في يوم الجمعه .. مر اليوم بسلام على الكل .. ما عدا ريما بالطبع ..
كانت طول يوم الخميس والجمعه في غرفتها وصاكه على نفسها الباب ومو راضيه تخرج ..
حاولوا كلهم فيها بس ما رضيت .. وإذا جت اسيل تكلمها .. تصارخ ريما بهستيريا وتقول شيلوا الخاينه هذي .. فتأثرت اسيل كثير منها .. وعرفت الام ان السبب اسيل .. وطبعا ما خلت سب إلا قالته ..
اما ريما فتدهورت حالتها كثير .. كله بسبب اسيل وآرثر .. وكل ما تذكرت اسيل وهي تحكي عن آرثر بحماس تبكي اكثر واكثر .. واكثر شي تبكي منه لمن تتذكر اسيل وهي تقول انه بيخطبني ..
حبست نفسها في غرفتها ورفضت كل شي وقالت لأحد يدق علي .. انا لو بأطلع راح اطلع بكيفي .. فتركوها براحتها ومادقوا عليها ..
فجلست اسيل في الصاله وهي متضايقه من طردت اختها لها ..
فجاء فارس وجلس عندها وقال: شفيج ..؟!
اسيل بضيقه: مافيني شي ..
فارس بإبتسامه: ايه واضح ..
اسيل: ....................
فارس: اكيد صار شي بينج وبين ريما .. انا ما اعرف شصار بس اكيد في سوء فهم بينج وبينها .. خليها تهدأ وتفاهمي معاها .. بس المهم ما تضايقين نفسج جذي ..
فطالعت اسيل في فارس فتره بعدين ابتسمت ..
فارس: ايوه .. هذي اسيل اللي انا اعرفها ..
اسيل: فارس ..
فارس: هلا ..
اسيل: الله لا يحرمني منك ..
فطالع فارس فيها فكملت وقالت: لو انك مو اخوي ما ادري ايش اسوي انا في حياتي .. دايما تبتسم في ويهي وتشيل عني الضيقه وتخفف علي .. ودايما تدافع عني من دون لا تعرف اذا كنت صاجه او جذابه وكأنك حاس اني صاجه .. لولاك جان انضربت ومحد ياء يدافع عني وجان انضلمت ومحد اخذ حقي .. انت يا فارس اكثر من ميرد اخو فالله لا يحرمني منك ان شاء الله ..
فطالع فيها فارس وحس بألم من كلامها .. فعض على شفته وبعدين رسم ابتسامه خفيفه على فمه ..
فارس: اسيل .. احرجتيني بكلامج ذا ..
اسيل: ههههه يا عيني على اللي ينحرجون ..
فارس: خلينا نغير الموضوع .. كيفج مع دراستج ..
اسيل: اوكي نغير نغير .. دراستي والله تمام ..
فارس بشك: متأكده ..
اسيل: ايه ..
فارس: لا ..
اسيل بدهشه: شنو .. شتقصد بلا ..؟!
فارس: لأنه وصل لي خبر انج تسولفين في نص المحاضره مع رفيجتج .. صح هذا الكلام ولا خطأ ..؟!
اسيل بفهاوه: ها ..
فارس: شنو اللي ها ..؟! هذا واضح ان هذا الحجي صج ..
اسيل: امممممم منو قال لك ..؟!
فارس: ها ..
اسيل: ههههههههههه .. حلوه ها .. ههههههههه ..
فارس: اسيل خلاص مافي شي يضحك ..
اسيل: قبل شوي تستهبل علي وانت بنفسك سويتها هههههههه ..
فارس: طيب خلاص ما صار شي ..
اسيل: طيب منو قال لك اني اسولف في المحاضرات ..؟!
فارس بتردد: آآ .. أ .. اا واحد من اصحابي ..
اسيل: لا يا شيخ .. احلف عشان اصدق .. ترى واضح انك تجذب .. ياللا قول منو لأني تحمست ..؟!
فارس: ما تقولين لأحد ..
اسيل بحماس: ابدا ..
فارس: متأكده ..؟!
اسيل: طبعا ..
فارس: اكيد ..؟!
اسيل: فارس ياللا تحجى لأني حدي متحمسه ..
فارس: طيب .. أ .. اا تعرفين وحده في كلاسج اسمها لبنى ..؟!
فسكتت تفكر بعدين قالت: آآه عرفتها .. ذيج البنت الفلسطينيه البيضاء ..
فارس: ايه هي .. حصل مره اني كنت اتمشى في الحديقه الخلفيه فشفتها تبجي ومن وقتها تعرفت عليها .. وبعدها بجم يوم شفتها صدفه انا ورفيجي منصور وسولفنا شوي وقلتلها ان عندي اخت واسمها اسيل .. فقالت لي انج تسولفين في المحاضره مع صاحبتج ..
اسيل: أها .. جذي يعني .. بس ما توقعت انها فتانه ..
فارس بسرعه: لا لا هي ما فتنت عليج .. هي قالتها بطريجه انها شي عادي ومو قصدها تفتن عليج .. والله العظيم صدقيني ..
اسيل: اوكي .. وبعدين ..؟!
فارس بإستغراب: شتقصدين ..؟!
اسيل: اقصد بعد ما تدافع عنها شنو بتسوي ..؟!
فارس: ها ..
اسيل: ها تشرح كل شي .. معناته شكي كان في محله ..
فارس: لا يا اسيل انتي غلطانه ..
اسيل: ايه واضح اني غلطانه .. بس عادي لا تخاف .. البنت وايد حبوبه وشاطره وايد وحلوه وما عليها كلام ووايــــــــــــد تليق فيك وتنفعلك ..
فارس: اسيــــــــــــل ..
اسيل: وكمان احسن من لماروه هالحيوانه ..
فارس: اسيل لا تفهمين غلط .. انا ما احبها ..
اسيل: احلف عشان اصدقك ..
فارس: ما يحتاي احلف ..
اسيل: هذا معناته انك تحبها وتحبها وايد .. صح ..؟!
فارس: لا يا اسيل شفيج ما تصدقيني ..
اسيل بتسليك: اوكي خلاص صدقتك ..
فارس: واخيرا .. ما بغيتي تصدقين ..
اسيل: بس احتمال اني اتعرف عليها باجر ..
فارس: ليش ..؟!
اسيل: لانها دافوره ويمكن استفيد منها واضحك عليها ..
فارس: لا حرام عليج .. هدي البنت في حالها .. هي ما سوت فيج شي ..
اسيل: وانت شعليك .. مو تقول انك ما تحبها ..؟!
فارس: ها .. ايوه ما احبها ..
اسيل: عيل لا تتدخل ..
فارس: طيب ..
اسيل: بس تصدق .. البنت كسرت خاطري .. خلاص ما راح اضحك عليها .. بس بتصاحب معاها .. تبيني اسلم لك عليها ..؟!
فارس: ها .. يعني اذا مافي مشكله عادي ..
اسيل: فارس ..
فارس: نعم ..
اسيل: إلا الآن قلت ها اربع مرات .. هذا معناته انك تفكر فيها وتحبها وتجذب علي .. صح ..؟!
فارس: آاأ .. لا ..
اسيل بإصرار: إلا تحبها ..
فقام فارس وقال: صج انج بايخه ..
وطلع فوق وضحكت اسيل عليه لأنها تأكدت ان اخوها يحب هذي البنت ..
================================================== ==================
في صباح يوم السبت .. وفي الساعه تسعه وربع .. وعند بوابة الجامعه ..
وقفت سيارة همر سوداء في مواقف السيارات .. ونزلت منها بنت .. لابسه بنطلون اسود وقميص اسود ونضارات سوداء .. وشايله شنطتها السوداء واضافرها مصبوغه بلون اسود ولابسه قفاز اللي مفتوح من الاصابع ولونه اسود ..
كل شي فيها اسود x اسود .. هي نفسها البنت اللي سميناها البنــــــــــــت الكئيبــــــــــــه ..
دخلت الجامعه ولفتت انضار كل الموجودين فيها .. لأن شكلها كان جدا ملفت ..
طنشت كل هذي الانضار ومشيت بإتجاه مكتب المدير .. وفي خلال خمس دقايق وصلت عند باب المكتب .. فدقت الباب ودخلت ..
فرفع المدير راسه وطالع في مستغرب منها ومن شكلها فقال: هلا ..
فنزلت نضارتها وقالت: اسمي وصايف .. وانا ابي ادرس في هذي الجامعه .. ممكن ..؟!
فطالع فيها من فوق لين تحت بعدين قال: وين كنتي تدرسين قبل جذا ..؟!
وصايف: برى الدوحه ..
المدير: وليه تركتي الدراسه من هناك ..؟!
وصايف: لي اسبابي الخاصه ..
المدير: في صف جم انتي ..؟!
وصايف: ثاني ..
المدير: طيب هات ملفج اشوف بياناتج ..
فأعطته ملفها وهي ساكته .. لأن طبيعتها الهدوء واذا تكلمت قالت كلمه ورد غطاها ..
فطالع في الملف وبعدين قال: انتي اهلج متوفين ..؟!
فمرت قدام عيونها ماضي تحاول تنساه ..
فضبطت نفسها وقالت: ايوه ..
المدير: اها ..
وطالع وقلب في اوراق ملفها بعدين قال: طيب خلاص .. مافي مشكله .. متى تبغين تبدأين تدرسين ..؟!
وصايف: باجر ..
المدير: خلاص .. اوراقج عندنا وراح ننهي كل شي .. وتعالي باجر بدري عشان تاخذين جدولج وتبدأين تاخذين محاضرات .. خلاص ..
فهزت راسها بإيه .. فطالع فيها فتره بعدين قال: تقدرين تطلعين اللحين ..
فهزت راسها ولبست نضارتها وخرجت من المكتب .. وراحت لجهة سيارتها .. فجوا قدامها شلة غيدا .. ياليل الليل على ذي الشله .. يحبون اللقافه ..
فطالعت وصايف فيهم فقالت غيدا: ذي اول مره اشوفج هنا .. انتي طالبه يديده ..؟!
وصايف: ....................
غيدا: مو كأنج تتطنشيني ..؟!
غدير: بليز شوفوا شنو لابسه .. كأنها تحسب نفسها في فلم عصابات ..
خلود: وانتي الصاجه ..
غدير: مسويه لنا اكشن في الجامعه ..
تهاني: خلاص هدوا البنت في حالها .. تراها ما سوت لكم شي ..
غدير: تهانــــــــــــي .. عن السماجه اللي انتي فيها ..
غيدا: غدوش صاجه .. كل شوي تقولي هدوا الناس واتركوا الناس ..
خلود: اذا مو عاجبج حالنا تقدرين تروحين وتخلينا ..
تهاني: يووه خلاص آسفه كليتوني بقشوري ..
غيدا: وانتي يا آنسه سودا .. ما ودج تياوبين على سؤالي .. انتي طالبه يديده ..
فطالعت وصايف فيهم بعدين طنشتهم ومشيت من جنبهم .. فتنرفزت غيدا من حركتها .. فمسكتها من كتفها ولفتها على ناحيتها .. فلفت وصايف عليهم وطالعت فيهم بنضرات بارده ..
فاستغربت غيدا من ردت فعلها .. توقعتها بتضارب او تخاصم بس طلع العكس ..
وقفت وصايف فتره تطالع فيهم .. ولمن محد كلمها راحت وخرجت برى الجامعه .. ركبت سيارتها وراحت لبيتها ..
غيدا بعصبيه: شفتم كيف ..؟! حمــــــــــــاره .. طنشتني وراحت ..
غدير: ولا يضيق خاطرج يا غيدا .. باجر حتجي وعاد انتي صفي حسابج معها مثل ما تبين ..
تهاني: طيب اذا ما كانت طالبه .. يعني يمكن تكون اخت اي طالب او طالبه ويت تسأل عن اخوها او اختها ..
خلود: في ذي الحاله انسيها يا غيدا ..
غدير: صراحتا البنت نفسي اضربها هي ولبسها .. ناقصها مسدس وتصير ممثله سينمائيه عضيمه ..
غيدا: اللي قاهرني انها ساكته وبارده وما نطقت بأي شي ..
خلود: فعلا .. هذا الشي يحوم الجبد ويموت قهر ..
غدير: كانت طالعه من مكتب المدير .. معناته انها طااااالبه .. يعني حتجي باجر اكيد ..
غيدا: وانا استناها ..
تهاني: ما يكفيكم اللي متهاوشين معاهم .. انتم ناقصين ناس زياده ..؟!
الكل: تهــــــــــــاني ..
تهاني: سوري سوري ما قلت شي ..
================================================== ==================
خلصت محاضرة كلاس اسيل .. فقامت اسيل وتثاوبت بقووه وقالت: معاي نووووم ..
لين: نامي يا حياتي نامي ..
اسيل: وين ..؟!
لين: في الكلاس ..
اسيل: تستهبلين انتي وويهج ..
لين: انتي اللي تستهبلين مو انا ..
ندى: كلكم تستهبلون .. ارتحتم جذي ..
اسيل: بنات بنات بنات .. تعالوا معاي بسرعه ..
ندى: فين ..؟!
اسيل: عند لبنى ..
لين: ليش ..؟!
اسيل: بعدين اقولكم ..
فراحوا عند لبنى وصاحبتها امل ..
فمدت اسيل يدها وقالت: اهلا ..
لبنى بإبتسامه: اهلين ..
فسلموا على بعض كلهم بعدين قالت اسيل: كيفج يا لبنى ..؟!
لبنى: تمام .. انتي شو اخبارك واخبار دراستك ..؟!
اسيل: لا بأس ..
لبنى: سلامات .. ليه كنتي غايبه يوم الاربعا ..؟!
اسيل: اممم كنت تعبانه ..
لبنى: ما تشوفي شر ..
اسيل: الشر ما ييج ان شاء الله ..
لبنى: يسلمو ..
اسيل: حبيت اسلم واتعرف عليج .. واقول ترى فارس يسلم عليج ..
لبنى: ها ..
اسيل: هههههه ياني فارس رقم اثنين .. اقولج فارس يسلم عليج ..
لبنى: الله يسلمو ..
اسيل: بس ..
لبنى: ليه .. شو بدياني ائول مثلا ..؟!
اسيل: يعني مثلا ما يشوف شر ان شاء الله او سلميلي عليه بعد او عسى الشر فيني ولا فيه .. شي زي جذي يعني ..
فانحرجت لبنى لأنها فهمت قصد اسيل .. فقالت اسيل: شفيج انحرجتي .. اخوي تراه وايد حبوب وطيوب .. وكمان حكاني كثيييير عنج .. يقول انج حبوبه وحلوه وخلوقه وووو واشياء كثيره ..
لبنى: اها ..
اسيل: اها بس ..؟! طيب ردي وقولي حتى هو حلو وعسل وقمر واشياء زي جذي ..
لبنى باحراج: تشرفت بمعرفتك اكتير يا اسيل واشوفك مره تانيه ان شاء الله ..
وراحت هي وصاحبتها فضحكت اسيل وقالت لين: بسسسسرعه قولي لي وش السالفه بينكم ..
اسيل: اوكي اوكي ..
<< وحكت لهم كل السالفه <<
ندى: حرام عليج .. ليه تقولين كلام ما قاله اخوج ..؟!
اسيل: بس .. وعشان انا عارفه انه يحبها بس يستحي .. فقلت انا بكون الوسيط بينهم .. وكمان راح اقول لأخوي ان لبنى تسلم عليك .. لأن الاخت طلعت تستحي بعد ..
لين: والله حماس .. استمري يا اسيل ..
اسيل: من عيوني ..
ندى: صج انكم مخفات ..
فطلعوا برى المبنى وهم يسولفون .. بس قابلوا في وجههم بنت وولد ..
البنت كانت لابسه تيشيرت رصاصي وتنوره لفوق الركبه بشوي لونها اسود جينز .. ولابسه بوت لنص الساق لونه اسود وكعبه طوووويل .. وشعرها اشقر وعيونها ازرق قاتم .. يعني كانت اليزا .. ومعاها شاب في وسط العشرينات تقريبا ..
اسيل: من ذولا ..؟!
ندى: ما ادري ..
اليزا بالتركي: من منهم هي اسيل يا مايكل ..؟!
مايكل بالتركي: انها ذات القميص الرمادي ..
فطالعت اليزا في اسيل من فوق لين تحت باحتقار .. البنت طلعت حلوه عكس ما تخيلت اليزا ..
اسيل: سلامات .. شفيج تطلين .. مضيعه شي في ويهي ..؟!
اليزا: يالك من فتاه حمقاء ..
اسيل: تحجي عربي لو سمحتي لأني ما افهم انجليزي ..
ندى: هذي مو انجليزي .. باين انها من اوروبا ..
اليزا: اخبرها يا مايكل ان اسمي اليزا واني ابنة خال آرثر وزوجته في المستقبل ..
مايكل بالفصحى: هذه الفتاة تدعى اليزا وهي ابنة خال آرثر .. هل تعرفين آرثر يا اسيل ..
اسيل: ووووااععععوووه .. ذي تقرب لآرثر ..؟! ما اصدق ..
مايكل: أها .. للمعلوميه هذه الفتاه هي زوجة آرثر في المستقبل ..
فانصــــــــــــدمــــــــــــــــــــــــت اسيــــــــــــل .. ولفت تطالع في اليزا وهي مو مصدقه .. واليزا تطالع فيها بابتسامه احتقار وفرح ..
اسيل بصدمه: شنو يعني ..؟!
مايكل: ان اليزا مستاءة منك يا اسيل .. وتقول ارجو منك الابتعاد عن آرثر .. فآرثر بعد نهاية دراسته الجامعيه سيتزوجها .. افهمتي ..
اسيل: جذابــــــــــــه .. اليزا ذي جذابه واكبر جذابه .. آرثر يحبني و........
مايكل: آسف على مقاطعتك .. ولكن ان كانت هناك علاقه بينك وبين آرثر فتأكدي انه كان يضحك عليك مثلما فعل في بقية الفتيات من قبلك ..
اسيل: وايش اللي يدريني انك صاج انت والبقره اللي بينبك ..؟!
مايكل: هناك الكثير من الادله .. اولها ماضي آرثر اوليس يكلم ويلعب على الكثير من الفتيات فما الذي يمنعه من اللعب عليك انتي ايضا .. وثانيا اليزا وآرثر ابناء اقارب وهم مقدران لبعضهما منذ سبع سنوات وهذا الشي معروف واسألي ام آرثر لو اردتي ان تصدقي .. وثالثا هو انه لا يمكن ان يتزوج آرثر فتاة ليست من نفس بلده ومن نفس تفكيره وعاداته وتقاليده اليس كذالك .. ورابعا انتي لستي من نفس طبقته الاجتماعيه .. فهو من الاثرياء وانتي من طبقة الفقراء في حالتك الاجتماعيه وفي نسبك فهو نسب عادي جدا .. وخامسا وسادسا وسابعا .. هناك الكثير والكثير من الفروق والادله يا اسيل .. هل تريدين ان اخبرك ماهي ..؟!
فطالعت اسيل فيه وهي تحت تأثير الصدمه .. فشالت هالكلام من راسها لأنها مستحيل تصدقهم ..
اسيل بثقه: وتحسب اني بصدق كلام حثالى مثلكم ..
فطالع مايكل فيها بدهشه فقالت اليزا: ماذا تقول هذي الحمقاء ..؟!
مايكل: انها تقول لا اصدق كلام حثالى مثلكم ..
اليزا بصدمه: مــــــــــــاذا ..؟؟؟!!! تلك الحقيره تقول عني حثالى ..!!!!
فلفت وطالعت في اسيل بعصبيه واسيل تطالع فيها بابتسامه استفزاز ..
فقدمت اليزا منها وصفقتها كككككككـــف على وجهها وهي تقول: انا لست من الحثالى ايتها القذره ..
فطالعت اسيل فيها بصدمه .. بعدين عصبت ومدت ايدها بتعطيها كف اقوى .. بس اليزا كانت اسرع منها ومسكت يد اسيل ..
اليزا: هل تضنين بأنك قادرة على لمسي .. هههآي لم تحزري ياحلوه ..
فعضت اسيل على شفتها لأن اليزا ماسكه ايدها اللي توجعها .. فسحبت اسيل ايدها بقوه بس اليزا مسكتها زين ولفتها ..
فصرخت اسيل بقوه لأن اليد عورتها ..
ندى بسرعه: هيه هيه انتي مينونه .. ايدها قابله للكسر يالخبله ..
مايكل: انهم يقولون ان يدها قابلة للكسر ..
اسيل: عمى في شكلج هــــــــــــدي ايــــــــــــدي آآآآاااآآآآآه ..
اليزا بخبث: هكذا اذن .. سنرى يا اسيل ..
ولفت ايدها بقوه وصرخت اسيل بأقوى ماعندها .. فجت لين بتفكها بس منعها مايكل ..
اليزا: اسألها .. هل ستترك آرثر ام لا ..؟!
مايكل: هل ستتركين آرثر ام لا تريدين ..؟!
اسيل بألم: آآآآآآآآآآآآآه .. لا ما بتركه آآآه ..
فجت ندى عند اليزا عشان تفكها من اسيل .. فدفتها اليزا بقوه وطاحت ندى عالارض ..
اليزا: اياكي ان تقتربي وإلا كسرت يدها ..
مايكل: اياكما ان تقتربا وإلا ستقوم اليزا بكسر يد رفيقتكم ..
ندى: بس راح تكسر ايدها بذي الطريقه ..
مايكل: كلا لن تفعل ..
لين: انا رايحه اقول للاداره عالمهزله هذي ..
وراحت .. والطلاب متجمعين حولهم بفضول كالعاده ..
مايكل: آنسه اسيل .. هذا آخر تحذير .. هل ستتركين آرثر او لا ..؟!
فهزت اسيل راسها بلا وهي كاتمه الالم في نفسها ..
اليزا بعصبيه: هكذا اذن .. يبدو انك عنيده وانا لا احب العنيدين ..
ولفت ايدها بأقوى ماعندها لدرجة انها انكسرت ..
اسيل بصراخ الم: آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآ آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآ آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآ آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآ آآآآآآآآه ..
فقامت ندى ودفت اليزا بقوه على الارض ومسكت اسيل اللي تتألم وتبكي من ألم ايدها ..
قامت اليزا وقالت بعصبيه: لم تري مني شيئا بعد يا اسيل .. سأريك يالحمقاء ..
وراحت هي ومايكل .. وجووا الاداره في نفس الوقت .. المدير والوكيل ..
الوكيل بصراخ: خيــــــــــــر .. ليه التجمــــــــــــع هذا .. كل واحد على محاضرته بســــــــــــرعه ..
فراحوا الطلاب وجلس المدير عند اسيل وقال: شفيج ..؟!
اسيل كانت عيونها مليانه دموع وتحاول تمسك نفسها لا تبكي قدام المدير فقالت ندى: يووا ولد وبنت ما نعرف مين يكونون وكسروا ايدها وراحوا بعدها ..
الوكيل: شلون ما تعرفون مين ..؟!
فهزت ندى كتفها ..
المدير: خلاص قومي لمستوصف الجامعه عشان يشوفون ايش فيه ..
فهزت راسها اسيل وقامت معاهم وراحوا للمستوصف .. وبعدها ودوها للمستشفى وجبروا ايدها لأنها انكسرت .. وما اتصلوا على اهلها لأنها بتطلع في موعد انصراف الطلاب وهي بنفسها راح تخبرهم ..
================================================== ==================