في الشرقية وبغرفة نوره ومالك ..

مالك" خلاص بطلي من البكي وبعدين ؟؟

نوره جالسه تبكي ومو مهتمه من كلامه ...

مالك" قومي سوي لي عشا ميت من جوعي وما تعشيت

نوره" وش أسوي لك ؟؟

مالك" كفته ...

طلع مالك من الغرفة وراح للصالة وجلس بجنب أمه

نوره تروح له وتجلس جنبه وتكلمه بصوت واطي " مالك

...ما اعرف أسوي كفته

مالك بملل" خلاص سوي لي بيض

نوره تنزل راسها" ريحته كريهة ما أطيقه

مالك يقرب منها" بس أنا أحبه يا نوره

أم مسعود" كيف ما تحبي البيض يا يمه البيض مغذي

ومفيد ...

نوره" ايي بس زفر يا خالتي وأنا ما أحب الزفوره

مالك باستفزاز" بكره لما تحملي وش راح تآكلي ؟؟ لازم

تآكلي بيض حتى يتغذى الجنين

نوره بضيق " أنا ما أحب الجهال

مالك ببرود" بس أنا أحبهم يا نوره

نوره تغير السالفة " مو اليوم انت أكلت بيض؟؟

مالك" ايي أكلت بيض بالجبن والحين ابغي بيض بالطماطم

نوره" وش هذا إدمان ؟؟

مالك" سميه مثل ما تحبين

نوره بزعل" ما اعرف والله يا مالك...وش رأيك أسوي لك

بريد وجبن ؟؟

مالك يطالعها" بزر أنا تسوين لي بريد بالجبن قومي يا لله

بلا كسل يا عروس

راحت نوره المطبخ وهي متضايقة من مالك وطريقته وقفت

تطالع بكل زاوية في المطبخ وهي حايره بعمرها لكنها

رجعت لهم الصالة

مالك يطالعها " هااا وش صار ؟؟

نوره محرجه" خالتي ما شفت البيض وينه ؟؟

أم مسعود" يمه البيض بمكانه بباب الثلاجة

نوره" بالثلاجة ؟؟ أنا أدوره بالمخازن

مالك ما قدر يتمالك نفسه وصار يضحك بجنون "هههههه

نوره تضايقت وصارت تطالعه وبعيونها متجمعة الدموع

مالك" هههه آآآه يا يمه مو قادر بطني بيتفجر

أم مسعود" خلاص يمه روحي شوفيه

راحت نوره وهي متضايقة ودموعها على خدها

أم مسعود" رغد روحي معها

مالك يمسك يد رغد" جلسي

أم مسعود" حرام عليك يا يمه ...البنت متعودة على الخدم

والحشم من حقها ما تعرف شي

مالك سكت والضيق مبين من عيونه وكان يقول في نفسه

كذاب يا مالك همك أكبر من الدنيا أصلا حتى ضحكتك

كانت في غير محلها انت متأزم كثير والله العالم على

شانها ولا على شان حالك

أم مسعود" يمه رجع البنت لبيت أهلها

مالك بزعل" نعم ؟؟ نوره هذا مكانها لين أنا أقرر اني

اتركها ذاك الوقت أقول لها مع السلامة

أم مسعود" يا يمه لا يكون الله يعاقبني ببناتي ...حرام عليك

اللي جالس تسويه فيها

مالك بضيق" ليه وأنا قاتلها ؟؟ هذا هي جالسه معززه

مكرمه.. تبغي تعيش أحسن من كذا ؟؟

على كل اللي سواه أبوها فينا انتي للحين كاسره خاطرك...

هي وين تلاقي ناس مثلنا بالله هااا؟؟

أم مسعود" أبوها جزاه عند ربه أنا وكلت همي له ..لكن

البنت مالها ذنب تدفع ثمن أخطاء غيرها

مالك بضيق" نوره ذبحتني يا يمه

أم مسعود بجديه " مالك انت تحبها ؟؟

مالك وكأنه تلقى صفعه على وجهه " وش تقولين يمه ؟؟

أم مسعود" أنا أسألك إذا كنت تحبها أو لا

مالك بصوت متقطع " هههه انتي غريبة يا غالية أصلا

نوره ما ....

قاطعت كلام مالك صرخة نوره اللي كانت بالمطبخ ...

فز مالك لعندها لقاها على الأرض وماسكه يدها

مالك" خير نوره ...وش فيك؟؟

نوره تبكي" يدي احترقت يا مالك

مالك بخوف" لا تخافين يا عمري ...قومي آخذك للدكتور

نوره تطالع عيونه وكأنها تدور فيهم الحنان" بموووت يدي

توجعني

مالك" بسم الله عليك ...أنا آسف يا نوره يا ليتني ما طلبت

منك شي

نوره دموعها على خدها وترجف من الخوف" يمكن

تشوهت يدي يا مالك الحقني الله يخليك

مالك" أنا معك لا تحاتين بس انتي قومي معي اوديك

للدكتور يا قلبي

نوره مو قادرة تتماسك رفعها مالك على يده وهو ميت من

خوفه عليها ... وصار يصرخ على رغد إنها تلحقه لغرفته

,,

هناك وعند طيور الحب ...طلال ومرام

طلال بهدوء" بالله بتضلين منزله راسك كذا ؟؟

مرام رفعت راسها وعلى وجهها ابتسامه جميله ".....

طلال" تعبتيني من كثر ما تكلمت أبغي اسمع كلامك

مرام" ههه وش تبغيني أقول ؟؟

طلال بعشق" قولي لي أحبك

مرام نزلت راسها وهي بتموت خجل".....

طلال" هههه امزح معك ... بس لا تظلين كذا تكفين ,

أخاف مالك يجي يقول لي اتكل وأنا ما شبعت منك

مرام" هههه طيب وش أقول ؟؟ أنا بنت أميل للهدوء نوعا

ما ....خدوم لو احد يطلبني عيوني ما اقصر

طلال بلهفه" عيونك لي فاهمه ؟؟

مرام" ههه مثل ما تآمر

طلال" ما يآمر عليك عدو يا نور قلب طلال

مرام محرجه" بوقت الشدة تلاقيني بسبع رجال

طلال" اووف ...الله يستر هههه

مرام" ههه لا يعني تقدر تعتمد علي في كل شي ..أخواني

علموني كيف اعتمد على حالي وأمشي أموري بنفسي

طلال"طيب فهمنا .... والعاطفة وينها ووينك ؟؟

مرام بخجل" انولدت من طاحت عيني عليك

طلال يرفع راسها بيده" يعني كان الشعور متبادل ؟؟

مرام" اممم

طلال بعشق " بمناسبة هذا الاعتراف الخطير ... ممكن

أطلب طلب ؟؟

مرام تطالعه بخوف" لا

طلال" ليه ؟؟

مرام ساكتة"..........

طلال" ما كنت أبغي أكثر من إني أشوف شعرك نازل على

وجهك

مرام طالعته براحه كبيره وفتحت شعرها اللي نزل على

طول على وجهها ... مسك طلال خصلة من شعرها

وقربها له وباسها ومرام كانت خجلانه كثير ....

طلال يمسك يدها ويكلمها بكل حب" أخيرا تحقق حلمي

وانتي بجنبي الحين

مرام بس سمعت صوت نوره راحت لها ركض لقت مالك

رافعها وموديها للغرفة

مرام بلهفه" خير مالك ؟؟

مالك متوتر" نوره احترقت ...ساعديها إنها تغير ملابسها

مرام" يا الله ...لا يكون الحرق كبير ؟؟

مالك" ما أدري ما قدرت أشوفه

نوره" ما اقدر يألمني كثير

مرام تروح لنوره" وريني يا عمري يدك ...لا يكون الوضع

متأزم وإحنا نضيع وقتنا بالصراخ

رفعت نوره يدها عن الحرق عندها بس اهدأت نوره شوي

مالك" هاا مرام كيفها يدها ؟؟

مرام" خير يا مالك ليش خايف ؟؟ كلها لسعه ما تتعدى حجم

حبة الحمص

مالك يطالع بنوره اللي كانت تمسح دموعها وتنفخ على

الحرق بحرص شديد

نوره بخوف" تتوقعون يحطون لي عليها جبيرة ؟؟

تركها مالك وطلع بره وهو مبتسم من الموقف اللي صار

على نوره وكيف إنها كبرت الأمور وخلتهم كلهم يخافون

مثلها... لحقته أم مسعود وهي تضحك

أم مسعود" الحين عرفت الإجابة على سؤالي

مالك بضيق" أي سؤال يمه ؟؟

أم مسعود" يوم سألتك تحبها أو لا

مالك بزعل كبير" كلكم مجانين بهذا البيت

طلع مالك من البيت وهو يفكر بالموقف وبسر اندفاعه لنوره

وانه كان خايف عليها كثير ويسأل حاله ألف مره ..معقول

نوره صوبتني بقلبي ؟؟ معقولة أنا انجذبت لها وحبيتها؟؟

ممكن يكون السحر انقلب على الساحر

؟؟؟؟؟؟؟؟؟؟

,,

في دبي وعند راشد اللي كان جالس بالحديقة .. وعيونه

تتنقل بين العشب اللي تحت رجوله ...

تطلع ميثه وتشوفه جالس سرحان ...ترددت أكثر من مره

إنها تكلمه كانت خايفه إنها تضايقه لأنه بها ليومين يحب

يجلس وحده كثير

ميثه" حبي..

راشد يطالعها بابتسامه صفره " هلا بيج

ميثه تمسك يده" مو بعادتك ...خير ؟؟

راشد يطالعها" كل هذا وتسألين إذا خير أو لا؟؟

ميثه تجلس جنبه" حبيبي ...هانت

راشد" اممم

ميثه تغيير السالفة" نوف كلمتني اليوم وخبرتها إن رحتلنا

بإذن الله بكره

راشد ببرود" شو أحوالهم ؟؟

ميثه" طيبين ...وتقول بكره بيروحون على جده يزورون

صيته

راشد" حلو

ميثه " وش فيك مكتم ؟؟ فكها يا عسل الدنيا ما تسوى

راشد بضيق" يضايقني إني أشوف نظرة ألا مبالاة منك يا

ميثه

ميثه بذهول" أنا ؟؟

راشد بحده" بكره راح يتحتم مصيري يا ارجع راشد الأولي

يا خلاص ما في بعدها أمل

ميثه بزعل" قصدك إني مو مهتمة؟؟

راشد يلف الكرسي ويصد عنها " .........

ميثه" أنا أحاول إني ازرع الأمل بقلبك ...

لا يكون تفكر ضحكي هذا عدم اهتمام فيك وبالمشكلة اللي

مو ملازمتك انت لوحدك ...

راشد انت ما تعرف شنو تعني لي؟؟

انت كل شي بالنسبة لي ...ومو لأنك فقدت إحساسك

برجليك يعني انك ولا شي

أنا أعشق روحك اللي سكنت فيها ... وأحب عيونك اللي

تحتويني ...واموووت في قلبك اللي عشقني

راشد يلتفت لها ودموعه على خده" ميثه عذريني لكني تعبان

كثير ...الدكتور لما شاف الأشعة والتحاليل قال إن نسبة

نجاح العملية 40 % بس

ميثه بضيق" لو 10% يا راشد راح تروح وتسوي العملية

...ما راح نقطع الأمل بالله

راشد" والنعم بالله بس

ميثه تشد على يده وتطالعه بعيونها اللي كان راشد يحاول

يستمد الأمل من خلال عيونها ..

سكت راشد عندها ميثه مسكت كرسيه وتوجهت للداخل

وقلبها متفتت عليها

..............

,,

في جده ....

ماجد جالس على السرير وعيونه على صيته اللي كانت

تعبانه كثير ...على طول نايمه وما تطيق تاكل

فتحت صيته عيونها لقت ماجد في وجهها

صيته بتعب" كم الساعة ؟؟

ماجد" الحين الساعة 11

صيته بتقوم لكنها ما توازنت وجلست على السرير

ماجد بخوف" صيته وش بك ؟؟ جننتيني يا بنت الناس

صيته تطالعه" أنا بخير

ماجد" قومي غيري ملابسك يا قلبي لازم اوديك للدكتور

صيته" ما أبغي أروح ...ما أحب المستشفيات

ماجد" انا ما قلت نتمشى حتى تقولين تحبين أو لا

صيته بتوتر" أنا عارفه وش مشكلتي

ماجد بحده" لا يكون انتي دكتورة وأنا ما أدري

صيته ببرود" انا حامل يا ماجد

ماجد مو مصدق" هااا ...حامل ؟؟

صيته تهز راسها يعني ايي "..........

ماجد يلمها له وهو فرحان كثير " يا بعد عمري انتي

خليك مرتاحة يا عمري لا تجهدي حالك طيب؟؟

صيته تطالعه" هذا الطفل غلطه يا ماجد

ماجد يطالعها وهو معصب" شنووووو؟؟

صيته تنزل راسها" أقول إن إحنا غلطانين ...كيف ما خذنا

احتياطنا ؟؟

ماجد بيجن " كيف تفكرين ؟؟ انتي زوجتي مو عشيقتي يا

مدام

صيته" الطفل ماله ذنب انه يعيش بأجواء كلها مشاحنات

ماجد" المشاحنات هذي انتي السبب فيها يا صيته

صيته" انت أناني وما تحب غير حالك

ماجد بعنف " تدرين ؟؟ أنا تعبت منك متى بتسامحيني

وتعرفين إن نوره ماضي وانتهى من حياتي؟؟

صيته" ما اقدر أصدقك

ماجد" لا تصدقيني ...أصلا لو أنا احلف لك ألف يمين اللي

براسك براسك ما بتغيرينه لأنك ما تقيسين الأمور بعاطفتك

..الأعمى شاف وعرف إني ميت فيك لكن انتي لا

صيته تبكي" أنا ما ابغي الطفل هذا

ماجد بيموت " شنووووو؟؟

صيته تبكي"..........

ماجد" انتي مو صاحية يا صيته ... والله لو تفكرين تنزلين

الطفل ما بتشوفين خير

صيته تبكي" أنا ما أبغيك يا ماجد أنا أكرهك

ماجد يطالعها بضيق"........

صيته تصرخ فيه" كيف ترضاها على حالك تعيش مع وحده

تكرهك ؟؟

ماجد يحاول يتماسك " والحل ؟؟

صيته باندفاع" بروح بيت أهلي ..أنا اطلب الطلاق

ماجد بزعل" شيلي أغراضك ما راح يطلع الصباح إلا

وانتي عندهم

صيته"!!!!!!!!!!!

راح ماجد من قدامها عندها رمت حالها على السرير وهي

تبكي من قلب

نزل ماجد وهو متضايق لحد الجنون ...رمى حاله على

الكنبة وهو ينفخ

بو ماجد" وش فيك يبه؟؟

ماجد" أنا وهي بننفصل

دلع" وش تقول؟؟

أم ماجد" انت منصاب بعقلك ؟؟

ماجد حاط يده على راسه ومو راضي يتكلم

بو ماجد بهدوء" في مجال نتدخل

ماجد ضيق" ما اعتقد ..الموضوع انتهى

راحت دلع من قدامهم لعند صيته اللي كانت تبكي من قلب

دلع " وش اللي سمعناه يا صيته ؟؟

صيته" ما أدري يا دلع ... ماني عارفه وش سويت

دلع" ماجد متأزم كثير ودموعه على خده

صيته بخوف" دبريني يا دلع ...أنا كنت متضايقة وما

اعرف كيف قلت له كل هذا ؟؟

دلع" يعني انتي ما تبغين تنفصلين ؟؟

صيته" أنا مشكلتي إني أحبه وأموت فيه والله لو يتركني

أموت

دلع" طيب ليه اصريتي على الطلاق؟؟

صيته تصرخ فيها" ما أدري يا دلع ...أنا حامل ما ابغي

طفلي يعيش من غير أبوه

دلع" انتي حامل ؟؟

صيته تهز لها براسها يعني اييي

دلع" خلاص سوي اللي أقولك عليه ..طيب؟؟

.................

,,

في الشرقية .......

رجع مالك من بره لقى محد موجود بالصالة ...

راح جهة غرفته عندها سمع صوت مرام ونوره يتكلمون

مرام" مثل ما قلت لك طيب ؟؟

نوره" لا ما أقدر

مرام" لا تخافين ...مالك طيب كثير

نوره " أنا مو خايفه منه بس ما أبغيه يزعل مني

مرام" هههه وش هذا الحب

نوره" وش الفايده ؟؟

مرام" انتي سوي اللي أقولك عليه

مالك يدخل عليهم عندها فزت نوره وعدلت جلابيتها اللي

كانت مرفوعة

مرام" الله يهديك يا خوي ... متنا من خوفنا

مالك يشيل شماغه" ما يخاف إلا اللي مسوي شي ..أو ناوي

يسوي شي

نوره" لالالا ما سوينا شي

مالك يطالع يد نوره اللي كانت لافتها على طول الذراع كان

وده يضحك عليها لكنه تمالك نفسه

مالك" نوره جيبي كاس ماي

نوره تروح" طيب

مالك" مرام ...وش كنتوا تتكلمون فيه ؟؟

مرام" كانت تكلمني شقد هي تحبك

مالك ابتسم ابتسامه بسيطة بعدها " مرام ...ما أبغيك تقوين

شوكتها علي

مرام" أنا بس ألاحظها إنها تخاف منك ...قلت اكلمها عن

قلبك الطيب والحنون

مالك ببرود" خليها تخاف يا مرام لأن في ناس تخاف ما

تستحي

تدخل نوره تعطي مالك كاس الماي " تفضل

مالك" حطيها على المكتب ...ثانيا كاسة الماي ما تتقدم من

غير صحن

نوره بضيق " إن شاء الله

استأذنتهم مرام وراحت ...توجه مالك لعند الباب وسكره

عليهم دخل مالك دورة المياه عندها تمددت نوره على

السرير ...

طلع مالك من دورة المياه " إذا جلستي للصلاة جلسيني

نوره" طيب

أخذ له مالك الفرش وفرشه وتمدد عليه ... كان يفكر باللي

صار في اليوم كله ...ويستغفر ربه عن أخطائه

التفت جهة نوره اللي كانت مغمضه عيونها مثل الطفل اللي

يتصنع النوم ...كان يترجى من ربه انه يساعده وما يخليه

ينجرف ورى عواطفه لنوره اللي صارت لعنه على كل من

يقرب منها

...........

,,

في جده....

نزلت دلع وهي تصرخ وبلغتهم إن صيته أغمى عليها

فزعوا كلهم وراحوا ركض لعندها ...مسكها ماجد ولمها

لحضنه ...

ماجد" حبيبتي وش فيك ؟؟

أم ماجد تبكي" يا بعد عمري ... وش صار فيها ؟؟

بو ماجد" وديها للمستشفى بسرعة

لبسوها عبايتها وراحوا للمستشفى اللي بلغوهم إنها حامل

لكنها محتاجه للراحة وللتغذية السليمة

حطوا لها مغذي وعطوها ابره ...طلب منهم ماجد إنهم

يخلونها عندهم لكنهم بلغوه إن الأمر مو مستدعي كل

الحوامل يمرون بهذي الحالة

طلعت صيته من المستشفى وهي خايفه من ردة فعل ماجد

وكانت تفكر بينها وبين نفسها هل مازال مصر على انه

يوديها بيت أهلها أو لا

وصلوا البيت صعدت صيته شقتها وغيرت ملابسها

وتمددت على السرير وهي تعبانه كثير وعلى وجهها آثار

التعب محفورة

تمدد ماجد جنبها على السرير وروحه عندها

ماجد بهدوء" انتي أحسن ؟؟

صيته" الحمد لله ...بس أنام بصحى طيبه أكيد

ماجد" أشكرك انك قبلتي تجلسين إلى بكره

صيته تضايقت من كلامه هذا دليل على انه للحين فاهم إنها

تبغي تروح بيت أهلها عندها صيته غمضت عيونها وما

تكلمت بكلمه

ناموا ماجد وصيته وهم جنب بعض وكل واحد وده يمسك

بيد الثاني لكن كرامته ما تسمح له

............

,,

في اليوم الثاني وعند الساعة 4 طارت طيارة بيت بو نواف

إلى جده وهم في غاية السعادة ...........

في المطار كان طارق يده بيد أم عبد الرحمن ما تركها

لحظه وكل شوي يجيب لها شي تشربه لحد ما عافت

العافية من ورآه

التقوا مع بيت بو ماجد على البحر مثل ما كانوا متفقين مع

ماجد...كانت صيته جالسه على الكرسي ويدها بيد ماجد

اللي كان يكلمها ومو منتبه للي حواليه

أم عبد الرحمن تشوف طارق توجه للبحر وهو متضايق

أم عبد الرحمن" طارق تعال ...تونا جينا وش بك ؟؟

طارق" دلع راحت هناك أخاف تغرق

كان البحر مخيف وعاصف وقفت أم عبد الرحمن تتعكز

على عصاتها كانت خايفه على طارق كثير

وزاد خوفها يوم شافت دلع راجعه بدونه

كلمتها أم عبد الرحمن وسألتها عن طارق لكنها ما عطتها

وجه ...أم عبد الرحمن تصرخ على نواف انه يروح يشوف

أخوه لكنه ملتهي بنوف ومو منتبه لها كلش

كانت حالتها للبلى وخصوصا يوم سمعت صوت طارق

يصرخ ...جدتـــي

انتبهت أم عبد الرحمن على حالها إنها كانت تحلم والدخان

مالي الغرفة وصوت سيارات الإسعاف بره وطارق يصرخ

فيهم وينادي على جدته

بالموت قامت من السرير وتوجهت للباب ...لكن النار

جالسه تآكل فيه أكل

ابتعدت أم عبد الرحمن عن النار وهي دايخه من ريحة

الدخان اللي تشبعت في جسمها صارت تذكر الله وتتشهد

لأنها تأكدت إنها ما راح تطلع من هنا إلا عند الباري

.......

بره كانوا الناس ملتمه على طارق وهو وده يدخل لجدته

لأن أمه وأبوه طلعوا وهي لسه داخل ...كانوا يصبرونه

لأن رجال الإطفاء جالسين يستعدون للدخول بعد ما أرشدهم

طارق عن مكان نافذتها

لكنه ما قدر يصبر وراح دخل داخل البيت واللهيب أكل

ثلاث أرباع الفيلا

بالموت قدروا إنهم يطفون الجزء القريب من غرفة أم عبد

الرحمن ودخل رجل الإطفاء وساعد أم عبد الرحمن وطلعها

من الفيلا وكان نواف موجود وهو اللي تلقاها

نواف بخوف " الحمد لله على سلامتك يا الغالية

أم عبد الرحمن بفزع" طارق وينه ؟؟

نواف" لا تخافين عليه توه كان هنا

أم عبد الرحمن" توني سمعت صوته وهو يصرخ ويناديني

من داخل البيت

نواف التفت حواليه لكنه ما شاف طارق ...ترك جدته

وراح متوجه للفيلا لكنهم مسكوه وهو يصرخ فيهم

نواف" طارق داخل ...طارق بالفيلا

وجهوا الماي إلى المدخل حتى يقدرون أنهم يدخلون للداخل

ونواف يصرخ من راسه ويترجاهم يتركونه ...لكنهم

مسكوه وبعدوه عن النار

بعد ساعة ....انطفى الحريق لكنه أخذ معه أغلى ما في

البيت ...طلعوا رجال الإسعاف وعندهم جثة طارق متفحمة

وسط النار جنب غرفة جدته