شبكة همس الشوق - عرض مشاركة واحدة

16 - 11 - 2024, 05:14 PM

في مكان ثاني ووقت ثاني , وبعيد عن افكار عبد الملك ,, كان سالم لسه جاي من الصلاه ,, وجلس بالصاله يسولف مع امه وناديه اللي كانت جالسه وسانده ظهرها للكنبه ,, لان الحمل بدى يتعبها اكثر ,, حس بهالشي من طريقة كلامها المُتعبه ,, وقال بابتسامه : ام عبد العزيز وش فيك ؟

ضحكت ناديه : عبد العزيز مره وحده ! وش دراك انه بيطلع ولد ؟

..... : اذا طلع ولد عبد العزيز , واذا بنت انتي اختاري الاسم ,وبعدين لاتقولين عبد العزيز مو حلو ؟

..... : لا لا بالعكس مره يعجبني

تدخل ام سالم معاهم في الموضوع وتقول بقهر ممزوج بضيقه : وليش ان شاء الله ماتسميه على اسم ابوك الله يرحمه

سالم بابتسامه : الله يرحمه , مايهون ابوي ,, وتدرين انتي وش كثر احبه , ووش كثر يعني لي .. بس هذا مو معناه اني لازم اسمي ولدي باسمه , انا عاجبني اسم عبد العزيز ومن زمان مشتهيه

حس بانها ماقتنعت ,, فكمّل كلامه : يعني يا يمه مافيه طريقه اقدر اثبت لكم فيها اني احبكم غير اني اسمي عيالي عليكم ؟

قالت ام سالم وهي عارفه ان ولدها مافيه مجال تتناقش معه : مشكله لانك صاحب مبدأ ماينفع احاول فيك

ضحكوا سالم وناديه ,, وناديه كانت تراقبه بين فتره وفتره ,, خف الصداع عليه بعد ذاك اليوم من المسكنات ,, بس مازال يحس به خفيف , والعرق الي بين عينه اليمنى وراسه يظهر وينبض بين فتره والثانيه .. يحاول هو انه مايقلقها بألمه ,, وهي تحاول ماتقلقه بآلام حملها ,, كل واحد خايف يضيّق خلق الثاني ,, متحمّلين الآمهم , \ وكل واحد عارف بالآم الثاني ,,

قطع عليها سالم حبل تفكيرها ,, لما قال بلهجه حسوا فيها شوي عصبيه : وينهي سلمى ؟ ان شاء الله نايمه ؟ ماتشبع ذي اعوذ بالله بس نوم في نوم

..... : خلها ياولدي وش وراها اجازه

...... : وراها صلاه وراها تشوف اشغالها وراها تساعد في البيت , عالأقل لو تسوي شي مفيد , مو بس تضيع وقتها في النوم ترا يقولون كثر النوم يسبب الغباء ,, وعاد سلمى مهيب ناقصه (وقال جملته الأخيره وهو ماسك ضحكته )

... ناديه ضحكت برضو , ام سالم ابتسمت وقالت بدفاع : يللا عاد اختك ذي لاتقول عنها كذا

..... : والله كيفها بقول اللي ابي ,, وسكت شوي ثم رفع صوته وقال بصراخ (سلمــــــــى ,, سلمـــــى سلمىىىىىىىى )

صحت مفزوعه وركضت غسلت وجات الصاله بسرعه : سم

مافهمت شي لما شافت كل اللي بالصاله يضحكون ,, فقالت ام سالم : مقهور منك ليه تنامين لهالوقت ؟

سلمى بقهر : وانت يعني مناديني بس عشان كذا

سالم وهو يأشر لها على الكنبه اللي بجمب ناديه : ايه , صايره كسول 24 ساعه نوم , اجلسي معنا

..... : يعني انت ماتبي شي بس كذا ؟

..... : يعني لو بغيت شي بتجيبين لي الحين , اقعدي بس مافيه نوم , والله ياسلمى لو استغفلتيني وسحبتي نفسك لفراشك ياويلك ,, كفايه انا ساكت لك ومافتحت معاك موضوع راشد لأن كل كلامك اللي بتقولينه ماني مقتنع فيه من الأساس فما ابغى اسمع تبريراتك , ومابي ارفع ضغطي على مشاكل تافهه ,, عشان كذا ماعلّقت بولا كلمه لما دريت ان زوجك قال لك اقعدي عندنا لأن معاه مليون حق ,, وانا ماتكلمت مع الرجال لين هو يروّق ويجي بنفسه يكلمني ..

حاولت ناديه تخفي ابتسامتها , اما ام سالم فبان على وجهها الكدر لأن كلام سالم ماعجبها , في نظرها انه مفروض مايكلم اخته كذا , بس التفتت لناديه اللي كانت توها قايمه من الكنبه : على وين

...... : عن اذنك خالتي , سالم ابي اروح بيت امي طيبه بسلم عليها من زمان ماشفتها

ابتسم سالم : يلله انا بعد ابي اسلم عليها , قومي البسي و بكلم السواق واودّيك

سلمى بعيون كلها نوم : وشو من زمان توك شايفتها قبل كم يوم بملكة نايف

قالت ام سالم لانها فهمت ان ناديه تبي تكلم خالها : شدخلك انتي كيفها دام زوجها راضي لها , بلا لقافه

قال سالم بلهجه امره وهو يقوم من الكنبه : ولا أجي وأشوفك نايمه ,, شوفي لك صرفه في حياتك

انقهرت سلمى لأن كان ودها ترجع تنام بس يطلع سالم ,, لكنها خافت منه فقالت بقهر وهي تسند ظهرها للكنبه : انيتاااااااااااااااااااا سوي لي قهوه

وكان الكل غارق بتفكيره ,, لين وصلوا لبيت طيبه ... دخلت ناديه الصاله وماشافت غير جدتها وراشد جالس على الكنبة الثانيه وماسك بحظنه شي مادققت فيها ,,

تقدمت وسلمت عليها طيبه بترحيب , لاحظها راشد اللي كان سرحان ورمى اللي بيده وبكل شوق وحب ضمها لصدره : هلااااااااااااااااااااا والله حبيبتي اخبارك ندّو من زمان ماشفتك

سالم بعد ماسلم على طيبه من بعيد قال وهو يضحك : هاي يابو الشباب زوجتي ذي وخّر

..... : احبها ياشيخ (وتقدم وسلم عليه بحراره ) يعني بس انت اللي حلال عليك تضمّها وحنا لا ؟

انحرجت ناديه وضربت ذراع خالها اللي ضحك والتفت لسالم اللي قال بابتسامه : لا بس تراك جفس بشويش على المره تراها حامل وانا اخاف عليها ,,

ضحك راشد وبحركه مفاجئه شال ناديه بسرعه ورفعها لفوق وصارت تصرخ

سالم تلفت براسه يحاول يعرف وش اللي صار , صرخت ناديه : نزلنيييي ياويلك من ربي والله اخاف

سالم بشهقه : وشايلها بعد ؟

خاف راشد منه ونزلها بسرعه وهو يضحك , سولف شوي معاه عن كل شي الا سلمى لأن سالم ماحب يذكر الموضوع , ومشى معاه للباب لين وصله وطلع ,, ورجع للصاله

طيبه بابتسامه : شخبارك مع الحمل ياناديه عسى ماتتعبين كثير

...... : والله الحمد لله , الله يعين بس

زادت ابتسامة الجده وقالت بحنية : الله يخليكم لبعض, ويسهل عليك ويجي ولدكم يتربى في عزكم ان شاء الله ,, حبكم يبان بعيونكم , حتى الأعمى يقدر يشوفه

سكتت ناديه ,, بسبب جملة جدتها الاخيره ,, طيبه ماكانت تقصد سالم , بس قالتها بعمومية ,, لما حست الجده ان ناديه تغير وجهها فقالت بأسى : مو قصدي والله

ابتسمت ناديه : عارفه

دخل راشد للصاله وقال وهو يحط المخده بحضنه : ها ناديه حبيبتي شخبارك ؟

..... : دبّ , لا تكلمني ماحبك

...... : هههههههه ليه

...... : والله خوفتني مالك داعي