ام عبدالله : وضحى كأن عبدالله ابطا مايكلمني
وضحى وهي تحس بتعب :اليوم يكلمنا ياخالتي لاتخافين
ام عبدالله: وضحى شفيك انتي تعبانه ؟
وضحى : لا يمه بس صداع ويروح
دق الجوال وابتسمت : خذي يمه ردي هذا عبدالله
ام عبدالله خذت الجوال وهي ترجف وتبكي
هلا يمه هلا بعيوني ، وينك والله اشتقنالك البيت من غيرك موحش
لا ماهي مقصره بخير شهرين والله انها كثير مير مابليد حيله، خذها تبيك الله يحفظك ترجع بالسلامه
وضحى وهي تمسح دموعها: هلا قلبي
عبدالله: اهلين اخبارك حيااااااتي مشتاق لكم وربي اني اكرف نفسي عشان اخلص وارجع لكم بدري
وضحى: انا بخير يالغالي وامك تمام فديتها
عبدالله: وش فيك انتي تعبانه صوتك مو لهناك؟
وضحى: لالا بخير بس شويه صداع وبيروح اهم شي انت انتبه لنفسك
عبدالله: ان شاء الله ياقلبي تدرين كل ماشتقتلك فتحت العلبه اللي اهدتيني اياها
وضحى: يالبى قلبك يابعدي
عبدالله: لاوصيك على امي وعلى نفسك كلها شهرين ان شاء الله واجيكم
وضحى: ابشر تامرني امر
عبدالله: يالله مضطر اسكر الحين
وضحى: الله يحفظك مع السلامه
عبدالله: في امان الله
/
/
/
مشت الايام والكل يمشي في همه العنود مستغربه من ماجد بالرغم انه صقر وجراح حاولوا يعرفون وش في خاطره الا انه مو راضي
العنود متضايقه منه وقررت تكلمه
بعد مانومت طارق لبست وكشخت له واستنته الى متى يجي متأخر ويقضي طول اليوم نوم لازم اكلمه واشوف وش اللي غيره
جلست تنتظره الى الساعه 3 الفجرغفت بس صحت على صوت الباب وهو يتسكر
العنود وهي تمسح عيونها وتتحرك بصعوبه: ماجد؟
ماجد كان شكله تعبان: خير ليش مانمتي للحين
العنود: استناك ياقلبي
قامت ومسكت ايده عشان يجلس
العنود: بقا نص ساعه ويأذن خلنا نتنظره
ماجد بعد ايده وجلس : طيب جيبي لي مويه عطشان
العنود اضغطت على نفسها وراحت المطبخ
وتو بتدخل الا تسمح ماجد يسب ويلعن ارجعت على ورا تبي تعرف وش فيه من بعيد
ماجد: شوف انا ماني خاين والعب ببعيد عني ، ولو فلوس الدنيا ماراح تقدر ترشيني مابي فلوس حرام فاهم
لا ماتقدر تضرني الله يعلن ابو جابك وسكر في وجهه
العنود كانت تسمعه وهي في المطبخ وحاطه ايدها على فمها، تمالكت اعصابها وراحت له عشان تفهم السالفه
العنود: سم حبيبي
ماجد شرب الماء مره وحده
العنود قربت منه وضمته: ماجد حبيبي هد نفسك شكلك تعبان
ماجد وهو يحس نفسه محتاج لها ماعارض بالعكس ارتخى : اسف يالعنود غصب عني
العنود وهي تبي تجر منه كلام: وش اللي مضايق علمني صارلك ثلاث اسابيع وانت بهالحال
ماجد: شغل معكر مزاجي لكن بتنحل ان شاء الله
العنود ماحبت تضايقه وجلست تمسح على شعره : تصدق طارق صار يمسك القلم زين وجلس يستناك عشان تشوفه
ماجد ناظرها : يالله من زمان ماجلست معه ومشيته
العنود: ماعليك هو كل يوم عند الجازي وامي
ياربي ياماجد ماني مصدقه ان صقر زواجه بكره
ماجد ابتسم: الله يوفقه يووه يالعنود يدك جابت لي النوم خليني اوضي واصلي بعدين كملي
العنود تحرك اللي بطنها وعورها : أأأي
ماجد بخوف : وش فيك؟
العنود وهي تبتسم بألم: هههههه حضرته معارض مايبني اضمك
ماجد: هههههههه
الله عليك يالعنود ونعم الزوجه قدرتي تهدينه وتغيرين مزاجه المتعكر
/
/
/
رهف وهي مو راضي النوم يجيها تذكرت احداث الليله اللي فاتت كانت زياره خطيبها عشان يشوفها شوفه شرعيه ولو انه يعرفها يوم كانت صغيره الا انه اصر يشوفها
ياسر: عمي اذا ماعندك مانع ابي اشوف رهف
ابو ماجد وهو يناظر خالد وماجد مبين انهم مبسوطين ان اختهم جاها واحد مثل ياسر دكتور واخلاق وغير كذا كان جارهم يعني فيه علاقه بينهم
: حقك ياولدي
ماجد: انا بناديها يبه
خالد استأذن لانه بينجن اذا مافتح الماسنجر وكلم شوق ارتاح معها لدرجه كبيره فضفض لها وهي بعد فضفضة له على انها بنت وادمجت حيل معه حس بانها انسانه طاهره بريئه عمرها ماتكلمت بشي شين محترمه وتجبرك على احترامها حساسه لكن متفهمه تحاول تحل الامور بطريقه حلوه
راح ماجد عند رهف اللي كانت متوتره شوي ،ولو انه متضايق من مشكلته الا انه فرح لاخته اللي لاحظ تغيرها الاسابيع اللي فاتت شافها كانت لابسه محتشم تنوره طويله جينز وبلوزه بنفسج كم طويل بس موديلها شياكه ومسويه شعرها كيرلي وحاطه مكياج خفيف حيل
سبحان اللي يغير ولايتغير هذا اللي نطقها ماجد وهو يشوف اخته
ماجد قرب منها وباسها وهي كانت محتاجه لاخوانها وقفتهم خصوصا بعد ماعرف غسان وارسل لها رساله دق الباب وعطاها الشغاله تعطيها رهف
ضمت اخوها وهي خايفه ومتردده بالارتباط من هذا الشخص اللي الكل يمدحه
خالد: الف مبروك خلاص اتركها ترى اختنقت
رهف: ههههههه بالعكس محتاجتلكم
خالد باسها على خدها وضمها بخفيف وقالها يالله ترى الرجال ينتظر وطلع غرفته
ماجد : هاه يالله
رهف وهي متوتره هزت راسها
ام ماجد وهي نازله من الدرج: وين وين؟
ماجد: يمه الرجال يبي يشوفها
ام ماجد : بتطلعين بهذا اللبس يالله غيري ملابسك واللبسي من الفاستين اللي ماليه الدرج
رهف: يمه هذي شوفه شرعيه مايصلح
ماجد وهي يطالع اخته بفخر: هي صادقه مايصير اذا ملكت ذيك الحزه يصير خير
ام ماجد بعصبيه: يابنت وش بيقول عنك ؟ هذا لبس بالله عليك
رهف : يمه ارجوك خلاص انا ماصدقت اتغير وارتاح
ام ماجد: وش صاير لك انتي؟ وين بنتي الدلوعه الشياكه اللي الكل يطالعها بذهول لي شافوها
ماجد: خلاص يمه تأخرنا على الرجال عن اذنك
دخلت رهف وهي منزله راسها وسلمت وجلست عند ابوها
كانت تحس بخوف من المستقبل اللي راح يخربه ماضيها حاولت تنسى ماضيها بشكل مؤقت يمكن تقدر تطلع عيوب فيه وتفركش الخطوبه
ياسر شافها وانبسط للحين جمالها ملفت مثل ماكانت صغيره
ابو ماجد: اظن تعرف اذا ربي كتب لك نصيب معها تكمل دراستها
ياسر بكل تفاهم: اكيد انا احب زوجتي مثقفه وكنت اتمنى انها تكون ملتزمه وان شاء الله نتفاهم في هذي الامور
رهف ماتسمع الا صوته اللي يريح القلب وشافت يده وساعته وكانت تتمنى تشوف وجهه هل مثل اول ولا احلى، رفعت عينها شوي وتفاجأت بشكله كان هو يطالعها ماقدرت انها تنزل عينها بسرعه
انتفض جسمها ماكانت تتوقع انه كذا كان ملتزم ومربي عارض ولحيته مرتبه لكن ماخفى وسامته بالعكس زادته جمال وهيبه
من يصدق رهف تتزوج واحد ملتزم ، دكتور، ومبين انه متفهم وطيب
حست انها ماتستاهله وانها راح تظلمه ، اذا عرف وش كانت قبل، وش بيسوي فيها وشلون بتكون نظرته لها
دمعت عينها لانها تذكرت الرساله وهي تتذكر كان غسان مهددها تفتح جوالها وترد عليه لكن مانفذت اللي يبي
كأن الله حط القوه فيها ومخليها مصممه على قرارها اكثر
ياسر اعجبته رهف وهدواتها بس من عيونها حس فيها شي وعاهد نفسه انه يعرف وش فيها ويساعدها
يدري من خواته اللي في الجامعه انها دلوعه ومغروره بس اللي شافه اليوم غير كانت انسانه غير الكلام اللي سمعه يمكن لانه يشوفها الطفله اللي اسرته من يومها صغيره