من مدار الجدي جيتك ..
من مدار الجدي جيتك شايل هم ٍ دفين
........ من ضمن بعض الهموم الي خذتني في سماها
ليت لو الهم هذا من هموم العابرين
............ ناس يكفيها الوصول وناس يكفيها عشاها
كان ما سايرت هجسي وين ماروّح الين
............. ابعدت بي رحلة الهاجس بعيد ٍ في مداها
لاقريت ارجوك قل لي وانت سيد العارفين
............... لا تخلي كل كلمه لين تعرف وش وراها
يلزمك شاعر فطين ويلزمك سامع فطين
.............. والاّ ما يوجد قصيده كان ما يوجد حداها
وانت تكتبها تحدد وانت تكتبها لمين
................ عارف ٍ ماكل واحد هو هدفها لو قراها
لوّها صفة حروف ان كان اصف الحرف زين
.............. واضبط الديكور فيها لين تبهر من رآها
كم تردد هالقصيده كل ما اكتب كلمتين
................. كنها ماودها تفصح وتظهر محتواها
جيتها باسلوب من يسأل حبيبه وش تبين
............... وجاتني باسلوبها المعتاد ياجعلي فداها
بينت لي عن خفايا ناس واجد صامتين
............ وقمت ابين عن خفايا كم قصيده ماعناها
قلت اظنك يا نسيتي من اكون او تمزحين
........... وصرت ادور نقطة تجمع زعلها مع رضاها
واستهلت بين طرق ٍ ضاحك وطرق حزين
........... نوب تاخذ من فرحها نوب تاخذ من شقاها
بعد تحديد البدايه جيت ادور لي ضمين
........... من ضمنها من بدايتها وانا اضمن منتهاها
ويطري الطاري وكنه يسأل الطاروق وين
................ لا تباعد عن مجال الي يداعبنا شذاها
والله لو تملا الفضا عنها قصايد مرتين
................. ما يكفيها ويبقى عند عيني ما ملاها
هذي الي علمت نبضات قلبك للحنين
............... وهذي الي طالما هجسك توحد واحتراها
وهذي الي جملت معنى الوفا في حاجتين
.................. ما يغيرها الزمان ولا تبيع الي شراها
قلت وين ابعد وهي للنفس مثل الاكسجين
............. مستحيل احيا بدونه مستحيل احيا بلاها
من بدا نبض الهوا فينا صغارٍ من سنين
............ ماعشقت الا ملامحها وانا اكبر مع هواها
والقلوب الي تحكـّم في مسار العاشقين
................ لااستقرت عند واحد خلت العالم وراها
لكن القصه مهي هذي ولكن بعد حين
.................... وقفة الدنيا ولابه واحدٍ قبلي قواها
كنها قالت يصير الجمع لكن هالثنين
................ مستحيل وكنها ما قدّرت ناتج خطاها
وانتهت بي بين قلب ٍ مايلام وبين عين
........... ان قويت القلب لحظه حدرت دمعة غلاها
وانتهت هي بين اهات تهز السامعين
........... من نقل عنها يقول الآه من اقصا حشاها
يالقسوة هالزمن لكن عسى ربي يعين
............ ان صبرنا نجتمع في جنته قولوا عساها |