عشــــــــــــ بس ..! ـــــــــــــــانك _32_


(((أحـــــ ـ ـ ـلى منيـــرهــ .. ))) :

هو ! مدري يمكن عيونه تخوف ..!

انتفضت ولاء وماقدرت تركز .. وعلطول قفلت المحادثه ماتدري ليه .. الحماره روان قايلة لصديقتها شي ؟ .. بس كيف .. هي ماقالت قدام روان ان عيون اخوها تربك ؟

شوي يدق التلفون وتسحبه بدون تركيز وتثقل صوتها : نعم

ابتسم : بسم الله , بتتضاربين انتي ؟

جمدت ولاء من الصوت : مــ مين ؟

ضحك : هههههه ماعرفتيني ؟

ارتبكت ولاء وطاحت السماعه منها ورجعت تشيلها مره ثانيه وتطالع فيها زي الهبله وترجع تحطها على اذنها : هــ ....هلا عبد الملك .. أخ .. أخبارك ..؟

..... : تمام , انتي شخبارك ؟

..... : هه ؟ يعني

ضحك وقال بصوته الهادي : ههههه وشلون يعني ؟ يا أما انك تمام .. او مو تمام ..

.... : لا , الاولى .. تمام

..... : دووووووم ان شاء الله

..... : .....

..... : ماقلتي لي , ليه طلعتي من المسن بسرعه ؟

ربكة ولاء ماخلتها تفهم : متى ؟

.... : توّ , انا وروان نسولف معك ,, فجأه طلعتي .. ليه خفتي من صورتي .. ؟

دق قلبها ونشف الدم بعروقها : انت .. انت

..... ضحك : أحلى منيرة ..

...... : آآآآآآآآآآ , يمااااااااااااااااه ..



ماقدر عبد الملك يتكلم .. من الضحك مسك بطنه .. صح صرختها ماكانت عاليه ,, كانت مكتومه بالأصح ,, بس بان انها خافت وارتبكت .. وسكرت السماعه بعد ..!

علطول اتصلت روان : وش سويت لها حرام عليك ... هذي سوالف تقولها لوحده اول مره تشوفها بالمسن ؟ داقه علي تصارخ ياويلي منها ..

...... : ماااااااالك شغل انا تكلمت وبس .. زين اسمعي بسكر بروح اكلمها شكلها من جد زعلت ..

..... : كيفك روح راضها ..

...... سكر منها واتصل على ولاء وماردت .. شوي جته اضافه من ولاء الي شكلها تفاهمت مع روان .. وبكل قوته يضغط اوكي ..

ويغير النك نيم وهو يضحك ..

(أميرة الورد .. ليـــهـ الورد مفتونـــكــ .. ليهـ بحياتهـ يحاول .. يشبهــ ألوانــكــ .. ؟ ) :

مساء الخير

(في عيونــــهـ شي مقدر أوصفه ..!! ) :

مساء النور

(أميرة الورد .. ليـــهـ الورد مفتونـــكــ .. ليهـ بحياتهـ يحاول .. يشبهــ ألوانــكــ .. ؟ ) :

ههههههههههه , ليه ادق ماتردين ؟

(في عيونــــهـ شي مقدر أوصفه ..!! ) :

كذا .. ما أبي ..


(أميرة الورد .. ليـــهـ الورد مفتونـــكــ .. ليهـ بحياتهـ يحاول .. يشبهــ ألوانــكــ .. ؟ ) :

وليه ؟


(في عيونــــهـ شي مقدر أوصفه ..!! ) :

احسن ..

ضحك وهو يمسك جواله ويتصل , وتشوف الرقم وماترد ..

(أميرة الورد .. ليـــهـ الورد مفتونـــكــ .. ليهـ بحياتهـ يحاول .. يشبهــ ألوانــكــ .. ؟ ) :

ولاء , بلا دلع ردي ..

(في عيونــــهـ شي مقدر أوصفه ..!! ) :

منيرة مابي ارد

هنا انفجر عبد الملك ضحك .. وهي حست انها زودتها فنفخت صدرها وسحبت نفس طويل وكنها بتدخل معركة ,, واخيرا ردت .. وهي تضحك طبعا .. بنعومه وبدون توقف ..

..... : هههه تسلم لي هالضحكه ..

سكتت ,, وقالت باحراج وهي تلعب بشعرها : شتبي ؟

..... : حرام عليك .. (وسند ظهره للكرسي الدوار ودار برجوله بخفيف ) وش ابي يعني ؟ ابي اسولف معاك ..

.... ردت بعناد وهي تحاول تغير نبرة صوتها : ليه تلعبون علي ؟

....... : هههههه هذي روان انا مالي دخل

..... : لا والله ..؟ مره مالك دخل والله خفت .. اسلوبك كنك بنت وانا الغبية صدقت

.... : والله خفتي ؟

..... بعفوية : ايه والله

.... : بسم الله عليك ..

جلست على السرير لانها ماعادت تقدر توقف على طولها .. هو قال جملته الاخيره بصوت واطي وهالشي حلى صوته اكثر ..

...... : .....

...... : ولاء ..

..... : سمّ

...... : هههههههه لاتقولين سمَ , احسها رسميه ,,

..... : امممم , شقول يعني ؟

..... : يعني , أي كلمه ثانيه ..

وردت بخجل : لبيه

..... : لبى قلبك

< ايه عشانكم مو في وجه بعض ولا والله كل الكلام ذا يروح ..

..... : .....

.... : بتظلين ساكته ؟

..... : امممم , لا

..... انسدح على السرير : زين قولي لي , مين تقصدين بالنك نيم ؟

..... : ياربيه لازم اكون اقصد احد , شفيك علي ..

..... : ههههههههه بس كذا , داري انك تقصديني بس ابيك تقولينها

..... : هههههه مره واثق ..

...... : زين قوليها

سكتت ولاء وهي محرجه ,, جت في بالها فكره فراحت عند اللاب تب وكتبت له

(في عيونــــهـ شي مقدر أوصفه ..!! ) :


اقصد عبد الملك لأن نظراته تربكني ..

ابتسم لما سمع صوت المسن وقام للاب تب وضحك ,, وكتب ..

(أميرة الورد .. ليـــهـ الورد مفتونـــكــ .. ليهـ بحياتهـ يحاول .. يشبهــ ألوانــكــ .. ؟ ) :

مسكين والله مايقصد ,, ربي خلقه كذا , واذا عيونه تخوف وش يسوي ؟ حرام عليك تحطمينه وتزعلينه

(في عيونــــهـ شي مقدر أوصفه ..!! ) :

لااااااااااااااا والله ماتخوف , قصدي تدوّخ ..

(في عيونــــهـ شي مقدر أوصفه ..!! ) :

لا لا مو قصدي كذا هذي الكلمه بالغلط ووووالله بالغلط

وضربت نفسها على كلامها البايخ اللي طلع منها بعفويه .. علطول تقولين للولد عيونك تدوخ .. صراحه ياولاء ودي اضربك احيان ..!

عبد الملك ضحك بخبث وهو يتأكد انها مازالت معاه بالجوال : ليه بالغلط ؟ عادي طيب انا اقصدك بالنك نيم وحاطه عشانك اصلا .. وبعدين تعالي اذا بتكلميني من المسن , سكري طيب ..!

..... احترق وجهها : مابي .. ابي اسمع طقطقتك ع الكيبورد

.... : اجل خلينا نسكر المسن

..... : طيب واذا بغيت اقول شي واستحي شسوي ؟

..... : هههههههه عادي خلاص بخليه مفتوح .. بس اذا على كذا شكلي مارح اسمع صوتك .. ماغير سكوتك ..


في مكان ثاني بوسط الرياض وقف راشد عند باب الغرفة الواااااسعه .. واللي تعلقت فيها رسوماته ,, بشكل منسق ورائع ,, وراح يلف على الناس اللي يتفرجون ,, بكل راحه وسعاده ..

المبلغ اللي كسبه اليوم .. بيكفي قسط ايجار شقه له هو وروعه ..

هي ماتبي عرس .. مره ماتبي تكلف على احد على قولتها .. يملك عليها .. بعدين تاخذ عليه اسبوع اسبوعين ,, وياخذها ..

حاس بالتفاؤل .. بالأمل ! حاس انه يقدر يبني حياة جديده على انقاض حياته القديمة , بس كلامها له خوفه شوي ,,هو مايبي شي غير انه يعيش مرتاح .. متهني .. والاهم .. يلقى احد يستقبل مشاعره ,,

لاتخافين يا روعه , بتكونين بأمان معاي ان شاء الله

رغم اني ماعرف وش اللي مكدر خاطرك .. بس مستحيل اخليك وانا كل يوم اتعلق فيك زياده , وابني وارسم امالي واحلامي معاك .. واتخيل شكلنا سوا ..

اتخيلنا انا وانتي .. جالسين بالصاله .. بالغرفه ,, بالمطبخ ..

احس اذا ضحكت ,, بتضحكين معاي ..

واذا ضاق خلقي ,, احسك بتكونين موجوده تواسيني ..

لاتقولون ماتعرفها ! احس اني اعرفها من زمان .. وهذا اهم شي ..

احس بشفافيتها .. ببياض قلبها ..

أحس .. أهم شي أحس .. !

دق جواله بجيبه ,, وعلطول يرفع

طيبه : وووجع ورا ماترد قايلة لك طمني ..

ضحك راشد : هههههههه هذا انتي يمه ,, معليه يمه ووالله نسيت

..... : زين شصار عليك مع المحل ذا مدري وش اسمه

..... : هههههههه معرض يا أم راشد .. مـــ عــ ر ض

..... : مدري عنك انت وياه , المهم كيف الناس عجبتهم شخاميطك ؟

.... : ههههه ايه الحمد لله ,, كل شوي تنباع لوحة ..

..... : زين زين ,, الحمد لله طمنتني ,, وبعدين تعال .. انت طلعت قبل العشاء لايكون لحد الحين ..

قاطعها : ههههههههه لاتخافين يمه صليتها ,, ما تتوبين انتي كم مره قلت لك كبرنااااااااا

..... : زين يالكبير , الله يوفقك

..... : آآآآآمين ,

..... : الله يحفظك ..

سكر راشد وراح يتكلم مع المسؤل ,, ويوزع ابتسامات بشوشه تبان منها غمازته اليتيمة للناس اللي جاو يسلمون عليه ويسألونه , وبعضهم يطلب يرسم لهم لوحات معينة .. بتفاصيل معينة ..

يمكن ماكان حلم بالنسبة لراشد .. بس هو طبق المثل : أحب ماتعمل حتى تعمل ماتحب .. !

توّه يكتشف هالشي ..! يللا احسن من انه مايكتشف ابد ..

مرت ساعات ,, ممتعه للبعض , وممله للبعض الاخر ,, وثقيله على ضاوي اللي كان متمدد على كنبة الصالة ,, وحاط فلم سخيف ,, من الملل غفى بثوبه والريموت بيده

مرت امه وشافته بهالحاله , وتمسك لها مخده ترجمه فيها بقوه : قم لاتنسدح بالصاله

انتفض ضاوي مرتاع : بسم الله .. (ولما فتح عيونه يستوعب ) الله يهديك يمه ماحسيت بنفسي ,, لازم تنفضون ؟

ابوه وهو يجلس عالكنب : لاتعصب قوم بنتكلم معاك في سالفة هالزواج , هالحين حنا اتفقنا على كل شي , بس باقي السكن , بتطلعها بشقه ؟ ماله داعي جبها هنا مافيه غير انا وامك

ابتسم ضاوي بقهر وهو يطالع امه : لاخليكم على راحتكم , مارح اقعدها هنا,, قايل لواحد يدور لي شقه ووعدني خير ان شاء الله

لوت شفايفها : وش فيها يعني جبها عندي تونسني

..... : لا يمه معليش .. اجيبها لك كل يوم بس ماينفع نسكن هنا

قام ابو ضاوي : انا مالي شغل , اتفقي انتي وياه .. (وطلع )

استغل ضاوي فرصة غياب ابوه وراح جلس جمب امه : اقول ام ضاوي .. سولفي لي عن اسيل ترا ماعرف شي عنها

.... عصبت : وش اقول لك ؟ انت اللي قايل لي اختاري بنفسك ولا مو عاجبك اختياري ؟

..... : افااا , اخسى اقول مو عاجبتني ,, انا بس اقول انتي ليه عجبتك يعني ؟

..... : البنت جميله وجمالها مختلف ,, وكشخه وجريئة تعرف تتكلم وترد وتسلم ,, مهيب طرمه وتستحي مثل هالهنوف

قام ضاوي وبدا يعصب : لاحظي انا ما أفتح معاك أي موضوع الا وتجيبين سيرتها ,, قلت لك نسيناها واخطبي لي وبتزوج وعلى اختيارك , وانتم اللي تماطلون فيني

سكتت امه وزفرت : مدري عنك ,, بس انا قايلة لك من اول شخصيتها مهيب زينه ,, احسن يبي لك وحده مثل اسيل , وشخصياتكم تناسب لبعض ..

طالع ضاوي في تعبيرات وجه امه ,, ورجع يسند ظهره للكنب : الله يكتب اللي فيه الخير ..

وغمض عيونه .. يتذكر اليوم اللي خطبها فيه ..

تذكر لما قالت له امه , واكتشف انها تصير قريبة صديق عمره وخويه بندر ..

راح له ,, وجلس معاه .. وسأله ,, بس النظره في عيون بندر كانت غريبه ..!

كنه يبي ,, ومايبي ..

..... : بندر انا امي شارت علي بها ,, ومابي في خاطرك علي شي .. وانت ولد عمها واولى بها

..... : انا اصغر منها ياضاوي

..... : بسنه بس .. !

سكت بندر وابتسم ..

ضاوي وهو يتنهد : يابن الحلال قل لي وريحني .. مابي اطيح في مشاكل وانت عارفني زين عقدة الذنب بدت تفك عني ,, (قصدة سالفة نايف )

ابتسم بندر وقام من ع الطاولة : مبروك والله يهنيكم سوا , ولو كنت ابيها برخصها لك ..

...... انفزع : لا ياشيخ لاتقول لو كنت ابيها ,,, ليه انا امشي وافرّق بين الناس ؟ اصرف لي افكر بوحده من برا وارتاح

وقف في وجهه وضحك بمرح : ههههههه وشفيك مو قصدي .. قلت لك البنت مو فخاطري .. وانا ما أفكر بالزواج اصلا ومابي من العيله .. وبنت عمتي مابتلقى احسن منك .. لو انا منها كان وافقت

...... : ههههههههههه حمار

< أحيان .. هواجسنا اقوى .. لدرجة أنها تغلبنا .. ماتخلينا نقتنع بالواقع ..!

هزته امه : ضاوي ووووعمى من الصبح اتكلم وانت مو معي ..

التفت بتلقائيه : هلا يمه وش كنتي تقولين ..

انقهرت : اقول قوم نام اصرف لك (وضربت على جيبه ) وكم مره قايل لي بتبطل هالدخان .. ؟

ابتسم وسحب الباكيت من جيبه : خففت , بس اذا ضاق خلقي .. سحبت لي وحده ولا ثنتين .. (وشاف امه معصبه فقال يضحك ) بروح الغرفه مارح احشركم

وقام وسمع امه تكمل كلامها : اترك هالدخان لاتفشلنا يمكن البنت ماتحبه ؟

< أبد ماتحبه !

التفت بابتسامه : يدرون اني ادخن ماشترطوا ابطّل , وبعدين انا مو مدمن ..

ورجع يدخل قبل لاتفتح امه سالفة ثانيه ويصدع راسه ,,

في بيت ابو نايف .. كان الكل نايم ,, الساعه 4 الفجر .. بس احمد وليان مابطلوا صياح .. يصيحون سوا بالوقت نفسه , ويصارخون بالوقت نفسه ..

صحت هنوف تعبااااااانه ومسكتهم ثنينهم تدور فيهم وعيونها كلها نوم .. رضعتهم وغيرت لهم بس شكلهم مالهم نيه ينامون .. صار لها ساعه ونص تدور فيهم واذا حاولت تنومهم يصيحون ,, وفي نفس الوقت برضو ..

وقفت فوق راس نايف اللي كان ناااايم بسابع نومه , وقالت بكل رقه ممزوجه بتعب : ناايف ,, نايف

...... : همممممم

..... : نايف قوم امسكهم , ابي انام

رد بصوت ثقيل من النوم : اووووه هنوف انا بعد نعسان وديهم لامي

..... ضاقت : ياربي فشله قووم امسكهم ع الأقل والله مو عارفه اصلي الفجر

.... فتح نص عين وكنه مايبي النوم يطير .. واول ماشافها من جد تعبانه وشوي وتصيح .. فز جالس : خلاص هاتيهم

حطتهم عنده وراحت الحمام , اما هو من كثر نعاسه نام وهو حاضنهم ,, وكل ماصارخوا صحى بنص عين يسكتهم شوي ويرجع ينام بشكل مضحك ..

صلت وراحت تسبح وتبدل .. ولما طلعت شافتهم .. وابتسمت بحنية .. منظرهم ينرحم ..

نايف نايم على السرير بس بالعرض .. محوط احمد بذراع , وليان بالذراع الثانيه .. وهم يتحركون بين يدينه وهو نايم مو حاس بشي ..

قربت منهم ,, وخذتهم بهدوء تنومهم .. وهم بين يديها ,, انتبهت لاثار الجرح اللي في جمب نايف , مرت عليها فتره خلتها تنسى ,, بس بين كل وقت ,, تشوف الآثار وتبتسم ,, صح شي صار وانتهى ,, بس كذا لازم يبقى شي يذكرها بأوقات أليمه في حياتها .. فالنهايه يبقى شي يذكر بأن الحب اقوى من كل شي ..

عشان تحس ان حياتها الحين حلوه صح ؟

سدحتهم في سريرهم الصغير وقربته من سريرها .. وسرقت من الوقت دقايق تتأمل فيها وجه نايف اللي تحبه حيل .. واخيرا تبتسم لما تشوف شعره المحيوس من المعركه مع عياله قبل شوي ..

مدت يدها ورتبت شعره .. وهمست باذنه : نايف .. انت نايم غلط .. بعدين رقبتك توجعك

.... ابتسم : همممممممم

..... حطت يديها ورا ظهره يقال لها بترفعه : نايف حبيبي حط ظهرك بالجهه الثانيه ..

ماتحرك نايف وقاومها , همه ينام مو مهم المكان ..

ضحكت عليه وخذت المخده تحطها تحت راسه وهو بنفس مكانه .. وتجيب مخده ثانيه تحطها جمبه وتنسدح .. وتضحك على نفسها ,, ويبتسم هو لما يحس بها جمبه .. ويحوطها ..

ومن هنوف نايف .. الى الوقت اللي مر وصارت الساعه تسع .. كانت ناديه جايه من الصاله وانسدحت جمب سالم تسولف

عزوز : بووووووووووووووو

ناديه وسالم : ههههههههههههههههههه

سالم ضحك وشال عزوز من بينهم : يالشيطاااااان مالقيت مكان الا هذا

يضحك عزوز ويتربع على المخده الصغيره الي تفصل بين سالم وناديه : هنا ..

سالم بابتسامه : بس كذا ياحبيبي انا ما أشوف ماما ..!

ناديه من وراه : وانا ما أشوف بابا ..

ضحك بخبث وهو ينطط : ماما للللللأ .. بابا لللللأ ,, أذوذ بث

ناديه ضحكت وخذته بحظنها : ايش ؟ قول عزوز مره ثانيه ؟ قوووول

ضحك وهو يتفلت منها ويرجع ينطط ع السرير : أذّوذ أذّوذ.. أذّووووووووووووووووذ

ناديه : شااااطر حبيبي تعال حب ماما

قرب عزوز ومسك وجه امه ببراءه ولزق شفته على خدها ..

سالم : ههههه وبابا طيب ماتعطيه بوسه ؟

ضحك عزوز وقام بحماس يمسك وجه ابوه .. ولان سالم حاط عوارض .. احتار عزوز وين يبوسه .. بس صار يدقق في عيون ابوه وكنه ينتبه لشي .. اخيرا يبتسم ويبوسه على عينه اللي مايشوف فيها .. وكنه انتبه ان شكلها يختلف عن الثانيه ..

ناديه تصرفت بسرعه قبل لايضيق خلق سالم .. : وحده ثانيه حق العين الثانيه

ضحك سالم ببراءه ,, وباسه عزوز بوسه ثانيه ..

والتفت لزوجته شافها تبتسم بمرح , يعني عادي ماكن شي صار ..

ويبتسم سالم بحب .. على هالحب الكبير اللي له بقلبها ..

في الفيلا المتواضعه ..

عايشه تهز بنتها صار لها خمس دقايق : ياربي ياعذبه قومي وجع بياذن الظهر

عذبه طفشت : مابي اقوم طفش ماعندي شي اسويه ,, خليني نايمه

..... : قومي خلينا نعرف وش بنلبس لملكة اختك اليوم

تغير وجهها وقامت معصبه : وع منيب رايحه الله ياخذها ان شاء الله

..... : يوووه اختك ذي لاتدعين عليها , وبعدين ياعذبه ياحبيبتي وش بيقولون عنا الناس .. ؟ لازم نروح .. وانتي بعد (وترميلها نظرات خبث ) لازم الحريم يشوفونك ,, ابي الناس تعرف ان عندي بنت ثانيه حلوه وسليمه ومافيها شي

ابتسمت من كلام امها وشالت اللحاف : خلاص بروح

طلعت عايشه من الغرفه وتركت بنتها تغوص في افكارها ومخططاتها ,, عذبه ماتوقعت تكون الملكه بهالسرعه ؟ صح مر عليها وقت بس توقعت يطول .. وضحكت بسخريه .. لهالدرجه ميت عليها مو قادر يصبر ..؟

< مو مسألة مو قادر يصبر .. المعرض والحمد لله جاب نتيجة .. وخلاه يرجع يوقف على رجلينه ..وابو نايف قرر لانه حس ان روعه بدت تنطوي على نفسها وتحس انها ثقل عليهم وفترة جلوسها طولت .. وهو مستحيل بيرجعها بيت اخته .. وسبحان الله ربي كتب لها نصيب .. ليش التأخير اجل ؟

فتحت دولابها تحوس ,, تدور لها شي تلبسه ,, لما يأست راحت طفشانه لغرفة أمها , وهي تقلب خطتها براسها ,, صح هي حاقده على اختها ,, بس مو مثل حقدها على هنوف ونايف ..

كذا علمتهم أمهم .. اذا تبون الشي .. لازم تكافحون عشانه ..!

بس الفرق بين الثنتين ,, ان وحده منهم تميز الحدود ,, والثانيه لا

روعه .. اللي كانت ماتقرب للحدود اصلا ,, دائما انسانه ضعيفه وخوافه .. ماتتجرأ بسرعه وسهوله .. عشان كذا عذبه فاهمه ,, انها تجرحها وتكسر خاطرها ,, احلى طريقة للانتقام ,, ولا الضرب ضربت لين قالت بس ..!

كانت متوتره طول اليوم .. مع ان حالها مو حال أي بنت بتتزوج ,, بيجيبون لها الدفتر وتوقع .. وبعدها بتجلس بالغرفه وهو بيدخل عليها .. يلبسها ..

يعني هي جالسه ومارح تقوم .. وهالشي يريحها , ويخفف عليها ..

بنات ..

تخيلوا شكلي بكرسي ,, او امشي له بعكاز ...؟

تخيلوا اسويها واخطّي بدون شي .. كعادتي لما اتدرب ..

واطيح شوي .. واوقف اكمل .. لين اوصل له ..

كني طفل بدى يتعلم يمشي ..

والناس تقول مسكينه ..

يعمري عليها ماتمشي ..

وممكن تنطق وحده ,, وش يبي فيها مالقى احسن منها ..

ماخذ له وحده ناقصه ..!

وشلون بيعيش معاها ..؟ وشلون تخدمه ؟

لو ماتكلموا .. لو ماقالوا شي ,, يكفي نظراتهم ..

تكفي الشفقة بعيونهم ..

مابي ..

مستوعبين انتم .. ان انا انسانه ضعيفه .. صغيره وعاجزه بعد ..!

يحتويني عالم كبير .. قاسي ومخيف ..

انا خايفه ..! والله ..!

< مو يقولون الأرض مدورة .. ؟ بعضنا بس يدور معاها .. وبعضنا لأنه صغير ,, يدورون الناس حوله .. ويتعدّونه .. !

الكل في بيت طيبة بعد العصر يحوسون راشد ويربكونه ويتلفون اعصابه .. الكل خايف محاولته الثانيه تفشل .. والوضع شوي غريب ...