(البارت الثاني والعشرون)
بلع ريقو ويطالع فيه بقلق : اصلا هيا نسيت جوالها هنا وكذا*
ياسر طالع فيه بنص عين*
احمد : بالله علييييك نسيت جوالها ها من ذاك اليوم لين ذحين وهي ناسيه جوالها*
انس : وايش دراك لين ذحين رجعتو لها خلاص*
احمد بتحدي : طيب نشوف*
مسك جوالو ودق عليها*
انس بكل هدوء يحاول يقفل الصوت بس خايف احمد يحس بحركتو*
الجوال يرن وقلب انس يرن معاه*
احمد رفع حاجبو : رجعتو ها؟*
انس اتأفف : ياخي خلاص مارجعتو طيب ؟*
احمد عصب *: وليش اخذتو اصلاا ؟؟؟*
ياسر : احمد احمد اسمعني انا حفهمك*
انس ماكان قصدو يئذيها بس يقول مرة قلت ادبها عليه ويبا يأدبها فاخذ جوالها*
احمد ما اقتنع : ماريا ماتقل ادبها على احد*
ياسر : الله الله الملاك الطاهر*
احمد طالع فيه بحقد*
ياسر انبكم*
احمد مد يدو : جيب الجوال*
انس طلعو من جيبو واعطاه الجوال وخرج من الغرفه*
احمد يطالع في الجوال وحطو في جيبو*
ياسر : طيب ذحين هدي بعدين اتفاهمو اهم شي ذحين قلي ماتفتكر اي احد من اهلك وين ساكن*
احمد جلس فوق السرير : انت من جدك اكثر من عشرة سنين ما ادري عنهم اكيد حيغيرو مكانهم*
ياسر : طيب والحل ؟*
احمد ؛ ما ادري والله ياياسر بس تبا الصراحه انت مدامك رجعتلي يكفيني*
ياسر جلس جنب احمد وحط يدو على كتف احمد : افا عليك بس ولاحسيبك ان شاءالله*

وقف السيارة : يالله حبيبي لما تبيني اجيلك دقي عليا*
بدور : انا حبات عند اهلي*
مراد : حتباااتي؟*
بدور : ايوا اشبك ؟*
مراد : لا ولاشي طيب تتهني يارب*
بدور استغربت كانت تمزح معاه بس رضاه بسرعه يعني مايهمو مرة وجودها في البيت ...
نزلت من السيارة وقفلت الباب*
مراد مشي من القهر *قبل لايستناها تدخل*
بدور دخلت مهموومة ...

بعد دقايق وصل بيت اهلو*
وقف السيارة ودق الجرس*
فتحت الشغاله
مراد : وين امي*
الشغاله : جوا*
مراد دخل ولقاها في الصاله سلم على راسها ويدها : كيفك يا امي ان شاء الله بخير
ام مراد ابتسمت : الحمد الله ياولدي اهم شي انك بخير*
مراد انسدح على الكنبه : امم وين ماريا وحشتني والله من زمان عنها*
ام مراد : خرجت مع صحبتها ربا*
مراد : اهاا*
ام مراد تطالع في مراد كل شويه وتشيل عينها*
مراد لاحظ : خير يا امي تبي تقولي شي ؟*
ام مراد : لالا ولاشي سلامتك*
مراد جلس واتوجهلها ..جلس جنبها ومسك يدها : يا امي قولي اللي في قلبك محتاجه شي تبي مني شي*
ام مراد بدون ماتطالع فيه : ايوا*
مراد سلم على يدها : امريني*
ام مراد ملامحها كلها حزن : ياولدي برضايا عليك ابا اشوف عيالك والله نفسي اشوف احفادي قبل لاربك ياخذ منيتي*
مراد اخذ نفس : بعيد الشر يا امي*
ام مراد دمعتها في عينها*
مراد يطالع في امو : خلاص يا امي مايصير خاطرك الا طيب*
ام مراد ابتسمت : الله يرضى عليك ياولدي*
مراد قام : تامري على شي*
ام مراد : سلامتك*
مراد مسك مفتاحو وخرج*
فتح باب السيارة ودخل وقفلو بقوة*
رجع راسو لورا واتنهد : يارررب*
جوالو يرن ...*
مسك الجوال ورد : ايوا الو*
بدور حست في صوتو : ايوا الو مراد*
مراد : نعم ؟*
بدور : اهلي يبونك تجي للغدا بكرة هنا*
مراد : خير ان شاءالله*
بدور : طيب يالله مع السلامه*
مراد : مع السلامه*
بدور قفلت الجوال وصوتو في قلبها ماقدرت تسالو خافت يتضايق اكثر ...*
مراد حط الجوال بجنبو وزاد همو ماحست فيه ولاسألتو معنو نااادرا مايكلمها بهذي النبرة*
دقايق والجوال رجع يرن*
مسك الجوال ورد على بالو بدور : ايوا الو*
مروة : الو السلام عليكم*
مراد انتبه : وعليكم السلام*
مروة : اشبو صوتك فيك شي؟*
مراد استغرب : لالا ولاشي*
مروة : اممم طيب بس كنت بسالك الادويه يعني جبتها ولا كيف عشان الورقه معاك ماقدرت انا اشتريها ولا انت اعطيتني خبر*
مراد افتكر : اهااا طيب دقايق وتكون عندك اسف والله انشغلت ونسيت ما اجيبها*
مروة : لالاعادي ماقصرت تعبناك معانا*
مراد : قلتلك لاتقولي ذي الجمله مافي تعب ابدا*
مروة ابتسمت : طيب يالله مع السلامه*
مراد : مع السلامه*

يدق الباب بحماس*
مستنيه بفارغ الصبر: اتتفضل*
دخل والابتسامه شاقه وجهو : صباح الخير*
تالين ردت الابتسامه : صباح النور*
حسين : ها جاهزة ؟*
تالين : ايوا*
حسين رجع للباب وسحب العربيه لجوا*
تالين وجهها احمر مهي عارفه كيف حيشيلها ويحطها في العربيه*
حسين وجهو احمر منها*
وقف دقيقه قدامها وكل واحد مسرح ويطالع في الثاني ....
حسين انتبه : امم دقيقه بس*
خرج ونادى النيرس*
ثواني ودخلو سوا*
اتوجهت النيرس لتالين وساعدتها وحطتها في الكرسي*
تالين تتالم بس ساكته عشان حسين*
حسين : ها تمام؟*
تالين : ايوا*
خرجو من الغرفه*
تالين من يوم خرجت من باب الغرفه وهيا عيونها مارمشت*
اشتاقت تشوف اوادم اشتاقت تشوف الدنيا تحس انها كانت في عالم لوحدها وماصدقت ترجع لذا العالم*
مبتسمممه على الاخير وتطالع يمين ويسار*
حسين يطالع فيها ومبتسم على ابتسامتها
خرجو من المستشفى*
حسين: ها يا اختي فين تبغينا نروح ؟*
تالين تتنرفز لما يقول اختي: مني اختك وانا ايش دراني شايفني كل يوم اتمشى*
حسين انفجع من رده فعلها : طيب حاضر هدي بس سالتك عشان بحر ولاحديقه ولا سوق*
تالين : بحر*
حسين ابتسم : طيب حاضر
يتمشو في الشوارع وتالين تطالع وتحس انها تحلم من زمان تتمنى تروح المانيا*
*
وقفو قدام البحر*
تالين تطالع في البحر والناس اللي حولينو : الله يجنن*
حسين : سبحان الله*
تالين تطالع ومسرحه*
حسين انسحب بهدوء من المكان*
بعد دقايق ...
تالين تطالع يمين ويسار ووراها تدورلو وين راح*
خاافت بالمرة : ياااويلي ذا وين راح*
مرو بنات من جنبها شكلهم يخووف وراكبين دبابات يروحو ويجو ويبتسمو بطريقه اشمئزازيه*
تالين قلبها يدق*
حست بحركه من وراها ...صررخت*
اللي في البحر يطالعو كلهم ومستغربين*
حسين اتففففشل : اشبك تالين اشبك ؟*
تالين اتفشلت واطمنت انو جا : احلللف وين رحت انت تخليني عند ذي الاشكال وتروح على بالك اقدر اتحرك ولا ماشاءالله من فصاحتي في الالمانيه*
حسين انفجع من ردة فعلها : طيب اسف والله اسف خلاص ماحسيبك مرة ثانيه بس شفتك مندمجه رحت اجيب هذا العصير والحلويات اللي تحبيها*
تالين معصبه تطالع في الكيس واستغربت عين على الكيس وعين عليه ؛ ايش دراك اني احبو ؟!
حسين ابتسم : لما اجيبلك الاشياء اول يوم جبت من كذا نوع وثاني يوم جيت شفت اللي خلص وشفت اللي تخليه وثالث يوم لقيت نفس اللي جبتو خلص والباقي ماتمسكيه فعرفت*
تالين مهي عارفه ايش تقول : خير انت تقرابني؟*
حسين طفش: خلاص انا اسف*
حسين جا وجلس قدامها بس بعيد شويه يطالع في البحر*
تالين حست على نفسها ومهي عارفه ليش تعاملو كذا بس خلاص اتعقدت من رائد وكرهت الرجال كلهم*
جلسو ساكتين مدة طويله*
تالين طفشت ونفسها تروح مكان ثاني*
حسين ولا اتحرك من مكانو ولاطل فيها*
تالين بهدوء : خلاص طفشت بنروح مكان ثاني*
حسين مارد عليها*
تالين : هي اكلمك انا*
حسين مارد*
تالين : وبعدين؟*
حسين بدون مايطالع فيها :ماحقوم لين تتأسفي*
تالين ؛ وانا ايش سويت عشان اتأسفلك*
حسين : ما ادري اسالي نفسك*
تالين : ولو قلتلك مني متأسفه*
حسين : اجل ماحنتحرك من هنا الا واانا مرجعك المستشفى*
تالين كلو الا ترجع المستشفى*
سكتت تفكر واول مرة تسوي شي غصبا عنها دايما الكل يسمع كلامها : خلاص اسفين يالله قووم*
حسين ابتسم وقام واتوجهلها*
تالين : وديني اي مكان حلو*
حسين : حاضر*
مرت ساعتين بين حدايق ومتحف ولفلفه في الشوارع*
مرو على ملاهي كبببير ومن زمان نفسها تروحو*
حسين يطالع في نظراتها للملاهي وهما ماشيين جنبو : ان شاءالله حيجي يوم وتنبسطي فيه*
تالين : ومين قلك اني اروح ملاهي شايفني بزرة*
حسين ساكت*
تالين : المهم مررة جيعانه*
حسين سكت ولارد عليها وقف العربيه وجلس على كرسي في الشارع قدامها وحاط يدينو في جيوبو*
تالين مستغربه : اشبك جلست ؟*
حسين يطالع في الناس ولارد عليها*
تالين : تستهبل ؟؟؟*
حسين : ......
تالين اتأففت : ياربي هذا اللي بيجنني انت ماتفهم اقلك جيعانه.*
حسين :......
تالين عارفه انو يباها تتأسفلو : خليك ماحتأسف لو ايش تسوي*
حسين ابتسم بدون مايطالع فيها واتكى على الكرسي : بصراحه الجو يجنن يبالي اطول الجلسه*
تالين تشتعل من جوتها لفت راسها على الجهه الثانيه*

مرت نص ساعه*
تالين اصوات بطنها طلعت*
مسكت بطنها ووجهها احممر ( في قلبها تدعي عليه لين قالت امين )*
حسين ماسك ضحكتو*
بعد كم دقيقه*
تالين خلاص مهي قادرة تصبر*
مر ولد صغير في يدو اسكريم ويتلذذ بيه على الاخر*
تالين تطااااالع ولاشالت عينها وشويه وتبكي*
جيعانه خلاص من امس ما اكلت شي *(حسين يراقب)*
الولد يطالع في الملاهي من برا لين راحت امو*
انتبه وجررري .....وطاااح الاسكريم*
الولد زززعل بالمرة وامو تسحب يدو*
تالين ابتسمت : تستاهل*
حسين فك ضحك مو طبببببببببببيعي لين لاحظوه الناس*
تالين تطالع فيه ووجهها راح وتدعي انو مايكون لاحظها*
حسين وقف ورفع يدينو :حصنت نفسي بالله*
تالين فتحت عيونها من القهر وطالعت فييييه بحقققد : مع نفسك*
حسين رحمها واتوجهلها وحرك العربيه لمطعموا المفضل*
وقف العربيه*
تالين : ايش كمان اتأسفلك عليه؟*
حسين اشر للسيارة ووقفت قدامهم*
تالين انبكمت مهي عارفه ايش تقول*
حسين مافي يدو حيله المنطقه مافيها مطاعم كثير ومايعرف طبيعه اكلها*
وجهو احمر مضطر يشيلها*
رجع العربيه لورا وفتح الباب*
تالين جسمها كلو تحسو يدق مو بس قلبها*
حسين فكر يرفعها من رجولها وهيا تساعدو بيدها بس المشكله ماتقدر تحرك الا اصابيعها ويدها تئلمهااا اذا حركتها*
السواق : بسرعه*
حسين بلع ريقو*
وشالها على يدينو : بسم الله وحطها في السيارة وقفل الباب ورجع العربيه ورا وركب قدام ووصفلو المكان*
تالين طول الطريق ساااكته ماكانت متخيله انو حيلمسها حتى بس مافي يدها شي*
بعد دقايق وصلو المطعم ....
حسين اعطاه الفلوس : شكرا*
السواق ابتسم للطفو : عفوا*
حسين نزل ونزل العربيه وفتحها وفتح الباب وبدون مايطالع في تالين عشان لاينحرج ولاتنحرج حطها في العربيه*
تالين سااكته ووجها احمر*
حسين دخل المطعم*
الجرسون ابتسم لما شافو بس استغرب لما شاف تالين*
تالين تطالع في اللي موجودين معنهم قليل وديكور المطعم مرة عجبها*
حسين سلم على الجرسون ووداهم طاوله مناسبه*
تالين تطالع في المنيو ومهي فاهمه كلمه*
حسين : اساعدك ؟*
تالين مارفعت عينها : لاشكرا*
حسين نادى الجرسون*
الجرسون جا واخذ طلبو*
تالين تأشر للجرسون على اللي تبغاه*
الجرسون استغرب*
حسين قلو يجيبلها زيو*

حسين : ها عجبك المكان : امم تمام*
حسين : طيب كويس في شي عجبك*
تالين : ليش ايش شايفني مايعجبني العجب؟
حسين : اممم بدينا لاتخليني اقلب عليك*
تالين.: لا الله يخليك لاتقلب اخاف اصلا*
حسين : امم طيب نشوف*
تالين بدون ماتطالع : هي انت ترا امزح وي محد يمزح معاك
حسين : تمزحي ها*
الطلب جا ...
تالين تطالع في طلبها وطلبو: خيرر مقلدني ؟*
حسين : انتي اللي مقلدتني*
تالين : اجل ماباه*
حسين : اهجدي بالله تراك طلبتي *وجبات اطفال وبدلتلك طلبك*
تالين اتفشلت : ايوا طيب كيفي انا احب اكل الاطفال*
حسين : وبخصوص اللي ماتلعب في الملاهي عشانها مهي بزرة*
تالين : في فرق*
حسين : ايش؟*
تالين ماعرفت ايش ترد*
حسين مسك الملعقه : اجل لما تلاقي الفرق قوليلي*
تالين :.......

نزلت من غرفتها تعباانه ومافيها حيل*
مرت على غرفه ابوها ودقت الباب*
ابو ريم : ادخلي ياريم *
ريم دخلت : كيف عرفت اني انا*
ابو ريم : من دقتك*
ريم سلمت على ابوها : كيفك ؟*
ابو ريم ؛ الحمد الله مدامك تمام انا تمام *
ريم *ابتسمت : طيب الحمد الله*
ابو ريم اتغيرت ملامحو*
ريم باستغراب : اشبك يابابا؟
ابو ريم : ريم انا طلقت امك*
ريم انفجعت وجلست دقايق في حاله ذهول*
ابو ريم اخذ ريم في حضنو : معليه يابابا بس انتي كوني متفهمه*
ريم: بس مهما كان هذي امي*
ابو ريم : اعرف والله*
ريم : ويعني حتتزوج؟*
ابو ريم يمرر يدو على شعر ريم : لا يابنتي*
(بعد ريم من حضنو ) اتزوج وعندي عرروسه زيك ؟ ازوجك اول وافرح فيك ان شاءالله
ريم : ويعني حتزوجني ووحتتزوج ؟*
ابو ريم ؛ قلتلك ما افكر حاليا*
ريم : طيب وكيف ذحين هيا حتعيش فين*
ابو ريم : عندها فله باسمها والخدم والسواق وحساب في البنك وعندها ايش تبا كمان*
ريم : امم طيب*
ريم قامت : عن اذنك*
ابو ريم : اذنك معاك*
ريم خرجت من غرفة ابوهاواتوجهت لغرفتها
قفلت الباب وجلست على السرير مسكت جوالها واتصلت .....*

يمشو في الشارع متوجهين للمستشفى*
مسك جوالو ورد : هلا والله*
ريم: هلافيك*
حسين : كيفك ؟*
ريم : تمام الحمد الله وانت كيفك وتالين كيفها؟
حسين : والله الحمد الله كلنا بخير*
ريم : لااتنسى انا مارجعت انا في منطقه اجيب الدوا*
حسين : ايوا صح طمنيني ايش اخبار الادويه ؟*
ريم : ايوا تمام عشان لاتحس*
حسين : وانت ايش دراك اصلا*
ريم : ايش دراني انها معاك قصدك ؟*
حسين : ايوا*
ريم : شفتها كاتبه في حالتها*
حسين يطالع في تالين اللي حاطه جوالها على رجولها وتضغط عليه بالقوه : اهاا*
ريم : طيب يالله بس حابه اتطمن عليها اديني اياها اكلمها*
حسين مد يدو من وراها وحط الجوال علئ اذنها*
تالين انفجعععععععت وتحاول تطالع وراها بس سمعت صوت ريم : الو الو تالين ؟؟*
تالين وجهها احمر وقلبها يدق : امم ايوا ؟*
ريم : هلاا والله بصالوت وصحبه الصوت*
تالين : اهلين
ريم : اشببك كذا ردي زي الناس *
تالين : اممممممممم*
ريم ضحححكت : اشبك مستحيه؟*
تالين : لا ابدا بس في ناس مايستحوا راحو وخلوني*
ريم : ياقلبي والله انتي عارفه ليش انا رحت*
الشغاله تدق الباب ...*
ريم : تاالين اسمعي اكلمك بعدين يالله اهم شي اتطمنت عليك*
تالين : طيب*
ريم : مع السلامه*
تالين : سلام*
سحب الجوال وقفلو*
تالين مستحيه ولااتكلمت كلمه...*
حسين وقفها عند محل اسكريم الرجال يلعب بالاسكريم لعب ويطيرو والناس حواليه ووتالين اتجننت لما شافتو مبتتتسمه وتطالع باندماج*
حسين : ها ايش تبي؟*
تالين تأشر : ذا وذا*
حسين اشرلو*
الرجال بعد من الناس وجا عندهم*
وقف قدام تالين ومعاه النوعين اللي اختارتو ويطيرها وهيا تضحك*
حسين يحاول يمسكو مو قادر*
وكل مرة يمد يدو ويتفشل*
وتالين ميته ضحك*
حسين اخذ نفس ومسكو بسرعه*
اعطاها اياه : تضحكي هاا *
ومسكتو بشوويش وحاولت تثبتو وكملت ضحك*
مشيو ورجعها لين البحر اللي كانو فيه كان قريب من المستشفى شويه*
تالين اتذكرت البنات : خلاص مافي داعي نجلس*
حسين : لاتخافي شوفي مافي ناس كثيير وانا ماحروح مكان*
تالين : ترا مايهمني وجودك بس حاجتي اجبرتني*
حسين حزن عليها: ياشيخه انتي جالسه ولسانك ماشاءالله اجل لو قمتي ايش حتسوي فيا*
تالين : ومين قال اذا قمت بكون معاك*
حسين : لاتسبقي الاحداث*
تالين : مع نفسك طيب*
حسين سكت منها ولف راسو جهه البحر*
حسين جالس على الحاجز وهيا قدامو في الكرسي مقابله البحر وهوا معطيه ظهرو*
تالين : ايوا صح انت من متى تعرف ريم؟*
حسين دار عليها : من واحنا صغار*
تالين استغربت : نعم ؟ مستحيل*
حسين ؛ ليش؟*
تالين : لاني ولا مرة سمعت شي عنك*
حسين : طيب مو شرط يمكن كانت مخبيه عليك*
تالين : احلف؟ اصلا مستحيل تخبي عليا شي*
حسين : بصفتك ايش ؟*
تالين: اعز صحباتها*
حسين : طيب في فرق بيني وبينك انت صحبتها انا اقرب من كذا*
تالين اتنرفزت : مع نفسك طيب؟ ترا مرة شايف نفسك وواثق بزيادة واصلا انت شكلك ماتعرفها ولاشي شكلها استاجرتك على بال ماتجيب الدواء*
حسين : ولد عمها*
ريم رمشت بسرعه وبلعت ريقها ووطت راسها*
احساس انها مهي مستوعبه ومتفشله : طيب مني داريه*
حسين بكل وثوق ؛ ومافي اسفه؟*
تالين : اممم*
حسين : اممم
تالين ماتطالع فيه : امم اسفه*
حسين : طيب كويس اتعلمتي درس اليوم*
تالين : مع*
حسين قاطعها : خلاص خلاص مع نفسي اعرف*
تالين ضحكت*
حسين قام وحرك العربيه ووداها المستشفى*

جالسه فوق الكنبه مستنيه بفارغ الصبرر*
دخل البيت*
ماصدقت تسمع صوت الباب راحت جري: ها ايش قالو ؟*
ابو احمد : مافي حجز مررة مليان*
تالا : طيب ايش حنسوي*
ابو احمد : المشكله اتصل على ابو وليد مايرد مني عارف ايش صار معاهم*
تالا : وانا ادق على ربا وعلى خالتي ومحد يرد*
ابو احمد زاد القلق : الله يستر يارب*
تالا : طيب ايش حنسوي كيف حنرجع جده ؟*
ابو احمد: بر طبعا*
تالا : طيب يالله انا حجهز الاغراض*
ابو احمد :طيب اليوم نصلي المغرب ونمشي يعني ساعتين كذا ان شاءالله *
تالا : ان شاءالله*

ماسك الجوال يكلم : ايوا ها مافي اخبار ؟
وليد : انا رايحه للجامعه وحسالهم عن سكنو
ابو وليد : طيب طمنا بالله*
وليد : ان شاءالله
*
ربا في غرفتها مهي عارفه كيف تصرف تالا خايفه تقلها رحنا المركز ولقيناه خرج ....

ام وليد جنب التلفون في الصاله : ان شاءالله خير بس زي ماقلتلك احنا هذي الايام نمر بظروف شويه فان شاءالله اول ماتهدا الاوضاع ابلغك ونتكلم من جديد ومايصير خاطرك الا طيب*
الحرمه : ان شاءالله يا ام وليد بس اهم شي الخبر قدو عندك
ام وليد : ان شاءالله ولايهمك*
الحرمه : مع السلامه*
ام وليد ؛ مع السلامه*
ام وليد قامت وجلست جنب ابو وليد*
ابو وليد يفكر*
ام وليد : امم هذي ام يوسف اتصلت*
ابو وليد بدرن اهتمام : طيب؟*
ام وليد : طلبت يد بنتك لولدها يوسف*
ابو وليد : طيب وانتي ايش قلتيلها ؟*
ام وليد : انا قلتلها هذي الفترة عندنا ظروف واول مايهدأ الوضع نتكلم في الموضوع
ابو وليد : طيب خير ان شاءالله الله يجيب اللي فيه الخير خلاص لاتكلمي بنتك لين نرجع الولد لاهلو ويهدا الوضع عشان نفكر برواق*
ام وليد : ان شاء الله*

دخل الجامعه على امل يلاقي احد من الادارة موجودين**
وليد مسررح ( في قلبو) سبحان الله مع اختو في نفس الجامعه ومادريو عن بعض*
وليد يمشي ودق الباب على غرفه الحارس*
محد رد*
ورجع يدق ويدق محد رد*
وليد : استغفر الله ذحين ارجع الصباح ولا ايه*
جا من وراه : السلام عليكم*
وليد لف عليه : وعليكم السلام*
الحارس : ايش تبغا؟*
وليد : العفو بس مافي احد جوا ؟*
الحارس : لا طبعا خلاص كلهم راحو ذحين بعد المغرب*
وليد : طيب عادي احيانا يجلسو*
الحارس : طيب تبغا مين؟*
وليد ؛ اي احد من الادارة*
الحارس : والله مافي احد تعال بكرة*
وليد : لا والله انا مستعجل واباهم ضروري ...طيب ماعندك رقم احد فيهم؟*
الحارس : الا دقيقه انا اديك الرقم*
وليد مسك جوالو يبا يسجل*
الحارس : 0 5*
وليد يسجل : ايوا؟*
الحارس : 3 8*
وليد : امم ... جوالو دق : دقيقه شويه*
وليد مستغرب من الرقم غريب : الو*
الرجال : وليد ...؟؟؟*
وليد : ايوا العفو مين معايا؟*
الرجال : انا اكلمك من المستشفى اللي فيها خالتك*
وليد باستغراب شديد: خاااالتي ؟؟؟؟؟*
( انتهى البارت الثاني والعشرون ) *