شبكة همس الشوق - عرض مشاركة واحدة

8 - 11 - 2024, 01:46 AM

(10)

رجع ناصر الشركه.. وحاول يحل المشكله....

وساره انتظرته للساعه 6 بالشركه.. وماجا ... رجعت بيتهم وهي تدعي يارب يرجعها ..
وصلت ودقت عليها شيماء...
شيماء: هاي سارونه ... وحشتيني يادووبه....
ساره: وانتي اكثر... اقول انتي الدبه..
شيماء: لا يكثر بس قومي تعالي بيتنا...
ساره: جيتي من الرياض؟
شيماء: ايه ....سبرايس....
ساره: سخيفه... طيب بخذ لي شاور واجي.... باي..
قامت راحت وطلعت لها ملابس.......... وراحت للحمام..

ناصر بعد ماخلص اجتماع.. طالع الساعه .. اووووف 6:30 تاخرت على البنت...
دق عليها ماردت... خلاص بكره اروح لها الشركه واعطيها وماراح ادق عليها مره ثانيه بعدين تظن شي ثاني,,, لا انا اللي ميت على البنات....

ساره طلعت من الحمام واستشورت شعرها ..ولبست
... بلوزه جلد الفهد بيج وبني... وبنطلون بني واسع... وحطت ميك اب.. ظل بني وكحل وماسكارا.. بلاشر بني مايل للبيج.. وروج بيج.. ولبست اكسسوار ذهبي وصندل لؤلؤي واخذت شنطتها وطلعت...

ناصر.. رجع بيتهم وراح لغرفته ... رمى نفسه على السرير كان تعبان ومصدع...
حتى ثوبه مابدله... اووف شنو هاذا اللي بجيبي.. طلعه كانت محفظة ساره...
لونها اسود وجلدها لماع.. مخيط بشكل مربعات بارزه.. شكلها ذوق.. (يحب اللون الأسود)
فتح الدرج ورماها فيه.... بكره اوديها لها وارتاح..

ساره راحت لشيماء بدون ماتتطالع جوالها...
شيماء: ماعندك نغمات جديده...
ساره: مادري خذي جوالي يمكن فيه شي يعجبك..
فتحت شيماء الجوال.. ساروه عندك مكالمه..
ساره: اشوف.. ايه هذا ثقيل الدم الي لقى محفظتي.. خليه يولي..
شيماء: ش سالفه.. وقالت لها السالفه...
شيماء: طيب كلميه وخليه يجيبها لبيتكم....
ساره: تخصرت..لا والله هذا اللي ناقص .. يجي بيتنا بعد .. بكره الصباح بكلمه واخليه يجيبها الشركه...
شيماء: واللي فيها... مو خايفه عليه..
ساره: الفلوس ماتهمني.. وسعد لغى بطاقات البنك.. اما بطاقة الأحوال مايقدر يسوي فيها شي...
شيماء: مادري بس قلبي مو متطمن..
ساره: اقول طنشيه ... هذا تلقينه واحد فاضي قال هذي بنت اتميلح عليها شوي,, مالت عليه ...
وقعدوا يسولفوا ... ويحشوا شوي.. ههههه ماتخلى قعدة بنات من الحش...

ناصر : تعشى وجلس يشرب شاي مع ابوه...
ندى : نوروة.. شفيه اخوك سرحان ,, لا يكون يحب..
نوره: لكزتها بقوه .. اسكتي لا يسمعك .. وبعدين هو فاضي يحب انتي ووجهك..
ناصر.. كان يفكر بصاحبة المحفظه.. عيونها فيها شي كان فيها حزن الدنيا كلها,, وكل شوي يستغفر ربه لأنه طالع بصورتها.. نشوف بكره..
ندى: اقول ناصر...
ناصر: ...........
ندى اشرت له بايدها وهو انتبه ..
ناصر: نعم..
ندى : اللي ماخذ عقلك...وهي تغمز له ,, حلوه؟؟
ناصر : اخذ مخده ورماها عليها.. روحي بس بقوم انام ..
ام فهد : ندوا.. وبعدين معاك.. ماتجوزين من سوالفك.....
ندى: احلق هذا اذا ماكانت وحده.. وهي تأشر على شنبها(اللي يسمعها فيها.. متأثره بباب الحاره)
يوم ثاني الصباح...

صحت ساره.. على صوت فيصل ولد اماني يدق الباب...
فيصل : خالتي .. تقول لك امي ام عبدالرحمن قومي,,,
ساره: صحت مفزوعه.. اوووه الساعه 6.. متأخره...(هي دوامها 8 تصحى من 5 مدري ليش؟)
قامت بسرعه ومن العجله ضرب اصبع رجولها بطرف السرير.. ساره وهي ماسكه اصبعها اللي المها.. يالله صباح خير..

تروشت ولبست ملابسها .. وصلت الفجر.. وبعدين
حطت لها كريم مبيض وبودرة اساس.. وماسكارا وغلوس لونه وردي طبيعي وطبعا ماننسى الكحله.. لبست عبايتها وجزمتها الكعب.. ونزلت بسرعه..
ابوعبدالرحمن: بشويش يابنتي .. لسه الساعه ماجات7...

عند ناصر ... صحى الساعه 5 ,,, وهو حاس بنشاط... قام من السرير وهو يمغط ايديه.. اووف اليوم مالي مزاج البس ثوب.. لبس بنطلون جينز ازرق غامق.. وقميص اسود اكمامه تغطي اصابعه ومشط شعره على ورا ولبس ساعته الفخمه تعطر بعطره الرجالي اللي يدوخ......و نزل..
بعد الفطور
ناصر ركب سيارته الهمر وعلى شركة ساره........

ام عبدالرحمن : ساره يمه عندك مصروف,,,,
ساره : ايه يمه.. يووووه تذكرت المحفظه...... خلاص بدق على مدري ش سمه اذا وصلت الشركه....
وصلت ولقت على مكتبها اوراق.. ساره اووه كل هذا شغل ,,, بدت تشتغل ونست تدق على مدري ش سمه على قولتها (ناصر)..

بعد نص ساعه من الدوام...

وصل الشركه.. عند الأستقبال..
ناصر: لو سمحتي .. مكتب ساره ال..., وين؟؟
رغد : تنحت فيه.. هااا..ايه في آخر الممر على ايدك اليمين..
ناصر : شكرا ومشى.......

لقى باب المكتب مسكر.. ودق الباب..
ساره : بدون نفس ..تفضل,,,وهي مشغوله بأوراق في يدها...
ناصر : السلام عليكم....
ساره: رفعت وهي تقول.. وعليكم الس,,,,,,,,,,,,,,,,,,,,وسكتت

والتقت عيونهم...
ساره : تتامل في ملامحه... بدر.. بدر.. واقف قدامي.. لكن لون عيونه مختلف... وهذا مبين انه اكبر.. لكن كأنه هو.......
ناصر كان يطالع الحزن والهم اللي يكسي وجهها....شكلها صغيره .. لكن ليش كل هالهم اللي في ملامحها......

ثواني التقت عيون اكثر شخصين حاقدين على بعض...

قطع نظراتهم تلفون ساره اللي رن..

ساره: أأأ.. تفضل استريح.. وردت على التلفون.. الو..

جلس وهو يطالعها... غطى عيونه بيده ومسك اعلى خشمه بأصابعه.. اعقل لا تطالع اي بنت بالدنيا......
كان اللي داق رغدوه الملقوفه تبي تعرف منو هذا الطلقه (يقولوها للولد او البنت اذا كان حلو وعذاب)اللي جاي يسأل عن ساره شخصيا..
رغد : سارووه يالخاينه منو هذا اللي جاي يسأل عنك... شكله عذاب من وراي هاا.. اذا عنده اخو قولي له يزوجني اياه.. طبعا رغد تتكلم بسرعه وساره ماردت عليها مرتبكه.. شفيني انا قاعده اطالع فيه,, حتى لو كان ملك جمال بيظل رجاااااااال........لكنه يشبه بدر.. لا تلومونها..

ساره: اكلمك بعدين وسكرته بوجهها........
ساره: بعد ماجلست على مكتبها وشبكت اصابعها ببعض.. آمر اي خدمه..
ناصر: مايامر عليك ظالم.. تفضلي .. وحط محفظتها على مكتبها.......
ساره : اخذتها من عنده بسرعه ,,, مشكور اخوي ماقصرت..
ناصر :العفو.. تطمني اذا كان في شي ناقص......
ساره: ماله داعي مبين عليك ولد نعمه...
ناصر: تسلمي ...

لحظة صمت........

ساره: هذا متى بيروح ... ترى طول السالفه..... وانا مالي خلق.......
ناصر: هالبنت فيها شي غريب.. لو سمحتي ممكن سؤال؟
ساره: في نفسها(لا حول ولا قوة الا بالله ش يبي بعد..اللهم طولك ياروح) تفضل...
ناصر: انا مدير شركه استثماريه كبيره .. وحاب اعرف نشاط شركتكم... يمكن يصير في تعاون بيننا انشاءالله...
ساره: (مدير شركه .. كثر منها ..الا مبين عليك واحد فاضي يدور بنات).. ان شاءالله ليش لأ.. تشرب شي؟
ناصر: ماعليك امر.. قهوه ساده..
ساره : طيب.. ودقت على الفراش وجاب القهوه ..
ناصر كان يشرب القهوه ببرود.. القهوه تعدل مزاجه صح..
وساره كان ودها تاخذ الدباسه وتضربه على وجهه على بروده..
وشرحت له بالتفصيل نشاط الشركه.....
ناصر : يطالعها وهي تتكلم.. كان صوتها واطي لكن مسموع وتتكلم وهي واثقه من نفسها.. لكن ماحطت عينها بعينه ابد الا ثواني وبعدين تتطالع اي شي ثاني او تطالع الأوراق اللي بيدها......

ناصر: حلو .. اجل تفضلي هذا كرتي واذا ممكن خذي لي موعد من المدير......
ساره: اخذت الكرت وقرت المكتوب,, يوؤؤ صحيح مدير........ ساره ان شاءالله اخذ لك موعد واكلمك .......
ناصر : قام ....... طيب مع السلامه......
ساره: وقفت.. مع السلامه ومشكور مره ثانيه...
ناصر : لا شدعوه هذا حقك .. ومشى........
ساره رمت نفسها على الكرسي ... اووف ياثقل دمه .. مغرووووووووووووووووووووور...

ناصر : ركب السياره .. لكن مامشى ظل واقف يفكر.. هالبنت فيها شي.. نظراتها مو طبيعيه.. وبعدين ليش تكلمني من طرف خشمها.. وشكلها مو طايقه حتى تطالع بوجهي.. اول بنت تعاملني بهالطريقه (متعود كل بنت تشوفه تذوب عليه)..شايف نفسه ويحق له...

العصر..
جا مدير ساره..
ساره وهي تلكم نفسها.. والله ماودي اقوله عن ثقيل الدم اللي جا ,, لكن يمكن يكون شغلنا معاه فيه مصلحه لشركتنا اقول للمدير واشوف,,
دخلت ساره مكتب المدير وقالت له عن ناصر وعطته الكرت..
المدير : متأكده هو شخصيا...
ساره: ببالها والله مبين عليه شي كبير.. ايه..
المدير : تمام تدرين هذا شركتهم كانت بتعلن افلاسها وهو خلال شهر رجعها احسن من قبل ماشاء الله عليه...
ساره : في نفسها (بعد .. مديرنا يمدح فيه .. لا هذا شايف نفسه على الآخر)
المدير: ساره دقي عليه وعطيه موعد بكره الساعه 10.....
ساره : اوكي .. اخذت الكرت وطلعت..
وهي على مكتبها ,,, مالي مزاج ادق عليه .. يلا ادق واشوف...
ناصر اللي كان بالشركه وكان معصب ع الآخر من المبالغ اللي سحبها فهد ..
رن جواله..
ناصر : اوووف منو هذا بعد..الو.. رد بدون نفس وماشاف حتى الرقم..
ساره: بعد يرد بدون نفس .. اسكره بوجهه.. الو.. السلام عليكم..
ناصر: بعد بنت اللهم طولك ياروح.. وعليكم السلام..
ساره: الأخ ناصر محمد عبدالله ال.....
ناصر: اي نعم مين معاي؟
ساره: معاك ساره صالح عبدالرحمن ال .....,,, من شركة ال.....
ناصر: ياهلا اختي .. (في باله صاحبة المحفظه المغروره)
ساره: ممكن تشرفنا بكره الساعه 10 مديرنا حاب يقابلك...
ناصر : حس دقات قلبه ترقص.. اوكي الساعه 10..
ساره : اوكي مع السلامه..
ناصر : مع السلامه.....
سكروا التلفون....
ساره .. اوووووووف لاعت كبدي ..ثقيل دم ومغرور..
ناصر: ياربي اش فيني .. مدري ش سوت فيني هالبنت.. طريقة كلامها حتى لو بدون نفس تعجبني وتشدني,,,, هز راسه لالالا مستحيل افكر في اي بنت ... كلهم مثل بعض......
المغرب ...
رجعت ساره البيت ...
سعد : سارونه حبيتي لقيتي محفظتك؟
ساره : ايه..
سعد : مافيها شي ناقص؟
ساره : لا الحمدلله...
راحت غرفتها ... شالت عبايتها واخذت لها دوش ... ومسكت صورة بدر.. طاحت دموعها... جا ببالها ثقيل الدم اللي جاب محفظتها.. يالله يشبهه لحد كبير.. نفس تفصيل الوجه.. والخشم.. نفس رسمة العين لكن ذاك لونها اخضر..
شكله مو سعودي ... لكنه يتكلم مثلنا.. اووه انا ليش افكر فيه.. في النهايه حتى لو كان براد بيت...رجااااااااااااااال..
ناصر قبل ماينام.. حط راسه على المخده وايديه ورا راسه.. انا ليش افكر بهالبنت.. صار لي اكثر من ثلاث سنوات ماناظرت اي بنت.. ليش هاذي بالذات؟ يمكن متزوجه.. او مخطوبه.. او في حياتها شخص.. بس اللي يشوف عيونها مايقول تحب .. الا هموم الدنيا فيها... وانا ليش افكر فيها .. اووووه انام احسن.. في النهايه هي بنت اومره .. كلهم سوا(لا موبايلي هههههه)

اليوم الثاني..
ساره .. صحت من النوم مزاجها مقلوب..

ناصر .. صحى مرووووووووق...

راحت الشركه وبدت تشتغل..
راجعت المواعيد لليوم..
اووف .. لازم ادق على ثقيل الدم قبل الموعد بنص ساعه اذكره... ياربي تصبرني..
دقت عليه...
ساره : الو السلام عليكم..
ناصر : وهو يضحك .. وعليكم السلام ,,هلا اخت ساره..
ساره : لا والله قام يمون الأخ ..هين.. ياهلا فيك بس حبيت اذكرك بموعدك مع مدير شركتنا.. الساعه 10..
ناصر : لا اكيد مانسيت كلها ربع ساعه وانا عندكم..
ساره : حياك الله.. بأنتظارك .. مع السلامه..
ناصر : الله يسلمك.. أ....... طوووط
ناصر: سكرته بوجهي... هين... لا وتتكلم بدون نفس هذي لو موظفه عندي فصلتها...
ساره : اش فيني اكلمه واعامله كذا .. لو يشتكي علي للمدير فصلني .. لا انا بستقيل خلاص تعبت من العمل مع رجال.....
ساره كل شوي تتطالع الساعه باقي دقايق ويجي... ياربي يدق ويعتذر مالي خلقه...
ناصر : لازم اعرف ليش هاذي تكلمني بهالطريقه...

الساعه 9:55 وصل ....
دق باب مكتب ساره...
ساره : ياربي هذا ثقيل الدم وصل...تفضل..
دخل ناصر .. طالعت فيه ساره ...

ياللــــــــــــــــــــــــــــــــــــــــــه .. شنو هاذا...

كان لابس ثوب وشماغ.. انتبهت لساعته ,,, لابسها في اليمين اووووف مثلي...
كان كله شموخ وكبرياء ...

شافها ناصر...

قد ايش نعومه هالبنت.. بيبي فيس.. بس لو اعرف هالهم في بوجهها والقسوه بكلامها ونظراتها ليش؟؟
ناصر : السلام عليكم..
ساره: وعليكم السلام تفضل...
جلس على يمين ساره.. اووه تلبس الساعه باليمين مثلي.. حلو ... اييه انت اشفيك.. في النهايه بنت ... بلا خبال...
ساره : كلمت المدير .. وقالها يستنى خمس دقايق عنده مكالمه خارجيه..
ساره : يارب تصبرني.. معليش المدير عنده مكالمه دقايق ويخلص.. تشرب شي..
ناصر : رجع على ورا وريح على الكرسي.. لا مافي مشكله.. قهوه ساده..
ساره : وهذا مايطلب الا قهوه عشان تطول ... اوكي وطلبت له قهوه..
كان قاعد بمكتبها وهي تشتغل ولا كانه موجود.. جابوا له القهوه وشربها.. وخلصت .. وهي ماقالت ولا كلمه .. ولا رفعت عيونها..
ناصر: هذي ليش جامده .. ولا ارتبكت ولا كأني موجود...
اتصل المدير وقالها تدخل ناصر..
ساره : طيب ولفت على ناصر.. اللي كان سرحان..
ساره: تفضل... هذا ليش يطالعني كذا؟
ساره : قالت مره ثانيه.. لوسمحت تفضل,,
ناصر: هاا.. اي شكرا وقام..
بعد ماقام تنفس ساره نفس طويل...... فكه منه...
دخل وكلم المدير.. المدير اعجب فيه وفي شغله وقرر انه يتعامل مع شركتهم.. ونادى ساره عشان تجيب له ملف فيه كل شي عن الشركه..
ساره : ياربييييييي.. شوي بتبكي..خلاص قرر يتعاون معاه... الله يعين قلبي ..
جابت له الملف..
اخذه ببرود وهو يطالعها ويبتسم بهدوء..
ساره : هذا ش يبي وبعدين معاه؟
ناصر : سلم على المدير اللي وعده يحدد موعد اجتماع عشان يوقعوا العقد معاهم وناصر قال افضل الأجتماع يكون بمقر شركتكم(شفتوا النذاله)
المدير : يشرفنا ,, واكيد مساعدتي بتكلمك بموعد الأجتماع.....
ناصر: طيب .. السلام عليكم..
المدير : وعليكم السلام..
ومشى.......
بعد ماطلع نادى المدير على ساره ...
ساره : حددي موعد اجتماع الأسبوع الجاي بنوقع عقد مع شركة ال......
ساره : خلاص راح نتعاون معاه...
المدير : اي نعم .. شركتهم شركه معروفه ومديرهم اللي جا لو تعاونا معاه وتوفقتنا ان شاء الله ,,, راح يفيدنا كثير..
ساره : طيب ورجعت مكتبها ... اوووف يعني بشوفه مره ثانيه.. اووه وانا ليش افكر فيه وش فيه زود عن غيره .. كلهم مثل بعض.. اطنشه احسن..

راحت البيت........
شافت الروزنامه .. وضحكت اليوم عيد ميلادي... وانا نسيت..
شغلت الاب توب وحطت اغنية الجسمي...

ياسنين عمري.. كفايه حزن ياسنيني..
خلاص راح الذي ..يستاهل احزانك..
لمي جروحك .. وكفي الدمع ياعيني..
ردي لزهرة حياتي باقي الوانك...
وش ذكرك بالهوا لي كان ناسيني..
والحزن ليه هو غدا في يوم عنوانك..
وش ذكرك بالليالي ليه تبكيني..
والجرح الأول.. وسط ناي بألحانك..
ياسنين كفي عن الذكرى وخليني..
ماعدت انا اقوى على حزنك واشجانك..
مااتحمل اكثر من الي بيني وبينك..
جفت عروقي وانا صابر على شانك..
حاولت اداري الحزن اللي عايشن فيني..
واحاول اضحك غصب في وجه خلانك..
لكن حزن الليالي بان في عيني..
واقول ياسنين هاذي آخر احزانك..

نزلت دمعه غصبا عنها..

دخلت لها فاتن..
فاتن : سارونه ليش تبكين؟
ساره : مسحت دموعها .. ولا شي ...
فاتن: قومي انزلي سعد يبيك في المجلس..
قامت ونزلت معاها..
دخلت المجلس.. كان ظلام..
ساره : فتون(اذا تبي تقهرها تناديها فتون ..مثل الي في مسلسل الحياله).. وينه سعد؟
فجأه تولع النور .. لقت اهلها وخواتها وعيالهم وجا لها سعد وحب جبينها كل عام وانتي بخير....
هم عادة مايسوون اعياد ميلاد لكنهم سوو لها واحد عشان تنبسط وتغير جو..
ساره : حست دموعها بتنزل.. وانت بألف خير..
غنوا لها هابي بيرثداي تو يو.. وقطعوا الكيكه.. لكن ساره وقفت وهي ساكته طالعت فيهم كلهم..كأنها تدور احد ..واكتست ملامحها بالحزن...
امها كانت واقفه جنبها .. عرفت تدور مين.. حوطت كتف بنتها وقالت: الله يرحمه يابنتي..
ساره : حصنت امها وحاولت قد ماتقدر ماتبكي..
عطوها الهدايا .. ساره فرحت بهدايا عيال خواتها مع انها بسيطه لكنها عجبتها..
تركي : ساروني اختي حبيتي ..
ساره : بدينا .. نعم ..
تركي: لأني جبت لك هديه وطيرت نص مصروفي عليها .. ابغى جوالك كم يوم اكشخ فيه..
ساره : وانت حتى الهديه تبغى وراها مقابل.. وانا اقعد بدون جوال؟
تركي: هههههههه.. لا بدليني بجهاز...
ساره : روووح ..
وضحكت وانبسطت مع اهلها الي قررت ماتفارقهم ابد ولا تبدلهم بكنوز الدنيا..

بعد العشا .. كان قاعد مع اهله وحاط يده على خده ويفكر .. لازم اعرف سر هالبنت.. ماشكلها متزوجه.. مافي يدها دبله.. ومبين عليها صغيره اممم 22 23 سنه... طيب شنو فيها.. حك راسه اووف لازم اشيلها من راسي..

ندى وهي تلكز نوره وتتكلم بصوت واطي : نويره .. احلق شنبي اذا ماكان يفكر في وحده..
نوره : وش تحلقين انتي ووجهك.. ابو شهاب على غفله.. وبعدين بطلي لقافه..
ندى : اقولك يفكر بوحده يعني يفكر بوحده.. وسوت حركه بأصبعها وشكلين مابحكي..
نوره : رووحي عني ..
ناصر : خير وش عندكم يافريال وسعاد..
نوره وندى : ههههههههههه
ندى : اخوي ممكن سوال صغنون؟
ناصر : شنو؟
ندى : وهي ترفع حواجبها .. سرحان في منو؟
ناصر: هاا.. الشغل في غيره..
ندى: وهي تغمز له .. متأكد الشغل والا شي ثاني؟
ناصر : فهم عليها.. وش قصدك؟
ندى: انت فهمت.. ادري..
ناصر : قلب مصري.. فاهم بس باستعبط.. وراح لعندها وهو يضربها بالمخده .. وانتي ماتبطلين لقافه..
ندى : يمههههه يبا .. تعالوا شوفوه.. واخذت امخده وقعدت تضرب فيه بعد...
نوره : وهي تصفق .. ناصر ناصر..
ندى تركت ناصر وراحت لنوره وضربتها وانتي ليش ماتوقفين معاي هااا...
ناصر وقف على جنب وهو يضحك عليهم..

اليوم موعد الأجتماع...
وناصر يستنى هاليوم ....
ساره .. ماتبي يجي تتمنى يصير اي شي ويلتغى..
في الاجتماع..
وصل ناصر وابوه وكانت ساره جالسه .. ناصر ابتسم وجلس..
ساره(اللهم طولك ياروح)
ناصر.. يغني في باله حطيتك ببالي.. واشغلت بك حالي..
كان طبعا لابس ثوب وشماغ .. ومسوي سكسوكه وطالع يجنن.. لكن مستحيل يلفت نظر ساره........
على طاولة الأجتماع...
مدير شركة ساره على رأس الطاوله
ابوناصر وناصر.. على اليمين
وعلى يساره المدير التنفيذي وجنبه ساره..تكتب محضر الأجتماع..
يعني ساره جالسه مقابل ناصر...
طول الأجتماع ساره مارفعت راسها..
وناصر مايرفع عينه من عليها الا اذا تكلم .. لازم يناظر المدير الا شنو بيقول عنه يغازل مساعدته من اول اجتماع...
ساره. . ودي اقوم واطلع خلاص هذا طلع روحي.. شيبي لو يموت ماعطيته وجه.. كانت تدق بالقلم على الأوراق اللي عندها.. وفجأة.......

اييييي.. شنو هذا..
ناصر ضربها بجزمته على جزمتها..
ساره: مافي الا هو هالمجنون.. رفعت عينها متفاجأه من حركته الجريئه.. وجات عينها الحاقده والحزينه في عينه وهذا اللي يببه...
ناصر.. ابتسم ببرود ورفع حواجبه..
ساره..نزلت راسها على طول قبل ماينتبه احد.. يارب يخلص هالأجتماع على خير قبل ماارتكب جريمه...
ناصر.. يارب مايتفقوا بسرعه .. وكان اذا تناقشوا على شي يعترض عشان بس يطول السالفه...
وفي النهايه يوافق...
ساره.. هذا نحيس.. مايبي الأجتماع يخلص ...

اخيــــــــــــرا بعد ساعتين انتهى الأجتماع ووقعوا العقد مع شركة ابوناصر..
ساره .. الله يعينني على هالغثيث......
ناصر .. كان بيتسم وبس..
طلعوا من الشركه وهو ركب سيارته وابوه راح لسيارته لأنه بيروح البيت(ناصر كان يسوي عنه كل شي لأنه بعد الجلطه ماصار يداوم في الشركه الا احيانا..)
وهو بالسياره.. وبعدين وبعدين.. وهو يضرب راسه.. شيلها من راسك.. لا تفكر فيها.. يوووووه وش سويت انا(تذكر حركته لما ضرب جزمتها...).. ضحك على نفسه ... جنيت انا .... آآآآآآآه ياقلبي تحب تتعب وبس..
رن جواله...
ناصر.. هذا رقم غريب منو..
رد : الو...
المتصل : مرحبا ناصر..
ناصر: ياهلا مين معاي..
المتصل: معقوله.. ماعرفت صوتي؟

ناصر: ........هيفااااااااااااااء؟؟؟؟؟؟

ساره راحت البيت وهي تدعي على ناصر.. اووف هذا مايستحي فوق مارجولي تاملمني من ضربة السرير يضربني بعد.. هين يامدري ش سمك..
والله لأخليك تندم ,,,