الجزء الثاني والثلاثون ..
ببيت زياد ..
العنود كانت مغضمه عيونها وضاغطه على أسنانها بقوة من الالم..كان زياد بمكتبه طلع منه للجناح لاجل يأخذ شماغه ويطلع لشغله .. فتح الباب ومشى لاجل يدخل لغرفتهم فتح الباب وشاف العنود تتلوى ركض:عنننننود شفيك ؟
العنود ماصدقت شافت أحد والاهم انه زياد: زياااااااد بموووت من الالم..
زياد طاح قلبه : وشو اللي يألمك ؟
العنود وجهها أحمر من الالم : ظهري وبطني ..
زياد عدلها على السرير وقعد يسألها أكثر من سؤال لاجل يتطمن أكثر عليها ارتاح نسيبا: اهم شي مافيه نزيف .. قام أخذ شنطته الطبيه ..وطلع منها ابره ..
العنود ماسكه على جنبها من الالم: لاآآ..
زياد يضبط الابرة : مافيه لا .. لاجل يخف الالم ومايصير للجنين شي..
العنود مدمعه من الالم: لا الابر مهيب زينه للبيبي ..
زياد ناظرها وهو يضرب على الابره بخفيف لاجل تمتزج المحاليل : أنا عارف وش اسوي .. لاتخافين ..
العنود طاحت دموعها من ثاني : قلت لا يعني لا ..
زياد حط الابرة على الطاولة جنب السرير ومسك يدها : لازم أعطيك هالابرة لانها مهمه لطفلنا ولتس .. (لمس شعرها وهو يكمل كلامه بهدوء) ..
العنود دمعت من القهر وكرهت نفسها ماتبي يضيع البيبي للمره الثانية وتكون هي السبب رضخت لامر زياد وأخذت الابرة ..
زياد بهدوء : ممكن اعرف وش سبب هالشي .. رحتي لبيت عمي..
العنود تعض على شفتها السفلى من الالم: آييه ..
زياد :أنتي وبعدين معاك .. صدقيني عنود لو صار لك او للبيبي أي شي ماراح اسامحك ..
العنود دمعت القهر والالم : مو مهم .. اهم شي برد الحرة اللي فيني ولاخلصت كلها..
زياد : عنووود تكفين خلاص .. لاتتكلمين..
العنود : اطلع عني مالي خلقك الحين ..
سكت زياد ..
وجلس معها وقت الين بدت تنام .. غطاها زين وأخذ نفس عميق: يارب احفظهم لي ..
نزل للشغالة : العنود فوق انتبهي عليها كل شوي طلي عليها باب الجناح مفتوح أنا بروح للشغل اخلص كم شغلة وارجع ..
.
.
.
بريطانيا..
الساعة سبع الصباح ..
صحى فارس على صوت المنبه وقام .. جلس وشاف سارة نايمة على الصوفا ..
قام من السرير وهو دايخ نوم من صلى الفجر ذاكر شوي وتالي أخذ غفوه..
طالع سارة اللي أكيد مانامت الا من شوي لانه ذاكر وهي بعدها صاحية على جوالها .. كسرت خاطره نومتها .. قرب وصحاها .. بعدت شعرها عن وجهها وناظرته :ها ..
فارس فهى وبخاطره (يالبييه وش هالخقه) ..
سارة ناظرته وهي مستغربة وجلست : وش تبي؟
فارس :هه.. آييه اقولك نامي بالسرير ووقتي الجوال لاجل تفطرين عمي وطلال..
سارة قامت : منيب نايمة خلاص..
فارس: نامي مانمتي الا ساعتين ..
سارة : أخذت كفايتي
دخلت تغسل وتفرش اسنانها وخلصت وطلعت ..
دخل فارس غسل وبدل وطلع..
فارس كان يسكر الازارر التابعه للكم ..رش عطر :سارة تبين اجيب فطور..
سارة : آييه ..
فارس: أوك ..
فتح باب غرفتهم ..
سارة: كتبك ولابك ..
فارس :آييه لا خليهم بجيب فطور وبرجع أخذهم..
طلع وطلعت سارة وحطت ماي بالغلاية وحضرت الاكواب ..والكوفي والحليب .. دورت سكر ولقت مكعبات سكر ..
صحى أبوها وشافته لما طلع من الغرفة بقلبهاياعمري أنت ياآحن ابو بالدنيا.. مشت له ..
سارة:صبااااحك نورر..
ابتسم أبوها وسلم على راسها :صباااح الخير لاحلى بنت بالدنيا.. معجزة سارة صاحية بدري..
ضحكت ..
جلس أبوها وجلست تسولف معه :يؤؤؤ الغلاية ..
ضحك ابوها عليها وهي تقوم للمطبخ:كببرت سارة ..
نزلت الماي المغلي بأبريق الشاي وحطته بالصينية على دخله فارس حط كل شي بالمطبخ وراح لعمه..
حضرت سارة وشالت تودي للصالة ..
قام فارس وساعدها..
سارة: اصحي طلال..
أبوها: لا أبوي خليه ينام .. البارح طول الليل يكلم وجن ولانام ..
ضحكت سارة وابتسم فارس..
عطت أبوها حليب وقعدت تسولف معه اهي وفارس .. تالي استأذن فارس وطلع للجامعة ..
أبوها: تبين نطلع..
سارة: عادي..
أبوها: أكيد.. بقوم ابدل واكتب ورقه لاخوك طلال اننا طالعين وراح اعطي فارس خبر.. وخلي اوريك لندن..
سارة : اوك..
قام أبوها ودخلت سارة تبدل ولبست عباتها وحطت الحاجب ابتسم ابوها لما شافها ..
طلعوا من الشقة يتمشون ..
.
.
.
الرياض..
ببيت أبو عبدالله..
كان معصب لاخر شي..
أم عبدالله :من اليوم راح تبدء تخرب بينك وبين العيال..
نوال :منيب مخربه ..الا أنت عندك أربعه عيال رابعهم العنود ولد مهيب بنت..
بدر كان متكتف وساكت يناظر زوجة أبوه باحتقار..
نوال:أنتتتتتتتتتتت ..
بدر ناظرها باحتقار أكثر.. وسلم على يد امه: تو مانور بيتك يالغالية..
امه ابتسمت له..
أبوعبدالله: وصلني لبيت أختك..
نزلت وعد وبنتها ..
أبوعبدالله: بركة انك جيتي ياوعد.. ورى خليتي العنود تضرب نوال..
وعد ناظرت باستغراب متعمد: ليه العنود جات ؟
عمها: آييه تقول نوال..
وعد ماسكه الضحكة: لا عمي ماجات العنود.. وبعدين العنود عندها اختبار اليوم كيف تجي..
نادى أبو عبدالله الشغالة :العنود جات..
الشغالة (تموت بالعنود من وهي صغيره العنود معهم ): لا..
بدر ابتسم:خلاص روحي..
راحت الشغالة ..
نوال مفتحه عيونها وقعدت تصارخ وقربت لـ وعد تبي تهزئها مشى بدر ووقف ببينها وبين زوجته :ارجعي لمكانك بسرعة..
نوال: ككذاببة ..
بدر بعصيبه : ماتعودت اضرب حريم .. ابعدي..
رفعت نوال يدها تبي تضرب بدر مسك يدها ولواها وراها ودفها لابوه..
أبو عبدالله ارتفع عنده السكر..
ركض بدر لابوه ومسكه وسنده .. ركض للمطبخ يجيب ابر الانسولين عقب ماسأل الشغالة وتأكد انه ماأخذها.. عطى أبوه أبره وطلعه للجناح الخاص بامه ..وخلاه يرتاح .. كانت نوال موجوده معهم..
بدر: اطلعي..
نوال : ماراح اطلع..
بدر شاف أبوه نام لان السكر منخفض عنده .. :اطلعي اقولك..
نوال ماردت ولاطلعت..
دخلت أم عبدالله للجناح ..
نوال : اطلعي برى هالجناح خاص فيني ..
أم عبدالله : ماتخسين الا أنتي .. بليله وحده تبين تأخذين بيتي ..
نوال : اطلعي برآ أنتي وولدك ..
بدر قرب لها والشر بعيونه: اطلعي.. وهالجناح والبيت كله تحت طوع وامر أمي .. وأنت خادمة من خدمها ..
خافت منه وطلعت ..
بدر سكر الجناح وكانت امه داخل عند ابوه اللي نام من انخفاض السكر .. بدر :يكون بعلمك أنا عارف أنك ماأخذتي ابوي لاجله .. لا ياحلوه فوقي زين..
نوال باحتقار: الا اخذت أبوك لاجله..
بدر: بلاش كذب .. تبين تقنعيني أنك أخذتي أبوي لاجله ..
نوال قعدت تناظر بدر بنظرات غريبة ..
بدر خزها : وفري نظراتك لابوي
نوال بجراءة : ياليتتتتتك أنت بدال أبوك ..
صفقها بدر بقووة ومشى ..
نوال ناظرته بحقد : ححححححححقير..
بدر دخل لغرفته وهو يتنفس بسرعة سبها بقوة ..
دخلت وعد ..وشافته ضايق ..:بدر شفيك؟
بدر كان ساكت .. وباين عليه ضايق وموب أي ضيقه..
وعد جلست جنبه وحطت يدها على كتفه: شفييك؟ صار بينك وبين عمي شي؟
بدر :لا .. وعد جهزي شماغي بطلع للجامعة عندي محاضرة من 11,50 وماعاد باقي وقت ..
وعد احترمت رغبته بعدم الكلام وقامت تنفذ طلبه ..
.
.
.
بريطانيا..
سارة كانت جالسة مع أبوها وتأكل آيسكريم ..ويسولف لها عن الدراسة..
سارة: اوك بس احسها صعبه هنا..
أبوها: مهيب سهله ولاهيب صعبه .. بس راح تقدرين ..
سارة : يعني ادرس من جديد أول جامعه..
أبوها: آييه ..
سارة : طيب..
أبوهاابتسم لان سارة مهيب راعيه دراسة ..
سارة : طيب متى ابد ادوام ..
أبوها : من مطلع الشهر الجاي .. أنا خلصت كل شي وانتهيت كل شي.. وحتى فارس تابع كل شي هنا مع السفارة السعودية ..
سارة باستغراب: فارس..!
أبوها: آييه فارس .. وحتى أنتي مع فارس بنفس الجامعة بس تفصل بينكم التخصصات وطبيعه الدراسة لان فارس ماجستير ودكتوراة .. وأنتي راح تدرسين من جديد ..
سارة: اها ..
أبوها : خلصتي الايسكريم ..
سارة :آييه ..
أبوها: تعالي نأخذ هدايا ..
قامت مع أبوها ..
دخلوا وشروا كم هدية وتم تغليفها .. وشالت سارة وأبوها..
سارة : بابا ممكن طلب..
أبوها بحنان: عيون أبوك وش تبين ؟
سارة: أبي لاب توب خاطري فيه .. وماقدرت اقول لفارس لان تونا ماتعودت عليه ..
أبوها: بس كذا .. كم سارة عندي .. الحين نروح ونجيب لاب لاحلى سارة..
ابتسمت :فديتك بابا ..
ابتسم أبوها ومسك يدها وصاروا يمشون بشوراع لندن ..
أبوها: هذا محل الكترونيات ..
دخلوا ..
أبوها : اختاري..
سارة: ماعرف بس أبي مميزات حلوه..
أبوها: بأخذ لتس على ذوقي ..
سارة: اوك ..
مشت وأبوها يشوف ويختار الين اختار لها واحد ..
سارة: بابا أبي كام ..
أبوها طالع : فيه كام ..
اشتراه لها ..: اشتري الشنطة الخاصة فيه ..
سارة : أبيي هذي ..
أخذها أبوها وأخذ كل المكملات والاشياء الضروية له .. وتالي انتظروا وقت الين حمل البرامج للجهاز ..
خلص المبرمج وعطاها أبوها كيس الهدايا وشال الاب والاغراض حقته أهو لانها ثقيله على سارة ..
.
.