شبكة همس الشوق - عرض مشاركة واحدة

9 - 3 - 2014, 07:55 PM

دخل وائل لجناح اسيل ومعاه اكياس غدا من برا .. راح لغرفة الطعام وبدأ يجهز الاكل على الطاوله وبعد ما خلص لقى اسيل نايمه في نفس مكانها اللي امس ..
وائل: اسيل .. اسيل اصحي ..
اسيل: ....................
وائل: اسيل ياللا قومي عاد .. كل هذا نوم ..
فتحت اسيل عيونها ببطئ وقعدت تطالع حوليها ..
وائل: ياللا قومي اغسلي ويهج عشان تصحصحين عدل ..
جلست على الكنبه وطالعت في الجناح وقالت: وين انا ..؟!
وائل: انتي في فندق الـ******** ..
فلفت اسيل حوليها وقالت: يعني مو في المستشفى ..؟!
وائل بإبتسامه: لا مو بالمستشفى .. مو احنا هربنا منه امس .. مسرع نسيتي ..
فتذكرت اسيل وقالت: صح ..
وائل: ياللا قومي غسلي ويهج وتعالي كلي ..
اسيل: وين فارس ..؟!
وائل: ما يقدر يي اللحين ..
اسيل: وليش ..؟!
وائل: عشان ابوه ما يدري .. مو انتي قلتي ما ابي ابوي يعرف مجاني ..
اسيل: ايه ..
وائل: عيل ما يقدر يي إلا لمن ابوج يكون مشغول عشان لا يدري ..
نزلت راسها وهزت بإيه ..
وائل: اسيل شفيج ..؟!
نزلت دموعها وقالت: ابي فارس ..
وائل: خلاص خلاص راح يي بس انتي لا تبجين ..
هزت راسها وقالت: طيب ..
وائل: ياللا قومي اللحين ..
اسيل: متى بيي فارس ..؟!
وائل بكذب: اليوم المغرب او العشاء ..
قامت اسيل وغسلت وجهها ونزلت العبايه وبعدين جلست على طاولة الاكل وبدأت تاكل ..
وائل: اسيل ..
اسيل: نعم ..
وائل: بننزل اليوم السوق اوكي ..
طالعت اسيل فيه وقالت: ليش ..؟!
وائل: عشان نشتري لج هدوم يديده واغراض ثانيه .. مثلا اللحين ما عندج غير لبس العامل ولبس المستشفى قطيناه .. حتى الجزمات ما عندج .. يعني لازم ننزل السوق ..
اسيل: طيب ..
وائل: متى تبين تنزلين ..؟!
سكتت فتره بعدين قالت: بدري عشان يمدينا نرجع وننتضر فارس ..
وائل: طيب خلاص .. شرايج بعد الغدا ننزل عشان نشتري ..
اسيل: طيب ..
وائل: خلاص انتي كلي وبعدين تجهزي وانا راح اشيل الاكل ..
اسيل: طيب ..
وائل: اسيل ..
اسيل: نعم ..
وائل: شفيج هاديه .. بس تقولين طيب وبس .. ليه ما تتحجين زي اول ..؟!
فنزلت دموعها وقالت: مابي اتحجى .. وائل بليز اتركني بحالي ولا تكلمني ..
وائل: اوكي براحتج حياتي ..
طالعت اسيل فيه فجأه وقالت: حياتي ..!! ليش تقول حياتي ..؟!
فطالع وائل فيها وجاء بيتكلم بس سبقته وقالت بصراخ: لا ‏‏‏‏‏‏‏‏تقـــــــــــول حياتــــــــــــي .. انت اكيد تبي تسوي سوات آرثر .. اذا كنت مثل آرثر فأنا اكرهــــــــــــك .. تعرف شنو يعني اكرهــــــــــــك ..؟! اكرهــــــــــــك كثر ما اكره آرثــــــــــــر .. اكرهــــــــــــــــــــــــك ..
وائل: اسيل خلاص اهدئي ما كان قصدي .. انا متعود اقول حياتي لأي احد حتى اخواتي ..
طالعت فيه والدموع في عينها وقالت: صج ..؟!
وائل: ايه صج ..
فقامت وقالت: شبعت ..
وائل: بالعافيه .. البسي العبايه لأنه ما يصير تمشي جدام الناس بذي الملابس وبعدين البسي جزمتي .. انا عندي جزمه ثانيه في السياره ..
هزت راسها وراحت .. قام ورتب الطاوله وهو يفكر ..
وائل: آرثر ..؟! يمكن هو اللي سحرها .. لأن اللي في اسيل مو ينون .. اللي فيها سحر .. آرثر .. مين يكون ..؟! اسمه مو عربي وهذا معناته اجنبي .. بسأل فارس يمكن يعرف احد اسمه آرثر ..
رتب كل شي وبعدين وقف عند باب الجناح ينتظر اسيل ..
خرج واحد من الجناح اللي جنبه ولمن شاف وائل عصب وجاء عنده .. استغرب وائل لمن شافه جاي ..
الولد بعصبيه: انت هيه ما تستحي على ويهك ..؟!
وائل بإستغراب: ليه شسويت ..؟!
الولد: ليه واقف عند باب الجناح ..؟!
وائل: انتضر اهلي على ما يخلصون ..
الولد: لا ما توقف على الباب .. افرض اختي طلعت من جناحي .. اكيد بتقعد تقز فيها وتغازلها ..
رفع وائل حاجبه وقال: شنو ..؟! اغازل ..؟! الله يديك عقل ياخي ..
الولد: لا تقعد تستخف .. اسمع يا انك تنتضر اهلك داخل او في السياره .. بس عند الباب لا ..
وائل: اذا كان الفندق فندق امك تعال وتكلم اوكي ..؟!
الولد: لا تحدني اشتكي عليك ..
وائل: ياعمي اشتكي للي تبيه .. انا ما سويت شي غلط عشان تقعد تهايط وتهدد ..
الولد: احترم نفسك احسن ..
وائل: يا شيخ طير قبل لا اطيرك انا ..
الولد: انا مصعب ابن ابوي تقولي بأطيرك .. ما عاش من قالي بأطيرك ..
طلعت اسيل وقالت: ياللا ..
وائل: ياللا ..
قفل الباب فقال مصعب: اهلي واهلي وفي النهايه ميرد بنت ..
وائل: مالك شغل ..
طالعت اسيل في الولد فتره .. فاستغرب مصعب من نضراتها ..
مصعب: هيه هيه شفيج تناضريني جذي ..؟!
لفت اسيل وراحت المصعد ..
وائل: احسن سافهتك ..
وراح وائل وركب معاها المصعد ..
مصعب بعصبيه: عمى في شكلك انت وياها .. ما اكون انا مصعب ولد ابوي إما راويتكم شغلكم .. هين ..
ركبت اسيل السياره وركب وائل في الجهه الثانيه وقال: اي سوق تبين ..؟!
اسيل: اي شي ..
وائل: خلاص بوديج لـ***** اوكي ..؟!
اسيل: طيب ..
فحرك وائل السياره بعدين قال: ها كيف الجزمه .. يت على مقاسج ..؟!
طالعت اسيل في الجزمه بعدين هزت راسها بلا ..
وائل: ان شالله اول شي اشتريه هو جزمه لج اوكي ..؟!
اسيل: طيب ..
بعد فتره وقف عند السوق ونزل هو واسيل وراحوا محل للاحذيه ..
وائل: شتبين ..؟!
سكتت ولا قالت شي ..
اخذ جزمه وقال: شرايج بذي ..؟!
اسيل: طيب ..
وائل: يعني اشتريها ..؟!
اسيل: .....................
وائل: خلاص البسيها ..
اسيل: طيب ..
فلبستها ووائل حاسب وبعدين راحوا محل ملابس واختار وائل لها اللبس لأنه ساكته وما تبدي رايها بأي شي ..
اخذت اللبس من وائل وراحت غرفة التبديل وبدلت ملابسها وخرجت والعبايه وملابس العامل في ايدها ..
اخذها وائل من ايدها وقال: شكلج وايد روعه .. اللحين راح نشتري لج اكثر من لبس اوكي ..؟!
اسيل: طيب ..
فتنهد وائل: ياللا معاي ..
وراح واشترى لها اكثر من لبس وبعدين اشترى لها شوية اكسسوارات وعطورات وشوي مكياج وراح محل الكترونيات واشترى لها جوال جديد واشترى لها كاميرا واشترى اشياء ثانيه يمكن تفرحها او تشغلها ..

================================================== ==================

في المغرب وفي شقة انس وطارق ..
انس: لا ما ابي ..
طارق: بس انا ابي ..
انس: طارق بلييز غير القناة لأني ما ابيها ..
طارق: بس انا ابيها ..
انس: طارق قسم بالله ان ما غيرت راح اقوم عليك ..
طارق: ياويلك انا مو ناقصك ولا ناقص جسمك ذا ..
انس: ليه وش فيه جسمي ..؟!
طارق: واحد ياكل ليل نهار وش تبي يكون جسمه ..؟!
انس: طارق حرام عليك ماني بدب ..
طارق: مو دب بس حجمك كبير .. اقصد وزنك اكثر من وزني ..
انس: ليه شدراك عن وزني ..؟!
حرك طارق حواجبه وقال: شفتك اليوم وانت توزن نفسك وتقول معقوله زد اثنين كيلو في شهر ..
انس: عمى في شكلك .. ما تعرف شي اسمه استئذان قبل لا تدخل غرفتي ..
طارق: كانت مفتوحه شسوي ..؟!
انس: طيب قول احم ابي ادخل ..
طارق: ليه داخل على حريم انا ..؟!
انس: صج انك بايخ ..
فابتسم طارق ولف عالتلفزيون يطالع فيه .. فاخذ انس جواله وقعد يقلب فيه ..
تذكر شي وقال: طارق ..
طارق: ها ..
انس: وشو اللي ها ..؟! قول نعم ..
طارق: قول وشتبي وخلصني ..؟!
انس: ما شفت اسيل من بعد ما كانت متضايقه ذاك اليوم ..
طارق: وانا شدخلني ..؟!
انس: لا بس بغيت اقولك انها من ذاك اليوم وهي غايبه .. شتتوقع هو السبب ..؟!
طارق: مالي شغل فيها عشان اهتم واعرف ليه غابت ..
انس: يوووه منك .. انسان غريب ..
طارق: انس اليوم طلال غايب .. تتوقع ليش ..؟!
انس: وانا شدخلني فيه .. يغيب براحته ..
طارق: شفت كيف .. انا مالي شغل في اسيل زي انت مالك شغل في طلال ..
انس: بااايخ ..
طارق: مشكور .. ورجاءا لا تفتح اي موضوع يخص اسيل بعد اللحين اوكي ..؟!
انس: وليش ..؟!
طارق: بس ..
انس: انـ............
دق جرس البيت ..
انس: اكيد ميار ..
قام وفتح الباب فشاف ميار واقفه بإبتسامتها ..
ميار: هلا ..
انس: اهلين تفضلي ..
ميار: مشكور ..
دخلت بالصينيه وقالت: اهلين طارق ..
قام طارق وقال: هلا والله كيفج ..؟!
ميار: تمام ..
حطت الصينيه على الطاوله الصغيره وانس وطارق يطالعون في الصينيه بحذر ..
انتبهت ميار لهم: ههههههههه اطمئنوا ماما اللي سوتها مو انا ..
انس: هههههههه لا عادي مافي مشكله ..
ميار: ايه واضح ..
جلسوا وقال طارق: طيب ايش اللي في الصينيه ..؟!
ميار: حلى التوفي ..
انس: وااااو يينن ..
طارق: كل شي يخص الاكل يينن عندك ..
ميار: ههههههه بروح اييب صحون لكم وملاعق ..
قامت ودخلت المطبخ .. فقام طارق ودخل الغرفه عشان يجهز الدفاتر والاقلام ..
جت ميار وجلست عالكنبه عشان تجهز ..
انس بصراخ: لاااااا تيلسيــــــــــــن ..
فأنفجعت وقامت بسرعه وقالت: ها ..
انس: لا تيلسين ..
ميار: ليه وش فيه ..؟!
انس: كنبة طارق وياويلج لو يلستي عليها .. انا مره يلست وشفت الويل منه ..
ميار: عمى عبالي فيه شي ..
فجلست في كنبه ثانيه وقعدت تقطع الحلى وتحطه في الصحون ..
ميار: اقول انس ..
انس: نعم ..
ميار: عن شنو كنتم تسولفون قبل لا ايي ..؟!
انس: اشياء كثيره .. اولا تهاوشنا على القناة وبعدين تكلمنا عن الوزن وبعدين عن الادب عند دخول الغرف وبعدين تكلمنا عن بنت في الجامعه اسمها اسيل ..
ميار: منهي اسيل ..؟!
انس: انا ما اعرفها عدل .. اسألي طارق هو يعرف عنها كل شي ..
فطالعت ميار في انس فتره طويله بعدين قالت: شلون يعرف عنها كل شي ..؟!
قال انس وهو يقلب في التلفزيون: صديقته ويعرف كل شي عنها ..
ميار بهدوء: صديقته ..؟!
فجاء طارق وجلس على الكنبه وقال: جاهزه للدراسه ..؟!
ميار: لا اول شي خلنا ناكل الحلى ..
طارق: اوكي ..
فقدمت ميار الحلى لهم وقالت: ذوقوا واحكموا ..
انس: مو لازم نذوق لأننا واثقين ان اكل امج روعه ..
ميار: ههههههههههه طيب ذوق وتكلم ..
فذاقه انس وقال: شفتي قلت لج ان اكل امج دايم روعه ..
ميار: وانت يا طارق ..
طارق: ......................
ميار: طــــــــــــارق ..
طارق: ها ..
ميار: وين رحت ..؟!
طارق: هنا هنا ..
ميار: طيب كل يا طارق ..
طارق: اوكي راح آكل ..
انس: وانا قوليلي كل ..
ميار: إلا انت لو ماتاكل يكون احسن ..
طارق: هههههههههههه ..
انس: لهدرجه انا طايح من عيونكم ..
ميار: انت خفف وتكون تمام ..
انس: ههههه ما راح آكل جدامكم عشان لا تقولون دب ..
طارق: عيل بتاكل من ورانا ..؟!
انس: ايه ..
طارق: اشوه انك علمتنا ..
اكلوا واخذت ميار الصحون وقالت: بغسلها وبأيي عشان تبدأ تذاكر لي ..
طارق: اوكي ..
قامت وشالت الاكل .. لف انس على التلفزيون وقعد يقلب فيه .. دق جوال طارق .. طالع المتصل وشافه اخته ..
قام وراح لغرفته ورد وقال: هلا بسهام ..
سهام: هلا بأخوي كيفك ..؟!
طارق: تمام كيفج انتي ..؟!
سهام: بخير .. اقول طارق ..
طارق: هلا ..
سهام: طارق ابيك تيي عندنا وتاخذني عندك للدوحه ..
طارق: ليش ..؟! لا تقولين بتزورين رفيجتج شهد ..؟!
سهام: ايه بزورها ..
طارق: لا ..
سهام: وليش ..؟!
طارق: في الاجازه زوريها .. اللحين احنا في وقت ضغط بالمراجعات والاختبارات وما اقدر اييج ..
سهام: طيب انت ما سألتني ليش بتزورينها ..؟!
طارق: كالعاده بتقولين مشتاقه لها ..
سهام: لا ..
طارق: عيل شنو ..؟!
سهام: بعزيها ..
طارق بإستغراب: وشو ..؟!
سهام: المسجينه امها ماتت ..
سكت طارق بعدين قال: لا حول ولا قوة إلا بالله ..
سهام: قبل سنتين ابوها مات واللحين امها ماتت .. صارت يتيمه هي واخوانها الصغار الاربعه .. حالتها وايد صعبه .. لازم ازورها عشان اخفف عليها ..
طارق: خلاص بييج الاربعاء اوكي .. كوني جاهزه ..
سهام: ليه مو باجر ..؟!
طارق: ما اقدر يا سهام .. هذي الايام مهمه وغلط اني اغيب .. بأييج الاربعاء واوديج عندها خلاص ..
سهام: اوكي ..
اما ميار فغسلت الصحون وخرجت الصاله فأستغربت لمن ما شافت طارق ..
ميار: وين رفيجك يا انس ..؟!
انس وهو مندمج في التفزيون: يكلم ..
فمشيت ميار وجلست تقلب في الكتب والدفاتر .. فطاحت ورقة مراجعه من الدفتر ودخل تحت كنبة طارق ..
فقامت وراحت للكنبه ودخلت ايدها بصعوبه عشان تتطلع الورقه .. فمسكت شي ثاني مع الورقه ..
ميار: شذا ..؟!
خرجت الورقه والشي الثاني .. هذا الشي كان سلسال بحرف a‏ ‏..
ميار: لمين هذا السلسال ..؟! ما دامه تحت كنبة طارق فهذا يعني انه يخصه .. لحضه هذا حرف ألف .. لا يكون حق البنت اللي قال انس انها صديقة طارق .. اسيل ..
ضغطت على السلسال بقوه وقالت: هذا يعني انه يحبها ..
رجعت السلسال تحت الكنبه وقالت لنفسها: "خلاص لا تفكرين بطارق يا ميار .. طارق يحب اسيل .. انسي طارق واعتبريه ميرد استاذ لج" ..
قامت وحطت الورقه داخل الدفتر وهي تفكر ..
جاء طارق وقال: ها تأخرت عليج ..
هزت راسها بلا ..
طارق: عيل نبدأ الدروس ..
ميار: طيب ..
فبدأوا بالدرس وميار كانت مرتبكه واستيعابها كان متوتر وبطيء .. حس طارق ان فيها شي بس ما سألها ..

================================================== ==================

في صباح يوم الاثنين .. قامت دانا وجهزت نفسها للجامعه ..
دانا: يوووه احس نفسي لي دهر ما رحت الجامعه ..
جهزت نفسها بالكامل بعدين خرجت .. كانت بتفطر بس لمن شافت عادل جالس يفطر بطلت وخرجت من دون لا تكلم احد ..
ركبت السياره واتجهت للجامعه ..
وقفت السياره فجأه وقالت بإستغراب وخوف: شفيني ..؟! احس انه فيه شي مو طبيعي راح يصير لي اذا رحت الجامعه .. انا احساسي ما يخيب .. الله يستر ..
حركت سيارتها وهي حاسه بخوف من احساسها اللي ما يخيب ابدا ..
وقفت في المواقف ودخلت الجامعه .. تأملتها فتره بعدين اتجهت لناحية الشله ..
وقفت فجأه وقالت في نفسها: "انا لي فتره ما شفتهم .. اخاف لمن يشوفوني ياخذوني بالاحضان وهذ اللي انا ما ابيه .. يا ربي شسوات" ..
دانا: لقيتها ..
راحت عندهم وكان عماد وسامي ويزيد بس موجودين ..
دانا: السلام عليكم ..
طالعوا فيها بعدين قاموا وقال عماد: سلامات يا عادل واخيرا طلعت ..
دانا: ايه الحمد لله .. والله ودي اسلم عليكم لأنكم وحشتوني بس الدكتور قالي انتبه لا تحتك بأحد عشان العمليه ..
سامي: سلامات سلامات .. بعدوا خلوه ييلس ..
فبعدوا .. ابتسمت دانا بإنتصار وجلست وهي حدها فرحانه ..
يزيد: ها كيف تحس اللحين ..؟! ان شالله تمام ..؟!
دانا: ايه الحمدلله تمام ..
سامي: زرناك اكثر من مره بس كنت نايم ومانعينا نزورك ..
دانا: ايه علمني ريان ..
عماد: والله وحشتنا وايد ..
دانا: تسلمون ..
سامي: فاتك يا عادل اللي صار امس ..
دانا: شصار ..؟!
سامي: اسمع ..<< وطبعا حكالها كل شي بالتفصيل << ..
دانا: حرااام ..
عماد: لا احسن يستاهل ..
يزيد: اهم شي يا عادل لا تقوله اننا احنا اللي يبنا الجرو .. والله العظيم انه ما راح يعديها على خير ..
دانا: طيب ..
سامي: يا حليلك يا عادل .. اقسم بالله انك عسسل ..
انحرجت دانا وسكتت ..
يزيد: اقول عادل ..
دانا: نعم ..
يزيد: الشرطه حققوا معاك ..
دانا: ايه بس كل شي مشي تمام ..
سامي: غصبا عنهم يمشونه تمام .. تصدق يا عادل انهم لو حبسوك كنت راح اطلعك بالواسطه ..
دانا: تسلم ..
عماد: اخس يا سامي محد قدك .. والله وتعرف الصداقه عدل ..
سامي: من يومي محد قدي ..
يزيد: اكره النوع اللي يثق في نفسه زياده .. احسهم يرفعون ضغطي ..
سامي: بسم الله عليك يا زيودي .. لا تهتم راح ادخلك مستشفى خاص واعالجك على حسابي ..
............: ما تلاحضون ان الاخ سامي قاعد يهايط ..؟!
...........٢: ايه انا لاحضت ..
لفوا ورى وشافوا شلة غيدا ..
لف سامي وجهه عنهم وقال: اوووووف شيبون ذولا بعد ..؟!
غيدا: انا اقولك ايش ابي .. اطين عيشتك يا سامي .. وانا عند وعدي لك اني اخليك تكره توقف في ويهي او تطل حتى ..
لف عليها وقال: نعم شتبين ..؟!
غيدا بدلع: ابييييييك ي حبي ..
صاحباتها: هههههههههههههههههههههههههههههههههه ..
يزيد: ضحك من سركم بلا .. شهالضحكه ..؟! كأنه صوت جرس بيتنا ..
عماد: ههههههههههه الله يخسك يا يزيد .. شهالتمثيل ..؟!
خلود: ها ها ها محد ضحك ..
ففقع يزيد وعماد ضحك عليها ..
غدير: الحمد لله والشكر .. ماودكم تسكتون لأني بديت احس باستفراغ من ريحة فمكم .. متى آخر مره فرشتم اسنانكم ..؟!
تهاني: ههههههههه ما اضنهم يعرفون شكل الفرشاه والمعجون ..
غدير: هذا اللي واضح ..
غيدا: لحضه لحضه .. مو هذا رفيجكم اللي سبب الغاز ..؟!
فطالعوا في دانا .. فحست دانا بإرتباك لأن الانضار متوجهه لها ..
سامي: ايه هو .. شتبين ..؟!
غيدا: بغيت اقولك انتبه مره ثانيه لأن صدري تعب من ريحة الغاز اوكي ..؟!
دانا: طيب ..
سامي بعصبيه: وانتي شدخلج ..؟! مين تكونين عشان تؤمرينه جذي ..؟! شوفي نفسج عدل بعدين تحجي ..
صفرت غيدا وقالت: تعرف تدافع عن اخوياك .. اهنئك على روحك الرائعه ..
سامي: سخيفه ..
غدير: يا عادل ..
لفت دانا على غدير وطالعت فيها ..
غدير: ممكن اسألك سؤال ..؟! من يوم ما شفتك وانا ابي اسألك هذا السؤال ..
حست دانا بالخوف من ذي البنت وقالت: اسألي ..
غدير: انت عادل عبدالعزيز حسن صح ..؟!
خافت دانا انه لا تكون تعرفهم .. فقالت بارتباك: ايه ..
ابتسمت غدير ابتسامه جانبيه وقالت باستهزاء: متأكد ..؟!
طالعت دانا فيها وهي بقمة الخوف وقالت: ايه ..
غدير: جذاب ..
فانفجعت دانا من ردها .. لا يكون عارفه بشي ..
غيدا: غدير شفيج ..؟! وليه تجذبين الولد ..؟!
سامي: خير يا استاذه غدير .. عادل ادرى بأسمه ومو منتضر منج تقوليله صح او غلط ..؟!
يزيد: اذا ما كان عندج سالفه فروحي احسن لج ..
غدير: ليه ما تتكلم يا .."وبإستهزاء" يا عادل ..؟!
اما دانا تطالع في غدير وهي بتموت خوف من داخل ..
غدير: طيب عندي استفسار واحد بس .. ممكن تياوب عليه يا عادل ..؟!
هزت دانا راسها بإيوه وهي خايفه من هذا الاستفسار ..
غدير: اوكي .. اللي اعرفه انه عادل بن عبدالعزيز حسن مشلول .. انت ليه مو مشلول ..؟!

\\انتهى الجزء الثاني من البآرت الخامس//
// توقعاتكـم عن الاحداث في هذا الجــزء \\
\\اتوقع انكم عرفتم مين بسام صح ..؟! وش تفسيـركم للحلم اللي تحلمته امه ..؟!//
// اروى وســامي .. تتـوقعـون اروى حتسكـت وتنســاه ولا لا ..؟!\\
|| وش بيصير مع دانا .. بتنكشف ولا لا ..؟!||
\\وش هو رايكم باللي تسويه وصايف .. هل هو صح ولا غلط ..؟!//
// مين اللي سحر اسيل ..؟! في البارت الجاي حتعرفوا بس ابغى جواب الآن ..؟! \\
\\انتضروني في الجزء الاخير من البارت//
// مع تحيات محبتكم :: صرخة المشتاقه \\
بليييز لا تنسوا التقييم اوكي ..؟؟!!

|$[ نهاية الجزء الثاني ]$|