شبكة همس الشوق - عرض مشاركة واحدة

18 - 12 - 2013, 07:08 PM

( الفصل الخــــــــــــ 5 ـــــامس )

الصباح \ صلاة الفجر
الطريق لبيت ضاحي بن فهيد
كلهم راجعين من الصلاه ضاحي ومحمد وصقر ونايف وسعد وفارس
صقر – ياابوي اليوم كلم البنت
ضاحي يتمتم – زين زين
محمد ناظر في إخوانه اللي عيونهم كلها معلقه على صقر – وش فيكم
نايف ماحب يتدخل بالسالفه دام اللي فيها صقر وتكلم سعد – انتم مصملين
محمد – وش فيها الزواج نص الدين
صقر ناظر في إخوانه .. وضاحي قطع النظرات
ضاحي – صقر قدام أخوانك بسألك وهم بيشهدون يوم الشهاده انت راغبن في
البنت ولا في راسك شين ثاني الضيم وانا ابوك ترى موب زين وتراها يتيمه
صقر وقف في وجهه ابوه واضطر ابوه يوقف وأشر على شيباته – ياابوي هالشيبات
ماحننت قلبك علي وش بيني وبينها عشان اضيمها تراها في الأول والأخير بنت عمي
ويالله ترى اسمها حرمه من متى نعرف بالحب والخرابيط انت خذيت امي ماتعرفها
الحب عند اليهود مهب عندنا
نايف رفع حاجب لانه عرف صقر يجرح وجرحه في الصميم .. ناظر فيه بنص عين ومشى تاركهم
وهو يدعي بغبن وقهر – الله لايوفقك معها وجعلها تطين عيشتك
فارس وسعد ناظروا في نايف وهو ماشي بعصبيه واضحه .. ويموتون ويعرفون وش بين صقر
ونايف اللي كانوا اقرب قريبين لبعض
محمد يحاول يدمدم السالفه ومايحس ابوهم – يبه البنت لولد العم وولد العم لبنت عمه هاذي سلومنا
وعوايدنا ولو ماجرحت موضي يوم جرحت ودخلت الرخوم بينا كان يمديها تصير حرمتي وام عيالي
ضاحي قرص عيونه فيه – انت لين هالحين مانسيت
محمد وهو يرص على يده – وماراح انسى الجرح القوي يوصل للصميم ويذبح
ضاحي – انت لها عندك إياها تزوجها وخلها تضم عيالك وتضم عيالها
محمد ضحك بسخريه – وش عقبه يبه مااقبل إهانة مره
فارس بحميه – حدك عاد إلا موضي شيخة الحريم
محمد ناظر فيه – ياغلي لو تسكت انت ,, شيخه عندك مو عندنا
سعد هز راسه – الله يهديك الله يهديك
كلهم مشوا للبيت ,, وكلن يغني على ليلاه

بعد هالآحداث بشوي .. الصباح \ بيت ضاحي بن فهيد
في الصاله ضاحي ناظر في بنات اخوهوبالأخص شيخه – اسمعني وانا عمتسن انا ويشهد الله علي
اني ابيتسن ماتفارقني ويوم المنى عندي يوم كل وحده تضوي بيت رجلها وتستانس
معه ( ناظر في شيخه شوي ) شيخه يابنتي صقر خطبتس مني
صدمه ,, والصدمه الأكبر كانت منيره اللي ماتعرف عن هالسالفه شي
منيره بين حلم وواقع .. مو مشكله يتزوج ولدها بس تمنت البنات إلا وحده غيرها لو وضحى بس هاذي
قويه وعوباء .. هي ماتلوم بس شيخه مو عاقله ولا تصلح لصقر هي نار وصقر حريقه يأكل كل اللي
قدامه .. اصلا مو مشكله لو تزوجت نايف او حتى محمد بس مو صقر
شيخه وقفت وعينها في عين عمها ولو كانت لغة العيون تذبح كان اول المذبوحين عمها وبهدؤ عكس
البراكين اللي في الصدر – اسمعني عاد مو عشانا احترمناك تأخذ راحتك بزياده تزوج فلانه لولدك
فلان ولا فلان لفلانه شفت السماء ( وتأشر على فوق بدون ماتطالع وعينها بعمها ) لو تنطبق ( وتأشر
على الأرض بدون ماتطالع فيها ) على الارض ماضويت انا وولدك في غرفه وحده
وبحسره – انا قلته قلبي مقروص من جيت حسبتك بتطلع لنا عون على ولدك اللي من أول ماجاء وهو
خام عقاله يبي يضربني ويخسى شيخه مو حمار شيخه مهره وعجز يروضها ألف خيال
ضاحي وقف وهو فيه ندم وحسره – اسمعيني وانا عمتـ .......
قطعته بصرخه – اسمعني انت المكان اللي ضم ابوي 30 سنه مو عاجز يضمني ومهب عشان خلاص
قدرت علينا وجبتنا بدميعاتك اللي نثرتها خلاص بنوافقك على اللي تبيه انت وولدك يخسي ثم يخسي
اخذه وعلمه قل شيخه شيخة الحريم تقول إلك تعلم المرجله ثم تعال اخطب
ومشت وخلتهم وسط صدمة خواتها وخصوصا وضحى .. اللي ماتدري وين تودي وجهها
ألتفتت على عمها وشافت دمعته تنزل .. بسرعه قامت إله وحبت يده – دخيلك ياعمي لاتأخذ بخاطرك
عليها انا بعلمك قصة شيخه ( وناظرت منيره ) دخيلتس ياعمه لاتزعلين دخيلتس

طلعت والنار شابه في صدرها .. ولا أي شي يقدر يطفيها .. بس فجأه لقت في عينها صقر بلبس
الشرطه توه جاي .. يوم شافته أقبلت عليه وشرشفها يلعبه الهواء .. هالشي وهي مقبله فيه على صقر
عرف ان فيه مصيبه واكيد ابوه خبرها .. وقفت في وجهه ورفعت اصبعها – اسمع ياأنت ياابو عقال
ياللي تدور مراجلك إبه وتخبى وراه مهب انا اللي يوم أخذ أخذك أنا فرس ماعسفني خيال تبي تعسفني انت
يوم انك حلمت ياشيخ احلم على قدك دور من طينتك تراهن واجد ....
قاطعها بصرخه – تخسين والله ثم والله لو ماأنتي حرمه وعايبه وضعيفه ومكسوره اني لاعرفتس منهو
صقر والله انتس ماتربيتي ماألومتس لأمن مثل العرب والناس وأبون هيتسن من ضاري بس انا لها
والله ماتحطين سمعتنا بالأرض ابتس نعبوتس ماتستحين خامه خمايمتس وتكلميني لاسحاء ولا مزاء
انتي كذا كل الريجيل تهرجينهم كذا !!!
شيخه انقهرت انه اخذ الموضوع لناحيه ثانيه وبسخريه – انا كذا انزل نفسي للواطين اللي مثلك
واعطيهم على هرجتهم اللي يفهمونها
اخذها من شرشفها وجرها وراه .. وهي تصارخ وتهاوش – فكني ياكلب فكني .. وصقر مايشوف الدرب
كله ولا أسم آل قاسي ينزل بالأرض .. دخل البيت وحذفها عند اهله وخواتها
وناظر فيهم وهي تهاوش وتسب – اسمعوا اليوم ملكتي على التسلبه هاذي ويوم فيها نعره انا صقر اللي
بطلعها ويوم ابوها مارباها انا اربيها .. والله مابقى غير سمعتنا تنزلها القاع بنت الهنديه عادي عندها
تهرج فلان وعلان لادين ولا دنيا
شيخه بهواش – تخسى تأخذني تخسى
صقر ركض يبي يضربها – ابك يامسلمين بعد إلها لسان ( وطلع حزامه )
بس صراخ ضاحي رده – صقـــــــــــــــــــــــــــر
صقر وقف وناظر في ابوه وبعصبيه – انا بروح وبعلم جدي العلوم كلها والله وانا احلف ثلاث ان
اليوم هاذي الكلبه حليلتي وانا اللي بعرف اربيها
منيره ركضت تمسكه وبخوف – انت مجنون ولا صاحي تبي تعلم جدك ( صقر ترك يدها وطلع )
ضاحي خاف على ابوه يصيبه شي – وقف وقف ياصقر ياصقــــــــــر ( وركض يتبعه )
وضحى وهي تبكي قربت لشيخه – هاه استانستي باللي سويتيه
شيخه وهي مصدومه من دموع اختها وكلامها وعطتها كف – انتي صاحيه ولا مجنونه تبيني اخذ
هالعايب هذه
وضحى خمت اختها وضمتها – لاتقولين تسذا لاتقولين
شيخه بعصبيه فكتها – ان كانتس خايفة منهم انا ماني بخايفه ومااخاف غير من اللي خلقني وانتي خلتس
بخوفتس هذه لين عيال عمتس يحطونتس أمعه مثل ابوتس وأمتس ( ناظرت في خواتها ) من تبي ترجع
معي لدوادمي تمشي تلم زهابها ( ناظرت في وضحى ) واللي تبي تقعد عند هاذي وتبيع كرامتها تقعد
عندها ,, ( وطلعت وخلتهم )
وضحى طلعت تركض وراها وهي تبكي .. ونوره وهند وساره طلعن وراهن
منيره جلست وبكت – حسبي الله ونعم الوكيل حسبي الله ونعم الوكيل
لانها سمعت صوت السيارات اللي طلعت من البيت .. اليوم بتصير مصيبه والله يعلم وش بيصير

في بيت عيسى
طلعن مريم وأمها من البيت .. وكل وحده تطبخ نار على آل قاسي
أم عيسى .. مرارة زمن وضيم عيالها .. ومريم يقودها قسوة رجل وإهانة شريك العمر .. وقفن إلهن تكسي
ركبن معه .. ووصفن إله البيت لـ سعد بن فهيد آل قاسي .. وتحضري ياموضي لمصيبه جايه في
الدرب

بيت سعد بن فهيد
وقف السياره بسرعه بالعرض في نص حوش بيت سعد ونزل منها وهو يصارخ – ياجدي ياجدي
فهيد اللي كان جالس في الجلسه الشعبيه في الحوش وقف وجاه يهرول وبريعه – علامك علامك
ترك باب سيارته مفتوح ومشى بسرعه لجده - عيبة آل قاسي عندنا في البيت ( وشاد على شفايفه بقهر )
ونخيتك لاتنزل الأسم اللي نفتخربه في الجماعه في الأرض
فهيد مط عيونه وناظر فيه .. ودخول سيارة ضاحي هو اللي قطع عليهم النظرات

بيت ضاحي بن فهيد \ الملحق
تحط ملابسها في الكيسه اللي جت ابها .. ووضحى تبكي عندها .. ونوره تحاول تمنع شيخه
شيخه بصرخه دزت نوره عنها – انتسلعي هناك انتن تبن تضيمني تبن تقهرني والله لأروح لدوادمي
واللي فيه خير يلحقني ماأني بجالسة إلهم هنيا
ساره وهي تبكي – شيخة تكفين لتروحين
هند وهي جالسه على الأرض وتبكي – تراهم يعرفون البيت حنا ذالين يسوون إلتس شي
شيخه اللي تلبس بشتها وناظرت في خواتها – انا بنت ابوي ( سخريه من خواتها ) خلتسن يابنات الهنديه
ينفعتسن الذل اللي عايشاته ابوي ماذل غير من اللي خلقه وتحداهم واخذ الهنديه وغصبن عن رقبة فهيد
وطوايفه وانا غصبن عن آل قاسي كلهم بروح واللي فيه خير قلتها يلحقني ,, وطلعت وخلتهن يبكن
ومامداها تفتح الباب بتطلع غير سمعت الصوت القوي – على وين يابنـــــــــــــــــــــــــــــــــت
قبل مرور 27 سنه ..
ايام طفرة البترول .. والسعوديه بدأ عليها مظاهر الحضاره والتمدن ..
فهيد – ادخلي ادخلي يابنتي ياوضحى ياوضحى
وضحى طلعت من المطبخ .. ناظرت في الشابه المزيونه اللي الأرض تتزلزل من مشيها .. جمال شديد
وعيون واسعه جدا عسليه .. شعر أسود غزير ومفكوك .. وجهه يشبه القمر في تفصيله .. ولون برونزي
مثير.. بإختصار فتنه فتنه فتنه .. والمشكله يبان انها صغيره في السن ماتتجاوز 16 سنه ( وسبحآن من خالقها )
وضحى من شافتها وشافت زينها بكت .. فهيد مط عيونه منصدم – علامتس يامره
وضحى وهي تصيح وتندب حظها وتضرب رأسها وجلست على الأرض– تزوجت علي يافهيد
من قالت تزوجت علي طاح في موجة ضحك عارمه - ههههههههههههههههههه ههههههههههههههههههه
هههههههههههههههههههههههه حرام عليتس يامره تبيني اتزوج على بنت خزام اللي اغنتني عن الحريم
وضحى مسحت دموعها بوناسه ووقفت من الأرض وأشرت عليها – اجل من هاذي
فهيد أشر للشغاله – روحي روحي وانا ابوتس للمطبخ ( وراحت الشغاله )
وضحى تناظر فيها يوم مرت حتى مشيها فتنه هاذي خطر كبير داخل عليها البيت ..
ناظرت فهيد – فهيد علمني هاذي وش قصتها
فهيد اللي يشتغل في أرامكو ذاك الوقت – هاذي سلمتس الله ابو عبدالعزيز قدم في شغاله وجته هاذي
يوم شافتها حرمته حلفت يمين ماتب البيت وتدخله يبا الفيت تغار عليه
وضحى انقهرت – وليش جايبها هنا
فهيد بطيب قلب – حرام عليتس ياوضحى هاذي جاية تأكل عيش وتدور رزق
وضحى بعصبيه – انت نسيت ان عندك عيال
فهيد – لا مانسيت بس عيالي محترمين ويخافون الله

موقف آخر
تمسح الزجاج حق غرفته من برى .. وعينه عليها ماتفارقها .. والمشكله ان حتى هي عينها عليه
ماتفارقه .. وكأن العيون نادت بعضها .. وأستجابوا لبعض .. قام من فراشه ووقف عند الدريشه
وهي تمسح وعيونها فيه .. في قلبه حسره على هالجمال .. هو في بداية عمره ويشوف هالجمال
ويتعذب فيه .. اخوانه الثنين تزوجوا وأخته شيخه بعد .. وصار فراغ كبير في حياته .. عينه فيها
ومتلذذه إبها .. ذاك الوقت كان في بداية التزامه .. بسرعه وخر عينه وسكر الستاره واستغفر ربه
اللي قاعد يسويه غلط .. بس قلبه والشيطان يناديه فتح الستاره مره ثانيه ومالقاها .. سكرها
وبسرعه طلع يدور عليها .. حصلها في المطبخ تغسل المواعين وأمه معها .. قرب منها لين
مايفرقهم شي .. وأخذ الكوب من يدها .. وسط مراقبة وضحى اللي انصدمت من هالموضوع
واتجه للثلاجه يشرب مويه وعينه فيها

موقف آخر
راجع من الدوام تعبان وحران وزهقان .. وبسرعه اتجهه لغرفته أخذ الفوطه وطلع للحمام بيتسبح
الحمام اللي كان جماعي للبيت كله وكان في الحوش .. حصلها فيه تغسله .. وكان حبات العرق
مثل اللؤلو في جبينها .. وكانت منحنيه يوم شافته قامت وانسدل شعرها اللي كانت رابطته بإحكام
بس إلى هنا ومايقدر يتحمل .. كل شي يناديه وكل شي جُمل في عينه قرب منها ولما شاف خوفها
زاد في الأمر أكثر .. وقرب منها كثير مايفصله عنها غير سنتيمترات وكلها في حضنه .. شاف الخوف
اللي صحاه من اللي جالس يسويه فيها فكها وطلع هربان من البيت يركض

موقف آخر
مصيبه يافهيد مصيبه
فهيد اللي كان جالس يقرأ – بس الله علينا من المصايب علامتس يامره
وضحى – الشغاله لاعمرت
فهيد – وش فيها
وضحى – بين ان ناصر ولدك متعلقن إبها
فهيد انصدم – وانتي وشدراتس يامره
وضحى – حركاته وبعض الأحيان يشيل عنها الثقيل وعيونه تفضحه
فهيد ضحك – انتي ماتعرفين ان ولدتس مطوع ومايسوي هالحركات أكيد انه يرحمها صغيرة
سن وحسبة اخته
وضحى بخوف – والله مدري بس قلبي مهب مطمن

موقف آخر
في المسجد ودموعه تصب بحسره .. لاحظه مدرس التحفيظ حقه وقرب منه وهو يربت عليه
المدرس – علامك ياناصر ياولدي عسى مهب الأمر كايد
ناصر مسح دموعه وبحسره وعيونه سرحانه لبعيد – الهوى الهوى ياأستاذ وش علاجه
ابتسم المدرس وربت عليه – انت حبيت يابوك
ناصر ودمعته طاحت – ابتليت ياشيخ بهالحب قلي وش علاجي
المدرس – تزوجها وانا ابوك
ناصر ناظر في المدرس بقوه – مستحيل
المدرس انصعق لكلمته – وراه مستحيل !!
ناصر – هاذي غريبه علينا لاهي من هنا ولا تعرف عاداتنا وتقاليدنا
المدرس بتسامح – ياولدي هي مسلمه
ناصر – ايه ودينها قوي بعد
المدرس – انت قادر على العرس
ناصر بتفكير – ايه اشتغل والحمدالله
المدرس ابتسم – الرسول صلى الله عليه وسلم ياولدي قال ( من جاءكم من ترضون دينه وخلقه فزوجوه
إن لم تفعلوا تكن فتنه وأمرٍ عظيما ) والرسول صلى الله عليه وسلم قال بعد ياولدي ( لافرق بين عربي
وأعجمي إلا بالتقوى ) عقب كلام الرسول فيه كلام
ناصر وكأن الأستاذ عطاه بصيص أمل – بس هي شغاله وأبوي مستحيل يرضى
المدرس – ياولدي مدامها مسلمه وقلبك أختارها الله يوفقك ويرزقك معها وانت وأنا ابوك بتزوج مسلمه
غيرك خذاله يهوديه ومسيحيه ونصرانيه وأبوك إن كانك تبيني أحاكيه حاكيته والعادات والتقاليد والتعصب
عمرها مانفعت أحد والرسول قال ( أتركوها فإنها نتنه )
ناصر حب راس إستاذه وقام يركض .. معه مفتاح إنفراج همه .. ماراح يلاقي أحسن منها في نظره كانت
بنت صاينه عمرها ونفسها بيكلم اهله وبيتزوجها

موقف آخر
بصدمه – ايششششش
فهيد بعصبيه – تخسي تأخذها انت تبي تفضحنا شغاله شغاله ياناصر وين تبانا نودي روسنا عن العرب
ناصر – دخيلك دخيلك ياابوي
فهيد – تخسي والله انها تحرم عليك برضاي
ناصر بتصميم – انت حرمتها علي برضاك وأنا حللتها علي غصب عنك ووالله أني لأخذها
فهيد – تخسى ووالله أني لأسفرها وهي بعيدة عن عيونك
( وطلع وخلاهم )
وضحى تشوف نهاية ولدها وتبكي اللي كان أخر العنقود إلها يسوي هالسواه فيهم
في أخر الليل
مشى بخطوات غير مسموعه لداخل البيت .. دق الباب على الشغاله .. فتحت له وهي لابسه شرشف
الصلاه .. كانت تحسبها وضحى طلع هو .. عينه بعينها ويشوف عيونها الحمر واللي باين انها كانت تبكي
.. كلمها باللي بيسويه وهي جلست تبكي – ناصر لا مافيه سوي كذا
ناصر وهو يتلفت يمين ويسار – ابسرعه امشي ياعايشه بسرعه
عايشه – لالالا انا خوف انا صح احب انت وابكي كثير عشان هاذا بلا بس لا مافيه روح
ناصر – عايشه امشي بنتزوج والله اني ماألعب بنتزوج وبنسافر بعيد عن أهلي
عايشه وكأنها بدت ترضخ وناظرت فيه تدور الصدق بعيونه .. اللي كانت مطمئنه إلها كثير
عايشه هزت رأسها دليل الموافقه

الصباح
جت تركض لفهيد اللي كان نايم وهي تولول – ألحق ألحق يافهيد ناصر والشغاله انحاشوا
فهيد قمز بريعه – ابتس انتي صادقه
وضحى وهي تضرب على فخوذها وتصيح – ايه ايه قم قم دورهم قم حسبي الله ونعم الوكيل فيتس
ياللي حرقتي قلبي على ولدي حسبي الله ( وناظرت في فهيد ) كله منك عمري مااشتكيت وقلت ابي
وحده تساعدني انت جبت هالبلوه وبليت ولدي فيها ( وتضرب على رأسها ) آآآآآآه ياخسارتي فيك ياناصر
ياخسارتي فيك اللي ماتنتعوض ( وتبكي بأنين وقهر وحسره )
فهيد اللي كان يلبس ملابسه ومعصب ومايشوف قدامه أخذ المفتاح وقعد يركض يدورهم .. وخبر عياله
ضاحي وسعد .. لفوا الرياض لف ولا حصلوهم .. وبلغوا الشرطه عليهم .. وذاك الوقت مافيه احد ماضحك
وتشمت في آل قاسي وهالشي اللي ماصدقه فهيد .. الكل يتشمت فيه ويسخرون منه .. ولد فهيد تزوج شغاله
وذاك الوقت كل شي عيب وبحسابه .. وناصر هد اللي سواه فهيد وقعد يبنيه في لحظه .. من حرمه لاهي من
من ثوبهم ولا ثوبها

موقف آخر \ بعد سنه وشوي
كان جالس حول ابوه واخوانه يوم جاه الأتصال .. وشافه رقم غريب .. وذاك الوقت مااحد يملك جوالات الا
اللي حالته الماديه زينه
فتح الخط – آلو
ناصر بفرحه – باركلي باركلي ياضاحي جتني بنت
ضاحي فرح لأخوه بس خبئ هالفرحه – وينك ياناصر قلبنا الديره عليك ابوي غضبان عليك
ناصر وكأن فيه شي كدر فرحته – خبر ابوي انا بنرد انا سافرت لنجران دوره وبرد
فهيد وسعد اللي كانوا يسمعون لضاحي وهو يكلم .. اخذ فهيد الجوال من يد ناصر – انت يالكلب لاعيني تشوف
انك راجع هنيا ولا تعرف حدن في آل قاسي كلهم رح الله لايردك
ناصر بحزن – ياابوي انا برجع لاتسوي فيني كذا
فهيد بعصبيه – وبطلق المخنزه اللي بليتنا فيها
ناصر انصدم من كلام ابوه – ياابوي مااقدر انا جالي منها بنت مااقدر اخليها
فهيد بصراخ وهواش – اجل خلها تنفعك وعيني اينها تشوفك عندي ولا تعرف حدن فينا والله ثم والله اني لأبيح
الكافر في دمك ( وسكر في وجهه )

موقف آخر \ بعد مرور سنه ونص
ناصر بفرح – اقلط قلط ياضاحي
ضاحي ناظر في المكان اللي يعيش فيه اخوه .. ثم ناظر فيه – ناصر ليش ترضى لعمرك بالمهانه
ناصر سكت
ضاحي قرب منه – ابوي حرمك من الحلال وفضحك قدام العالم والمكان اللي يعرف ان تشتغل فيه
رح وشى رئيسك يطردك شف حالتك والله انك حمار يوم رضيت بهالذل
ناصر عطاه ظهره وبنبرة قهر – ابوك يبيني صبي تحت رجله هو اللي يزوجني من اللي يبي ومن أفخر
النسب بس انا ماابي هالنسب ياضاحي انا اخترت حرمتي ليش ابوي كذا ليه
ضاحي بعصبيه – تبي اعلمك ليش يسوي ابك كذا لانك ولده سنده جابك ورباك وعلمك وماقصر عليك
ابوي ينحسب إله ألف حساب حنا قبيله تعرف وش قبيله يعني عآدات وتقاليد مهب في يوم وليله انت تبي
تمشي عآدات القبيله على كيفك ابوي بيطردك لانك خالفت سلومنا ووو ( قاطعه شوفة وضحى وهي تمشي
وتعرج ومتجهه لأبوها )
ناصر مشى لها وشالها وحب عليها واتجهه لضاحي – شف ياضاحي شفت هالإبتسامه لبنتي مستحيل ابيعها
لو بكنوز الأرض وخل ابوي يحرمني من كل شي انا اخترت حرمتي واخترت حياتي
ضاحي سكت .. واتجهه لين وصل للباب وناظر في اخوه – الله يسمح دربك ياأخوي ويوفقك بحياتك

موقف أخر
بغضب جلجل فيه بيت آل قاسي – ومن قالك تروح له هآآآآآآآآآآآآآآآآآه والله ياضاحي والله لو عدتها ثاني مره
اني لألحقك الكلب اللي ذلف
ضاحي منزل رأسه في الأرض .. ووضحى تبكي بأنين يصدر عن قلب محروق
وقفت وصرخت فيهم – بسسسسسسس ( وناظرت في فهيد ) كلها سبايبك كلها من تحت دروبك الله لايسامحك
يوم انك احرمتني ضناي
فهيد قرب منها وصرخ فيها – والله لوتجيبين طاري لهالموضوع ولا أعرف انتس ارسلتي حدى هالمخانيز للزفت
هذاك انتس تحرمين علي يابنت خزام
وراح وخلاهم ...
وضحى جلست على الأرض تبكي وسعد وشيخه وضاحي حولها يواسونها

بعد مرور 20 سنه
شيخه وناصر توهم جايين من الغنم .. جلسوا في الصاله
عايشه جابت إلهم القهوه – هاه وش سويتوا ( صارت متمرسه كثير في اللغه البدويه اللي حبتها من حب ناصر )
شيخه – ابدن انا ذيبه بنت ذيب اخذناها منه بنص القيمه
ناصر يضحك – والله انتس تعرفين السوم وانا ابوتس المشكله كيف مرت على مطلق
عايشه بفرح – تراني دعيتلكم قمن دعوتي صابت
ناصر ناظر فيها مبتسم – اصلا انا قلت من شفتس وانا عارفن ان عمري وحظي معتس
شيخه – احم احم ( ووقفت ) المهم اخوتس عبدالستار تراني شايفته يوطوط عند الحاره
عايشه زعلت اخوها مفشلها عند ناصر كل شوي يبي سلف ومدري وش يحسبنهم قاعدين على بنك مادرى انهم مديونين
في سرها ( الله يستر منك ياعبدالستار )

بعد مرور سنتين \ الرياض
عايشه – الحمدالله اللي خلصنا من هالمعامله وسلمنا من الرياض آه يازين الدوادمي مهب الرياض وشوارعها
ناصر- ايوالله صدقتي الله يعين على الزحمه ,, والله ان راسي يعورني
عايشه ناظرت فيه – لاتسو .......... ( ماأمدها تقول هالكلمه ,, إلا قضاء الله قد صار )
والسياره اللي قطعت الأشاره اعترضتهم بقوه لانها كانت تبي تلحق قبل تصير حمراء .. اتجمعوا الناس عليهم
واكتشفوا انهم ماتوا ,, قبل يلحقون يسعفونهم

بعد مرور خمس سنوات الواقع \ الملحق

ومامداها تفتح الباب بتطلع غير سمعت الصوت القوي – على وين يابنـــــــــــــــــــــــــــــــــت
رفعت عينها وانصدمت

من يساومني بحبك ياديرتي غلطان .. الله عطآك الحرمين وبيد شعبك صآنها

.
.
.

في العلآلي ياديرتي في العلآلي .. انتظروني بإذنه تعآلى يوم السبت

في اليوم الوطني للملكه العربيه السعوديه