شبكة همس الشوق - عرض مشاركة واحدة

10 - 3 - 2014, 06:45 PM

في العصر في ولاية ليفربول وفي منطقة آرينا ..
كان سامي واقف قدام شي ويطالع فيه بإنبهار ..
سامي: واااه روعه ..
وليد: هذه هي العجله الكبيره .. تعتبر معلم سياحي ..
سامي: تينن ..
اشر وليد عاليمين وقال: شوف هذا محل PIZZA EXPRESS‏ ‏.. شرايك نروح ناكل فيه .. جدا روعه بس طبعا غالي ..
سامي: لا لا مب يوعان .. ابي اتمشى .. الاماكن جدا روعه ..
وليد: اوكي براحتك ..
فقعدوا يمشون وقال وليد: احس انك شخص غريب ..
سامي: وليش ..؟!
وليد: يعني انت ولد الراهي ومع هذا فهذه هي اول مره تشوف هذه الاماكن .. يعني شي غريب ..
سامي: ههههههه ..
وليد: ليه تضحك ..؟!
سامي: ماكو سبب .. المهم بغيت اسألك ..
وليد: وشو ..؟!
سامي: انت هنا لوحدك ..؟! يعني اهلك معاك ولا لا ..؟!
وليد: لا انا ياي لوحدي ..
سامي: ما تحس بالطفش ..؟!
وليد: لو كنت حابس نفسي في الشقه جان طفشت بس انا اتمشى والفلف واروح مع ربعي ..
سامي: عندك ربع ..؟!
وليد: ايوه .. بس سحبت عليهم عشان امشيك .. كسرت خاطري ..
سامي: احلف يا شيخ ..؟!
وليد: لا لا مب لازم ..
سامي: واااااااااو ..
وليد: بسم الله شفيك ..؟!
سامي: هذا الشي حلو ..
لف وليد حواليه وقال: وشو ..؟!
اشر سامي قدام وقال: هذا ..
طالع وليد في هذا الشي بعدين سحب سامي وهو يقول: اشش فشلتنا ..
سامي: ليش ..؟!
وليد: ما تشوف مكتوب عليه Faith ..؟!
سامي: وش دخلني باللي مكتوب عليه .. انا ابي ادخله ..
وليد: يا سامي هذا معبد يا غبي ..
سامي: ها ..؟!
لف يطالع شوي بعدين قال: معابدهم حلوه ..
وليد: امش امش لا يشوفنا اللحين واحد عربي وبعدين يقول اننا كفار ..
سامي: هههههههه ..
وليد: اللحين ليش تضحك ..؟!
سامي: تخيلت شكل واحد عربي ضخم يي عندنا ويصفقنا ويقول آه يا جليلين الحياء تركتم دينكم من اجل ملذات الدنيا ههههههههههه ..
وليد: ههههههههههههه ..
وقف سامي من الضحك وقال: وليد وليد ..
وليد: نعم ..
سامي: شفت ذاك الريال اللي لابس تيشيرت اصفر ..
وليد: وين ..؟!
سامي: اللي واقف عند اللوحه السماوي ..
وليد: أي واحد فيهم ..؟!
سامي: اللي ماسك في ايده علبة بيبسي ..
وليد: ايوه .. شفيه ..؟!
سامي: شفت نظارته ..؟!
وليد: ايوه ..
سامي: مثل نظارة واحد من ربعي بقطر ..
وليد: اللحين مقروشني وشف ذاك واللي كذا وواقف هناك وفي النهايه عشان نظاره تشبه نظارة واحد من ربعك ..
سامي: وحشوني ..
وليد: ربعك ..؟!
سامي: ايوه ..
وليد: طيب اتصل عليهم واهرج معاهم لين تطفش ..
سامي: ياليتني ما رميت الورقه ..
وليد: اي ورقه ..؟!
سامي: ياخي ما توقعت نفسي بندم ..
وليد: تندم على ايش ..؟!
سامي: تتوقع لو دورت الورقه بحصلها ..؟!
وليد: ياخي انت عن ايش تتحجى ..؟!
هز سامي راسه وقال: لا لا مو ندمان ..
وقف وليد وقعد يطالع فيه ..
تنهد سامي وقال: والله اني ندمان وقاعد اقنع نفسي اني مو ندمان ..
سكت سامي فتره وقال: من فين بطلع الرقم ..؟!
لف على وليد وقال: شفيك وقفت ..؟!
وليد: انتظرك تخلص حديثك مع نفسك ..
مشي سامي وجلس على وحده من الكراسي الجانبيه وقال: وليد ..
جلس وليد وقال: نعم ..
سامي: ابي ارجع قطر ..
رفع وليد حاجبه وقال: مو انت تقول ما ابي ارجع ابدا وهنا حلو ..
سامي: مدري .. اول كان تفكيري غبي واللحين اشتقت لربعي ..
وليد: طيب ارجع ..
سامي: بس المشكله ان ابوي رافض ويقول كمل الجامعه برى ..
وليد: ههههه شكل كل الاباء جذي ..
سامي: وليد عندك طريجه تخليني اقنع ابوي وارجع ..؟!
وليد: ما اظن .. في بداية دراستي حاولت بشتى الطرق بس ماكو فايده ..
جاء بيتكلم سامي بس لف وجهه وعطس مرتين ورى بعض ..
وليد: ههههههههه وانت إلى الآن ما تعودت عالجو ..؟!
سامي: لا .. ياخوفي اني اصخن للمره الرابعه ..
وليد: ياخي اهتم بنفسك شوي .. الاجواء هنا غير قطر تماما ..
سامي: يصير خير ..
وليد: اقول سامي ..
سامي: ها ..
وليد: لا تقول ها ..
سامي: ههه طيب .. نعم شبغيت ..؟!
وليد: سولف لي عن اهلك ..
سامي: ماكو غيري انا وابوي ..
وليد: ما عندك اخوان ..؟!
سامي: لا ..
وليد: طيب اعمام ..؟!
سامي: ههههههههههههههههههه ..
وليد: انت شفيك كل شوي تضحك فجأه ..؟!
سامي: اضحك على نفسي ..
وليد: وليه ..؟!
سامي: عندي عم وبنت عم بس ما عمري شفتهم إلا وانا طفل .. ولا اعرف اي شي عنهم .. حتى اسمائهم ما اعرفها ..
وليد: انت من يدك ..؟!
سامي: ايه من يدي ..
وليد: ايش السبب ..؟!
سامي: مشكله قديمه صارت بين ابوي وعمي ومن بعدها تقاطعوا ..
وليد: طيب ما فكرت تسأل ابوك عن عمك وبنته ..؟!
سامي: لا .. ابوي كثير السفر وشغله كثير وما نيلس مع بعض ..
وليد: طيب ببساطه ..
سامي: وشو ..؟!
وليد: ابوك تاجر كبير ومعروف في معظم دول العالم واكيد عمك مثله .. ادخل عالنت وابحث معلومات عن الراهي في مجالات التجاره والصناعه واكيد بتقرأ اسم عمك ..
سامي: خلاص مو لازم لأني مو مهتم بالامر ..
وليد: بس هذا عمك ..
سامي: وإذا ..
وليد: طيب عالاقل تعرف منهي بنت عمك ..
سامي: هههههههههههههه ..
وليد: يووووه رد وضحك مره ثانيه ..
سامي: بنت عمي ضايعه من طفولتها ويمكن ماتت ..
وليد بصدمه: شنــــــــــــــو ..؟؟؟!!!
سامي: اللي سمعته ..
وليد: انت من صجك .. طيب ما فكرتم تدورون عنها ..؟!
سامي: مدري .. هي ضاعت بعد ما صارت الهوشه بين ابوي وعمي .. يمكن عمي دور عنها ويمكن لا ..
وليد: وامها ما دورت عنها ..؟!
سامي: اللي اعرفه ان امها ماتت .. بس يمكن ماتت ويمكن لا ..
وليد: والله انكم غريبين يا عائلة الراهي ..
سامي: فعلا ..
سكت وليد فتره وقال: ياخي انا متأكد اني سمعت عن عائلة الراهي من قبل ..
طالع سامي فيه وما قال شي ..
وليد: تذكرت ..
سامي: طيب فين سمعته ..؟!
وليد: اتوقع اني سمعت بسام قال شي عن الراهي ..
سامي: ومين بسام ..؟!
وليد: رفيجي .. بس ما اتذكر متى قاله ..
طالع فيه سامي فتره بإستغراب بعدين قال بعدم اكتراث: مو بس احنا لقبنا الراهي .. في ناس كثير لقبهم جذي ..
وليد: وانت الصاج ..
سامي: ياللا قوم نروح لهذا اللي قلت اول عنه ..
وليد: ايش ..؟!
سامي: اللي اسمه حوض سفن الملوك ..
وليد: آها .. طيب ياللا امش ..
لف على سامي وقال: نسيت اسألك شي ..
سامي: ايش ..؟!
وليد: ليه لمن ادق عليك ما ترد ..؟!
سامي: لأني حاطه عالصامت واذا شفت مكالماتك اتصل عليك ..
وليد: وليش عالصامت ..؟!
سامي: السواق بس يتصل علي لأني صرت اخرج من البيت كثير ويقول ان ابوي يقولك خفف طلعاتك .. بس انا بعاند وبزيد طلعاتي ويمكن انام برى بعد ..
وليد: هههههه ما تخاف ابوك يهزئك ..؟!
سامي: ههههه اذا اتصل فموبايلي عالصامت ..
ضحكوا وبعدين كملوا لفلفه في شوارع ليفربول ..

================================================== ==================

الساعه سبعه المغرب كانت ريما جالسه في غرفتها وهي حدها متوتره ومقهوره وخايفه ..
متوتره من منصور اللي جاء قبل شوي هو وعائلته وجالسين تحت ..
مقهوره من الطريقه اللي بتتزوج فيها .. هي ريما الرملي والمفروض ما تتزوج من واحد زي كذا وبطريقه زي كذا ..
بس الضروف اجبرتها .. لو ما وافقت فراح تبقى مدمنه إلى اجل غير مسمى ..
ولو ماوافقت فأحتمال انه يعلم فارس عنها او فيصل او ابوها ..
ولو ماوافقت راح يجي الشرطي هنا وتصير فضيحه ..
اذن توافق احسن لها ..
واللحين هي حاسه بخوف .. خوف من المستقبل .. منصور كيف بيعاملها وايش نظرته لها ..؟!
تذكرت كلامه :: "سمعيني عدل .. شهر .. شهر بس .. شهر واحد بس راح اتزوجك بعدين اطلقج اوكي"
ريما: شوفي غبائج وين وصلج ..؟! خلال شهر راح تشيلين اسم مطلقه ..
حست بالعبره تخنقها .. مافي وحده بالدنيا تبغى تحمل هالاسم ..
غمضت عيونها تمنع دموعها من النزول ..
ريما: آآآآخ يا ريما .. حياتج تدمرت بسبة هالياسر الله لا يسامحه ..
عضت على شفتها وقالت: انا السبب .. انا اللي دمرت نفسي .. انا اللي خربت حياتي بإيدي ..
انسدحت عالسرير تريح نفسها شوي ..
سرحت شوي بأفكارها ..
قامت ووقفت قدام المرايه وطالعت في نفسها بغرور وقالت: هو الخسران مو انا .. واذا طلقني شفيها ..؟! مليون واحد يتمنى هالجمال وهالرقه وهالنعومه .. الحمد لله انا ما سويت شي غلط عشان اندم .. كل اللي صار بسبة ياسر .. انا مالي شغل ..
ابتسمت برضى على تفكيرها .. مستحيل تسمح للي صار انه يهزها ابدا ..
ريما بإبتسامه: انا ريــمــا الــرمــلــي مو اي وحده ..

اما عن الاب وفارس فكانوا في المجلس مع منصور وابوه ..
الاب: والله صراحتا يشرفنا نسبكم واذا علي فأنا ما عندي مانع بس لازم ناخذ راي البنت ..
ابو منصور: هذا شي اكيد .. رايها اهم ..
منصور: لو سمحت يا عمي ..
الاب: نعم ..
منصور: اذا ما عليكم امر تقدرون تاخذون رايها اللحين ..؟!
ابو منصور: ههههه الولد مستعيل ..
الاب: ماراح تقدر تفكر بسرعه ..
منصور: معليش ياعمي عالاقل اسألها ..
الاب: هههه طيب من عيوني .. انا استأذن ..
ابو منصور: اذنك معك ..
خرج الاب فلف ابو منصور على ولده وقال: وانت شفيك مطيور عالزواج .. اركد ..
فارس: ههههههه اتركه براحته يا عم ..
اما عن الاب فطلع فوق ودق الباب على ريما ..
ريما: ادخل ..
دخل الاب وشافها جالسه عاللاب ..
ريما: اهليين بابا ..
الاب: اهلين بحبيبة بابا .. شقاعده تسوين ..؟!
ريما: يالسه عالمنتدى ..
الاب: طيب يا حبيبتي ابي اكلمج بموضوع ..
قفلت ريما وقالت: تفضل ..
الاب: اسمعي يا حبيبتي ..
حبت ريما تختصر الموضوع فقالت: اسيل قالتلي ان في احد ياء يخطبج ..
الاب: ههههههه الله يهديها هالاسيل .. متى لحقت تعلمج ..؟! طيب تعرفين مين هو الريال ..؟!
ريما: ايه .. رفيج فارس .. اسيل قالتلي كمان ..
الاب بإبتسامه: طيب شرايج ..؟!
ريما بإحراج مصطنع: رايي من رايك يا بابا ..
الاب: ما عليج في رايي .. اهم شي انتي ..
ريما: طيب باجر برد عليكم .. اول شي لازم استخير ..
الاب: خذي راحتج يا حبيبتي ..
ريما في نفسها: "بس اخاف منصور يعصب .. وانا شعلي فيه .. بس لحظه نسيت الشرطي" ..
ريما: خلاص انا موافقه ..
الاب: لا لازم تستخيرين اول ..
ريما: بابا خلاص انا موافقه .. انا حاسه براحه ..
الاب: اوكي براحتج مع اني توقعت انج ترفضين ..
ريما: افا طايحه من عينك ..
الاب: مبروك يا حبيبتي ..
وحضنها فقالت: الله يبارك فيك ..
قام الاب وقال: ياللا بروح اقولهم على رايج ..
خرج من الغرفه ونزل تحت فقابل ام فيصل ..
الام: ها شقالت ..؟!
الاب: موافقه ..
فزغرطت الام من الفرحه ببنتها الوحيده ..
الاب: ياء ولدج فيصل ولا لا ..؟!
الام: لا والله ما ياء ..
عصب الاب .. المفروض في يوم زي هذا يكون موجود ..
دخل للمجلس فقال منصور: وش قالت ..؟!
الاب: ههههههه خلاص وافقت ..
ابتسم منصور وقعدوا يهنونه ..
اما فارس فكان في قمة استغرابه .. هو يعرف اخته تمام المعرفه ..
هز كتفه وقام يهني منصور ..
منصور: يا عم ابغى الزواج بعد ثلاث ايام ..
انصدمــــــــــــــــــــــــــــوا من كلامه ..
ابو منصور: منصور شتقول انت ..؟!
الاب: ههههههه اكيد يقصد ان الخطوبه بعد ثلاث ايام ..
منصور: لا يا عم .. انا ابغى الزواج بعد ثلاث ايام ..
فارس: منصور انت من يدك ..؟!
منصور: ايه من يدي ..
انصدموا بجد من كلامه .. ابو منصور استغرب من كلام ولده بس مع هذا وقف مع ولده وحاول فيهم ..
وكلمه من هنا وكلمه من هناك .. ونقاشات دامت حول ساعه ..
ابو منصور: طيب انتم خذوا راي البنت .. اذا وافقت فالله يتمم بخير واذا رفضت فبراحتها ..
الاب: انا واثق انها ما راح توافق .. البنت ما يمديها تشتري ملابس لها وتجهز نفسها ..
منصور: اذا ما امداها فبعد الزواج انا بنفسي بنزلها للسوق تشتري كل اللي تبغاه ..
الاب: طيب انتم ليش مستعيلين جذي ..؟!
سكت ابو منصور لأن ماعنده رد ..
فجاء بيتكلم بس منصور سبقه وقال: انا امتلك شركه بإيطاليا فبسافر اسبوعين عشان اديرها بس ابوي رافض وقال ما تسافر لوحدك .. حاولت مع امي انها تسافر معاي فرفضت .. حاولت مع اختي فكمان رفضت .. فقررت اتزوج واسافر مع زوجتي ..
الاب: والسفره هذه ما تتأجل شوي ..؟!
منصور: حاولت أأجلها لمدة اربع ايام بس ..
ابو منصور: خلاص يا ابو فيصل لا تكبر الموضوع .. كلموا البنت ..
تنهد الاب وقال: يصير خير ..
اما عن مجلس الحريم فكانت الام واسيل وام منصور جالسين ..
ام منصور: ألا وينها العروس ما نشوفها ..؟!
الام: فوق .. شكلها مستحيه شوي ..
ام منصور: هههههههه الله يحفضها لكم ..
الام: ان شالله ..
ام منصور: اذا ما عليكم كلافه نادوها .. ودي اشوف زوجة ولدي الوحيد .. ابي اعرف ذوقه ..
الام: ههههه اكيد بيكون ذوقه تمام مادام اختار بنتي الوحيده ..
لفت اسيل تطالع فيها بدهشه ..
اسيل في نفسها: "بنتي الوحيده ..؟؟!! طيب وانا ..؟؟!!" ..
الام: اسيل روحي نادي ريما بسرعه ولا تتأخري ..
طالعت اسيل فيها فتره بعدين هزت راسها وطلعت لغرفة ريما ..
اسيل في نفسها: "اكيد امي ما انتبهت .. بس هذي مو المره الاولى .. قد قالتها قبل جذي" ..
تنهدت وقالت: كل الناس يغلطون واكيد امي كمان غلطت ..
دقت الباب ودخلت ..
اسيل: ريما ام العريس تبي تشوفج ..
ريما: ها ..
اسيل: ام منصور تبي تشوفج ..
ريما: اوووف يبغالي اتجهز ..
تذكرت اسيل وقالت: يوووه نسيت مبرووووووك ..
ريما بدون نفس: الله يبارج فيج ..
طالعت اسيل فيها بإستغراب بس ما قالت شي ..
لفت بتطلع بس قالت ريما: لحضه لحضه ..
اسيل: نعم ..
ريما: اسمعي .. انا قلت لأبوي انج انتي قلتيلي انه ياني عريس من اول .. لو سالج لا تقولين لا فاهمه ..؟!
اسيل: طيب ..
لفت وطلعت .. وهي نازله كان ابوها طالع ..
الاب: اسيل شفيج ..؟!
اسيل بإبتسامه: مافيني شي ..
الاب: والله اني شاك ..
اسيل: هههههههه ..
ونزلت .. طلع الاب وقال لريما واللي صدمه انها وافقت ..
حاول معها وفهمها الموضوع زين من كل النواحي بس كانت مصره على الموافقه بحجة انها تبي تسافر لإيطاليا لأنها ما عمرها شافتها ..
فاستسلم الاب لرغبتها ونزل للمجلس ..
دخل والكل يطالع فيها ..
جلس وقال: صراحتا زي ما قلنا يشرفنا نسبكم وباجر بيي المملك ويوم اليمعه الزواج ان شالله ..
ارتاح منصور لأنه كان متوقع انها ترفض وتعاند ..
فبدؤا يتكلمون الرجال وفارس مصدوم ..
اخته وافقت بسرعه .. اكيد فيه شي ..
وبدأ الشك ياكل قلبه بس تعوذ من الشيطان وراح يبارك لصاحبه ..

..............................................

جاء يوم الثلاثاء ..
في العصر راحت اسيل للسوق وقابلت آرثر ..
اشتروا غرفة نوم بملتزماتها وهو اصر انها تروح معاه البيت عشان امه تشوفها ..
حست بالاحراج بس راحت واستغرب ان قصر آرثر قريب من جامعتهم ..
الام حبت اسيل كثير وارتاحت لها وقالتلها انهم بيجون يخطبوها يوم الخميس ..
وفي المغرب رجعت للبيت وجاء المملك وملك بين منصور وريما ..
والزواج طبعا يوم الجمعه ..

================================================== ==================