
لطيفه ...وش اخبارك نوف ...
نوف ...الحمدلله بخير
لطيفه ...وش اخبارعمي ان شالله صحته زينه
نوف ....الحمدلله صحته تحسنت
لطيفه ....كان ودي ازوركم واتطمن عليه بنفسي بس انشغلت اشوي
نوف .....مالك عذر وش هالشغل الي يمنعك تزوينا لو ساعه
لطيفه ...والله صادقه بس الله يهداه نايف موكلني ادور له عروس من قبل مرض عمي واجلناها علشانه والحين رجع يحن علي
كانت لطيفه تقول هالكلام ونوف تسمع وكآنها بحلم والثانيه تجر الكلام حتى تستمع بجرحها لان نوف انسانه مكشوفه ولطيفه عارفه انها مياله لنايف
لطيفه ...اشوفك ساكته مافيه مبروك
استجمت مابقى لها من قوه ..اذا لقيتي العروس ابارك لي
لطيفه ,....ابشرك لقينها
نوف ودموعها الحاره مثل النهر الهادى على خدها الصافي وهي تكتم شهقتها بكل ماعطاها الله من قوه
نوف ....مبروك ان شالله الله يوفقهم
ردت لطيفه بنبره شامته ...الله يبارك فيك وعقبالك ان شا الله
نوف ...ان شالله
لطيفه ..زين يالله مابي اطول عليك سلمي على ساره
نوف ....الله يسلمك
لطيفه ....مع السلامه
نوف ....مع السلامه
انهت المكالمه ورمت الجوال على السرير
ورمت جسمها الصغير على الاراض وحطت راسها الي نزل عليه الخبر مثل الصاعقه بين يديها
وعطت نفسها الحق انها تبكي على حب اوهمت نفسها فيه حب مايقبله العقل لكن القلب اقتنع فيه
رجع سلمان لغرفته بعد ماجلس مع ابوه شاف نوره نايمه وتوجه للحمام <وانتم بكرامه >
وغير ملابسه ودخل بفراشه بهدؤ ونام
نوف الى الان في غرفتها دخلت عليها ساره ومانتبهت لها
ساره ....جسمي متكسر وفيني نوم قاعده من الصبح ولانمت
تنتظر تعليق من نوف مثل ماعودتها
.
اسرعت لها ...نوف وش فيك
كانت تسمع صوت شهقاتها الي تدل انها مجروحه
نزلت لمستواها وبصوت عالي ....نوف ردي علي
لكن ردها واحد
رفعت راسها ....تكفين خوفتيني قولي لي وش صاير
هالمره رمت نفسها بحضن اختها يمكن تستضل من الحريق الي تشعر فيه لكن كيف والنار تتسعربين ضلوعها
ساره ....الله يخليك ردي علي
نوف من وسط شهقاتها ... سوتها ياساره سوتها
ساره بنفاذ صبر .....نوف فهميني من الي سوتها وش سوت
نوف ..لطيييييييفه
ساره ...لطيفه؟؟؟وش سوت ؟؟؟
تنتظر الجواب وهي خايفه ان الي تتوقعه صار ساعتها نوف بتتحطم وهي انسانه حساسه أي شي يجرحها
نوف ..........اخطبت له وبتزوجه تركني تركني وانا طول عمري اتمناه هو حلمي الي اتمنى انه يتحقق
ساره حطت يدها على فمها تحس باختها ومع انها كانت تعارضها الا انها كانت تتمنى ان هالحلم يكون حقيقه وان الله يجمعها بالانسان الي حبته لكن يبقى نصيب وماحد يعلم الغيب والي الله كاتب له
كانت تبكي بحراره ...حذرتك يانوف حذرتك لكن ماطعتيني انعميتي وصرتي تشوفين بقلبك
نوف ...ساره الي فيني كافيني اتركيني بهمي
مسكت يد اختها بقوه لعلها تقاسمها همها وتشيل عنها ولو بعض العذاب
كانت الدموع سيدة الموقف تمردت على العيون وابكتها وانتصرت على القلوب وادمتها
استجمعت قوتها احبت تفول الكلام الي لازام ينقال ماكانت احسن من حال اختها لكن هذا الي تقدر تسويه
.........نوف حبيتي البكى ماينفع ولايغير قسمتنا وصدقيني الي صار لك والي راح يصير لك هذا هو قسمتك و يمكن الله كاتب لك احسن منه
نوف وجهها مليان دموع وكانت حالتها تقطع القلب
نوف ...ياليتني طعتك وغالطت نفسي ياليت, ونزلت راسها بين رجليها
ساره ...هذا الي صار والي فات مات انسي ترى الدنيا مدرسه فيها الصعب وفيها السهل لكن الشاطر الي يقدر يتغلب على الصعب قبل السهل
رفعت راسها لاختها وحطت يدها بيدها
نوف بهدؤ ودموعها مثل السيل ...ساره
كانت تنأمل الحزن بعيونها وقلبها يتقطع عليها ...امريني
نوف بصوت مرتجف .....لاتتركيني انا مالي غيرك بعد الله
ساره وهي تجاهد دموعها ...وانا مالي غيرك وماراح اتركك
دفنت نفسها بصدر اختها لعلها تلم شتات روحها
ومرت عليهم ليله طولها الحزن
.................................................. .................................................. ..
الساعه 8الصباح
نزل ناصر من فوق وصبح على امه وابوه
ابو ناصر ...بتطلع للشركه
ناصر ...ايه يبه تامرني بشي
ابو ناصر ....ان شالله بعد صلاة العشا بنروح لبيت ابو سلمان
ناصر ...طيب كلمتوهم ؟؟؟
ام ناصر ...ايه كلمت ام سلطان وكلمت سلمان يبلغ ابوه
ناصر ...خلاص توكلنا على الله انا استئذن
ام ناصر وابو ناصر.... بحفظ الله
...............................................
مر على نوف ليل طويل انتهى ليسفر عن صبح كئيب
صعب احساس الخديعه الاستغفال
كانت طول الليل تحاول تنام وساره تراقبها خايفه عليها حتى طلع الصبح حست انها هدت
الساعه 7
ساره ....نوف نوف
نوف بصوت مبحوح ...نعم
ساره ...قومي وراك مقابله
نوف ...ماني قادره احس راسي ثقيل وحيلي مهدود
ساره ...نوف هذا مستقبك لازام ماتضيعينه
نوف ....اقولك ماني قادره
مسكت يدها وحاولت تقومها من السرير ..قومي بلا دلع بتروح عليك المقابله
استسلمت وقامت معها ومشت متوجهه للحمام <الله يكرمكم >
كانت ساره متوجه لباب الغرفه حست ان حركتها توقفت التفت لقتها جالسه على الاراض
مشت ساره لجهتها ...نوف وش فيك
نوف ...مافيني شي بس حسيت بشوية دوخه
ساره ...انادي سلمان ونوديك للمستشفى
نوف ...لالا مابغى اروح لاتخوفين ابوي
ساره ....موافقه بس بشرط
نوف ....وش شرطك
ساره ..اصلح فطور وتفطرين معاي وتصيرين اقوى من الي داخلك مهما كان وترحين للجامعه ترى اذا ضاع مستقبلك ماحد ينفعك
ابتسمت وهزت راسها بالموافقه
.................................................. ....................
في بيت لطيفه
...اقولك قلت لها خطب وبيتزوج
نوال ...ههههههههه الله يقطع ابليسك طيب ماسئلت من العروس ؟؟
لطيفه ...ماسئلت ماعاد تقدر تتكلم
نوال.....والله انك داهيه
لطيفه ..طالعه عليك
نوال ...الا ماقلتي لي وش سويتي مع نواف
لطيفه ...ماعليك منه نواف بزر وبسرعه ينسى
نوال ...الله ياخذه ويريحنا منه
لطيفه بصوت مرتفع .. اسم الله عليه ليش تدعين عليه
نوال ...عشان مايخرب مخططاتنا
لطيفه ..عمر ان شالله ماتمت مخططاتك وياويلك لوتدعين عليه مره ثانيه
نوال ...الي يسمعك وانتي تكلمين مايقول مهزئك من كم يوم
لطيفه ...مالك دخل بيني وبينه
نوال ... خلاص آسفين ماكنت احسب نوافوه غالي عندك
لطيفه ...لا ياشيخه اسمعي يانوال مومعناة اني اجاريك يعني اسمح لك تتمادين على اخواني بكلام اوغيره ؟؟؟؟
نوال ..خلاص الله يخليه لكم ويهزئك كل يوم
لطيفه ...قلت لك مالك شغل واي كلمه بحقه لاعاد تكلميني
قالت هالكلام وسكرت التلفون بوجهها استحملتها لان لها عندها حاجه ولا نوال انسانه حقوده ولاتحب الانفسها
.............................................
ابو سلمان ...وين اختك يا ساره ؟؟ماشفتها على الغدا
....يبه نوف تعبانه ونايمه بغرفتها
....ليش وش فيها ؟؟
....ابد الظاهر نزلة برد بس الحمدلله الحين احسن
...طيب ماراحت للمشتشفى
....لا تقول مايحتاج اخذت دوا وصارات زينه
....الحمدلله ..وانتي بعد مانتي عاجبتني وش فيك ؟؟
..انا يبه مافيني شي بس لاني مانمت زين
دخل سلمان عليهم وسلم
ابو سلمان...وانت ليه ماعاد تجلس بالبيت
سلمان ..عند الشباب استانس خصوصا اجازتي بتخلص واروح للشرقيه وماشوفهم
كان بيروح لغرفته لكن تذكر ....يبه بعد العشا بيجنا ضيوف
ابوسلمان ...منهم ؟؟
سلمان ...ناصر وابوه الي كانو جيرانكم
ابو سلمان ...حياهم الله
سلمان ...تصبحون على خير
ابو سلمان ...وانت بخير
ساره .ساره .ساره
انتبهت ..نعم يبه
...وش فيك يا بنتي ؟؟
...سلامتك يبه
....زين يابنتي قولي لنوف ونوره ورتبو مجلس الرجال وبخروه بيجينا ضيوف
....تامر يبه
.................................................. .................................................. ......
..هاه ياوليدي فكرت بالي قلت لك عليه ؟؟
....يمه ماتفقنا نأجل الموضوع لين نشوف وش يصير مع لطيفه
ام عبدالله ...بس السالفه طولت
عبدالله ..اكيد بتطول هذا علاج
ا م عبدالله ...الى متى وحنا ننتظر والعمر يركض
عبدالله ...يمه يعني كل مازورك تفتحين الموضوع وتضايقني به
ام عبدالله ...انا مابي اضايقك ياوليدي بس انا ابي مصلحتك
عبدالله ..آسف يمه بس صدقيني اذا العلاج مامنه فايده مايصير الا الي يرضيك
ام عبد الله ...الله يرضى عليك ويرزقك
.................................................. ...................
في مجلس ابو سلمان
ابو سلمان ....حيالله ابو ناصر
ابو ناصر ...الله يحييك وشلون صحتك ؟؟؟
ابو سلمان ...الحمد لله احسن وشلونك ياناصر ؟؟
ناصر ...بخير الله يسلمك
بعد حوار عادي دار دخل ابو ناصر بالموضوع
ابو ناصر ...حنا يابو ناصر جايين بحاجه وان شالله تتم
ابو سلمان ...ابشر بالي اقدر عليه وكان حاجتك بيدي قضيتها لك ولاتغلى عليك
ابو ناصر ...نبي نخطب بنتك لولدي ناصر
ابو سلمان ...والله ناصر ماينعيب ولو الامر بيدي عطيتك اياها بس الشور للبنت
ابو ناصر ...حقك وحقها والي تامرون به حنا جاهزين
ابو سلمان ...مثل ماقلت لك انا بشاور البنت وان شالله يصير خير
ابو ناصر ...وحنا ننتظر الرد
كان ناصر مجرد مستمع للكلام وكأن الامر مايخصه
طلع ناصر وابوه على ان يجيهم الرد بعد اسبوع لان ناصر مايحتاج من يسئل عنه لكن مجرد فتره تفكر فيها نوف
ياترى وش تكون ردت فعل نوف عندما يعرض عليها بناء حياه جديده بعد انهيار حياه رسمتها في الخيال
.................................................. .................................................. ............................
...ومتى تسافر ان شالله؟؟
..الاسبوع الجاي مانت ناوي تروح معي
..ماقدر انا مشغول بس ان شالله بزورهم اذا فضيت
..خلاص انا بعتذر لك من ابوي واخواني
..تروح وترجع با السلامه
..الله يسلمك
. كان يجلس على طرف السرير الي احتضن انسانه انساها الهم ان الحياه ليست احزان وان فيها الفرح والسعاده ولوا كبر الهموم ماشعرنا بقيمة السعاده
..اليوم نوف انخطبت يام سلمان
لكن لاحياة لمن تنادي
..نوف كبرت وصارت تنخطب وانتي حرمتيهم منك وحرمتي نفسك منهم
..كانت عيونها تدور تبغى تنطق بشي بس غلبها الحزن وموت الفرحه وبدت تجري دموع من عيونها ماتدري وش سببها
ابو سلمان ...يام سلمان عزت علي نوف ماتحسين بفرحتها وتحس انك معها وانتي حيه
دموعها مثل السيل بدون توقف
ابو سلمان ...يكفي الي ضيعتيه من عمرك واعمارنا كل ماحاولنا ننسى الى راح نشوفك ويتجدد الجرح
كمل ...الحياه حزن وفرح وانتي وقفتي حياتك على الحزن
كان بعيونها كلام ماقدرت تنطقه بس عارفه ومدركه
ابو سلمان ..انتي مالك ذنب هذا يومه وحتى لو مااصريتي عليه يطلع كان بيطلع ويموت هذا يومه
متعب غالي علينا كلنا بس هذي ارادة رب العالمين ومايحق لنا نعترض على حكمه
قال هالكلام ينتظر منها رد لكن ردها لايتغير طلع بهمه وتركها بهمها
ام سلمان كانت تحس بالذنب لانها اصرت عليه يطلع من البيت يقضي لها حاجه
متعب كان شاب مرح عمره 20اصغر من سلمان مثل ماعرفنا من سياق القصه توفى بحادث بعد ماطلبت منه امه يطلع من البيت يقضي لها شغل وام سلمان صابها انهيار عصبي من الصدمه اضافه الى لومها لنفسها كانت تعتقد انها السبب بموته ومن اربع سنوات وهي في عزله تامه حتى الاكل ماتاكل الامجبوره
في مكتب نايف
خالد ....يعني غيرت رايك
نايف ...لابس باخلي الموضوع بعدين
خالد ...الى متى ؟؟
نايف ..مدري بس الحين احس اني ماني قادر افكر والبنت الي قالت لي عليها اختى نواف رافضها
خالد ..نواف ؟؟غريبه مع انه كان اكثر واحد متحمس انك تتزوج
نايف وهو يرمي القلم على المكتب ..وهذا الي مجنني لاهو موافق ولاهو راضي يقول السبب
خالد ..وانت وش رايك
نايف ..مدري بس انا اولا ماكنت مقتنع من الاساس ثانيا ماني مستعد اخسره علشان هالموضوع
.................................................. ........
في بيت ابو سلمان
جالس مع ابوه في المجلس بعد
ابو سلمان ...متى ترجع لشغلك
سلمان ..ان شالله الاسبوع الجاي بروح للشرقيه اخلص شوية اشغال وارجع اداوام بالرياض
ابو سلمان ...وكم بتجلس في الرياض ؟؟
سلمان ..حوالي ست شهور بس شايل هم اذا خلصت هالست شهور وشلون بخليكم واروح هناك
ابو سلمان ....لاتشيل هم حنا ان شا الله ماعلينا خوف
سلمان ..الله كريم ان شالله اقدر انقل هنا ...الايبه ماقلت لي وش عنده ناصر وابوه جايين عندنا من كم يوم؟؟
ابو سلمان ...وهذا الي ناديتك علشان اكلمك فيه واخذ شور قبل مااكلم اختك
سلمان ..خير يبه
ابو سلمان ..ابو ناصر خطب نوف لناصر
سلمان ...والله حسب علمي ناصر رجال ماعليه قصور ونسبه يشرف بس الكلمه الاخيره لنوف
ابو سلمان ..اكيد بس نوف هالكم يوم احسها تعبانه ومشغوله بالتسجيل باستنى كم يوم واكلمها بالموضوع
سلمان ...الي تشوفه
.................................................. ...
كان مركي جسمه على الجدار الي بجنب الباب الداخلي للبيت الفخم ينتظر انه ينفتح له
كان ضايق وكأنه شايل جبل على صدره انتبه للباب الي انفتح
فتحت الباب شابه عمرها 19سنه بانت في عيونها الفرحه بشوفته وهو كان باين من تعابير وجهه مدى شوقه لها
.....نواف حبيبي اشتقت لك ....وضمته بحراره
نواف ...وانا اكثر.. وشلونك؟ وشلونكم كلكم
...كلنا بخير ..انت شلونك ؟
نواف ..انا بخير ..بتدخليني ولاارجع للرياض
....ياعمري انا ماصدقت اشوفك واخليك ترجع ادخل قلي وش اخبارك
كان حاط يده ورا كتفها دخلوا داخل البيت وسكروا الباب ؟؟؟؟
.................................................. .........................
منسدحه على السرير وسارحه بعالم تفكر بالقدر الي خلاها تتعلق بانسان مايدري عنها ولاتشكل اهميه بحياته
وعلى قدر مانصدمت وهزها الخبر الاانها حاولت تكون قويه ولاتفكر بشخص مافكر فيها هذا الي هي مقتنعه فيه لكن كل الزعل والحزن الي تحس فيه غصبا عنها
اخرجها صوت اختها من دوامتها الي تدور فيها من حوالي اسبوع ساره ماكانت تحب تفتح معها الموضوع علشان ماتجدد جروحها لانها هي الوحيده الي عارفه مدى تعلقها بنايف وهي بس الي حاسه فيها
ساره بصوت هادي ..نوف
انتبهت لدمعه تلمح على خدها رفعت راسها ومسحتها ..نعم
ساره ..وشلونك الحين ؟؟
ابتسمت لاختها ابتسامه بارده وكانها تتحدى الالم و حتى تطمنها عليها لانها عارفه مدى خوفها عليها ..الحمدالله اليوم احسن من امس وبكره ان شالله احسن من اليوم كانت تقول هالكلام وهي تجلس على السرير
قربت لها وجلست وحطت يدها على ركبتها ..طيب ليش ماتطلعين اشتقت لسوالفك حتى نوره مشتاقه لك وكل ماجت تدخل تشوفك اطلع لها حجه
نوف ...ان شالله بطلع بس استني على
ساره ...واذا قلت لك ان ابوي قالي خليها تطلع
نوف ...غريبه وش يبي قبل يومين قال بيكلمني بس حس اني تعبانه قال بعدين اقولك
ساره ...طيب روحي شوفي وش يبي
نوف ...خلاص اصلي واروح له
..........................................
لطيفه ...هاه ماقلتي وش رايك
نايف ...ريي بايش
لطيفه ..بايش!! بخطبتك لنوال
نايف ..ماني موافق دوري غيرهاولا اجلي الموضوع مره وحده
لطيفه ...ليش ؟؟؟
نايف ..انتي تدرين من اول اني ماني موافق واللحين نواف معارض
لطيفه ...وانت تطيع هالبزر ؟؟
نايف ...لا يالطيفه نواف ماهو بزر واكيد ورا اعتراضه سبب قوي
لطيفه ...يعني لو تخطب وحده ثانيه يعترض عليها نواف بترفضها
نايف...انا من اول مارتحت لنوال ومتاكد ان نواف عنده سبب
وهم يتكلمون دخل عليهم عبدالله
وبعد ماسلم على نايف
لطيفه ..وين كنت للحين ؟؟
عبدالله ...كنت عند امي اتطمن عليها
لطيفه...وانت كل يوم مقابل هالعجوز؟؟
عبدالله ...العجوز الي تتكلمين عنها هذي امي
لطيفه ..انت ماتمل من مقابل وجهها ؟؟؟
عبدالله بعصبيه ..انا اذا امل من شي امل من اسلوبك وتصرفاتك
لطيفه ...شفت اانت من تجي من عندها ماتتحمل مني ولا كلمه
عبدالله ..لاني ماتحمل أي كلمه تمسها فاهمه ولا لا ؟؟
كانت راح تتكلم كلام ماتفكر بعواقبه لكن سبقها نايف الي ماهو راضي على كلامها ومقدر صبر عبدالله عليها
نابف ..عيب يالطيفه الكلام الي قلتيه احترمي وجودي ووجود زوجك
لطيفه ..حتى انت صرت ضدي يانايف ؟؟؟
نايف ...ماحد ضدك انت الي ضد نفسك وعبد الله ماغلط يوم زار امه ولالك حق تمنعينه عنها
ظل نايف معها مابين يعاتبها ويهديها حتى قدر الى حد ما يخفف من حدة غضبها وشدة زعل زوجها
بعدها استئذن وراح لشقته الي اصبحت موحشه وتفتقد الجو المرح الي كان يخلقه نواف مو من بعد ماسافر لكن كان يلاحظ عليه التغيير من قبل السفر ومقلقه التغيير الي طرئ على اخوه ....
.................................................. ..........
عند نواف ومها >>>
مها ...ماقلت لي وش اخبار نايف
نواف ..الحمد لله تمام كان يفكر بالزواج لكن
وقبل لايكمل كلامه
مها ...ياييييي اخيرا اخوي بيتزوج واصير عمه
نواف وهو يصفق يديه ببعض ...الحمدلله على نعمة العقل خبله هالبنت اقولك كان وانتي على طول تبين تصيرين عمه
مها ...كان ؟؟ليه يعني غير رايه ؟؟
نواف ..اهاه يا مها سالفه طويله اقولها لك بعدين يمكن تشورين على الا ما قلتي لي وين ابوي وام بدر واخواني
مها ..ابوي مسافر وبيرجع بكره الصبح وامي و البنات معزومين على عرس ومشعل فوق نايم
نواف ...وبدر؟
مها ..بدر لاتسئلني عنه مانشوفه يابالجامعه يايذاكر بغرفته ولا مع اخوياه
نواف ...الجامعه ؟؟ليش هو يداوم
مها..ايه ماخذ ترو صيفي
نواف ..الله يوفقه هو ونايف طالعين على ابوي مجتهدين من كانوا صغارمايملون من الدراسه والشغل
مها ..وانا وانت طالعين على الدجه ماعندنا ماعند جدتي
نواف ...الله يوفقنا بعد
مها ..ههههههههههه امين
عائلة ابو نايف شخصيات جديده تلوح في سما قصتنا فضلت تاخير التعريف بهم
ابو نايف رجل اعمال شغله ماخذ كل وقته بس انسان طيب واب حنون
ام بدر شخصيه مهتمه بعلاقتها الاجتماعيه ومظهرها مبعتده شوي عن عيالها لكن صاحبة قلب طيب
بدر طالب جامعي مجتهد ومهتم بدراسته بنفس عمر نواف ملامحه عاديه لكن شاب ماعليه كلام
مها ملح البيت بنت جميله ماخذه من نواف الملامح الحلوه والروح المرحه عمرها 19سنه تدرس في الجامعه بنفس عمر نوف لكن سابقتها بالدراسه لان نوف تاخرت سنه
نجود البنت الثانيه لابو نايف شخصيه هاديه عمرها 17سنه تدرس ثاني ثانوي
مشعل النصف الثاني لنجود قريبين من بعض عمره 14سنه في ثاني متوسط
جود اخر العنقود طفله جميله عمرها 10في رابع ابتدائي
..............
...................................
عند نوف وابوها
ابو سلمان ..وش قلتي يانوف
ارتسمت الصدمه على وجهها الذبلان ولا تدري كيف ترد متفاجئه ومستغربه ليش بهالوقت وبهالظروف؟ ليش انا بالذات ؟واسئله كثيره تدور براسها
ساكته وتنظر للارض وتحاول تستجمع قوتها وتجمع شتات الحروف الي هربت منها عشان ترد على ابوها الي ينتظر ردها ويتمنى موفقتها لكن طال سكوتها
ابو سلمان ..نوف ردي يابنتي
اخيرا رفعت راسها وتكلمت ..مدري يبه فاجئتني
ابو سلمان ..الرجال ينتظر الرد من حوالي عشر ايام وانا وعدتهم اعطيهم الرد بعد اسبوع
نوف ..بس انا بكمل دراستي
ابو سلمان ..ماعنده مانع تكميلين وانتي عنده
نوف .. انا ماعرفه
ابو سلمان .. انتي ماتعرفينه ولاتعرفين غيره بس الرجال ماينعاب وانا اعرفه وسلمان يعرفه ويمدحه ,,كمل بابتسامه الا اذا ماتثقين في ابوك؟؟
نوف ..لايبه انا اثق برايك ومتاكده من خبرتك بالناس
ابو سلمان ..صدقيني يابنيتي لو ماني متاكد من اخلاق الرجال ماكنت كلمتك عنه انا ودي اتطمن عليك انتي واختك بحياتي
بمجرد ماقال هاالكلمه حتى طفرت من عينها دمعه كانت مستعده للنزول ...الله يخليك لنا يبه,, وبعد تردد..خلاص عطني يومين افكر وارد
ابوسلمان ..على خير ان شالله
تركته وراحت تجر خطوتها لداخل البيت لعلها تلقى الراحه عند ساره
.................................................. ..
في بيت ام محمد < بيت نوال >
ام محمد ..ومتى انشالله تنتهي الموأمره الي مسويتها انتي ولطيفه ويجي يخطبك
نوال ..راح الكثير يمه وعن قريب بتشوفين نايف جايك يخطبني
ام نوال ..ياخوفي مايجي وانتي كل يوم تطيرين عريس من يدك
نوال ..صدقيني يمه لو جاي احد احسن من نايف كان وافقت لكن ما فيهم ولا واحد يستاهل اتنازل عن نايف على شانه
ام محمد ..انا سويت الي علي ونصحتك وانتي حره
نوال ..لاتخافين يام محمد بتزوج نايف وساعتها باخذ حقي من لطيفه وادفعها ثمن مذلتي غالي ,,,,,,,,,,,,,,
..............................................
...طيب ليش وش مصلحة نايف ولا وش مصلحتها انها تحرمه من البنت الي بغى يتزوجها
...مصلحتها يتزوج نوال بنت خالتي
..بس مافيه وجه مقارنه بين نوف ونوال
..انا ماعندي مشكله بهذي ولاهذي المهم الي يقتنع فيها ويرتاح لها
..لطيفه غريبه كيف تضحي بسعادة نايف علشان وحده مثل نوال اول ماتاخذ الي تبيه تقطع اليد الي ساعدتها
..طيب قله يانواف حرام بكذبه ينحرم منها
..انا بس ارجع للرياض
..ليش ماقلت له من اول
..لاني خفت من ردة فعله نايف صندوق مقفول على الي داخله وماحد يعرف وشلون يفكر ولا كيف يتعامل مع هالمواقف بس انا قطعت عهد على نفسي حتى لو ماتزوج نوف مايتزوج نوال
..............................................
متكوره على سريرها وسارحه بدنيا ثانيه ما طاب جرحها حتى يحطها ابوها بحيره ماهي قادره تطلع منها
حست بيد على كتفها عرفت انها ساره
ساره ..ما قلتي لي ابوي ليش نادك
التفت لاختها وبصوت هادي ومبحوح ..تخيلي ياساره انا انخطبت !!!
ساره وعلامات الدهشه على وجهها ..انخطبتي ومن الي خطبك ؟؟
نوف ..وهي تنظر لفوق ..تذكرين ام ناصر الي طلبت تشوفنا بزواج سلمان ؟؟
ساره ..ايه وش فيها؟؟
نوف ..يصير ولدها
ساره .. انا كنت حاسه ان وراها شي !!وانتي وش رايك ؟؟
نوف ..xxxxxه انا ماكنت افكر اني اتزوج اللحين الا اذا خطبني ....وسكتت
ساره ..نوف نايف صار ماضي لازام تنسينه
نوف ..ابوي مقتنع ويتمنى اني اوافق ويقول سلمان يعرفه
ساره..سبحان الله ماجا الا هالوقت فكري يانوف يمكن الله ارسله لك عشان تنسين
نوف ..ياليت امي تتكلم عشان تشور علي وتنصحني
ساره ..ابوي ماقصر شار عليك وترك القرار لك
نوف..انا قلت له يعطيني يومين
.................................................. .
اليوم الثاني في بيت ابو نايف كان نواف جالس وابوه واخوانه مجتمعين بعدوماسلم على ابوه واخوانه لانه نام وماكان موجود احد بالبيت الامها
ابونايف ..ليش نايف ماجا معك
نواف ..مشغول ولاقدر يجي
ابو نايف ..الله يوفقه هالولد من صغره شايل نفسه بنفسه
ام بدر ..زوجه يابونايف علشان يستقر ويرتاح
ابو نايف ..كل ماكلمته يقول بعدين
نجود ..اذا تتركه لين يقتنع مايتزوج ابد
نواف ..نايف رافض فكرة الزواج بس انا بغى اتزوج
ابو نايف ..والله انا ماعندي مانع انت رجال موظف وماقدر اقولك لا الزواج حقك حتى لو كنت احس انه بدري شوي عليك
متوقع هالرد لانه عارف ابوه مايعارض هالامور
بدر ..ياخي اشفيك مطيور اخوك اكبر منك ماتزوج وانا كبرك ماقلت زوجوني
نواف ..اقول اكرمنا بسكوتك انت ونظارتك نايف هو مايبي الزواج وانت ولد شاطر ماتبي تتزوج لين تخرج
مها ..ايه انت خلك بدروسك ياحلو وخله يتزوج انا من زمان ابي اصير عمه
نواف ..ترى ازعجتنا من امس معلقه تبي تصير عمه
ابونايف بجديه ..ومن ناوي تخطب
نواف ..ودي اخطب ساره بنت عمي محمد
ام بدر ..والله عرفت تختار البنت ماشالله عليها اذكرها يوم نزلنا للرياض العام ومناسبه لعمرك
مها ..والله مانت بسيط تعرف تختار
ابونايف ..وان بعد ماراح اعارض وابو سلمان يشرف نسبه
نواف ..طيب يبه متى تروح معي للرياض نخطبها ؟؟
ابونايف ..انا كنت ناوي اروح اشوفه بعد ماتعب بس الحين زياره وخطبه
نواف ..الله يطول بعمرك ويخليك لنا
.................................................. ............................
دموعها مثل السيل على خدها وماسكه يد امها حست بدفئها فتحت قلبها وكانها ترمي الحمل الي اثقلها
كانت تبكي بحراره ..شوري علي يمه قولي وش اسوي
مثل عادتها عيونها تدور في الفراغ وكانها تحاول تقول شي
نوف ..يمه الله يخليك لاتخليني انا محتاجتك
كملت ..يمه كلهم قالوا رايهم وانا اتعبني التفكيرعقلي مقتنع لكن قلبي غلبني
كانت ماسكه يد امها وتكلمها لكن مالقت منها الالصمت المخيف
رفعت نفسها عن السرير كانت ناويه تقوم لكن كان شي سحبها للسرير مره ثانيه
ماصدقت نفسها هاذي يد امها جلست مره ثانيه وابتسمت ابتسامة فرح من بين احزانها
نوف ..يمه انتي عندك شي تبين تقولينه قولي يمه
ام سلمان ....................
نوف ..طيب اشري والي تبينه بسويه حتى لوكنت ماني مقتنعه يمه انتي موافقه على ناصر
حست على شفاة امها ابتسامة رضا
بدون شعور دفنت نفسها بحضن امها وهي تبكي ...بس علشان ابتسامك بوافق عليه حتى لو ماقدر ينسيني همي بوافق عليه لانه هو الي خلاك تحسين فيني وخلاني اشوفك تبتسمين
ظلت بحضن امها خايفه هاللحظه تضيع قررت توافق على ناصر بس علشان تفرح الي حولها
.................................................. ........................................
في غرفة سلمان
نوره في حالة نشاط بعد زيارة اهلها
وكانت ترتب غرفتها وسلمان ماكان موجود
كان الدولاب عالي عالي جدا ومظطره تطلع بعض الاغراض لاعلى الدولاب
ماكان عندها حل الاتسحب كرسي صغير موجود بالغرفه الثانيه حتى تطلع عليه الاغراض في شنطه متوسطة الحجم طلعت على الكرسي والشنطه بيدها رفعت الشنطه لباب الدولاب كانت ثقيله نسبة الى وزنها اختل توازنها ماعادت تتحكم بنفسها وطاحت على زاوية السرير وكانت الضربه قويه سببت جرح بليغ بفخذها ظلت بالاراض تجاهد المها حطت يدها على مكان الالم بعد حوالي الخمس دقايق تغلبت على نفسها وقامت متوجه للحمام <وانتم بكرامه > غيرت ملابسها ونظفت الجرح وربطت عليه قطعة قماش حتى ماينزف داخت من الدم الي نزف رمت نفسها على السرير ونامت .....
.................................................. .....
صباح اليوم الثاني
..وش قلتي ؟؟
بكل برود..راح اوافق
..انتي متاكده يانوف ؟؟
..متاكده !!!
..طيب فكرتي ؟؟
..فكرت وشاورت امي ..امي ابتسمت ياساره امي الي ماشفت ضحكتها من اربع سنين
..فكري لايكون الي تسوينه هروب الرجال ماله ذنب يعيش مع مره قلبها ملك رجال ثاني
من وسط دموعها.. صحيح الي جاني هزني لكن ماهي نوف الي توقف عند ذكريات واحد مافكر فيها انا الي مايبيني مابيه ولاهي نوف بنت ابو سلمان الي تخون الرجال الي امنها على بيته وشرفه حتى بتفكيرها وقلبي بادوسه
..ياخوفي ان هالكلام الي تقولينه مجرد كلام ماتقدرين عليه اوانه رد ماقدرتي تقولينه يوم عرفتي بخطبة نايف
..لاتخافين حتى ان ماقدرت احبه ماراح احب غيره
..الله يوفقك ويريح بالك
..................................
في جده
مها ..طيب والسكن وين تسكن وانت ماعندك بيت
نواف ..مدري يمكن استاجر شقه لين ابني ارضي واسكن فيها
مها..طيب ماتخاف نايف يزعل لانك بتتزوج قبله ؟؟
نواف ..لانايف يدري ولو ماهوموافق ماتزوجت
في هالوقت دق جوال نايف كانت لطيفه
نواف ..هذي لطيفه
مها ..رد عليها
نواف ..ماني راد
مها ..رد يمكن عندها كلام يعجبك
اقتنع نواف بكلام مها واستقبل المكالمه
..الو
..انت ليش ارفض زواج نايف من نوال ؟؟
..الناس تسلم اول ؟؟
..نواف لاتستهبل ورد على سؤالي
..انتي تدرين ليه رافض وحده مثل هذي ماتصلح تصير زوجه وتربي عيال لانها ماهي متربيه اساسا
..انا راح اقول لابوي انك ماتبي اخوك يتزوج لانك تبييه يصرف عليك
..هههه ضحكتيني وانا بعد باقول لابوي وش سويتي مع نوال يوم نايف فكر يخطب بنت ابو سلمان وانتي تعرفين ابوي كان يتمنى
..وانت وش دخلك يتزوج الي يتزوج نوال ولاغيرها
..الالي دخل وهذا عهد قطعته على نفسي صحيح ماقلت لنايف حتى ماينصدم فيك مثل ماانصدمت لكن الي براسك انسيه
..انت مامنك فايده بزر وعنيد
..البزر الي تكلمين عنه قريب بيخطب ويتزوج انا بخطب اخت الي رفضتي نايف يتزوجها
بعصبيه وصوت عالي ..لا مانت صاحي لكن ماني لطيفه ان خليتك تاخذها ماباقي تاخذ الاهذي
.اعلى مابخيلك اركبيه انا ماني نايف صدقك يوم كذبتي عليه انا كشفتك ..وسكر الجوال ورماه على الكنبه ورمى نفسه وراه كل هذا ومها تشوف وتسمع لكن فضلت تسكت حتى يهدى لان نواف عصبي جدا لكن سرعان مايهدى
.................................................. .......
الجرح يئلمها ولاخلاها ترتاح بنومها طلع سلمان من غرفة النوم وهي بالصاله الي مقابله الغرفه
سلمان ..نوره جهزتي الفطور
نوره باين وجها ماهو طبيعي ..الحين اجهزه
سلمان ...نوره وش فيك وجهك ماهو طبيعي
نوره ..لا بس كنت سهرانه مع البنات
سلمان ..زين ترى ان شالله اليوم المغرب باسافر للشرقيه واقعد خمس ايام او اسبوع اذا محتاجه شي وا تبين شي قولي لي
مع انه عارف ردها لهم حوالي شهر ونص متزوجين عمرها ماطلبته حتى لو تحتاج شي
نوره..لا لا مابغى شي سلامتك
............................ | | |
| |
30 - 12 - 2014, 02:55 PM
|
#8 |
|
30 - 12 - 2014, 02:59 PM
|
#9 |
|
30 - 12 - 2014, 03:05 PM
|
#10 |
ليه عمري مالقى لبرده دفى الا دفاكي للكاتبه ذكرى نجديه |
الذين يشاهدون محتوى الموضوع الآن : 1 ( الأعضاء 0 والزوار 1) | | | 
الأعضاء الذين قاموا بتقييم هذا الموضوع : 0
| لم يقوم أحد بتقييم هذا الموضوع | | أدوات الموضوع | | | | انواع عرض الموضوع |  العرض العادي | 
تعليمات المشاركة
| لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك
كود HTML معطلة
| | |  الساعة الآن 01:11 AM
sitemap
| | | | | | | | | | 
او 
لمشاركة اصدقائك!
