|$[ البآرت الاول الجزء الثاني ]$|
جالسه ليان فوق الكنبه تقرا في مجلة ازياء .. فنزلت المجله بطفش وقالت: وبعدين معاكم انتم ...
وكان قدامها لين واخوها حسام عمره 17 يلعبون بلاي استيشن وصراخهم واصل لآخر حدود الخليج ..
ليان بعصبيه: انا اتحجى مع الطوفه ولا شلون ..
ولا من مجيب .. مندمجين مع اللعب .. فرمت المجله وقالت: لين وصمخ .. انا احاجيك ..
لين وبصراخ: وااااااااااو قــــــــــــــــــــــــــــــووووول ...
حسام: لا غش انتي غشاشه ..
لين: ههههههه اعترف يا حبيبي انك خسران .. ارضخ للامر الواقع ..
ليان: ليــــــــــن .. انا من الصبح احاجيــــــــــــــــــك ..
لين: يا عيون لين .. شنو بغيتي ..
ليان: تستغبين انتي وويهج ...
لين: لا ..
حسام: ليان تعالي العبي معاي لأنج منتي غشاشه مثل بعض الاوادم ..
لين: اقول ليه ما تعترف انك خسرت ثلاثه واحد ها .. ليه ما تعترف ..
حسام: ليااان تعالي العبي ..
ليان: انا ماني فاضيه لخرابيط الاطفال هذي ..
حسام: بلاي استيشن بلاي استيشن اسمها مو خرابيط ..
ليان: لا بالله احلف .. وانتي يالين ليه ما تذاكري ..
لين: والله شفت اختي ماتذاكر فبطلت اذاكر ..
حسام بأعلى صوته: رااااائــــــــــــــد تعــــــــــــــاااااال ..
فجاء رائد وقال: هلا .. شنو بغيت ..
حسام: تعال العب معي ..
رائد: اوكي بشرط .. انا مابي كوره .. ابي سباق سيارات ..
حسام: لا الله يخليك العب كوره ..
رائد: لا انا ما اعرف للكوره اعرف للسيارات ..
حسام: اوكي مباراه وحده خلاص ..
رائد: مافي مشكله ..
فجلس يلعب فقالت لين: يا حبيبي يبي واحد يلعب معاه عشان يسترجع الخساره اللي خسرها ..
ليان: ليــــن خلاص خليهم .. وقومي ذاكري ..
لين: وليه ما تذاكري انتي ..
ليان: ذاكرت وخلصت .. يالله بلا حجي زايد وقومي ذاكري ..
لين: نفسي اعرف ليه مسويه انج انتي الكبيره مع اننا في نفس العمر ..
ليان: الكبر يا حبيبتي مو بالسن .. الكبر بالعقل يا ذكيه ..
لين: بالله يعني قلك انتي اعقل مني ..
ليان بصراخ: إيه اعقل منج .. لأن عقلج عقل اطفال .. لعب بلاي استيشن ومدري شنو .. وفوق هذا ليه اخذتي اليوم بطاقه اسيل ..
لين: إي بطاقه ..
ليان: بطاقة الشحن يا فالحه ..
لين: ما كنت ادري انها تزعل بسرعه ..
ليان: انتي قبل لا تاخذين بطاقة الشحن لازم تعرفين إذا البطاقه مهمه ولا لا .. افرضي الحين انها اخذت سلسالج .. وش بتسوين ..
لين بخوف: نعــــــــــــم .. واللــــه احفر قبرها جدامهــــــا .. ذا ذكرى من ماماتــــي ..
ليان: اها شفتي .. حتى هي ذي البطاقه كان اخوها فيصل يخاصمها عشان ما تشتريها واشتراها اخوها فارس .. شفتي كيف ..
لين: اكره فيصل ..
ليان: ذا مو حجينا ..
لين: طيب ماكنت ادري ..
ليان: إلا كانت تقول الا ذي البطاقه وانتي مانتي مهتمه .. يعني غلطانه ..
لين: طيب وش اسوي .. ماكان قصدي جذا ..
ليان: اتصلي عليها واعتذري عن حركتكي البايخه ..
لين: يا شيخه اسيل طيبه وبعد جم يوم تكلمني عادي ..
ليان: بس مهما يكن حسسيها انج رفيجتها صج ..
لين: يعني لازم ..
ليان بإصرار: إيه .. لازم ..
لين بقلة حيل: اوكي ..
اخذت جوالها ودقت ..
في ذا الوقت كانت اسيل منبطحه على السرير تذاكر لإختبار بكره .. فسمعت صوت جوالها يدق على نغمة "واحشني لسميه" .. فطالعت فيه بملل وقالت: مين ذا الفاضي اللي يتصل في العصر ..
فقالت بصراخ: مايكفي الانجليزي اللي جدامي مسببلي ازمه نفسه وجسديه وروحيه ..
فدخلت ريما ووقفت عالباب بملل وقالت بدلع: آووووف اسيــــــلووه .. سكتي موبايلج .. ماقدر اذاكر عدل ..
فتربعت اسيل على السرير وطالعت فيها بأستخفاف .. هي ناقصه ذي بعد فقالت: لااا .. بجد .. احلفي ان صوت موبايلي اذاج ..
تأففت ريما وقالت: اللهم صبرج ياروح .. ما تفهمن انتي .. اقولج موبايلج مزعجني .. يا ربييه ..
اسيل وشوي تعصب: لا بالله .. كيف اذاج وانتي بغرفه غير غرفتي ..
ريما رفعت عيونها فوق وقالت: غبيه ماتفهم ..
فعدلت خصله كانت على وجهها وقالت بدلع: انتي نسيتي ان غرفتي بجنب غرفتج يا فالحه .. وياللا ردي على موبايلج .. جالس يدق للمره الثانيه ..
اسيل بإستهزاء: جالس ههههه حسبته نايم ..
ريما بسخريه: ها ها ها بايخه .. والمره الجايه غيري نغمة جوالج وخليها هاديه مو الازعاج ذا ..
اسيل: كيفي .. انا اعشق الاغاني المصريه واللبنانيه واعشق الرجه .. احط اللي عايبني ..
ريما تنهي الموضوع: الحجي معاج مامنه فايده .. اطلع ازين لي ..
اسيل: وياليت تاخذين الباب وراج ..
ريما بدلع: من عيوني ..
اسيل استغربت معقول ريما تسمع الكلام .. يمكن تغيرت فقالت: شكرا ..
ريما: العفو ..
وارسلتلها بوسه عالهوا وخرجت لكن من دون ما تقفل الباب ..
اسيل بعصبيه: ذي مستحيل تتغير ..
وسمعت ضحكة ريما اللي ماليه المكان ..
ولفت ناحية جوالها اللي يدق للمره الثالثه .. فأخذته وكان مكتوب عالشاشه " آلمرچوچـہ يتصل بك " ضحكت وقالت: وش تبي لين اللحين .. اكيد مذاكرة الانجليزي معقدتها زي ماهي معقدتني ..
ولمن جت بترد تذكرت سالفة البطاقه فقالت بعصبيه: لها ويه عشان تتصل .. اكيد اللحين تدقها سوالف ولا كأن شي سار .. لانها بلا شعور ..
ترددت ترد ولا لا .. في النهايه قالت ارد وش بخسر خليني افتك شوي من غثا الانجليزي ..
وردت ..
لين بفرج: واخيــــــــــــراا ..
اسيل بجفاء: خيــر وش تبين ..؟!
لين بابتسامه: اسيــــل .. من يدج انتي زعلانه .. خلاص انا اسفه .. ياللا ماصار شي ..
اسيل في نفسها: معقوله داقه تعتذر .. ياحليلها وانا ضنيتها بلا شعور ..
فقالت: نعــم .. تعتذرين .. واللي سويتيه شي سهل ..
لين: اسيييييل .. خلاص خلي قلبج ابيض ..
اسيل بعناد: لااااا ..
لين: ياللا وغلاتي عندج .. هذا إن كان لي عندج غلا ..
اسيل ضحكت بقلبها ترحمها ولا لا .. بس قررت تستمتع شوي معاها .. فقالت: إذا عندج شي مهم قوليه انا وراي مذاكره ..
لين: الله يالمذاكره اللي بتقطعين نفسج عليها .. تراه انجليزي وانا اعرف انج ولا شي في الانجليزي .. تذاكري كيف ..
اسيل: يعني ماعندج شي مهم اقفل ..
لين بسرعه: لا لا اسيل واللي يخليج لا تقفلي ابيج ..
اسيل: بسرعه اخلصي علي ..
لين بدلع: إذا ماكان في قلبج مكان للين عشان تسامحينها .. اكيد في قلبج مكان لليوني رفيجة عمرج وحياتج كلها وسامحيني ..
فضحكت اسيل بصوت عالي: هههههههههههههه الله يقطع ابليسج ..
لين بفرح: يعني رضيتي ..؟!
اسيل: إيه إيه راضيه من اول ههههههههه ..
لين بقهر: يالملعونه وحيوانه وزفته ..
اسيل: ههههه اقول انتي وش مسويه اللحين ..؟!
لين: ترى حأرد لج الحركه لا تنسين .. المهم ياطويلة العمر كنت العب مع حسام كوره ..
فقالت بحماس: وفزت عليه ثلاث واحد .. طبعها محد يجاريني في الكوره ..
اسيل: اشك انج ولــد ..
لين: ياشيخه كنت مستمتعه بس الله يهداها ليان خربت علي وقومتني عشان اذاكر ..
اسيل: هههههه اختج صارمه .. يالله ورانا الزفت السيد انجليزي قومي ذاكري ..
لين: مابي .. اكره الانجليزي .. تصدقين ودي اكون مثل ندى اتكلم انجليزي ..
اسيل: إيه والله ماشاء الله عليها شاطره فيه ..
فسكتوا فتره فقالت لين: اقول اسيل تتوقعين مثل اللي ببالي ..
اسيل: يمكن .. لأن شطاره جذا مستحيل تصير ..
لين: هو واحد من ثلاثه ..
1_ إما يكون فيها عرق اجنبي وعشان جذا فاهمه انجليزي .. او ..
2_ يمكن لها مدرس خصوصي او مدرسه خصوصيه .. او ..
فقالوا اسيل ولين مع بعض: تغــــــــش ..
اسيل: إيه فعلا مافي غيرها ..
لين: اكيد ولا كيف تجيب درجات عاليه فيها ..
اسيل: افا ماتوقعتها تغش وما تقولنا نغش معاها ..
لين: اسيل لا يكون مفكره تغشي ..
اسيل ببلاهه: امممم لا مو قصدي جذي ..
لين بجديه: اسيــــــــل ..!!!
اسيل بسرعه: لا لا ما بغش ..
لين بإرتياح: ووه حسبتج بتغشي وما تقوليلي عشان اشاركج ..
اسيل: ؟؟؟؟؟؟؟؟؟
لمن ماسمعت لين رد قالت: اقول اسيل لايكون متي وإحنا باجي ما كشفنا ندى على حقيقتها ..
اسيل بصراخ: بسم الله علي .. يعل يومج قبل يومي ..
لين بعصبيه: لا لا لا انتبهي لاينفجر فيج عرج ..
اسيل بإستهزاء: لا بسم الله علي .. انتبهي على عروقج انتي لا تتفجر ..
لين: لااا احلفي .. الحمد لله عروجي ماتنفجر .. عندها مضــــاد ..
اسيل: هههه مضاد حيوي ولا شنو ..
لين بسخريه: ها ها ها بايخه .. باي رصيدي خلص على وحده ما تستاهل ..
اسيل بسخريه اكثر منها: اوكي اوكي بسكر .. اخاف بعدين شحادة الاشارات ماتلقى فلوس تشحن ..
لين بعصبيه: شحاده بعينج ..
اسيل: هههه بااي ..
وقفلوا .. فقامت لين وطلعت فقابلتها أختها ليان وقالت: ها تصالحتوا ..
لفت لين عليها وقالت: إيــــه .. وابشرج .. تزاعلنا اكثر بعدهــا ..
وطلعت بدون نقاش .. فطالعت فيها ليان وقالت: ياليتها مادقت ..
ونزلت ..
================================================== ==========
.. في قصر سامي الراهي ..
سامي: لا ريان ما يصير جذي ..
ريان: والله وش اسوي الاهل مصرين نقعد ..
سامي: ماصار ذا عزا ياخي ..
ريان: ههههه الله يهداك ياسامي كله يومين وتقول ماصار ذا عزا ..
سامي: انا اشك ان اللي مات ابوك مو يدك ..
ريان: سامي .. وش فيك .. اشتقت لي يعني ..
سامي: طبعا .. طفشت من اصحابك الهبل ..
ريان: هههه تراهم اصحابك مثل ماهم اصحابي .. الا يا سامي قد إيش اشتقت لي ..؟!
سامي في نفسه: "هذا يتميلح ولا شنو" ..؟!
سامي: اوكي اقولك قد إيش اشتقت لك .. شفت العالم ..
ريان بحماس: إيه ...
سامي: العالم ياصديقي يوجد فيه كره ارضيه وهي الارض .. وهذه الارض يوجد عليها عدت بحار ومحيطات وجزر .. والجزر توجد على متنها ياطويل العمر الكثير من الكائنات الحيه من حيوان وانسان ونبات .. والحيوانات تنقسم الى نصفين حيوانات وحشرات .. اسمع يا ريان .. انا اشتقت لك قد اصغر حشره من هذي الحشرات ..
فعصب سامي وكمل: عشان المره اليايه ما تتميلح جدامي وتسوي فيها انك مهم زياده حبتين .. اوكي ..
ريان: اقول انا الغلطان اللي حجيت معك ..
سامي: إيه غلطان .. ورجاء اقعد عندك اسبوع مو يوم .. باااااي ..
ريان: اقعد شهر من زينكم عشان استعيل ارجعلكم بااي ..
وقفل سامي وقال: اهبل .. يخفف دمه مع انه اثقل من كاتشب جامد ..
ورمي الجوال على كنبه الصوفا الطويله ..
سامي: يا الله ليه عصبت مو انا اتصلت عشان احجي معه عن سالفة رسالة غيدا .. بكيفه هو اللي يرفع الضغط ..
وقام وتسدح على الصوفا واخذ جواله وفتح يطالع في الرساله وهو مايدري كم مره قراها .. فضحك وقال: ما ادري وش فيني لمن اقرى الرساله اضحك .. يمكن لأنها اول مره بنت تهددني واحس بإستمتاع ..
فقرى الرساله وكان نصها :
(( سامو عيوني ترى انا راجعتلك للجامعه وحنشوف من هو اللي بيضحك في النهايه .. ولا تنسى ترى انا غيــــــــــــــــــــدا مو إي حد وجلمتي ما تنعاد ولا تنكسر ))
سامي: هههههههههه خلينا نشوف مين بيضحك من جد يا .. يا غيــــــــــدا ههههه تخطي وتحملني المسؤليه وتهددني على غلطها .. بكيفها وانا وش هامني ..
فسكت يقلب في الجوال وقال: يوووه نفسي اقابلها سنه ونص ماشفتها .. هههه والله ودي احجي مع ريان عنها .. بس احنا متخاصمين قبل مانقفل يعني مايصير ادق عليه .. خلاص ادق على يزيد .. اوووه حتى ذا تخاصمت معاه على سالفة اروى وصالح بعد زعلان مني لأني قلت له صلوح ..
ريندا: يوووه ياسيد سامي .. جميع اصحابك متخاصم معهم ..
لف سامي وجهه عليها وقال: ريندا .. انتي امن متى هني ..؟!
ريندا: من فتره ليست بالطويله .. سيد سامي اتريد شيئا ما ..؟!
سامي: لا شكرا مابي شي ..
ريندا: امتأكد ..؟!
سامي: إيه ..
ريندا: حسننا ..
سامي بسرعه: ريندا ..!!
فلفت ريندا وقالت: نعم ..
فتربع سامي عالكنبه وقال بالفصحى: هنالك سؤال يتبادر إلى ذهني دائما اريد ان اسألك إياه ..
ريندا: تفضل ..
سامي: انتي ليه تتحجين لغه عربيه فصحى ..؟!
ريندا: انسيت اني تركية الاصل .. فمن الطبيعي ان اتحدث الفصحى ..
سامي: بس انتي عندنا من 10 سنوات .. معقوله ما تعلمتي لهجتنا وانا اربع وعشرين ساعه اتحجى معج ..
فإبتسمت ريندا وجلست على كنبه مستقله وقالت: بلى .. منذ ان اتيت كنت انت في 11 من عمرك .. وانا كنت آناذاك في السابعة عشر من عمري .. عندما كنت تتحدث انت بلهجتك.. كنت انا اغار لأنك تتحدث بها .. فكنت كل ليله اقف امام المرآه واحاول تقليد لهجتك ..
سامي بحماس: وقدرتي ..؟!
ريندا: يعني .. حاولت وحاولت .. لكني لم استطع .. فكنت انا اسجل صوتك عندما تذاكر كي اتعلم ..
سامي: يا نصابه ..
فضحكت ريندا وقالت: آسفه على هذا العمل .. ولكني كنت مراهقه أنذاك وافعل إي شي لأصل الى طموحي .. اجل لقد كانت محاولة تعلم تلك اللهجه هي اقصى طموحي في ذلك الوقت .. وبعد مرور حوالي شهر كامل .. اتقنت التحدث بها ..
سامي بحماس: يعني صرتي تتحجي مثلي ..
ريندا: ههههه ما هذا الحماس ياسيد سامي .. لقد نسيتها الآن .. فلقد مر على ذلك الوقت عشر سنوات ..
سامي بإصرار: لا لا اكيد مانسيتيها .. يالله تحجي جدامي .. امانه ..
ريندا: لقد قلت ياسيد سامي اني نسيتها .. صدقني ..
سامي: مو علينا .. انتي مجابلتني اربع وستين ساعه .. وتسمعين حجيي دايما .. يعني مستحيل تكونين نسيتيها .. ياللا تحجي ..
ريندا: هههه اربع وستون .. هل اصابتك ضربة شمس ..
سامي: لا تحاولي تغيري الموضوع ..
ابتسمت وقالت: سيد سامي .. قوانين عملي لا تسمح لي بأن اتحدث سوى الفصحى .. وإلا سيعاقبني المدير المختص بإدارة شؤون المنزل ..
سامي: يووووه قصدج مرادوه .. هذا مسافر مع ابوي ولا يدري عنج ..
ريندا: آسفه ياسيد سامي ..
سامي: جم مره اقولج لا تقولين سيد .. انا ما احب ذي الكلمه ..
فوقفت وقالت: آسفه انها قوانين عملي ويجب الالتزام بها .. هل تريد إي خدمه اخرى ياسيدي ..؟!
فأنسدح سامي عالكنبه واخذ جواله وقال: لا .. وهذي اخر كلمه بيني وبينج .. لا تتحجي معي مره ثانيه ..
فضحكت وراحت .. فطالع سامي فيها لمن راحت فقال بصوت منخفض: قوانين قوانين .. احس نفسي في بيوت اوروبا مو الخليج .. وإذا يدي كان اوروبي .. لازم ابوي يسوي في قصره قوانين مثل بلاد اوروبا .. اوووووف ..
فقعد يضغط في جواله بحقد وقوه ..
ويتمنى لو انه يعيش مثل إي واحد .. يعيش عيشه بعيده عن هذا المحيط اللي عايش فيه .. محيط القوانين والاستقراطيه .. فبعض الاحيان يحسد اصحابه على عيشتهم .. فإيش هي فايدة الفلوس إذا ما كان فيه حنان اوحريه ..
فدق جوال سامي .. فرفع سامي راسه وطالع في الجوال وكان مكتوب ''نصف الدائره يتصل بك"
فلف وجهه وقال: ريان .. هو انا ناقص ..
وبعدين اخذ الجوال وقال: الو ..
ريان: سااامي .. هلا والله .. كيفك ..؟!
سامي بهدوء: بخير ..
ريان: افاا لا يكون زعلت .. سامو انا كنت امزح هيا بلا دلع بنات ..
سامي: لا عادي ما زعلت ..
ريان: طيب وش فيه صوتك متغير .. اها عرفت .. انت مزكم .. مبروووووك ..
سامي بعصبيه: مبروك بعينك .. انا ماني مزكم .. وإذا كنت مزكم ليه تباركلي ..
ريان: ههههههه تصدق اني ما ادري ليه باركتلك ..
سامي: تستهبل ولا إيش ...
ريان: والله اني ما استهبل .. بس انت في البيت ..
سامي: إيه في البيت .. يعني اطلع مع مين مثلا ..
ريان: تطلع مع يزيد او صالح او عماد ..
سامي: متخاصم معاهم ..
ريان بدهشه: كلهم ..؟؟؟!!
سامي: إيه .. صالح لأني قلت له صلوح فعصب وماراضيته .. ويزيد لأني استهزأت عليه مع بنت فعصب وماراضيته .. وعماد ما تزاعلت معاه بس هو قال انه بيحضر حفلة بنت اخته المولوده .. يعني ماكو احد اطلع معاه ..
ريان: طيب افتح لي الباب استناك ..
سامي ببلاهه: هاا ....
ريان: ههههه إيش فيك .. انا عند الباب افتح ..
سامي: كيف يعني ..؟!
ريان: يعني جذي ..
ودق الجرس .. فطالع سامي في الباب .. ففتحت ريندا الباب وقالت: إي خدمه ..
ريان: انا من ربع سامي .. ممكن ادخل ..
ريندا: انتضر دقيقه ..
فقفل سامي الجوال وجاء عند الباب وقال: الله يلعن شكلك .. مو انت تقول انك بتقعد ثلاث ايام كمان ..
فراحت ريندا فقال ريان: هههه انا قلت الاهل بيقعدوا ماقلت انا ..
سامي: وغريبه .. يعني جيت لوحدك ..
ريان: لا جيت انا واختي عشان الدراسه ..
سامي بصدمه: عندك اخت ..
ريان: إيوه .. رشا في الثانوي ..
سامي: ما كنت ادري ..
ريان: احسن انك ماكنت تدري ياشيخ .. انا خايف على اختي ..
فضربه سامي بمزح على كتفه وقال: الله يخسك .. مهما كان انت رفيجي ومستحيل اشبك اختك ..
فتنهد وقال: الحمد لله ريحتني ..
سامي بعصبيه: لا بالله .. احلف ..
ريان: ههههههه امزح شفيك .. ياللا تعال تخرج معاي ..
سامي: اوكي بس ببدل هدومي واجي ..
ريان: خلاص انتضرك في السياره ..
فطلع سامي وبدل ملابسه ونزل وركب مع ريان وقال: ها تأخرت ..
ريان: يعني مو مره ..
سامي: لا ياشيخ .. اقول حرك حرك ..
ريان: طيب ..
فحس سامي انه في احد ورى .. فلف ولقى بنت جالسه وتطالع في الشباك سرحانه ..
سامي بهدوء: ريان مين ذي ..
فعلا صوته وقال: لا يكون اعرست في ذي اليومين وما قلت لي ..
ريان: ههههههه ذي اختي يا سامي إيش فيك .. زوجتاني وانا لسى صغير على الهم ..
لف سامي على ورى وقال بإستغراب: ذي اختك رشا ..
ريان: إيه .. ليه وش فيه ..
سامي: لا بس ما تشبهلك ..
ريان: ليه انا احلى ..
سامي بهدوء: ريان إيش فيها سرحانه ..
ريان: متضايقه .. لانها اكثر وحده فينا كانت تحب يدها ..
سامي: أهاا .. كيفج رشا ..
فصحيت رشا من سرحانها وابتسمت بهدوء وقالت: بخير ..
سامي: انا سامي رفيج ريان ..
رشا: إيه عارفه .. ريان قال انه بياخذ صاحبه في طريجه .. كيفك انت ..
سامي: الحمد لله .. بخير ..
فوقف ريان السياره ولف على سامي وقال: انتضرني لحضه .. بنزل اختي واجي ..
سامي: نعــــم .!! بتخلي اختك لحالها في البيت ..
ابتسم ريان وقال: وش رايك تقعد عندها إذا كنت خايف عليها ..
ففتح سامي عيونه بصدمه وقال: ريــــــــــان انت من جدك تتحجى ..
فضحك ريان وقال: امزح ياخي امزح .. شوف البيت .. هذا بيتنا ..
فطالع سامي من الشباك وقال: لا .. مو هو .. بيتكم اكبر شوي ..
ريان: هذا البيت بيت اختي الكبيره رنا .. بحطها عند اختها .. لأنها محتاجه احد يهديها ..
فتنهد سامي وقال: ووووه .. خوفتني ..
ريان: ليه .. تحسبني بايع اختي عشان اخليها لحالها في البيت ..
سامي: والله ما ادري ..
ريان: هههههه اوكي انتضرني لحضه ..
فلف على اخته: رشا حبيبتي انزلي ..
رشا: طيب ..
فنزل هو واخته .. وماهي إلا سبع دقايق وجاء ريان وركب ..
سامي: اقول ريان .. اليوم إيش ..؟!
ريان: هههه اليوم السبت يا ياهل .. مو انا اتصل عليك يوم الخميس وقلت اني سافرت ..
سامي: إيوه صح صح ..
فحرك ريان السياره وقال: اليوم كانت المحاضرات مهمه ولا لا ..؟!
سامي: عاديه جدا .. اقول تصدق ان الدكتور هشام دكتور الانجليزي بغى يطردني ..
ريان: ههههه ياليته طردك ياخي .. انت مطلع الشيب في راسه ..
سامي بحماس: بس في بنتين خقه ساعدوني ..
ريان: والله ...
سامي: يا حليلهم .. بغيت ارقمهم بس يزيد الله يصلحه سحبني ..
ريان: ههه احسن ..
فتذكر سامي شي وقال: ريان ..
ريان: هلا ..
سامي: تعرف الدكتور هشام ..
ريان: ايش فيه ..
سامي: سمعت انه عنده بنت في اولى جامعه ويقولون انها بنته الوحيده ..
ريان: ههههه إذا خلها تتوسطلك عند ابوها عشان ماينقصك بعدين ..
سامي: وهذا اللي انا بسويه ..
ريان: وتتوقع انك بتقدر ..
سامي بثقه: اكيــــــــــد .. فأنا سامي ومليون وحده تتمناني ..
ريان: ياخي متى تترك حركات الغرور هذي ..
سامي: ذا مو غرور .. ذا اسمه ثقه بالنفس ..
ريان: عمري ماشفت ثقه بزياده زي جذا ..
سامي بسرعه: ريان تتذكر غيدا ..
ريان بتفكير: غيدا غيدا .. لا والله ما اتذكرها ..
سامي: تذكر غيدا اللي كانت معانا في اولى جامعه ونقلت في الترم الثاني ..
ريان بإستغراب: كانت معانا ..!!
سامي: اقصد اللي كنت انا مشبكها ..
ريان: هههه لا تحاول تذكرني .. ياكثر اللي كنت مشبكهم في ذاك الوقت ..
سامي: لا ريان بالله تذكر .. ذيج اللي كانت فيها ندبه تحت عينها ..
ريان: آآآآآه تذكرتها .. اللي انخطبت وشافها خطيبها تتحجى معاك ففسخ الخطبه ..
سامي: عليك نوررر .. ايوه هي ..
ريان: إيش بها ..
سامي: ارسلتلي رساله ..
ريان: أمــــــــــا .. احلف ..
سامي: والله .. وتبغى ترجعلي ..
ريان: لا ما اصدق ..
سامي: امزح .. ارسلت تهددني ..
ريان بإستغراب: تهدد .. مو هي اللي غلطانه .. كيف تهدد ..
سامي: بكيفها .. هي اللي لزقت فيني مع اني حاولت انهي كل شي بعد ما عرفت انها انخطبت .. وفوق كل هذا تقول اني انا السبب ..
ريان: وش قالت في الرساله ..
فطلع سامي جواله وفتح على الرساله و قال: خذ ..
فأخذها ريان وقراها .. فضحك ورجع الجوال لسامي وقال: ههههه حلوه ذي نشوف مين يضحك في النهايه .. ليه انت اول ضحكت عليها ..
فسكر سامي الجوال وقال: يعني مو بصفه مباشره .. لأنها بعد ما انفصل خطيبها عنها .. يت عندي وقالت اني السبب في كل شي .. فقلت لها انج غلطانه .. انا ابعدتج وانتي رفضتي .. فوق هذا تحمليني الغلط .. روحي ورى خطيبج اعتذري وقولي الصج وهو راح يسامحج .. فقالت قاعد تضحك علي وما ادري شنو .. يعني من ذا الحجي فضحكت منها .. ومن ذاك اليوم ماسمعت عنها اي شي ..
ريان: تصدق ياخي .. احس بيكون فله لمن تيي ..
سامي: اكيـــــد .. واللي اني متحمس ..
فوقف ريان السياره وقال: اوكي ياللا انزل .. عازمك على وجبة عشاء في افخم المطاعم عشاني زعلتك ..
سامي بحماس: وااااو .. إذا دايما بزعل عشان تنزلني اماكن زي جذا ..
ريان: استغلالي انت ..
سامي: هههه ياللا ننزل قبل ما يزدحم المجان .. بعدين مانلقى مجان نتعشى فيه ..
ريان: اووهو مستعيل ولسى الساعه 7 ..
سامي: اقول انزل بلا حجي فاضي ..
================================================== =================
.. في مكان ما عند شاطئ البحر ..
راشد: رواااان ياللا ...
روان: رشود لسى بدري ..
راشد: الساعه 8 مو بدري ..
فرمت روان البحر برجلها بقهر وقالت: طيب خلنا نتعشا هنيه ..
راشد: رواان اخرجي من البحر ياللا بلا دلع ..
روان: لك تؤبر ألبي رشود خلنا شوي ..
راشد: رواان انتي تدرين ان باجر عندي مراجعه وما ذاكرت .. تبيني اندم اني مشيتج
روان بسرعه: نو نو نو انا حاطلع ..
فطلعت من البحر وبدلت ملابسها وركبت معاه السياره ..
روان: راشد ..
فشغل راشد السياره وحرك وقال: هلا ..
روان بدلع: ابي باسكن روبنز ..
راشد: اسكريم جرب العشاء .. صعبه ..
روان: لا عادي .. باكله في السهره عالفيلم ..
راشد: فلم .. ليه باجر ماعليج مدرسه ..؟!
روان: لا لا باجر مافي اختبار ..
راشد: وإذا مافي إختبار .. ماتروحين يعني ..؟!
روان: مالي نفس اروح .. راشد واللي يسلمك ابي اغيب ..
راشد: بكيفج ..
روان بصدمه: من يدك ..!!!
راشد: انا ما احب اغصبج على شي .. انتي كبيره وتعرفين مصلحتج ..
روان: شكرا .. طيب ابي باسكن روبنز ..
راشد: من عيوني ..
روان: تسلملي عيونك ..
فوقف راشد سيارته ونزل يشتريلها اللي تبغاه .. فجلست روان في السياره تفكر وتقول: اغيب ولا لا .؟! .. اغيب احسن لأن الفلم اهم من الدراسه .. صح بغيب وحأتصل عالشله عشان يغيبوا معاي ..
فأخذت جوالها وقلبت في الاسماء بعدين وقفت عند اسم .. وقعدت تفكر .. وبعد شوي ركب راشد وقال: يبت الباسكن حقج .. رونه وش فيج ..
فصحيت من سرحانها وطالعت فيه وقالت: راشد .. انا حأروح باجر المدرسه ..
فشغل راشد السياره وقال: غريبه .. إيش اللي غير رايج ..
روان: لا تذكرت رفيجتي رشا .. حرام يدها مات واكيد محتايه اني اوقف معاها ..
راشد: الله يرحمه .. طيب ليه تروح المدرسه ويدها ميت ..
روان: لأن باجر يوم مهم .. زي مانت عارف انه عندنا عيز في مدرسات الفيزياء .. فيتنا وحده من برى تدرسنا يوم الاحد حصتين .. والفيزياء مره صعبه وصعب فهمها من دون مدرسه .. عشان جذا ماتقدر تغيب ..
فطالع فيها راشد وقال: أها .. يعني تاخذون الفيزياء يوم الاحد بس .. والفيزياء صعبه .. وصعب فهمها من دون مدرسه .. طيب ليه قلتي انه مافي باجر شي مهم ..
روان بتردد: لأنه .. لأنه .. لأنه بصراحه الفلم مره روعه وما ابي افوته .. يعني بالنسبه لي الفلم اهم من الفيزياء .. الفيزياء قهر وغم وضيجه ونكد وملل وفلفسه زايده .. يعني ما احبه ..
راشد: انا اعرفج انج ولاشي في الفيزياء .. فليه تغيبين .. تبين ترسبين ..
روان: خلاص قلت اني بروح .. انتهى الامر ..
راشد: ههههههههه كل ذا الزعل من الفيزياء ..
روان: لا ..
راشد: ههه واضح ..
روان: راشد ..
راشد: نعم ..
روان: تقدر توديني لبيت رشا ..
راشد بدهشه: الحيــــن !!!
روان: إيه الحين .. وش فيها ..
راشد: الساعه ثمان ونص .. يعني اقصد انها اكيد نامت بدري من شدة ضيجتها ..
روان: عيل خلاص لا توديني ..
راشد: خلاص اوديج باجر .. بس الحين مايمدي ..
روان: قلت خلاص مابي ..
راشد: ههههههههههههههههه .. صغيره تزعلي بسرعه ..
روان بعصبيه: رااااااااشــــــــــــــــد ..!!!
راشد: ههههههههههههههههههههه ..
فبعد فتره طويله من السكوت وصلوا للبيت الساعه 9 .. فنزلوا ودخلوا لداخل وصرخ راشد: شهــــــــــد .. يبيلي العشاء لغرفتي ..
قعد فتره ينتظرها بس ما جت ..
راشد بصراخ: شـــــــــــــــهد وصمـــــخ .. ما تسمعين انتي ..
فجت شهد بسرعه وقالت بخوف: هــاا ..
راشد: يبي العشا لغرفتي .. تحركـــــي ..
شهد بخوف: حـ .. حــــاضر ..
طلع راشد لغرفته اما روان فاكلت العشاء في غرفة الاكل الخاصه ..
حضرت شهد الاكل وطلعت لغرفة راشد وحطت الاكل عالطاوله وقالت: تبي شي بعد ..؟!
راشد: إيه ..
شهد: إيش ..؟!
راشد: مين صلح العشا ..؟!
شهد: الخدامه ..
راشد: وليه ماسويتيه انتي ..؟!
شهد: لأن طبخي دايما تطلع فيه عيب ..
راشد: لأنج ماتعرفين تطبخين ..
شهد: إلا اعرف بس انـ...
راشد بعصبيه: لا تردين علي ..
شهد: حاضر ..
راشد: اشوف بس المره اليايه تردين علي .. شوفي وش حأسوي فيج ..
شهد: طيب تبي شي ..؟!
راشد: إيه ..
شهد: شنو ..؟!
راشد: المره اليايه سوي العشا لي انتي ..
شهد: حاضر ..
راشد: وكمان شي ثاني ..
شهد: إيش ..؟!
راشد: والله اني ماني فايق لنفسي عشان اطفشج .. خلاص هذا اليوم عيد بالنسبه لج .. روحي ..
شهد في نفسها: "إن شاء الله دوم" ..
راشد: قلت روحي ..
شهد: ها .. حـ حاضر ..
وخرجت .. فنزلت لتحت ودخلت لغرفتها وانسدحت عالسرير .. فدق جوالها اللي اعطاها إياه راشد عشان يتصل عليها ويؤمرها وهو في الجامعه .. فطالعت في الجوال وردت من دون ما تطالع في الاسم: الو ..
فجاها صوت بنت: الو .. شحالج شهد ..؟!
شهد: مين معاي ..؟!
البنت: الله يخسج .. طالعي في الاسم وتعرفين ..
فطالعت شهد في الاسم بعدين ردت: هلا .. سوري سهام .. بس كنت مستعيله وما شفت الاسم ..
سهام: طيب خلاص عادي .. كيفج ..؟!
شهد: الحمد لله انتي كيفج وياالدراسه ..؟!
سهام: والله غثا .. الحمد لله انج ارتحتي منها ..
شهد: لا والله .. نفسي ادرس ..
سهام: إيوه صح كيفج مع راشد ..؟!
شهد بضيقه: عادي .. مثل دايم بس اليوم اهون ..
سهام: اقول انا عندي طريجي تدفعين فيها ديون اهلج كلها وترتاحين ..
شهد: إيش ..؟!
سهام: تسرقين من فلوس راشد ..
شهد بصدمه: شنو !! اسرق ..!!!!
سهام: إيه .. اسرقيه جزاء بما فعله لج ..
شهد: بس مهما كان هذا حرام ..
سهام: طيب هو اللي يسويه فيج مو حرام ..
شهد: حتى لو سوى فيني جذا ما اسرق ..
سهام: اوووف بكيفج .. طيب ليه ماتبهذلينه ..؟!
شهد بإستهزاء: ياسلام .. عشان يطردني وما القى مجان اشتغل فيه بشهادة الاعدادي ..
سهام: لا .. بهذليه بطريجه غير مباشره ..
شهد: ماني فاهمه ..
سهام: انا اقولج .. مثلا وهو يتسبح خذي موبايله وخبيه عشان يتعب وهو يدور عنه ..
شهد: ياسلام وإذا لقيه معايا إيش استفيد ..؟!
سهام: لا ياغبيه .. خبيه في غرفته ورى الكومدينه او الدولاب .. فاهمه علي ..
شهد: كملي كملي عشان اشوف آخرتها معاج ..
سهام: او في الليل اخرجي وفشي كفر سيارته ..
شهد بشهقه: إيــــــــــش ..؟؟!!!
سهام: اشفيج اختبصتي .. إيه فشيها عشان يعرف ان الله حق ..
شهد: اشك انج رفيجتي .. احسج مجرمه ..
سهام: ما عليج مني المهم عندج اشياء كثيره تعملينها منها انج تقفلين السخانه عشان لمن يتسبح بعد ما يرجع من الجامعه يلقاها حاره ويحترق كل جسمه يارب .. او حطي في يزمته شوك عشان لمن يلبسها ينصاب ويتعور .. او حطي جدام باب البيت ماي عشان يتزحلق ويطيح ويتكسر و إن شاء الله على المستشفى عالطول .. او خذي من شنطته كتاب وحطيه في دريه عشان يتفشل جدام الدكتور عساه بستين فشيله .. او........
فقاطعتها شهد: خلاص خلاص خلاص .. بليز سكتي .. موتي الريال بحجيج ..
سهام: شفتي كيف .. في مليون طريجه تسوينها صح ..؟!
شهد: بس انتي مجرمه ..
سهام: لا لا ماني مجرمه .. هو المجرم ولازم ياخذ جزائه .. ها توعديني انج ماتكونين خوافه وتبهذلينه ..؟!
شهد: والله صعب يا سهام انتي ماتعرفينه ..
سهام: حتى لو كان جذا .. حاولي تكونين قويه ولاتسكتين عن حقج لمن يصرخ عليج بدون سبب ..
شهد: اقولج هو يمد إيده إذا صرخت عليه ..
سهام: طيب زي ماقلت آذيه بطريجه غير مباشره ..
شهد: اشوف ..
سهام: لا لاتشوفين .. حاولي ..
شهد: إن شاء الله ..
سهام: اوكي حأقفل الحين لأن وراي اختبار ومررره صعب باااااي ..
شهد: بااااي وذاكري عدل ..
سهام: ههه من عيوني بااااي ..
وقفلوا فأنسدحت شهد تفكر في الكلام اللي قالته سهام ...
================================================== ===============