شبكة همس الشوق - عرض مشاركة واحدة

20 - 12 - 2013, 12:00 PM

الجــــــــزء الرابــــع..
ورود ذابــــله...

في غرفتها الورديه..الناعمه..جالسه وفاتحه اللاب حقها وتكلم صاحبتها على المسن..
دانا:هاي لمو..
لمياء:هلا..هايات حبو..
دانا:كيفك؟...وينك من زمان عنك؟؟
لمياء:والله مثل ما انتي عارفه علمي ومافي مجال اني اشوف احد ههههههه..
دانا: هههه الله يوفقك ان شا الله..
لمياء:الا دنو شوفتي البنت الـboy..؟؟
دانا تذكرتها وكشرت:ايش فيها...؟
لمياء:صايره سالفة البنات..واغلب البنات منهبلين عليها..
دانا بقرف: ووووع...بصراحه ما عجبتني بالمره..
لمياء: عاد البنات عاجبتهم شخصيتها..ومسميه نفسها فيصل..
دانا: ههههه الحمد لله والشكر بس..اكيد انها مجنونه رسمي..
لمياء: ههه معاكي حق..ايوه سولفي بس وخليها عنك..

************************************************** ****************

لانا نزلت بعبايتها..
ام ضاري: على وين؟؟؟
لانا:ماما انا وصاحباتي مجتمعين بالمول..
ام ضاري: واختك وينها؟؟
لانا: وانا ايش علي منها..
ام ضاري: لا تتأخرين الساعه 8 بالضبط تكوني بالبيت..مفهوم؟؟
لانا بطفش: مفهوم مامي...يله باي..
ام ضاري مسكت الريموت تقلب المحطات بطفش لان اليوم ما عندها شي..

&&&&&&&&&&&&&&&&&&&&&&&&&&&&&&&&&&&&&&

قامت مدى وام سلطان اللي فهموا قصد ابتهال وتفاجؤا ان اللي في بالهم صحيح..وحطوا ايديهم على قلوبهم.بما ان سلطان مو موجود بالبيت...والبيت فيه بنات...

دخل يترنح بمشيته ويدندن..
مدى بلعت ريقها: يمه لهيه شوي لحد ما ندخل البنات الغرفه..
ام سلطان ارتجفت كلها..وحاولت تضبط اعصابها:اتركيه علي ..
دخلت مدى الصاله ووجهها مخطوف..
وبصوت مرتجف: ابتهال دخلي البنات الغرفه..
ابتهال اختفى الدم من وجهها: ايش جابه؟؟؟"وفزت من مكانها"..بنات بسرعه..بسرعه ادخلوا الغرفه...
مشاعل قد تكرر عليها الموقف..وبدا قلبها بالخفقان..
اما مرام اللي ما تدري ولا فهمت ايش السالفه قامت والخوف مالي قلبها..
ابتهال دخلت البنات بسرعه الغرفه..وسكرت الباب وقفلته مرتين وتسندت عليه وهي مغمضه عيونها ..وتبلع عبرتها لانها عارفه ايش راح يصير..
في الممر كانت واقفه ام سلطان ..
حاولت تتكلم بثبات:ابو سلطان ايش جابك؟؟
ابو سلطان اللي صار جنبها: ايش عليك مني هذا بيتي.."ودفها"..وخري عن وجهي..
مدى راحت بسرعه لامها تسندها لانها صقعت الجدار..
دخل ابو سلطان الصاله..شاف الاكل والعصير والصحون,,,وبدر ووداد جالسين يطالعون الكيكه بشغف اطفال بريء..
لف وعيونه كلها شر: كان عندكم احــد؟؟
ام سلطان بارتباك: كان عندنا..عندنا....
ما امداها تكمل جملتها الا بدا الاسد بالزئير..
:انا كم مره قلت لكم ما ابي احد في بيتي ..كـــــــــــــــــم مررررررررررررررره؟؟..يعني ايش تعانديني...اكيد تعانديني...
نزل واخذ الكيكه ورماها الى ان صكت في الجداروعيون الطفوله والبرائه تتابعها..بعيون مليانه حرمان..الم..ودمعة قهر..
ودودا بطفوله: ليه بابا؟؟؟؟
مسك وداد من بيجامتها ورفعها بيد وحده:حتى انتي تراديني...؟
بدر بدا في نوبة بكاء حاده..بكاء خوف من الكائن الهايج اللي قدامه ..
رمى بنته بكل قسوه على الطرحات الموجوده بالصاله..ودز كاسات العصير برجله لحد ما انكسبت على الارض..
وتوجه لام سلطان ومسكها من شعرها : انا كم مره بعلم فيك.هااااااااااااه..؟؟؟
ام سلطان الموقف مو غريب عليها..بس لها فتره ماشفته بالهيجان هذا..
مدى وهي تحاول تمسك يد ابوها: خلاص يبه..خلاص شي صار وانتهى..وما راح يتكرر..
طالعها بعين قويه: انتي اسكتي ولا حرف..وانتي"وشد شعر ام سلطان"..مره ثانيه بتكسرين كلمتي اذبحك..تعرفين ايش معني اذبحـــــــــك..؟؟
ابتهال في الغرفه حطت ايدينها على اذنيها ..ماتبي تسمع شي..ماتبي..خلااااااص ملت..تعبت..ماتبي تفتح عيونها وتشوف وجه مشاعل ومرام..ماتبي تشوف نظرة الشفقه..ولا الخوف..ولا حتى الرحمه..ماتبي تكون ضعيفه عندهم..تمنت ذيك اللحظه لو ابوها ميت..لو ما كان موجود على الحياة احسن..
مشاعل بدت تبكي..اول مره تشوف ابتهال كذا..دايما قويه..ما تخاف..ما تهاب ليه صارت كذا ليه!!
مرام..ما تعودت على هالمواقف عيشتها افضل بكثير منهم..على قد ما رحمتهم على قد ما كانت تبي تطلع من هالبيت بسرعه...
ابو سلطان ما زال في قمة هياجانه..ويصرخ ترك ام سلطان وراح للصاله ..للمطبخ ..صار يتحرك بجنون..بيكسر كل شي حوله..يبي يحول كل شي قدامه لدمار..
مدى تطالعه بقوه وهي سانده امها عليها..بس ما تقدر تسوي شي..
ثواني وانفتح الباب..دخل منه وهو يلهث من الركض..
:هـــو داخـــل؟؟؟
ابتسمت له مدى لانه المنقذ الوحيد: ايوه..الحمد لله انك جيت صاير بركان..
سلطان ابتسم يطمنها: قال لي واحد من العيال شفت ابوك رجع...وين البنات؟؟
مدى: بالغرفه مسكرين عليهم..
سلطان: انا بتصرف..
اخذ نفس عميق لان بيجيه من الضرب ما يكفيه بس لازم يتصرف...دخل على ابوه وهو واقف ويتنفس بسرعه..وحوله اغراض مكسره ومبعرثه..
شده بقوه:يبه تعال معاي..
ابو سلطان: اتركني يا الولد العاق..اتركــــني..
سلطان شد ابوه اكثر: تعال معاي بيــه تعـــــال..
ابو سلطان وهو يحاول يفلت منه ويدفه عنه: قلت لك اتركني يا حيوان ياxxxxxx..يا ابنxxxxxx..
سلطان سحبه بقوه بالقوه: خلينا نتفاهم برا..
ابو سلطان وهو يحاول يتحرر من سلطان..ضربه من جنبه..
سلطان تألم وخف شده على ابوه...
وعلى طول استغل ابوه المه وصار يضربه من كل مكان..
سلطان عرف لو ترك له المجال بيروح فيها فا مسك يد ابوه وثبتها بقوووه..وشده اقوى وحركه قدامه وهو يحاول يتجنب الضرب قدر الامكان..
سلطان: بعدوا....بعدوا...وسكروا الباب وراي...
مدى وام سلطان..بعدوا على طول لحد ما طلع سلطان بابوهم...وسكروا الباب...
تنفست مدى بعمق..وحطت يدها على راسها بتعب وهي تحاول تقوي نفسها عشان اللي حولها...
ام سلطان جلست على الارض بالصاله بتعب..
مدى: احم احم..بروح اقول لابتهال تطلع..
وهي تمشي تفكر بالاهانه اللي سواها ابوهم لهم..قالوا ان الابو سند وعز..بس هم ما شافوا منه الا الذل والهوان..
دقت الباب: ابتهال....ابتهال خلاص راح..
ابتهال بسرعه وقفت وفتحت الباب..وضمت اختها وهي تبكي..
مشاعل اشرت لمرام انهم يطلعون ويروحون بيوتهم..وفعلا طلعوا بسرعه..
بعــــد دقايق..
كان الهدوء مالي المكان..
مدى جالسه ترتب اوراق شغلها وتهلي نفسها..
ابتهال ضامه رجولها لصدرها وتحاول تمسك دمعتها..
ام سلطان اخذ عقلها التفكير" انا حرمه كبيره ويصير لي كذا...ما فكر بسني..ما فكر اني زوجته..ياريتك ترجع ابو سلطان الاول..حسبي على من كان السبب حسبي الله ونعم الوكيل"
بدر نايم على الارض ..
وداد تطالع الجرح بإيدها خلفته اصابع ابوها وامتلت عيونها دموع..
:ماما....شوفي بابا ايش سوى..."وقربت عند امها"
الثلاثه طالعوا الجرح العميق شوي..
ام سلطان..مسكت ايد بنتها وباستها وضمتها بحضنها الدافي..
ابتهال لفت على مدى والالم ياكل قلبها...
مدى طالعت ابتهال وكأن الشي عادي...ورجعت لاوراقها وهي ما تدري ايش مكتوب فيها...

%%%%%%%%%%%%%%%%%%%%%%%%%%%%%

فـــــــي المول..
لانا ومعاها شهد..طبعا التميز واضح عليهم..عباياتهم مثل بعض وكلها تلمع بالكرستال..وكل وحده مكتوب على عبايتها من ورا الدلع حقها"لاني..شوشو"..ومفتوحه من قدام..كاشفين والشعر نصه طالع..اكمام العبايه مرفوعه واليد مليانه اساور حلوه وملونه..
جمالهم تشهد به جميع العيون..صح لانا اجمل بكثيييير من شهد اللي جمالها ناعم مو جذاب مثل لانا..
وابتسامتهم البيضا تفتن كل القلوب..
لانا: شوفي هذولي من الصبح ورانا..
لفت شهد: ههههه مصدقين بنعطيهم وجه..
لانا بغرور: ولا واحد حلو..
شهد: وين اياد؟؟
لانا: اوه انتي قديمه..غيرته طلباته كثيره..
شهد:اها وانتي بدون شي الحين..؟
لانا بضحكه ماسخه:ههههه لا مستحيل...مو بس واحد الا كم واحد....وانتي؟؟
شهد: انا ما عندي احد كلهم تركتهم باخذ بريك..
لانا: ههههه حلوه بريك..
وجلسوا بكوفي على الكراسي اللي قدام المحل وهم عارفين انها مو للعائلات..
وكل العيون تطالعهم منهم المعجبه ومنها الناقده..ومنها العابره اللي ما همها تصرفاتهم المراهقه..
:اروح انا مع الدلع..
لانا لفت عليه:oh my god...انت شوفت روحك بالمرايه قبل لاتجي هههههه.
الولد: افااا...ما عجبناك...والحلو الثاني بعد ما عجبناه؟؟
شهد طالعت لانا يمعنى ايش اقول..لانا اشرت لها تطنشه..
ونفذت شهد الاوامر..
لانا بطفش: اليوم المول أي شي..
شهد:جايين بدري مره..
لانا: كله من دنو ما رضت تجي..
شهد: ليه؟؟
لانا بقهر: ما عندها هالحركات ولا تحبها..
شهد تنمت انها صادقت دانا بدال لانا..لكن تدري ان حياتها وسمعتها معلقه بيد لانا..ولا تقدر تعاندها.. ولا تفكر ترد لها طلب..

$$$$$$$$$$$$$$$$$$$$$$$$$$$$$$$$$$$$$$$$$$$$$$

سلطان اخذ ابوه على مكان بعيد شوي عند البيت وجلسه..
جلس ابوه بتعب بعد ما خلصت كل طاقته..وانسدح بالشارع..
طالعه سلطان بأسى..حس انه هو ابوه مو ولده..مسؤول عنه وعن تصرفاته..تعب من حال ابوه..ومن المشاكل اللي يسببها له..الناس كلها تتكلم عليهم..وسيرة ابوه على كل لسان.."آآآآآآآه"..تنهد بتعب..تمنى لو يقدر يغير شي..تمنى لو ان القدر كتب له حياة احسن..تمنى لو انه عايش مثل كل اللي بسنه عايشين الحياة بالطول والعرض..
زادت همومه هموم..وغير هذا فكرة ان اخته تصرف عليه وعلى اهله فكره ما يتقبلها أي رجال..ومسيطره عليه من لما توظفت بس ما لقى لها حــل..

##############################################

في الشوفت المســــائي..
دخلت مكتبه بفرح..
:استــاذ خالد...
خالد ابتسم لها اول مره تدخل عنده ولا وبعد مبتسمه <<عز الطلب..
اريام: استاذ خالد ابشرك..المريض سامي وافق على جلسات العلاج..
خالد اتسعت ابتسامته: هههههه كنت عارف انك قدها...مبروووك..وتستاهلي كل خير..
اريام بعفويه: قد ايش فرحت"وضمت ايدها لبعض" هههه ما توقعت اني انجح..
خالد قام من كرسيه وقرب منها: وربي تستاهلين كل خير..وانا كنت واثق فيك..
اريام:مشكور على الثقه تسلم..
خالد قرب اكثر: العفو...
اريام اختفت ابتسامتها وهي تحس بقربه..طالعت خالد بعيونها...حست ان في شي غلط..شي مو طبيعي..نظره مو عاديه..
:احم احم.....خلاص عن اذنك..قلت ابشرك وامشي..
خالد استوقفها: اريام......!
اريام لفت عليه: هلا..
خالد بتردد: آآآ...امممممم...خلاص خلاص روحي..
اريام ارتاحت انه ما تكلم وطلعت بسرعه..ودخلت مكتبها...
وهي تحس قلبها بيوقف...ايش كان يبي منها..ما ارتاحت له ابد..بس لو مو مسؤولها بالشغل..كان شافت له حل..

************************************************** ****************

ضاري بمكتب ابوه بالشركه..ويفتح درج وينبش اللي فيه..والثاني والثالث وراه..
والرابع والخامس بدون جدوا..
ضاري: لو كان عنده اوراق ولا شي وين ممكن تكون؟؟؟وين؟؟؟
حط يده على الطاوله وسند عليها راسه ..يريح شوي..من عرف السالفه وعقله مو راضي يهدا ولا دقيقه وحده..
رفع راسه فجأه: اكيد بمكتب البيت....اكيد..
وتحرك وطلع من الشركه..

&&&&&&&&&&&&&&&&&&&&&&&&&&&&&&&&&&&&&&

دخل ابو ضاري الصاله..حصل ام ضاري جالسه وجلس عندها..
ام ضاري بدون ما تطالعه: رجعت...؟؟
ابو ضاري:ايوه..
ام ضاري سكتت..وراحت بها الذكريات لكم سنه ورا..
}اخذت ابو ضاري عن حب ..بس عمره ما حبها..وعمره ما كنّ لها غير الاحترام والموده..كان حبه وحياته وقلبه كله لامرته الاولى السوريه..وكل تفكيرها انحصر بانه فضل الاجنبيه علي..تحولت وتبدلت مشاعرها من ناحيته...من بعد ما كانت تركض وراه..تركته بحاله..وتوقف قلبها عن النبض باسمه..قسى قلبها عليه..وصلت لدرجة الكره..صارت تشوف عيوبه..ما صار يملي عينها..تجبرت عليه بما انه حنين وطيب قلبه..بس عمره ما كان لها ولا كانت له..
كل واحد رضا بالقدر والنصيب..ومجبورين على بعض تحت اسم العشره والقرابه..
تزوجها غصب عنه..بعد غضب الجد عليه لانه ترك بنات العايله واخذ الاجنبيه..وبعد ما جابت زوجته ضاري..الموت اخذ عشقه وقلبه وروحه..رجع وحصل نفسه مخطوب لبنت عمه ومحدد زواجه ومجبور عليه وبدون أي اعتراض..ما حس بطعم السعاده ولا يوم من بعد موت زوجته..ولا شاف للفرح لمحه..بالعكس كل مالها تتحول حياته لجحيم مع ام ضاري...
ام ضاري فرض عليها الجد انها تمثل قدام العالم ان ضاري ولدها ويكون لقبها ام ضاري..صبت انتقامها على ضاري وابوه..وبدت تفكر في نفسها وبأنانيه..وتحول قلبها لصخر جلمود مستحيل يتصدع..مستحيل..{

قطع عليهم الصمت الرهيب بسة دانا...وهي تتلزق في ابو ضاري..
:هههههه وينها راعيتك..
لانا: لالي ..لالي ...وين راحت الدوبه؟؟
ام ضاري ابتسمت تحاول تنسى الماضي اللي يضعفها في بعض الاحيان..
:تعالي شوفيها..
جات لانا:لالي come..حاست لي الغرفه وهربت..
ضحكوا...نادر ما كان الابتسامه لها صدا في هالقصر الكبير...كل واحد عايش لحاله ومنعزل ولا يدري عن الثاني باي شي..
لانا حست ولاول مره بالسعاده...اول مره تشوف امها ابوها يضحكون مع بعض ..ابتسمت..كان ودها تبكي ما كانت تحس بالحنان الاسري..ما كانت تحس انهم عائله مترابطه..
ابوها لاهي بالشغل..وامها ما ذاقت منها حضن دافي دايم رسميه معاهم ودلالها بالفلوس بس...
جلست وهي تطالعهم وتتمنى لو اللحظه هذي تتحول لصوره وتثبت وتدوووووم..
دخلت لانا..
:هاي...الكل مجتمع"ولاحظت الابتسامات"
ابتسمت بداخلها بس عارفه انها مجرد لحظه وتختفي..
الكل: هايات...
دانا طالعت لانا وفهمت نظرتها اليائسه..
ابو ضاري: تعالي اجلسي وسولفي علينا..وين كنتي؟؟
لانا ابتسمت: كنت بالمول..
ام ضاري:ومن كان معاك..؟
لانا: شهد صاحبتي..
شوي دخلوا ضاري واريام..
اريام :السلام عليكم..
الكل : وعليكم السلام..
لفت اريام على ضاري تشوف ردة فعله على الجمعه هذي في غير وقت الاكل..
ضاري ما عطى نظرة اريام أي اهميه..ورمى نفسه على اقرب كنبه..
:الســلام..ايش عندكم مجتمعين..؟؟
ام ضاري رفعت حاجب: ليه حرام...؟؟
ضاري بابتسامه سخريه: لالا عادي حلال خذوا راحتكم..
حس بنظرات التوأم المعاتبه له..
ضاري:اوك..انا قايم ما راح اخرب عليكم الجو الاسري هه.."وراح"
اريام على انها عصبت من حركته...بس تدري ايش بداخله يحس انه غير مرغوب فيه ومنبوذ بينهم..
بعد ما راح ضاري سكت الكل..وتوتر الجو...
ابو ضاري: انا رايح انام تصبحون على خير..
عرفوا ان اللحظه خلاص اختفت..وتفرقوا كلهم.....

&&&&&&&&&&&&&&&&&&&&&&&&&&&&&&&&&&&&&&

في غرفة لانــــــا..
:يعني لازم يخرب علينا..
دانا: الله يهديه..
لانا: تصدقين بعض الاحيان احسه يكرهنا..
دانا: لااااانا...هذا اخوك عيب تقولي هالكلام..
لانا بتبرير: احساس مجرد احساس..
دانا:لا اكيد مو في محله..
"ما كان عندهم علم بانه مو من ام واب واحد ومحد يعرف الا ضاري و بس"

%%%%%%%%%%%%%%%%%%%%%%%%%%%%%

على فراش مدى كانت ابتهال منسدحه جنب مدى وحاضنتها..
ابتهال بهدوء: مـــدى..
مدى: هلا..
ابتهال: متى ابوي راح يتغير....؟
مدى سكتت..
ابتهال: تتوقعين في امل؟؟؟
مدى تنهدت: يمكن...ان شا الله....الله يهديه..
ابتهال عيونها دموع: مدى..احس ان ابوي ما يحبنا..
مدى بلعت غصه بحلقها..حاولت تتكلم..تبرر..تلاقي عذر..بس ما قدرت..
ابتهال: يعني انتي تحسين مثلي..؟
مدى: احم..لا اكيد انه يحبنا بس مو في وعيه..يعني ما قد صحا..
ابتهال: طيب تصبحين على خير..
مدى: وانتي من اهله..
ولفت على بدر ووداد اللي على نفس الفرشه اللي هم عليها ..غطتهم زين وباست كل واحد على عينه بحنان..وهي تتمنى ان النوم يتسلل لجفونها..