شبكة همس الشوق - عرض مشاركة واحدة

7 - 3 - 2014, 04:55 PM

|$[ البآرت الرابع الجزء الثاني ]$|

وقفت وصايف سيارتها في مواقف سيارات الجامعه .. نزلت منها وحست بجوع لأنها من غدا امس .. بس طنشت الامر لأن آخر اهتماماتها الاكل ..
اوه سوري اصلا الدنيا كلها من آخر اهتماماتها ..
دخلت الجامعه وهي حاسه بدوخه بسيطه لأنها مانامت امس .. بس عادي هذي مو اول مره ما تنام ..
راحت واخذت جدول المحاضرات .. وشافت ان اول محاضره حتبدأ في الساعه 8 يعني بعد ربع ساعه ..
ففكرت انها تروح الكافتيريا عشان تاكل لها شي قبل ما تتدخل المحاضره .. بس بعدين بطلت لأنها ما تعرف طريق الكافتيريا وما تبغى تسأل احد ..
فراحت للمبنى تدور على الكلاس حقها .. وبعد عشر دقايق لقيته .. فقعدت واقفه عند الباب تطالع في الكلاس اللي كان شبه مليان عشان وقت المحاضره قرب ..
واقفه تطالع في الكلاس بسرحان .. عيونها في الكلاس وعقلها برى الجامعه ..
...........: عفوا اختي ..
فلفت ورى وشافت شاب واقف ومعاه كتاب وقلم ..
...........: ممكن شوي .. ابي ادخل ..
فبعدت من دون لا تنطق بكلمه .. فوقف يطالع فيها بفضول ..
فمد ايده وقال: انا اسمي سيف .. شكلج طالبه يديده صح ..؟!
فطالعت فيه فتره بعدين دخلت وطنشت ايده الممدوده لها .. فطالع فيها .. البنت غامضه وعنده فضول يعرفها .. فراح وجلس جنبها ..
لفت طالعته ببرود وبعدين لفت عنه ..
سيف: واااه اللحين بيي دكتور ثقيل ظل .. الله يعيننا على هذرته الفاضيه ..
فطلعت وصايف جوالها وقعدت تدقدق فيه ومطنشته ..
فطالع فيها وقال: ألا ما عرفتينا على اسمج ..
دخلت وصايف على الرسايل اللي كلها من الشركات .. لأنها ما عندها صاحبات .. يعني وحيـــــــــــــده .. قعدت تلفلف في الرسايل وتمسح الرسايل السامجه اللي فيها اعلانات عن مقاطع حب او عن قناة ازياء او عن صور مكياج او تقرير سداد الفاتوره ..
سيف: من يوم ما شفتج ما سمعت صوتج .. ليش ..؟!
صلحت تحديد الكل وحذفت كل الرسايل ..
سيف: ليه تطنشين ..؟!
دخلت الاسماء وكان فيها ٣ ارقام .. الاول كان "السواق" والثاني "معين" وهو الحارس الخاص والثالث كان "امجد" وهو شخص تعتمد عليه في كثير من الاشياء .. صارت تنسخ وتمسح وتنسخ وتمسح ..
فتنهد سيف وقال: انتي غريبه ..
فطنشته وقعدت تقلب في الجوال وتدخل كل الاماكن ما عدا الاستديو لأنه صعب تدخل عليه وصعب عليها تشوف الصور صعب مرره بالنسبه لها ..
رفع سيف نفسه بفضول وطالع في جوالها الاسود .. واستغرب ان الثيمات كانت سوداء كمان ..
سيف في نفسه: "البنت هذي كل شي عندها اسود .. عجيبه" ..
فلاحظ اشارة البلوتوث .. هذا يعني انه شغال .. فأبتسم ..
سيف: سوري باين عليج ما تحبين الرياييل .. ببدل مع البنت اللي وراي ..
ما اهتمت لكلامه .. فقام وبدل مع البنت اللي وراه ..
جلس وطلع جواله وشغل البلوتوث وعمل بحث .. وبعد شوي جاله اسماء ثلاث بلوتوثات .. وكان نكهم .. "ضايعه في حضن خويها" و "سعيد ٢٠١٢" و "دمها يريحني وينجيني" ..
سكت يطالع ويفكر .. فتوقع ان نكها هو آخر نك لأنه يناسب مع شكلها ..
فأرسل لها (( هاااي .. ممكن نتعرف )) ..
وطالع فيها لأنها قدامها .. فشافت وصايف طلب قبول من "قاهرهم بعنادي" .. ففتحته ولمن قرته رفعت حاجبها ..
وصايف في نفسها: "صج ناس سامجه" ..
فما ردت .. فتأكد سيف انها هي .. فأرسل (( نكج جذبني .. ممكن اعرف ايش سر هذا النك .. ومين هي اللي تقصدينها )) ..
وللمره الثانيه طنشته .. ودخل الدكتور وبدأ يشرح .. فطنش سيف الدكتور وارسل لها (( ليه ما تردين )) ..
فطالعت في جوالها .. ولفت عيونها تطالع اذا في احد ماسك جواله .. بس ما شافت احد .. فجاها طلب قبول فقبلت وكان مكتوب (( قاعده تدوريني )) .. فأستغربت .. هذا معناته انه يعرفها ..
ففرح سيف لمن شاف طلب قبول منها .. فقبل وفتح بحماس وكان مكتوب (( شتبغى )) ..
فابتسم وارسل (( ابي اعرف شسر النك حقج )) ..
فارسلت له (( كل زق ولا تتدخل )) .. وبعدها قفلت البلوتوث حقها ..
فأنقهر .. وكل شوي الفضول يزيد عنده .. بس الجايات اكثر ..

================================================== ==================

صعدت اسيل عالدرج وشافت قدامها الخاله ام محمد .. فأبتسمت اسيل وجت عندها ..
اسيل: صباح الخير ..
فلفت ام محمد عليها وابتسمت لمن شافتها وقالت: صباح النور .. هلا ببنتي .. هلا بأسيل ..
فطالعت اسيل وقالت: شفيج ..؟!
فطالعت ام محمد في اللي بإيدها وقالت: ما ادري .. عصا المكنسه انكسرت واحاول اعدلها ..
اسيل: هات عنج ..
ام محمد: لا لا مو لازم ..
فطنشتها اسيل واخذت المكنسه وقعدت تهندس فيها ليييين صلحت ..
فأعطتها وقالت: جذا مزبوطه ..
ام محمد: مشكوره يا بنتي .. عرفتي تسوينها مع ان ايدج مكسوره .. صح سلامات .. ليش ايدج مكسوره ..؟!
اسيل: طحت من الدري ..
ام محمد: ما تشوفين شر انشالله ..
اسيل: الشر ما ييج .. ياللا انا استأذن ..
ام محمد: اذنج معج ..
فلفت اسيل وشافت اللي ما تبغى تشوفه .. شافت السيد راشد الشعلان ..
راشد: كيفج يا اسيل ..؟!
اسيل بإرتباك: ر ر را راشـ راشد ..
راشد: اووووو مشوار على ما تقولين اسمي ..
اسيل من الخوف سكتت ..
راشد: طيبه .. انتي طيبه وايد وتساعدين الناس .. شكله فيج خير وانا ما ادري ..
اسيل بخوف: شتبي ..؟!
راشد: سلامات .. شفيها ايدج مكسوره .. له له له لا يكون انا السبب ..؟!
فسكتت ولفت تطالع في الطلاب بإرتباك وخوف ..
راشد بحده: انا لمن احاجيج تطالعين فيني ..
فلفت وطالعت فيه وتحاول تكون قويه بس مو قادره ..
ايمن: حرام عليك يا رشود .. شوف كيف البنيه تنتفض من الخوف ..
راشد: احسن ..
عزوز: كسرت خاطري ..
اسيل بتردد: شتبي مني اكثر ..؟! ما يكفي اللي ساويته ..
راشد: لا ما يكفي ..
اسيل: طيب ايش حتسوي كمان ..؟!
راشد: مالج شغل .. انا اذا بسوي شي بسويه من دون لأحد يسألني فاهمه ..
فهزت راسها بإيه ..
راشد: هذي آخر مره تسألين هذا السؤال .. مفهوم ..؟!
فهزت راسها بإيه ..
راشد: برافو ..
سليم: هههههه بنيه مطيعه ..
متعب: والله منت سهل يا رشود ..
راشد: طبعا .. فأنا ولد الشعلان ..
ايمن بطفش: اووهو طفشتنا ياخي بلقبك .. كل ساعه قلت لنا ولد الشعلان وولد الشعلان .. كأنك الوحيد اللي عنده لقب ..
راشد: ايوه وبعدين ..؟!
عزوز: شكل الاخ عصب ..
فلف راشد وطالع فيه وقال: الى متى ..؟! والله لو كنتم بقر جان فهمتم .. جم مره اقول انا ما عندي اخوان ما تفهمون ..؟! يعني تبوني اعصب مثلا عشان تستوعبون ..؟!
عزوز: خلاص سوري سوري .. ما صار إلا الخير ..
فلف راشد على اسيل وقال: متى تبدأ محاضرتج ..؟!
فبلعت ريقها وقالت: بعد نص ساعه ..
راشد: عيل ضفى ويهج عن ويهي ..
فعصبت من كلامه .. بس مسكت نفسها وراحت عنه ..
فلقت قدامها آرثر اللي قال: صباح الورد ..
فأبتسمت وقالت: صباح الفل ..
طالع آرثر وراها على شلة راشد وقال: آذووج بشي او كلموج ..؟!
فلفت ورى بعدين لفت عليه وقالت: ها .. لا ابدا ..
آرثر بشك: متأكده ..؟!
اسيل: ايوه متأكده ..
آرثر: اسيل .. لو بس طالع فيج علميني خلاص ..؟!
اسيل: من عيوني ..
فأبتسم وقال: كيفج ..؟!
اسيل: تمام ..
آرثر: محاضرتج بعد نص ساعه صح ..؟!
اسيل بإستغراب: شدراك ..؟!
آرثر: مو انا قلت اللي يحب لازم يعرف كل شي عن حبيبته ..
فهزت راسها بإحراج ..
آرثر: يوعانه ..؟!
اسيل: يعني ..
آرثر: طيب تعالي للكافتيريا ..
اسيل: اوكي ..
فمشيوا وبعد فتره قال آرثر: اسيل ..
اسيل: نعم ..
آرثر بتردد: بسألج سؤال وياوبيني بصراحه ..
اسيل: طيب ..
آرثر بالتركي: سن بيني سيفرميسين ..؟!
طالعت فيه بفهاوه وقالت: ها .. ما فهمت ..؟!
فضحك على شكلها بعدين قال: يعني هل .. يعني انتي تحبيني ..؟!
فطالعت فيه فتره بعدين سكتت ..
آرثر: ليه سكتي ..؟!
اسيل بهدوء: شتبيني اقول ..؟!
آرثر: اي شي بس المهم تياوبيني ..
فتنهدت بعدين قالت: سؤالك ..
آرثر: شفيه سؤالي ..؟!
اسيل: محرج .. سؤالك محرج ..
فطالع فيها فتره بعدين قال بإرتياح: عمى في شكلج وقعتي قلبي .. توقعتج تقولين لا ..
اسيل بإحراج: لا تسأل اسأله زي جذي ..
آرثر: طيب بس ياوبي على ذا السؤال ..
اسيل: عفيه آرثر اعفيني من الاجابه ..
آرثر: اسيل انتي اللي عفيه .. بس ياوبي عن هذا السؤال ..
فسكتت فتره تطالع فيه وقالت: لازم ..؟!
آرثر: ايه ..
فسكتت فتره ولمن جت بتتكلم وقفت لأنها شافت بنت وقفت قدامهم .. طالعوا فيها بإستغراب ..
البنت بجفاء: السلام عليكم ..
اسيل: وعليكم السلام .. اي خدمه ..؟!
فطالعت البنت في آرثر وقالت: ليه ما ترد ..؟!
آرثر: وعليكم السلام .. ها شتبغين ..؟!
البنت: ما تعرفني يا استاذ آرثر ..؟!
فطالعوا فيها باستغراب اكبر .. وآرثر مشبه عليها بس ما يعرفها ..
آرثر: عفوا ما اعرفج .. منو انتي ..؟!
البنت بصوت شوي عالي: طبعا ما راح تعرفني من كثر البنات اللي تلعب فيهم وفي اعراضهم .. انا سهــــــــــى يا آرثر تتذكرني ولا اذكرك من هي سهـــــــــــــى ..؟!
فسكت آرثر فتره يطالع فيها بعدين تذكر وقال: انتـــــــــــــي ..؟!
سهى: ايه انا .. شفيك متفاجئ ..؟!
اسيل: آرثر .. من ذي ..؟!
سهى بعصبيه وصراخ: انا اقولج من انا .. انا سهـــــــــــــى اللي حبت آرثر من كل قلبها .. انا سهـــــــــــــى اللي ضحت بكل شي عشان آرثر وسعادته .. انا سهـــــــــــــى اللي استغلني آرثر عشان شهواته النفسيه .. انا سهـــــــــــــى اللي ضحك آرثر علي واوهمني بحبه لين لين حبيته وبعدين رمى فيني بعرض الحائط .. انا سهـــــــــــــى اللي ضيع آرثر مستقبلي وضيع شرفي عشان متعته هو وعشان نفسه وبس ولا اهتم في شعور انسانه وهي انا .. وطبعا مو انا الوحيده .. ضحك على الكثير الكثير من البنات اللي قبلي وبعدي .. انا سهـــــــــــــى اللي بسببه حملت وعرفوا اهلي اني حامل وضربوني وذوقوني انواع الشتايم والسب والضرب والصخت وكل شي بسبب واحـــــــــــــد حقيـــــــــــــر وواطـــــــــــــي .. حبيته وهو ما اهتم ابد ولا قدر مشاعري .. عالاقل لو ابعدني عني وقال اني اكرهج احسن من انه يضيعنـــــــــــــي جذي .. والله حرام حـــــــــــــرام ..
وجلست تبكي بهدوء .. فلف آرثر وهو مصدوم لناحية اسيل .. يبي يشوف وش ردت فعلها .. ما كان حاسب حساب هاذا اليوم ..
اما اسيل فكانت تطالع قدام وفي الفراغ .. صدمـــــــــــــتهـــــــــــــا كبيــــــــــــــــــــــــــره مــــــــــــــــــــــــــرره ..
آرثر بهدوء: اسيل .. اسيل ترى ما .. ترى ..
فنزلت دمعه على خدها وبدأت شفايفها ترتجف ولفت بهدوء تطالع في آرثر بنضرات غريبه مليانه دموع .. نضرات لوم وعتاب وكره وحقد واستحقار وقهر وكل المعاني السيئه ..
قامت سهى ومسحت دموعها وقالت لأسيل: صدقيني انا آسفه .. بس ما قدرت اشوفه يضحك عليج واسكت .. ما ييت إلا عشان احذرج منه .. لو كنتي تحبينه طنشي هذا الحب عشان ما تضيعين نفسج .. آرثر لعـــــــــــــاب ولعـــــــــــــاب بقوه وما يهتم بأي شي .. انا سمعت انه لعاب بس حبي له اعماني .. بلييز يا حياتي اتركيه وانتبهي لنفسج .. لا تكونين غبيه مثلي .. انا دلخه واكتشفت في الوقت الضايع والمتأخر .. احمي نفسج من بدري .. وآسفه اذا ازعجتج ..
ولفت وراحت .. واسيل إلى الآن تطالع في آرثر بنفس النضرات وبدأت دموعها تنهمر بكثره .. وشهقت ودموعها زادت ..
آرثر بترجي: اسيل بلييز انتي فاهمه غلط .. انا
فمدت ايدها وقالت بصوت مخنوق: كفايه ..
فطالع فيها بحزن .. فأعطته نضره وبعدين راحت بسرعه ..
آرثر بسرعه: اسيــــــــــــــــــــــــــل ..
ولحقها بس .. بس ضيعها مع زحمة الطلاب ..

================================================== ==================