.:: الشعر عندي مشتق من المشاعر
فا انا هنا نزفت ما يطابق لمشاعري وما يروق لي من حروف ::.
جاك الجواب وهاك الاخير تكمال .. يمطر على السامع جواهر من القيل
ماهي سوالف روّحت كلها هبال .. علم(ن) وكاد ويتعب البال والحيل
امعقّبينك سابق الوقت فنجال .. يوم اصطفاق الروس وامطارد الخيل
وش لك و وش للمعضلة باشهب اللال؟ .. وش لك و وش للطايلة والبهاذيل؟
يومك تقول الوقت مافيه رجال؟ .. بيّن على انك ما زهمت الرياجيل
عساه ماصابه من الوقت سلاّل .. من تقصده في كتبتك للتماثيل
حيثه ولد قوم(ن) تعيل الف عيّال .. وكم بين ربعه من قروم وحلاحيل
اخاوي الطيّب واعدّه لي اظلال .. ولا الردي خله على نقلت القيل
شروا الذي يمشي على درب الانذال .. ويحط في هرج الخنا نوب ويشيل
البل لها من قسمت الله وبّال .. يوم الشواوية طفح فيهم الكيل
مانيب اعرّجها على بلال وهلال .. لاصار مالي عرق يروى من النيل
خابر حدودي واحتمي في ذرا جبال .. ودروع جنبي من عيال المشاكيل
اكبح جماح العلم والعلم وان طال .. مردّنا في الحرف؟ ولا المقابيل !