شبكة همس الشوق - عرض مشاركة واحدة

18 - 12 - 2013, 07:46 PM

( البـــــــــــــارت الثــــــــــــــ 8 ــــــــــــامن )

في بيت ضاحي بن فهيد \ الصاله قسم النسا
موضي وعمشا والجده جالسات .. دخلت عليهم نوره وساره
نوره – السلام عليكم
وقفت لهم موضي وعمشا وسلموا عليهم
موضي – كيفكم يابنات
نوره وساره – بخير
عمشا تبتسم – نور البيت فيتسن يابنات ناصر
نوره – النور نوركم
موضي وهي تبتسم – اعرفكم هاذي امي عمشا مرة عمكم سعد وانا موضي
الكبيره بس فهيد اكبر مني ووراي ضاحي اخوي ثم الشيطونه ريموه
نوره ترد لها الإبتسامه – مرحبا فيكم
منيره – نوره وين خواتس
نوره – جايات وراي
من قالت هالكلمه دخلت وضحى – السلآم عليكم
موضي وعمشا وقفولها وسلمن عليها .. وبعد السؤال وجلسن
انفتح الباب ودخل نايف .. من شافته ساره فز قلبها – آووووووووووه آسف
الجده – تعال تعال حيالله نويفان انت وينك غاطن فيه اخيرن لزمناك
نايف انحرج ويمسح على راسه وهو حاس فيه بثقل – السلآم عليكم
( ويقرب لهم )
قرب من جدته وسلم عليها وهو دايخ – كيفك ياجده
الجده – ماني بطيبه حشا يانويف ماشوفك انت واخوانك غاطسين مانشوف
غير النخله وسعد الله يحفظهم اما انتم غسلت يديني منكم
نايف اللي السكره ماراحت منه تمام – آه زين انا بروح راسي يعورني
الجده نشبت فيه ومسكت يده وتبي تجلسه جنبها – اجلس اجلس شفت بنات
عمك
ناظر فيهن – اهلن
عمشا – وشلونك يايمه يانايف
نايف بثقل في راسه – زين زين
الجده – ابك انت علامك اجلس اجلس جنبي ورد على بنات عمك وجلسته
غصب عنه وتأشر عليهن بوناسه – هاذيك وضحى وهاذيك نوره وهاذيك
ساره
ناظر فيهن وحده وحده وساره يوم ناظرها فز قلبها .. وصار يضرب طبول
نايف وقف – ايه خلاص انا بروح ( ناظر امه ) يمه لاتصحيني خليني ارقد
منيره – ليه ياعين ابوي والعشا
نايف وهو يعطيهم ظهره – مابي شي تعبان راسي يعورني
منيره – تبي بندول
نايف في داخله ( ليت البندول يفيد ) – لا ماابي شي يمه

في الشرطه
عند البوابه الخارجيه طلع ضاحي وصقر مع بعض .. بعد ماسجلوا إعترافات
ابو خضر .. وبنته حولوها على الدار الأجتماعيه
ضاحي – صراحه ألمتني حالة بنته انصدمت باللي سواه ابوها
صقر – هو اللي جابه لعمره
ضاحي – قلت لهم يشددون الحراسه
صقر – ايه بو خضر من العصابات الكبيره وأكيد اللي اعترف عليهم اليوم
ماهب مخلينه في حاله
ضاحي – الله يعين وينه محمد
صقر – مادري يمكن راح لسلطان
ضاحي – ايه هاذا شخباره
صقر – مادري عنه اتوقع هاذا ملازم بيته دائم
ضاحي – اللي صار لهم مو شوي حسبي الله على الحرمه اللي كانت السبب
صقر – استغفر ربك تراها ماتت معهم .. لاتصير مثل جدي يوم يدعي على
عمي ناصر الله يرحمه وهو ميت
ضاحي بدون مايعرف عن جيت بنات عمه – الله يرحمه يارب ويهدي جدي
صقر ناظر في ضاحي وهو بيركب سيارته وضاحي واقف عنده – باركلي
تراني تملكت
ضاحي انصدم – خطبت وتملكت وانا مااعرف
صقر ضحك – الله يخس إبليس هي ملكه بسيطه اصلا البنت عندنا
ضاحي عقد حواجبه – عندكم !!
صقر استغرب – انت مادريت ان بنات عمي ناصر عندنا
ضاحي انصدم بقوه – متى جو ؟؟
صقر – رحت انا وابوي ومحمد وجبناهم مابقى إلا هي عيبه وهايتات
ضاحي سخر من صقر – ياسلام وهالعلم عرف فيه جدي
صقر وهو يركب السياره ويصفع بهالكلمه ضاحي – جدي كان عندنا الظهر
وهو اللي ملكلي على البنت ( وسكر الباب )
ضاحي واقف ومبلم من اللي سمعه .. صدمه جده فهيد اللي من عرف عمره
من هو صغير .. دائم يدعي على عمه ناصر .. ويكرهه طاريه .. وحلف بناته
مايجونا يوافق ويملك لصقر بعد .. ناظر في صقر وهو يرجع سيارته بيمشي
وإبتسم على جنب – والله منت بهين ياصقر كيف اقنعتوا جدي
جاء بيمشي وجاه إتصال من صقر .. رفع الجوال بخوف – وش فيه
صقر ضحك – شكلك بلمت المهم تعال ترى مسوين لبنات ناصر عشاء وأهلك
عندنا
ضاحي – زين بروح للبيت اتروش وبجيكم احس اني بذلت مجهود سنه اليوم
صقر – زين صار ولاتطول نحتريك

بيت سلطان
محمد معصب – مايصير اللي تسويه خاف الله
سلطان ويحس دموعه بتنزل – يامحمد عجزت استوعب خسرتهم مره وحده
محمد – أمر الله بعد وش نسوي
سلطان بحسره وقهر وضيم – كله بسببها لو أني ذابحها بيدي قبل لاتروح
محمد عصب أكثر – انت لمتى وأنت تأكل في المسكينه اللي ماتت
سلطان بصرخه – ماهيب مسكينه مو مسكينه هي السبب هي اللي ذبحت
امي وابوي هي هي
محمد زفر – لاحول ولاقوة إلا بالله ,, انته الحين امش للعزيمه وسلم على
خوالك وجدتك وانسى ترى وش فايدة إسمك إنسان مو عشان تنسى
سلطان بسخريه – هه وتتوقع بعد اللي صار انسى
محمد – حاول تنسى عشان خاطر جدتك وجدك اللي شايلين همك ,, يالله امش
بنروح في سيارتي
سلطان – طيب بروح اتروش وابدل واجي معك
محمد – صار انا احتريك شفني جالـ ( ماكمل الكلمه إلا الجوال يدق طلعه
من مخبى ثوبه .. ناظر في الرقم الغريب ) – آلو
الرجال – السلآم عليكم
محمد بإستغراب – عليكم السلام ورحمة الله ,, من معي
الرجال- معك المقدم عادل من شرطة السليمانيه تقدر تشرفنا في المخفر
محمد إستغرب وشك – وش السبب
المقدم – متقدم عليك بلاغ من السيده مريم ووالدتها يدعون فيك بالسب والقذف
والضرب
محمد وهو يمشي للبوابه – زين انا هالحين جايكم ,, بس هم عندك
المقدم – ايه
محمد فرح لها لخبر بيعطيهم درس قاسي وعز الطلب شرطة السليمانيه – زين
انا هالحين جايكم ( وسكر منه )
سلطان وقفه – محمد وش صاير
محمد – انت اسبقني للعشاء انا فيه شغله صغيره بسويها واجي
سلطان بإستغراب – زين
نازل معصب مع الدرج ونفسه في راس خشمه من اللي صارله .. شاف الكل
متجمع في الصاله .. اللي من طاحت عينه في جدته نادته – تعال تعال يالنخله
الكل كتم ضحكته من ضمنهم هند اللي لمحها فارس تضحك وتصد بوجهها
عنه قرب منهم – السلآم عليكم
الجميع – عليكم السلآم
قرب لجدته وسلم عليها – شلونتس ياجده
الجده تناظر فيه – ابدن مانت بالنخله اللي اعرفه صايرن ابك شي
فارس ناظر لهند بنص عين – اليوم ناس غثيثين مزحهم بايخ بالحيييييييييل
مثل وجيههم
الجده – انت وش تقول
هند انقهرت منه قاعد يسبها
فارس – مافيه شي ( ناظر في عمشا وموضي وريم ) السموحه ماانتبهت إلكم
وشلونتسن آل سعد بن فهيد
ضحكن عليه قالت موضي – ايه هاذا النخله اللي نعرفه
قاطعتهم خلود وهي تهز يد فارس – عمو عمو وش رايك في فستاني
فارس اللي شالها عن الأرض – الله أحلى فستان حلو ,, طيب وينه الكمخه
اخوتس
خلود عصبت – اخوي مو كمخه
فارس يسوي نفسه مستغرب – اجل من الكمخه
خلود وهي في نفس عصبيتها – انت
هنا هند خقتها ضحك والكل إستغرب ضحكتها .. ونوره قرصت عيونها فيها
وفارس دخن .. نزل خلود وقال – انقلعي لابوتس يالله
خلود بدموع – انت مومثل عمو سعد عمو سعد أحلى منك
فارس – اجل انقلعي لعمتس سعد
الجده – ايا الخايس فويرس خلها عنك ورح شف جدك جاء ولالا
فارس بخبث جلس جنبها ويسوي مروجلها ( لمقصود به شرشفها ) ومخفي
إبتسامته – طيب انت قولي ياجميل مشتاقه له
الجده تناظر ريم – ولد عمتس يرطن وش يقول
ريم ومخبيه ضحكته – يقول اشتقتي لشايبتس تبينه
الجده وهي تضحك طلعت عصاها وفارس قام وركض لعند الباب – يوم
ياوضحى انتي وفهيد ابأخذ عصيكم واكسّرها اللي متقوين فيها علي والله
أعلم ان كل واحدن فيكم يقدر يعدي ويمحط الرياض برجلينه
الجده تنفث على نفسها – تف بسم الله علي وعلى جدك من عينك
فارس ضحك وراح
ريم قربت لنوره وهمست لها – تعالي نروح الملحق حقتسن ابي اطمن على
شيخه ليش ماجت
نوره بطيب لهالبنت – خليها عنتس هاذي من تروق بتهجدنا كلنا
ريم – انتي تدرسين
نوره – ايه في الكليه
ريم بوناسه وهي تصرخ – احلفييييييييي يعني بتصيرين تدرسين معي
الجده وهي تناظرها وناقدتها – ها رويمه انتي وش جاتس لايكون دخلتس جني
ترى سعد هنيا بناديه يقرأ عليتس
ريم فهت – هآآآآآآآآآآآآآه
الكل ضحك عليها

في المطبخ
منيره عند قدر الطبخ ووضحى تغسل الرز يوم دخلت عليهم شيخه – السلام
عليكم
وضحى افرحت بدخلتها ومنيره بحب لها – وعليتس السلآم حيالله مرت ولدي
حيالله مرت صقيران
شيخه لفت براطمها من تحت البرقع دليل على عدم رضاها – فيه شي اعاونكم
فيه
منيره – لا ياحبيبتي كانتس بس تبهرين الدله
شيخه – طيب
منيره بفشيله – والله مدري وين اغدي وجهي منتسن يابنات ناصر العشاء
لتسن ومدخلتسن المطبخ
وضحى بحب – لا لايهمتس ياعمه اعتبرينا بناتس
منيره تركت اللي بيدها وناظرت فيهم ودمعتها نزلت – كنت ارجي ربي
يرزقني لو بنت ورحمة ربي كبيره مادريت انه بيرزقني خمس
شيخه ووضحى حزنوا عليها بس شيخه سكتت واتجهت للقهوه تبهرها
ووضحى بحنان بالغ – دخيل عينتس ياعمه لاتبكين
منيره وهي تمسح دموعها بطرف شرشفها – من حبي لتسن عسى ربي يبلغني
شوفة عيالتسن
شيخه اهتز الغوري بيدها من كلمة منيره ولاعلقت

عند الريجيل
دخل سعد والجد ,, وصقر وراهم اللي ألتقى فيهم عند الباب
فارس قرب لجده وحب خشمه وراسه – وشلونك ياجدي
الجد ناظر فيه – هماك الظهر مسلم علي
سعد كتم ضحكته الشايب فشل فارس
فارس طاح وجهه وقعد ينكت عشان يخفي إحراجه – نغليك نغليك يالشايب
العجوز صجتنا فيك ويوم شفت خشتك آآآآآآ اقصد وجهك ومبسمك استانست
أببشر الوضحي بوصولك
الشايب بسؤال – هي وينها فيه من ظهرت من الظهر ماردت بيتها اظاهر
تبي تمسي هنيا بعد
الشباب كتموا ضحكهم جدهم يموت في بنت خزام ويهواها .. وابو محمد وابو
فهيد يناظرون في عيالهم ناقدين عليهم
صقر وهو يريح ظهره على المسنده ويطلع ظرف من جيبه – يوم انكم ملتمين
ترى هذا مهر بنت ناصر ثمانين ألف وان كان نقصها شي تعلم ابوي وانا
أوفيها والعرس عقب ماأرد من المقناص
ابو محمد ناظر فيه دليل ان تصرف ولده مااعجبه – انت على كيفك حددت
العرس
صقر ناظر في ابوه – ياابو محمد انا أبلغكم ان عرسي بيصير عقب
المقناص انا اللي بتزوج ومال لحد كلمه
فارس – اكشخ وفي أي قصر بتحط عرسك
صقر – نسويه في إستراحه وتخلص السالفه
ابو فهيد – مايصير وانا عمك نبي نفرح فيكم
الجد ساكت ويشوف وش نهاية قرارهم
صقر – يكفي فرحة محمد وبنتك موضي اللي العيون ماقصرت فيهم
هنا ابو فهيد انخرس وابو محمد انقهر من ولده اللي يقهره في بعض
التصرفات
دخل ضاحي – السلآم عليكم
قرب وسلم على الجميع
ابو محمد – وين سلطان ومحمد ونايف وفهيد
ابو فهيد وبحسره وقهر – فهيد هه اغسل يدك منه حسبي الله عليه من ولد
الجد ناقد على فهيد – عز الله ماطلع مثلي هالولد مفشلنا اللي كبره زد اعرس
وجاب كمن ورع مير الله يصلحه
ابو فهيد – عجزت معه يابوي هماك تشوف والله اني اخذته حتى للأبل مير
والله انه مفشلني والله اني بعض الأحيان ادعي عليه بالموت ربي يأخذه
ويريحني منه
ضاحي – لا الله يهديك يابوي استغفر ربك
ابو محمد – ضاحي وانا عمك والله ان نايف مثله مير الله يصلح الحال
سعد وقف وضاحي ناظر فيه – وين
سعد رفع حاجب – وانت وش دخلك بتمنعني اروح لأمي
فارس – الله أعلم من اللي ورى امك ياحبيب امك اقعد بس
ضاحي اللي رافع حاجب ويناظر فيه
سعد منقهر – انت ياورع امس نقطنا بسكاتك مابقى غيرك يهرج وانت
(يناظر ضاحي ) تراها حرمتي ولو بغيت اعرست مع صقر
سلطان دخل في هاللحظه – السلآم عليكم
الجميع – عليكم السلآم
وسلم عليهم جميع .. وجلس جنب جده اللي يحاول يطلعه من ضيقه اللي
ملازمه

في شرطة السليمانيه
دل على الظابط وسلم وعرفه على نفسه .. واللي بدورهم قدملوه القهوه
والشاهي بما إن منصب محمد كبير
محمد عقب ماتضيف – ايوه ياطلال خلهن يجن بس ابيك تطلع هاذي أمور
عائليه واسمحلي
طلال اللي لبس طاقيته ووقف – ابدن يامحمد خذ راحتك طال عمرك
بعد فتره دخلت مريم وامها .. اللي من شافنه بالحاله جتهن أم الركب
وقعدن ينتفضن .. ووقفن عند الباب من الخرعه .. مشى محمد لين وقف
عندهن .. ومريم تخبت ورى أمها
محمد وهو شاد على أسنانه – هاذي ( ويأشر على أم عيسى ) نقول حرمه
كبيره وبعذرها ماودي بصراحه أدخلها السجن بس انتي
مريم وهي ايفه بس تشجعت – حنا ماسوينا شي حنا جايات نطالب بعيالنا اللي
مخلينهم عندكم
محمد عصب – انا ولد ابوي هماكم حاذفينهم وماتبون إلهم ذكر توهم حلوا في
عيونتسن
أم عيسى بقوة بأس – عيالنا أخذينهم أخذينهم وخلني أشوف حد من ذا قاسي
يوطوط في المحكمه ان اطلب كسر كراعينكم وتسان فيكم خير صنتوا بنات
اخوكم ناصر اللي مهيتينهن يبا الفيت تبون تلمون عيال عيسى ولدي في
حجوركم وماتبونا نأخذهم
محمد بقهر وعصبيه – اقطعي وأخسي حسبي الله عليتس من حرمه بيظل
لسانتس وصخ من عرفتس ومالتس خص في بنات عمي
مريم تدخلت بينهم – هيه هيه ياأنت اعرف من تكلم تخسي توصل ظفر أمي
وليش تحسب عليها حسبي الله عليك انت يالصايع يالضايع
محمد ويأشر على نفسه وبعصبيه ورافع حاجب – انا صايع ضايع
مريم بقهر كابته – ايه ولا نسيت حبك لبنت عمك حسبي الله عليك وعليها
عساكم ماتهنون ويوريني فيكم أبشع عذابه
محمد عصب ومسك نفسه لايسوي فضيحه وعشان يقهرها – وابشرتس
بخطبها وبتزوجها وبخليها تربي عيالي وبربي عيالها وانتي موتي قهر
انتي واخوتس وهالحين انتي ياعجوز النار اذلفي لبيتس لاتباتين في السجن
الليله مع بنتس
مريم بعصبيه بقهر من اللي يقوله – تزوجها عساكم للحريقه بس بإي حق
بدخلني السجن وش مسويه انا
محمد ويتجهه للمكتب – تعدي على رجل أمن في الدوله وتشتكينه وسب وقذف
مريم ماتت قهر وشوي ودموعها تنزل – والله اني لأشكيك لأكبر مسؤول في
هالديره وأحط عاليها أسفلها
محمد وهو جالس على المكتب وبعصبيه – انتي بدال ماتجين تحبين يدي
اخليتس تطلعين مع امتس ياأم لسان تبين تشكيني في الدوله هذه الباب قدامتس
روحي اشكيني والله أن أقول المره متعديه علي وسابتني وقاذفتني
( وحط رجل على رجل ) وعشاني طيب وحافظن للعشره وبيني وبينتس
عيال عساهم ماجوا بخليتس تذلفين مع امتس ولا والله اني اليوم ابيتس في
سجن الملز
افتحت الباب وقالت لأمها تمشي .. وكانت تمشي ورافعه صوتها وتدعي
عليه بحسره وحرق قلب
محمد بقهر – اهبي من مره حسبي الله عليتس الله يعل كبدتس كانتس
من شفت وجهتس وانتي عالة كبدي
بيت ضاحي بن فهيد \ في أخر العزيمه
في الحوش ,, وقفت الجده وهي تقول بشراسه للشايب – ماني براجعه برقد
عند بنات ناصر
الجد عصب – مالتس لزوم عودي لبيتس يامره
الجده – وهذه بيتي بقعد عند ولدي مابت عند غريب وابي ارقد مع بنات ناصر
الله يبيحه
الجد بقهر وهو يعطيها ظهره ومتجهه للسياره يركب مع ضاحي – الله لايبيحه
كانه ماريحني لاحي ولاميت من شفت وجهه وانا شايفن الضيم
الجده وشوي تبكي – هب عسى ربي مايقبل دعوتك الله يرحمه ويغفرله ولدي
كان مغرر به وانت شبيت فيه الله لايقبل دعوتك
الجد سكر الباب بعصبيه .. والجده مسحت دمعتها .. ومشت داخل بعصاها
وشافت الجو متوتر من دخول صقر للصاله وشيخه جالسه
ووجيهم ماتنتفسر
الجده – وش بلاكم
صقر – اقول لحرمتي امشي معي فوق تقول تخسي خبرتي حرمة تعصى
رجالها ياجده
الجده – يافقر وضحى فقراه ابك انت ماتستحي وش تبا أبها فوق هاه علمني
صقر حس ان جدته فاهمته غلط – لالالا ياجده بعلمها عن ترتيب العرس
الجده جلست جنب شيخه – هاه يالله علمنا وانا معها
صقر كشر .. كان ناوي اليوم مايعدي على خير مع ذا المستلعنه بس الجده
خربت مخطاطته كلها

في الملحق
ساره وهي تنسدح على السرير وهي تنفث الهواء بعشق – حبيته
هند مطت عيونها – منهو
ساره انبطحت على بطنها – من بعد نايف شفتيه
هند تلفتت يمين يسار .. وبسرعه سكرت عليهن باب الغرفه – انتي
انهبلتي صار بعقلتس شي
ساره بسرحان – لابالله غير اني ذبت لين شوشتي
هند كشت بيدها قدام وجهها – هيه هيه صحصحي لاتسمعتس شيخه قسم
لاتردتس على تريله لدوادمي مير ابلعي النعمه واقطعي
ساره وهي تتوعد – ماأكون ساره ان ماخليته يحبني وبتشوفين

في الصاله
شيخه بقهر – تحلم ولولا جدك وابوك ماحلمت بظفري
صقر انقهر وجاء بيتكلم
وقامت تروح لخواتها اللي في المطبخ يساعدن منيره في غسل المواعين
مع الشغالات
شيخه بعصبيه – امشن روحنا معاد قعد احد
وضحى امسحت المويه اللي بيدها وناظرت في اختها .. نوره تناظر في وجهه
شيخه
منيره – والله اني قلت لتسن معاد بقى شي الشغالات بيقومن بالباقي روحن
امرحن واخبر عمتي تبي ترقد عندتسن وتسولف معتسن طيبن خاطرها
وطمننها عليتسن
مشن خواتها معها .. ولقن محمد وصقر وسعد وفارس وعمهن جالسين
مع الجده اللي تعلمهم عن هوشة الجد فهيد
شيخه تقاطعهم – جده حنا بنروح نرقد
العم بو محمد – تعالن يابناتي اقعدن
وضحى – اسمحلنا ياعمي حنا تعابى ونبي نرقد
العم بو محمد – نوم العافي هوانا عمتسن ناقصتسن شي تبن شي
وضحى – خيرك سابق جانا اليوم السواق وجاب من كل شي ماقصرت
العم بو محمد – وان نقصتسن شي علمني
وضحى – ابدن لاتوصي
الجده قامت معهن واتجهن للملحق يرقدن ,, ومانامن غير عقب إستجواب
مطول من الجده عن حالهن وحال ابوهن اللي بكت كثير وهي تسمع أخباره
من بناته وبكن وبكت كثير معهن .. ونامت الجده وهي حاضنتن نوره
وهند

غرفة صقر
جالس محمد معه وهو يحكيله – وبس بس يشهد بالله طلال ماقصر معي
صقر بعصبيه – يافرقا كل هذه صار لك وانا مادريت كان علمتني ابرد كبدك
فيهن
محمد – خلهن مقصرت فيهن بس انا قررت
صقر رفع حاجب – اللي هو
محمد – برد واخطب موضي
صقر انصدم من القرار – وش هو موضي !!

في بيت سعد بن فهيد \ جناح ضاحي
جاه إتصال من الشرطه مقر عمله .. واللي أستغرب أتصالهم هالوقت
رفع الخط – نعم
الشرطي – طويل العمر فيه مصيبه صارت ياليت تلحقنا
ضاحي فز من فراشه – وش هوووووووووو !!