( البارت التاسع عشر )
واقفين قبالها ومستنين جواب بفارغ الصبر*
رمشت بسرعه : مين تالا ؟ يعني لحظه لحظه ممكن تفهمني السالفه انا مني فاهمه شي*
ياسر اتأفف : ذحين يعني ماتعرفي عن احمد القصه هذي؟؟؟*
ماريا باستغراب : ولاقد حكاني ولاشي كل اللي اعرفو انو عايش لوحدو وامو اتوفيت على ولاده بيه*
ياسر : كذذذاب ذا يكذب عليك*
ماريا انفجعت : نعم ؟*
ياسر : ترا احمد امو في غيبوبه بس مني متاكد اذا صحيت منها ولا اتوفيت وعندو اخت اسمها تالا*
ماريا جات علي بالها تالا بس ما اتوقعت انها تكون هيا ابدا : يعني انا عندي صحبتي اسمها تالا بس ماقد سمعت ذي القصه منها*
ياسر خاف يبفقد الامل ومايعرف يوصل لاهل احمد : طيب ويعني ايش نسوي؟*
انس: اقول ياسر امشي بالله خلينا نروح وفكر على كيفك*
ماريا عصبت : استنى هنا ايش يروح قلي اول ايش احمد يكذب مايكذب حكيني بسرعه
ياسر طالع في ماريا ومو فاضيلها ابدا : ياشيخه مرة مو وقتك اقلك اذا عرفتي شي عن احمد قوليلي سلاام*
نزل من الغرفه وانس لحقوا*
ماريا مصدومة ما اتوقعت انو احمد يكذب عليها جلست على الارض بقهر وتفكر في كل لحظه مرت بينهم ....

جوالو يرن ....
فتح عيونو واخذ الجوال باستغراب : ايش تبغا ذي ؟*
رد بصوت كلو نوم : الو*
الخدامه الخاصه : الو*
رائد : نعم ايش في؟*
الخدامه الخاصه : ابوك تعبان في المستشفى لازم تجي وتشوفو*
رائد انفجع : ابويا ؟ اشبو ؟*
الخدامه الخاصه : جاو الشرطه واخذوه مني عارفه ايش في وبعدها ارتفع الضغط وراح على المستشفى*
رائد قام من السرير مفجوع : ايش في وليش ماتتكلمي من اول*
الخدامه الخاصه : حاولنا نتصل عليك بس ماترد على اتصالاتنا*
رائد *اتأفف : خلاص انا ححاول اجي على اقرب طيارة واذا صار شي اتصلي*
الخدامه الخاصه : حاضر*
قفل الجوال ولبس وخرج على مكتب الحجز ....
في الطريق ...*
جوالو يرن*
اخذ الجوال ورد : ايوا الو*
ريم : وينك اشوف سحبت عليا قال تمشيه قال*
رائد : تمشيه ايييه انا وين وانتي وين*
ريم عصبت : لا والله والله حبيبي مو انا اللي قلتلك مشيني انت عرضت عليا*
التاكسي وقف ..*
رائد : يالله يالله بعدين اكلمك سلام*
قفل الخط*
ريم انفجعت من حركتو : انا اوررريك قله حيا يعزمني ويسحب عليا ويقفل في وجهي كمان*

قفلت الجوال ودخلت الغرفه معصبه وجلست على الكنبه بدون اي كلمه*
ماسكه الريموت : استغفر الله مني فاهمه شي كل امو كلام مو مفهوم*
تطالع فيها : هي اشبك ؟*
ريم طفشانه : ولاشي*
تالين ردت بنفس طريقتها : لا بالله احلفي ؟*
ريم : يختي عزمني وقلك بيخرجني وسحب عليا ولما كلمتو قفل في وجهي*
تالين متعجبه : خير حبيبي مين هوا ذا من متى تعرفي تتكلمي الماني ؟*
ريم : الماني اييييه*
تالين : اجل متعرفه على مين انتي ؟*
ريم افتكرت انها ماقالت لتالين على وجود رائد معاهم : لالا ولاشي ... اسمعي انا نازله اشتري من تحت تبغي شي؟*
تالين انقهرت : هبل اصلا من متى تخبي عليا انتي ... لاشكرا مابا منك شي شكلي طولت في الغيبوبه الناس اتغيرت*
ريم اخذت في خاطرها وكان نفسها تحكيها بس خبت السالفه عشان خايفه تالين تروح فيها لو دريت انو معاهم*
ريم خرجت بدون ماتتكلم .....*

واقفه عند الباب مستنيه*
وقف قدامها : اتفضلي معايا*
مشيت بخوف وقلق*

دخلها غرفه صغيرة مرة واشر بيدو : اجلسي هنا ذحين حيجي*
جلست وتطالع في المكان بخوف واشمئزاز*
بعد ثواني دخل ومعاه عسكريين*
دخلوه وجلسوه فوق الكرسي*
ووقفو عند الباب*
تطالع فيه : كيفك ؟*
بدون مايطالع فيها : ايش جابك ؟*
ام حسين : ايش ايش جابني ماتباني اتطمن عليك ؟*
ابو حسين : مابا احد يتطمن عليا ايش حتطمني ولاجايه تتريقي*
ام حسين عصبت : خيرر اشبك ايش اتريق هذا جزاتي اني جيت واتطمن عليك*
ابو حسين مارد*
ام حسين : طيب ذحين ايش صار ؟*
ابو حسين : ما ادري عنهم ماطلعوني*
ام حسبن : اول كلمت حسين بس ماقلتلو قلت بقلك اول*
ابو حسين : لالا لاتقوليلو ولاشي ولاتجيبي سيرة اذا سالك عني قوليلو تمام وماكلمك مشغول*
ام حسين : ليش طيب ؟*
ابو حسين : يعني ماتعرفي ولدك حيسيب دراستو ويجي*
ام حسين : طيب خلاص*
الشرطي: انتهت الزيارة
ام حسين : خلاص انا كلمت محامي واداني موعد وفي اقرب فرصه حشوفو*
ابو حسين : لاتتأخري وطلعيني من العفن ذا*
ام حسين : انت دخلت نفسك فيه تجري ورا الفلوس جري*
ابو حسين عصب : قومي انقلعي من قدامي قلك اجري وراها جري مدري مين كل ماحك راسو سويلي فله هنا وسويلي بيت هنا*
ام حسين نزلت بدون ماترد*
الشرطي اتوجه لابو حسين ومسكو من يدو*
ابو حسين بعد يدو بقوه : سيب انا اعرف اقوم لحالي .....

الغرفه بارده وهاديه*
دخل الدكتور ومعاه الضابط*
جلس بهدوء فوق الكرسي*
ابو رائد مغمض عيونو*
الضابط يأشر للدكتور : كيفو اليوم نقدر نتكلم معاه ولالا؟
الدكتور يطالع في ابو رائد : ها يا ابو رائد كيفك اليوم ؟*
ابو رائد فتح عيونو بشويش : الحمد الله*
الدكتور : شوف الضابط هنا يباك يكلمك كلمتين بس وحيمشي*
ابو رائد مارد ....
الضابط: كيفك يا ابو رائد*
ابو رائد اشر براسو ( ايوا)*
الضابط حكى ابو رائد كل مستجد من التحقيق*
ابو رائد : انتو لازم تتأكدو من صحه الاوراق اكيد مزورة وبعدين ما اعرف ولد غير حسين من وين طلع احمد ذا ؟*
الضابط : والله هوا وضحلنا القصه اللي صارت بينهم وذحين جاري التحقيق ونتأكد من صحه كل الاوراق*
ابو رائد يسمع ومستغرب*
الضابط:يالله انا استئذن*
ابو رائد مهموم ويفكر ....

تحضنها من قلبها : حتوحشيييني*
لمى : وانت اكثثثثر ياماما*
بدور سابتها وماتبغا تسيبها*
مراد مسك يدها: يالله نمشي؟*
لمى اشرت براسها( ايوا )
مراد نزل وركبها السيارة وركب السيارة ومشي ...*
في الطريق ... *
لمى تطالع في مراد*
مراد استغرب : اشبك حبيبي تبغي شي؟*
لمى : بابا ماما ليش ماتجي تعيش معانا يعني ماما ماعندها بابا بس ماما بدور عندها*
ليش مانجلس كلنا مع بعض ؟*
مراد ارتبك وبلع ريقو مو عارف اي يرد : لا حبيبي لا بابا حيجي من الرياض ان شاءالله وتشوفيه وتجلسي معاه*
لمى ما اقتنعت بالكلام وملامحها تحولت للزعل*
مراد مايبا يكلمها خايف انها تبكي ...
مسك جوالو واتصل :الوو*
بدور ردت :ايوا الو*
مراد عين على الطريق وعين على لمى : قولي لمروة تنزل تاخذ لمى انا تحت***
بدور: ماترد عليا من اول اتصل خلاص انت طلعها فوق*
مراد: ايش اطلعها ياهو دقي انت*
بدور : من جد اشبك كم مرة اتصل وارسلها ماترد*
مراد اتأفف : طيب*
قفل منها ووقف السيارة : يالله حبيبي بطلعك فوق*
لمى بدون اي كلمه نزلت*
مراد بيقطع الشارع مد يدو يمسك يد لمى : اديني يدك*
لمى بعدت يدها : مابا*
مراد اتأفف ومسك يدها بقوة ومرو*
لمى زاد العناد : خلاص سيبني بطلع لوحدي ماباك*
مراد طالع فيها واستغرب : طيب يالله روحي لوحدك*
لمى خافت وجريت *
تطلع الدرج قابلها بودوقارد عند باب الفندق*
طالع فيها وهيا تجري مد يدو يهديها لاتطيح من الجري*
لمى خافت وصرخت رجعت بسرعه لمراد وحضنتو*
مراد فك ضحك عليها : بتطلعي لوحدك ها*
لمى بكيت*
مراد شالها واتوجه للاستقبال : السلام عليكم*
الرجال: وعليكم السلام*
مراد سال الرجال عن غرفه مروة والدور*
مراد : طيب شكرا*
الرجال *ابتسم : العفو*
مراد طلع الدور الخامس*
واتوجه للغرفه ودق الباب*
يطالع في لمى اللي سانده راسها على كتفو ..سلم عليها*
يستنى الباب ينفتح ....
مرت اكثر من ثلاثة دقايق وهما يستنو
مراد طلع جوالو واتصل : الوو*
بدور : ايوا الو خلاص حطيتها ؟*
مراد : اي حطيتها مهي راضيه تفتح الباب ذي انتي متأكده انها موجودة
بدور : ما ادري بس انا اتصل عليها من امس ماترد*
مراد حب يتأكد : طيب طيب انا حتصرف*
قفل جوالو ونزل الاستقبال*
مراد: لو سمحت انا طلعت الغرفه ودقيت الباب ومحد رد بس بسالك اذا موجودين ولالا*
الاستقبال استغرب : لا ابدا ماخرجت المدام لازم تحط البطاقه عندنا قبل لاتخرج بس البطاقه معاها يعني وانا متاكد ماشفتها خرجت*
مراد استغرب اكثر: استغفر الله طيب يعني نايمه ولا ايش*
مراد : المهم ممكن تديني نسخه من البطاقه*
الرجال : بس اديني بياناتك*
مراد اداه بياناتو*
والرجال اتاكد انو بنتها تعرف مراد*
طلع واحد من البودوقارد مع مراد*
لمى تغمض عيونها عشان لاتشوفو*
مراد طلع وفتح الباب*
الغرفه هدوء دق باب غرفتها برضو محد يرد*
فتح الغرفه بشويش وانصدم*
طايحه علي الارض*
حط لمى وجري عليها : يامروة مرروة*
البودوقارد : انادي الاسعاف ؟*
مراد : لالا انا حشيلها المستشفى معايا*
لمى تدقها وتبكي: ماما قومي مااما*
مراد اتطمن انو في نبضات قلب وعرف انو مغمي عليها*
سحب عبايتها المرميه على الكنبه وغطاها وحملها*
لمى تمشي وراه وتمسح دمعتها وتشهق كل شويه*
خرج للسيارة بسرعه*
واتوجه لاقرب مستشفى*
اعصابو متوترة يسوق وهوا يفكر في كذا شي*
بعد دقايق وصل المستشفى*
حملها بسرعه ودخل للطوارئ*
دخلوها الممرضات ودخل عندها الدكتور*
مراد مستني برا مع لمى*
لمى حاضنتو وتبكي : ابا ماما
مراد اتنهد : طيب حبيبي بس ماما تعبانه شويه *
بدور تتصل ..
مراد شاف اسمها بس مارد عارف لو قلها حتقيم الدنيا وحتخاف*
ارسلها رساله( ياقلبي خلاص حطيت لمى بس عندي كم شغله اخلصها وارجعلك )*
بدور اتطمنت*
الدكتور نزل*
مراد : ايوا يادكتور طمني*
الدكتور : والله زوجتك الحمد الله كويسه بس الضغط كان نازل جدا وسببلها حاله اغماء*
مراد مشى كلمه زوجتك عشان الموقف مايساعد : اها طيب الحمد الله*
الدكتور : بس اهم شي عشان صحتها لاتعرضوها لاي ضغط ولا لاي فجعه لازم تداروها لانو لو صار واتعرضت لشي مايسرها حتسببلها جلطه*
مراد يسمع الدكتور وشايل همها : طيب ان شاءالله*
بعد نص ساعه الممرضه تنادي مراد*
مراد اتوجه للغرفه وجلس*
مروة تطالع فيه وانفجعت ايش جابو*
لمى جريت على امها: ماااامااا*
مروة ابتسمت بشويش : لمى؟*
لمى: ماما وحشتيني*
مروة : وانت اكثر*
مراد متنح*
مروة طالعت فيه : تسلم والله تعبناك معانا*
مراد : لالا ابدا مافي لي تعب احنا في الخدمه*
وسلامتك ماتشوفي شر*
لمى تضحك*
مروة تطالع فيها : اشبك ياماما ؟*
لمى: ماما هذا بابا مراد زوجك انا سمعت الدكتور قلو كذا*
مروة قلبها يدق من الاحراج*
مراد وجهو راح فيها وطالع جهه الباب*
مروة : عيب ياماما*
لمى :مو انا هذا الدكتور قال كذا وكمان قلو لاتزعلها*
مراد نفسو يخنق لمى*
مروة حست في مراد : خلاص مشكور تقدر تمشي سامحنا تعبناك معانا*
مراد : لالا مافي تعب قلنالك خلاص الدكتور كتبلك خروج الليل وحستناكم*
مروة مهي عارفه ايش تقلو ....

ينزل الشنط للحوش*
ابو وليد واقف : خلاص انا حوديكم المطار*
خالد: مشكور جزاك الله خير*
تالا تقفل الشنط وعيونها ماوقفت من الدموع*
ربا تطالع فيها مهي عارفه ايش تقلها*
تالا وقفت تشيل عطورها من فوق التسريحه*
حطت الاول وطالعت في الثاني دموعها نزلت اكثر ضحكت بقهر ولفت على ربا*
ربا ماصدقت تالا تطالع فيها*
تالا مبتسمه والدموع تنزل : هذا العطر اللي اعطيتيني اياه هديه لما اتخرجت وقلتيلي بخي بخه ورجعيه*
ربا ما ابتسمت ودموعها نزلت بسرعه صوتها كلو بكاء : تالا لاتروحي*
تالا اختفت ابتسامتها ونزلت راسها*
ربا تشهق : تالا الله يخليك الله يخليك لاتروحين انا ما اعرف ايش حسوي بدونك كيف حنام في ذي الغرفه كيف حروح الجامعه كيف حضحك كيف حاكل حتى*
تالا جات حضنتها*
ربا مسكت تالا بقوتها كلها وتبكي بصوت عالي*
مرت الثواني ولا وحدة تبا تسيب الثانيه*
الباب يندق*
اتحمحم: ربا يالله قوليلهم يتجهزو بعد ربع ساعه حنمشي المطار*
ربا تخبي صوت البكاا : طيب يا ابويا
تالا وقفت وكملت ترتيب اشياءها وقفلت الشنط*
ربا اتوجهت لغرفه وليد مالقيتو**

طالعت في جوالها لقت مكالمتين منو*
اتصلت عليه بسرعه*
وليد رد : وييييينك انتي*
ربا : *والله ماسمعتو
وليد : يالله بسرعه انا تحت*
ربا : ايش تحت ايش في ؟*
وليد : خليني اشوف تالا ضروووري اكلمها اتصرفي*
ربا انفجعت : طيب ايش اسوي؟ كيف؟*
وليد : انا ورا البيت مستحيل احد يشوفها*
ربا : طيب دقيقه اناديها*
وليد : بسرعه استناك*
قفلت جوالها*
واتوجهت لغرفتهم*
تالا : ربا شوفي هذي بلوزتي اللي تخاصمنا واحنا نشتريها وكنتي تبيها حخليها ذكرى*
ربا مهي معاها ابدا : تالا*
تالا : نعم ؟*
ربا : تعالي معايا شويه*
تالا : وين ؟*
ربا : انت تعالي بس شويه*
تالا مشيت مع ربا ....

تطالع في العلبه : هيا بالله ذا حيسافر وحيخلينا كيف اعرف ذا حلال ولاحرام المشكله ما افهم*
تتأفف وطلعت جوالها تحاول تترجم*
فجعها صوت الجوال وهوا يرن*
ردت بدون ماتشوف الرقم : الو*
ام ريم : ايوا الو*
ريم تحس نسيت صوتها : امم ايوا ؟*
ام ريم: كيفك ؟*
ريم: تمام الحمد الله*
ام ريم : متي راجعه؟*
ريم : لما تتحسن صحبتي*
ام ريم : اقوول بطلي لعب وتعالي ترا ابوك في السجن*
ريم مهي حاسه في رجولها تحسها نملت*
جلست بسرعه : ايش؟؟؟؟؟؟*
ام ريم ؛ والله هوا محتجز ومني عارفه ليه كانو بيحققو معاه ومعد رجع*
ريم : وانت مارحتي تشوفيه؟*
ام ريم : لا والله اخر عمري اروح السجن ايش تبغي الناس يقولو لو احد شافني*
ريم : طيب سلام*
قفلت الجوال*
حسبي الله على بليسك انتي ام والله حرررام ياربي يعيينني عليها ( دموعها نزلت من القهر )*
خرجت من المحل بسرعه واتوجهت للفندق *
تتصل عليه مايرد*
طلعت بسرعه وتحس الطريق بعيددد بعد ثواني وصلت غرفتو تدق الباب بقوة : رائد افتح راااائد انا ريم افتتتح*
رائد فتح بكل برود : اشبك؟*
ريم دخلت : بالله رائد احجززلي معاك برجع*
رائد انفجع ؛ نعمم؟ ليش ؟*
ريم : ابويا في السجن يارائد*
رائد انفجع اكثر : في السجن ؟ ليش؟*
ريم ماسكتو من كتفو تترجاه : ما ادري يارائد الله يخليك بروح*
رائد يطالع في الساعه : مستتحيل باقيلي ساعتين واروح المطار*
ريم تبكي : رائد الله يخلليك احجزلي ذحين*
رائد اتأفف :طيب دقيقه*
ريم فرحت*
رائدمسك جوالو واتصل*
رائد حجز وكل شي وقبل مايقفل شهق*
ريم انفجعت وتأشر اشبك؟*
رائد : طيب شكرا*
وقفل بسرعه*
ريم : اشبك ايش في!*
رائد : احلفي نسييتي تالين ؟*
ريم افتكرت وانفجعت : يالله ذحين ايش نسوي*
جلست على الكنبه وتبكي : والله ابا اشوف ابويا انت تعرف كيف انا متعلقه فيه وتالين ماحقدر اسيبها*
رائد : قومي رتبي اغراضك بعد ساعتين ترا حنروح المطار*
ريم ساكته*
رائد : خلاص لقيتا قومي رتبي نفسك*
ريم : ايش؟*
رائد : نخلي حسين عندها*
(انتهئ البارت التاسع عشر )*