(البارت الثاني عشر )
فتح عيونو على صوت المظيفه :لو سمحت
رائد اتعدل بسرعه واتحمحم :وصلنا؟
المظيفه:ايوا
رائد:يطالع في الشباك وبعدها جات عيونو عليها :يالله ذي لسا نايمه
قام واتوجه لها ووقف قبالها واتحمحم...
ريم مهي حاسه بشي
رائد بصوت واطي :ريم ياريم
ريم فتحت عيونها بشويش :ايش في ؟
رائد:قومي وصلنا
ريم ترمش بعينها وتستوعب وعدلت جلستها
رائد:يالله قومي ننزل
ريم ماترد عليه
رائد ما استناها وطفش من ذا الحال مشي ونزل
ريم وقفت واخذت شنطتها ومشيت
رائد واقف في درج الطيارة يطالع حولينو ومبتسم :الله الجو يجننن سبحان الله زي جدة (حول ملامحو لليأس)ونزل
ريم تكلم المسؤل :ها كيف ذحين
المسؤل:حننقلها للمستشفى طوالي طبعا لاتشيلو هم
ريم اطمنت ونزلت
في المطار ...
ريم واقفه ورا رائد
رائد يطالع قدامو :ايش قالو ؟
ريم :كان سألتهم لو يهمك
رائد لف عليها :ريم اسمعي الاسلوب ذا ياريت يتغير خلاص ماصارت مين ممكن يسوي زيي يسفرها ويسيب اشغالو ودنيتو وهوا ماسوا فيها شي ترا مو انا اللي قلتلها ارمي نفسك هيا رمت نفسها
ريم تطالع حولينها :وطي صوتك طيب
رائد اتنرفز :ياشيخه روحي انت الكلام ضايع معاك ماهمك غير الناس
خرجو من المطار واخذو سيارة
في السيارة ...
ريم :على وين رايحين ؟
رائد يطالع في الشباك :الفندق يعني وين ؟
ريم رفعت حاجبها :لا والله ايش نسوي في الفندق ؟
رائد لف عليها:نلعب مثلا ؟انت ايش رايك ؟الناس ايش يسو في الفندق
ريم:كأنك قلبت عليا ؟احترم نفسك
رائد:لا والله انا احترم نفسي ؟وانت ذي الفتره كلها مررة الاحترام مقطعك
ريم سكتت
رائد يطالع فيها واخذ نفس :الفندق مقابل المستشفى

اخذت نفس ومسكت راسها :ااااه خلاص تعبت والله
احمد :اشبك ؟
ماريا :والله تعبت من كثر ما اقلب في الورق والتصاميم ذي
احمد ابتسم :طيب خلاص وقفي اصلا خلاص انتهى دوامنا
ماريا :طيب الحمدالله
احمد :ليش الشغل ملل؟
ماريا :لا دكتور مو ملل والله ابدااا بس متعب شويه من الصباح لين العصر وانا اشتغل
احمد :طيب اسف ياطالبتي بس خلاص من بكرة انا مني معاكم والشغل يخف ويصير ممتع
ماريا اتحولت ملامحها للحزن :ما اعتقد
احمد ماسمع:ايش؟
ماريا:لالا ولاشي
احمد قام :طيب انا حكمل اشراف على الباقيين
ماريا :طيب اتفضل
احمد راح
ماريا عيونها عليه وتلعب بالقلم
جا من وراها : متى حتبدأي شغل؟
ماريا لفت بسرعه ومفجوعه :نعم ؟
انس ابتسم :اشبك ؟
ماريا خافت :عفوا ايش تبا ؟
انس :لا بس كنت بسألك متى حتبدأو شغل ؟
ماريا :ان شاءالله من بكرة
انس :اهااا ...طيب ليش اخترتي غرفتي ؟
ماريا موطيه راسها شويه وشويه ترفعو :والله عجبتني مساحتها لا اقل ولا اكثر
انس مبتسم :طيب اقدر اساعدك ؟
ماريا مستغربه :كيف مافهمت ؟
انس :لا يعني كذا اساعدك في شغلك اركب احط اشيل يعني شي زي كذا
ماريا تنحنت:لا شكرا اخويا مني محتاجه مساعده هذا شغلي وانا محاسبه على كل شي فيه يعني عليه درجات جامعه وكذا
انس :اممم طيب اجل حجلس اطالع بس
ماريا فتحت عينها :نعم؟؟ لا معليه ماينفع اصلا ممنوع واحنا نشتغل يكون فيها احد
انس :طيب غرفتي ذي
ماريا :حتى لو معليه ماينفع اعتذر اخويا
انس مشي بطفش واداها ظهرو :طيب سلام ... وبلاشي من اخويا ذي
ماريا مستغربه :والله لو احد ثاني كان كفختو بس حالتو حتسكتني
رجعت ظهرها على الكرسي وتقلب الورق
جا باتجاهها :ها ماريا خلصتي ؟
ماريا انتبهت واتعدلت :ايوا خلاص الحمدالله
احمد :امم طيب كويس يالله انا ماشي
ماريا :طيب
احمد :ايوا صح بسألك
ماريا :امم؟ اتفضل
احمد :ايش كان يبا اممم انس اظن اسمو ؟
ماريا ابتسمت على خفيف وتبا ترد غيرتها:والله ولاشي يسعدو جاي يطمن بس
احمد استغرب :كيف يعني ؟
ماريا :لا يعني جا يسألني كيف الشغل ومتى حبدأ ويعني كذا قلي نفسي اساعدك في الشغل وكذا
احمد :طيب انت ايش قلتيلو ؟
ماريا :والله انا قلتلو ماينفع وكذا وانو هذي درجات جامعه مو بس شغل كذا
احمد :ايوا وايش كمان ؟
ماريا :لا خلاص بس قلتلو كذا قال طيب بس حجلس اتفرجلك وانت تشتغلي
احمد ابتسم بتعجب :ايوا؟
ماريا الفرحه بتقطعها حست انو بدأ يغار :امم انا قلتلو مايصير ولازم اكون لوحدي اشتغل
احمد ابتسم :حرام ليش كان خليتيه يطالع ويتعلم اقلها اعتقد هذي كانت فكرتك كمان
ماريا اتنرفزت :اعتقد فكرتي كانت لذوي الاحتياجات الخاصه مو ايتام
احمد :طيب عادي غرفتو
ماريا نفسها تذبحو عصبت :طيب ويعني ؟؟
احمد :اشبك ؟عادي يعني هوا في الاخير نبا الفايده تعم الكل
ماريا قلبها وقف من برودو :طيب ولايهمك حخليه يمشي معايا طول الوقت ولو يوديني ويجيبني احسن يكسب اجر فيا كمان
احمد ضحك :طيب اشبك كذا متنرفزة ؟
ماريا وقفت ومسكت اغراضها :ولا شي انا ماشيه سلام
بعدت عن الكرسي وادتو ظهرها ومشيت بشويش
احمد :طيب ماتبي تودعيني ؟
ماريا وقفت وقلبها وجعها دارت عليه :امم الله يوفقك يارب
احمد :بس؟
ماريا باستغراب :ايش بس ؟ايش تباني اقول؟
احمد :يعني حتوحشني مثلا
ماريا مفجوعه :نعم؟
احمد يضحك :امزح امزح
ماريا :كنك نسيت انك دكتوري
احمد :لامانسيت ياطالبتي
ماريا :طيب يالله سلاام
احمد :سلاااام

في الطريق
وليد :ها وين تبو تتغدو ؟
تالا:ربا تختار طبعا
ربا :احم احم
وليد :يالله اخلصي
ربا :اصبر وي بفكر
وليد يطالع في تالا من المرايا ومبتسم :خذي راحتك
تالا ابتسمت ووطت راسها
ربا :اممم ايووا ابا مطعم .....
وليد طل فيها :مسرع اخترتي ماشاءالله
ربا:لاحوووول
وليد يضحك :خلاص خلاص طيب
ربا:امي بتجي بكرة ولا حيجلسو كمان ؟
وليد يطالع في الطريق:والله على اساس بكرة بس ما ادري لسا ما ادوني خبر اكيد
ربا:ااها ...(تضحك)تخيييل امي امس كلمتني تقلي كنت جالسه في الحرم استنى الصلاه بعدين جات جنبي بنت قدي او اصغر مدري المهم قالت جلست اتكلم معاها وتجنن مررة حلوة ومن جدة جايه عمرة مع امها تقول مسكينه كل شويه تجبلي مويه وتنفذ طلباتي اننا وامها تقول يبالي اخذها لوليد (ضحكت بصوت اعلى)
تالا قلبها وقف مع الكلام
وليد طالع في ربا :وماشاءالله امي على طول كذا خطوبه ؟
ربا مبتسمه :انا ادري
وليد :اممم والله انا اللي حختار ما ابا احد يختارلي
ربا:اكشخ وانت ايش دراك بالبنات ولا وين حتشوفهم
وليد طالع لتالا من المرايا وابتسم :انت ايش دخلك
تالا تحس جبل وانزاح من قلبها
ربا :امم بنشوف والله ماتاخذها لين اعرف كل شي فيها
وليد :حتعرفيها ولايهمك
ربا :بنشووف ..والله نفسي احضر زواج من زماااان مارحت زواج
ربا لفت على تالا:يالله متى اشوفك عروسه وازفك
وليد ضربها على راسها :اقول خليك في نفسك ايش عليك من الناس
ربا اتنرفزت :وانت ايش لك صلااااااااح ؟
وليد :اقول انزلي انزلي
فتحو الباب ونزلو
ربا معصبه نزلت واتقدمت قدامهم ودخلت بسرعه
تالا قفلت الباب وتبا تلحق ربا
وليد قفل الباب وحط المفتاح في جيبو :والله لو ايش يسوو فيا ماحاخذ غيرك
تالا وقفت ماقدرت تتحرك من مكانها
وليد ابتسم ومشي
تالا واقفه عند السيارة ووجهها ناااااار
بعد ثواني استيعاب مشيت
في المطعم ....
ربا جالسه وماسكه جوالها
وليد جا باتجاهها وسحب الكرسي :اشبك ؟
ربا :اشبي؟مافيا شي .. وين تالا ؟
وليد مسك جوالو وابتسم :هناك
تالا دخلت وتدورلهم
ربا تأشرلها
جات باتجاههم وجلست جنب ربا
ربا :اشبك أتاخرتي
تالا تصلح طرحتها :ما أتاخرت انت اللي تجري
ربا تطالع في الجواال وصفرت بشويش
تالا تطالع فيها باستغراب
ربا توري تالا الجوال:يالبيه اروحلك ابتسامه
تالا تطالع باستغراب :مين ذا ؟
ربا:هذا دكتور ماريا مالت عليها حظظظظ
تالا طالعت فيها بدون تعبير :هبله
ربا اتنرفزت :ياشيخه روحي انت محد مالي عينك والله انو يجنن
تالا:طيب يجنن ويعني ؟
ربا :ولا شي خليك في تفكيرك بس
تالا تضحك :انت مانسيتي من ذاك اليوم
ربا:لا طبعاا وعلى بالك حسيبك والا ما اكفشك
الجرسون جا
وليد يطالع فيهم :انا اخترت خلاص
ربا :مسرع ماشاءالله متى لحقت
وليد:شايفتني زيك ابربر
تالا تقلب بسرعه واختارت
ربا تقلب بشويش رفعت عينها تطلب( فتحت عينها باستغراب):ايش جابهم ذول هنا؟
تالا تطالع مكان ماربا تطالع :مين؟
وليد لف
ربا :يامعفن لاتطالع فشله
وليد رجع عليهم :انت شوفي نفسك كيف تطالعي
تالا:اممم نسلم ولا؟
ربا :اكيد ايش رايك ؟فشله لو شافونا وماسلمنا
ربا وتالا قامو :استنى احنا نسلم اول
مشيو باتجاههم
جالس على الطاوله قبالها مبتسم
ربا مدت يدها ومبتسمه :هلا والله
تالا مدت يدها بعدها :ياهلااا
بدور وقفت وابتسمت :اهللللين ايش الصدفه الحلوة ذي
ربا :شايفه كيف
تالا :كيفك؟
بدور :تمام الحمدالله انتو كيفكم ؟
تالا وربا :تمام الحمدالله
مراد موطي راسو
تالا:طيب احنا نستأذن خذو راحتكم بس حبينا نسلم
ربا:ايوا ونشوفك على خير ان شاءالله
بدور:طيب اسمعو ربي جابكم كنت حتصل عليكم انو تجو بكرة عندي عشان عندي خالتي وماريا وكمان حكلم كم صحبه ليا
ربا:والله ان شاءالله نشوف وليد كيف يقدر يودينا ولا لا
بدور:يالله ياهو مو دايما نجتمع خلونا ننبسط شويه
تالا:ان شاءالله ولايهمك
بدور:تسلمو والله وانبسطت بشوفتكم
سلمو ورجعو مكانهم
ربا وتالا يسحبو الكرسي وجلسو
وليد :ايش الهبل ذا فجاه اقوم انا بالدور هوا ؟
ربا:ايش يعني عادي
تاالا:لاخلاص وقت ماتشوفو قام قوم سلم احسن
وليد :يسلملي الرأي وصحبتو
تالا قلبها في رجلها
ربا تطالع وعينها مفتووووحه :ايش قلت ؟
وليد انتبه على نفسو ..
اتحمحم بثقه:ايش قلت ؟
ربا تطالع بنص عين :لالا ولاشي سلامتك ماقلت شي
الجرسون بدا يجيب الاكل ويحطو على الطاوله
ربا بدت تشبك الخيوط ومسرحه تفتكر كل موقف وجه تالا احمر فيه وسرحانها ووليد وروقانو وكلامو
وليد ماسك جوالو وارسل
تالا مسكت جوالها
(اشبك كذا ؟ عادي ايش يعني مصيرها تعرف واصلا انا ناوي اكلم اهلي قريبا لو ماعندك مانع طبعا )
تالا تقرأ بلعت ريقها (في قلبها )اشبو ذا ايش ناوي عليه الله يستر بس
حطت الجوال وتاكل بشويش

يشرب القهوة ويسمعها بانصات ....
الحرمه المسنه تتكلم عن دينها وايجابياتو وسلبياتو
بعد دقايق :خلاص انا خلصت
حسين مبتسم
الحرمه المسنه :تقدر تقلي ذحين ايش يعنيلك الإسلام؟
حسين ابتسم اكثر :اكيد اقدر
حسين يتكلم بحماس ومبتسم :الإسلام صعب اني اختصرلك عن ديني
صعب اني اتكلم عنو في دقايق الإسلام هدف ومنهج وحياة كل مسلم
الطريق اللي مانضيع فيلو الإسلام الدين الوحيد اللي يخدم كل الامم والاديان والاجناس باختلافها
الإسلام دين سلام وسماح ورأفه وعقل
ربنا اكرمنا بالإسلام وانعم علينا بيه وارسلنا رسول يبينلنا مكانة وقدر هذا الإسلام يبينلنا اسس الحياه وليش احنا عايشين وارسلنا رسول غير كل الرسل رسول حسن خلقو ويمثلنا الإسلام باصولو وقواعدو رسول رحيم من رحمتو بينلنا الخير والشر يخاف علينا من العذاب يدعيلنا يرحم صغيرنا ويحترم كبيرنا يحسن للجار ويبر بالناس يتصدق ويحب امتو مادعا علينا معننا عذبناه وخالفنا كلامو
واهم شي بينلنا كيف نعبد ربنا حق عبادته كيف نتقرب من ربنا ومانشرك بيه احد
هوا خلقنا واكرمنا بكل شي يكفي انو هوا اعطانا الدين وارسلنا الرسل عشان نعبدو وندخل تحت رحمتو في اكرم من كذا؟ ليش بعد النعم كلها نكفر بيه ونشرك بيه غيرو ؟
انا مهما اتكلمت ماحوفي لاحق ربي ولاحق رسولي ولاحق ديني
الحرمة المسنه مبتسمه :كلامك اقنعني كثير واسلوبك وانت تتكلم حسسني بجمال هذا الدين
حسين :شوفي هذي بعض من ايجابيات ديني وفي الكثيير الكثير اصلا مافيه سلبيات دين كامل مكمل من الايجابيات بس اذا بتكلم عن سلبيات بتكلم عن سلبيات اللي طبقوه واللي ماطبقوه
انت اللي كان موقفك عن الاسلام السياح اللي يجو هنا اعرف انو طبايعهم تتغير وللاسف يوصفو الاسلام بشكل خاطئ بس هذا من الجهل والتأثر بكم
الحرمه المسنه باستغراب :بس احنا مو كذا !
حسين :الا كذا طبعا مو كلكم بس فيكم الخير وفيكم الشر واحنا نفس الشي فينا الخير وفينا الشر
الحرمه المسنه تفكر
حسين وقف:انا اسأذن ومتى ماتبي تستفسري عن شي انا حاضر
الحرمه المسنه :شكرا
حسين :العفو
خرج من بيتها واتوجه لبيتو القديم يرتب اغراضو للنقل

جوالو يدق ....
مسك الجوال ورد :الو
ابو حسين :ايوا احمد وينك
احمد :في الطريق جاي
ابو حسين :يالله انا استناك
احمد :طيب
قفلو
بعد دقايق وصل ...
نزل من السيارة
ويطالع في الشركه باستغراب ماكان يتوقع شكلها كذا كانت بسيطه نوعا ما صح مرتبه بس مهي بالفخامه اللي متوقعها
دخل وطلع الدور الثالث
احمد يأشر :لو سمحت فين مكتب المدير ؟
الرجال يأشر:هناك على يدك اليمين حتلاقيه
احمد يطالع في المكان :طيب شكرا
اتوجه للمكتب يدق الباب
ابو حسين :اتفضل
احمد دخل
ابو حسين رسم ابتسامه على وجهو :هلا والله
احمد اتصنع ابتسامه وجلس
ابو حسين :شوف يا احمد انا عارف الشركه مو ذاك المستوى بس هذا مو مهم اهم شي الشغل يزبط
احمد :طيب من بكرة الدوام ؟
ابو حسين :ايوا طبعا
احمد :طيب والمطلوب ؟
ابو حسين مد الورقه :اول شي اباك توقعلي على هذي الورقه عشان انقل املاك هذي الشركه باسمك
احمد يطالع في الورقه وجات عينو على الاسمين المكتوبه عند الملكيه
احمد باستغراب:ايش جاب اسم عمي ابو رائد ؟
ابو حسين :مو احنا املاكنا هوا المسؤل عنها زي منتا عارف فلازم ينكت باسمو واسم المالك الثاني اللي هوا انت
احمد مبلم
ابو حسين :شوف انت ماحتفهم في هذي الامور واعرف مالك فيها بس حتتعود شويه شويه
انت وقع وبس
احمد قلبو مقبوض وقع غصبا عنو بيشوف ايش نهايتها
ابو حسين الابتسامه مافارقتو
بدأ يعلم احمد على الشغل والمطلوب منو
احمد بالقوه يستوعب مالو في شغل الشركات والاستثمارات

يفكر ومتعمق في التفكير
جوالو يدق ...
قام من السرير ورد :هلا ياسر
ياسر :هلا محمد كيفك ؟
محمد:تمام الحمد الله انت كيفك ؟
ياسر :والله الحمد الله بخير
ياسر :اسمع امرك ولا تمرلي اليوم ؟
محمد:على وين ؟
ياسر :ياشيخ نروح أي مكان والله طفشان
محمد:خلاص طيب ساعه واكون عندك ان شاءالله صراحه حتى انا ابغا اغير جو
ياسر:خلاص استناك يالله سلام
محمد:سلاام
بعد ساعه
في السيارة
ياسر :امشي نروح البحر ذحين مدارس ووسط اسبوع مافي زحمه
محمد :طيب يالله
بعد وصولهم
محمد وياسر جالسين على الكراسي قررريب البحر هدووء وصوتو هوا اللي ينسمع
محمد وياسر منهمكين في التفكير وكل واحد في عالمو
ياسر يطالع في البحر :شفت مروة مرة ثانيه
محمد :والله ؟وين ؟
ياسر :في السوبر ماركت اللي قدام بيتي اصلا ساكنه في الفندق اللي قبالنا
محمد مستغرب :لييش؟
ياسر :مني عارف والله
محمد:طيب ؟وشافتك ؟
ياسر:ايوا بس طبعا كانت زعلانه اكيد واول ماشافتني اخذت بنتها وخرجت
محمد :طيب انت ايش في بالك ذحين ؟
ياسر :ما ادري والله صراحه بدأت ترجع في بالي
محمد:طيب كويس اتزوجها وخلصنا
ياسر طل في محمد :اتزوجها ايش مستحيل اقلك معاها بنت كم مرة اقلك اشبك مو راضي تفهمني
محمد:طيب يعني انت في بالها وهيا في بالك وجالسين تتفرجو لبعض طيب الين متى كذا ؟
ياسر:ابغاها ترجع وما ابغاها ترجع ما ادري كيف صراحه متلخبطه مشاعري
محمد :طيب كلمها
ياسر:لا طبعا ايش تباني اقلها وبيني وبينك ما احس بترجع كرامتها راحت لما جات ببيتي واترجتني
محمد:اذا تحبك حتبيع كرامتها وبعدين فين الكرامه في الموضوع ترا الحب مافيه كرامات
ياسر:انت ايش دراك ...المهم قلي انت ايش اخبارك ؟
محمد:لقينا تالين
ياسر فتح عيونو :بالله ؟
محمد اتنهد :ياشيخ لقيتها ومافي فايدة ماكاني لقيتها
ياسر مستغرب:ايش تقول انت ؟ مني فاهم شي؟
محمد جلس يحكي ياسر كل الحكايه
ياسر :طيب كان قلتلي من اول افزعلك
محمد:يعني ايش بتسوي ؟
ياسر :اقلها اسافر انا وياك بدون مايعرفو
محمد:لاياشيخ ولو عرفو اختي تضيع من يدي ؟
ياسر:اصلا انت ايش عصابه ترا مهي داخله مخي
محمد:يعني اانا اللي مصدق بس ما ادري ريم هذي ايش وراها
ياسر:لالا ياشيخ ريم طيبه وبنت ناس واخلاق ومتربيه ما اعتقد تسوي شي بصحبتها خصوصا انه ممررة قريبين من بعض
محمد :ايش دراني بس والله كلامها غصبا عني مستغربو
ياسر :لا والله يعني هيا مهما كان عندها فلوس ومدري ايش ماهمها يعني فيها انسانيه مستحيل تخون صحبتها صدقني انت اطمن وماعليك
محمد:وانت اشبك جالس ساعه تمدح فيها؟
ياسر ابتسم :اقول الحق انا
محمد:لاياشيخ
ياسر يضيع الموضوع :المهم اشتريلنا شي نشربو


مسكت الجوال تتصل
مروة :هلا والله
بدور:يا اهللللين
مروة :كيفك ؟
بدور :تمام الحمدالله انت كيفك ؟
مروة :الحمدالله
بدور :وينك يختي من زمان عنك
مروة :والله موجودة بس يعني تعرفي الواحد ينشغل
بدور :اهااا
بدور:طيب اسمعي اباك بكرة تجي عندي عازمة اهل زوجي بس خالتي وبنتها يعني
وبنت خالتي ويعني اباك تجي منها اشوفك ومنها يتعرفو عليك
مروة :امم ماشاءالله والله ما ادري ايش اقلك يعني
بدور:لاتقولي ولاشي انا حستناك ومن جد نفسي تجي لاترديني
مروة :خلاص ولايهمك مايصير خاطرك الا طيب
بدور:تسلمي حبيبتي ..يالله اشوفك بكرة على خير
مروة :ان شاءالله
بدور:مع السلامه
مروة :مع السلامه
بدور قفلت وهيا مبتسمه
دخل البيت يغني ومروق ...
شافها جالسه ومبتسمه :السلام عليكم
بدور:وعليكم السلام هلا والله
مراد :حركات ايش الابتسامه ذي الله يديمها
بدور: دوبي كلمت مروة وحتجي بكرة معاهم
مراد :الله الله وذي الابتسامه كلها عشانها ؟
بدور:والله البنت طيبه وتونس و
مراد قاطعها :خلاص خلاص ذحين تجلس تمدح فيها سنه
بدور تضحك
مراد :طيب يالله قومي ماتبي تجيبي اغراض ؟
بدور:الاطبعا يالله حقوم البس
مراد :استناك في السيارة
بدور:طيب

دخل المطبخ واخذ كاسه واتوجه للثلاجه فتح الثلاجه
جات من ورا باب الثلاجه
رفع راسو ...قفلت باب الثلاجه بسرعه
وليد انفجع :بسم الله
ربا :خير شايف جنيه ؟
وليد :الجنيه اهون
ربا :انققققققلع
وليد :احد يدخل زي كذا
ربا:مو شغلك
وليد اخذ جك العصير وجلس على الطاوله يصبو
ربا جلست قبالو تطالع فيه
وليد مسك الكاسه يشرب ونزلها ... اشبك ؟
ربا مبتسمه :انت اللي اشبك ؟
وليد :ايش اشبي انا ؟
ربا :يعني اشبك ذي اليومين مروق ماشاءالله تف تف غريبه
وليد :اعوذ بالله حاسدتني
ربا :قلت ماشاءالله مالت عليك
وليد :طيب ايش تبي
ربا ابتسمت اكثررر وحطت يدينها تحت ذقنها وغمزتلو :تحبها؟
وليد رفع حواجبو ومستغرب :مين هيا ؟؟
ربا :جدتي يعني ميييين ؟
وليد :ربا انتي ايش تبي ؟
ربا :ذحين انت قلي تحبها ؟
وليد :انت ايش رايك؟
ربا :والله صراحه اشوفكم روميو وجولييت وطاقينها مغامرات كل يوم والله اشك انت اللي مقنع امي تروح تسوي عمرة
وليد ضحك :استغفر الله
ربا :طيب ايش دراك انها تحبك ؟
وليد :مو شغلك انت ايش دخلك ؟
ربا :مالت عليك هذا وانا بساعدك واشبكلك
وليد :مشكورة ماتقصري مايحتاج شبكت نفسي بنفسي
ربا :اخس والله منتا هين
بعد ثوانيي
ربا :طيب وليد اسمع
وليد :اللهم طولك ياروح .. ايش تبي كمان ؟
ربا :ايش ناوي تسوي معاها ؟ يعني اقصد الين وين حتوصلو ؟
وليد :والله ما ادري الين متى بس حستغل وجود ابويا هنا قبل مايسافر مني عارف متى حقلهم بس افكر قريبا وفي الوقت المناسب ان شاءالله
ربا :واخيرا بنحضر زواج
وليد طالع بنص عين :ذحين ذا اللي همك
ربا :اكيد طبعا والله حبيبي انت وياها بتتزوجو وتنبسطو وانا ايش فايدتي في الموضوع اقلها انبسط في الزواج
وليد ساكت
ربا :طيب ياخي سوي اكشن استغل الفرصه اليوم اخر يوم لكم سوا
وليد مخطط للملاهي :طيب ان شاءالله يصير خير ماعليك انت
ربا :اممم طيب انا بقوم استخبر معاها هيا
وليد يحرك راسو باسف :الله يعيننا عليك
ربا قامت واتوجهت للغرفه
دخلت مبتسمه
تالا فوق السرير منسدحه وماسكه ظهرها
ربا دخلت :اشبك بتنامي ؟
تالا:لا طبعا بس ظهري وبطني يوجعوني شويه
ربا:ليش جاتك الانسه ؟
تالا:امم
ربا :طيب روحي قولي لوليد يجيبلك حبوب
تالا فتحت عينها :نعممم؟
ربا :اشبك ؟عادي قوليلو جاتني وابا حبوب شي طبيعي ترا
تالا:ربا انقلعي بالله استخف عقلك
ربا تضحك وغمزتلها :ولاعشانو حبيبك ماينفع ؟
تالا جلست ومفجوعه :ربا انت صاحيه ؟
ربا تطالع في نفسها من فوق لتحت :الحمدالله مافيا شي سالمه غانمه
تالا:اشك والله
ربا جلست عندها :تحبيه ؟
تالا اختفت التعابير من وجهها :مين هوا ؟
ربا :جدي مين يعني ؟
تالا :ربا انت ايش تبي ؟
ربا بصوت واطي :اقول اشبهم ذولا متفقين على الكلام ولا ايه
ربا :تالا صحصي معايا وليد تحبيه ؟
تالا وجهها احمر
ربا :اهااااااا من حمرة الوجه اعرف الجواب
طيب قوليلي ايش احساسك
تالا ساكته
ربا :والله عمري ما اتوقعت تحبي هذا واحنا متفقين نتقاسمو بس عاد ذا خذيه لك
تالا تضحك
ربا :يالله ياهو
تالا:ايش في ؟
ربا :قوليلي كيف ومتى وليش حبيتيه ؟
تالا وجهها احمر وقلبها يدق مع الكلام :اممم يعني ما ادري احس كل شي جا لوحدو كل الاحاسيس في يوم وليله اتجمعت ماا ادري بس حسيت قلبي ينبسط بشوفتو ويدق كل ماسمع صوتو احسو يفهمني ويعرف تفكيري
ربا حطت يدها على جبينها :اااااه ياربي وينك ياماريا تسمعي اللي اسمعوووو شي مايستوعبو عقلللللي
تالا:ربا ياهبله بالله قومي انت محد يكلمك تخربي ام الجو
ربا: خفي علللللينننننا ياعبله خفي علينا ياليلى
تالا:ربــــــــــــــــــــــــــــا
ربا قامت تضحك وغمزتلها :ولايهمك ازبطكم


قاعد على التويتر يكتب
(لوهله ظننت ان الدنيا قد نشرت لي ماتحتويه من سعاده وجعلتني التقي بأنقى سكانها لكن سرعان مااقفلت ابوابها وارجعتني لهموم قد استنزفت كل طاقتي )

قفل اللاب وانسدح وحط يدو على جبينو ويفكرر
مو عارف القرار اللي اتخذو صح ولاغلط مايعرف ايش العواقب اللي تنتظرو

في جهه ثانيه
قامت من النوم واتوجهت للحمام وبدلت ورجعت مسكت جوالها تشوف مين ارسلها وايش الاخبار
لفلفت في الجوال وردت على اللي تباه وقفلت
منسدحه فوق سريرها ومافيها تقوم تسوي شي ...جا على بالها ومهي داريه كيف تتابع اخبارو
اخذت الجهاز من جنبها وفتحتو تفتش وتتابع فتحت التويتر دايما متابعتو باستمرار
قرأت اللي كتبتو
شالت همو مرررررة وزاد تفكيرها بيه
قفلت الجهاز وجلست طفشانه نفسها تعرف اشبو لسا الصباح كان مروق
وقفت وتدور في غرفتها رايحه جايه
جلست على الكنبه ومسكت الجوال (في قلبها )ارسل ولا لا
اخاف ارسل يقول اشبها ذي
لالا فشله .. طيب ياربي كيف اعرف اشبو
استغفر الله العظيم بس
طيب خلاص حرسل كلمتين واعرف اشبو واللي يصير يصير
فتحت جوالها وارسلت (اشبك؟ فيك شي؟)

احمد مسك جوالو بطفش مو عارف مين ارسلو مررة ماعندو اصحاب ومو مختلط باحد كثير
شاف اسمها مسك الجوال تمام واتعدل
اتنهد مع الرساله (في قلبو)معقوله حاسه فيا ايش اقلها ؟من جد نفسي اشتكيلها معنو عمري ما اشتكيت لاحد
ارسلها(تعبان ومهوم)

ماريا مسرحه ومع صوت الجوال انفجعت
فتحت رسالتو وشهقت :اشبوووووو ؟
ارسلت (طيب ايش اللي حاس فيه ؟)

احمد مسك الجوال
ويكتبلها ويتخيلها قدامو
(مرة متضايق وقلبي مهموم )

ماريا بلعت ريقها
(طيب فضفضلي اتكلم انا اسمعك)

احمد ابتسم شويه
(انا وقعت على عقد الشركه خلاص بس مني مرتاح ياماريا مني حاب الشغل نفسي ارجع لشغلي )
ماريا حاطه نفسها في مكانو ومبادلتو احساسو
(طيب ماتقدر ترجع يااحمد ؟)
احمد ملامحو كلها هم
(لا ياريت خلاص هذي عقود ومافيها لعب )
ماريا اتحطمت
(طيب ايش حتسوي؟)
احمد ضايع
(والله ما ادري ياماريا مررة محتار )
ماريا تبا تساعدو باي طريقه
(طيب ايش اقدر اساعدك فيه يخفف عنك ؟)
احمد انبسط شويه
(يكفي انك تكلميني ذحين قاعده تخففي عليا )
ماريا ابتسمت بحزن
(اتمنى بصراحه اساعدك واذا احتجت أي شي انا موجودة واعتبرني اللي تبغاه)
احمد ابتسم اكثر
(تسلمي والله الله لايحرمني منك من جد انا معتبرك شي كبير بالنسبه ليا )
ماريا قلبها يدق ومبسوطة
(الله يسلمك ولامنك وانا كمان انت بالنسبه ليا اكثر من دكتوري )
احمد ارتاح
(والله ريحتيني بكلامك )
ماريا مبتسمه
(طيب الحمدالله دوم ان شاءالله )
احمد
(اميين وياك )
ماريا
(طيب تامر على شي يادكتور؟)
احمد مايباها تقفل
(ايش قلنا على دكتور ؟)
ماريا تضحك
(طيب خلاص ولايهمك تامر على شي يا احمد ؟)
احمد
(ايوا كذا وبعدين ايوا امر على شي )
ماريا مستغربه
(اتفضل )
احمد
(اتمنى صراحه اننا نكون متواصلين ياريت يعني اذا مايضرك )
ماريا خايفه ومترددة
(اممم ماا ادري)
احمد
(طيب شوفي انا حكون موجود أي وقت واتمنى اقلها الوقت اللي تحتاجيني او احتاجك فيه نوصل لبعض )
ماريا ارتاحت
(طيب ولايهمك كذا كويس )
احمد مبتسم
(طيب خذي راحتك )
ماريا
(سلام)
احمد
(سلام)
مسكت جوالها وضمتو لها وغمضت عيونها (في قلبها)يارب لاتحرممممممني
احمد مبتسم ويطالع في الجوال ويعيد ويقرا المحادثه كذا مرررة
انسدح على السرير ويدينو تحت راسو ويطالع فوق ويفكررر
(انتهى البارت الثاني عشر )