شبكة همس الشوق - عرض مشاركة واحدة

2 - 11 - 2024, 06:20 AM

ببيت ماجد ..
كانت وجدان تستعد عشان راح يجونها صديقاتها وكل صديقاتها من طبقتها الاجتماعية الراقيه( طبعا أبوها حيل غني عكس ماجد اللي حالته المادية حلوه بس موب قد عمه ) .. شافت عمتها بالصالة جالسة تشوف برنامج فتاوى ..: عمه مطولة هنا ..
عمتها : بشوف الفتاوى..
وجدان: معليش ياعمتي صديقاتي راح يجون يسهرون عندي وابغى الشغالة تنظف الصالة ..
عمتها :خلاص طيب..
وجدان: تجلسين معنا ..
عمتها بطيب نية: بجلس معكم ..
وجدان ناظرت عمتها وبلبسها لان ام ماجد لابسه ثوب حق برد وشكله حلو ومناسب كثير لسنها : عمتي ولاتزعلين مني.. لبسك يفشل وحتى حكيك ماينفهم عند صديقاتي .. خليك بغرفتك وعشاك الحين راح يتحضر.. وأذا تبين دورة المياة(وأنتم بكرامه) ادخليها الحين .. وش يفكني من لسانهم لامن شافوك ..
عمتها انجرحت كثير وأخذت عكازها وقامت من الصالة ..
وجدان : الله يستر لاتقول لماجد ..
لحقتها وكانت توها بتدخل الغرفة: ياليت ماجد مايدري..
مشت وراحت تكلم الشغالة تنظف الصالة ..
جلست ام ماجد على سريرها وشغلت الردايو ..وحطت على اذاعة القران وقعدت تسمع لها .. ونزلت الصوت بحيث ماينسمع كثير..
جابت لها الشغالة العشا لعندها ..
أم ماجد: رجعيها مالي رغبتن فيه ..
شالت الصينيه الشغالة وطلعت فيه وشوي على دخله ولدها ماجد توه جاي من المستشفى :السلام عليكم ..
امه ابتسمت: وعليكم السلام ..
قرب لامه وباس يدينها وراسها : كيف روح ماجد الليلة ؟
امه: بخير يانظر عيون امك .. اهلك هالشغل ..
ماجد ابتسم :لا يالغالية .. لاتخافين علي.. يمه كأنك ضايقة ..أحد ضايقك ؟
امه: لا يانظر عيني مافيني خلاف ..
ماجد ماسك يدين امه اللي ملتها التجاعيد ..ويناظرها وباين انها ضايقها كثير..

يمـّـه كبـرتي وصـرتي أحلـى من العــام
يـاحلـو ضحكــات التجـاعيـد بيـديــك ..

امه: ماجد ودي ارجع للديرة ..
ماجد: أفا يمه .. مهيب عاجبتك الرياض ..
امه: الرياض حلوه بعين اهلها وسكانها .. بس أنا تعودت على الديرة.. وودي ارجع لها ..
ماجد : يمه كأنك تبين راحتي لاتطرين لي الطلعة من بيتي .. ماتدرين انك بركة هالبيت ونور عين ولدك .. طلبتك يمه ..
باس يدين امه : لاتطرينها لي.. راحتي بوجودك معي ..
دخلت وتين وهي تضحك لما شافت أبوها ..ضحك ماجد: وتتتتتين تعالي ياقلب أبوك ..
شالها وحطها بحضنه .. وقعد يسولف مع امه اهو وبنته ..

.
.
.

ببيت زياد ..
كانت بغرفتها تذاكر وزياد جا طفشان من الشغل ودخل يأخذ له شاور يهدي أعصابه .. طلعت عند عمتها لغرفتها ..
العنود : هالجزئية حيل صعبه ..
عمتها تدرس الماده بكلاسات ثانية : الاسئلة موحده وهالجزئية كل الدكاترة حاذفينها ..
أخذت عمتها الكتاب وأشرت لها على المهم وحطت لها مواضع الاسئلة..
العنود باستها: فديتك ..
عمتها :فداك الكون .. شدي حيلك ..
العنود: اوك .. تصبحين على خير..
عمتها: وانتي من اهله حيبيتي ..
طلعت العنود لجناحها ..
وجلست تذاكر طلع زياد ..
زياد : هاقربتي تخلصين ؟
العنود : عمتي اشرت لي على الاشياء المهمه .. وبذاكرها..
زياد ابتسم :يعني غششتك ..
العنود: لآآآ .. بس حددت المهم .. لو غششت كانت عطتني الاسئلة ..
زياد : وأنا اقول امي دكتورة عقيده ماتسويها ..
العنود: خلني اذاكر ..
ضحك ..:طيب بخليك ..
لفت انتباهه شي بخدها خفيف لمس خدها :عنود وش ذا ؟
العنود نست :وشو ؟
زياد : شوفيه
فتحت الدرج القريب منها وطلعت منه مرايه وشافت :طيب شي خفيف..!
زياد شده الفضول : آييه شي خفيف بس من أيش جا ؟!
العنود تذكرت :عادي..
زياد: موب عادي .. من وشو ؟!
العنود : زياد خلني اذاكر ..
زياد شك بالسالفة : لا الحين قولي بسرعة ..
العنود : شوف طبعا أنت تعرف سالفه المعجبات بنت باستني كذا .. بس أنو هاوشتها..
زياد بعصبيه : لآآآآآآ .. خير وين عايشين ؟ شلون تخلينها تبوسك بهالطريقة اصلن ..
العنود بدت تترفز : باست بشكل مفاجئ
زياد: حتى لو باستك بشكل مفاجئ ماتخلف هالاثر الا انها طولت ..
العنود : وقسم بالله مامدى باست الا دفيتها ..
زياد : لوح قدامك وتقولين لي هالكلام ..
العنود تنرفزت ورمت الكتاب بقوة الين وصل بزواية الغرفة :دامك موب راضي تصدق بالطقاق .. أنا قلت لك الصدق .. رضيت كيفك مارضيت شف فيه اربع جدران بالغرفة صك براسك فيها وذا موب عاجبتك ولاهيب مكفيه شف بصالة الجناح ..
زياد وصل :عنوووووووووووووووود ..
العنود : أنت غاوي مشاكل .. آفففف ..
بعدت عنه وغطت نفسها بالغطا ..
بعد الغطا :قومي ..
رجعت الغطا عليها : انصحك اتركني بحالي لاسوي لك مصيبه ..
زياد ناظرها شوي وتالي قام وتركها لاجل تهدى شوي .. شال الكتاب المرمي بالزواية وحطه على الطاولة جنب السرير .. راح يشرب مويه وتالي طفى النور وولع الابجورة وجلس عندها : عنود .. خلاص عيوني آسف قومي ذاكري..
ماردت عليه ..
زياد : عنودتي .. حياة زياد أنتي قومي ..
بعد الغطا عنها بالقوة وهو مبتسم على زعلها .. لانه يبعدالغطا وهي ترجعه عليها .. :فديتتتك أنا .. آسف .. خلاص .. بس تحملي غيرتي شوي ..
بعد الغطا وجلس عليه عشان ماترجعه عليها .. فيه الضحكه على شكلها حاطه يدينها على عيونها وبجد زعلانة شالها وحطها بحضنه ووقف يمشي فيها بغرفتهم وراسها على كتفه وهي بعدها حاطه يدينها على وجهها ..
زياد ويدها على اكتافها عشان ماتطيح : عنودتي .. نونو .. روحي أنا.. خلاص كفاية زعل .. عناااادي طالعيني خلاص والله اسف .. ولاعاد منيب متعودها ..
جلس فيها على الصوفا وخلاها ترفع راسها : رضينا ..
باسها وجننها الين رضت ..ضحك : ياجعلني فدوووة .. ماتصدقين تزعلين ..
العنود : وأنت ماتصدق تهاوشني ..
مسك خدودها : اهاوشك يأخذني الموت لو زعلتك..
العنود :هييييي لاتدعي على نفسك .. يادب ترى أحبببك ..
زياد خق خقه مابعدها شي ..
العنود تلعب بشعره وتالي مسكت يده : بيبي ..
زياد : عيونه ..
العنود حطت راسها على صدره : بس خلاص ابي اسوي كذا..
رفع يدها وباسها وهو مبتسم : ربي يخليك لعيونك ..
.
.
.
ببيت أبوفارس ..
جناح صفا وفهاد ..
صفا كانت تطالع بالاثار زين خفت كثثير عن أول ..
فهاد دخل وناظرها وفي راسه حرش : ترى الحلا وحده مايفيد ..

ماتفيدك حلاتك .. ما يدوم [ الحلا ] ،
ليت روحك جميله دام وجهك جميل

قلت لك ياتحبْني حيل ~ وإلا - فلا
إللي مثلي ( أناني ) مايحب القليل

إنت هَمٍ { ثقيل } ومن حياتي إنجلا ،
صرت هَمْ بحياتك وأدري همّك ثقيل !

صفا لفت وخزته بنظره ..
فهاد : وأنا صادز .. وش ينفع الحلا لاكانت النفس شينة ..
صفا : أنت واحد فاضي تبي تتهاوش بس ..
دق جوالها وكانت مرة أبوها :هلايمه .. وعليكم السلام ..
امها: شخببارك ؟
صفا: بخير .. كيفك كيف اخواني..
امها: بخير..
صفا مشت وطلعت لصالة الجناح :آييه يمه .. ها رجعتم للبيت ..
مرة أبوها: لا مابعد رجعنا .. خلي أبوتس يعقل أحد يسوي ببنته كذا..!
صفا: تكفين يمه ارجعي للبيت .. عشان أخواني لايصير فيهم مثل اللي صار فيني .. طيب أبوي جا عند بيت جدي..
مرة أبوها: آييه جا والحين بعده موجود ..
صفا: طيب راح ترجعين معه..
مرة أبوها: آييه برجع بس عقب مايتعهد مايسوي مثل هالتصرفات اللي تفشل ..
صفا: فديتك يمه لاتضيقين صدرك أنا بخير .. بس تكفين ارجعي..
مرة أبوها : من عيوني .. الا ماكلمك أبوك ..
صفا: لا يمه ..
مرة أبوها: الله يكف شره عنك .. صفا جدك يناديني بروح له انتبهي لنفسك ..
صفا: اوك ماما .. سلمي على جداني ..
مرة أبوها: يسلمي عمرك .. مع السلامة ..
سكرت امها ونزلت صفا الجوال ..
فهاد براسه حرش ماخلص : جوالك بالليل يتسكر ..
صفا: شارب شي ؟
فهاد يتنطنز: آيييه لبن ..
صفا تبادله : منتهيه صلاحيته مثلك ..
فهاد :

بايخه..
صفا : موب أكثر منك ..
دخلت للغرفة وصكت الباب ..
فهاد : اشردي يالبزر ..
ماردت عليه وضحكت من حر مافيها ..
.
.
.
ببيت أبو أنفال ..
جلس جالس بالمجلس جنب أنفال وهو من بعد العشا لازق فيها : متصوره ان بكرة عرسنا ..
دخل عبدالملك ودفه وجلس بينهم ..
عمر : مليك برآ
عبدالملك : ياخي خلني أحب اختي وبكرة راح تأخذها ..أحبب أختي ..
عمر :حبتك القرداة ياولد خالتي..
أنفال ضحكت ..
عمر حط يدينها على جوانب وجهه : يالبيييه اروح ملح مع الضحكه.. ملوك تكفى روح خلني معها.. ولاتخاف أختك ماعطتني لاحق ولاباطل..
ضحك عبدالملك : بعدي أختي ..
عمر: تكفى تقلع ..
عبدالملك: بس أخذ دروس منك ..خبرك يمكن اعرس قريب الا اعرف كيف اتعامل مع حرمتي ..
عمر :هههههههههههههههههههه طس يامليك .. وبعد شهر العسل اعشيكم كلكم على حسابي بالاستراحة..
عبدالملك: مااصدق دوم تسحب ..أنت والشله الطفرانة ..
عمر: صدقيني بسوي لكم..
عبدالملك طلع جوالها وفتح التسجيل : قول انك راح تعشينا بعد شهر العسل..
عمر جاته ضحكه وتالي قال: راح اعشيكم بعد شهر العسل بس فكني من خشتك ..
عبدالملك سكر التسجيل وهو ميت ضحك وقف :بتقلع ..
عمر يضحك : خلاص تقلع ..
عبدالملك : ترى عادي اجلس ..
عمر: لا ياخي انقلع ..
عبدالملك سوى زعلان وطلع ..
عمر قرب لها : جهزتي كل شي للعرس ؟
أنفال: آييه ..
عمر: أبي بكرة تكون ليلة غييييير .. غييير ياأنفال ..
.
.
.
شقه عناد ..
ريما :خلاص طيب .. مع السلامة ..
سكرت جوالها ..
عناد : أختك ؟
ريما: آييه ..
طلعت للمطبخ وقام معها عناد ..
ريما: تبي أي شيبس ؟
عناد : فيه حار ..
ريما: آييه
عناد : طيب جيبي لي حار .. وأنا بسوي صلصه عليه ..
ريما ابتسمت :اوك ..
طلع عناد الزبادي والمقادير الثانية وريما تجهز الشيبس وحطته في طاسه (صحن,كأسه) وتالي جهزت البيبسي :خلصت ؟
عناد : آييه ..
طلعوا من المطبخ وجلسوا بالصالة يشوفون فليم ويأكلون :هاشرأيك ؟
ريما : خققه ..
عناد: خققه وتأكل شي خققه وش اللي راح يصبر عناد ومايأكلها ..
ريما شرقت ..
عناد فز :اسم الله عليييك ..
قام جاب لها مويه : اشربي ..
شربها :شفيك ؟
ريما حمر وجهها: عناد لاتتغزل تكفى ارحمني ..
ضحك ولمها من خصرها وهو يبوس خدها : وأنا اقوى ..
شاف حياها وكسرة عيونها ضحك حييل وفكها : خلي نكمل سهرتنا على هالفلم الاكششن .. ريموي بكرة بنروح لشهد ..
ريما: آييييييه كنت بقولك مرآ وحشششتني ..خاطري أشوفها ..
عناد: اجل بكرة نمرها .. الا وش كانت تبي أختك ؟
ريما عارف ان هالطاري راح يضيق صدر عناد فما حبت تقول : ابد كانت تبي تتطمن علي ..
عناد مهوب متطمن: اها ..
.
.
.
بريطانيا ..
دخل فارس للشقة ومعه أغراضة خفيفه للمطبخ نزلها للمطبخ ودخل لغرفه النوم ولاقها مغطية نفسها وعلى باله زعلانة مادرى ان اللي فيها أكثر بكثير من زعل منه صرخ فيها :ساررررررررررررررة ..
بعد الغطا عنها وهو معصب :قومي نوووم نننوم الى متى .. فوقي لنفسك تراك صرتي متزوجة .. آوف منك ..
رجع وشغل النور ..
جلست وهي تبكي من الروعة اللي روعها أياااه .. والرجفه اللي جايه جسمها من البرد اللي بلندن ..والاكل اللي مااكلت من ليلة عرسها ..كان وجهها ذبلان وأنفها أحمر وعيونها من الصياح والتعب وشفايفها محترقة من كثر البكا .. ضمت نفسها بخوف منه ..
فارس : شفيك قومي رتبي الاغراض وننزل بكرة نأخذ باقي الاغراض يمكن تتذكرين لما تشوفين الاغراض قدامك ..
طلع من الغرفة وملامحها باقي قباله رجع بسرعة للغرفة ودنق على السرير وهي كانت جالسة وضامه نفسها وتبكي :سارة فيك شي؟ليه ترجفين ؟ بردانه ؟
هزت راسها باييه ..
رفع الغطا من الارض لانه رماه وغطاها .. ماكفى الغطا وقام جاب غطا ثاني من الدولاب غطاها ..
جلس وهو مجدر(ماسك أطراف الغطا عشان تتدفى أكثر وماترجف أكثر) :بسم الله عليتس ..
جلس معها وقت وتذكر وفجأه : سارة أنتي أكلتي شي من جينا لبريطانيا ؟!
ماردت عليه لانها كانت حيل بردانه ..
قام وهو ضايق لان فكر شلون تأكل والمطبخ فاضي وكل ماجاب أكل ماتأكل وحتى نقد على نفسه هي مره وحده جاب غدا وبعدها ماجاب..
دق على خويه ناصر :هلا ناصر.. آبييك بخدمه ..
ناصر: سم ..
فارس: سم الله عدوك .. اسأل زوجتك كيف نسوي شوربة ..
ناصر ضحك : ورى؟
فارس: روقان أنت تضحك .. زوجتي مريضة وماعرف اسوي ..
ناصر: خلاص لاتسوي الحين اخلي العيال (زوجته) يسوونها وراح اجيبها لك ..
فارس: لا تكلف على نفسك بس علمني بالطريقة .. وبنزل اجيب اغراضها من السوبر ماركت تحت ..
ناصر: اقول ريح بس .. شوي واجيبها لك..
فارس: تسلم والله ..
ناصر: ماسويت شي يالخوي .. اشوف بعد شوي..
سكر منه ورجع لسارة جلس عند راسها ورحمها كان ترجف غطاها أكثر وقعد يلمس شعرها بحنان ويقرأ عليها لانها كانت خايفه صحاها بطريقه تروع :آسف على همجيتي قبل شوي بس ماكنت أدري أنك تعبانة ..
ماردت عليه مانتظر كثير ودق الجرس لان أخوياه ناصر وعبدالرحمن مستأجرين معه بنفس العمارة اللي كلها عرب..
قام ..
عند الباب: هلا ناصر ..
عطاه ناصر الحافظه :هلابك .. وسلامتكم ماتشوفون شر..
فارس:الله يسلمك .. اقلط ..
ناصر: وقت ثاني .. عن اذنك ..
راح ناصر لشقته .. ودخل فارس وصك الباب وتالي راح للمطبخ حط شوي منها بصحن وأخذ معلقه وراح لغرفه النوم جلس سارة : اشربي منها ..
ماقدرت تمسك الملعقه ..
حط الصينيه بحضنه :أنا بشربك ..
سارة :لا .. مابي شي..
فارس : لا راح تشربين .. أو راح اكلم أبوك يتفاهم معك لان وصاني عليك كثير ..
سارة : طيب مابي ..
فارس : طيب عشان أبوك .. هم ياشطورة ..
قهرها كأنها بزر عنده ..
شربها شوي :بس خلاص ..
فارس: لا راح تكملين هالصحن ..
سارة : خلاص مابي..
فارس: ياتشربين يااكلم ابوك ..
قعدت تشرب الين خلص الصحن :شاطرة .. شوفي ماضرك ..
قام وودى الصيينه للمطبخ ورجع وجلس وقت ورجع ومعاه حليب :خذي اشربي..
سارة : مابي خلاص ..
فارس :بكلم ابوك ..
سارة: خير كل شوي راح تكلم ابوي..
فارس ابتسم .. :خذيه ..
أخذته وشربت شوي .. وفارس يناظرها: كملي قبل مايبرد ..
سارة : قبل شوي شوربة والحين حليب كلها سوائل خلاص ..
فارس: أوك خلاص ..
شاله ووداه للمطبخ .. ورجع لها :باقي تحسين ببرد ..
سارة: لا ..
فارس: طيب تعبانة ؟
سارة :لا..
فارس: ليه ماقلتي لي ان البيت فاضي وكيف صابرة 3 ايام من غير اكل .. لو جاك شي ؟ ..
ماردت عليه كانت تناظر يدينها ..
فارس : خذي لتس شاور وراح ننزل للسوبر ماركت نأخذ باقي الاغراض ..
طلع من الغرفة ورد الباب وراه .. قامت سارة وهي محتارة من الشخص اللي كان امامها .. تصرفاته متناقضه .. دخلت تأخذ لها شاور عشان يطلعون ..
بالمطبخ ..
كان فارس يغسل الصحون والاكواب خلص منها وجففها وتالي حط أغراض ناصر عشان يرجعه له ..
نزل أكمام القميص وطلع من المطبخ .. انتظر سارة الين خلصت..
دخل للغرفة وكانت خالصة ..
فارس: خلصتي ؟
سارة:أييه ..
فارس: طيب خلي ننزل نجيب أغراض ..
لبست حاجبها .. وكان حيل لبسها ساتر ..
فارس : سارة ماعندك عبايه ؟!
سارة :الا ..
فارس :طيب راس او كتف ؟
سارة: ثنتين
فارس: وش كنتي تلبسين بالرياض ..
سارة :راس ..
فارس: حلو .. طيب مشينا ..(فكر أنه يقولها تلبس عباتها الكتف بس نظرات الاجانب وخاف يدخلون بمشاكل ) بس سارة لبست عباتها الكتف..
فارس : راح تلبسينها ؟
سارة : آييه ..
فارس علت بعينه كثير : اوك مشينا ..
طلعوا من شقتهم ..
بالسوبر ماركت ..
فارس : طيب زيت نأخذ ؟
سارة : يمكن مو نحطه على الاكل ..
فارس ابتسم ..
أخذت سارة كم نوع من المكرونة واغراض خفيفه ..
فارس :تعالي نروح قسم الحلويات ..
مروا أخذو كم نوع وتالي حاسب فارس وطلعوا ..
بشقتهم ..
رتبوا الاغراض ..
فارس بحنان: كيفك الحين ..
سارة نست انها تسولف معه: تماااام بغيت اموت العصر..
فارس :اسم الله عليك .. غلط تصرفك مفروض تأكلين..
سارة استحت ..
ابتسم فارس ومشى للغرفة عشان ينام :تصبحين على خير..
سارة: وأنت من اهله ..
جلست بالصالة وشافت لابه مفتوح مالمسته وخلته على حاله .. برغم انها كثير مشتاقه تجلس على النت وتفتح المسن ..
جلست على التلفزيون وقعدت تبرمج وتحوس بالقنوات الين طلعت لها قنوات عربية جلست تشوف برامج .. وتالي استقرت وجلست تشوف مسرحية ..
مر الوقت وجا نص الليل ولاحست فيه .. طلع فارس اللي كان دايخ نوم بس جيعان ..
عدلت جلستها لما شافته ..
فارس يحك راسه وجلس جنبها : أنا جيعان عادي تسوين لنا مكرونة..
ذكرها بأخوها زياد وابتسمت: أوك .. ترى أحبها حاره تبي مثلي ؟
فارس: آييه ..
قامت وقام معها ..
فارس جهز القدر ..
سارة: لا راح نسلق المكرونة أول شي وحدها وتالي نأخذ قلاية ونسوي فيها المكرونة كاملة ..
فارس: خلاص أنا بحضر المكرونة وبسلقها ..
سارة لفت عليها : تعرف
فارس ابتسم : خبره بالسلق كنت أنا وفهاد نسويها كذا وامي تجي تكملها .. ياهي إياااااام ..
سارة :ان شاء الله ترجع ..
فارس اندمج بالكلام معها وكان يكسر المكرونة ويحطها بالقدر: بس موب مثل قبل .. الحين كل واحد من بديره أنا هنا وفهاد بالرياض .. فهاد متزوج وعايش حياته الله يسعده .. وأنا هنا اكمل دراسات عليا وتزوجت بس موب اختياري هالزواج كل شي تم بـ إجبار من الوالد والوالدة بحجه وشو احصن نفسي.. طيب أنا ماابغى الزواج ولا عمري فكرت فيه وحتى لما تمت الخطوبة انصدمت بما قالوا لي البنت وافقت ....... (سكت فجأه واستوعب كل الكلام اللي قاله لف على سارة ) ضاع كل الكلام منه ماقدر يقول ولاكلمه ..ناظرها وهي معطيته ظهرها وكانت تقطع البصل واختلطت دموعها باحراق البصل ..
فارس ترك المكرونة تغلي على النار ومشى ووقف وراها حط يدينه على أكتافها وبصوت خافت وممزوج بحرقة انه جرحها ولاهو قاصد : مااحب أجرح أحد لو كان من كان فما بالك بزوجتي ..
كانت أكتافها تحت يدين فارس ترجف : آسف وأدري الاسف مايمحي آثر جرح بس مهوب قصدي ..
سارة بقوة ماعرفت مصدرها وبصوت واثق تحدت الرجفة اللي تسري بجسدها من قرب فارس وجرحها لها : ماصار شي ..
فارس سكت ..
سارة مسحت دموعها بفقا كفها : ممكن شوي أبي اكمل شغل المكرونة..
رفع يدينه عنها وبعد وكسرت خاطره كثير .. وكرهه نفسه أكثر على هالبوح ..
قعدت تكمل وجهزت كل شي الين تنسلق المكرونة زين .. طلعت من المطبخ وفارس عيونه تتبعها لان المطبخ متفوح على الصالة .. دخلت للغرفة ودخلت للحمام(تكرمون) .. صكت على نفسها الباب جلست على البانيو وحطت راسها على يدينها اللي حطتها على الرف الخشبي وبدت بنوبة بكا إلييمه على اللي تعرضت له .. بكت وقت الين حست انها ارتاحت شوي غسلت وجهها بموية باردة حيل وضحكت وهو تناظر المراية وترش الموية على وجهها : موب أنا اللي فارس يخليني أبكي واتحطم واعيش الحزن ..
نشفت وجهها وأخذت جوالها من الصالة وركبت السماعات بأذنها ودخلت للمطبخ شاف فارس عيونها وعرف انها باكية بس سكت..
سارة : خلصت المكرونة..
فارس استغرب منها تكلمه : أكيد نضجت ..
شافتها :آييه خلصت ..
رجعت ركبت السماعات بأذنها وكملت طبخ المكرونة .. ودخلت جو وهي تسوي المكرونه واندمجت مع اللي تسمعه وهي تردد بصوت خافت ..
فتحت الثلاجة وطلعت لهم بيبسي :مافيه غير واحد
فارس كان حيل ضايق وماقدر يتكلم ..
سارة :فارس مافيه الاببسي واحد عادي نقسمه بيننا ..
فارس :براحتك ..
سارة بنظره وبنره :البكاء على اللبن المسكوب لايفيد ..!
فارس : عمري ماجرحت .. ولا أحب اجرح ..
سارة : شوف حلو أنك تكون واضح معي .. لو قلت لي من ليلة الزفة كان اختصرت على نفسك كل هالتعب وهالتأنيب.. حلوه الصراحه ولو هي جارحة.. لان مصيرها تبان .. وهذا هي بانت ..
فارس سكت..
سارة : ها تبي ببسي معي (قالتها وهي مبتسمه)
فارس ابتسم : أنتي كريمة وأنا استاهل ..
ابتسمت ورجعت للمكرونة :خلصت ..وين الصحون ؟
قعدت تدور ..
مشى فارس وكانت تدور بدرج وقف وراها وسحب صحنين .. :ذولاي يصلحون ..
سارة تخدرت من قربه وصوته اللي قريب منها حيل:آييه ..
غسلهم وحضرت سارة المكرونة وقسمت الببسي بينهم بالنص .. طلعوا للصالة ..وجلس كل منهم على كنبه ..
سارة :حط خل نشوف مسرحية هنا مرآ تضحك ..
فارس عطاها الريموت حطت وقعدت تشاهد ..
فارس : تحبين المسرحيات ..
سارة: آممم أنا مااحب الاشياء ذي .. لان ستايلي كلش يختلف عنها.. آحب الاجنبي كثثثير.. وأعشق شرق آسيا كثثير وستايلهم واسلوبهم ونمط الحياة عندهم .. كل شي عندهم سلس وكيوت ..
فارس :عشان تسذا ستايلك يميل كثير لهم ..
سارة اكتتفت بالابتسامة وكلمت أكلها .. فارس فهى فيها وهي تأكل ونسى نفسه وقعد يتأملها .. عكسها اللي مادرت عن فارس وقعدت تأكل وتشوف المسرحية وتضحك ..
.
.
.
الرياض ..
آخر الليل ..
مانامت وجن لانها تتنظر طلال يكلمها ويطمنها عنه ..
دق جوالها : هلا طلال .. ليه ماترد اشغلت بالي وفكري ..
طلال: يابعد فكر وبال وحال طلال .. انشغلت الوالد شاف زملاء له تصوري من ايام الدراسة واصروا الا يجلسون مع بعض ويسهرون.. وتونا رجعنا الحين ..
وجن : اها .. طيب شخبارك ؟
طلال: الحمدلله تمام .. أخبارك وكيف عزوز والكل..
وجن: كلهم تمام .. ها وش صار على النتيجة ؟
طلال: كل شي سليم .. لان الدكتور هو نفسه اللي كنت اتعالج عنده وكل الاشاعات والفحوصات سليم يبي له بس فترة شهرين استمر على المضادات لاجل اكمل الفترة المحدده لي من العلاج وتالي خلاص اترك العلاج كليا..
استانست وجن بشكل جنوني: وااااااااااااااااو ونااااااااااااااسة .. يالله الحمدلله .. ربي يحفظك لي ..
طلال ابتسم : ياعمري أنتي .. وجون فيني النوم بروح انوم وبكرة بكلمك بأذن الله ..
وجن: اوك حياتي .. تصبح على خير ..
طلال: وأنتي من اهل الخير ..
سكر طلال وهي نزلت الجوال وهي مخنوقة من الفرحة .. بس صدرها ضاق كان ودها لو شوي يسولفون ..لان صارت كل مكالمتهم مختصرة سؤال عن احوال بعض وتالي يسكرون ..

حزين .. ومشتاق , أشكي له مثل أوّل
والوضع .. ما يشّبه الماضي .. ومتّعكر .. ,

أوّل نسولف , عن الاحلام .. ونّطوّل
والحين شخبارك ! ومن بعدها أنّسكر !...
.
.
.
اليوم الثاني ..
الصباح ..
الجامعة ..
طلعت العنود من الاختبار واللي كان اختبار شهري هي وغدير : حلو احسه سهل ..
غدير: آييه يالبآ عمتتتك ..
العنود : فديتتها تزنن .. تعالي نروح نفطر .. من الحين راح نأخذ فروالة وتكثر الشكولاتة .. وه بسسس ..
دق جوالها : بيبي زياد ..
غدير : يوقت هالانسان كأنه عارف موعد طلعتك ..
العنود: لاني قلت له ترى مااقعد كل الوقت بالقاعه .. حدي نص الوقت ..
ردت على الجوال : هلا بيبي ..
زياد: هلا باللي صوتها يرد الروح .. كيفك ياعمري ؟
العنود: تمام .. واختباري حلو وسهل ..
زياد: حلو حلو ربي يوفقققك .. حبيت اتطمن عليك بس لان وراي مراجعين ووقفت دخولهم علي ..
العنود ابتسمت : لبى قلبك .. مايدخلون حريم وحدهم عندك ..
زياد ابتسم : تغارين ..
العنود: شرأيك ..
زياد ضحك : اصلن كل وحده اكيد راح يدخل معها زوجها .. او امها ..يله سلام ..
العنود: سيآ
سكرت جوالها وحطته بجيب التنورة ..
غدير: تعالي نشوف أشكالنا قبل مانروح نفطر ..
العنود: اوك ..
دخلوا شافوا أشكالهم ..وطلعوا ..
بالكفرتيا ..
غدير حاطه يدينها على أكتاف العنود وتاكيه عليها وهو يطلبون : كثري الشوكلاته مرآ ..
العاملة في المحل ابتسمت وهي من الجنسيات الاسيوية لان دايم هالقروب مطيحين عندها : حاضر عنود .. وين سارة وصفا ؟
العنود : آخيييه لاتذكرينا .. سارة تزوجت وسافرت بريطاينا .. وصفا راح تجي قريب ..
العاملة : سارة تزوجت ؟
العنود: آيييه فاتتتك عرسها .. معك حق تستغربين بس كل تم بسرعة..
العاملة : كثير ..
العنود ضحكت: أشك فيك احسسك سعودية
ضحكت العاملة : خلاص عشت هنا .. طبيعي أخذ لهجتكم .. تبين تسذا ؟(قالتها وهي تضحك )
انفجروا العنود وغدير ضحك : الا تسذا خليها بعيده ..
ضحكت العاملة وعطتهم طلبهم ..
جلسوا على طاولتهم المخصصه ..
جلسوا نفس كل مره هواش على الفروالة والشوكلاته .. سحر مرت من عندها :هههههههههههههههههههههه مجانين بطلوا حركات المبرزة ..
العنود :هههههههههههههههههههه تعالي تهاوشي معنا دايما احنا كذا..
سحر :هههههههههه ماتعلموني فيكم .. خبره .. الا وين صفا ؟
غدير: بتجي قريب..
سحر : سلموا علييييها مرآ .. وحشتنا ..
غدير: من عنووووووننا .. سحر سحر خذي هالقطعه يييييمي ..
قربت سحر : وه خقه ..
أخذت القطعه ومشت ..
العنود : شوفي بنت عمي نورة ..
غدير: شوفي شلون تناظرنا .. جااات ..
قربت لطاولتهم ووقفوا سلموا عليها وتالي جلسوا .. :تفضلي ..
نورة: لا قروبي هناك .. بس حبيت ابارلك ..
العنود : أنا ..!
نورة : آييه ..
غدير: تباركين لها على الحمل ؟
نورة فتحت عيونها: آيشش حامل
العنود :آييه حامل ..
نورة بقسوة: الله لايتم هالضنا ..
غدير تلقائيا : الله يأخذك ليه تدعين على ضنا العنود .. انقعلي عنا ..
العنود : اشك بقواك العقلية ..
نورة بحقد : حبيت ابارلك بزواج عمي اللي هو أبوك .. تزوج يالعنود..
العنود حست بدوخة مفاجئة اجتاحتها ..
غدير وقفت للعنود : عنوده ماعليك منها ..
نورة ضحكت ومشت ..
العنود حاولت تتماسك عشان الكفتريا كلها بنات كلمت السواق وقالت له يمرها ..
نزلت جوالها : مستتحيل يكون كلامها صدق .. ابوي يتزوج على امي..
غدير جلست جنبها : عنوده اكيد هي حاقده عليك وتكذب ..
العنود : راح اسوي مصيبه لو هالكلام صدق.. قومي خل نأخذ عباتي لان كلمت السواق..
قامت العنود وغدير .. مشوا اخذو عباه العنود ووقفت معها عند البوابة..كلمت العنود سحر عشان تأخذ غدير وماتجلس وحدها..
جا سواقها وطلعت له ..
بالسيارة: بيت أبوي ..
طول الطريق كانت تكذب وتصدق الخبر ..!
.
.
.
ببيت أبو عبدالله ..
دخل هو وزوجته الجديدة : نور بيتك ..
نوال: بوجودك .. الا وين اهل البيت مايستقبلونا..
أبوعبدالله: تلاقينهم بعدهم نيام .. تعالي اجلسي فيذا وبطلع لهم ..
طلع أبوعبدالله للدور الثاني وجلست نوال تطالع بالفيلا الكبيرة وسقفها المنقوش بفخامه :صبرت ونلت وأنا بنت أبوي ..
وقفت سيارة العنود داخل حوش الفيلا وشافت سيارة أبوها: يارب الخبر كذب..
دخلت وكان البيت هدوء نزلت عباتها وحطتها على الكنبه بهدوء ..لفت انتباهها وحده واقفه تتأمل بالبيت ومعطيتها ظهرها ..:مين أنتي؟
لفت نوال وانبهرت على هالفتنه اللي واقفه قدامها :مشالله تبارك الله ..
العنود : مين أنتي ؟
نوال: أنا مين ؟ أنتي مين داخله بيتي وتسأليني ..
العنود تأكد الخبر عندها: أنتي مرت أبوي ؟!
نوال ابتسمت: آييه ..
العنود: وتقولينها بكل ثقه ..
نوال: زوجته على شرع ربي وسنه رسوله اللهم صلي وسلم عليه..
العنود صرخت فيها : وتقولييييييييييينها بكل جراءة .. اطلعي برآ
نوال جلست وحطت رجل على رجل: بيتي كيف اطلع منه ..
العنود شافت فازة صغيرة ورمتها بوجهها ..
نوال يدها على حاجبها: آيييييي ..
العنود بضحكه شر وهي تشوف الدم ينزل من حاجبها: ماشفتي شي.. حطك رماك عندي ..
نوال بدت تبكي وحركات المسكنه والتمسكن .. نزل أبو عبدالله وام عبدالله من الدرج على الصوت العالي اللي تحت ..
أبوعبدالله ركض بشيبه لنوال: من اللي صوبك ؟
نوال بدت تبكي أكثر: هذي ..
العنود الفازة الثانية بيدها والشر بصوتها: أنا .. تتزوج على أمي.. ليه؟ ..
أبوها بعصبيه وقرب .....
العنود بصوت اعلى: لو تقرب يابوي ماراح أعرفك صدقني ارجع للخمه زوجتك ارجع لها يابوي ..
أبوعبدالله يعرف بنتها لاعصبت ماتعرف نفسها .. وخاف على نفسه نوال وعلى العنود من نفسها ..رجع لنوال .. وقال لبنته: ليه تسوين تسذا بمرة أبوك ؟
العنود : قلتها بعظمه لسانك مرت أبوك .. يعني (يصوت عالي حيل وهي ضاغطه أسنانها العليا بالسلفا ) الذبح فيها حلال..
ام عبدالله جلست على الدرج من تحت وماعاد فيها حيل عقب اللي سمعته ..
رمت العنود اللي بيدها وركضت لامها على نزله أخوها بدر ووعد على خلفيه الصوت العالي..:يممممه شفيك ؟
أم عبدالله ويدها على طرف راسها: حسبي الله ونعم الوكيل ..
بدر : شفيكم ؟
العنود الدمعة بعيونها وبحده: شوف الحقيرة اللي وافقه جنب أبونا.. تزوج وفشلنا ..
أبوعبدالله بحده: لامافشلتكم ..
ام عبدالله بعدها جالسه : الا فشلت عيالك.. كلهم كبار ومتزوجين وأصغرهم بالثانوي .. دايم مفشلنا ومسود وجيهنا بتصرفاتك حسبي الله عليك .. من يومك قاسي وظالم ..
بدر بذهول : يبه صدق ذي زوجتك ..
نزلت وجن من الدرج ودموعها اربع اربع على اللي سمعته ..
أبوعبدالله: آييه زوجتي .. وش فيها ؟ فكروا بعقولكم مهوب بالعاطفة..
بدر: معليش احترمنا وفكر أنت بعقلك ..
امه: وجن جيبي عباتي من غرفتي ..
بدر: يمه لاتخلين البيت لها..
العنود: أهو وزوجته يطلعون من البيت .. وأنتي يمه لتس البيت..
أبوعبدالله : اسمعوني كلكم .. أمكم تبغى تعيش معي بهالبيت حياها الله.. ولنوال مثل مالها بالبيت .. وتحكم وتتحكم ..
أم عبدالله وقفت وبعزه نفس: مهيب أنا اللي ترضى فيك وبشروطك.. وجن جيبي عباتي ..
مشت ودقت على أخوها وقالت له يمرها .. لفت عليه وقالت : الله يخلي أبوي وأخواني لاتفكر عقب كل هالعمر مهم مستقبليني..
جابت لها وجن عباتها وشطنة اليد.. لبست وقعدت تتنظر أخوها..
العنود موب مصدقة: يمممممه من جدك بتطلعين وتتركين البيت لها..
وجن: يمه هذا بيتك ..
أم عبدالله : دامه دخل فيه الغريبة مهوب ببيتي..
بدر مشى لامه: يابعد راسي البيت ذا بيتك .. وماعاشت ولا خلقت اللي تطلعك من بيتك ..
أبوعبدالله : مااحد طلعها .. امكم تبغى تروح ..
وعد كانت تناظر الموقف بصمت وعيونها فيها لمحه احتقار لعمها وتصرفه ..
العنود قربت لابوها : ليه سويت كذا.. طحت من عيني كثثثثييير كثييير..!
نوال بشكل مفاجئ صفقت العنود كف ..
.
.

انتهى