الجزء السادس والثلاثون ..
ببيت أخو ريان ..
ركض ومعه متعب : هييييييييييييييييي ابعد عنها ..
دفه ريان :واااااااااطي ..
شده ريان وسحبه وقعد يضرب فيه بالسلك ومتعب ماقصر فيه ..
ريان : متتتعب اسحببه معي ..
سحبوه ورموه بالمجلس ..
ريان : والله منيب من ظهر أبوي أن مارميتهم بالسجن ..متعب صك باب المجلس ..
صك متعب الباب وكان المفتاح فيه سكرة ..
مسك جواله وهو يأخذ نفس : الكلاب ..
دق على الشرطة وعطاهم العنوان .. نزل جواله ..
متعب مسك كتفه : ريان البنت شوفها ..
ركض لبنت اخوه وكانت طايحه على الارض ..: ممممها ..
شالها وكانت منهاراة تماما .. :مها لمسسك سوى لك شي ..
دلت يدينها على أكتاف عمها وهي تبكي بشكل يقطع القلب : عمممممي آآآه ياعمممممممي ضععت ضعت خلالاص ..
كانت تبكي وتضرب نفسها بهستريا ..:خلالاص انتهيت ..
ضمها ريان وبكى على حال بنت اخوه : جعله مايتوفق لا هو ولاربعه..
متعب جلس بالصالة لاقرب كنبه :لاحول ولاقوة الا بالله ..
ريان قومها معه : ممهها وقفي بكى حقك وأنا عمك مايضيع وأنا ريان..
جلسها عمها على السرير.. مسكت يد عمها .. :لاتروح ..
ريان : لاتخافين أنا هنا ..
مها: لا عمي أكيد راح يجي ..
ريان جلس جنبها ولمها وهو مخنوق بنت أخوه ضاعت ..
دق جواله :ذولاي الشرطة بقوم لاجل يأخذون هالخمه..
قام فتح متعب ودخلوا ..
ريان صك الباب على بنت أخوه وطلع لهم : شوفوهم داخل..
العسكري فتح الباب :سكرانين ..
ريان كان مخنوق وجالس..
متعب: آييه .. كلهم شيلوهم ..
ريان ناظره: خلهم يخيسون بالسجن..
العسكري: وش تقربون لهم ..
ريان : واحد منهم أخوي والباقين الخمه ربعه..
كلم الدوريات العسكري : أبي دورية ثانية تجيني على هالعنوان .. آييه ..
كانت متعب يناظر ريان وحاس بثقل المصيبه اللي فيها خويه ..
العسكري: بما أن الحين تم استدعاء دورية ثانية ..
ريان قاطعه بحده: لاتقولي راح تحقق الحين لان ماراح اتكلم الا بقسم الشرطة والخمه اللي داخل يقضونها بالسجن ولا راح اتنازل عن حقي فيهم ..
العسكري كأنه فهم محتوى السالفة ..:لو سمحت ياخوي الحين أنتم تحت مسؤليتي .. على الاقل أبي اعرف اسمك وصلتك بالاشخاص داخل..
ريان : أخوي وربعه.. ولاتسألني أكثر..
العسكري: طيب انتهك عرض..
صرخ فيه رياان : خلالالالاص ..
هداه متعب ..
العسكري :ياخي اهدى شوي .. ترى هذا طيبعه شغلنا ..
متعب: وأنت ياخي ذا وقت اسئلتك ..
جات الدورية وشالوهم وهم سكارى مايدرون عن الدنيا ..
العسكري عطى ريان ورقة لاجل يراجعهم ..
متعب: بكرة راح نمركم ..
العسكري: وتجي المعنية او المعنيات بالسالفة .. عن اذنكم..
طلع العسكري ودخل ريان بنوبة بكا شديدة ..
متعب : ريان ..
ريان : مها ضاعت ..
متعب سكت ..
ريان تماسك شوي وقام لها ..
دخل عمها وكانت لامه نفسها وتبكي ..
ريان منظرها قدامه مهوب رايح عن عيونه : مها..
مها رفعت راسها لعمها وناظرته : بطلبك بس طلب .. لا أحد يدري تكفى عمي..
ريان : أفا يامها وش على بالك عمك ..
مها رجعت تبكي : أببببي اموت..
ريان ناظرها بقوة ودموعه تتساقط..
مها قامت وهي تتكلم: عممي لاتناظرني كذا مستغرب.. آيييه أبي اموووت قولي وش الحياة الحين .. مافيه شي عمي يستاهل خلاص أنا ضعت ..
ريان مسكها ورفع راسها: لا ماضعتي .. دام ايمانك بالله قوي ..
مها : ايماني بالله قوي .. بس عمي انت مستوعب وش اللي صار (شدت قميص عمها وبقهر وهي تصرخ من التعب والالم والحزن) عممممممي أنت شفت المنظر اللي كنت فيه ..
انهارات على الارض وهي تبكي وتصرخ من حر مافيها ..
ريان جلس يبكي جنب بنت أخوه مهوب من كبر عمره ولاتجربته بالحياة لاجل يتماسك بمثل هالموقف .. !
متعب كان يسمع بكى رفيق دربه وهلت الدمعة من عينه لاجل صاحبه وهمه ..
.
.
.
ببيت زياد ..
تقلب بالسرير ماقدر ينام ..أخذ جواله وشاف الساعة 2 الفجر..
دق على العنود وكانت نايمة .. :آمممم..
زياد بطفش: مو قادر انوم ..
العنود جلست وفيها النوم: مين زياد.. لييه موب قادر تنوم..
زياد يحط راسه تحت المخده : منيب قادر لي ساعتين اتقلب ابي ارقد ماقدرت.. عنود اجي أخذك..
العنود تحوس شعرها: زياد اجل وش راح تسوي لما اولد ترى راح اجلس عند اهلي شهر وشوي..
زياد جلس بسرعة: من الحييين تحلمييين ليلة ومنيب قادر اتحمل ..
العنود صوتها نايم: لاتتحدى .. ومعروف يالدب لما تولد الوحده تجلس عند اهلها..
زياد ينقل الجوال : مافييه تبين كم شغالة واجيب لتس بس تبعدين عني شهر وشوي لا يابعد زياد ..
العنود : آييه هين.. المهم حط راسك على المخده ونام أبي انام لاجل اصحى بدري واجلس مع امي وابوي..
زياد انسدح : طيب اقعدي سولفي الين ماتسمعين صوتي ووقتها سكري لاني بكون نمت..
العنود : زياد تنكت أنت..
زياد: والله صدق يلا سولفي ودي انوم..
العنود: آففف ..
زياد : طفشتي مني.. خلاص بسكر اجل مع السلامة..
سكر الخط ورمى الجوال على السرير .. وهو زعلان من العنود ..
.
.
.
ببيت أبوعبدالله ..
غرفة العنود ..
كانت تدق على زياد مايرد .. استمرت تدق اغلق جواله ..: يالله وقت زعل ذا ..
طلعت من غرفتها وصكت بالباب من النوم :آفففففف ..
فتحت وطلعت لغرفة وعد اللي كانت سهرانة تكلم بدر ..دقت العنود ..
وعد: عنوووود ادخلي..
دخلت العنود ورمت نفسها على السرير وعد :لحظه بدوري.. عنود مهبولة ترمين نفسك كذا على السرير بعلم عمتي عليك لاجل تركدين ..
العنود رمتها بمخده :كملي مكالمة يالدبا..
وعد ترجع المخده عندها:هههههههه تكفين يالعصلا.. (رجعت تكلم بدر) آييه بدر ..لا العنود جاية لعندي ...ههههههههههه شكلها.. طيب حبيبي انتبه لنفسك .. بحفظ الله ..
نزلت الجوال..
العنود: كيفهم؟
وعد تحط جوالها على الطاولة جنب السرير: تمام ويقول الدكتور طمنهم ان العلاج هناك حيل متطور وراح يتشافى عبدالله بأذن الله ..
العنود بأمل: ياررررب ..
وعد: مانمتي بعد ..
العنود : زياد دق وصحيت..
وعد ضحكت: ياحرام أكيد مشتاق..
العنود ضحكت: آييه يقول ماقدرت انام سولفي ..
وعد ضحكت .. :عنوده تعالي معي نأخذ أي من المطبخ جيعانة..
العنود جلست : يلا ..
باست بنت اخوها بقوة الين تحركت ..
وعد :
لاتصحينها ماصدقت وخمدت..
العنود:هههههههههههههههههههه تحزنين ..
وعد: هههههههههه اشوف فيك يوم يالعنود أحد يجي ويصحي عيالك وتتورطين..
العنود تضحك وهم يطلعون من الغرفة : كم كف ويخمد ..
وعد: ياساتر تضربين نونو..
العنود: لما اعصب اتوطاه مهوب اضربه بس ..
وعد:هههههههههههههه يمه منك ..
نزلوا للمطبخ ..
وعد: فيه ورق عنب تبين ..
العنود: أكيييد .. وعد فيه ببسي ..
وعد : آييه ..
العنود: جيبي لي ..
طلعت وعد علبتين وصحن ورق العنب وطلعوا للصالة ..
العنود تفتح الببسي :يالبيييييييييييه وحشششني ..
وعد تناظر: وشو اللي وحشك ..
العنود : الببسي ..
وعد : ورى؟
العنود: زياد مسوي لي حظر من كل المشروبات الغازية ..
وعد: يؤ وأنا عطيتك ..
العنود:هههههههههههه صرت احببك أكثر..
وعد:هههههههههههه من الببسي ..
العنود تدق على زياد بس مغلق .. ضاقت شوي بس مابينت وقعدت تطالع مع وعد التلفزيون ..
.
.
.
شقه فهاد وصفا ..
صفا: لا شوف كم الساعة على الثلاث اجلس الين يأذن ونام..
فهاد :صحيني ..
صفا : مافيه اعرفك لامن نمت .. اقولك خل ننام وتقول لا..
فهاد ضحك : مافيه احلى من سهرتنا ..
صفا ضحكت: آييه مرآ ..
فهاد ابتسم: يالبى اللي زهقت مني وجننتها ..
صفا دفنت وجهها بمخده: خلاص ..
فهاد طار النوم من عيونه: ههههههههههههههه خلاص بهجد..
بعد المخده : ممكن افضفض لتس..
صفا ابتسمت له : تستأذن من روحك..فضفض..
جلس يسولف لها بس حست انه مخنوق وهو يسولف.. كانت تناظره وهو يتكلم عن حال شهد اللي حاز بخاطره كثير وعن سفر فارس وتركه له وعن ربعه اللي سافروا مع فارس مابقى الا كم واحد..وكانت تناظره وهي متابعه معه بأدق همومه وتفاصيلها ونظراته الحزينة وصوته الممزوج فيه الم بقهر ..
فهاد كان يلعب بالمخده ويمرر يده عليها ويتكلم وتالي رفع راسه وابتسم كأنه حس انه سولف بالحيل وخربها : اقول قمت ازود همك
صفا : ياقلبي أنتتت.. وتسولف وتضحك كأنك اسعد من خلق الله..كمل فضفضه ..
فهاد: بفور دمك لاني بفضفض عنا ..
ضحكت له ..
فهاد بعد المخده ومسك يدينها : اجل اسمعيني ..
صفا فيها الضحكه:فهااااد ..
فهاد ضحك وحط راسه بحضنها وتالي رفعه : اذوب فيك لاحاس خاطرك .. بس اسمعيني وناظري بعيوني ..
صفا دنقت ..
فهاد فيه الضحكه : لاطالعيني مافيه احلى من أنني اهذر وعيونك تناظرني ..
خلني آفضفض لين .. آفـوّر دمّـگ
وآلعب في حسبة خآطرگ .. وآحوسه
وآضآيقـگ .. وأشتّتـگ .. وألمّـگ
ويمگن مشآعر ضيقتي .. معگوسـه
شفني على آني قمت آزوّد .. همگ!
محبتگ فـي مهجتـي .. مغروسـه
حقي عليگ .. آنـگ تسگّـر فمّـگ
وحقگ عليّ .. آني آجي / و آبوسـه .!
.
.
.
اليوم الثاني ..
ببيت اهل شهد ..
شهد كانت صايمة يوم التروية (اليوم الثامن من شهرذي الحجه)..
شهد :كلمت عمي يقول الدكتور ان شاء الله يفوق قريب..
ريما : يارررب..
دقت ريما على الدكتورة لاجل تشوف موعد شهد وسجلته عندها..
شهد: ماعاد لي رغبه بشي..
ريما : شهد عشانك عشان عيالك عشان عبدالله .. ياااه ياكبر فرحته لامن رجع وعياله قباله ..
شهد دمعت: الا ياكبر فرحتي.. آآه ياريما لاشفت عبدالله قدامي وواقف على رجوله .. تدرين احاول من الحين اتخيل شعوري بذيك اللحظه..مدري وش اللي راح يصير لي .. ياااه ربي لاتحرمني شوفته متعافي ..
.
.
ببيت أبو عبدالله ..
العنود : لا يمه تونا تسع الصبح .. بروح وابرجع..
امها: بحفظ الله ..
طلعت لاجل تروح لبيتها لان قلبها مع زياد مغلق جواله ..
أم عبدالله تناظر أبو عبدالله وحاله يكسر الخاطر ماغير يهوجس ولامن فتح الباب يناظر ويتخيل عبدالله يدخل عليهم ..
أم عبدالله : وكل امرك لله .. والمكتوب صار والحمدلله عليه.. ياعبدالعزيز ماينفع حالك تسذا .. أنت انسان مؤمن ودراي ان اللي صار لعبدالله مكتوب له وهو باقي ببطني .. لاتجزع وادعي له لان دعوة الوالد مستجابة ..
كان يناظرها ودموعه تخترق لحيته الطويلة والحمرا من الحنا ..
أم عبدالله حزنت ودمعت لاجل حال أبوعبدالله .. والتزمت الصمت وهي تناظر حاله المزري كثثير ..!
.
.
.
ببيت زياد ..
دخلت العنود ونزلت العباية وحطتها بالصالة على الكنب.. وتالي فتحت شطنتها ورشت عطر ..
طلعت للدور الثاني ودخلت لجناحهم .. شافت زياد باقي نايم ومنعرض بالسرير والجوال مرمي بآخر السرير..
عدلت بلوزتها وجلست على السرير .. :زياد .. زياد .. يالله ياثقل نومك قوم بيبي ..
انحنت عند راسه واشرقته بعطرها ..تحرك شوي .. العنود بعدها قريبه منه حيل: قوم ..
فرك عيونه وتالي سكرها وفتحتها ثاني : عننننود ..
العنود :آييه عنود .. قوم ..
زياد جلس وباسها : ناوية تجنيني من الصبح.. يالبى هالجمال..
ضحكت : يالله صباح خير قوم توك صاحي وتتغزل..
زياد ابتسم: وش صحاني غير ريحة عطرك ..
العنود قامت من السرير :قوم خذ لك شاور لاجل تصحصح وتالي نطلع نفطر ..
زياد مد يده لها وقومته..
زياد :غريبه جاية..
العنود ابتسمت :لاجل اللي زعل البارح ..
ضحك ومشى يحضر له ملابس : بجد زعلت .. العنود تفهمي احتياجي لتس ..
العنود جلست على الصوفا : وأنت تفهم ظروفي ..
زياد يصك الدولاب: على عيني وراسي.. بس أنتي لي مقدر على بعدك.. قدري بس هالشي.. ترى بجد بجد أحببببك ..
العنود : زياد تتكلم من جدك ؟
زياد يناظرها بجدية : آييه بجدية.. أنتي زوجتي ومن ابسط حقوقي عليك ماتباتين برى البيت .. أنا اولى الناس فيييك اولى فيك من امك وابوك واخوانك ..
العنود رفعت حاجب وهي تناظره ومستغربة من جديته ..
زياد : اعترف عندي حب تملك (قالها وهو مبتسم وتالي دخل يأخذ شاور) ..
العنود رجعت راسها على الصوفا : موال جديد ذا ..!
.
.
.
سيارة متعب ..
ريان : مها قولي كل اللي صار ..
مها كانت ساكتة وماينسمع يكود صوت بكاها ..
ريان : والله مايضيع حقك وأنا عمك ..
وقف متعب قدام قسم الشرطة .. ونزلوا ..
دخلت وهي تمشي ورى عمها ومتعب .. اللي وقف برى المكتب ينتظرهم..
دخلوا للمكتب ..
الملازم سعود : تفضلوا ..
ريان جلس وجلست بنت اخوه جنبه ..
الملازم سعود: طبعا عندي السالفة بشكل عام بس لازم اعرف السالفة بأدق تفاصيلها .. لان فيها سجن وغرامات وممكن ارواح تتلف..
ريان فرك يدينه ..
الملازم سعود: الحين ممكن تكون الاخت وحدها ..
ريان: نعم ؟!!
الملازم سعود: يأخ ريان هذي الاجراءت ..
ريان : العرف يقول ماتقعد البنت بدون محرم..
الملازم سعود :القضية حساسه جداً .. رجاء خلنا..
ريان همس لبنت أخوه وتركها ..
الملازم سعود: ممكن تعرفينا بأسمك وعمرك وكل شي عنك ..
مها قعدت تتكلم وتقوله ..
الملازم سعود: الحين راح ندخل الاشخاص المتهمين وراح تتعرفين على المتعدي عليك(قالها بألم)
مها بخوف وانمكشت على نفسها:لاآآ
الملازم سعود : لاتخافين أنتي بحما الله ثم حمانا .. بس لازم يدخلون..
مها رجعت تبكي ..قام الملازم سعود ونادى عمها بسرعة ..
جلس ريان يهديها وشوي الا بدخلتهم..
مسك العسكري ريان ..
الملازم سعود : ريييان جزاهم عندنا ..(كان واقف وبيده قلم ويأشر عليهم باحتقار) يامها مين منهم ..
انتظر وهو يناظرها وتنرحم اشرت على واحد منهم ويدها وكلها ترجف..
الملازم سعود بأسى: ووين أبوك منهم ؟
ريان : ذا ..
ماقدر يمسك نفسه قام ومسك أخوه من ياقه ثوبه ويهزه بقوة ودموعه تنزل :شفت وش جنيت من ورى الخمور والسكرة ..شفت ضعيت عرضك شرفك سمعتك..ضيععععت بنتتتك ..
كان أخوه بعده دايخ ..
الملازم سعود بعده : العتب والتأنيب ماينفع معه الحين لان مابعد صحى..
نادى العساكر لاجل يشيلونهم الا المتعدي على مها..
وسحبوا العساكر ريان وطلعوه برى لاجل ماقدر يمسك نفسه وضربه..
الملازم سعود : محمد ودوه واغلسوه الين يفوق ..الله لايبلانا..
سحبه محمد بقرف واضح .. وكانت مها منهاراة تماما ..
الملازم سعود:مها حقك ماراح يضيع ..
مها بدت تغيب عن الوعي تدرجيا من شافت المعتدي عليها..
الملازم سعود ركض ومسكها ونادى عمها ..اللي شالها ونقلها للمستشفى..
.
.
.
ببيت زياد ..
العنود : اوك طيب وصلني لاهلي..
زياد: خلاص خليك بالبيت..
العنود: متفقين على يومين..
زياد: وكلامي قبل شوي..
العنود تلبس شيلتها : رأيك .. بس ذولاي اهلي..
زياد: وأنا زوجك..
العنود: كلكم عينين براس.. بس أنت قدر..
زياد: مافيه شي لاجل اقدر..
العنود وقفت يدها : كل ذا يازياد ومافيه شي ..!
زياد مسك يدها: لا مااقصد كذا..
العنود: اجل ؟!
زياد: اقصد مايستدعي تجلسين ..
العنود: دامي حطيت اني راح اجلس فراح اجلس..
زياد ناظرها شوي : خلي شغل العناد..
العنود: زياد براسك حرش اليوم؟
زياد حس راح يتهاوشون وخمدها من بدايتها وهو يلمها :لاتلوميني يابنت ..
العنود تحاول تبعده: زياد خلالالاص ..
زياد ماتززح: وأن قلت لا..
.
.
.
بريطانيا..
سارة : خير ..
فارس: لبسك ماتطلعين فيه..
سارة: اقول لبسي محتشم وراح اطلع للجامعة وراح اطلع مع لطيفه..
فارس: وأنا اقول مافيه طلعه الين تبدلين..
سارة تخصرت : آييو ..
فارس: اللي سمعيته ..
سارة رمت الشنطة بالصالة :تدري منيب رايحة جامعة وبالطقاق..
دخلت وصكت الباب..مشى فارس وفتح الباب :بدلي وامشي اشوف..
سارة تفك الحجاب وترميه :لا..
جلست على طرف السرير وتفك الشوز ..
فارس تكتف وهو يناظرها وهي تفك الشوز ..ويبي يشوف اخرتها مع هالبنت..
فارس : بببنت ..
سارة خزته: اطلع برى..
فارس بعصيبه:سسسسسسسسسسارة وبعدين ..
سارة وقفت :أنت وبعدين معاك ..
فارس قرب لها وهو يمسك يدينها وبقوة: غررروك ورفعه خشمك نزليها لا أذلك بطريقتي الخاصة واخليك ذليله بعين نفسك ..
سارة : تخسسى .....
مامداها تكككمل كلامها الا ضربها بقوة في منطقة الرقبة على جنب : مايخسى ويعقب الا أنتي.. يكون بعلمك المره اللي ماتسمع حكي رجلها مالها قيمه ولاقدر بعينه..ولا أنتي متربية لو متربية ماكانت ذي حركاتك ..
سارة كانت تناظره بصمت وبعيونها اسئلة ممزوجة بصدمة من كلامه..وبقلبها كل شي يهون الا انه يشك بتربيتها واخلاقها ..
فارس بقسوة:كلامي ماينعاد ثاني مره والحين بدلي وخلي نطلع للجامعة..
سارة بعدت عنه بتوهان وجلست على السرير وهي حاطه يدنيها على أطراف وجهها.. فارس كان يناظرها رده فعل منها ماتوقعها ابد توقع تهاوش تصارخ تسوي أي شي بس ماتضل ساكتة .. طلع من الغرفة ورمى نفسه على الكنب بالصالة وهو يسترجع كلامه لها بهمس وهو يشد يده: جرحتها جرحتها الين متى ؟!!
جلس وقت وقام لغرفته دق على فهاد ..
فهاد:حي هالصوت..
فارس انسدح على السرير بهم : هلابك .. كيفك..
فهاد كانت بمكتبه سكر الملف : منيب بخير من عقب نبرة هالصوت..شفيك يالغالي؟
فارس: تهاوشنا..
فهاد قام يمشي بهدوء:مين السبب منكم؟
فارس:كلنا .. بس مشكلتي قلت لها مهيب متربية ..!
فهاد بغرابة: لييه ؟
فارس: لانها ماتطيعني بأي شي .. أقولها الدرب يمين تقول يسار..
فهاد : يعني عناد السالفة ؟
فارس جلس: عليك نور.. تعبت معها وتعبت معي.. (بتردد) ضربتها..
فهاد انصدم: مهبول تضربها ..
فارس :خلها تتأدب.....
فهاد قاطعه: طيب صارت لي مشاكل مع صفا مايعلم فيها الا الله وهواش الييم بس ماعمري فكرت امد يدي عليها..مفروض تمسك أعصابك..
فارس:تكفى يافهاد أبي منك الحل.. اعترف أنا بديت بصدها ولاكنت أبيها.. بس البنت جابت راسي وأنا أخوك والحين صاده عني صده بنت يهود ولا حاطه كل أغراضها بغرفة ثانية اقسم بالله حالنا زفت..
فهاد زفر بضيقه من حال تؤامه: شوف ماعندك الا أنك تعتذر لها لانك أولا جرحتها وثانيا ضربتها ..
فارس: الحين لما ضربتها ماتكلمت ماقالت شي .. ودي انها قالت شي لاكن سكوت تام..
فهاد: اصبر عليها..
فارس: اصبر وين الصبر .. !
فهاد: فارس ورى الصبر خيره.. وبعدين مثل ماقلت لك من قبل البنت ماتبغى غير الحنان عطها حنان ولمها لعندك كل ماضاقت منك وبعدين كأني سمعت أن كل منكم بغرفة ..
فارس :آييه ..
فهاد: ترى صارت معي لاكن اجبرتها تنام معي بالغرفة وكلن منا كلنا بحاله ..
فارس: أقولك هالبنت عنيدة العناد مخلوق منها .. ماتتنازل عن شي لو كان اللي كان .. ماتعرفها يافهاد ..
فهاد : ارجع واقولك خذ البنت بحنانك ..
فارس :بحاول ..
فهاد يبي يروقه : طحت وأنا أخوك في حبال بنت محمد ..
فارس ابتسم : لاكن علقت اخوك بهواها وصدت..
فهاد :تجيبها وأنت فارس ..
ابتسم وبقلبه ماتعرفها وأنا اخوك .. : اقول فهود يدق الجرس شكلها خويتها ..
فهاد: خلاص طمني ..
فارس: ان شاء الله ..
سكر من اخوه وطلع لاجل يفتح الباب وشاف مع العين السحرية وصد بسرعة ..
دخل للغرفة: شكلها زوجة عبدالرحمن ..
قامت ومرت من جنبه .. وشاف اثار يده في رقبتها ..
صك الباب لاجل دخلت لطيفه..
بالصالة ..
لطيفه: ماجهزتي ..
سارة : الا بس احس اني تعبانة شوي ومالي خلق..
لطيفه: اوك ..عطيني طيب اوراقك راح اروح أنا اوديها والدوام والمحاضرات ماراح تبدء الا الاسبوع الجاي..
سارة: يافديتك ماتقصرين .. بجد حيل كسلانة..
لطيفه وقفت: روحي عطيني ..
سارة فتحت الشنطة لانها كانت مرمية بالصالة وطلعت الاورق وعطتها..
أخذتها لطيفه وطلعت ..
طلعت سارة جوالها ودقت على أبوها ..
سارة: آهلين بابا ..
أبوها: هلا بحبيبه البابا .. شخبارك؟
سارة من سمعت ابوها بكت : زفتتت ..
أبوها تكدر :عسى ماخلاف..
طلع فارس من الغرفة وهو يناظرها وهي تكلم وتمشي بالصالة وتبكي حتى كلامها موب مفهوم كثير من صوت شهقاتها ..
سارة : الليلة تجي بابا .. آوك .. مع السلامة..
صكت الجوال وفارس يناظرها بصدمة :كلمتي أبوك ؟
ساره شالت شنطتها وجوالها ودخلت للغرفة ..
فارس كان واقف بباب غرفتها صك الباب ..
ساره لفت عليه : آييه كلمته.. ليه على بالك راح اسكت لك انا قلت لك من قبل لو مديت يدك تحمل اللي يجيك ..
فارس :أنتي استفزيتني ..
ساره : لا .. والمره اللي طافت بعد استفزيتك .. أنت مديت مرآ وسكتت لك بس تحمل اللي يجيك ..
فارس : أنا اسسف..
سارة :آسسف .. لما يجي البابا اشوف قوتك اللي كل شوي مطلعها علي.. ترى اللي يطلع قوته على بنت مهوب رجال.. !
فارس تماسك لاجل مايضربها ..
ساره: اطلع..
فارس تقدم لها :ممكن نتكلم مع بعض ..
ساره : تبي تعتذر او تبرر لكلامك مايفيد ؟ ماراح يفيد أنت ضيقت صدري وانتهينا..
الكـلام احيـان مـا منـه ثمـره
خلّني ساكـت وسـوّ اللـي تبـي
ضيّق الخاطـر كلامـك وكسـره
آه .. من كسر الخواطـر وتعبـي
ساره تكمل وهي تشوف نظراته :يالله عمري ماشفت شخص مثلك ياحبك للجرح ..الى الان احاول ادور فيك عن خصلة حلوه تخليني اتحمل واكمل الاربع سنين الجاية بس مقدر مستحيل لما يجي البابا اجلس معاك ..
فارس : راح ترجعين للرياض..
سارة: أكيييد وشاللي بالغربة ..
فارس بحزن: وأنا ..
ساره صدت : مابيننا شي ..
فارس: لا بيننا .. اسمى شي بالوجود كله ..
ساره ناظرته واكتفت فيها..
فارس: لاترجعين والحين تكفين كلمي ابوك وبلاش يجي..
ساره المتها رقبتها وحطت يدها .. فارس مشى وجلس مقابلها على السرير تردد وهو يبي يحط يده على مكان المها .. كيف هو سببه والحين يحاول يخفف عنها .. ماخاب ظنه لانها بعدت يده وهو يناظر بعيونها الممتلئة حزن على حالها ..
استند انه يقوم ويخليها لان عنده يقين ان شوفته تزود جروحها جروح ..!
.
.
.
الرياض ..
المستشفى..
الدكتورة : معاها انهيار عصبي وحاد للاسف..
ريان كان ساكت وباين الهم بوجهه ..
متعب: طيب الحين راح تجلس هنا..
الدكتورة: أكييد ..
متعب: يعطيك العافية ..
راحت الدكتورة ..
متعب: ريان هونها..
ريان ناظر رفيق دربه : يامتعب ذي مافيها هونها ولاغيرها..
متعب : بأذن الله ربك يحلها .. لازم تتماسك لاجل البنت..
ريان : أنا خايف عليها تسوي بنفسها شي..
متعب: الحين هي نايمة والدكتورة تقول مفعول المنوم يمتد لمده 12 ساعة لاتخاف..
ريان : يمكن تصحى..
متعب: ماراح تصحى قبل ماينتهى المنوم .. وحتى البنت تعبانة راح تطول أكثر.. مشينا ..
ريان: بدخل اتطمن عليها ..
دخل وجلس متعب ينتظر ريان .. دق جواله : هلا طلال.. وعليكم السلام.. بخير الله يسلمك..هههه خلاص بعد شوي بمركم.. سلام..
سكر جواله ودخل بجيبه على طلعه ريان ..
بسيارة متعب..
ريان : صورة مها بغرفتها مهيب قادرة تنمسح من ذهني..
متعب : تدري ماابشع منه الا حادث أخوي عبدالله ..
ريان مسند راسه واكد على كلام خويه بأييوه..
متعب: وش السواة الحين ؟
ريان : مدري احس اني مششوش تفكير..
متعب: ان شاء الله نلاقي حل..
ريان: حل السالفة يامتعب عرض انتهك وين الحل ؟ مافيييه لو نقلب الدنيا حل .. كل شي له حي الا هالاشياء مافيها حلول..
متعب : يحلها الله ..
وقف قبال شقه الشباب ..
ريان: راح تنزل..؟
متعب: لا بروح للشركة ..راح امرك العصر..
ريان: لا ارتاح .. ومششكور يامتعب تعبتك معي..
متعب: افا ياريان تقول هالكلام..الاخوان مابينهم مثل هالكلام.. وسع صدرك لاجل مايحسون الشباب ان فيه شي ..
ريان : ان شاء الله..يلا سلام ..
متعب: بحفظ الله ..
نزل ريان ومشى متعب للشركة..
.
.
.
اليوم الثاني..
المغرب ..
كانت شهد تسمع الاذان وهي تردد معه ..وأكلت تمره على سنة المصطفى صلى الله عليه وسلم وهي تدعي لعبدالله بالشفا العاجل..
قال ابن عمر : « كان يقال إن لكل مؤمن دعوة مستجابة عند إفطاره ، إما أن يعجل له في دنياه ، أو يدخر له في آخرته » . فكان ابن عمر يقول عند إفطاره : « يا واسع المغفرة اغفر لي ».
ريما: شهد خذي شوربة ..
شهد :مالي نفس .. (حطت يدها على خدها) سنويا أنا وعبدالله نصوم سوى ..وكان دايم نصوم العشر الاولى من ذي هالحجه بس هالسنة ماصام معي..
ريما كانت تناظرها وهي تتكلم وقطعت قلبها..دخل عناد..ولاحسوا فيه..
عناد:سلالالالالالام..
ريما لفت وهي مبتسمه:هلالالا والله..
قامت لاجل تسلم عليه وقامت معها شهد ..
ريما:صايم..
عناد ابتسم: أحد يتوفه يوم عرفة..
جاء عن النبي صلى الله عليه وسلم أنه قال" : صيام يوم عرفه أحتسب على الله أنه يكفر السنة التي قبله والسنة التي بعده "
[ رواه مسلم ]
ريما: متى وصلت؟
عناد: على صلاة العصر بس خبرك حوسة المطار وكم شغله.. (ناظر شهد ) شخبارك شهد؟
شهد ابتسمت ابتسامه ميته: الحمدلله..
عطت ريما عناد تمره وقهوة ..لاجل يفطر وتالي قدمت له شوربة..
عناد:شهد افطري..
شهد:بس عمي شربت موية وثقلت زود..
عناد:لازم تأكلين..
شهد وقفت:ان شاء الله.. بروح اصلي المغرب..
مشت ..
عناد : ماتأكل..
ريما:لا.. تكفى عناد حاول فيها.. أخوها فهاد امس تعب معها ..
عناد: شهد ماراح يتعدل حالها الا برجعه عبدالله..
ريما: راح يصير لها شي كذا.. ماتأكل ابد ..
عناد: خليها تصلي وراح اتكلم معها..
.
.
.
ببيت أبو بندر..
بعد المغرب..
أبوبندر: كلهم بكرة راح يتجمعون بالمزرعة وراح نتغدا هناك..
بندر: شورك وهداية الله..
نورة:بس يبه أنت شايف الظروف..
أبوها: لازم نعيد.. وحتى أخوي ودي يطلع من حالته ..
بندر: خلاص راح اكلم العيال ونطلع كلنا بعد مانصلي العيد..
أبوه: كلهم يجون ..لاحدن يتخلف..
بندر: ان شاء الله ..
.