الجزء السادس ..
شقة عبدالله وشهد ..
عبدالله: شهد لآتقولين هالكلآم ..
شهد: الله يخليك ماأبي اصير نفسك اقط كلآم واجرح ..أتركني بروحي..
عبدالله بحنان: عيون عبدالله أنتي..تعالي لحضني ..مااشتقني تدفنين نفسك بأحضاني..
طالعته ..

مرات أحس إنك معي شخص ثااني ..
ومرات أحس إنك حبيبي ومازلت..

فتح يدينه لها: هاتيك تعالي..
ناظرته ..
عبدالله: هاتيك تعالي حبيبة قلب عبدالله ..
مشت كأنها طفلة متشوقة لحضن أبوها ..مشت وهي تمسح دموعها حطت راسها على صدره واحتواها بحنانه وحبه لها..
طوقت عبدالله بيدينها وهي تبكي وتعاتبه ..حط يده على راسها وهو يهديها ..
دق جواله وبعدت عنه شهد .. باسها على خدها وحط يديه على خصرها وهو يطلع جواله ..
كانت أنفال ..
ماحب يرد ..
عبدالله: جهزي نفسك نطلع نتعشى برآ ..
شهد: أوك ..
عبدالله: أبي أوك مع ابتسامه مع حركة حلوه.. موب جامدة تسذا..
ابتسمت على خفيف
عبدالله: ياجعلني فدوة لـ هالمبسم ..
دق جواله ..
عبدالله:هلآ..
أنفال: وينك ؟
عبدالله: مع شهد ..
أنفال: ناسي ان الليلة الاربعاء عزيمة اهلي..
عبدالله : ايه نسيت..
بعدت عنه شهد وطلعت للصاله ..
عبدالله: وش المطلوب الحين ؟
أنفال: خير وشو المطلوب العزيمة لنا..مفروض الحين تكون موجودين ..
عبدالله ضرب على راسه: نسيت..
أنفال: أنا لبست بسرعة تأخرنا على أهلي..
عبدالله :خلآص طيب..
سكر الجوال..:آه ياشهد ..
كانت بالصاله ..
جلس جنبها ..ويبي يقولها أنه معزوم ومرتبط بموعد للعشاء عند أهل أنفال..
شهد ودموعها تتساقط من عيونها على الارض مباشرة..:روح لها ..
(أصدق الدموع هي من تسقط من العين لترتطم بالارض)
عبدالله: نسيت أن عندهم عشا ..
شهد تمسح دموعها:الله يرحم والديك خلني ..خلآص ياعبدالله خلآص ..
عبدالله: لو مو مرتبط ماكان رحت ..
شهد :والله ماعاد شي يهمني .. سوى مستقبلي ..
عبدالله :مستقبلك معي..
شهد: شقلت لك داخل ..أنا وحدي مالي أحد مالي سند ولآ أبي أحد يكون معي وثم يتركني ..
عبدالله: مين دخل فكرة أن مافيه أحد لك ..
شهد ضحكت باستهزاء: الظروف قالت لي .. شهر وشوي وحدي ولآحتى مكالمة والحين جاي وراح تروح لاهل زوجتك .. (تغير صوتها للبكا من ثاني) ..آآآآآآه يمه ويبه ياليتي معكم ..
عبدالله ضمها لصدره : ولمين تخليني ..
شهد ناظرته: وحدة×وحدة ..أنت عندك أنفال وأهلك ..بس أنا مين عندي فهمني ..لآتقول أنت .. أنت تركتني أنت موب عبدالله اللي زمان.. عبدالله الحنون راح عبدالله حبيبي راح..
دقت أنفال ..
عبدالله: آوف ..الحين جاي..
سكر الجوال..
بعدت عنه: عبدالله روح لها خلآص كل شوي تدق..
عبدالله : تغارين منها .. شهد والله أنفال ماأحبها ولآ أبيها ..
شهد بنظرة: ماعدت اغار .. كنت اغار عليك بس لما جلست ومددت شهر العسل مات كل شي حلو بداخلي تجاهك وتجاه هالدنيا .. روح لها الله يوفقك ويسعدك ويرزقك الذرية الصالحه ..

ماني على روحتك للغير مغتاضي
هذي حياتك وانا ماعادلي فيها

لاصرت راضي على الفرقا وانا راضي
كلن على مايبي رجله يمشيها

اتعبت نفسي معك لكن على الفاضي
والعيشه اللي معك ماعدت ادانيها

اركض ورا هقوتي وانطال مركاضي
واخلفت هقواتي اللي كنت هاقيها

القلب لاهزك إمن الشوق واهتاضي
تذكر ان رجلي بدربك معنيها

والحين ماعدت ابيك ورجع اغراضي
واعراضك اللي معي ماعادت انا ابيها

منتا على عشرتي حاكم ولا قاضي
والسالفه مبطي(ن) خابر تواليها

مافيه غير الفراق ومنه نعتاضي
خلاص انا انهيت هالعشره وماضيها

ماودي اذكر ولاطاري من الماضي
وبتعب على خوتن زينه وابشريها

و انكان قصدك تخلي القلب يغتاضي
النار ماتحرق الا رجل واطيها


عبدالله: لآتزعلين .. راح تثبت لتس الايام صدق حبي لك ..
طلع من الشقه ..
حطت راسه على الكنبة وهي تبكي: صدق حبك قصدك وهم حبك ..
دق جوالها ..
شهد: مااااري جيبي الجوال..
جابته وكان سكر عمها عناد: يافديتك ..
دق ثاني..
شهد :هلآ والله ..
عناد: شهد ..
شهد: ايه عمي..شخبارك؟
عناد: شهد شفيك ؟
شهد: ولآ شي عمي.. متى وصلت؟
عناد: الحين بجيك ..سلآم ..
سكر عمها ونزلت الجوال ..:يالله ..
.
.
.
ببيت أبو عبدالله ..
العنود: يبه ماخلصنا من هالموضوع ..
أبوها: قلت لـ زياد لآكن يقول لآ حاول فيها ..
العنود تأكل حلآ: يالله نشبة
دخل متعب :سلآم ..
الكل: وعليكم السلآم ..
أبوها: عيب تقولين عن ولد عمك نشبة ..
العنود: معلية ولآتزعل بابي نشبتين .. ماأبيه غصب هو ..
متعب: وليه ماتوافقين ؟
العنود: متعب قلبي تبي قهوة..
متعب: ايه ابي ..
عطت أخوها القهوة ..
متعب: وحلآ عطيني ترى راح تصرين دبه زود ..
العنود: الدنيا فانية أهم حاجه راحتي خل اكل ..
أبوها: خليك من متعب..
العنود: يبه موضوع زياد بليز سكر عليه ..
أبوها: ورى..
العنود: أنا أوب موافقه ..وسبق قلت اسبابي للرفض ..
متعب: معلية على المقاطعة..بس ابي فلوس لان الربع بالبر وراح نخيم هناك ..
أبوه: والاختبارات ..
متعب: ماعاد بوه الا مادتين مااختربتهم والاسبوع الجاي ..
أبوه: وين الفلوس اللي اعطيتك اياهم ..
متعب: يمه عطيني ..
أبوه: استح على وجهك اكلمك تروح تكلم امك ..
متعب: العيال الحين راح يمروني ..
أبوه: الله يهديك ..كم تبغى ؟
متعب: أنت كريم وحنا نستاهل ..
أبوه: الف يكفي..
أم عبدالله: عطه زود ..
أبوه: الف وخمس ..
متعب: تكفي ..
باس راس ابوه وامه :يله سلآم ..
أمه: انتبه لنفسك ..الله يحفظك ..
.
.
.
شقة شهد وعبدالله ..
دق الجرس ..
فتحت شهد الباب ..
سلمت على عمها ..:الحمدلله على السلآمة..
عناد: الله يسلمك..شفيك ؟كأنك باكية ؟من بكاك ؟
ضمت عمها وبكت :تعبانة..
أحتواها عمها ورتب على ظهرها بحنان ..: من اللي متعبك ؟
شهد: كل شي عمي..
عناد: عبدالله ..عمك ..زوجته الجديدة ..هم اللي مزعلينك ..
شهد: عبدالله متغير كثير..
عناد يبوس راسها وبعده ضامها: من أي ناحية ؟
شهد: مو عبدالله الاول.. تغير كثير..
رفعت راسها وطالعت عمه: قوله مايبيني يقول .. مستحيل اعيش معه ..
عمها مشى وجلسها: قولي لي عن كل تصرفاته..
شهد: تغير.. ماصار يهتم فيني مثل زمان..
عمها: اها ..
بقلبه (أنا اتفاهم معك ياعبدالله) ..
شهد: توني اليوم اشوفه جا امس قهرني بكل تصرفاته .. حاسه بذل أوب طبيعي..
عناد: ماعاش من يذلك .. وليه ماكلمتني ..كان قطعت سفرتي وجيتك.. شهد أنتي مو بس بنت أخوي أنتي بنتي وأختي وصديقتي وكل شي..
تعلقت برقبه عمها وبكت ..:الله لآيحرمني منك ..
عناد: يله قومي نطلع تنعشى برى .. وتالي نروح لجدتك وننام عندها..
شهد: جد..
عناد: جد الجد ..أفا قومي وخذي لتس ملآبس..
مسح دموعها ..
شهد: ويلومني بحبك ..
عناد ابتسم :من السخفين ذولآي ؟
شهد: الكل يقول ليه تحبين عناد هالكثر.. الله لآيحرمني منك ..
عناد: ولآمنك ..
راحت تجهز أغراضها ..
راح عناد يحوس بالمطبخ ولقى كوكيز ..
طلع للصاله ..
شهد: خلصت عمي..
عناد: يالله مشينا..
شهد: ماري تبين تزلين تحت ..
ماري ابتسمت عشان الشغاله تحت الثانية:يس ..
بادلته شهد الابتسامه: آوك اجل روحي..
طلعت شهد وعمها من الشقه ..
بالسيارة ..
شهد: عمي قول لـ عبدالله ..
عناد: من عيوني..
طلع جواله ودق ..
عناد: هلآ عبدالله ..
عبدالله كان بالعزيمة: هلآ عمي..وصلت..
عناد: ايه ..المهم شهد معي وبنروح نابت عند جدتك ..
عبدالله بصوت واطي: عمي وين تباتون ؟
عناد:لآيكثر حبيبي أنا بعدين أبيك اتفاهم معاك .. أنا ماكلمتك عشان استأذن منك بس حبيت أبلغك هي معي وانا عمها وراح تبات بيت جدتها ..سلآم ..
سكر عناد ..
شهد: مارضى..
عناد: بس يستفسر وين راح ننام ..
عناد: تعالي نروح لمطعم صب واي أو يبتزا هوت ..
شهد: أي واحد تختاره حلو ..
عناد: أجل صب واي ..تعالي شخبار نجد ؟
شهد: ماقلت لك راح تكمل هالترم..
عناد: بالله ..
شهد: ايه .. الحمد لله وافقت ولو أنها مرآ خايفه من هالتجربة .. راح نتخرج سوى..
عناد: حلو .. يازين هالخبر.. ومتى راح تبدء الاختبارات ؟
شهد: أنا بنص هالاسبوع ..
عناد: الله يوفقك ..شدي حيلك .. وهالسنة راح نسافر أنا وأنتي لآي مكان تختارينه ..
شهد:يؤ.. لآتدلعني تسذا..
عناد: ومن عندي غيرك .. بس أبيك تشدين حيلك ..أبي أقول بنتي جابت معدل ماأحد جابه بالعايلة كلها ..
لمعت عيونها من حنان وحب عمها ..وتمتمت بينها وبين نفسها(جعل ربي مايخليني) ..
.
.
.
ببيت أهل أنفال ..
عمر : وش فيها بنت خالتي ..عادي لوشفتها ..
غيد : عمر بلآ هبال.. متزوجة.. غلط اللي تسويه..
عمر: تتطلق منه..
غيد: تتطلق.. أقول روح .. وبعدين من اهل البيت انت واقف هنا عن المطبخ ..
عمر: مالك شغل..
غيد: فكر بس انه حرام اللي تسوية وبعدين مهوب من صغرك الحين بالجامعة وتسوي هالحركات ..
أنفال: عمر خلآص روح ..
عمر: وأنتي..
أنفال: أنا متزوجة وأحب زوجي..
عمر انصدم وسكت ..
غيد ناظرت أنفال اللي مدمعه وعمر اللي عند الباب الخلفي للمطبخ ومنصم ..
عمر: من جدك ..
أنفال مسحت دموعها: ايه ..
عمر بحزن: الله يوفقك ..
.
.
.
ببيت أبو طلآل..
زياد: قسم بالله ماأخذ غيرها دامها رافضة ولو يكلف الامر ارجع سلوم اول البنت لولد عمها رضت أو انرضت ..
أبو طلآل: مهبول أنت.. تأخذ البنت عناد ..ماتبيك.. وبعدين قلت ماتبي نورة لآن ردك عمك والحين العنود صاحبة الشأن هي ردتك ..
زياد: الحين عندي مناوبة جيت أخذ اغراض وبرجع وبأخذها بالطيب بالقوة..
أبوه: زياد فيك شي ؟
زياد: بلغ عمي لآزلت أبيها ..
طلع من عندهم ..
دخلت أم طلآل ومعها صينيه الشاي..:وين زياد ؟
أبوه: زياد مجنون .. يبي العنود ..
أم طلآل : ماقلت له أنها رفضت
أبو طلآل: الا ..
أم طلآل: وباقي مصر..
أبو طلآل: ولدك عنيد ..
أم طلآل: ليكون شافها ..العنود الله لآيضرها قمر ..
أبو طلال ابتسم: تهقين ..
أم طلآل: أجل لية مصر عليها وترك نورة ..
أبو طلآل أخذ فنجال الشاي وهو مبتسم ..:كل شي ممكن..
أم طلآل: خلنا من زياد .. نجد متى راح تطلع؟
أبو طلآل: مدري الحين هي مع الدكتور ماجد ..
أم طلآل: ماقالت له شي؟
أبو طلآل: ماحبيت اسأل ماجد لآن هالشي يدخل بـ خصوصية المرضى ولآ أبي احرج ماجد ..
آم طلآل: بس نبي نعرف بنتنا شفيها ؟
أبو طلآل: هالشي خاص بـ نجد والدكتور ماجد .. وان شاء الله تتشافى..
.
.
.
غرفة سارة ..
كانت تكلم العنود ..:وجع وش مسوية باخوي يبيك ..
العنود: خخخخخخخخخخخ ماسويت له شي..
سارة: تدرين طلع معصب ..
العنود: كلمية سوير شيبي مني ؟خليه يرجع لـ نورة حرام لو تدري راح يجيها شي هي مرآ تحبه ..
سارة: اليوم عنده مناوبة بكرة بكلمه .. بجد لو تدري نورة.. بس عاد هو يبيك ..
العنود: آحم آثر أخوك يبحبني.. احس وراه سالفه ..
سارة: هآ..
العنود: اقولك وراه سالفه شمعنى هالاصرار علي ..
سارة: مدري ..
العنود: وراتس مفهية.. المهم تجين بكرة عندنا..
سارة : تعالي أنتي تكفين .. تعرفين زياد مذله على مايوصلني..
العنود: والسواق..
سارة: تعرفين امي متشدده حبتين ..
العنود: آوك أجل بجي معتس عقب مانطلع من عند نجد ..
سارة: آوك ..
العنود: المهم خلص تحميل حلقات المسلسل الكوري بروح اشوفه..
سارة: جبيه بكرة معتس..
العنود: آوك ..سي يآ ..
دخلت وجن ومعها ولدها :عنيد امسكيه أبي اذاكر..
العنود: هاتيه حبيبي ..
جلست وجن مع العنود وولدها ..
العنود: روحي ذاكري ..
وجن: بريح شوي بس جنني ..
مسكت لآب العنود ..وقعدت تشوف الصفحات اللي فاتحتها العنود ..
وجن: شعندك كلها مسجات..
العنود: ابي احطها بمفكرة وانزلها للجهاز أبي رسايل جديدة .. يافيه رسايل خقق..
وجن : ايه قاعده اشوف ........
سكتت واندمجت مع مسج ..

وين انت؟ غبت وغابت ايامي .. وين انت؟ رحت .. وهالمدى ظامي
وين انت؟ ماتدري ان الخوف .. مايرتعش فيني ويسكن شراييني
لو هو تحقق .. شوف
وين انت ياقاسي؟
ياساكن احساسي
لو دريت ،، انكـ تشاركني الليالي
في سهرها .. في قهرها
لا سرى يمكـ خيالي
لو دريت ،، ادري انكـ ما قسيت
بس عارف
مايهم تكون قاسي
المهم ماتكون في بعدكـ المجنون
ناسي
تقدر تروح ... الله معكـ.. تقدر تلوح لي وتقول الله معكـ
اللي مضى كافي .. انتظاري واحتراقي
والسهر اياااااااام .. واسمكـ في شفاهي
يمكن اني ماقدرت .. اخفي شعوري
ويمكن اني ماقدرت .. اشرح شعوري
ليه احزن وانطفي؟ ليه؟ .. ليه ادور للحكايات القديمه في يديه؟
ليه اسافر في عيونه؟ ليه تشغلني ظنونه؟
ليه ؟؟؟
.
.
.

ببيت أم عناد ..
جدتها : نامي معي بغرفتي ..
شهد ابتسمت: خلآص ..
عناد: صحيناك يمة..
امه: لآ مانمت كانوا جارتي عندي ..
عناد: ياحبني لتس ولجاراتك ..شهد لو تشوفين جارات جدتس..
امه تضحك: يبسط عمك معنا ..
عناد: كلهم عجايز .. ياجلسه معهم أليمة وانا عمك ..
ضحكت امه ..
عناد باس راس امه: اجل الجين نتركك تنومين ..
امه: خلآص.. لآجيتي بترقدين تعالى عندي..
شهد: ان شاء الله ..
طلعوا من الغرفة ..
شهد: بروح ابدل..
راحت تبدل وتالي جلست مع عمها على لآب توب ..
دق جوال عناد..
عناد: هلآ عبدالله ..
عبدالله : هلآ عمي.. كيف الحال؟
عناد: بخير جعلك بخير..
عبدالله : تسلم .. وش السالفه توني الحين واصل للبيت ..
عناد: لحظه بقوم مااسمعك زين ..
عطى شهد لاب توب وطلع للحوش..
عناد: شفيه .. شهد معي وماحبيت اتكلم قبل شوي .. شف لآتقول شهد يتيمه وأعمامي كل واحد لآهي بحياته .. وعناد مسافر كل شوي.. لآ ترى لو كانت غايب جسد فـ أنا مع شهد بروحي ..
عبدالله : وش مناسبة هالكلآم ..
عناد: لو فكرت بس يبوم تضايق شهد تذكر هالكلآم .. خذها مني الحين ماتبي شهد اخلي سبيلها ..
عبدالله : عمي لآتصير أنت والظروف علي..
عناد: حذرتك .. زوجتك الثانية شسمها ولآيهمني اعرفه ..لآتقرب لـ شهد الحين شهد مقبله على اختبارات نهائيه وآخر سنة وأبي لها معدل عالي أبيها تأخذ الاولى على الدفعه كلها .. أبيها تدخل الاختبارات بمخ صافي ومزاج حلو ..
عبدالله : مستقبل شهد يهمني بالمقام الاول..
عناد : حلو .. أجل لآاسمع ولآ اشوف دمعه بعيونها مثل الليلة ولآحزن بصوتها ولآقهر والم بضحكها ولآ هم يغيرها ولآشي يكدر بالها.. لو مات أبوها ترى أنا أبوها وعمها ولآعاش من ينزل دموعه..
عبدالله : عمي يمكن أنت عارف شكثر تهمني شهد ..ومستحيل أجرحها بقصد ..
عناد بحده: ولآ بغير قصد ..
عبدالله : ولآيهمك .. طيب متى راح تجون..
عناد: ماراح نجي.. الليلة أنا وشهد راح نبات عند جدتك .. والين يوم الجمعه العصر عشان جامعه شهد ..
عبدالله: عمي لي عنها شهر وشوي ماجلست معها..
عناد: من منعك ؟
سكت عبدالله ..
عناد: عبدالله وسع صدرك .. أنت عارف غلآتك عندي بس شهد مكانتها غير ..
عبدالله : سلم عليها ..
عناد بمزح: أخاف ماتبي طاريك ..
عبدالله طاح قلبه : وشو ..
ضحك عناد ..
ضحك عبدالله بتوتر: الله يسامحك .. عاد وقتها مالي داعي بدنياي..
عناد: تصبح على خير..
عبدالله: وانت من أهله ..
سكر عناد ودخل لداخل..
جلس جنب شهد :عبدالله يسلم عليتس..
شهد: الله يسلمك ..
عطت عمها الاب وقعدت تتفرج معه..:شوفي هذي صورتي أنا وخويي ثامر بالنرويج .. هذا اللي عطاني الموكا ..
شهد: اي أي اتذكره ..
عناد: وهنا شوفي يمديك على رجل الثلج سويناه .. أنا وربعي..
شهد:هههههههههههههههههه عمي شكله توحفه..
عناد: شوفي هذا أنا ..خقه أنا صح
شهد:خخخخخخخخخخخخخ تدنن ..
عناد: أدري .. وامير البنات عندي خاقين معي..
ضحكت شهد على هبال عمها..
.
.
.
اليوم الثاني ..
المستشفى..
دخل د/ماجد الساعه 8 ..وجلس مع نجد ..
نجد : أبي اطلع من هنا خنقه وملل..
د/ماجد: كلمتي الوالد ..
نجد: أبوي يقول بيدك ..
ضحك : وش تبين أنتي..
نجد : أبي اطلع..
د/ماجد: بس عندي شروط ؟
نجد: وشو؟
د/ماجد:لآزم تجين على الاقل 3 مرات بالاسبوع .. وتخلين نفسك أقوى من كل شي.. وتتذكرين أن ماصابك ماكان ليخطئك ..
نجد: صعب اجي خاصه اختباراتي قربت ..
د/ماجد: سماح فترة الاختبارات بس بعدها راح نعوض ..
نجد: ان شاء الله ..
قام :أجل اشوفك على خير.. وبأذن الله أخذ أخبار نجاحك وتفوقك من الدكتور محمد ..
نجد: ان شاء الله ..قول لآبوي ..
د/ماجد ابتسم: الحين اروح له ..عن اذنك ..
.
.
.
ببيت أم عناد ..
صحت أم عناد شهد وعناد عشان يفطرون ..
عناد جالس: يمه احد يفطر الساعه ثمان ..
أمه: احمد ربك على النعمه وافطر..
ابتسمت شهد على جدتها وعمها ..
قام عناد وغسل ..
امه: مافطرت ..
عناد: بعدين يمة بصحى وبفطر..
انسدح على رجول شهد ..
أمه: قوم عن شهد منت بـ صغير..
شهد : لآجدتي خليه ..
عناد: فديت الناس الحنونه ..
نام عناد ..
دق الجرس وفتحت الشغاله ..
عرفت شهد أنه عبدالله من ريحه عطره اللي سبقت دخوله ..

يامرحبا مليون يااعز من جيت ..
شميت عطرك وأنت توك على الباب ..

جدته ناظرته وهو يدخل : عبدالله ..
عبدالله : ايه ياجده ..
مشى :والله ماتقومين ..
جدته: الله يرفع قدرك ..
سلم على جدته وهي جالسه :السلآم عليكم ..
جدته*شهد: وعليكم السلآم ..
عبدالله: كيفك ؟
جدته: الحمدلله .. شلونك ؟
عبدالله: الحمدلله بخير.. كيفك شهد ..
شهد :تمام ..
عبدالله ابتسم: بعض الناس نايم على رجول زوجتي وموسع صدره ..
ضحكت جدته ..
نادت الشغاله تجيب القهوة..
جابت الشغاله القهوة ومعها الفطور اللي جابه عبدالله ..
جدته: ليه تكلف على نفسك؟
عبدالله: لآكلآفة ولآشي..
عطته فنجان قهوة..
عبدالله: جده افطري..
جدته: افطرت ياولدي ..لآكن شهد وعمك مافطروا..
عبدالله: شهد افطري..
شهد: بس الحمدلله..
كان مركز النظر فيها .. وفي تلعب بـ شعر عمها ..
جدته: متى جيت من السفر..
عبدالله: قبل يومين ..
جدتها: وشسمها مرتك الجديدة..
عبدالله: أنفال..
جدته: ماشفتها ليلة العرس الا لما سلمت عليها..
عبدالله : ان شاء الله تشوفينها قريب..
رفعت عيونها تناظره بقوة ماتدري عن مصدرها بس تبي تشوف شلون نظرته وكلآمه عنها..
جدته : وحملت ..
عبدالله فجأه السؤال:ايش ؟
جدته: حملت ..
عبدالله طالع شهد للحظه وناظر جدته: لآ ياجده بدري..
جدته: أجل ليش أبوك خلآك تعرس على بنت عمك .. الا وهو مستعجل على ضناك ..
عبدالله : الله يكتب اللي فيه خير..
جدته: وكم عمر مرتك ؟
عبدالله: 18..
جدته ابتسمت: بعدها صغيره ان شاء الله تحمل قريب.. وأنتي ياشهد الله ينولك الضنا..
شهد: الحمدلله ياجده على كل حال ..أنا راضية بنصيبي ..
جدتها: ماتبغين عيال ؟
شهد: مافي مرة ياجدتي ماتبي .. بس ربي ماكتبي لي خلآص الحمدلله ..
جدتها: ولو حملت ضرتك ؟
شهد : راح تحمل قريب عاااتي ياجدتي..
ناظرها عبدالله ..
جدتها: شهد بلآ عيارة ..الغيرة فينا يالنسوان ..
شهد ابتسمت : الله يعين ياجده..ويستر من مقبلآت الليالي..
جدتها: امين ..
قامت جدتهم وساعدها عبدالله ..
جدتهم: بروح امدد رجيلي شوي ..
عبدالله : خذي راحتس ..
مشت جدته لغرفتها ومشى جلس جنب شهد ..:شخبارك ؟
شهد: الحمدلله..
عبدالله : أول مره تنامين برى بيتك ..
سكتت..
عبدالله: وحشتيني ..
شهد: عمي نايم ..
عبدالله : اشوفه ..
شهد حمر وجهها: عبدالله يؤ..
ضحك ..
عناد صحى: اقول تراي هنا .. امسك ارضك ..
ضحك عبدالله من قلبه ..
جلس عناد : أنت وجدتك لق لق كثير..
عبدالله : استح جدتي هي امك ..
عناد: شهوده حضري لي فطور جيعان ..
عبدالله: شوف جبت لكم ساندوشات ..
عناد: من وين ؟
عبدالله : من محل حلو شهد تحب الفطور من عندهم.. الظاهر شامي..
عناد: اللي بالشارع المقابل لكم ..
عبدالله : ايه الظاهر هو..
جلس عناد ..ونادى الشغاله تجيب له عصير..
عبدالله : شهد البسي وخلي نروح لبيتنا..
شهد: معليه عبدالله بجلس مع جدتي وعمي..
عناد: بكرة بجيبها العصر..
عبدالله: وليه اليوم ماتجيين ؟
شهد: لو رحت للبيت بقعد بملل ..
عبدالله : أنا معك ..
شهد: راح تطلع عزيمة أو أي شي ..
عبدالله : لآ شدعوه .. خلينا نروح تكفين..
عناد: أوه الولد خاق معك وأنا عمك..
استحت شهد ..
عبدالله : هاتجين معي ..
شهد: عمي أروح ..
عناد: براحتك أنا اهم شي عندي سعادتك ..
شهد: أوك بروح ..
.
.
.
بـ شقتهم ..
عبدالله: شرأيك ننام الين الظهر..
شهد: مافيني نوم ..
عبدالله : طيب خلي نسولف ..
تذكرت لما قالها خل نسولف وتالي عصب .. لمعت عيونها وصارت تكرهه ضعفها ..
عبدالله رفع وجهها:شهد شفيك ؟
بعدت يده: ولآشي.. عبدالله بروح انوم ..
عبدالله مقدر اللي تمر فيه : خلآص براحتك ..
دخلت للفراش وغطت كل نفسها وهي بللت جزء من المخده بدموعها..
دخل عبدالله وبعد الغطا عنها : ليه هالدموع..
شهد: عبدالله ابي أنام ..
عبدالله :وعبدالله ماراح يتركك الين يعرف سبب هالدموع ..
شهد: متضايقة شوي ..
عبدالله : شاللي مضايقك ؟
شهد: كل شي بدنياي مضايقني..
عبدالله : حتى أنا ؟!
شهد جلست : بجد بجد بجد بعض الاحيان أفكر انفصل عنك .. عشان ارتاح واريح ..
ناظرها عبدالله والصمت مأخذ موقف الكلآم ..
ضمت نفسها وهي تبكي ..
عبدالله : أنا من وين الاقيها ؟ من أبوي اللي خلآني اتزوج أنفال ..أو من أنفال ذا الطفله ..أو منك صرتي كله حزن كل ماشفتك حزينة×كئيبة..
رفعت راسها : بجد والله .. خلآص أجل لآتجي.. أو أقولك أنا بريحك مني وبروح بيت أبوي تراه موجود لو رحلوا أصحابة وتركوه ..
عبدالله: شوفي حتى صرتي حساسه زود ..
شهد: اطلع وخلني ..
عبدالله: أنا طالع..
طلع وتركها وهي رجعت رمت نفسها على السرير وهي تبكي الين نامت..
دخل عبدالله للغرفة بعد وقت وعدلها بحضنه عشان ينام معها..

.