تطلع ام ياسر مع بنتها ولما حسوا الشباب بصوت التفتوا بحركه وحده ..

ولاء من سمعت حس الشباب رجعت ورا ,, ونزلت راسها طبعا ..

ياسر وهو شوي ويوقف على اكتاف عبد الملك : ولاء ولاء تبين تمر ؟

توهقت ولاء وانحرجت ,,ياشين غباء البزارين (وأشرت له بيده لا )

طيبه لأم ياسر : هذا راشد ولدي وهذا عبد الملك ولد مازن

..... : ماشاء الله , الله يخليهم لك , مشكورين ماقصرتوا

... راشد وهو ينزل ناصر : وشدعوه ماسوينا شي ..

ينزل عبد الملك ياسر للأرض ويرفع عيونه وهو يبتسم للكائن الحي المستحي اللي لازق في الجدار ...

(واذا تجاهلنا الوقت وتركناه يمر ,, وصارت الساعه 5 المغرب ,, بنلاقي نايف في د. كيف ينتظر وصول ضاوي ,

شكله ضاوي عنده موضوع مهم , ولا ماكان طلب انه يقابلني هنا ..

ضاوي كان ضايق وضايع وهو يسوق ,, صح يحس انه مرتاح لأنه ماسمع كلام امه وواجه نايف قدام كل الناس .. بس ماهو عارف وش يقول له ..

وصل وسلّم .. وجلس وهو يزفر زفرة الهم من صدره

نايف : امريكانو كالعاده صح ؟

..... : لا تسلم

..... : لا .. أبد (وينادي الرجال ويطلب القهوه لضاوي )

...... : ماشاء الله منفتحه النفس اليوم وش السبب ؟

...... : ابد , متفائل خير ان شاء الله ..

..... ماحب يتدخل : ان شاء الله , (وفكر شوي بعدين قال ) نايف انا جاي اطلب منك طلب


...... : آمرني

...... : نايف انا بقول لك اللي عندي بدون مقدمات ,, انا خطبت هنوف بنت عمي,, بس ابوها قال لي انها محيّره لك من وانتوا صغار

يسكت نايف ويطالع ضاوي بعمق وبكل استغراب .. يحاول يستوعب الكلام اللي هو قاعد يقوله , توّه اليوم الدنيا مو سايعته من الفرحه لأنهم بيخطبون له البنت وحبه لها كل يوم يزيد , والحين يجي هو ويطلبها منه ! موقفه صعب .. صعب !

وفيما كان نايف يفكر ,, قال ضاوي : أنا آسف , شكل ماكان المفروض اطلب منك هالطلب ..

..... : لا تأسف ياضاوي , انا توني خاطب البنت وماجاني رد , وزي ما أنا ولد خالتها فأنت ولد عمها ,, لكن ابيك تعرف , والله ماكنت ادري انها لي وتوني عرفت قبل فتره

استغرب ضاوي من نايف , هو عادة مايرد أحد , وشكله جالس يلف ويدور

نايف : ضاوي , والله منحرج منك , لو انك طلبت عيوني عطيتك اياها , لكن هنوف ,, ماقدر !

..... يبتسم : دام ماعمرك رديت احد في شي , ورديتني في هنوف ,, معناها انها غالية عليك اكثر مما هي غاليه علي ,, المعذره يانايف ,, وهنوف تستاهل ان الرجال ينردّون فيها

..... : اسمح لي اني اكون اناني ..

..... : مسموح يا نايف , ويمكن انا كنت محتاج هالشي ,, عشان ابتعد , ووالله لو ادري انك خاطبها رسمي كان مافتحت معاك الموضوع , يعلم الله اني حسبتها سالفة تسمية وبس ,,

..... بعيون كلها امتنان : عارف ياضاوي , مشكور ,,

.... : على ايش ؟

..... : لانك ماهزيت رجولتي وطلبتني وخليتني اقول لك تم , لأنك ماستغليت كوني مع جماعه لجل تحرجني معهم ,, مع اني كنت برد عليك بنفس الرد ,, بس كان بيغيرون فكرتهم عني ..

...... : لأني حاس من الأول انها غاليه عليك , وان ربي مو كاتبها لي ,, مشكور يانايف (ويقوم)يللا اشوفك على خير

نايف بابتسامة صداقة : ليه يابو الشباب ؟ دافعين فلوس في القهوه .. اجلس وكملها , لا تحسسني ان صار بيننا شي

ابتسم ضاوي وجلس معاه يكملها ,, لكنه كان يبي يطلع من أي مكان يتواجد نايف فيه , ماكان متوقع من نفسه انه يستسلم ويكلمه بهذي الطريقة ..

.... مسكينه هنوف ,, والله ماتدري وش القصه .. !

(الله معك .. ياهوانا !)

بعد ما كمل قهوته .. ركب ضاوي السياره وهو يشغل السجاير ويطفيها ,, وهو يلعن ويسبّ ويشتم نفسه ..

غبيّ متخلّف ,, وقح , وقليل ذوق بعد ..

تروح تستأذن البنت من خطيبها ؟ منتب صاحي ,, اكيد صاير فيك شي !

احمد ربك نايف ردّك ولا لو درت هنوف بتطيح من عينها ..

بس انا مادريت انها خطبها صدق !

والله افكر مثل القصص ,, محيّره لفلان ولا علان ,, واذا احد يغاها يترخص منه ..

وياما في ناس محجوزين لبعض غصب عنهم !

كنت حاس ياهنوف ,, المفروض من صدودك اعرف ان مالي حظ فيك ..

بس استاهل اللي يجيني .. !



بعد فتره ,, هنوف جاتها مسج ,, وفتحتها ,, واول ماشافت .. رقم ضاوي ..

كانت بتمسح المسج ,, بس لفت نظرها اسلوب الرساله من بدايتها ..

هنوف .. آسف على كل مابدر مني , ماكنت ادري انك مخطوبة لنايف من زمان ,, وصدقيني لو ادري ماحاولت ,, بس طالبك تنسين الموضوع ونرجع عيال عم ,, واذا جيتي بيت جدتي بتشوفيني اجي مثل أول وبتعشى كل خميس عندهم ان شاء الله,, وماكأن شي صار .. ضاوي

ارتجفت يد هنوف وطاح الجوال على السرير , رفعته مره ثانيه ببطء وقرت المسج مره مرتين ثلاث ,,


أنا مخطوبه لنايف ؟ ومن زمان ؟

طيب من زمان يعني متى ؟

ومن وين ادري ؟ من ضاوي ..!

لا لا مو معقول ,, اكيد المسج فيه خدعه !

(وفي وسط حيرتها الشديده ,, مالقت الا صديقتها تتصل فيها . )

ام ولاء وهي جالسة في الصالة وتتابع مسلسل : ولاااااااااااااااء جوالك ازعجنا وهو يدق قومي ردي عليه

ولاء وهي واقفه وتغسل المواعين : لحظه ماما يدي فيها صابون هذي هنوف

(ولما شافت ان جوالها ماوقف يرن , تركت اللي بيدها وردّت وهي تمسح يديها بالمنشفه )

اول ما فتحت الخط قالت هنوف كل اللي في راسها وبكل اندفاع ..

ولاء : رويدك يا أختنا في الله , فأنا لم أفهم شيئا

تبتسم هنوف وتحاول تبطئ في كلامها , لين تخلص كل السالفه ..

..... : والله مدري وش اقول لك ياهنوف , شي غريب الصراحه , طيب ليه ضايق خلقك , أول أسألي وتأكدي اذا انتي فعلاً محجوزه لنايف ولا لا ؟

..... بعصبية : تستهبلين ؟ بالله عليك قولي لي أسأل مين ؟ امي ولا أبوي .؟ ولا أسأل نايف احسن .. ولا تدرين ؟ خليني ادق على ضاوي وأتأكد اذا هو يستهبل ولا لا ..

...... بحيرة : اممممممم طيب هنوف ياقلبي أكيد بيقولون لك بس مو انتي تقولين ان ابوك سافر الصبح اليوم ؟ اكيد ينتظرونه يجي عشان يكلمونه , بعدين اهم شي انتي تحسين اهلك يسوون شي من وراك ؟

...... : لا ! مايسوّون , مجرد اني محجوزة للأخ نايف ومن زمان بعد ..! وأنا آخر من يعلم ..!

..... : طولي بالك أنا ماتوقع كل الناس يدرون بهالسالفه ولاّ كان انتي دريتي صح ولا لا ؟ ,بعدين انتي تدرين مدام ان هالشي جا من عند الرجال يعني مارح ينتشر , مو لو كانت السالفة عند حرمه , يعني اكيد اكيد الخبر لسّه ماوصل لأمك أو خالاتك

....... : مدري ,, ولاء الله يخليك لا تقولين لا

..... : والله ماقول لك لا بس وشو ؟

..... : سولفي معاي عن أي شي نسيني هالسالفه لين يفاتحوني اهلي

..... بمرح : من عيوني (وتجلس على سريرها الكبير ) , يللا اختاري سالفه وافتحيها والله يعينك علي

..... : اممممم , (وتبي تهبل فيها) يقولون عبد الملك بيرجع للبرنامج الاسبوع الجاي

..... بعصبية : يرجع بكيفه يرجع مالت عليه وعلى وجهه , سخيف بايخ ماله داعي سخيف بايخ سخييييييف

..... تضحك على اسلوب ولاء وهي تقولها : وش فيييييك , احمدي ربك انه تكلم معك , وبعدين للعلم تراه شايل لك شنطتك يعني منتي كفو

...... : ماقلنا شي مايقصر , بس ليه يلمّح لي بالكلام , يحسب اني قاصده اعلي صوتي والكل يسمع , سخيف , اصلا انا انهبلت وبالموت استوعبت انه سمعني ذاك اليوم , والمفروض يوم انه سمعني مايفشلني , يحترم شكله ويستر علي ,, سخيف بايخ سخييييف

...... : ههههه, يمكن على باله ينبّهك , وتراه احيان يستهبل , مايقصد يحرج او يلمح , يعتمد على ملامح وجهه وطريقته في قولة الجمله , كيف كان شكله ؟

...... بصدق : هنوف والله مدري , اصلا ماشفت اشكالهم من زود الحيا والاحراج , ما قويت ارفع عيني لهم , مو بس لأنهم يعرفون بابا , لأن موقفي سخيف , ولأن كل عيلتكم تدري اني صديقتك ,, والأهم من هذا كله اني استحي من أي احد غريب وتعرفيني احنا نشبه بعض بهالطبع , وشلون تبيني اتصرف يعني