فجأه يوقف اصيل بالنص : ايش هاذا حرام عليكم ؟

التفت الكل له : شفيك

...... : مو معقوله منتو صاحين ,, وش فيكم فجأه كلكم تزوجتوا ؟ ايش هاذا سخافه

ضحكت اسماء وهي تلمح له بنظراتها يسكت

طيبه : وش تبي اجل ؟

جا اصيل وقعد جمبها وصلح شماغه : قصدي ياجدتي الحبيبة .. ان على الأقل كل سنه يتزوج احد .. مو كذا كلكم مره وحده

وطرااااااااااااخ بعصايتها : نصيب .. على كيف امك توقفه

ضحك اصيل : آي يمه لاتضربين , ماقلت اوقف نصيب بس مدري شفيكم قلودين .. ملكة ورا ملكة عرس ورا عرس

اعتدال : قل لا اله الا الله

اسماء : وبعدين احسن لك مو انت بتموت وترقص في عروسنا .. ؟

نفخ صدره : ايه برقص اليوم

ضربته امه : استح على وجهك مو على كيفك احنا نمزح ,, اليوم ناس كثير بيجون واهلها مانعرفهم كثير ,, ونسمع عيونهم قويه ..

..... : وشلون يعني ما استانس ؟

ضربته اسماء : لا , قلنا لك عيونهم حاره وينخاف منهم ..

انقهر وعفس وجهه : ياربي من هالمعتقدات , خلاص اقروا علي واتفلوا

طيبه قربته لها وضحكت : تف عليك قم عن وجهي بس

وقف يزفر ويصلح شماغه ويقول بمزحه : يمه انتي مدري شلون صراحه ,, تقهرين احيان , بس برقص لو لحالي

وطلع وهم يضحكون عليه .. مايركد هالمراهق .. !

اسماء : ها ياعتدال عسى هنوف وناديه مع البنت ؟

.... : أي والله انا طلعت وهم معاها ,, والكوافيره جتهم بعد .. يونسونها ويخففون توترها شوي ,, والله اني راحمتها هالبنت تستاهل كل خير

..... : الله يوفقكم والله انا مرتاحه لهالزواج ..

..... : أي والله حتى انا ,, شوفي وجهه (وتأشر على راشد ) صح مرتبك بس تحسينها على سعاده ..

..... : الله يهنيهم


كان التجمع حلو .. بالرغم من انه مو زواج .. ومو حفله كبيره .. بس الاستراحه اللي حجزها ابو نايف كبيره .. وواسعه وفخمه .. وتكفي عدد كبير ..

الحضور كبير .. من العايلتين ,, والكل يبي يتأكد بعينه ان روعه المقعده هي اللي بينكتب كتابها اليوم ..

وكأن الكل مو مصدق انها تقدر تتزوج وهاليوم بيسجل في التاريخ .. !!

لبست فستان بيج طويل .. .. مطعم بفصوص ذهبيه ناعمه .. مناسب لهالمناسبه ..

وقعت في الدفتر المخيف .. ! وهي تشوف توقيع راشد وتحاول تتذكر شكله وصوته وتبلع غصتها .. مرتاحة له وتحس انه طيب مثل هنوف وناديه .. بس ولو .. خايفه ..

جلسوها على الكرسي الفخم .. واجتمعوا الضيوف حولها .. والكل يبارك ويسلم ..

معليه هم مضطرين يدخلونها الغرفه قبل لايجون الحريم كلهم وتنجرح احاسيسها ..

متقبلين هالشي ..

طق ورقص والجو على آخره .. هنوف وناديه الاقرب لروعه .. كانوا يروحون ويجون عليها .. يطمنونها ويهدونها

لكنها من شافت امها واختها يدخلون .. دب الخوف في قلبها زيادة ..

عذبه .. ! اتركيني في حالي .. !

حست عذبه بخوف اختها وضحكت باصطناع ونزلت تسلم عليها , ويقال لها تمزح : والله سويتيها وتزوجتي قبلي

..... ابتسمت : شفتي شلون ؟

ابتسمت لها وراحت عنها .. وتركتها تخاف .. ان هالليلة تقلب نكد .. مو بس لحالها .. كل اللي يعرفون عذبه .. انزرع في نفسهم الخوف .. الا هالليلة ياعذبه .. الا هالليلة ..!

الا هالليلة .. الا هالليلة ..

حلوه هالليلة .. !

ولا أجمل .. ولا أروع ولا أحلى .. ولا أمتع .. !

ليلة فيها الحب قال .. "مافي شي اسمه محال .."

فيها الوان الجمال ,, وكل مافيها سعيد ..

راحت عذبه تجلس جمب هنوف وتسبل بعيونها : شخباار العيال عسى مو متعبينك ...؟

ابتسمت : والله الحمد لله ,, توهم صغار لازم يتعبوني

..... : ماشفتهم انا ايهم يشبه ابوه ؟

التفتوا ريهام واسيل عليها .. فكررت سؤالها يعني عادي : أسأل بس مين فيهم يشبه نايف

قبل لاترد هنوف طلت ريهام بوجهها روعتها : كلهم يشبهون امهم ..

..... خافت عذبه : يمه لاتاكليني ماقلت شي اسأل بس .. (وقامت واقفه ) بقوم اصلح مكياجي ..

واول ماقامت التفتت لهم هنوف والقهر واضح بوجهها : المشكله تتصرف وماكنها سوت شي ... تقهررر

ريهام : ماعليك ,, قومي ارقص وفلي ابوها , حرام خلي البنت تحس ان فيه احد فرحان لها

ضحكت : هههه طيب

روان .. ماحضرت .. هالمره ماتصلت على بندر ولا عبد الملك ,, لان امها سمعت من مازن ان زواج راشد اليوم .. وراحت لبنتها تركض تاخذ الجوال منها , وتفصل التلفون ,, ولانها ماتفهم كثير بالنت , ماجا في بالها انها تقدر تكلمهم , هي دخلت المسن وتمنت تشوفهم بس كانوا كلهم off line وانقهرت مووت .. بس تركته مفتوح يمكن على اخر لحظه ينقذها احد .. للأسف الكل مشغول ..

كانت تبادل الابتسامه ,, لكل اللي يسلم عليها .. وهي على قلق .. ماقالوا لها متى بيدخل راشد .. ومو عارفه كيف تتصرف .. وزياده على كذا .. عذبه قامت من عندها .. ومو قادره تشوفها وتحاول تفسر نظراتها .. ليه ماقعدت جمبهم ..

كانت برا .. عند قسم الرجال .. تكلم صديقتها بالجوال .. بعد ما أخذت لها نظره عليهم وهي متلثمه ..

عذبه : يمه والله يجنن موت عذاب ..

..... ضحكت صديقتها : ومين هذا ؟

..... : مدري مين هو شكله من قرايبهم .. بس شفته قبل شوي وعيونه تعلقت فيني .. بموووت والله

..... : هبله انتي كل الناس بتموتين عليهم

..... مصره : لا هذا غير , وان شاء الله الثالثه ثابته وهو بيكون لي ..

..... : اقول بس ,, قلتي نايف وتزوج وخلاك ,, وراشد اخذ اختك .. والحين ..

قاطعتها بغضب : لاتقهريني .. اصلا كل شي ضدي مررره حظي شين .. بس هذا شكلي اعجبته مدري ,,

..... : وشلون يعني هو شافك ؟

..... : لا انا متلثمه بس ناظرته بعيوني ,, وهو ماصد طالعني شويه , اكييييد عجبته عيوني

...... : طيب يمكن يطلع متزوج ؟

...... بدون اهتمام : وإذا ؟ عادي متزوج ياخذني ثانيه ,, مايهمني ..

...... ضحكت : مدري متى بتعقلين ,, اخاف مايعطيك وجه وتتحطمين

..... : لا لا , قلت لك ان شاء الله الثالثه ثاابته .. وهـــ بس .. ماقدر ,, نظرته ما أنساها

..... : بشويش لاتموتين علينا

..... : لا لا لو شايفته ماقلتي كذا ,, وش اقول وش اخلي .. ما أحلى من طوله غير شكله وسكسكوته ورزته .. ولا النظاره اللي تحليه زياده ..

..... : ههههههههههههه زين درينا انه حلو

<< طبعا عرفتوا مين ..!

بندر ينغز راشد بكوعه وهو كاتم ضحكته : نسيت تسكر فمك

راشد وضحكته اتسعت زياده : هه ؟

..... : بلاك تضحك زي الاهبل ؟ من قبل شوي وانت فاتح فمك .. والله شكلك غبي ..

عبد الملك من جمبه الثاني يكتم ضحكته : سكر ترا الذبان كثير هنا

استحى راشد وتحولت ضحكته لابتسامه وهو يضحك في داخله على نفسه .. : متى بيدخلوني ع البنت ترا زهقت من مقابل وجيهكم ..؟

عبد الملك : اصبر خلني اكلم امي طيبه محد يعرف لها غيري ..

بندر بمزح يبتسم : زين خلنا ندخل معاك ونشد من أزرك ..

راشد يرص على اسنانه عن الناس : انثبر مكانك

..... : ماهقيتها منك وانا ولد اخوك .. خلني ادخل ,, وبغمض عيوني .. منيب شايفها .. بس اشوف اللي حولها

..... : انطم بس ,, تبي .. اخطب اختها

ابتسم : لا شكرا ,, ماعرفها

..... : هي اللي مرت قبل شوي .. اظن كانت متلثمه ..

دفه بندر بخفه : هذا وبتعرس على اختها قزيتها .. يمه صدق ينخاف منك ..

..... ببراءه : والله ماقزيتها بس انا اعرفها شفتها قبل .. وبعدين هي مرت وشلون يعني ما ألتفت ..؟

... ضحك : التفت ياحبيبي وسو اللي تبي .. اما زواااج لاتزوجوني , محد يبي انسان فاشل في دراسته وحياته ..

عبد الملك ابتسم : افااااا , والله لو توقف بالشارع وتقول مين يتزوجني يطبون عليك خمسمية وحده

...... ابتسم يغير الموضوع : طيب ..

التفت راشد لابو نايف يكلمه ..

فعبد الملك همس لبندر : بالله شف عمك .. كنه اول مره يعرس

..... : هههه شف من زود الحماس بيتكسر البشت وكنه حاضنه بيديه ,,

..... : تصدق ودي الحين الحين اهبل فيه واقول له خلاص كل شي تفركش

..... : هههه لا والله تجيه صدمه عصبية محنا ناقصين .. بس طلع جوالك وصوره .. منظره مايتفوت ,, كنه بزر معطينه جالكسي ..

....... : ههههههههه طيب


شوفوا .. راشد شكله اليوم كنه بزر معطينه حلاوه ..

وعبد الملك شكله يوم الملكه كنه طالب نسى يحل الواجب وخايف من الاستاذ ..

اما نايف كان كأنه طالب متفوق جاي يستلم جائزته ..

شرايكم بالتشبيهات بس . ؟؟


اسماء صرخت : تغطوا .. بيدخل ..

انتفضت روعه .. وودها تقوم تتغطى هي بعد .. لا لا ... لحظه مابي خلوه يطلع ..

تغطوا كلهم وعذبه جت تررركض وتتلثم تمسك طرف اللثام بيدها .. ونص شعرها طالع .. هالشي خلى نظرات هنوف وناديه وريهام واسيل تتأملها ..

كانت خايفه وهي تشوف نظرات عذبه المترقبة لراشد وهو يدخل بالبشت .. وابتسامته تبان منها غمازته ..

تذكر كلام خواته .. سلم عليها واجلس .. !

بس هي جالسه صح ؟ ماتقدر توقف .. !

وصل قبالها ومد يده يصافحها .. ونزل راسه لمستوى راسها وحبها على جبينها .. وجلس وابتسامته مافارقته

والبنات يصارخون من الحركه ..

عذبه لامها : سخيف , ماله داعي سلم عليها كذا , كان صافحها وبس ..

..... : ماعليك منه تلقينهم ماعلموه ..

< اقول ياشين الغيره بس .. !

..... عذبه بغرور : مو حلو ,, والله شكله عادي مافيه حلا الا بغمازته ولا وجهه عادي ..

..... نغزتها : اسكتي فشلتينا ..

روعه في معركة تحارب دموعها عشان ماتنزل .. من حركة راشد حست بالضعف والقهر .. وحمدت ربها انها غمضت عيونها ولا شافت نظرات الناس لحظتها ..

خلوني اقول لكم .. ان كلمة ترتجف .. شويه وصف على حالتها .. وراشد يلبسها وهم (جالسين ) .. مو خوف واحراج بس .. زي العصفور الجريح .. اللي مو عارف يتصرف .. وخايف من أي احد يساعده ..

ماحلمت بهاليوم يجي .. ابد ...!

رفعت عينها على وجه راشد الباسم .. وحست بشويه اطمئنان وهو يقرب منها يسكر لها العقد .. تدعي ربها ان راشد يكون نعمه مو نقمه .. يارب يارب .. يااااااارب .. !

استرجعت كل كلامه معاها بالتلفون ذاك اليوم .. وكل كلام البنات عنه .. وكنها تدور أي شي يطمنها ..

شافت بعض البنات يتغطون .. وابو نايف يدخل يسلم .. والضحكة المريحة تتربع على قسمات وجهه .. لين يوصل لها اخير ا وينزل لمستواها ويحضنها .. ويبارك لها بكل سعاده حستها في صوته ..

اعتدال : اوقف صور معاها

ابتسم ابو نايف : عاد هذي روعه ان ماصورنا معاها نصور مع مين .. يللا وهاذي صوره

واغتاظت عذبه طبعا .. بس في داخلها مبسوطه .. كل الصور اللي خذوها .. لناس جالسين .. !

عايشه تمخطرت واقفه : وانا بصور ..

ابو نايف : زين اجلسي لاتخرب الصوره لحالك واقفه .. !

..... : منيب جالسه ابي فستاني يبين , انتم قوموا واقفين ..

(لأ .. طعنه في الصميم ياعايشه .. والله مؤلمة .. !)

التفت راشد علطول لروعه اللي بان الألم على وجهها .. بس ابتسمت .. والكل استغرب لما شافها قامت واقفه بس بدون اتزان .. واضح على شكلها ..

ماتبي كلهم واقفين في الصوره .. وهي جالسه .. !

وماتبي الكل يشفق عليها .. فوقفت .. مع انها ماتقدر توقف لفترة طويلة ..

عايشه ساعتين واقفه تصلح الفستان ,, لا لحظه لاتصورين .. لا دقيقة .. اصبري شوي ..

يعني تطول بالمده عشان روعه تتعب وترجع تجلس ,,

شكلها انقهرت لما شافتها واقفه ..

وسط الازعاج والزحمه والاغاني .. ولانهم كانوا قريبين للصوره .. قدر راشد يسمع انفاسها المتلاحقه المتعبه .. الخايفه .. وبحركه مايدري كيف قدم عليها .. مد يده مسك بها خصرها من ورا .. ويشدها له

(لا ياروعه ..! والله ماتطيحين قدامهم ..! )
ابو نايف انتبه هو الثاني واشر للمصوره : صوري يللا ..

انتفضت من اول ماذراعه لامست جسمها .. صح حست باحراج .. لكن هالحركه فعلا ساعدتها ووقفتها زياده على رجلينها .. بس معاها نزلت دمعه سرييييعه .. تسابق الريح وتموت عند طرف فستانها .. ولكذا محد شافها ..

غير عذبه اللي واقفه من بعيد .. !

حتى هو .. حتى راشد حس بالقهر .. ليه كذا كلهم ضدها ... !

انتهى التصوير .. وجلست بهدوء وهي تقاوم آلام رجلينها اللي اتعبتها اليوم .. وجلس راشد ونظراته طبيعية .. مايبي يحسسها بالحرج ..

وشوي خفت شحونة الجو .. ومابقى غير البنات .. اللي جو يباركون لخالهم ولروعه ..

ودخلت عايشه .. وبكل تعبيرات وجه طبيعيه .. قالت وهي تطالع راشد وروعه : هالصاله كبيره , صعبه نفضيها لكم , قوموا للغرفه الثانيه .. هناك العشاء ..