عشــــــــــــ بس ..! ــــــــــــــانك _33_

في الغرفه ..

تكلم راشد ويده تمسح على ظهرها : روعه والله ماقصدت احرجك بحركتي ..

ماردت وظلت مخبيه وجهها بيديها .. وكتوفها تهز من كثر الصياح .. صح حركة راشد يوم شالها ما أحرجتها كثر ماخاطرها منكسر .. ! بالعكس جت في وقتها كرد على ظلم اهلها لها ..

شاف صياحها زاد فأبعد يده عنها .. يمكن هو متزوج من اول ومتعود ,, وهي الحين اللي زاد على صياحها لانها محرجه منه ..

...... : روعه ... اخليك الحين ,, تهدين وارجع لك متى ماحبيتي ,,, واذا ماتبين خلاص معاد ارجع ..

تكلمت بهدوء وسط صياحها : لا لاتروح

ابتسم : اجلس يعني ؟

..... ببراءه: بس التفت شوي .. (وحاولت تضحك ) اكيد شكلي يفشل ..

ضحك وابتعد عنها ولف وجهه : طيب , يللا امسحي دموعك عشان اشوفك ,, لاني ماشفتك زين ..

ابتسمت والخجل يصبغ حركة يدها وهي تمدها تاخذ منديل ..

دخلوا اسماء واعتدال ونوره معاهم .. يطمنون .. عليهم بعد ماشافوا القهر بعيونها ..

وابتسمت لهم

اسماء تبادلها الابتسامه : ها كل شي تمام ..؟

هزت راسها بخجل وباين توها كانت تصيح .. اما راشد التفت لنوره يكلمها

اعتدال همست لها : ماعليه حبيبتي .. بترتاحين معاه ان شاء الله ..

سكتت روعه وحست ودها تصيح اكثر .. بس انتبهت لاعتدال تكلم راشد : اسمع ترا هذي البنت ارق ماشافت عيني .. تتجيفس عليها ياويلك فاهم ؟

اسماء بتأييد : والله نسمع انك مسوي لها شي ...

ابتسم راشد : وانا اقدر ..! احد يشوف هالرقه بعيونه ومايقدّرها ..؟

احححححترق وجهها .. ويمكن جسمها كله بعد ,, وطأطات راسها بخجل .. لدرجة شعرها الناعم نزل على قدام بكل تلقائية و روعه .. خلت راشد مايشيل عينه من عليها ..

اعتدال تسحب خواتها : قومو خلوهم ياخذون راحتهم ... نويّر تعالي

ضحكت نوره وطلعوا وتركوهم لحالهم ..

خاف راشد انه يفتح أي موضوع ,, تستاء وترجع تصيح .. ففضل يسكت ..

روعه حست انها لازم تقول أي شي ..

تكلمت ,, ومازالت منزله راسها : راشد ... .................. سوري

ابتسم : على ايش ؟

...... شبكت يديها باحراج وهي تحاول ترتب كلامها .. : يعني .. سببت لك .. احراج اليوم ..

انتظرته يرد .. لكن انتظارها طال .. فرفعت راسها تشوف شفيه ,, لقته مبتسم ويتأملها بحب واعجاب .. اربكها فحاولت تنزل راسها ,, لكنها صنمت لما شافته يتحرك .. ويقرب .. وتنمد يده ناحيتها ,, وتستقر .. على خدها .. وبصبعه يمسح بقايا كحل خفيفه مانتبهت له .. و اخيرا يبتسم برضا : خلاص راح , كذا احلى

انصبغ وجهها باللون الاحمر.. وانتبه راشد لحركة قلبها يدق بقووووه ,, بس هي قدرت تبتسم وتقول بنعومه ماحست فيها : راشد ....ترا انا اول مره اتزوج ..!

وضحك على جملتها .. وضحكت بحيا وراه ..

في الصاله .. وبعدما رجع راشد للشباب .. فتحوا البنات الستاره يطلون ع الشباب وهم يرقصون ,, ولان الشباك مظلل فماخذين راحتهم ..

عذبه وكنها بتوصل لشي : الطويل هذا مين ؟

هنوف ابتسمت ماتبيها تعرف : مدري مو من قرايبكم ؟

ريهام استغربت بس ضحكت لما فهمت هنوف : ايه حتى انا اول مره اشوفه ..

سكتت عذبه مقهوره ورجعت تطالعهم .. وشوي جات عايشه وابتسمت لهنوف : وينه اخوك اللي رقص بالعرس ذاك اليوم ... ؟ يقولون كبر وتغير

تغير وجهها بس اشرت عليه : قاعد معهم .. بس شكله معطينا ظهره

طلت عايشه بحماس لين شافت اصيل يقوم ويرقص

..... فتحت عيونها : يختي هذا صغره وعليه رقص يجنن ,, وباين عليه اكبر من سنه .. نشيط ويعجبك

...... : قولي ماشاء الله ..!

التفتوا البنات على هنوف لما لاحظوا الحده بصوتها .. وهي حست وتفشلت .. وابتسمت وهي تلعب بشعرها : سوري مو قصدي .. بس

عايشه دزتها من كتفها وقالت بمزح : يوه وشفيك قالوا لك بعطيه عين ؟

سكتت هنوف ومن غيظها ماردت .. ولهوها البنات يوم رجعوا يلتفتون ,, وعايشه مشت مقهوره من قلة ادب هنوف .. ! ليه تقول لها كذا ..


قدرت تنسى افكارها وقهرها من عايشه , لما شافت جوالها يدق : اهلين

...... : ياهلا وغلا والله ,,

ضحكت : وش ذا الرقص الخطير يانايف ,, ترا شفنااااك كلنا

شهق : والله منتو صاحين تقزّوننا بعد ,, المفروض نبدل المجالس

....... : ههههههه لا والله ,, بس شوف ,, صراحه انت غطيت عليهم كلهم يازوجي العزيز .. وحتى لو رقصك مو زين احبك برضوووو

...... : شوفي تقولين لي هالكلام تخليني اجي عندك الحين واتهور وادخل ..

....... : ههههههههههه خلاص بسكت ...

...... : زين متى بتطلعون ؟ تراك هالمره رحتي وماخليتين اشوف الكشخه

...... : هههههه مو لازم

..... : لا لازم ,, وياويلك تدخلين وتبدلين .. ياويلك والله

..... : اممممم افكر ,,,

...... : طيب خليني اتخيل ,, أي لون لابسه .. ؟

...... طالعت فستانها : وردي .. وفوشي .. مشجر يعني

..... : آه ياقلبي ,, افتحي الباب بسرعه انا جاي وماعلي من احد ..

ضحكت وهي تحاول تخفض صوتها : ناايف هنوف .. اعقل خلاص بخليك تشوف الفستان ..

...... ضحك برضا : طيب ,, اذا بتطولون مع روعه علميني ,, اشوف لي صرفه

...... : مارح نطول ,, وبعدين (همست ) انا طول اليوم انشغلت وماشفتك زين ..

..... : يعني

..... : يعني وحشتني

..... : ادخل ؟ لا لا خليني ادخل

ضحكت : هههههههههههههههههه


روعه بابتسامه لريهام : يالله شلون يعني بتسكنون في جده ؟

.... : ان شاء الله ,,

نوره وهي تجلس جمبهم : وليه وش فيها الرياض ؟

انحرجت ريهام وفكرت بتصريفه : مافيها شي ,, بس سلطان يقول عنده شغل هناك في الفرع اللي بجده , وهنا بالرياض فيه مشاكل .. بس ماتوقع نسكن هناك علطول ..

نوره : تحبون الشقا

اسيل وهي جايه ويدينها بجيوب بنطلونها , وتكفخ ريهام على راسها : اصلا ياويلها لو تروح وتنسانا ..

..... : وانا اقدر ؟ (والتفتت لروعه ) زين لحقت على هالمناسبه الحلوه

نغزتها اسيل بصوت عالي : وعرسي ياويلك تفوّتينه ..

ضحكت : لا ماقدر .. اجي عشانه ,, ماعندنا غير اسيل وحده بس ..

وحده من الحريم حطت رجل على رجل : ايه عندكم طياره خاصة تعالوا على كيف كيفكم

الثانيه تلوي شفايفها : الخير كثير استغليه

بكل جرأه قامت ريهام ومسكت طرف فستانها : اعوذ بكلمات الله التامه ,, من كل شر وهامه .. وكل عين ولامه .. (ونفخت في صدرها )

نوره تفشلت من حركة بنتها : اقعدي انتي فشلتينا