شبكة همس الشوق - عرض مشاركة واحدة

9 - 3 - 2014, 07:54 PM

في وقت انتهاء دوام الجامعه وعند قروب اسيل ..
سارا: يا بنات ما صارت .. اسيل غايبه لها ثلاث ايام .. مو من عادتها تغيب قد جذي ..
ليان: والمشكله موبايلها مغلق ..
ندى: انا رحت يوم الجمعه عندها للبيت فقابلتني امها وقالت اسيل تعبانه وما راح تقابل احد ..
لين: انا اليوم بروح لها ..
ندى: انصحج لا .. لأن امها شريره ..
لين: وانا شعلي من امها .. انا ابي اسيل مو امها ..
ندى: بكيفج .. روحي وتلقي التهزيء ..
لين: خلوها بس تتجرأ ترفع صوتها علي .. والله اني لأنسيها حليب امها ..
ليان: لين وويع .. عيب هذي اكبر منج وام رفيجتج ..
لين: طيب بكون محترمه بس شوي ..
سارا: ما تلاحضون انه فيه شخص ثاني كمان اختفى ..
ندى: مين ..؟!
سارا: آرثر ..
ليان: ايه صح ما عاد صرت اشوفه ..
ندى: اسيل وآرثر .. الامر مايطمن ..
لين: لقيتها ..
سارا: ايش ..؟!
لين: انا راح اقولكم كيف اختفوا آرثر واسيل .. آرثر لمن شاف حالة اسيل يوم الثلاثاء قال لازم ازورها .. واكيد بعد فتره عرف بيتها وزارها وعرف انها تعبانه فركبها معاه عشان يوديها المستشفى .. في الطريج يت شاحنه ودعستهم .. الله يرحمهم ..
ندى بصدمه: فال الله ولا فالج .. عمى في شكلج .. سكتي بليز ولا عاد تتحجين ..
ليان: لين شهالكلام ..؟!
لين: امزح امزح ما كان قصدي ..
ندى: لا تمزحين في امور زي جذي ..
سارا: اقول بنات من رخصتكم سواقي ياء ..
لين: باااي ..
فراحت سارا .. طالعت ندى في ساعتها وقالت: اكيد اخوي ياء انا كمان .. بااي ..
فراحت ندى وخرجت برى الجامعه فشافت اخوها موقف سيارته في الجهه الثانيه من الشارع .. فجت بتقطع الشارع بس ..
...........: نــــــــــــدى ..
وقفت ندى وطالعت ورى فشافت آرثر ..
ندى: اهلين آرثر ..
آرثر: كيفج ..؟!
ندى: تمام ..
آرثر: ندى وين اسيل ..؟!
ندى: تعبانه ..
آرثر: اعطيني عنوان بيتها ..
ندى: اسفه يا آرثر بس .......
آرثر: لا تكملين كلامج .. اعطيني عنوان البيت وانا اوعدج ان اسيل ما راح تعرف انج انتي اعطيتيني اياه .. واوعدج اني ما ادخل البيت ولا ادق بابه .. ندى بليز حسي فيني واعطيني .. ندى انا ما قمت آكل ولا اشرب ولا انام من كثر ما افكر فيها ..
طالعت ندى فيه فتره بعدين قالت: اوكي راح اعطيك بس تظل عند وعدك ولا تدق باب البيت او تدخل ..
آرثر: طيب ..
فتحت شنطتها وطلعت قلم وورقه وكتبت له العنوان فأخذه ..
آرثر: مشكوره ..
وراح ركب سيارته وخرج من الجامعه ..
طالع في العنوان واتجه له .. يبغى يشوفها .. خلاص مو قادر يتحمل ..
آرثر: ان شالله تكوني مويوده يا اسيل ..
فتح درج سيارته واخذله حبة بندول .. كان يحس بصداع خفيف ويبغاه يهدأ ..
بعد نص ساعه من البحث وصل عند البيت .. وقف سيارته وفتح الشباك يطالع في البيت ..
لف عيونه على الشبابيك لعل وعسى يشوفها بس للاسف كلها مقفله .. طالع في باب البيت فتره طويله لعل اسيل تطلع بس كمان للاسف الباب ما زال مقفل ..
آرثر: اسيل ما يصير جذي بسرعه اطلعي ..
قعد حول ساعه وكل شي على حاله ..
آرثر: راح انتضرك حتى لو قعدت للصباح ..
بعد نص ساعه شاف باب البيت ينفتح ..
آرثر: يارب هي يارب هي ..
خرج الاب وباين عليه معصب وخرج وراه فارس ..
آرثر: وين بيروحون ..؟! لحضه ندى قالت ان اسيل تعبانه .. عيل يمكن تكون في المستشفى وابوها واخوها بيروحون يزوروها ..
فحرك سيارته ولحقهم ..
بعد فتره وقف ابو فيصل سيارته قدام المستشفى ..
استغرب آرثر وقال: مستشفى الميانين ..؟! ليه مين داخل ..؟! لحضه ....
وتذكر كلام حاتم عن اللي صار لأسيل ..
آرثر: معقوله قطوها في هالمستشفى ..؟؟ مستحيل ..
نزل من سيارته واتجه للمستشفى ودخله .. راح للاستعلامات وسأل عن اسيل الرملي ..
الاستعلامات: انت تسأل اذا كانت اسيل في هالمستشفى ..؟!
آرثر: ايه ..
الاستعلامات: والله ما ادري شقولك .. هي كانت في هالمستشفى بس هربت ..
فأنصدم آرثر .. يعني فعلا هي في ذا المستشفى ..
آرثر: مـ مشكور ..
مشي آرثر بهدوء وخرج من المستشفى وهو مو قادر يصدق ان اسيل صارت مجنونه ..
ركب سيارته واسند راسه ع الدركسون ..
آرثر: مستحيل مستحيل .. اسيل مو مينونه .. ما اصدق .. كانت دايم تضحك ودايم تستهبل مستحيل تكون مينونه .. اكيد في غلط ..
فتذكرها يوم شافها في الكلاس تبكي وكان هذا هو اول لقاء بينهم .. وتذكر لمن اعطاها الهديه قد ايش فرحت واستانست ..
تذكر وتذكر وتذكر .. مو قادر يصدق ان البنت اللي عرفها صارت مجنونه ..

================================================== ==================

اما عن راشد .. رجع من الجامعه ودخل البيت ..
راشد بصراخ: شهــــــــــــــــــــــــــــــــــــد وويــــــــــــــــــــــــعوه ..
جت شهد وقالت بهدوء: نعم ..
راشد: نعامه .. لا تقولين نعم ..
شهد بهدوء: طيب شقول ..؟!
راشد: اي شي بس نعم لا ..
شهد: طيب ..
راشد: شهد ..
شهد: سم ..
راشد: سم الله بدنج .. لا تقولين سم ..
فهزت راسها وقالت: طيب ..
راشد: شهد ..
شهد: ها ..
راشد: هاوي ان شالله .. حتى ها لا تقولينها ..
طالعت فيه وقالت: حاضر ..
راشد: شهد ..
سكتت فتره بعدين قالت: لبيه ..
راشد: امون عليج عشان تقولين لبيه ..؟!
فنزلت دموعها وقالت: طيب شقول ..؟!
راشد: اي شي غير اللي قبل ..
شهد: ..................
راشد: شهد ..
شهد: هلا ..
راشد: حتى هلا لا تقولينها ..
شهد: .................
راشد: شهدوه ..
شهد: ..............
راشد: ليش ساكته ..؟!
شهد: ما باجي شي اقوله ..
راشد: إلا باجي ..
شهد: صح باجي ..
طالع فيها بعصبيه وقال: شمعنى كلامج ..؟! كأنج تضحكي على عقلي لمن تقولين صح باجي ..
فشهقت وقالت: شسوي ..؟! كل ما قـ........
راشد: جــــــــــــب ولا كلمه .. روحي يبي الغدا ..
شهد: طيب ..
وراحت ودخلت المطبخ وجهزت الاكل وهي حابسه البكاء بصعوبه ..
جهزت الاكل على الطاوله بعدين راحت لغرفتها وانسدحت على السرير وبكت .. حياتها كابوس وكابوس طويل ..
شهد: وينج يا يمه وينج ..؟! ابوي انت وينك كمان ..؟! ابيكم والله ابيكم .. ابي ارتاح مثل زمان .. ابي الكابوس اللي انا عايشه فيه ينتهي .. بس شكلي راح اموت وانا هنا في ذا الحلم .. اكرهه اكرهه اكــــــــــــرهه ..
وكملت بكائها .. فوقفت لمن سمعت جوالها يدق .. اخذته وشافت سهام اللي اتصلت ..
ردت وقالت: الو ..
سهام: الو هلا بشهد ..
شهد: هلا ..
سهام بإستغراب: شهد شفيه صوتج ..؟! كنتي تبجين صح ..؟!
فبكت شهد وقالت: سهام ..
سهام بخوف: شفيج يا شهد .. ليش تبجين ..؟! رشود سوالج شي او اذاج ..؟!
شهد: امي يا سهام ..
سهام: شفيها امج ..؟!
شهد وهي تبكي: ماتت .. امي ماتت يا سهام .. ماتت وتركتني ..
فانصدمت سهام من كلامها وقالت: خلاص يا شهد اهدي ..
شهد بصياح: شنو اللي خلاص ..؟! امي ماتت يا سهام .. امي حياتي كلها ماتت .. شلون بعيش من دون ام ..؟! سهام تخيلي نفسج في مجاني شنو راح تساوين ..؟! كيف بتعيشين ..؟! شلون راح تتقبلين حياتج ..؟! ماتت امي وتركتنا كلنا .. ماتت وخلتني عند هاذا المتوحش .. تخيلي يا سهام لمن قلت له امي ماتت شنو قال ..؟! قال وإذا .. امج مو اول وحده تموت .. بالعكس راح تفتكين من فرد يزيد المصاريف عليج .. اكــــــــــــرهـــــــــــــــــــه .. ذا مو بشر .. اكرهــــــــــــه ..
سهام: خلاص انتي اهدئي يا شهود ولا تهتمين لكلامه .. ذا واحد مينون رسمي ولا يحب احد .. شهوده لا تضايقين نفسج جذي .. ادعي لها افضل من انج تبجين .. لأن البجاء يخليها تتعذب في القبر ..
شهد: سهام خلاص انا كارهه حياتي هنا .. ابي اترك الشغل واعيش مع اخواني ..
سهام: طيب خلاص استقيلي واتركي الشغل هذا افضل لج ..
شهد وهي تبكي: ما يبي .. راشد منعني وقال غصب عنج تشتغلي ..
سهام بعصبيه: لا والله زودها هالاخ .. مو بكيفه يمنعج ..
شهد: انتي ما تدري يا سهام ان راشد متحكم فيني بكل شي .. وغصبا عني راح اشتغل من دون لا انطق بأي كلمه ..
سهام بضبط اعصاب: الجلب .. آآآخخ لو بس هو عندي جان علمته اصله ..
راشد بصراخ: شهــــــــــــــــــــــــدوه وويعــــــــــــــــــــــــــــــــــــوه ..
شهد بسرعه: باي يا سهام راشد يناديني ..
سهام: عمى في شكله .. اوكي باي ..
قفلت شهد الجوال وراحت بسرعه عند راشد فشافته جالس مع اخته ..
شهد: نعم ..
راشد: نعامه ترفسج .. لا عاد تقولين نعم ..
شهد: طيب ..
راشد: ييبي لروان غدا ..
طالعت شهد في طاولة الاكل وقالت: بس الاكل يكفي لأكثر من اثنين ..
راشد بعصبيه: مالج شغل .. صلحي اللي قلته لج وانتي ساكته ..
شهد: حاضر ..
وراحت .. فكانت فيه شغاله تنضف الصاله وكانت تطالع فيهم ..
جت الشغاله عند راشد وقالت: بابا راشد ..
راشد: جم مره اقولج لا تقولين بابا ..
الشغاله: حادر .. بس انت واجد قاسي .. شهد امها في يموت .. هي مسكين واجد .. دايما تبكي وتبكي عشان ام .. حرام تخاصم هي ..
راشد بعصبيه: وانتي شدخلج ..؟!
الشغاله: بس حرام شهد مسكين .. كون طيب شوي عشان لا تبكي كثير ..
راشد بعصبيه: روحي لشغلج ولا تتليقفين يالحيوانه ..
الشغاله: حادر .. بس ترا شهد مافي ام مافي اب .. هي زعلانه واجد ..
راشد بصراخ: ماتفهميــــــــــــن يالجلبــــــــــــه ..
الشغاله بخوف: حادر حادر بابا ..
وراحت بسرعه للمطبخ ..
راشد: غبيــــــــــــه ..
طالعت روان في راشد وقالت: ام شهد ماتت من جد ..؟!
راشد: ايه ماتت ..
روان: مسجينه ..
راشد: عساها بسجين .. لا تقولين مسجينه ..
روان: بس هي من جد مسجينه .. ابوها مات فأضطرت تترك دراستها وتشتغل عشان اهلها وبعدين اشتغلت وشافت الويل من صاحب الشغل وبعد كل ذا تموت امها .. انا لمن ماتت امي كنت بنين شلون شهد ..؟!
راشد بعصبيه: روان انا شقلت ..؟!
روان: اوكي آسفه .. بس بسألك سؤال ..
راشد: اسألي ..
روان: انت ليه دايم معصب ..؟!
ضبط راشد اعصابه وقال: عشان البيئه اللي حولي باااااردين وما يسمعوا الكلام ..
روان: واااااو جواب رائع ومنطقي ..
راشد بقلة صبر: رواااان وبعدين ..
روان: سوري سوري ..
جت شهد وحطت الاكل فقال راشد: ليه كل هذا التأخير ..؟!
شهد: اسفه ..
راشد: بسرعه تقلعي عن ويهي ..
شهد: طيب ..
وراحت وروان تطالع فيها لين راحت ..
روان: راشد البنت باين عليها انها كانت تبجي ..
راشد: احسن ..
روان: راشد امها مالها اسبوع من يوم ماتت .. خف عليها هذي الفتره بس .. حرام تزيدها فوق ما تتحمل .. مسجينه والله ..
طالع راشد في روان فتره فقالت: علشاني يا رشودي ..
هز راشد راسه بعدين قال: شهــــــــــــد ..
جت شهد وقالت: نعم ..
راشد: روحي غرفتي واغسلي جدرانها كلها والستاير وفرش السرير والبوتيك ونضفي المكتب والدولاب والكرسي والتحف وبعدين نضفي الميلس من اوله لين آخره من مكتبه وكنب وجدران وبوتيك والمزهريات وبعدين روحي غسلي الحوش كله والسطح .. اوكي ..
طالعت شهد فيه بصدمه وقالت: بس ....
راشد: لا بس ولا غيره .. نفذي اللي قلته قبل لا ازيد ..
نزلت راسها وقالت: حاضر ..
وراحت .. لفت روان على راشد بسرعه تطالع فيه بصدمه وقالت: راشد ...
راشد: احسن .. عشان لمن اقول تسكتين تسكتين فاهمه .. واذا قلتي كلمه ثانيه بخليها تنضف البيت كله ..
حطت روان ايدها على فمها وهزت راسها بلا وقالت: بسكت بسكت ..
راشد: هههههههه احسن عشان تحرمين مره ثانيه تعانديني ..

اما عن سهام .. قفلت جوالها وقعدت فتره تفكر ..
سهام: اقسم بالله انك جلب يا راشدوه ..
دخلت امها وفي ايدها عبايتها وقالت: غريبه .. شمقعدج في الصاله ..؟!
سهام: يمه وين كنتي ..؟!
الام: كنت عند ام عبدالله .. بنتها يابت طفل ورحت اباركلها ..
سهام: ولل ذي البنت متى بتوقف عن الولاده .. هذا سابع ولد ..
الام: سهاموه وويع .. قولي ماشالله ..
سهام: يمه تبيني اقول ماشالله عشان تييب الثامن .. لا والله ما راح اقول ..
الام: صج انج جليلة ادب يا سهاموه ..
سهام: عادي هذي مو اول مره تقوليلي جذي .. صرت متوقعه اي سبه .. عادي عادي تعودت ..
اخذت سهام جوالها فجلست الام وقالت: بمين بتتصلين ..؟!
سهام: بطارق ..
الام: اللحين ..؟!
سهام: ايه اللحين عيل باجر ..
الام: لا لا تتصلين ..
سهام: وليه ..؟!
الام: اللحين وعلي عليه توه راجع من الجامعه وتعبان ويبي يرتاح .. اتصلي عليه في المغرب او العشا ..
سهام تقلد امها: وعلي عليه توه راجع تعبان .. يمه ليه جذي ليه ..؟!
الام: بسم الله الرحمن الرحيم شفيج ..؟!
سهام: حرام عليج يايمه حرام ..
الام: سهاموه شفيج ..؟!
سهام: انا بنتج والله بنتج .. ليه تفرقين بيني وبين طارق ..؟! طارق ممنوع احد يزعجه او يضايقه او يأذيه بأي كلمه .. وانا بستين داهيه عادي .. لو احد ضايقني عادي .. لو احد زعلني عادي .. ليش ..؟! حتى لمن تنادينه تقوليله طروقي ولدي حبيبي .. اما انا تقوليلي سهاموه وويع .. ايش الاضطهاد هذا ..؟! نفسي مره وحده بحياتي بس تناديني عدل .. لا تقوليلي سهومتي ولا سهوم .. ابيج بس تقولين سهام .. يمه بليز بس قولي سهام عشان ارتاح ..
الام: هههههههههههههههههههههههههههههههههههههههههههههههههه .. احسن تستاهلين ..
سهام: وليه ..؟!
الام: لسانج طويل وما تحترمين احد .. لو انج مثل اخوج عسل وطيبه وحنان جان دلعتج ..
سهام: حتى لمن اكون طيبه تقوليلي ..
قلدت سهام امها وقالت: سهاموه شعندج .. هذا الادب والاحترام مو لله .. بسرعه خلصيني وقولي شتبغين ..؟!
الام: لأنه مستحيل تصلحين شي من دون مصلحه ..
سهام: ماكو فايده .. طارق ولدج وانا بنت البطه السودا صح ..؟!
قامت الام وقالت: الحجي معاج ضايع .. اروح لغرفتي ابرك لي ..
وطلعت فوق ..
سهام: آآآه يا دنيا ..