في بيت اشواق..
واقفه قدام المرايه وهي خجلانه من نفسها
: والله ما ادري ايش راح يقولون عني..
ردت عليها سجى بسرعه: يعني ايش بيقولون عنك..وربي تجنني..
اشواق: طيب شعري ما ارفعه شوي.. يعني اخليه كذا فيه شوية حركه..
سجى: لا خليه ناعم وطايح على وجهك..يا بنتي تجنني خليك واثقه..
اشواق رجعت تطالع نفسها وتحاول تتشجع وتواجه نفسها والكل لاول مره..
>>>>>>>>>>>>>>>>>>>>>>>>>>>>>>>>>>>>>>>>
مشاعل ومرام دخلوا القصر..
: وينهاه البنت !!
مرام: انتظري اتصل عليها " واتصلت" وينك يا الدوبا..خلاص اوكي .."وسكرت"
تقول جايه..
وشافوها من بعيد..
مشاعل تصفر لها: لالا انا على الجمال اصير لك شاورما يا شيخه..
ابتهال: هههه ربي يسلمك في عيونك يا حوبي..
مشاعل تسلم عليها: ومتواضعه ؟؟ لا انتي ناويه علي.
مرام: وه ..يا لبى مرت اخوي المستقبليه بسرعه فكري عشان نخطبك..كفايه تغلي عذبتي قلوب العذارى..
ابتهال استحت: هههه دوبا ..سلمي وانتي ساكته..
وجلسوا مع بعض..
مشاعل: وش عندها بنت عمك لانا..حاطه الزين كله..
ابتهال بعفويه: هههه فرحانه ماخذه الفستان مع سلطان ......."وسكتت"
شافت وجه مشاعل صد عن لانا بسرعه..
: قلتي ماخذته مع مين ؟؟؟
مشاعل حست نفسها جاها الصم..ما سمعت اسمه غصب عنها ولا حاولت تسمعه..
ابتهال ما عرفت كيف ترقعها: هي ما حصلت احد يرةح معاها ووو وسلطان ما رضى تروح مع السايق لو حدها ..
قاطعتها مشاعل بوقفتها: خلينا نروح نسلم عليها..واشوف الفستان من قريب مره عجبني.."وراحت عنهم"
مرام بهمس: ايش فيها؟؟
ابتهال وتأنيب الضمير اكل قلبها: ما ادري عنها..امشي معاي..
وراحوا كلهم لعند البنات..
مشاعل: هاي يا حلوين ..
دانا: هلا والله وغلا..مشاعل اشتقت لك والله..
مشاعل : وانا اكثر..
لانا من شافتها تغير لون وجها ومزاجها..
مشاعل وقفت قدامها: اهلين لنو..بصراحه فستانك لفتني..وحبيت اقولك انو مره ذوق..
لانا حاولت تبتسم لها: يسلموو كلك ذوق...بس مو من ذوقي هذا ذوق سلطان..
دانا لفت عليها منصدمه : لانا انتي اللي ..
لانا طالعت دانا وهي رافعه حاجب بمعنى "اسكتي "
مشاعل: ايوه عرفت..ملبس العافيه..سلطان قلبه طيب ويحب يساعد الناس..انا اكثر وحده اعرفه ومتربين مع بعض..
لانا ولعت: ايوه ..ولد عمي ما يقصر معانا الله يخليه لنا ولا يحرمنا منه..
ابتهال شافت الوضع تأزم: ههههههه كل هذا مدح بأخوي ههههههه ما توقعت فيه كل هالاشياء الجميله..
البنات ضحكوا ..الا لانا ومشاعل..
مشاعل المكسور قلبها والمجروح...ولانها عارفه انها تحلم بعيد..
لانا اللي قلقانه على حبها..مو متأكده من مشاعره..وخايفه انها تكون لمشاعل مو لها..
>>>>>>>>>>>>>>>>>>>>>>>>>>>>>>>>>>>>>>>
: قالت لي انتظرها ولسه ما شرفت ..ليه تأخرت كذا ؟؟؟
وشافت وحده تمشي جايه تدخل..طالعتها ولا ميزتها ..رجعت تطالع الباب تنتظرها..تنتظر اشواق قلبها..
وقفت قدامه وهي مبتسمه عرفت انها ما انتبهت لها.. ونغزت كتفها وغيرت صوتها : لو سمحتي..
دانا بدون ما تطالعها وتطالع موبايلها: هلا..
اشواق: كنت بسألك..
دانا وهي تدور رقم اشواق عشان تتصل عليها: تفضلي..
اشواق ما قدرت تكتم ضحكتها: تعرفين وحده اسمها دانا..
دانا لفت عليها وهي تتصل : دانا ايش؟؟؟
طالعت ملامحها..مو غريبه عليها بس !!.....بس !!!!!!!! وسمعت الموبايل يرن في شنطتها وبنفس النغمه..
سكرت السماعه ورجعت تطالع الواقفه قدامها كويس..وهي مطيره عيونها ..فستان قصير..وميك اب ..وشعرها على وجهها؟؟؟؟؟
: اشـــ ......اشواااااق ؟؟؟
اشواق تضحك بنعومه مصطنعه ومو لايقه: هههه ليه ما عرفتيني ؟؟
دانا رجعت كم خطوه ورى وهي حاطه ايدها على فمها منصدمه: اشوقه ..انتي...وهـ والله مو مصدقه "وراحت تحضنها بسرعه"
وربي طالعه تجنني..وربي خقه..
اشواق: ههه بس ما عرفت امشي بالشي هذا !! لازم البسه
دانا مسكت ايدها وخلتها تدور على نفسها: وربي البيت...وربي خقه..شي مو طبيعي..
اشواق: احم خلاص استحيت..
دانا مسكتها من ايدها : تعالي..تعالي معاي خلي البنات يشوفونك...
واخذتها للبنات..
دانا خبت اشواق وراها: بنات معاي مفاجأه لكم..حطوا ايديكم على قلوبكم بسرعه..
البنات يستهبلون وحطوا ايديهم..
دانا بعدت عن اشواق: ترااااا..مين هذي ؟؟
الكل طالعها شوي ...محد عرفها..
لانا بشك: فيصل اقصد اشواق ؟؟؟
رهام: الا اشواق..
ريماس: يا سبحان الله..
ابتهال نطت عندها: انتي اشوقه.؟؟
اشواق بصوتها العربجي: بنات بلا سخافه ههههههه
الكل مات ضحك.
لانا: يؤ باقي كثير..اهم شي الصوت..
رهام: بس والله تجنني..صايره دلوعه بزود..
ابتهال ضمتها: والله خقيت عندك..
دانا تبعد ابتهال: انتي ابعدي عنها..هذي لي ممنوع اللمس والاقتراب..حتى السلام ما راح تسلم عليكم..
جات مأثر: هاي صبايا..
اشواق ماتت ضحك: هذي الدلع ولا بلاها...
لانا: هههه زوجة اخوي اكيد دلع..
اشواق اختفت ابتسامتها: أي اخو؟؟
مأثر بدلعها الطبيعي: دوبب لا تصدقين..ماني زوجة احد..
دانا: مالك مفر يا قلبي لسطام للابد..أشوقه مامي تبيها لسطوم..
اشواق حاولت تبتسم بس واضح ان وجها قلب لونه: ايوه..الله يوفقها..
ابتهال لاحظت هالشي وبعدت عنها..
رهام طالعت مأثر واشواق..وحده تبيه ولا حصل لها..ووحده ما تبيه وحصل لها ..شوف القدر كيف مو قادر يحقق لآحد امانيه..
رهام : أشوقه..
اشواق لفت عليها : عيونها..
رهام: خليك كذا ..وربي احلى " وغمزت لها"
رهام اكتشفت ان ممكن سبب تغيرها يكون سطام..وخافت انها لما عرفت عن مأثر ترجع مثل ما كانت واسوأ..
دانا اخذت اشواق وجلسوا جنب بعض ودانا ما رفعت عينها من عليها..
اشواق تغير جوها :ايش فيك !! ما ودك تطالعين احد غيري ..
دانا: لا بس اسأل نفسي ليه التغير المفاجئ؟؟
اشواق ابتسمت بأسى: اول مره واخره مره..ما حسيت انو فيه شي مميز..
دانا: بالعكس انتي كذا على طبيعتك..خلاص لا ترجعي مثل اول مع اني احوب شكلك واموت بحركة شعرك واذوب على طريقة لبسك.. بس ضروري اقتنع انك انتي كذا احلى ..وانك مفروض تكوني كذا ..
اشواق: مافي شي يحدني اسوي هالشي ...وانا ما بعد اقتنعت فيه..
دانا: عشان نفسك اقتنعي..واحنا نسعى للتغير..
اشواق سكتت
منار بتردد: ريوم..
اريام: هلا ..
منار: متى ناويه ترجعين للمستشفى..؟؟
اريام: قريب..
منار انبسطت: جد !!
اريام تنهدت..وهي تحاول تتناسى انه مكان سامي.وانه بداية حبها ونهايته..
: ضروري ارجع..انا حياتي هناك..بالبيت مالي أي وجود..وبغير ذاك المكان ما راح ألاقي نفسي...مع ان فيه مليون عذر يردني عنه..بس راح ارجع ..
منار مسكت ايدها وشدت عليها : احب شجاعتك..اريام صدقيني لما تروحين هنام وتواجهين نفسك راح تتغيرين اشياء كثيره بوقت اسرع..
اريام تنهدت من قلب: وهذا اللي ابيه..سامي في قلبي مو بالمستشفى او بأي مكان ثاني..
>>>>>>>>>>>>>>>>>>>>>>>>>>>>>>>>>>>>>>>>>>>>
كان جوها غير..ما كانت مع احد ..ولا تبي احد..جالسه مع عمتها بين الحريم بس ما تدري في ايش قاعدين يحكون..ولا فكرت تسمع لهم..تفكيرها ما كان محصور في نقطه وحده..كان مترامي الاطراف..تحس نفسها لما توصل لنقطه ترجع لنفس الدوامه..حياتها..تغيرها..مشاعرها..ضياعها.. ضاري ..سطام ..حتى اخوانها..كل شي حولها ماخذها من جهه..ما تدري كيف تفكر ولا تعرف كيف تنسق افكارها..
لفت عليها لطيفه: ولا يا مدى ؟؟
مدى لفت على عمتها: سمي !!
لطيفه: شكل بالك مو معانا..صاير معاك شي ؟
مدى: والله يا عمه ما ادري ايش اقولك..بس ماني لاقيه نفسي احسب أحساس غريب..
لطيفه ما فهمت عليها: مثل ايش يعني ؟؟
مدى وهي تطالع بعيد والعبره خنقتها: والله انا ما فهمت عشان افهمك..كل اللي اعرفه ..اني ما اقدر اتحكم بنفسي ..احس في شي يمشيني على كيفه..ولا اقدر اسيطر على مشاعري ولا حركاتي ولا حتى تصرفاتي..
لطيفه مرره منصدمه: مدى...وش هالاحساس..ولا تعرفين من ايش؟؟
مدى: يا عمه لو اعرف قلت لك..شي يبعدني عن الناس وانا ابيهم..ابي زوجي واخواني واهلي..بس احصل نفسي بعيده عنهم..
لطيفه: بسم الله عليك الرحمن الرحيم..ياربي على بنت اخوي..ايش قاعد يصير لك..اخاف عين...خليني اخذك عند شيخ..
جات موضي وسمعت اخر كلمه " شيخ "
: شيخ وش شيخه..من اللي تعبان ..
لطيفه: بنت اخوي ..حتى انها امس طاحت عليكم..اخاف ناس حاسدينها على جملها ولا زوجها ولا اخلاقها..والله هالناس مالها امان..
موضي: بسم الله عليها ..ايش فيك صرتي توسوين البنت..خلي عنك بس بكره نروح الشرقيه ويتغير مزاجك..ابد لا تخافين..
لطيفه سكتت وهي تشوف مدى اقتعنت بكلام موضي...
>>>>>>>>>>>>>>>>>>>>>>>>>>>>>>>>>>>>>>>>>>>>
كملوا البنات الحلفه رقص ووناسه واستهبال وفعلا كان احلى بارتي مر عليهم ..الكل متعود على بعض والنفسيات مرتاحه..
وعلى اخر السهره..
باقي الناس القريبين من موضي وحمد..ويعتبر المكان مزحوم شوي ..وقررت موضي تزف ولدها ..
اريام جهزت سطام اللي لابس شماغ ولاول مره من وصل...ونادر ما يسويها..
وقف برى والدي جي استعد بالانوار والاغنيه..
ثواني وفتحوا الخدم البوابه والتصوير قدامه..وخدم واقفين عند البوابه يرمونه بالورد..
واشتغلت الاغنيه..محمد الزيلعي ..."المهلي"
مرحبا بقدوم خلّي
يوم جاني في محلّي
يـاهلا وآلفين سهلا
والمهلي مايولي
...................
يالله حيه وحي زوله
حيه في دربا مشا به
عيني وقلبي وفقوا له
ينثرو الورد لترابه
...................
مرحبا بالي نصاني
ومن غلاتي لي تعنا
اشهد انه من لفاني
اسفهل القلب وغنا
...................
سعدي يوم بشروني
انه بيجيني هنيا
الله لايحرم عيوني
شوفته في كل جيه
..................
كان مبتسم ابتسامه ساحره..وفاجئ الكل بطلته..نص القصر بنات واشتغل التصفير والتصفيق..والكل كان خاق عليه..شكله غير..وجماله غير..وسحره شي ثاني..
اول ما وصل لصدر المجلس سلم على امه وعمته وجلس بينهم ..وتجمعوا عليه خواته..
جابو كيكه حجمها مو طبيعي وعليها صورته..وعليها شموع ..الحفل كان روعه وكل شي فيه منسق ورااايق..
جلس الكل ..
سطام بدت عيونه تدور عليها..طول الوقت يدورها ولا حصلها ..واخيرا طاحت عينه عليها وهي تأكل الكيك لبدر مع ان خدامتين فوق راسها بس هي تبي تأكله ..وابتسم براحه حتى لو ما شاف وجهها بس على الاقل حس انها مستقره نفسيا..
اشواق كانت مركزه عليه ..عيونها ما كتانت على مأثر ولا حتى انتبه لها .. معناته انو ما لها بقلبه مكان..بس اكيد اذا امه اصرت عليه راح ياخذها عشانها..
قربت لعنده وكل همها ...انها تكسر كلمته اللي غيرت فيها كثير وبالنهايه حست انها ضيعت تفكيرها على الفاضي...
وقفت عنده..
: سوري المره اللي راحت ما قلت لك الحمد على السلامه..مع انها جات الحين متأخر..
سطام رفع عينه عليها ..واكيد ميزها بس بعد ايش : انتي كنتي ...
دانا وقفت جنبها وهي خايفه عليها يجيها كلمه منه تجرحها: ايوه هذي صديقتي اشواق..
سطام طالعها من فوووق لتحت: والله شي..سوري شكل خيالي صار محدود ..انا قلت لك ما اقدر اتخيلك بنوته ناعمه..بس فعلا لايق عليك..خليك كذا..عليك احلى..
اشواق ابتسمت غصب عنها..ما تدري ليه ..هو عشان ارضى غرور الانثى ولا عشان اعجبه..ولا هي كانت تستنى الجمله هذي..
سطام شاف ابتسامتها وعرف سر التغيير..حركات البنات من خلال خبرته الطويل هابدا ما تطوف عليه..
: ربي يسلم اللي خلاك تتغيرين عشانه..
اشواق فهمت النغزه: الحمد لله ما تغيرت عشان احد..قلبي فاضي..وما هو فاضي يدق لاحد..
سطام: اجل خليك مثلي..وعيشي حياتك..
اشواق رفعت حاجب ما توقعت التجاوب هذا ..يعني هو كان يبي يقولها انو قلبي فاضي كمان..ما تدري قال هالشي عشان يريحها..ولا عشان يعطيها مجال..
دانا حست نفسها ضاعت بينهم: اقول أشوقه..امشي نجلس تعبت من الوقفه..
رهام كانت تطالع اشواق..حسدتها على جرأتها ..بس يمكن فرصتها اكبر لسطام منها..هي مستحيل يلتفت لها وعارفه هالشي ومؤمنه فيه..
بعد ما طلع الكل دخل حمد..
وجلس معاهم شوي..
: اجل وين مدى ؟؟
ابتهال وقفت: لحظه بروح اناديها..
سطام شكر ابوه من كل قلبه..ما شافها الا من بعيد وكمان معطيته ظهرها..كيف يمر اليوم كذا بدونها..
مدى اخذت طرحه ولفتها وطلعت لهم.
حمد: تعالي وانا عمك جنبي..كيفك الحين عسى ما تعبتي؟؟
مدى ابتسمت لعمها ولآهتمامه: انا الحمد لله وبأهتمامك احسن ..
سطام فتح فمه فيها..عيونها سحر من كوكب ثاني..ما قد شاف مثلها..صح مبين انها تعبانه بس حتى تعبها رقيق ونااااعم..
سطام تمنى امنيه وقرر يحققها: مدى شفتي ولد عمك بالشماغ..
مدى من سمعت اسمها على لسانه دق قلبها ولفت عليه وهي ما تدري وش تقول..على انها ممكن تمدح احد ثاني بس مدحة سطام صعبه..
: والله لايق عليك..مخليك رزه..
سطام كانت امنيته توجه له كلام..وتحط عينها بعينه ..بس ما يدري ليه جاء على باله هالسؤال...
: احلى من رزة ضاري؟؟
الكل سكت ولف عليه مصدوم..
مدى على طاري يوقف قلبها..بس ليش هذا يقارن نفسه فيه؟؟
اريام حبت تغير الجو: ايش جاب لجاب ههههههه
لانا: سطوم خليك متواضع انت بالسبور تغطي عليه بس هو بالثوب محد يقدر ينافسه
سطام حس نفسه غبي بالمقارنه هذي..ليش يحط نفسه بالموقف هذا وقدام مدى..
مدى نزلت راسها ..وكل اللي تبيه الحين دخلة ضاري..بس تأخر وما دخل ..
ريماس شافت مدى..فيها شي متغير..وكأن روحها اللي تملي المكان طفت..ما تدري تنبسط على هالشي وتفرح فيه ولا يحزن قلبها ..
وبعد وقت...طلع الكل لبيته..
سطام وقف: قبل لا اطلع غرفتي..تبون الشرقيه بكره ولا بعده !!
اريام: انا اقول بكره بالليل..
لانا ودانا وابتهال : واحنا نفس الشي..
مدى ساكته..
حمد: متى قررت !!
سطام: سوري داد..بس صار كل شي فجأه..بس على العموم هي هديه مني ...خلي كذا شوي النفوس تصفى "وغمز له"
حمد فاهم حركته وما اعطاه وجه..
سطام: مامي موافقه مو..
موضي: هديتك وانا اقدر اردها ..
سطام بالاخير لف على مدى اللي انتظرها تتكلم كثير: ومدى ايش قلتي ؟؟
مدى: انا معاكم...عادي..
سطام فرح: حلووو..
ودخل سلطان..
: ايوه سلطان جيت في وقتك..بكره ناوين الشرقيه معانا مو؟؟
سلطان وهو يطالع الكل: خيانه مقررين بدوني..
سطام: وبمناسبه المنصب الجديد..
مدى : سلطون ترقيت ولا قلت لنا ؟؟
سلطان حط ايده ورى رقبته: ههههه والله انتوا حشرتوني..يا اقرر السفر يا اقول لكم الخبر..
ابتهال: هههههههه عاش مصرف..
سلطان: والله ما جاء الوقت اقول لكم..بس اني ترقيت ..
الكل بارك له وفرح له
مدى : انتظر هديتي لك..
سلطان: اهم شي انها هدبه على مستوى ههههه
مدى : ابشر..
لانا بجواة نفسها قررت تشري له هديه تعبر عن اللي بداخلها وقررت توضح له على الاقل بطريقه غير مباشره..
سطام: الكل اتفق انام مرتاح !!
سلطان: اوك انا معاكم..ما راح افوتها..
اريام: وضاري ؟؟
سطام تذكره وتنهد: خليه علي انا تفاهم معاه ...
"الفصــل الثاني"
رجعت البيت وهي حاسه بشعور غريب وجديد عليها..دخلت الغرفه وهي تتنفس براحه..رمت الشنطه على السرير من بعيد...ووقفت قدام المرايه وهي تطالع نفسها بأعجاب..
: وربي اني حلوه...ههههههه
اللوك الجديدغير نفسيتها وتغيرت مشاعرها بعد ما علق عليه سطام..ما توقعت فرحتها توصل للدرجه هذي..ما تخيلت انها كانت بس محتاجه منه الكلمه هذي..ولما قالعا قلبت حالها فوق تحت..
رمت حالها على السرير ورجولها نازله على اطرافه..وجابت شعرها القصر على وجهها والابتسامه ما فارقتها وتلعب فيه..شعرها هالمره حريري بعيد عن المثبتات وكان نادر ما يلامس وجها..كانت تكره الحركه هذي..لانها تحسسها بالانوثه او تحسها تناسب الدلوعات بس..وهي ما يليق عليها الا التسريحات الغريبه..ضحكت بصوت عالي على تفكيرها ولخطبت شعرها بطريقه عشوائيه وهي تتذكر شكل سطام..
:آه..لا من اليوم وطالع راح اخليه كذا على وجهي..
وفجأه فزت من سريرها وقعدت على حيلها تطالع دولابها..
: واتوقع اني من بكره راح ارمي هالملابس واشتري لي غيرهم..او اخلي سجى تشتري لي بدالهم..؟؟
"وابتسمت" سطام انت شي ثاني..انت خليت أشوقه مجنونه فيك..خليك مستعد لحبي لك..واكيد غصب عنك راح تحبني..
ضحكت على نفسها..لانها بدت تحس نفسها انجنت..ومن كثر الفرحه نامت بفستانها الناعم..اللي يوم يكون هو بداية مشوار سعادتها..
&&&&&&&&&&&&&&&&&&&&&&&&&&&&&&&&&&&&&&
وفي مكان ثاني..
تحس ان قلبها يتقطع من كثر تأنيب الضمير ياكل فيه..جاها بكل شوق وحب وكان واضح في عيونه..بس هي للاسف ما قدرت تبادله لو حتى ربع اللي كان يحسه او يبيه حتى منها..
مشاعرها غصب عنها ما قدرت تضبطها لآ إرادي منها ..مالت لآنسان غصب عن الكل يجذب اللي حوله وكانت فعلا وحده من ضحاياه..
جلس جنبها وهي ماحست فيه..طالعها كثير..حس ان فيها شي متغير.. بس ما بعد اكتشفه..مو هذي جانيت اللي يعرفها..
جود: حبيبي فيكي شي ؟
جانيت لفت عليه مخترعه: لا ....لا حبيبي مافي شي..
جود: حاس انو في شي شاغلك بالك..
جانيت حاولت تكون طبيعيه: نو حبيبي..بس الصغار كتير اشتقت اليهون..
جود بشك: اكيد هيك..!!
جانيت هزت راسها: أيه اكيد..
طالعت خطيبها جود..من ثلاث سنين مخطوبين..ويحبها ومخلص لها..تارك لها الحريه في حياتها..ولا وقفها لما فكرت تجي السعوديه بعد عرض ضاري عليها..
حست نفسها انها ماتستاهله لما فكرت لو حتى التفكير انها تخونه بمشاعرها ..انسان اعطاها بكل ما يقدر..ليش مو قادره لو حتى توفي له..حست انها اعطت نفسها مجال في ان مشاعرها تتغير عنه..مفروض تكون اكثر حزم من الناحيه هذي..شدت على ايده اكثر...وهي كلها اصرار..بأنها تمحي سلطان وبكل الاحاسيس اللي حستها معاه للابد..جود معاها واكيد بحبه راح ينسيها العالم كله..
: جود .انا بحبك كتير ..ما تتخلى عني شو ما صار اوكي !!
جود ابتسم لها بحب وهو حاس انو في شي بس موفاهمه..
: اكيد ما راح اتخلى عنك..انا إلك وبس..
&&&&&&&&&&&&&&&&&&&&&&&&&&&&&&&&&&&&&&
وبالقصــر..
ينتظره برى..ضروري يعرف عن نيتهم للسفر..وبداخله يدعي انه يعتذر وما يجي معاهم..
شاف سيارته الرنج دخلت القصر..ما يدري ليه من يشوفه يحس قلبه يشتعل..في شي غريب يتحرك بدااااخله..
ضاري منافسه بكل شي من لما كانوا صغار..حتى في اللي اختارها وحبها طلعت ملك لضاري..مو معقول القدر جمعهم في كل شي حتى البنت اللي حبوها..
شاف ضاري نزل من السياره وما كان منتبه له ولا متوقع وجوده..بس واضح عليه انه تعبااااان وماله خلق أي شي..
سطام بنفسه" انا كيف قارنت نفسي فيه..والله اني غبي..هو يعرف كيف يرز نفسه.."
بعد هالفكره عن راسه لان كل ما تذكر نظرة مدى وكأنها تقول له " ايش جاب لجاب !!"
راح لعنده وصوَت له : ضاري!!
ضاري اخر شي ممكن يتوقعه ان سطام ينتظره او يكلمه..
وقف وهو يشوف سطام جاي لعنده وواضح ان عنده كلام يبي يقوله..
سطام وهو حاط ايده بجيب التشيرت حقه لان الجو بارد شوي..
: تأخرت...وين كنت !!
ضاري اخذ نفس بصعوبه..ما يقدر يشيل نفسه من التعب وبدون نفس: ولي امري انت ؟؟
سطام بدون اهتمام: لا ...بس قلت غريبه..رجل نظامي وعملي ويحب شغله ويتأخر للوقت هذا "وطالع ساعته"
ضاري سكت وما رد عليه..
سطام: ايوه..كنت راح اقولك ان بكره راح نروح الشرقيه..
ضاري شده الموضوع: ومين مقترح الفكره؟
سطام طق صدره وهو مبتسم بفخر: انا سطام بن حمد..هديه مني للجميع..
ضاري ما تعجبه حركات سطام: ومن راح يروح ؟؟
سطام: الكل..
ضاري مشى وتركه..
سطام لحقه: طيب انت بتروح ولا؟؟
ضاري: بفكر..
سطام وقف: اوكي ...خذ راحتك يا ....يا اخوي..
ضاري تنهد بضمير ..سطام شغلته في الحياة بس يرفع ضغطه..
طلع غرفته اللي صارت بالنسبه له الجحيم ..ومن يدخلها يحس كل الغضب والعصبيه والقهر تتحمع في قلبه..وتضيق عليه الدنيا من كل جهه..
ورمى شماغه وعقاله وفك ازراره الاول...وجلس على الكنب وطلع سيقاره...
: الشرقيه !! والكل بيروح ؟؟...مدى لو راحت بتكون لوحدها ؟ اكيد ما راح يهدا لي بال وهي في مكان وانا بمكان..وخصوصا سطام الزفت موجود..
سند راسه على الكنب..فجأه تمنى امنيه محرومه..لكنه تمنى تتحق من كل قلبـــــــــه..
تمنى مدى موجوده جنبه وينام بحضنها..ويحكي لها عن تعبه ..يشكي لها عن اللي في داخله ومعذبه..عن قهره وألمه..بأحساسه الجريح والوحيد..ليه الدنيا في غيابها تخلا..وليه الكون بدونها ماله قيمه..وليش عيونه ما تشوف الا هي والباقي سواد ..ليه يحبها وتعذب قلبه..
نام في مكانه وهو ما حس بنفسه..
&&&&&&&&&&&&&&&&&&&&&&&&&&&&&&&&&&&&&&
اليوم الجديد..
الكل صحى من بدري ..وافطر ..الوضع تقريبا هادي والنفسيات مرتاحه..برجعة موضي البنات استقرت نفسياتهم حتى حمد..
ابتهال كان وضعها طبيعي وخصوصا ان موضي ما عاد صارت مثل اول حاطه العين عليها..بالعكس صارت تشوفها تضحك وتسولف مع بناتها وعادي..وهذا اكثر شي مطمنها ومريحها ..وتدعي انه دوووم مو يوم..
مدى ما شاركتهم الفطور بعذر انها تعبانه..وجلست برى في الغرفه الخارجيه مع اخوانها..
ضاري كان معاهم على الفطور كمالة عدد بس..وبعدها طلع وتوجه لخويه ورفقيه في وقت الشدايد مساعد..كان محتاج يحكي لآحد..وماله غيره بضيقه مثل هذي..
وبمكان هادي جالسين مع بعض..ضاري طلب له كوفي..ومساعد عصير...
مساعد صار له ساعه جالس قدامه وما تكلم معاه بحرف..وباله بعيد عنه.. ما تحمل الوضع اكثر..
: ضاري ....
ضاري لف عليه مخترع: نعم !!
مساعد: انت جايبني معاك في يوم اجازتي عشان اطالعك وانت تشرب في هالكوفي وتدخن السم اللي بأيدك؟؟
ضاري بعد عيونه عن مساعد: وايش فيها تفرح علي..صارت الفرجه والشماته هالايام موضه..
مساعد: انت تستهبل معاي..يا اخي مكتوب على جبينك هنا هموم الكون..ما ودك تتكلم عنها شوي..
ضاري يطالع كوب قهوته: وايش اقدر احكي لك وايش اللي اقدر اخبيه..انا يا مساعد احس ام كل طاقاتي انتهت ما عاد فيني اصارع الحياة..كل شي صار ضدي ومن كل جهه..
مساعد شايف هالشي ..ما يحتاج ضاري يتكلم عنه..يعرف ضاري انه قد المشاكل وكل الصعايب ومافي شي بالكون يهزه او يهده..بس هالمره شكل الضربه جات قويه عليه..
:تكلم ياخوك..ايش قاعد يصير لك؟؟
ضاري طلب قهوه جديده..ولف على مساعد..
: انت عارف برجعة سطام..وانت اكثر شخص عارف ايش معنى سطام يرجع وهالمره شكلها للابد.. عاد انت تخيل بخيالك الواسع ان امه الحين جات معاه..وكلهم ضجي حتى خواتي في صفهم ويشوفني غلطان..
مساعد: بس كل هذا مو جديد عليك ولا ؟؟
ضاري عارف ان مساعد فاهمه: ادري مو جديد..بس المشكله لا صار زواجي انقلب بعد فوق تحت..وهالمره كأني اشوفه ماله حل ..احس اني مربط...لما اجيبه يمين يروح مني شمال..ولما اجيبه شمال يروح مني يمين..
مساعد: معليش بتدخل في حياتك..بس الغلط من زوجتك ولا احد قاعد يضغط عليها..؟
ضاري: والله ماني عارف..هي جات من كل الجهات..
مساعد: وايش ناوي عليه..
ضاري: ناوري اروح الشرقيه معاهم..عسى يتعدل وضعي لما يتغير المكان والجو.. اتمنى النفسيات تتغير بعد..
مساعد: انت بس خليك اقوى من كذا..ومهما تعكر صفو حياتك صدقني بيرجع مثل ما كان بس انت اصبر وهدي نفسك وريحها ولا تتخيل الحياة سهله ..الحياة حربها صعبه لانك ما تعرف ايش مخبي لك بكره..فا انا اقولك خلي ايمانك قوي وتوكل على ربك..واصبر..وصدقني كل شي بيرجع مثل ما كان واحسن..وعلى اخوك سطام حتى هو مع الايام راح يتغير اكيد ما راح يظل سطام الطايش طول حياته..
ضاري: الله يسمع منك...مع اني اشك بالشي هذا..
مساعد ابتسم ابتسامه واسعه: الا على طاري الشرقيه ليش ما تعزمني معاك..بأجي انا وأهلي معاكم..
ضاري رد له الابتسامه: والله حياك..بالعكس ابيك معاي..واهلك راح ينبسطون معانا..لان كل العائله بتروح واكيد موضي بتاخذ اخوها..وعمتي دايما معانا..جيبهم خليهم يغيرون جو..
مساعد: احم..لا توضي حريص..جايبهم جايبهم الله لا يعوق بشر ..مشتاق للبحر..بأشكي له همومي "وغمز له وضحك"
ضاري رفع عليه كوب القهوه وهو يضحك: اتوقع ما قد جربت قهوه حار رايق على راسك..
مساعد: ههههههه لا والله ما قد جربته ..
>>>>>>>>>>>>>>>>>>>>>>>>>>>>>>>>>>>>>>>>>>>>
دخلت ابتهال عند مدى وشافت عندها اريام..
: بنات راح نروح سياره؟
اريام: ايوه صح بجد راح نروح بسياره ؟؟
مدى : السياره احلى ..راح نفلها ونغير جو..
اريام: ما سألنا صاحب الهديه..
ابتهال: أريوم خلينا نسأله عشان نستعد للرحله..
مدى: ههههههه ايش ناويه عليه..
ابتهال تلعب بحواجبها: سر..للمراهقات بس ههههههههه
مدى: ههههههه اهم شي انك معترفه ..
اريام: لحظه اتصل عليه ..."واتصلت"...الووو هلا سطوم..
سطام: يعني انا مو بالبيت عشان تتصلين بجوالك ؟؟
اريام: مستعجله وانا بالغرفه الخارجيه ما اقدر اتصل منها على غرفتك..
سطام: يعني عند مدى ؟؟
اريام : ايوه..بس كنت بسألك راح نروح سياره ولا ايش.؟؟
سطام:لحظه..انا نازل لكم الحين ..
اريام: طيب جاو......."وقفل بوجهها" ايش فيه هذا قفل بوجهي..
ابتهال: ايش قال لك؟؟
اريام: قال بيجي..
مدى اخترعت: هنا !!!
اريام: ايوه اكيد..
ثواني الا هو داق الباب وداخل..
: سلام..
الكل رد السلام..
سطام طالع مدى وهو يحاول يخفي ابتسامته الجانبيه..غصب عنه اذا شافها يبتسم..
: ما صبحت عليك...صباح الخير..
مدى حست ان وجها قلب احمر ما ودها هالشي يبان عليها: صباح النور..
اريام: وهـ فديت اخوي ذوق بسم الله عليه..
سطام يكشخ:عشان تعرفين اني انسان راقي بكل المقاييس واي بنت بالكون تتمناني..
ابتهال قربت جنبه: والله لو تشوف البنات امس يا سطام كيف خقوا عليك ان يكبر راسك..
سطام ضحك من قلب : ههههه لا تخافين متعود على هالشي..البنات دايم يلاحقوني هههههه
مدى فتحت فمها غصب عنها على ضحكته وغميزاته وابتسمت ابتسامه حلوه..
سطام طاحت عينه عليها وشاف ابتسامتها ونظرتها له ..وفجأه جلس جنبها ..
: اليوم راح نخلي مدى دلوعتنا بما انها مريضه تختار ...تبين نروح سياره..طياره..ولا قطار .."حط عينه بعينها"
مجى ما تدري ليه قلبها دق بقووووه..وحراره غريبه ملت جسمها قربه منها فضيع..مافي شي يفصلهم واللي اكثر من كذا مقرب وجه منها ..
اريام طالعت ابتهال ...وابتهال ردة لها النظره مستغربين حركته..
بس اقرب شي جاء في بالهم ولد طول حياته برى ايش يرجون منه ..اكيد ماخذ عاداتهم وطبايعهم..
مدى ميته من الاحراج وتحاول تبعد جسمها شوي عنه: والله على راحتك انت..
سطام بأصرار: لا ..انا ابي رايك انتي ..واللي يريحك انتي..
مدى: ما ادري بس انا احب السياره واحسها اكثر وناسه وناخذ راحتنا وخصوصا الشرقيه مو بعيده..
سطام طالع اريام وابتهال: اوكي سياره سياره..
اريام ما قدرت تتحمل اكثر..مسكت ايده وسحبته وسجلت مكانه جنب مدى : تعبت من الوقفه..
مدى نزلت راسها ...تفشلت من اريام..
سطام: شوف الحركه !! يعني عشانك كبيره راح امشيها لك ..
اريام: ههه طيب الحين تقدر تتفضل بقول لمدى شي خاص..
سطام وقف عند الباب: اليوم كرامتي صارت صفر ..بس معليش عشاني اليومين هذي كريم واعطيكم هدايا واسوي لكم مفاجأت راح اعدي لك كثير..بس اهم شي خلوا النفسيات اوكي..وتجهزوا عشان تطلع الرحله اوكي " وغمز لهم ونظرته كانت موجه لمدى "
وطلع وسكر الباب وراه..
اريام لفت على مدى بسرعه: اخوي لك عليه شوي..لا تدققين كثير..
مدى حاولت يكون الوضع عادي: لا عادي ..مقدره هالشي ...
ابتهال سكتت ولا هضمت الحركه ابد..
>>>>>>>>>>>>>>>>>>>>>>>>>>>>>>>>>>>>>>>>>>>
طلع من الغرفه ووقف عند بابها ورفع راسها للسماء وابتسم ابتسامه واسعه ...وحط ايده على قلبه اللي كان يدق بسرعه .."مجنون..انا عقلي فصل ..كيف قربت منها للدرجه هذي وقدام اريام واختها !!...سطوم المره الجايه انتبه لنفسك "
مشى كم خطوه وشاف ضاري واقف وتعابير وجهه ماليتها الصدمه..
ضاري بس اللي يبي يعرفه هو كان طالع من الغرفه ولا بس واقف جنبها !!!!!!
سطام بلع ريقه ومشى جنبه ولا كأن صار شي ..مع ان قلبه يدق خوف ..لانه فعلا مسوي شي غلط ..وهو معترف بهالشي بداخله.. ورافضه عقله ...
سطام تعدا ضاري..
ضاري مشى جنبه وبكل هدوء: لا تحاول...ولا تفكر انك تقرب للغرفه هذي...اتوقع مالك حاجه فيها..
سطام وقف ولف عليه وهو رافع حاجب: ليه يا اخ ضاري ؟؟ لا يكون في شي ببالك وجاي تحطه علي ؟؟
ضاري: افهمها مثل ماتبي..بس انا حذرتك.."ومشى وتركه"
سطام مات قهر: هذا اللي بيخرب مزاجي ...
وغير طريقه...وقرر يطلع بسيارته ويغير جو...
>>>>>>>>>>>>>>>>>>>>>>>>>>>>>>>>>>>>>>>>>>>>
على الساعه عشره بالليل...
تجمع الكل بالقصر...
البنات حماسهم واصل القمه..
رهام: وربي راح نفلها لما ندوخ..راح نعوض الايام اللي بتجي ...الاختبارات ما باقي عليها شي..
دانا: اهم شي التعويض..
لانا: صبايا اعلن الفله من اللحظه هذي..وما راح نترك ولا نبقي شي ماراح نسويه..
ابتهال: وأعلن من ناحيتي الهبال وعنوانه...وابشركم كل المهارات راح اطلعها..
رهام: ههههه يرحم امك الا مهاراتك ما نبي ننغث..
ريماس: انا عن نفسي بعوض كل الايام اللي راحت لان ما عندي شي اعوضه قدام..
مأثر مبسوطه معاهم بس ما علقت..
لفت عليها ابتهال: ودك تعلنين حالة طوارئ ولا شي نستعد له ..
مأثر: هههههه لا شكرا..بخلي مواهبي مدفونه..
دانا: اتمنى في يوم نشوفها|..
لانا: اهم شي خلينا نلحق عليها..
ومن جهه ثانيه......
اريام: انا متفائله بالرحله هذي..احسها راح تقرب البعيدين..
مدى ما فهمت قصدها: أي والله انا اتمنى هالشي عمي ومرت عمي محتاجين لها ..
اريام: نست نفسها الاخت..
مدى لسه صحت على وضعها حست انها نست نفسها بجد : انا ؟؟؟
اريام: ليه ما عندك مخطط تستغلين الفرصه فيه ..؟
مدى ارتبكت: الا ..بس اقصد ا نشا الله..
اريام لاحظت ان مدى وكأن عاجبها الوضع كذا ومرتاحه..لو كانت علاقتها مع ضاري قبل الهواش عاديه ممكن تسكت ..بس هم من لما رجعوا من شهر العسل وهم يجننوا وباين ان ايامهم كلها كانت حلوه...ليش مدى ما فكرت ترجع مثل ما كان !!
جاء سطام والخدم وراه بالشناط ينزلوها من الدور الثاني ..
: الكل موجود؟؟
دانا: يس الكل هون..
سطام: حلو.."دوره بعيونه" وين ضاري !! ولا ما راح يروح...
الا ضاري طالع له: وليه ما اروح..
البنات انبسطوا ..
اريام: راح ننبسط اكثر لما تكون معانا...
دانا: ضاري اخوي فديته الطلعه معاه دايما احلى..
لانا: وانا اشهد..
ريماس وقفت جنبه: ونقدر نستغني عنك..
مدى ماتت قهر..حست انها ولعت..ايش الوقاحه هذي !!
سطام شاف الصدمه بعيون مدى على حركة ريماس..ولف عليها
: ريمو...الطلعه معاك كذا "وأشر لها بأيده"
مدى ما تدري تفهم قصد سطام مثل ما هو واضح ولا تحاول ترقع له !!
ضاري طالع سطام ابدا مو ناوي خير..
جاء سلطان ودخل عليهم وهو بصعوبه يلاحق انفاسه: ان شا الله ما تأخرت ..ولا فاتني شي..
لطيفه: ابد ..ما فاتك شي ..اجلس بس خذ لك نفس..
سطام : سلطون..كويس انك جيت ودنا انك تاخذ الحلوين الكبار للمطار..واحنا راح ناخذها سياره..
سلطان: اوكي..يله يا شيابنا وعجايزنا على المطار..
موضي كشرت: عجايز!! عجايز بعينك..
لطيفه: هههه ما ودك تعترفين يا موضي..
حمد: طول عمرها 35 ما بعد كبرت ..
موضي وقفت: والله انا شاريه راحتي بأروح بالطياره..مو عشاني ما اقدر ..بما ان وحده ما ادري ايش تبي مقترحه هالاقتراح وولدي مصدقها في مل شي..
لانا: مامي...بالعكس مدى معاها حق السياره وناسه وخصوصا انها اول تجربه لنا..
ضاري طالع سطام ..وسطام بادله النظره مبتسم بخبث..
ضاري طنش نظرات سطام ولف على مدى..بقصد اذا كان سطام ما عليه شرهه بس انتي يا مدى !!
مدى نزلت راسها للارض..ما تقدر تحط عينها بعينه..
ضاري بس تخيل انه تركها تروح لحالها مع هذا الواقف جنبه كيف راح يهدا له باال؟؟؟
سلطان اخذ الحريم معاه ...موضي ولطيفه والحلام..واخوانه الصغار
وحمد وراهم مع السايق..
ما بقى بالبيت الا الشباب..ينتظرون سلطان ويمشون مع بعض...
بعد ساعه رجع سلطان..وشاف الجو هادي بين الكبار ..والبنات الصغار هم اللي عايشين حياتهم..
سطام وقف : نمشي...!!
البنات بحماس: يله..
وطلع الكل..
مدى سحبت شنطتها وراها...واخذت وحده كبيره لها وللصغار..ما حبت تكثر شناط..
وطلعوا للحديقه سطام مر من جنبها..
: اسحبها عنك..؟؟
مدى تجامل: لا عادي ...
سطام مد ايده لها: ولو ...كيف البنات الرقيقات يسحبوا وراهم الشناط..خلي هذي لراجالها..
ضاري كان واقف وراه: ورجالها هو انا ...مو انت ..
سطام اخترع وسحب ايده الممدوده : والله ما شفتك فازع ..
مدى ملت من هواشهم: انا اعرف اخذ شنطتي.."ومشت عنهم"
ضاري مشى وهو مبتسم: في ناس تحب تحشر عمرهاا..
سطام مشى وهو ساكت..
سلطان بعد ما ركب الشناط..
: مرت عمي كم خدامه بتاخذ ؟؟
اريام: هي قالت ثلاث..
سلطان: الله..ثلاث !! ما اراح يكفي الا ثنتين او وحده بعد.
سطام: ما عليكم خذو وحده بس..وهي ايش راح تسوي فيهم..
دانا: يا دوب ترى هذي امي..
سطام: هههه قولي ق واصدقك..طيب يا قمرات انا سيارتي ما تكفي الا ثنيتن او ثلاث...وسيارة سلطون ا ربعه..وفي ضاري..قسموا انفسكم..
لانا: احم..معليش اقترح اقتراح ؟؟
سطام: انا قلت لكم يومين تاخذون راحتكم فيها..تفضلي..
لانا: نبي الرنج من ضاري بس يسوقه سلطان ولد عمي..
دانا تكمل معاها: وضاري اخوي ياخذ سيارة سلطان ..يعني هو وزوجته ياخذون راحتهم..
سلطان: موافق ناخذ زوجتك الثانيه "وحط ايده على السياره"
ضاري طالع مدى ..
مدى حست ان قلبها انقبض..راح تركب مع ضاري وتكون جنبه من جديد !!! وخط 3 ساعات ؟؟؟؟؟
سطام ما يبي مدى تروح معاه: ولا اخذ سيارة السايق وضاري يجي معانا كمان..؟؟
مدى احتارت...صعبه وقدام الكل تختار البنات وتترك ضاري.. وبنفس الوقت سطام اعطاها الحل وريحها ...عذرها راح يكون البنات..
ضاري شاف تردد مدى ..رمى المفتاح على سلطان..
: انا راح اخذ سيارتك.."ومشى"
اريام دقتها بكوعها: فرصتك يا مدى ..روحي معاه..
لانا: ايش رايك فيني ضبطتك مو !!
سلطان طالعها ..بمعنى زوجك ينتظرك..
مدى ما تدري ليه راح نظرها لسطام..هو عشانه منقذها الوحيد.. بس حصلته يلعب بمفتاح سيارته ولا حاول يطالعها ..ما يقدر يسوي لها شي...
ابتهال: مدو..بلا حركات تغلي " ودفتها من وراها" روميو ينتظرك..
مدى بلعت ريقها وغصب عنها مشت لجهة سيارة سلطان اللي جالس فيها ضاري..
ودها تروح معاه..وقلبها بيموت على ما تكون جنبه ..بس من كثر ما تأذت من الاحساس الغريب اللي تحسه لما تكون جنبه كرهته او يتعبها قربه لدرجه فضيعه..
سطام وهو يشوفها راحت لعنده..صد عيونه عنهم..
: اللي يبي يجي معاي حياه الله..
ركبت ابتهال وداناولانا وريماس مع سلطان..
واريام ورهام اللي كانت قاصده ما تركب معاهم ومأثر مع سطام..
مدى واقفه عند الباب ..وفتحته بتردد ..طالعت المكان الفاضي ..شي غصب عنها يمنعها ودها تسكر الباب بقوه وتهرب..
بس اجبرت نفسها وركبت ..وسكرت الباب وهي شاده على اعصابها..تبي تجبر نفسها اكثر وتجرب..يمكن تقدر تتغلب على هالشعور وتتخلص منه..
ضاري رجع السياره على ورى بهدوء..وطلع من القصر..ولحقته السيارتين
مدى كانت متمسكه بالباب..وشعور الضيق يزاحمها..تحس وكأن السياره تتسكر عليها ..
ومسكوا طريق الشرقيه..
ضاري كان هادي ومستقر تقريبا الا من مخاوفه ..ويحاول قد ما يقدر يتفائل بأن الخطوه هذي ..هي الخطوه الاولى لرجعة مدى له مثل اول..
لف عليها..حس ان مدى مو مرتاحه معاه..وهذا الشي هو المخرب عليه هدوئه..
قرر يقطع الصمت الرهيب: كيف صحتك الحين ؟؟
مدى حاولت تهدا..اخذت علبة مويه موجوده بسيارة سلطان وشربت منها ..ما تقدر تتكلم..
: لا .......الحمد لله كويسه..
ضاري ما عجبه صوتها ولا ردها..متأكد ان فيها شي..صار كل شوي يطالعها ..يبي يشوف عيونها ..
مدى كان وجها للجهه الثانيه وبقوه ...ثواني فتحت الشباك تبي نفس..
ضاري: أرفع على درجة التكييف
مدى هزت راسها بلا..
ضاري: تبين شي ؟؟؟ محتاجه شي ؟؟
مدى رجعت تهز راسها بلا..
ضاري مات خوف عليها: مدى تكلمي فيك شي ؟؟؟
مدى اشرت بأيدها يوقف على جنب..جاها شعور انها بترجع..
ضاري على طول لف بقوه من جهة اقصى اليسار الى اقصى اليمين..ووقف..
مجى من وقف السياره نزلت وفتحت غطاها تبي تتنفس وترجع..
ضاري نزل من السياره بسرعه..ونزل لمستواها لانها جالسه على الارض..
حط ايده على ظهرها: ايش صار لك ؟؟؟
>>>>>>>>>>>>>>>>>>>>>>>>>>>>>>>>>>>>>>>>>>>>
وبجو ثاااااني..
سطام مشغل المسجل وكلها اغاني اجنبيه ورافع على الصوت ويستهبل ويرقص ..وحافظ الاغاني كلها..
اريام ميته ضحك على هباله..
رهام معاه على الخط وانواع الهبال...مأثر كانت ناقده جدا على حركاته.. وتتخيل ا ن اهلها بجد بجبرونها عليه..مستحيل..اكيد راح ترفضه بكل الطرق اللي تقدر عليها..
اريام تصارخ: طيب على الاقل هدي سرعتك..
سطام يستهبل: ايش ؟؟ اعلى اعلى ما اسمعك..
اريام صح تضحك بس خايفه: سطام بلا هبال والله سرعتك مجنونه..
سطام: انا قلت لك ما اسمع ..ارفعي صوتك..رهام مبسوطه ؟؟
رهام تصارخ: اكيـــــــــــد..
سطام لف على اريام: شوفتي رهام معاي بالمود..انتي ......."وفجأه خفض على الصوت وتغيرت ملامح وجه" اقول بنات مو هذي سيارة ضاري !!!
وبقوه لف واخذ جهة اليمين..
سلطان اللي كان وراهم..
: يا الحلوين مو هذي سيارات عيال عمي ؟
ابتهال: الا ..هذي سيارة سطام اللي لفت على اليمين..
دانا ولانا: ايش صار عليهم ؟؟؟
ريماس : لا يكون ضاري فيه شي ؟؟؟؟
>>>>>>>>>>>>>>>>>>>>>>>>>>>>>>>>>>>>>>>>>>>
مدى من حط ايده على ظهرها حست ان عروقها راح تطلع من مكانها ..
بعدتها بقوه وصرخت وكأنه مجنونه: لا تلمسني...لا تلمســــــــني..
ضاري مسك ايده..كانت ضربتها قويه..
مدى صرخت بوجهه: ما تفهم انت ... لا تقرب مني...
ضاري الثاني جن جنونه مسكها بقوه: انتي اللي انهبلتي.. ولا اكيد فصل مخك..
مدى بكت ودموعها سيل على خدودها: ضاري اتركني ...ضاري بليز لا تقرب مني .. ابعد عني ... ابعد انا اترجاااااك..
ما حسوا الا بشخص يدف ضاري بعييد: انت مجنون..ما تسمع ايش تقول لك؟؟ البنت تتألم وانت جدار ما تحس..
ضاري ما عاد يحس بنفسه ولا يشوف قدامه: سطام اطلع منها ...
شويه شافوا انوار سيارة سلطان واقفه ونازل منها بسرعه..
: خير ايش فيكم ..
ضاري بلهجه حاده: خذ اختك معاك..
سلطان ما فهم شي ..طالع مدى : فيك شي ؟
سطام بأستهزاء: اخذها عن المجنون هذا ..."وتركهم معصب"
سلطان طالع ضاري يبي منه اجابه بس ما اعطاها مجال لانه تركهم الثاني...وركب سيارته ومشى..
سلطان أشر لسطام يحرك سيارته ومدى بحضنه.
وسطام على طول انطلق..
وسلطان اخذ مدى لسيارته ..نزلت ابتهال ..خلت مدى تركب قدام مكانها ...ورجعت ورى مع البنات..
ابتهال: سلطان ايش فيها مدى ؟؟
سلطان وهو محتار ..ما هو عارف ايش قاعد يصير: ما ادري شكلها تعبت من جديد..
لانا: ايش فيها مدو ...كل يوم تطيح علينا مع ان والله اهتمينا فيها ..
دانا: يا قلبي عليها ...مدو..ايش تحسين فيه الحين؟؟
ريماس كانت منصدمه..معقول كل اللي في مدى الحين من السحر ...؟؟ ابد ما توقعت انه يأثر على صحتها كذا !! اكثر شي توقعته انهم يكرهون بعض وبس..بدون ما يتأذى احد..اليوم وجه ضاري ابد ما يدل على انه بخير..ومدى وكأن ملامحها اختفت اللون الاصفر طاغي عليها..
بلعت ريقها بخوف..ولآول مره تقلق على مدى ...
>>>>>>>>>>>>>>>>>>>>>>>>>>>>>>>>>>>>>>>>>>
بسيارة سطام..
اريام: ايش فيكم ؟؟ وايش فيها مدى ؟
سطام معصب وصوته عالي: اخوك هذا عقله صار ميح ..البنت تصرخ تبيه يفكها وهو ماسكها..
اريام رفعت نبرتها مع نبرته: طيب انت فهمني ايش فيها مدى اصلا..
سطام: انا ما ادري عن مدى... انا ادري عن اخوك المريض ما يفهم...
اريام: بس ما كان له داعي تدخل ..هو وزوجته يتصالحون..
سطام: انتي ما شفتيها كيف تصارخ بوجهه.. وهو مثل الابله.. وتبيني اقعد ساكت..
اريام سكتت وهي مو مقتنعه بالكلام اللي يقوله سطام ...ليه مدى تسوي هالحركات !!..شي مو طبيعي ..وانفعالها ابدا مو في محله..يعني مهما صار ما راح تصرخ بوجه ضاري..
رهام ما علقت ولا حاولت لانها شافت رجفة سطام من قوة العصبيه ..
مأثر خافت..اول مره تشوف اثنين يتهاوشون وغير ان الموقف بحد ذاته يطيح القلب..
بسيارة ضاري..
كان ماشي بكل بسرعته..ما يدري كم صارت..بس اهم شي ما في شي يوقف بطريقه..
لحد هنا وبس..كل شي ممكن يستوعبه ولا صراخها الغريب اللي صار قبل شوي..
لا مو هذي مدى ..هذي وحده ثانيه ..مو تكرهه الا ما تطيق وجوده.. مو معقول من لمسه منه تنهار.. من يقرب منها تصير مجنونه..لدرجه انها تترجاه يبعد عنها ؟؟ هذا شي ما يدخل أي عقل في الكون ..طيب ليه ؟؟؟ على الاقل احد يشرح له شي ... يفهمه ايش الحاصل ؟؟ مو معقول يكون مثل الابله ...بس يفهم وش يصير معاه ومعاها ؟؟؟؟؟؟؟؟
رجع شعره لورى .......
: مدى ...ما ادري من اللي فينا فقد عقله انا ولا انتي ؟؟؟؟
>>>>>>>>>>>>>>>>>>>>>>>>>>>>>>>>>>>>>>>>>>>>
تغير جو الكل ...وصار الوضع اشبه بالعزا...الكل ساكت وعايش بتفكيره وهمه..
لحد ما قضت اقل من اربع ساعات نكد وضيقه على الجميع ووصلوا للدمام بالسلامه..
راحوا للفندق على طول..اللي كانوا موجودين فيه الكبار..وواصلين فيه من زمان ومريحين..
ودخلوا على الحريم اللي كانوا جالسين بصالة سويت موضي الفاخر..والاغلى والاريح..
شافوا مدى ساندتها اريام..
لطيفه وقفت مخترعه: مدى !! بسم الله عليها ايش فيها.؟؟
اريام: تبعت شوي..
لطيفه اخذتها من اريام وجلستها جنبها وهي تمسح على شعرها
: بعد قلب عمتك ايش فيك؟؟
مدى تحاول تتكلم: مافي شي يا عمه ..شوي وبكون احسن..
لطيفه رفعت راسها على البنات : فهموني ايش فيها؟؟
ابتهال: ما ندري يا عمه..احنا ما فهمنا ...كانت مع ضاري بسيارته وفجأه واحنا بنص الطريق شفناهم واقفين على جنب..ورجعت لنا تعبانه..
لطيفه رجعت تطالع مدى وباستها على راسها: وربي عين ما صلت على النبي ..هالبنت فيها شي ..مو اول مره تتعب...
احلام: والله يمكن يا لطيفه..ما تسمعين حكي الناس عنها وعن ضاري..والله انهم سيره على كل ناس..وخصوصا ضاري من اللي ما تبيه لبنتها..
موضي طالعت ريماس وشافت وجهها متغير لونه ..
ونطت بالسالفه: أي عين ؟؟ واي خرابيط.. قال الدكتور شوية ارهاق..
لطيفه: ولو ..انا بأخذها عند شيخ سمعنا عنه كثير..
موضي: يا اريام خذي بنت عمك لغرفتها ولا غرفتك وخليها ترتاح بس ..وراح ترجع مثل اول واحسن..انتوا الله يعافيكم تحبون تكبرون المسائل ..
لطيفه: قران.. ما فيها شي لو قريت عليها ..ان نفع ما ضر..
جلسوا البنات مع الحريم ..والقلق ماكل قلبهم على مدى ..
اريام: مدى تبين غرفتك ولا غرفتي؟؟
مدى بسرعه: لا ...غرفتي لا ..
اريام: اوكي اوكي.. راح اخذك لغرفتي..
وسدحتها على السرير وغطتها وقعدت جنبها...
>>>>>>>>>>>>>>>>>>>>>>>>>>>>>>>>>>>>>>>>>>
سلطان تحت بالفندق مع سطام وضاري ..وحمد واخو موضي ابراهيم..
جلس جنب ضاري: ولد عمي..ايش صار لآختي ؟؟ والله وضعها ما يطمن كل يوم وهي بالمستشفى !!
ضاري بقلق واضح: لو اعرف قلت لك...انت اذا عرفت شي عنها قولي..
سطام تدخل: يمكن نفسيا تعبانه..وشوف ايش اللي تاعبها..
حمد: ايش فيكم ؟؟ من اللي تعبان !!
ضاري بسرعه: سلامتك يبه..محد تعبان .."وطالع سطام بدون نفس"
حمد طالع سطام يمكن يتكلم ..بس سطام ما حب السالفه تكبر وسكت..
سلطان ما عجبه حال اخته..بس ما قدر يستنتج ايش ممكن يكون فيها !!\