شبكة همس الشوق - عرض مشاركة واحدة

9 - 3 - 2014, 08:46 PM

في المغرب كانت دانا جالسه في الصاله تذاكر وكل شوي تلف تشوف غرفة اخوها وتلقاها مقفله ومحد طلع ..
قفلت كتابها بعد ماراجعته للمره الثانيه .. طالعت في ساعتها وقالت: باجي ساعه ..
قامت وراحت لغرفتها وجهزت ملابسها عشان بتروح الشغل وتتركه نهائيا وتاخذ راتبها ..
جلست عالسرير وهي تفكر وقالت: ليش سامي غايب ..؟! مستحيل الواحد يغيب ايام الامتحانات إلا ويكون عنده سبب قوي جدا .. طيب ليش غاب ..؟! وليش موبايله مغلق ..؟! نفسي اعرف ليش ..؟! سامي هذا انسان جدا غريب .. مره احس انه صايع لآخر درجه .. ومره احس ان الدنيا عنده وناسه وبس .. ومره احس انه اغبى مخلوق عالارض .. ومره احس ان هموم الدنيا كلها عنده ..
سكتت فتره طويله بعدين قالت: دانا .. ما تحسين نفسج مهتمه فيه بزياده وكل شوي تفكرين فيه ..؟!
انسدحت عالسرير وقالت: هذا شي طبيعي لأنه واحد من الشله ..
سكتت بعدين قالت: طيب انتي مهتمه فيه اكثر من باجي الشله ليش ..؟!
طالعت في السقف وهي تفكر بعدين قامت وخرجت الصاله وشافت غرفة اخوها مازالت مقفله ..
تنهدت بإنكسار ورجعت للغرفه ولبست ملابسها وبعدين انسدحت تفكر بكل شي بحياتها ..
بعد نص ساعه خرجت وركبت سيارتها واتجهت لمكان الشغل ..
وقفت السياره وهي حاسه بخوف لأن المكان اللي وقفت فيه السياره كان مظلم ..
دخلت ودورت بعيونها على صلاح بس ما شافته ..
طاحت عيونها في عيون نايف وشافته يبتسم ..
لفت عيونها بسرعه ودخلت لمكتب المدير مشاري ..
مشاري: اهلين عادل ..
دانا: هلا ..
مشاري: ليش الغياب اللي صار يكثر ..؟!
دانا: عندي ضروف ..
مشاري: آها .. طيب شكنت تبغى ..؟!
دانا: ابغى اترك الشغل ..
مشاري بتفاجئ: وشو ..؟!!! طيب ليش تتركه ..؟!
دانا: عندي ضروف خاصه ..
مشاري: اوكي براحتك بس الافضل انك ما تتركه لأنها شغله وايد حلوه وراتبها وايد زين ..
دانا: كان بودي بس ما اقدر ..
مشاري: خلاص بكيفك ..
خرج مشاري اوراقها يطالع فيها ويحسب بالآله الحاسبه لين طلع الراتب المستحق لها ..
راح صرفه وبعدين اعطاها اياه ..
مشاري: خساره انك تروح .. شغلك كان وايد زين .. اذا كنت تبي ترجع تشتغل مره ثانيه فالمجان مفتوح لك ..
دانا: مشكور ..
مشاري: خلاص روح يا ابني وانتبه على نفسك ..
دانا: ان شالله .. مع السلامه ..
مشاري: مع السلامه ..
خرجت دانا من المكتب واتجهت لسيارتها وهي ماسكه الفلوس تعدها ..
وقفت عند السياره وقالت: المبلغ وايد حلو ..
دخلت الفلوس في جيبها وفتحت باب السياره ..
انفجعت لمن احد سحب ايدها وقفل باب السياره ..
لفت ورى وشافته نايف مثل ما توقعت ..

.................................................. ......

اما عن عادل فكان في غرفته جالس ويفكر في دانا .. رن جواله وكان صاحبه طلال فرد ..
عادل: هلا طلال ..
طلال: اهلا فيك .. كيفك وشخبارك ..؟!
عادل: الحمد لله تمام ..
طلال: اقول عادل ..
عادل: نعم ..
طلال: صحيح اللي سمعته ..؟!
عادل: ليش وش سمعت ..؟!
طلال: علي ..
عادل: وشفيه ..؟!
طلال: يقول انك علمته منو اللي صدمك ..
سكت عادل بعدين قال: يعني ..
طلال: يعني وشو ..؟!
عادل: هو اكتشف بنفسه ..
طلال: يعني هو راشد الشعلان ..
عادل: وانت شدراك ..؟!
طلال: علي عرف اسمه وقالنا ..
عادل: اوووف من علي .. اخاف ينوي على شي ..
طلال: هو نوى وخلص ..
عادل: شتقصد ..؟!
طلال: قبل شوي قال والله لأربي راشد وخرج وباين انه ناوي حاجه جايده .. وحمد طلع معاه ..
عادل بصدمه: انت متأكد ..؟!
طلال: ايه متأكد وعشان جذي اتصلت عليك عشان اتأكد منك يمكن ما يكون راشد هو اللي صدمك ..
عادل: باي يا طلال ..
وقفل الجوال واتصل على علي بس محد يرد واتصل على حمد وكمان محد يرد ..
عادل: يا ربي وش ناويين ذولا عليه ..؟!

.................................................. ......

اما علي كان في سيارته وقال: شكل الخبر وصل لعادل وعشان جذي يتصل علينا ..
حمد: فعلا .. بس يا علي ..
علي: نعم ..
حمد: انت شناوي عليه بالضبط ..؟!
علي: لمن نوصل اقولك ..
حمد: علي لا يكون شي جايد ..
علي: لا .. بس بآخذ بهذا المثل اللي يقول الجزاء من جنس العمل ..
حمد: شتقصد ..؟!
علي: لمن نوصل راح تفهم ..
حمد: قلبي مو مطمئن منك ابدا ..
علي: هههههههههه ليه ..؟!
حمد: ما ادري بس احس انك ناوي على شي جايد مثل عاداتك ..
علي: افا شكلي طايح من عينك ..
حمد: من زمان ..
وقف علي السياره وقال: وصلنا ..

انتهى الجزء الاول من البآرت السادس .. الاسئله كلها تبدأ بوش توقعاتكم فأتمنى انكم تفكروا بالاجابات ومو لازم تحلونها ..
>> وش توقعاتكم عن ريما بعد ما عرفت انها مدمنه ..؟!
>> وش توقعاتكم عن شهــد بعــد ما جابت اخوانهــا ..؟!
>> وش توقعاتكم عن اللي يصير لسامـــي بالضبــط ..؟!
>> وش توقعاتكم عن اللي بيصير بين دانـا ونايــف ..؟!
>> وش توقعاتكم عن اللي بيسويـــه علــي لراشـــد ..؟!
>> وش توقعاتكم عن اسيل بشكل عام في هالجــزء ..؟!
صراحتا الجزء كان حلو وان شالله الاجزاء القادمه تكون احلى واحلى بس احتاج تعاون وتشجيع منكم ..
انتضروني في الجزء الثاني من البآرت السادس ..

محبتكم •°• ـصرررخة لـ‏‎أـمشتاقهـ •°•

|$[ نهاية الجزء ]$|