.
بريطانيا ..
طلعت سارة من الشاور وراحت لاجل تحط ملابسها بالغاسلة وتغسلها وتالي طلعت شرائح مرتديلا.. وتالي طلعت الجبن والخس والطماطم ..
سوت لها .. ضحكت على نفسها لانها سوت 2 سندوشتات لانها جيعانه.. رجعت كل شي مكانه وأخذت عصير وطلعت من المطبخ ..
بغرفتها ..
نزلت الصحن والعصير على الطاولة جنب الاب وهي راح تتربع على السرير لاجل تأكل ..:يممممممممه ..
كان فارس متغطي ونايم وهي جلست على يده ..جلس فارس وهو متروع .. وسارة أكثر منه ..
فارس حاط يدينه على عيونه : وش هالازعاج ؟
سارة وقفت من السرير وهي تناظره: وجع خوفتني .. وبعدين خير نايم بسريري ..
فارس : يعني ماشفتيني قبل شوي ..
سارة : لا.. آفف ..
فارس يتثاوب وهو حاط يده على فمه ..
ساره كانت تناظره ..
فارس ينرحم : خلاص بقوم عن سريرك ..
أخذ شوزه وقام ..
فارس : فضلا لا امر أبي اصلي العشا وبالحيل جيعان وفيني النوم سوي لي أي شي لو اندومي ..
قالها وطلع من الغرفة ..
ساره رحمته .. وتالي شافت الساندوش الثاني شالته وراحت للمطبخ حطته بصحن وطلعت له عصير .. شافته كان يوضي .. حطت الساندوش بالصالة على الطاولة : فااارس ..
خلص وضوء وطلع :هلا ..
سارة وهي تمشي: شوف الساندوش هنا ..
فارس ابتسم : شكررررررآ ماقصرتي ..
دخلت وصكت باب غرفتها .. وهو فرش السجاده وصلى ..
بغرفتها جلست على السرير وأخذت الاب وحطته على رجولها وعشاها جنبها وتأكل وتتفرج..
.
.
.
الرياض ..
المطعم ..
العنود تأكل الحلا بعد العشا : بيبي ..
زياد :عيونه..
العنود: تسلم لي عيونك .. قولي شفيك ؟
ابتسم : مافيني شي ..
العنود نزلت الشوكة : مدري احس فيك شي.. ومصيري اعرفه..(ابتسمت فجاه ) ممكن طلب ؟
زياد ابتسم :امريني بس..
العنود: يالبى .. أبي فروالة عليها شوكلاتة ..
زياد ضحك: أكلتي حلا كثير والحين تزودينها بذي..
العنود : لا مالي شغل ابيها ..
قام زياد وجاب الطلب..
العنود: وه وه شوف (كانت ترفع الفروالة وتقوطر منها الشوكلا السايحه ) خقه صح ؟
ابتسم لها: تراي منيب خاق الا معتس ..
العنود حمرت خدودها من كلامه
زياد ناظرها وهي تقطع الفروالة وتغمسها بالشوكلا وبقلبه (يالبى برائتها وطفولتها وحركاتها )
العنود تمد له : همممم ..
زياد فتح فمه لها وهي تأكله ..
العنود تطالعه وهو يأكلها: حلوه ..
زياد : يدك اللي مدتها لي أكيد مهيب حلوه الا احلى من الحلا ذاته..
العنود ابتسمت وهي تأكل وخدودها وردت: لا ترى كذا اسيح مثل هالشوكولا..
زياد عاشقها بجنون: سيحي وراح المك واضمك وادفيك على هالبرد ..
العنود ناظرته بنظره دلع وتالي كملت اكلت شوي :بس شعبت..
زياد :بالعافية ..
العنود :الله يعافيك ..
زياد: نقوم ..
العنود: آييه بس لحظه خل اعدل شيلتي والبس نقابي..
عدلتها وتالي حط زياد الحساب وفتح الحاجب (لان مطعم عوائل) وطلعوا..
.
.
.
ببيت أبو عبدالله ..
نوال كانت تنافخ وتصارخ ..
بدر كان توه راجع من المستشفى وضايقه فيه الدنيا ..:وش هالصوت؟
وعد: ذي نوال .. بدر كيف عبدالله ؟
بدر لمعت عيونه: عبدالله حالته تحت الله .. كل الاجهزة عليه .. الا وين امي ؟
وعد ضاقت كثير : عمتي بالصالة الداخلية ادخل لها يابدر وهديها..
بدر مشى معها: الا ماجاو وجن والعنود..
وعد: لا ..
دخلت وجن ودموعها تتساقط هي وفواز اخوها وولدها ..:بدر كيف عبدالله ؟
بدر ضم اخته بحنان : ادعي له ان ربي يعافيه ..
وجن تناظر أخوها : أكيد حالته خطيره ..
بدر: ادعي.. وان شاء الله انه بخير.. بس وجن امي داخل ادخلي معي وخل نطمنها على عبدالله .. تكفين تماسكي ..
وجن مسحت دموعها ورجعت نزلت : طيب..
دخلت مع أخوانها .. ووعد دخلت للصالة الثانية لما شافت فواز لانها تتغطى عنه ..
امهم : بدر طمني عن أخوك ؟
بدر جلس على ركبه مقابل امه : يالغالية عبدالله بخير وهو حادث بسيط وان شاء الله يطلع قريب..
وجن مسكت كف امها: لاتخافين يمه هو بخير بس انه الحين مايقدر يكلمك ..
بدر: لان تخبرين المستشفيات ممنوع المكالمات بهالوقت..
امهم بقلب مؤمن بقضاء الله وقدره: علومني بالوكاد عبدالله وشهي احواله..بروح له بكرة فعلومني من الحين .. منيب قادرة انجي نفسي من المكتوب والمقدر بس أنكم طمنوني عنه .. وتراني مؤمنه بربي واللي كاتبه ..
بدر حط راسه على ركبه امه يدراي دموعه .. اللي اكتفت امه انها ترتبت على ظهره بحنان الامومه ولسانها وقلبها يلهجون بالدعاء ان ربي يحفظ ضناها ..
نزلت نوال وهي بعدها تنافخ ..
فواز ماسك نفسه: اطلعي فوق ..
نوال : ماراح اطلع وكلكم انقلعوا ..
فواز بعصيبه: نووووووال انصحك لاتخليني اطلع شيطايني عليك ..
نوال : اطلع انت لغرفتك بسرعة وأنت منطم ..
فواز بلمح البصر مشى وقعد يضربها وهي تصرخ ..فز بدر وفك أخوه عنها هو ووجن ..
فواز يتفل عليها : ياوسسسخه برآ ..
نادى الشغالة ..وجات : بسرعة جيبي عباية هالنكرة ..
طلعت وجاتبتها ..
نوال وقفت وبعصيبه : موب طالعه من هالبيت ..
فواز فك نفسه من بدر اخوه ..: لا احد يقرب لا اذبحها .. أجل موب طالعه اطلعك وأنا فواز ..
بدر شاف اخوه خربت اخلاقه وبجنبه فازه خاف يضربها فيها وتصير بذمته لذلك خلا نفسه بعيد ..
وجن شالت ولدها اللي يبكي بخوف وهي تبكي معه:فواز لاتأخذها بذمتك..
امه ماقدرت تتكلم لانها عارفة ولدها وجنونه ..
فواز :اجل خلوكم بعاد ..البسي عباتك ..
لبستها وهي تبكي من الخوف ..شد من شعرها :وين جوالتس..
طلعته وهي ترجف ..
فواز: بسرعة دقي على اهلتس..
نوال دقت سحب الجوال فواز : الو .. اسمع اذا انت مبقي على حياة اختك تعال الحين للبيبت وخذها ... أي بيت يعني بيت زوجها.. اسمع معك (ناظر ساعته) الحين 11,5 معاك الين 11,20 يعني ربع ساعة أذ ماجيبت وأخذتها .. دمها حلال لي فهمت ..
سكر الجوال وهو شاد على شعرها :امسسكي او اقولك لا حرام أكيد هالجوال من فلوس ابوي ..
رماها على الرخام الين تفكك ..
بدر :فواز اهدى ..
فواز : بدر لو سمحت .. بيتنا لو ينظف من هالاشكال .. الا وين أبوي؟
بدر يأس من اخوه وجلس : ابوي منوم بالمستشفى ..
امه : فواز خلاص ..
فواز: خلاص .. وين يمه خلاص.. وكل شي بسببها ..
وجن :فواز خلاص فك شعرها ..
فواز شد أكثر وهو راص على اسنانه: شرأيك الحين ؟
وجن : فواز خلاص ..حرام
فواز ناظر أخته بحده : حرررام ؟! ها .. حرااام ياوجن أني اضربها ؟! وموب حرام كل اللي صار بسببها (قالها وهو يصرخ ) ..
بدر : وجن خليه راح يجن أكثر ..
ناظرهم فواز وتالي رفع راسها بيده وبحده: مرت خمس دقايق وماجاو.. هم قريبين من هنا ؟
نوال ترجف: لآ ..
فواز سكت وانتظر شوي يدق الجرس ..
قام بدر ..وفواز : امشي قدامي ..
مشت ولما شافت أخوها ركضت له ..
فواز وهو يأشر بيده : شوف لو باقي اشوف اختك هنا اعتبرها ميته..
أخوها يناظر اخته وهو مصدوم من اللي فيها وشعرها وشكلها المبهذل..:مين ضربك ؟
نوال ترجف : فواز ..
اخوها عصب وتقدم : مين فواز ..
فواز مشى بس وقف بدر بينهم : أنت خذ اختك وتوكل ..
أخوها دف يد بدر : لا حق اختي مايروح هدر ..
فواز :ياليل ياذا القزم .. الظاهر مااندبغت من قبل ..
بدر : خلالالاص وأنت خذ اختك الله يسستر عليكم ..
فواز : اقول احسن تربية أختس تراها مهيب متربية ..
أخوها طرطع : حسن الفاظك ..
فواز يأشر بيده وبعصيبه: اقوووووول رب اختك بس ..
بدر : خلاص فواز ..
فواز : لا خله يعرف تربيه اهله ..
نوال بكت وضحت نفسها بخوفها: لا تصدقه ..
لف اخوها عليها وهو يخزها وتالي ناظر فواز: اقول ترى منب اتبلى عليها .. والحين برآ اشوف ..
أخوها : وين أبوكم ؟
بدر: بالمستشفى ..
أخوها: لاجل كذا طردتم اختي..
فواز : اقول اختك ورقتها راح توصل لها ..ويكون بعلمك طيحه الوالد من سبايب هالزفت .. انقلعوا بسرعة ..
أخوها : أنا اتفاهم مع أبوك لما يطلع .. اجل تطردون أختي ..
فواز : احمد ربك ماذبحتها .. انقلع..
مشى أخوها وهو يتوعد ..
لما شافهم طلعوا ..نادى السواق يسكر البوابة الخارجية وتالي دخلوا..
بدر : ياخي ترى عصيبتك ذي راح توديك بداهية ..
فواز سفط اخوه وطلع لغرفته ..
نادى بدر وعد ودخلوا للصالة والجو كان جداً كئيب وحزين ..
.
.
.
ببيت اهل شهد ..
كانت شهد بغرفة نومها هي وعبدالله ولامه بوكه وجواله والمسحبه ومفاتيح السيارة وضامه نفسها وحاطه راسها على ركبها ودموعها تنهمر بصمت..
ريما حاولت فيها لاجل تأكل ورفضت وحاول عناد ورفضت ..
عناد شافها حيل غايبه عن الوعي واللي حولها ولو هي مااغمى عليها وجاها انهيار عصبي ..
بعد يدينها وشال أغراض عبدالله وكانت تناظر عمها وتسألها بنظراتها ليه كذا ..حطها جنبها وتالي عدلها وخلاها تنسدح :لازم تريحين ظهرك.. (يبها تطيعه) وعبدالله راح يطلع ترضين يطلع وأنتي تعبانة وماتستقبلينه ..
غطاها وقعد جنبها وريما تناظرهم وقوة العلاقة بينهم وبقلبه غصه على حال شهد ..
جلسوا على هالحال ساعة وشوي الين غفت ..
غطاها زين عناد ووقف لريما: انتبهي لها..
ريما: لاتوصيني على قلبي.. الله يحفظه لها..
عناد بحزن: آميييين..
طلع عناد للصالة بالدور الثاني وجلست ريما عند راس شهد بسريرها وهو تقرأ عليها لاجل تهدى نفسها ..
.
.
.
اليوم الثاني..
ببيت زياد..
صحى الساعة تسع وصحى العنود ..خلاها تأخذ شاور لاجل تصحى عدل.. وتالي نزلوا يفطرون ..
العنود : تراك دب طيب.. ليه ماتتركني انام ..
زياد سحب الكرسي وجلس جنبها : لان لازم تفطرين ..
العنود : يؤ طيب شبعت ..
زياد :اكلي زين ..
العنود: منيب مأكلة شعبت..
قامت وقام معها..
بالصالة ..
زياد جلس جنبها ومسك يدينها وقعد يتكلم معها: عنود قلبي ..(سكت شوي والعنود كانت تناظره وعارفة ان فيه شي صاير بس ماقدرت تخمن ... تكلم زياد) عنود ... (رجع يسكت ) ... (أخذ نفس) عنود عبدالله صار عليه البارح حادث ..........
صرخت العنود وحطت يدها على فمها ودموعها بسرعة نزلت ..
زياد مسك يدينها وقعد يهديها ومرآ اتخبص: والله حي لاتخافين حي ..
العنود حطت يدينها على وجهها وقعدت تبكي ..
زياد بعد يدينها بكاها قطع قلبه : طيب موب مصدقة قومي معي وتزوينه..
العنود صرخت فيه :اخوي من امس صار عليه الحادث ولاقلت.. ليييه حرام عليك ..
زياد وقف معها: صدقيني دريت بعد العشا ..
العنود بهمس ودموعها تتساقط : حرام علييك ..
زياد مسك يدينها : عنود اهدئي .. وتعالي نطلع..
حطت راسها على صدره من غير احساس منها وضمته وهو احتواها وهو يهديها الين حس بهدوئها نسبينا ..
جلسها ونادى الشغالة لاجل تجيب عبايه العنود وشنطتها ..
جابتها الشغالة وهو يساعدها لاجل تلبس .. لبست وأخذت الشنطة وطلعوا..
بالسيارة..
العنود: أنت شفته ؟
زياد: آييه البارح ..
العنود سكتت مهيب قادرة تتكلم كل تفكيرها بأخوها وهي تدعي يارب تحفظه..
.
.
.
المستشفى ..
كانت شهد تناظر من ورى القزاز وممنوع الدخول لعبدالله ..
طلع الدكتور ..
شهد :لو سمحت ممكن اتكلم معاك..
الدكتور: تفضلي اختي لمكتبي..
شهد مشت: ريما شوي وجاية ..
ناظرتها ريما وسكتت ..
بمكتب الدكتور..
شهد: خلك معي صريح .. أنا زوجته وأولى الناس لمعرفته حالته ..
الدكتور : يأختي بصراحه عبدالله بغيبوية تامه.. (كانت شهد تسمع كلام الدكتور وتدراي صوت شهقاتها وتتماسك) .. وسوينا له عملية بس الظاهر النزيف اثر على الرأس.. ولاجل كذا دخل بغيبوبه تامه..
شهد سكتت شوي: طيب راح اسفره برآ..
الدكتور: يكون أحسسن..
شهد: طيب رشح لي أفضل المستشفيات لعلاج عبدالله..
الدكتور قعد يتذكر وتالي كلم أكثر من شخص وسكر : المانيا..هناك أفضل المستشفيات لعلاج عبدالله ..
شهد وقفت: طيب شلون انقله لبرآ..
الدكتور وقف معها: راح اتكفل بهالموضوع بس ياليت يكون فيه رجل..
دقت على عمها بسرعة وجا ..
قعد يتكلمون بحدود النص ساعة ووقع عناد على ارواق تخص العلاج..
شهد: العلاج راح يكون على حسابي الخاص.. أبي يسافر عبدالله بسرعة..
الدكتور: أذا كذا خلال هالاسبوع راح يتم كل شي..
شكر عناد الدكتور وطلعوا..
عند غرفة العناية ..
العنود :متأكد انه أخوي؟
زياد حزن عليها: ادعي له..
العنود ماتحملت وطاحت على زياد اللي رفعها بسرعة ونقلها لاقرب غرفة شوي شوي وفاقت .. حست بوجود زياد وعمها عناد حولها..سلم عليها عمها: ماتشوفين شر..
العنود كانت صورة أخوها عبدالله ببالها ماغابت وهي ساكته وتتذكر..
زياد خاف عليها ليكون انصدمت ..
العنود ناظرتهم : كيف صار حادث عبدالله ؟
عناد : تعرفين السيارات ياعمك .. بس الحين ادعي له ..ماتنفع معرفتنا لطريقة الحادث بس ادعي له.. وخليك مثل ماخبرتك قوية..وبأذن الله ازمه وتعدي..
العنود جلست من السرير :أبي اشوفه ..
عناد : توك شفتيه.. تعالي الحين خلي نزور الوالد..
العنود بنرة : أبوي .. ليه أبوي كان مع عبدالله لما صار الحادث..
عناد: لالا .. بس خبرك طاح شوي والحين هو بخير توني كنت عنده..
العنود وقفت وهي تحاول قد ماتقدر تتماسك: ودوني لابوي..
طلع معها زياد .. وعناد راح شهد ..
عناد : شهد تزوين عمك ؟
كانت تناظر عبدالله لفت على عمها وهي تعدل عباتها على راسها : ازوه.. أنا مالي عم بهالاسم ..
عناد: شهد لازم تزوينه والحين هو ندمان قد شعر راسه ..
شهد بكلمه صارمة: قلت ياعمي عم بهالاسم مااعرفه .. اللي يدعي على عبدالله ويتسبب بحادثه لاجل فلوس اسمحلي عمي هذا مايستاهل يكون ابو..تكفى عمي لاتكلمني بخصوص هالموضوع .. عمي عبدالعزيز مااعتبره حي الحين ..
عناد حس فيها ومعها الحق لاجل اللي سواه اخوه .. : طيب نروح للبيت..
شهد بنرة حزن فضيعه : واترك عبدالله ..
عناد :لاجل ترتاحين شوي والعصر نجي لعبدالله ..
شهد: راحتي وانا اشوفه قدامي ..
عناد:لاجل عبدالله وضناكم خلينا نروح للبيت وترتاحين أنتي من الساعة سبعه هنا وعلى وقفتك ..
ريما مسكت يدها: مشينا شهد ..
مشت ووقفت شوي ناظرت عبدالله وهو تسودعته الله ..
.
.
.
بغرفة أبوعبدالله ..
العنود كانت تتحمد لابوها بالسلامة ولاتدري عن شي ..
دخلت ام عبدالله وعيالها ..
زياد حس راح تصير سالفة وتكشف العنود السالفة وهو خايف عليها.. حن عليها الين خلاها تطلع معه للبيت بما انها تطمنت على أخوها وأبوها ..
انصك الباب وجلست ام عبدالله على الكنب الاسود وهي تمسح دموعها وتناظر أبوعبدالله وقعدت تبأنه :الحين وش فايدتي الفلوس ونور عيون امه بالعناية مايدري عن الدنيا وكل الاجهزة عليه ..
بدر : يمه مايفيد العتب الحين .. بس ادعو له ..
امه كانت تبكي وتمسح دموعها بشيلتها: حسبي الله ونعم الوكيل.. تدعي عليه لاجل فلوس.. ولاجل انه يبي يحافظ عليها .. وابشرك مرتك طلعت وبانت النية قدامك وانها ماتبيك لاجلك لاجل فلوسك .. حسبي الله ونعم الوكيل.. من الحين اعلمك لو صار له شي الله لايسامحك ..
بدر قعد يهدي امه وأبوه اللي ساكت من وقت الحادث ولاهوب قادر يتكلم ..
حس بدر بقوة المشاكل والهموم اللي تكابلت عليهم .. دعى ربه بسره(بداخله) يفرجها ويهونها ..ويقوم عبدالله بالسلامة وأبوه ..
.
.
.
شقه فهاد*صفا ..
صحى فهاد على صوت جواله ..وتحركت صفا معه حط راسه على يدها الممدوه على المخده وغمض عيونه ..
دق جوال صفا وشالته ..وكانت عمتها ام فهاد ..
فهاد: صفووو ..
صفا جلست ووكان الرنين للجوال وقف ..:فهاد خلني ..
فهاد دفن نفسه بحضنه لانها كانت جالسة على السرير قعدت تحوس بشعرها وهي تدق على عمتها ..:صباح الخير..
عمتها: صباح النور حبيبتي .. معليش ازعجتك ..
صفا بصدق: لافديتك .. شخباركم ؟
عمتها: الحمدلله .. وكيفك وكيف فهاد ؟
صفا ابتسمت ابتسامه نايمة وهي تناظر فهاد اللي مكمل نومه بحضنها: كلنا بخير وفهاد باقي نايم ..
عمتها: صفا صحيه وخليه يمر للبيت ضروي..
صفا خافت: ان شاء الله .. بس فيه شي صوتك عمتي موب مثل كل مرة..
عمتها : عبدالله صار عليه حادث والحين هو بالعناية وأبغى فهاد يكون مع اخته ..
صفا بهمس : يالله .. أوك عمتي..
جلس فهاد وطار النوم من عينه لما سمع همسها الخايف :شفيه ؟
عطته الجوال ..
فهاد :يمه شفيه ؟
امه: عبدالله نسيبك صار عليه حادث من البارح وأبيك تجي لاختك هي الحين بامس الحاجه لوقوفك معها ..
فهاد فز من السرير : طيب طيب شوي وجاي .. سلام ..
نزل الجوال ..:صفا حضري ملابسي بأخذ اخذ شاور واطلع ..
قامت صفا وحضرت له ملابسه كلها .. وراحت طلعت غتره بيضا لاجل طلعت له ثوب اسود لان برد بالرياض ..
ناداها لاجل تعطيه ملابسه الداخلية وعطته وتالي طلع ولبس ثوبه وغتره وطلع ..
صفا: فهاد امسك ..
عطته البوك والمفاتيح والجوال .. وطلع ..
دخلت تأخذ لها شاور لاجل تروق شوي عقب هالصدمة ..
.
.
.
ببيت زياد ..
العنود كانت مخنوقة والعبره مهيب تاركتها ..
زياد : هونيها..
العنود : اهونها وأخوي بالعناية .. وأبوي مايتكلم ..!
زياد : كل شي وله حل ..
العنود ناظرته وبهدوء: طيب طلع عبدالله من العناية .. وخله يرجع مثل ماكان .. عبدالله في غيبوبة صح ؟
زياد سكت ..
العنود : الا بغيوببه .. واضح اصلن عليه .. (دنقت وهي حاطه يدينها على خدوها وتتكلم) .. آآآه ..ماشفت الاجهزه اللي عليه .. على صدره وعلى وجهه ويدينه والله اعلم وش اللي مابعد حطوه على عبدالله.. أو أبوي (حطت يدينهاعلى وجهها وشهقت ) مايتكلم .. طيب حلها يازياد..
زياد ماقدر الا انه احتواها ولمها ..
بعدت عنه وناظرته : طيب عبدالله مايسرع اعرفه .. كيف صار هالحادث ؟ أنت تدري ..
سكت زياد ..
شدته العنود : علمننني لاتخليني كذا ..
زياد: سياره صدمته ..
العنود: وأبوي؟
زياد : عمي تعرفين ماتوقع هالشي يجي لعبدالله .. فصدمة..
العنود : يارب احفظهم .. ودني لبيت اهلي ..
زياد : أكيد الحين مهم موجودين..
العنود: لا أكيد رجعت امي .. ودني لهم ..
قام زياد ولبست العنود عباتها وطلعوا لبيت اهلها ..
.