البارت السابع عشر*
يطالع فيه بعصبيه : عمممممك في عينك يالظالم حرام عليك حرراااام انت مين عشان تورطني معاك انا لاوقعت ذا العقد معاك ولا اعرفك*
احمد يطالع في عمو نفسو يشوف احد من اهلو بس مو في هذا الموقف
ابو رائد وقف وماسك في طرفين الكرسي : اسمع والله ثم والله اذا ماتقول للضابط عن كل شي وتعترف انو مالي علاقه فيك ولا اعرف ماتلوم الا نفسك*
يتكلم ويسكت يتنفس ويرجع يكمل كلامو*
الضابط : يا ابو رائد هدي حنتفاهم على كل شي بس مو زي كذا*
احمد واقف ومو عارف يتكلم يسمع لعمو بس وقلبو محروق : انا*
قاطعو ابو رائد : انت ايش؟ انت مجرم ياشيخ ماتخاف ربك نصب واحتيال ومدخلني شراكه*
احمد رفع صوتو :ياعمي هددي انا مالي
ابو رائد قاطعو بعصبيه : انا مني عمك ولا اعرفك*
حسبي الله ونعم الوكيل فيك حسبي الله ونعم الوكيل*
طاح على الكرسي بقوه ويحاول يفتح ازارير ثوبو حااس النفس انقطع عنو :موويه ادينني مويه*
احمد مسكو بسرعه*
ابو رائد يبعد يد احمد عنو بالقوه واحمد يرجعها *
الضابط يناددي العساكر يساعدوه*
بعد دقايق نقلوه المستشفى مع العساكر*

الضابط ماسك الجوال : ها وصلتو ؟*
الشرطي : ايوا نعم وصلنا وذحين الدكتور عندو
الضابط : خلاص ما اوصيك على الحراسه والزيارات ممنوعه وبكرة ان شاءالله لو اتحسن حنكمل تحقيق*
الشرطي : ان شاءالله*
الضابط قفل الجوال ودخل مكتبو وجلس على الكرسي : ايوا قلي بالتفصيل انت متئ اتعينت وايش صار بالتفصيل*
احمد مسرح ومتشتت مو فاهم شي : والله العظيم انا مني فاهم شي انت فهمني قلي انتو جايبيني هنا ليه ؟*
الضابط : في عده بلاغات على شركتكم ولما بحثنا في الصفقات والمبيعات واغلب المستندات تدل على انكم من اكبر النصابين*
احمد انفعل : نصابين مين حرام عليك*
اصبر اصبر انا بحكيك ( يتكلم ويداتو تشررح من القها والخوف )ذحين انا كنت دكتور في هندسه الديكور في جامعه .... الحمد الله احب شغلي وماشي تمام جا ابويا قلي عندي لك شركه اباك تكون مديرها منها تأمن مستقبلك وتستفيد ويعني تجاره خاصه وانا ما احب شغل الشركات ولا اعرف فيه بس اصر عليا هوا وعمي وبعدين وافقت*
الضابط يسمع ومندمج واحمد يشرح من قلبو
الضابط :طيب وبعدين؟؟*
احمد : بعدين وقعت العقد وكان فيه اسم عمي ابو رائد وانا استغربت قلتلهم ليه شراكه معايا ؟ قالو عشان الحلال الاكبر له وباسمو مدري ايش المهم انا مني فاهم شي وقعت وبدات اشتغل وكانت في سكرتيرة علمتني على الشغل يوم بعد يوم بس ماصارلي الا اسبوعين يمكن او اقلللل من اشتغلت وذحين فجاه ساحبيني وتقولولي نصب ومااعرف ايش*
الضابط مو مصدق: لا والله ؟ عمك ها ؟ ومن متى العم مايعرف ولد اخوه ؟*
احمد : اصلا اول مرة يشوفني وهذا قصه ثانيه*
الضابط : اسمع انت اليوم حنحتجزك عندنا هنا ووبنكمل تحقيق وبنسمع الطرف الثاني*
الضابط ينادي : ياعسكررري*
العسكري فتح الباب*
الضابط : خذه معاك وبكرة بنكمل تحقيق*
احمد قام والهم مالي قلبو مو عارف ايش يسوي*
يمشي بخطوات ثقيله ...انقفل الباب عليه*
ماسك الباب بقووة من القهر*
رجع على ورا بيأس وجلس على الارض وراسو يضربو في الجدار :ياررب يارب

تصحيها : قومييي هيييي وقت متاخر مرررة
مافي فايدة النوم كابس عليها سهرانه طول الليل*
رجعت تصحيها : ياربي منك قوووووومي خلاص يكفي نوم*
فتحت عيونها بشويش؛حرام علليك والله مانمت الا الساعه 7 الصباح*
ربا انفجعت : اووف ليش؟*
تالا بتعب وقهر اتنهدت : ماجاني نوم*
ربا طالعت فيها بطفش: احلفيييي*
تاالا مهي طايقه احد: ربا بالله قفلي النور واطلعي*
ربا مفجوعه : لا والله والجامعه ياقلبي انتي؟؟؟؟؟؟؟*
تالا بكل برود : مني رايحه*
ربا : ياسلاام على كيفك هوا*
تالا ماردت وغطت وجهها باللحاف*
ربا جلست عند راس تالا :تالا اشبك ؟*
تالا :......
ربا طفشت: تالا هي بالله اشبك تعبانه ولا احد سوالك شي؟*
تالا :ربا مافياشي*
ربا : تالا تضحكي علي مين انتي؟*
تالا عصبت وجلست بقوه : ايش اضحك على مين خلاااااص قلتلك مافيا شي غصب يكون فيا شي انقلعي وقفلي النور والباب ولا والله مايصير طيب*
ربا تنحت واتصلبت مكانها مافي اي ملامح*
قامت بهدوء من مكانها واخذت شنطتها وقفلت النور وخرجت*
تالا حست على نفسها حطت يدها على راسها ودموعها نزلت : انا ايش سويت ماتستااهل الادميه ياربي ساعدنيي*
انسدحت وغطت نفسها وبدات تشهق بالبكاء*

خرجت للصاله بدون اي ملامح ومزاجها قلب تماما*
خرجت من غرفتها : ها رايحه؟*
ربا : ايوا*
ام وليد : طيب خلاص وليد نايم ولا يس
قاطعتها : لالا وليد يستناني بره*
ام وليد : اهاا*
ربا اتورطت : ابويا موجود؟*
ام وليد مستغربه : ليش ؟*
ربا : لابس ابا فلوس عشان بشتري كتب للجامعه وحاجات*
ام وليد اتوجهت للمطبخ ؛ ايوا في الغرفه*
ربا جريت على الغرفه ودقت الباب ودخلت*
ماسك جوالو : خلاص ان شاءالله انا حتصرف ...مع السلامه*
جلست على الكنبه : ابويا*
ابو وليد: نعم*
ربا : ابويا بقلك شي بس لاتقول لامي*
ابو وليد استغرب: ايش؟*
ربا : وليد من امس من يوم ماجابنا من عند بدور مارجع للبيت*
ابو وليد انفجع : كيييف؟*
ربا : لاتخاف حيرجع اكيد يعني ماتعرف وليد بس شكلو متضايق كان ما ادري ايش فيه*
ابو وليد فهم ولدو : طيب ذحين مين حيوديكم ؟*
ربا : لا بس انا اباك توديني تاالا تعبانه شويه وماحتروح الجامعه*
ابو وليد : اشبها ؟*
ربا : لاتعب خفيف وكمان ماعندها محاضرات كثير اليوم
ابو وليد : طيب يالله مشينا*
ربا : طيب كيف مابا امي تعرف*
ابو وليد : ولايهمك انا حروح المطبخ اتكلم معاها وانتي اخرجي بسرعه وانا حصرفلها اي عذر وحوديك*
ربا : طيب*
ابو وليد قام واتوجه للمطبخ : ها جاهز الفطور ؟*
ام وليد تكسر البيضه : لا لسا شويه ويجهز*
ابو وليد : ها فكرتي؟*
ام وليد اتأففت : والله مني عارفه ايش اقلك تعبت من التفكير خلاص*
ربا مرت بسرعه*
ابو وليد : طيب انت فكري كمان واستخيري انا خارج مشوار بسيط وراجع*
خرج بسرعه ودخلو السيارة*

وقف السيارة واخذ نفس ونزل*
فتح الباب ودخل*
ماشي بسرعه ومتوجه لغرفتو*
نزلت من المطبخ : ها جيت ؟*
تطالع في وليد باستغراب : ماشاءالله مسرع
*وديت البنات *على بالي ابوك جا*
وليد مو فاهم شي: امم لامافي زحمه*
كمل طريقو*
ام وليد تطالع فيه باستغراب : وليد*
وليد وقف ودار عليها : نعم يا امي*
ام وليد ؛ تعال ياولدي بكلمك*
وليد اتوجه لامو وجلس على الكنبه بتعب*
ام وليد : اشبك كذا حالتك حاله انت مانمت امس؟*
وليد يتكلم بالقوه : لا عادي المهم ايش في يا امي؟*
ام وليد : امم والله مني عارفه ياولدي ايش اقلك بس بصراحه امس قعدت افكر والله ياولدي انت عارفني انا ماحقول شي الا وانا متاكده من اللي اقول بصراحه يعني انا مني مرتاحه انك تاخذ بنت خالتك يعني هيا صح بنت خالتك على عيني وراسي وتربيه وادب بس يارب يعوضها وتاخذ ولد الحلال اللي يسعدها اما انت ياولدي. عندي لك بنت تاخذ العقل صدقني حتبسطك وتنسيك تالا*
وليد بدون اي ملامح وقف : طيب حاضر يا امي اللي تبغينو حيصير*
ام وليد : فين رايح؟*
وليد : رايح انام*
مشي ويبا يوصل لغرفتو بسرعه*
وقفتو غرفتهم طالع فيها ومر بسرعه من قدامها ...
رجع كم خطوة لورا*
صوتها يسمعوا بقلبو : تالا ؟؟؟؟؟*
صوت بكيها وصل لبرا الغرفه وشهقاتها*
فتح الباب بشويش ويطالع من فتحه صغيرة*
*معطيه الباب ظهرها وتبكي*
قفل الباب واتوجه لغرفتو قفل الباب بقوه*
ورمي نفسو علي السرير حط ذراعو على عيونو بقوووه ودموعو نزلت (من القهر مو عارف ليش ماكان يتوقع انو متعلق فيها لذي الدرجه يمكن دموعها حرقت قلبو وصوت بكيها ماقدر يقاومو احساس الفراق وانها حتروح منو احساس ماينوصف تنزل دموعو بصمت يقهر ويحكي عن اللي في قلبو من الم ): اااااه ياتالااا

فتحت عيونها....
تطالع حولينها وبعد ثوواني استوعبت انها ماتحلم :ريييم*
ماسكه الجوال وتطقطق عليه ...
علت صوتها : رريييييم*
ريم انتبهت وسابت الجوال وقامت : نعم امرري*
تالين بعدت جسمها شويه : تعالي اجلسي*
ريم ابتسمت وجلست بسرعه : يااعيونها امري*
تالين : ريم انا كيف جيت هنا ؟*
ريم رمشت بسررعه : امم طيب تبيني اكملك ولا مالك نفس. وتعبانه؟*
تالين : لاريم كملي اصلا حموووت لو مافهمت شي*
ريم بردة فعل سريعه : لابسم الله عليك انا ماصدقت تقومي بالسلامه مت خوووف عليك والله لاليلي نهار ولانهاري ليل والكل سبتو عشانك اهلي جامعتي كل شي*
تالين: طيب فهميني اول انا ليش هنا وليش انا وياك بس هنا*
ريم بدات تحكي تالين القصه من البدايه وتفهمها وتوقف شويتين عشان تستوعب تالين الحكايه .....
ريم ابتسمت : ها ياقلبي فهمتي كل شي ؟؟*
تالين مفجوعه ومهي مستوعبه :يعني هوا واطي فعلا والله ماتتصوري قد ايش شفت الموت(بدات دموعها تنزل) واتعذبت بسببو كنت اموت من الجوع والبكا والتعب وهوا يستغلني ويلعب فيا واتمنيت الموت على اني اجلس معاه او يسوي فيا شي*
ريم تمسح دموعها : ياقلبي انا معاك وفاهمتك وعاذرتك بس في شي واحد مني مأيدتك يعني مهما كان اللي سويتيه غلط في غلط والله مايرضي ربك وكمان حتخسري دنيتك واخرتك*
تالين بكيت زيادة :عارفه والله عارفه بس تعبت والله لاتلوميني من الخوف واللي شفتو مو شويه الله يسامحني يارب*
ريم حضنتها :هدي ياتالين هدي خلاص استغفري ربك وربي بيغفرلك ان شاءالله انتي حاولي تنسي اللي صار وان شاءالله ذحين مافيك الا العافيه.وشويه شويه حتتحسني*
تالين بعدت عن حضنها وقلبت وجهها للجهه الثانيه وتحاول تهدي وتفكر وتشهق بالبكا*
ريم جلست تهديها لدقايق وبعدها قامت من عندها وخرجت من الغرفه عشان ترتاح ...

تشتغل لساعات متواصله تروح وتجي تخرج وتدخل تزبط ذا وتعدل ذاك*
بعد دقايق....
جلست على الارض بتعب والابتسامه ماليه وجهها : ااااه الحمد الله واخيرررررا خلصت الجزء الاهم وماباقي الا اللمسات البسيطه
طالعت جهه شنطتها ومدت يدها وسحبتها لها*
فتحت الشنطه وتفتش فيها : وينو ذا*
تفتش جوتها بامانه وعيونها كل مالها تنفتح اكثر : ياويلييييي الجوال وينووووووو*
دورت جوتها ومالقتو شهقتتت : ياربي الجوال وينوووو ايش ذاااااااا*
قامت من الارض بسرعه وتدور حولينها مالقت شي*
خرجت تجري للاستقبال : لو سمحت لو سمحت بسرعه بالله مممكن اتصل من هنا ؟*
الرجال : اتفضلي*
دقت بسرعه علئ الرقم وقلبها طااايح حتموووت خلاص شي يجيب الجنون مرتين يضيع*
دقت ومستنيتو يرن وقلبها يدق معاه*
سمعت صوت الجوال يرن في جيبها طالعت فيه وعيونها فيها دموع قهرر ؛ ياربي على الغبااااء*
اوووف الحمد الله الحمد الله والله كنت حتجنن لو ضاع*
مشيت بدون ماتشكر الرجال حتى تمشي راجعه للغرفه مسكت جوالها وارسلت
*
*(دكتوري ...كنت اتمنى تكون معايا وحلويني في هذي اللحظات انا تقريبا خلصت ديكورات الغرفه وماباقي الا شي بسيط والترتيبات واكون مخلصه تماما بالمررة متحمسه تشوفها ومتحمسه اشوف ردة فعلك اتمنى تكون متهني في شغلك وما اكوون ازعجتك ...)
دخلت الغرفه وهيا مبتسمه*
اختفت ابتسامتها فجاه*
يدور ويطالع في الغرفه وهوا مبتسم ومعجب باللي يشوفو*
اتحمحمت ... انتبهلها*
ماريا : لو سمحت انت كيف تدخل الغرفه وانا لسا ماخلص دوامي ؟*
انس ابتسم : والله صراحه شغلك عجييييب وباين من قلب*
ماريا رفعت حواجبها مستغربه؛ عفوا ياريت ترد على سؤالي*
انس يطالع في الغرفه : ايش قلتي؟؟؟*
ماريا بلعت ريقها ومسكت اعصابها ؛ قلت كيف تدخل الغرفه وانا*
قاطعها : اها ايوا قلتيلي ليش ...لا ابدا بس جيت باخذ شي من غرفتي وامشي عندك مانع يا انسه ماريا ؟*
ماريا عصبت : اتفضل بره لين اخلص دوامي بعدين خذ االي تباه من غرفتك مو شغلي*
بس ياريت تتفضل ذحين انا مشغوله وورانا افتتاح وحفل ولازم اخلص شغلي*
انس حاط يدو في جيبو وابتسم بخبث : ليش خايفه دكتورك يزعل ؟ (ضحك بشويش)او اقصد حبيبك يزعل؟*
ماريا فتحت عيونها من الفجعه ورفعت اصباعها بعصبيه ؛ لو سمحتتتت انا لين ذحين محترمتك فاحترمني احسلك وهذا مو دكتوري لحالي دكتور الجميع وياريت تتفضل بره وتحسن الفاظك وماتتدخل في شي مايخصك ولا والله حتشوف شي*
قاطعها :بس بس اعوذ بالله انا مدري ذا كيف متحملك تبدا كلامها بلو سمحت وتشرشحك بعدو لين ماتقول امين وفي الاخير تقلك محترمتك مني شايف احترام انا*
ماريا اتكفت : لا والله .. احمد ربك اني اقلك لو سمحت واتفضل على الاقل الفاظي افضل من الفاظك وعقليتي وتفكيري احسن من تفكيرك بمليون مرة*
انس يمشي في الغرفه بدون اهتمام واتأفف ؛ على العموم انت غرفتي تشرفك انك تكوني فيها وما اوصيك اشتغلي زي الناس هاا مابا شغل حق مشي حالك تراها غرفتي يااا دكتور احمد*
خرج من الغوفه بدون مايسمع رده فعلها*
ماريا بلعت ريفها والعصبيه بتطلع من عيونها : رووووووح الله لايوفق بليسك منك لله عديم اخلاق استغفر الله بس انا ايش حطني عندك قلك غرفتي تشرفك روووووووح اصلا وجودي يشرفك سنين عمرك اللي ماعشتو ياعديم الادب والنخوه*
جوالها يرن حملت الجوال بسرعه : نعم ؟*
متضايقه ومهمومه : ماريا فينك؟*
ماريا معصبه ومهي فايقه احد : عند البحر اتمشى ...ايش فيني ايش فينيييي يعني ويني بالله اكيد حكون في المركز اشتغل واكرف مو اصلا محد يكرف غيري انا انت وتالا قاعدين تتفرجو اساسا مدري انتو ايش تشتغلو طول السنه فاضيين*
ربا متنحه ومهي مستوعبه شي : طيب انا ماقلت شي بس*
ماريا قاطعتها : ربا بالله ترا مرررة مني فايقه احد كفايه الشغل واصلي هناااا وكمان ناس سافله كرهت امي في الشغل*
ربا اتحطمت : طيب انا اسفه ازعجتك سلااام*
قفلت الجوال وحطتو جنبها*
رفعت رجلينها وحطت راسها عليهم متضايقه بالمرة الجامعه مظلمه بدونهم لاتالا لاماريا وكمان تالا مهزأتها من الصباح وماريا ماقصرت فيها : والله شكلو امي داعيه عليا اليوم ....

جالسه في الصاله طفشانه*
طالعت في جوالها وافتكرتها دورت اسمها واتصلت ....
نايمه من العتب وماتبغا تقوم كارهه كل شي تبغا تنام وترتاح ..
الجوال يرن وماوقف اتأففت وفتحت عينها شويه تشوف مين *...قرات الاسم وقفلتو ورجعت نامت*

بدور استغربت : اشبها ماترد مو من عادتها ذا الوقت تكون نايمه*
ارسلتلها ( اشبك ياهو لاحس ولاخبر ولادخلتي اي برنامج من زمان طيب طمنيني بس عليك واسفه اذا ازعجتك )*

فتح الباب ودخل البيت ...
سابت الجوال بسرعه وطالعت وراها*
دخل الصاله : السلام عليكم*
بدور ابتسمت : وعليكم السلام ياهلا*
جلس جنبها : ها كيفك ؟*
بدور باستغراب : تمام الحمد الله اشبك لسا باقي ساعتين على انو ينتهي دوامك ؟*
مراد بعد يدها ونام على رجولها : تعبااان والله واستأذنت*
بدور انفجعت : اشبك بسم الله من ايش ؟*
مراد حط ذراعو على عيونو : منك*
بدور انفجعت اكثر : مني؟؟؟؟*
مراد : ايوا منك اجل سايبتني كم يوم ولاتسالين عني ولاتقولي زوجي اكلمو اطمن عليه خلاااص نسيتي الدنيا مع صحباتك*
بدور ضحكت : اووف فجعتني حرام عليك*
مراد : لا بالله احلفي*
بدور بدات تلعب في شعرو : اولا يازوجي العزيز هيا كلها يومين اللي غبت فيها عنك عشان انشغلت بعزومة صحباتي واللي يسمعك يقول سنتين اهو ذحين انا تحت امرك وجنبك وعند الطلب*
مراد : ايوا ذحين اتفضيتيلي من اول معاهم*
بدور : طيب اسفه حقك عليا*
مراد : ماتنفع*
بدور : وبعدين يعني ايش اسويلك عشان ترضى؟*
مراد : مدة ثلاثة ايام تهتمي فيا اهتمام غيرر*
بدور : كيف يعني؟*
مراد : انا اقلك .. اول شي ماتنامي الا لما تنوميني ثاني شي تاكليني بيدك ثالث شي تناديني باي اسم فيه احساس فيه حب اتصرفي مراد هذي ما ابا اسمعها وطول الوقت اشعري فيا*
بدور انفجعت : لا والله انت اللي احلف؟ من وين اشعر ولا ايش عرفني بالشعر ؟*
مراد : موشغلي بدل ماتكلمي صحباتك دوريلي شعر*
بدور : طيب اي اوامر ثانيه ؟*
مراد ؛ قومي جيبلي مويه*
بدور بعدت راسو بتقوم*
مراد : لالا خلاص بطلت اول شي نوميني بعدين جيبيلي مويه*
بدور : وكيف تجي ذي؟*
مراد : ما ادري اتصرفي*
بدور اتأفتت : هي انت ترا ماصارت ذي مذلللله ترا مو عقاب*
مراد ضحك علي طول حياتو ينرفزها : ياخي احبك ايش اسويلك؟*
بدور : لا والله ايش من محبه ذي ؟*
مراد : اقول اجلسي بس كيفي حقي*
بدور كملت لعب بشعرو بقوه : استغفر الله العظيم ياربي صبرني*
مراد يتألم : بشوووووووووووويش
بدور ضحكت : طيييب خلاص فجعتني

خرج من الحمام وينشف شعرو*
لبس واتعطر ونزل للصاله بكل هدوء وجلس على الكنبه ....
جوالو يرن*
اخذ الجوال ورد : الو*
ربا : يالله وليد وينك ؟*
وليد افتكر : اووف نسيتك طيب ذحين جاي*
ربا : عادي اصلا الكل ينساني*
وليد : اقول اسكتي بس يالله سلام*
ربا بطفش : سلااام*
قام واتوجه للمطبخ يشرب مويه*

خرجت من الغرفه وملامحها تعب وبكا*
تمشي بطفش ومهي طايقه احد*
دخلت المطبخ مضطرة تساعد خالتها ...
سمع صوت احد جاي لف جهتو اول ماشافها. بعد الكاسه من فمو وقعد يطالع في شكلها التعبان*
اول ماشافتو بعدت عينها بسرعه واتأففت وخرجت من المطبخ*
وليد ساب الكاسه واتوجهلها : تالا*
تالا تمشي وماكانها سامعه شي*
وليد رفع صوتو: تالا اكلمك انا*
تالا بدون ماتطالع فيه : وانا ما اكلمك*
وليد يطالع يمين شمال خايف امو تجي : امشي معايا الجوش ابا اكلمك*
تالا لفت عليه بطفش وعدلت طرحتها : ولو اقلك امي مني جايه*
وليد اتنهد : تالا قلتلك كلمتين حقولها وامشي بس اسمعيني فيها*
تالا : وعلى اي اساس اكلمك مو انا ما اهمك ومالي صلاح فيك؟*
وليد : استغفر الله ياربي ...تالا امشي قدامي بسرعه*
تاالا غمضت عينها واخذت نفس ومشيت قدامو*
وليد لحقها*
وقفل الباب وراه*
تالا معطيتو ظهرها*
وليد واقف : طيب ممكن تديني وجهك عشان اعرف اتكلم*
تالا ؛ مو مهم اسمعك باذوني ترا*
وليد ؛ تااااالااا*
تالا خافت ودارت : نعم ايش تبا ؟ اهو لفيت*
وليد : تالا انا اسف امس كلمتك بطريقه كنت وقح فيها بس لازم تعذريني
تالا ضحكت بقهر ؛ كويس اعترفت*
وليد: تالا الله يخليك اتفهميني*
تالا : ايش افهم بالضبط؟ اني ما اهمك ؟*
وليد قرب اتجاهها : لو ماتهميني ماكان نمت امس في السيارة من شارع لشارع ادور محتار مني عارف وين اروح لو ماتهميني ماكان وجعت راسي وتعبت قلبي وعقلي باني افكر فيك*
قرب اكثر منها : تالا لما انا اقلك احبك ياريت تخلي هذي الكلمه في بالك ترا احبك عند وليد غير لما احب احب باخلاص واحب بكل مافيا مستعد اضحي واتعب عشان اللي احبو مستعد اسوي شي عشان ارضييه*
تالا تسمع ومتنحه وقلبها يدق : طيب ؟وليش ذا كلو ؟*
وليد بعد عنها واخذ نفس : امي رفضت*
تالا مهي مستوعبه : رفضت ايش؟*
وليد: انا كلمت اهلي اني اتقدملك وانتي عارفه ذا الشي ابويا وافق وكنت متحمس ومعنوياتي فوق وحاسس بسعاده مافي بعدها سعاده بس في لحظه وحدة اتحطمت واتحطمت معنوياتي برفض امي*
تالا مفجوعه والدموع في عينها : خالتي ؟ خالتي رفضت؟؟؟ ليش طيب ليش؟؟؟؟*
وليد بلع ريقو : ما ادري ايش اقلك تقول صح البنت تربيه واخلاق بس بلاقيك اللي احسن منها*
تالا دموعها نزلت غصبا عنها*
وليد يطالع فيها وقرب منها بدون مايحس على نفسو*
رفع يدينو ومسح دموعها : لاتبكي*
تالا ماتطالع فيه ودموعها ماوقفت*
وليد : تالا ياقلبي انا احبك ومستعد اسوي اي شي عشانك انا ذحين ما ادري ايش ممكن يصير ولا ايش اقدر اسوي عشان نكوو لبعض بس انا اوعدك بسوي كل اللي اقدر عليه*
مسك يدها : دموعك ههذي مابا اشوفها مرة ثانيه اذا بتنزل تنزل فرح بكوننا لبعض*

يضحك من قلبو : الله يهديك بس والله ذكرتني بايام من جد ايااام ماتتنسي*
فتح الباب والابتسامه مابعدت من وجهوو : اتفضل اتفضل والله نور البيت بوجودك*
ابتسم من قلبو : منور بوجودك تسلم*

عيونهم جات على الباب ....*
واللي عند الباب اختفت ابتسامتهم في نفس اللحظه*

وليد صنم ولابعد يدو*
تالا عيونها مارمشت من الفجعه ودموعها وقفت سحبت يدها بسرعه*
وليد مفجوع : ابوياااا؟؟؟؟؟*
تالا صدمتها اكبر : بابااااااا؟؟؟؟؟؟؟؟؟*
( انتهى البارت السابع عشر ) *