اللي دفنتوا جثته.. ليه تبكون؟
اللي دفنتوا جثته.. ليه تبكون؟
لولا الحيا..لأقول : معكم خذوني
منه انحرمت وكنت أنا عنه مسجون
ما أذكر لمحته .. غير مره بعيوني
شفته ..وكانت فرحتي مالها لون
عجزت لأوصف .. من لمحته شجوني
ياليتني ..كنت الكفن يوم تمشون
أبقى معه بالقبر ثم تدفنوني
أو ليتني .. من خلفكم كنت (مجنون)
أتبع خطاكم والعذر هو : جنوني
أبكي وراكم .. وأدعي ان كان تدعون
ما يكفي انه عاش عمره بدوني؟؟
تكفون <هاكم عمري اليوم تكفون
برخص حياتي دام خابت ظنوني
ما فادني صبري !! ولا فاد ني عون
ولا فادني دم(عن) .. حرق لي جفوني
يا ما بكيته والبكي يحرق عيون
ميت أو انه حي .. دمعي بعيوني!!
العام كان بفرحته.. يعزف لحون
واليوم ؛ تحت الأرض .. ماهو بكوني
لكن أنا في فرحته.. كنت مدفون
فوق الثرى .. واليوم موته سجوني
(سميت قلبي عقب فرقاه مطعون)
هو و الليالي .. عن هناه امنعوني
ياليتني.. ماعشت لحظه بهالكون
و ياليت ربعي .. في سكات اذبحوني
وياليتكم .. عن همّي اليوم تدرون
منه انحرمت > ومن عزاه .. احرموني
حتى بوفاته !! يوم أنا طحت مطعون
أخفيت طعناتي .. قبل لا يفضحوني
بكيت!! لكن .. ماتظاهرت بالهون
أبكي وأقول : الموت هو سبة طعوني
و إن كان في حبّـــــــي أنا ..ماتحسّون ..؟!
دلوني لقبره .. وهناك .. اتركوني . رأقت، لـــــــــــي،، |
|