السلام عليكم
كل عام وانتم بخير ب قدوم عيد الاضحى
قصيده لـ الشاعر جارالله الشدي ..
::
:
العيـد شـرّف والحبايـب بعيديـن
وقلبي يتوق متايق الطير قرنـاس
للي لهم في وسـط قلبـي مياديـن
واللي غلاهم ماله اليـوم مقيـاس
لاشك أبفرح فرحـة العيـد عيديـن
عيدي وعيدك يابعد كـل هالنـاس
الناس تفرح لابسه ثوبهـا الزيـن
وأنا في شوفـك أتـردد بالأنفـاس
أكنّها بالصـدر مـن بيـن لا بيـن
وأقولها بالصـوت وأدق الأجـراس
ماغيرك اللي تارسه محجر العيـن
وماغيرك اللي يزهي الزين بلبـاس
أنتي الوحيده من تقـود المزاييـن
وأنتي الفريده والحلا فيك مغـراس
وأنتي لا هنتي هالليالـي وبعديـن
مضرب مثل للناس من فوق الاقياس
يا بنـت شيـخٍ قايـدٍ للسلاطيـن
معرّبه من جدّهـا لآخـر السـاس
يا عقد لولو .. يا خلاصة مراجيـن
ياذا العقيق النادره بيـن الألمـاس
ياجوهره.. يـا كبريـاء العناويـن
يا جنس نادر.. فارعٍ بين الأجنـاس
يا أحلى قصيده دونت في دواويـن
كلاً قراها ..دوّنـة وسـط كـراس
ياعود غصنٍ منثني فـي بساتيـن
انتي الأميره لا ولا شيخة إحسـاس
إحساس يعني ساريـه بالشراييـن
متمكنه فيني من السـاس للـراس
في حق حبك سقتها ويـن ياويـن
شاعر وعمري فاقده فيـك يايـاس
خليت لـك قلبـي بهالعيـد قلبيـن
وأنا أتوووق متايق الطير قرنـاس
|