حبيبتي وانا الفصيح الي توغل في الكلام
لكن على شاطيك دايم ما تخونه كلمته
تثقل لسانه لو بغى حتى يبادلك السلام
وان قلت له وش لون حالك ردها لك همته
مادري سطت به هيبتك ولا تولها الهيام
او نور شمسك يوم شعشع أنطفت به نجمته
تدرين وش اوجع من طعون الخناجر والحسام
انك تعيش الحب لكن رغم هذا تصمته
والي تذوب بحبها ما صرحت لك بالغرام
تبطن لها قولك ولا تدري اذ هي فهمته
حبيبتي لا تحسبين الضرب في الميت حرام
دكي حصون الي يهيمك واستثيري همته
خلي حياته فوضويه ما بها نقطة نظام
خليه يجفى مرقده والليل زدي ظلمته
خليه تايه فالضبابيه ولجات العتام
خلي عذابك ينحت بوجهه وتظهر بصمته
|