الشعر فكره والمشاعر لها ساس
وميت الإحساس مشلول فكره
والقافية والوزن منبر ونبراس
من صابها ما هو على الناس نكره
بعض الشعر حبراً على أوراق قرطاس
وبعض الشعر يموت ما بان بكره
وبعض الشعر يعيش دومٍ مع الناس
والشاعر المبدع يخلده ذكره
احيان اشوفه اشقر الريش قرناس
صيده جميل القول والصدر وكره
واحيان اشوفه قصر من دون حراس
واحيان اشوفه سيف للموت سكره
واحيان اشوفه ليل هادي ونسناس
يبشّر الاحساس بقدوم فكره
ان وظفت في خير طيبً للأنفاس
و لّا فلّا الشاعر على الشعر مكره
وارجع واقول الشعر هو نبض الاحساس
ومن حق من يبدع على الناس شكره