.
الرياض..
ببيت أهل شهد ..
فهاد يتغدا ويخلي شهد تأكل ..:لا راح تأكلين.. فاضي يرجع عبدالله ويهاوش فيني ..
ابتسمت: خله بس يرجع..
فهاد بثقه بالله عز وجل: بيرجع بعون الله ..خذي ..
حط لها قطعه لحم وقطعها لها ويحط لها عصير :كلي .. حرام وأنا اخوتس هالتؤام الحلوين مايتغذون.. شكلي كنت أنا وفارس مثل عيالتس الحين لما تزعل امي تسحب علينا وحنا ببطنها..
ضحكت شهد ..
فهاد مسك كفه أخته: اضحكي يانور عيون أخوك يازين ضحكتك ..
شهد :وسعت صدري بوجودك معي ..
فهاد: هههههه أجل بغثك الليلة برقد عندك ..
شهد: ينور البيت..
فهاد: النور نورك ..
دخلت امهم وشافتهم يتغدون ..:تغديتوا.. فهييد هما قلتك لاتسوي اختك غدا..
فهاد ابتسم: نسيت ..
شهد قامت لامها: تعالي يمه تغدي معنا ..
امها: جبت غدانا ..أبوتس راح لم أخوانه يتغدا عندهم ..عاد قلت نتغدا عندك ..
شهد : فديتك يمه ..
دخلت هديل وبشرى ورنيم ويزيد ..
فهاد: جاو الشلة ..
امه: مبسط عندك ياشهد ..وين مرتك؟
فهاد: زوجتي العزيزة عند اهل أمها ..لان تو امها جات من تبوك وخليتها معها..
قعد يأكل ويسولف وامه تسمع لسوالفه وتضحك ..
.
.
.
المزرعة ..
صحت نجد من النوم على صوت بنت عمتها تصحيها .. جلست وهي تكح وحاسه بكتمه ..
بنت عمتها:نجد فيك شي..
نجد اشرت بيدها بمعنى لا..
بنت عمتها:شوفي وجهك شكلك مكتومة..
راحت ونادت امها..
أم طلال: نجد شفيك..
نجد بكت وحطت راسها على صدر أمها: موب قادرة انتفس..
امها تمسح على راسها بحنان :اسم الله عليك .. بقوم انادي زياد..
رجعت امها راسها للمخده وكلمت زياد اللي ماطول وجا ..
زياد ينزل السامعات: يمه نجد معها ربو ؟
امه: لا ..
زياد: يبي لها اوكسجين..يمه ساعديها لاجل تلبس وبروح فيها للمستشفى..
امه: طيب ..
زياد: ونادي يمه العنود لاجل نروح كلنا منيب راجع فيذا ..
طلع زياد ..
عند الرجال..
زياد يلبس شماغه: آييه تعبانة معاها ضيق تنفس..
عمه :وراه هالضيق؟
زياد يعدل الشماغ ويناظر عمه: علمي علمك ياعم ..بس انها مخنوقة بالحيل..
بندر كان يناظر زياد وهو يتكلم وحاس بكتمه وهم لانه هو تسبب لنجد بهالشي..
طلال :اقول بحرك معك للرياض ..
عمه: وراه ماتجلس..
طلال :ورانا اشغال ياعم ..
متعب وقف: وأنا بعد بحرك ..
أبو بندر: افا يالعلم ..وأنت ياأبو عبدالله ..
كان يناظرهم وساكت ..
متعب: الوالد معي ..
أبو بندر: آجل كلنا..
طلعوا من الخيمة وكان زياد يفتح سيارته ويسند اخته ..وعيون بندر تناظرها بحزن ..
العنود ركبت جنبها وام طلال قدام ..
حرك زياد وطلع من المزرعه ووراه سيارة أخوه ونسيبه متعب..
زياد : نجد حطي راسك ياخوك الطريق طويل ..
خلتها العنود تحط راسها على رجلها ..
زياد: الوالد كلمني وتراه بخير..
امه: آييه كلمني يقول الليلة عمليه عبدالله..
زياد: ان شاء الله انها خير..
العنود كانت تسمع كلامهم وتدعي لاخوها بسرها ربي يحفظه ..
.
.
.
الليل..
المستشفى..
نجد :خلاص زياد مايستدعي هالشي ..صدقني الحين أنا تمام ..
زياد: بشوف للدكتور ..
طلع أخوها وهي تحط يدينها على عيونها لاجل تخفي مشهد من خيالها ماغاب من حركة بندر ..
دخل طلال :السلام..
نجد كانت سرحانة وبنفس حالها..
قرب لها أخوها وحط يده :نجد ..
فزت :بعد ..
طلال :نجد أنا أخوك ..
تعوذت من ابليس وجلست :آهلين طلال سوري..
طلال مستغرب: لا عادي.. الحمدلله على السلامة..
نجد: الله يسلمك ..
طلال: شخبارك عسى خفت الكتمة..
نجد: آييه الحمدلله ..
طلال: زين الحمدلله ..
دخل زياد وشاف طلال: هلا طلال ..
طلال: هلابك ..
زياد: خلاص نجد الليلة تطلعين ..
نجد:زين ..
قامت ..
زياد: ياساتر تبي الفكة..
ضحك طلال: ماتنلام المستشفيات ياثقل دمها وغمها ..
زياد :آخس ياللي الحين يقالي مجربها ..
ابتسم طلال وهو يتذكر سنه وشوي قضاها بالمستشفى ..
.
.
.
آخر الليل
المانيا ..
بدر : عمي نجحت..
أبو طلال ابتسم : آيييه الحمدلله .. (أخذ نفس) كانت معقده ..
بدر: اللهم لك الحمد ..
أبو طلال :وين جوالي يابدر ..
عطاه بدر ..
أبوطلال:لازم شهد تدري بهالخبر ولو كان الوقت متأخر ..
دق عليها ..
شهد: عمي هابشر نجحت ..؟
عمها ابتسم: ابشرك نجحت ..
شهد هلت دموعها: يارب لك الحمد .. طيب صحى..
عمها: راح يبان هالشي خلال اليومين الجايين ..
شهد جلست على طرف السرير:يارب يصحى ..
عمها: ادعي له ياعمك .. والله يشفيه .. شهد الحين راح يطلع من غرفة العمليات وبروح له ..
شهد :آنتبه له ياعمي.. غطوه زين ..
عمها رحمها حيل وهي توصيه : بعيوني عبدالله .. بكلمك واطمنك كل وقت ..
شهد:تسلم ياعمي ماقصرت والله .. بحفظ الله ..
أبو طلال : ماسويت ياعمك غير الواجب ..مع السلامة..
سكر من بنت أخوه .. وتالي راح لعبدالله ..
.
.
.
بريطانيا ..
شقه فارس*ساره..
غرفة نومهم ..
ساره سحبت شوي من الغطا ..
فارس لف وسحب الغطا ..
ساره جلست : خير تسحب الغطا ..
فارس :انتي بديتي ..
ساره: آففف منك ..
فارس قام وسحب بطانية :خلاص خذي ذي ..
طلع البطانية مع الكيس وتلحف :اقول طفي النور ..
ساره: منيب مطفيته ..
فارس : منب احب النور وأنا نايم ..
ساره: مهوب شغلي ..
فارس تحرك شوي وتكى على فخذها وطفى النور :ياويلك لو تشغلينه خليني اخمد ..
ساره شغلته: لو طفيته بعلم بابا ..
فارس جلس وجاته ضحكه : قولي ق .. كلمي اشوف البابا وقولي فارس طفى النور .. كلميه ..
ساره: آفففففف ..
فارس : أنتي اصغر أخوانك كلهم ؟
ساره خزته ..
فارس يتذكر: الا اصغرهم أنتي .. لاجل تسذا مبرزه ..
ساره : مابزر غيرك ..
فارس : لاجل أبوك بسكت يالجاهلة..
ساره :هيييييييي ..
ضحك فارس : أعصابك .. اقول بخمد وامري لله ..
ساره بهمس: طس ..
فارس سمعها لف عليها: شكرآ ياحياتي ..
ساره :هيهي مسوي اخلاق ..
فارس سحب ولاعاد رد ..
ساره حطت المخده وحطت راسها لاجل تنام ..
فارس :ساره طفي النور ..
ساره :لا..
فارس: اجل بكرة دوري وراح اطفيه فاهمه ..
ساره قعدت تتحلطم بصوت واطي ..
فارس بصوت نايم :طلعي صوتك ..
ساره: طس عني ..
حطت المخده على راسها ونامت ..
.
.
.
بعد يومين ..
الرياض ..
كانت شهد تكلم عمها وقالها ماصحى تحطمت وضاقت آخلاقها ..
عناد :ان شاء الله يصحى ..
ريما جات عقب ماسكرت من أختها : عناد الليلة الجمعة ببيت أهلي..
عناد :يصير خير ..
ريما: شهوده ترى أمي عازمتك ولازم تجين ..
شهد: ياقلبي صدقيني مافيني لاي طلعه .. حتى عند امي مارحت وشوفي الباب بالباب ..
عناد: اطلعي وسعي عن صدرك..
شهد : لا عمي مالي رغبة ابببد .. وحتى نجد راح تمرني الليلة وتقول راح تبات معي .. فـ عشان كذا لاتشيل ياعمي همي .. ماعلي خلاف..
.
.
.
المستشفى ..
كان بندر ينتظر .. شافه زياد : بندر هلا ..
بندر كان محتاس: هلا ..
زياد: سلامات شعندك هنا؟
بندر: زوجتي هنا راح تولد ..
زياد: آييه تقوم بالسلامة .. لاتتروع ..مين الدكتورة داخل؟
بندر: مروة..
زياد: لا تخاف بأيدي امنيييه دامها بمستشفى أبو طلال..
بندر: لها حول الساعتين ..
زياد ابتسم : ولادة تراها .. طيب متى جبتها؟
بندر: من ساعتين ..
زياد: تطمن ..بعون الله خير..
طلعت الدكتورة مروة وبشرت بندر بأن جا له بنت ..
زياد: من قدك صرت أبو .. مببروك وتتربى بعزك والله يصلحها ويجعلها من حفظه كتابه ..
بندر بفرحة: اللهم امييين ..
مشى زياد لان عنده شغل .. وبندر جلس ينتظر الين يطلعون غاده لغرفة الزيارة ويشوف بنته ..
.
.
.
بعد عده آسابيع ..
.
.
.
ببيت أهل أنفال ..
أنفال كانت تكلم عمر وصوته متغير ..:فيك شي؟
عمر : أنفال الليلة نامي ببيت اهلتس أو اقولك اقعدي الين تملين منهم..
أنفال استغربت: ليه طيب؟
عمر: ماتبين أهلتس ..؟!
أنفال : عمر لاتحور الكلام على كيفك .. أنا مستغربة بس..
عمر يمشي بالاستراحه وحده: كذا .. خلاص مزاجي أنا ارجع مثل قبل عزوبي مايقيدني أي شي ..
أنفال: اها .. يعني كذا ..
عمر بتوهان: وفيه غيرها ..
أنفال : وشو غيرها ..؟
عمر: منيب رايق لاجل اتكلم ..
أنفال شوي تبكي : لا تكلم ..
عمر: قلت لتس منيب رايق ..
أنفال :عمر قولي شفيك ؟
عمر بحده : أنفال تبين الصدق ..
أنفال: شرأيك يعني ؟!
عمر :غلطه أننا تزوجنا .. لانها نزوة طيش وراحت ..وحتى الكل يتكلم..
أنفال بعدها ماسكه نفسها ماتبكي : بـ وشو يتكلمون؟!
عمر : كل اهل الوالد .. لاني تزوجتك وأنتي مطلقه .. ومن كلامهم احس اني تسرعت.. وحتى اشياء كثيرة ..
أنفال جلست :آييه وشو الاشياء ؟
عمر: ماله داعي الحين ..
أنفال: أنت ندمان على زواجنا..؟
سكت..
أنفال: ندمان ياعمر صح ..
عمر مارد ..
أنفال: ماراح تغير كلمتك وردك علي الحين ..
عمر: خلينا نبعد عن بعض ..
أنفال: براحتك ماتفرق معي عقب كلامك.. اجل ندمان ياعمر لانك تزوجت مطلقه ..
عمر :لا ....
قطعت كلامه: وش راح تقول يعني .. يأخذ الجرح ياعمر لامن جا من غالي .. أنا كنت رافضة أننا تنزوج بس أنت اصريت وحديتني ..
عمر سكت ..
أنفال : سوى اللي تبيه ..
سكرت الجوال ونزلته ورده فعلها كانت متفاوته لانها كانت متوقعه هالشي يصير بأي لحظه ..
دخلت امها : انفال شفيك ؟
أنفال: لا يمه ولاشي .. يمه بنام هنا ..
امها ابتسمت: زين وافق عمر ..
ابتسمت أنفال لامها ولاقدرت تتكلم ..
امها : طيب كتبك هنا ..
أنفال: بجيبها بكرة ..
أمها: ماعندك دوام ؟
انفال: الا يمه .. بس الجامعة مانحتاج الكتب ..
امها: وملابسك ..؟
أنفال : محاضرتي تبدء ثمان بخلي ملوك يوصلني لاجل أخذ ملابسي وتالي يمرني سواق الباص..
قامت :يمه بروح انام ..
أمها تطلع معها: حتى أنا بطلع لاكن عبدالملك مابعد جا من الاستراحه الله يصلحه ..
أنفال: مع عمر يمه ..
امها: الله يهديهم هم وهالسهرات ..
وصلت امها لغرفتها :تصبحين على خير..
أنفال: وأنتي من اهله يمه ..
.
.
.
ببيت زياد ..
العنود تطالع ببطنها اللي برز شوي :خخخخخخخخخخ شكلي شي..
ضحك زياد : جعلني فدوة بسس..
العنود ابتسمت: ياااه وحشتني هالكلمة ليه ماصرت تقولها ..
ابتسم لها زود : جعلني فدوة لتس .. وجعلني مافارقك وجعلك تموتين فيني زود وزود ..
ضحكت وهي حاطه يدها بشعرها : مشكلة كأنك ماتدري اني ميته فييك يالدب..
زياد فك شعرها: خلييه كذا ..
العنود تفله أكثر وبان طوله وكثافته ..: يتعب زياد ..
زياد: لاتفكرين تقصينه ..
العنود : منيب قاصته ارتاح ..
ضحك ..
العنود : زياد بعد آحس راح يروح البيبي من كثر ماتحط راسك على بطني ..
زياد :هههههههههههه ياكثر خوفك على هالبزر..
العنود تحط يدها على بطنها:أكييد راح اخاف عليه .. المهم قوم ..
تحرك زياد وجلس :قمت شفيه؟
العنود :بنننننننام وراي جامعة الصبح ..
زياد : حتى أنا وراي دوام ..الله ياهو ضغط علي رهيب ..
العنود: ياقلبي أنت ..زيود تدري أنك ناحف ..
زياد : ضغط يالعنود ..مسؤليه ادراة المستشفى صعبه .. وكل شوي اجتماع من غير المشاكل ونجد شايله حمل كبير..
العنود: يالبى نجد ..الله يرزقه الزوج الصالح ..
زياد: ان شاء الله.. نجد يتقدم لها واجد بس هي رافضة وكل مره تقول استخير وماارتاح ..
العنود: خلاص اجل الخيره فيما اختاره الله ..
زياد: على قولتك ..
العنود : فييييني نوم .. تصبح على خير..
زياد يحك حاجبه: عنوده نامي بحضني ..
العنود :وبطني .. اخاف تتهور مع النوم وتضرب عليه ..
زياد ابتسم: لا .. بس تعالي نامي ..
راحت لحضنه ودفنت نفسه تحت حلقه :يالبى الدفا ..
زياد ابتسم ولمها أكثر ..

.
.
.
اليوم الثاني ..
الصباح ..
كانت أنفال في شقتهم لاجل تأخذ ملابس للجامعة وتبدل .. تحرك عمر على تقفيله الباب وقام بسرعة وشافها كانت تأخذ كتب المحاضرات ..
عمر واقف بعيد عنها:صباح الخير..
لفت عليه :اهلين ..
عمر: غريبة جاية .. احنا مو اتفقنا نبعد عن بعض ..
انفال رفعت راسها وناظرته وتتماسك قد ماتقدر ماتبكي ولايابن بصوتها رجفه : أنا جيت لاجل اخذ ملابسي من هنا وأغراضي ..
عمر سكت ..
دخلت للغرفة وسحبت الشنطة وهي تحط ملابسها فيها ..
عمر مسك يدها: لاتزعلين ..
أنفال دمعت ماتحملت : منيب زعلانة .. ماينجبر قلبك دامك ماتبيني..
عمر سكت ..
أنفال دق جوالها وردت :آهلين ..لا موب جاية اليوم ..مع السلامة..
عمر: ماراح تروحين الجامعة؟
أنفال تسكر الشنطه: لا ..
عمر: على مين تدقين ؟
أنفال: عبدالملك ..
عمر: لا خليه أنا بوصلك ..
أنفال : لا ماله داعي تتعب نفسك وترهقها ..
دقت على أخوها وقالت له يمرها ..
عمر : تذكري عمري ماكرهتك بس ماننفع لبعضنا ..
أنفال : عادي .. الله يسمح دروبك .. خل كل شي يتم بشكل هادي..
عمر ناظرها أكثر : شلون بشكل هادي؟
أنفال : قصدي طلاقنا ..
عمر : اوكي ..
صدت عنه وهلت دموعها تماسكت ومسحتها ولبست عباتها ..
عمر مسك الشنطة: أنا بنزلها ..
نزل الشنطة معها للحوش ..
عمر: أنفال بطلع لفوق مابي يكون لي أي احتكاك أو اسلئه من عبدالملك..
أنفال: لاتخاف ماراح اقول أنت رفضتني هي كلمه لما أي احد يسألنا مافيه فيه نصيب وانتهينا ..
مارد وناظرها شوي :تدرين ليه رافضك بعد ..
ناظرته ..
عمر: لاني اشك فيك ..!
أنفال بصدمة: تشك ؟
عمر: آييه اششك ..ناسية أنك كنتي تكلميني لما كنتي على ذمه عبدالله..
أنفال ضاع الحكي منها ..
عمر: صدقيني أنفال ماننفع لبعض ..
أنفال كانت الصدمة تحل مكان أي كلام ممكن يقال ..
عمر مسك يدها: الله يوفقك ..
قالها وطلع وهي تناظر مكانه ودموعها اللي بدت تنزل ..
دخلت سيارة أخوها لحوش بيت خالتها ..
عبدالملك نزل من السيارة :وش ذا الشنطة..؟
أنفال: حطها بالسيارة وخل نطلع تكفى ..
عبدالملك شالها وحطها بالخلف وركبوا ..
عبدالملك :شفيك ؟
أنفال: راح نتطلق ..
عبدالملك وقف السيارة: وشو ؟!
أنفال: أي سمعته ..
عبدالملك : مهبولة مامر عليك شهر وشوي وتتطلقين ..
أنفال: تكفى اللي فيني مكفيني ..
عبدالملك : فجأه تتطلقون .. لاتقولين اللي فيني مكفيني .. انفال انتي تشوفين وش اللي قاعدين تسوونه ..؟
أنفال ماعاد ردت على أخوها وسكت : اشوف الاخ عمر ليه بعد هو راح يطلق مهوب كان راح يموت علينا لاجل يتزوجك والحين تتطلقون..!
.
.