شبكة همس الشوق - عرض مشاركة واحدة

10 - 3 - 2014, 06:51 PM

في احدى مجموعات شركات سعد المحدوده ..
كان الرئيس سعد جالس على كرسيه وقدامه فيصل ..
الرئيس: بالصعوبه قدرت اطلعك من سالفة الاستراحه واتمنى انك تنتبه في المره اليايه ..
فيصل: ان شالله .. ههههه اول مره احس انك مفيد لي ..
الرئيس: هههههههه عشان تعرف معزتك عندي قد ايش ..
فيصل: طيب ممكن سؤال ..
الرئيس: اسأل ..
فيصل: كيف طلعتني ..؟!
الرئيس: بالواسطه .. اعرف واحد هناك من الشرطه وبس ..
فيصل: ههههههه طيب مشكور واستأذن انا اللحين لأني تعبان ..
الرئيس: اذنك معاك ..
فيصل: مع السلامه ..
وخرج من المكتب وركب سيارته وهو يفكر .. "مين اللي بلغ" ..؟!
ابتسم وقال: المهم اني طلعت منها ..
كلها ربع ساعه ووصل بعدها للبيت ..
نزل ودخل فشاف ابوه وامه جالسين في الصاله والام كانت لابسه عبايتها ..
فيصل: السلام عليكم ..
قام الاب وقال: فيصل وين كنت ..؟!
فيصل: رحلة عمل ..
الاب: ليه موبايلك مغلق ..؟!
فيصل: لأنه لازم نغلقه في الرحله ..
الام: خوفتنا عليك ..
فيصل بإبتسامه: لا مو لازم تخافون انا بخير .. يمه ليه لابسه عباتج ..؟!
الام: توي رجعت انا وريما من السوق ..
جلس فيصل وقال: غريبه .. مو من عوايدج تروحين مع ريما السوق ..
الاب: اختك انخطبت وزواجها بعد باجر ..
انصــــــــــــــــــــــــــــدم وقال: ريما ..؟!!!!!!
الاب: ايوه ..
فيصل: شلون وكيف ومتى ..؟!
الاب: لمن كنت برحلتك هذه اللي يت في وقت خطأ .. يوم الاثنين ..
فيصل: يوم الاثنين انخطبت وبعد باجر زواجها .. اكيد تمزحون ..
الاب: لا ما نمزح ..
فيصل بعصبيه: انا ما راح ارضى عالشي هذا .. اختي لازم لها فترة خطوبه وبعدين ملجه والزواج يكون بعد جم شهر مو جذي .. ابوي شصار لعقلك عشان تزوجها بالسرعه هذه ..؟!
الاب: مالك حق تدخل .. ريما راضيه وزوجها راضي والقرار بيدهم ..
فيصل بصدمه: ريما راضيه ..؟؟!! معقوله ريما ترضى بشي زي جذي ..؟؟!!
الاب: انا بنفسي ما كنت راضي بس مادامها تبي جذي فبراحتها ..
فيصل: بس انا ما راح اوافق عالمهزله ذي .. وش بيقولون الناس لو شافوها تتزوج جذي ..؟! اكيد بيقولون انها عملت عمله ويبون يغطون عليها .. ريما اختي وما ارضى عليها هالزواج السريع والغبي ..
الاب بعصبيه: وافقت او ما وافقت فقرارك ما راح يغير شي .. خلاص تحددت القاعه وعزمنا الناس وانتهى كل شي .. والمره الثانيه اذا ييت تكلم ابوك فكلمه بإحترام .. فاهم يا فيصل ..؟!
عض فيصل على شفته من القهر وطلع فوق وراح لغرفة ريما ..
دخل فشافها ترتب الاكياس اللي توها اشترتها ..
فيصل: صحيح اللي سمعته يا ريما ..؟!
انفجعت ريما ولفت تطالع فيه فقالت: فيصل انت ييت ..؟!
فيصل: ياوبي على سؤالي .. صحيح اللي سمعته ..؟!
ريما: ليه وش سمعت ..؟!
فيصل: انج وافقتي تتزوجين زواج سريع في ضرف خمس ايام ..
ريما بإبتسامه: ايوه ..
فيصل بصراخ: ولييييش ..؟! وش اللي حادج تتزوجين جذي ..؟!
سكتت شوي بعدين قالت: الريال ما يعيبه شي وكمان انا طفشت من حياتي الروتينيه وابي اغير ..
فيصل: وعشانج طفشتي تقومين تستعيلين جذي ..؟!
ريما: هههههه بالعكس حلو لأني احس ان قراري تهور ..
فيصل: ريما مو معقول توافقين على جذي ..
ريما: وكمان الريال راح يسافر لايطاليا في شغل وابي اسافر معاه لأني عمري ما سافرت هناك ..
فيصل: طيب انا بسفرك لأيطاليا واسبانيا وكل اللي تبينه اذا كان هذا هو السبب ..
هزت راسها بلا وقالت: انا استخرت وارتحت وزي ما قلتلك ان قراري متهور واعجبني ..
طالع فيها وقال: ريما فكري عدل ..
ريما: خلاص قررت وانتهى الامر ..
فيصل بسرعه: لا ما انتهى .. اذا تبغين تغيرين قرارج فقولي ..
ريما: خلاص انا مرتاحه جذي ..
فيصل: متأكده ..؟!
ريما: ايوه ..
تنهد وخرج من الغرفه فشاف قدامه اسيل خارجه من غرفتها ومتجهزه ..
فيصل: هيه هيه وين رايحه انتي ..؟!
طالعت فيه وقالت: بروح مع رفيجاتي ..
فيصل بصراخ: مافي روحه .. فاهمه ..؟!
اسيل: انا استأدنت من ابوي وهو وافق ..
فيصل: جــــــــــــــب ..
الاب بحده: فيصــــــــــــــل ..
لف فيصل فشافه واقف نص الدرج .. فلف وجهه وراح لغرفته ..
طلع الاب وقال: ها يا اسيل خلصتي ..؟!
اسيل: ايوه واللحين لين تيي ..
الاب: انتبهي على نفسج ..
اسيل: ابوي ..
الاب: نعم ..
اسيل: بسألك سؤال وياوبني بصراحه ..
الاب: اسألي حبيبتي ..
اسيل: تعرف وحده اسمها سميه ..؟!
الاب بإستغراب: سميه ..؟!!!! لا ما اتوقع ..
اسيل: متأكد ..؟!
الاب: ايـ........
سكت فجأه وطالعت اسيل فيه بشك ..
اسيل: ابوي ..
طالع الاب فيها وقال: ما قد سمعت بهالاسم ..
اسيل: ابوي ياوبني بصراحه ..
الاب: صدقيني ان هذه هي الصراحه ..
اسيل: لا انت تجذب علي .. ابوي ابي اعرف منو سميه وابي اعرف شنو علاقتك فيها وبعائلة الراهي كمان ..
طالع فيها بتفاجئ وقال في نفسه: "معقوله وصل لها شي .. لا مستحيل" ..
الاب: انا مب فاهم اي شي من الحجي اللي تقولينه ..
اسيل: لا انت فاهمني وفاهمني عدل .. ابوي انا اللحين بروح ولمن ارجع ابيك تقولي كل شي ولا تخبي عني اي شي ..
لفت ونزل من الدرج وخرجت من البيت ووقفت تنتظر لين وهي سرحانه تفكر ..
سمعت صوت من الفله الكبيره اللي جنبهم ..
لفت فشافت اثنين رجال قاعدين يشيلون شنط ويحطوها في السياره ..
اسيل: هذه سيارة يارنا سلمان .. غريبه يحطون جنطه .. يمكن بيسافر ..
كانت واقفه تنتظر لين وتطالع فيهم بفضول ..
شوي خرج سلمان ووقف يكلم الرجال ..
بعد فتره دخل الرجال وجاء السواق وفتح له الباب ولمن جاء بيركب انتبه لأسيل ..
ابتسم وقال: كيفج يا اسيل ..؟!
كانت اسيل واقفه عند باب الحوش الخارجي وعشان جذي صارت قريبه منه ..
اسيل: تمام .. انت بتسافر صح ..؟!
سلمان: ايوه ..
اسيل: ليش ..؟!
سلمان: عندي شغل في اوروبا .. اخلصه وارجع ان شالله ..
اسيل: متى بترجع ..؟!
سلمان: والله مدري .. يمكن بعد شهرين او ثلاثه ..
اسيل: بتطول كثير ..
سلمان: هههههه هذا شغلي ..
ترددت اسيل بعدين قالت: طيب عادي اسألك سؤال شوي خصوصي ..
سلمان: اسألي عادي ..
اسيل: زوجتك وبنتك كيف ماتوا ..؟!
انقلب وجهه من الصدمه فتلعثم وقال: آ آ كان حادث ..
طالعت اسيل فيه بشك .. واضح انه يكذب بس ما حبت تتدخل اكثر ..
طالع فيها وعرف من نظراتها انها شاكه فيه ..
ابتسم وقال: هذا واحد جذاب .... هذا اللي تقولينه لنفسج ..
اسيل بسرعه: لا لا لا ..
سلمان: انا حأسافر ولمن ارجع بأحكيلج الصج بس عشاني مستعيل الآن وما اقدر اتأخر عالطياره ..
اسيل: لا عادي خذ راحتك ..
سلمان: ياللا مع السلامه ..
اسيل: مع السلامه ..
ركب السياره وانطلق السواق للمطار ..
تنهدت اسيل بعدين قالت: تأخرت لين ..
بعد خمس دقايق وقفت لين سيارتها وفتحت الشباك ..
لين: ها تأخرت ..؟!
اسيل: كثييييير ..
لين: ههههه سوري .. ياللا اركبي .. كل الشله قد وصلوا ..
ركبت وحركوا السياره .. وبعد ثلث ساعه وصلوا واتجهوا للشله ..
سارا: صح النوم ..
لين: سوري بس راحت علي نومه ..
وسن: كيفج يا اسيل ..؟!
اسيل: تمام ..
ندى: هههههههه واخيرا يت اسيل .. ازعجتنا وسن كل شوي تقول متى تيي اسيل ..
اسيل بإستغراب: وليش ..؟!
وسن: لأني ابي اقولج حاجه ..
لين: وانا ما ينفع تقوليلي حاجه ..؟!
وسن: لا .. هذا يخص اسيل وبس ..
اسيل: وايش هي الحاجه ..؟!
وسن: انا لمن رجعت اليوم نمت .. لمن نمت تحلمت فيج ..
اسيل: انا ..؟!!!
وسن: ايوه انتي ..
اسيل بحماس: وشهو الحلم ..؟!
وسن: انج كنتي توج طالعه من فله كبيييره وفخمممه مرآ .. كنتي تمشي رايحه لمجان .. في الطريج مريتي من ينب مستشفى مال الحالات النفسيه .. كان فيه واحد توه طلع منها وقعد يحفر حفره عميقه بعدين راح .. تلخبط الحلم شوي وصارت الحفره كبيييره وما تقدري تشوفي نهايتها .. المهم انتي كنتي تمشي وكنتي تشوفي الحفره ومع هذا مشيتي فوقها وطحتي فيها ..
اسيل بخوف: بسم الله الرحمن الرحيم .. شنو هالحلم ..؟!
لين: هههههههه هذا الحلم اللي كنتي متحمسه له ..
وسن: استنوا .. انا ما خلصت ..
سارا: ليه باجي فيه تكمله ..؟!
وسن: ايوه .. انا كنت في هذاك الوقت ماره فشفتج وانتي طايحه ومحد ساعدج .. رحت جري ويبت واحد خققققه عشان يساعدج ..
اسيل: ها ساعدني ..؟!
لين: البنت متحمسه ..
وسن: مد ايده ومسكج وساعدج مع انج كنتي طايحه في العمق بس ما ادري كيف صار جذي ..
اسيل: الحمد لله .. المهم اني صرت بخير ..
ندى: هههههه شفيج تحمستي مع الحلم ..؟!
سارا: حسستيني انه فعلا صج ..
وسن: اوووووف ..
لين: شفيج ..؟!
وسن: باجي ما خلص الحلم ..
لين: هذا ما صار حلم صار روايه ..
وسن: اصلا ما باجي غير شوي ..
اسيل: كملي ..
وسن: بعد ما ساعدج اعطيتيه كف وقلتي محد طلب منك تساعدني لأني كنت بساعد نفسي بنفسي .. وخلص الحلم ..
لين: افا يا اسيل .. ما توقعت انج ناكره الجميل ..
اسيل: يمممه في الحلم طلعت متوحشه ..
سارا: هههههههههههه ..
ندى: في النهايه اسمه حلم وبس ..
اسيل: ياللا ياللا غيروا الموضوع .. تعالوا نتزلج قبل لا يضيع الوقت عالفاضي ..
ندى: وخلونا نعلم وسن عالتزلج لأنها ما تعرف ..
اسيل: هههههههههه اذا كان مديرنا ما عرف فكيف راح نعرف احنا هههه ..
راحوا لصالة التزلج وجلسوا عالكراسي عشان يلبسوا الجزمات ..
اسيل: ياللا انا خلصت .. بسرعه خلصونا ..
لين: حتى انا خلصت ..
وسن: انا خلصت ..
اسيل: طيب اوقفي ..
وسن: اخاف اطيح ..
جوا اسيل ولين عندها وقالت اسيل: ياللا احنا بنساعدج ..
وقفت وسن وهي سانده ايدها عليها ..
لين: شايفه كيف انه سهل ..
وسن: لا مو سهل .. لأنكم اذا فكيتوني راح اطيح زي دايما .. بابي كان يحاول يخليني اوقف عليها بس ما قدرت ..
اسيل: لا ان شالله تقدرين ..
قامت ندى وسارا وقالت ندى: انتي لا تقولين ما اقدر .. بجذي انتي تحطمين نفسج ..
سارا: يتكم المحلله النفسانيه ..
لين: هههههههههههه ..
اسيل: بنات انا اشم ريحه غريبه ..
لين: ريحة ايش ..؟! انا ما اشم شي ..
اسيل: إلا .. كأنها ريحة مكنسه ..
استغربوا منها وحاولوا يشمونها ..
اسيل: ههههههه اشتغلت الجلاب البوليسيه ..
ندى: والله ما الجلب غيرج ..
لين: فعلا غبيه واااايد ..
سارا: يعني كنتي تستهبلين ..
اسيل: ههههههه ايه ..
لين: وانا مسجينه صدقت وقاعده احاول اشم .. هبله ..
سارا: قال مكنسه قال ..
ندى: خلاص تركوا الهبل وخلونا ندخل الساحه ..
لين: فعلا مانبي نضيع الوقت عالفاضي ..
اسيل: اوكي ياللا ..
وسن: بنات .. وين ريحة المكنسه مالقيتها ..؟!
الكل: ههههههههههههههههههههههههههههههههه ..
طالعت فيهم وقالت بإستغراب: ليش تضحكوا ..؟!
ندى: ههههه ماكو شي .. ياللا امشوا ..
دخلت ندى وسارا ووراهم لين واسيل ماسكين بوسن ..
وسن بخوف: والله بطيح .. خلاص خلاص مابي العب ..
لين: راح تلعبين غصب عنج ..
وسن وهي شوي وبتبكي: مابي مابي تركوني .. مابي العب ..
طالعت فيها ندى وقالت: طيب ليش ..؟!
هزت راسها بقوه وهي تقول: ما ابي العــب ..
تنهدت ندى بعدين قالت: خلاص شكلها ما تبي .. خلوها على راحتها ..
اسيل ولين: واحد .. اثنين .. ثــــــــلاثــــــــه ..
ودفوا وسن بقوه على قدام ..
وسن: آآآآآآآآآآآآآآآآآآآآآآآآآآآآآآه ..
ندى بصراخ: شسويتم ..؟!
غمضت وسن عيونها وهي تصارخ وفي بالها انها اللحين حتطيح ..
بعدوا كل الناس من قدامها ..
جت سارا قدامها ومسكتها فراحوا باقي الشله عندها ..
اسيل: ههههه شرايج .. حلو صح ..؟!
لفت وسن عليهم وعيونها تدمع وقالت بعصبيه: شريرات وخبلات .. ليش ترموني جذي .. لو طحت راح اتعور .. انتم شريرات وايد ..
سارا: لا تخافين .. انا متفقه معاهم انهم يدفونج وانا امسكج من الجهه الثانيه يعني ماراح تطيحين ..
ندى: حتى انتي يا سارا معاهم ..؟! الحركه اللي سويتوها بايخه .. البنت ما تبي فخلوها على راحتها ..
اسيل: لا .. من الآن وصاعدا .. انا ولين ندفها وانتي وسارا تمسكونها .. راح نلعبها غصب عنها .. ما يصير نلعب وهي تطالع فينا ..
وسن بصراخ: سكتــــي يا شرريرره .. مابي العــــب ..
اسيل بصراخ: مو بكيفج .. راح تلعبي غصب عنج ..
خاف وسن من صراخها وسكتت ..
ابتسمت اسيل وقالت: قدرت اقنعها ..
ندى: والله حرام اللي تسوونه ..
سارا: يا قلبو على حنية ندى ..
اسيل: ياللا نبدأ نلعب ..
طالعت وسن في اسيل نظرة ترجي بس اسيل قابلتها بنظره جامده ..
وسن: امانه .. واللي يسلمكم مابي ..
مسكوها اسيل ولين وقالوا: واحد .. اثنين .. ثــــلاثــــــــه ..
ودفوها وهي صرخت باعلى صوتها: آآآآآآآآآآآآآه وقفــــــــــــونــــــــي مابــــــــــــي ..
مسكتها سارا وجت لين عندها ودفوها كمان على جهة اسيل ..
طالعت ندى فيهم فأضطرت تلعب معاهم ووسن بس تصارخ ..
اشكالهم لفتت انتباه معظم اللي يتزلجون ..
واحد من الاولاد وقف وحط ايده في جيبه يطالع فيهم وهو يبتسم ..
وسن: آآآه خلاص لعبت ابي اوقــــــــــــــــــــف ..
مسكوها سارا واسيل فقالت: الله يخليكم خلاص لعبت كثير وابي ارتاح ..
سارا: تكسر الخاطر .. خلاص يا اسيل خلينا نوقف ..
اسيل: لا ..
ودفوها جهة لين وندى ..
اسيل: سارا ابي اروح الحمام .. تيين معاي ..؟!
سارا: ياللا لأني عطشانه وابي اشرب ..
اسيل: هيا ..
فراحوا وخرجوا من ساحة التزلج ..
لين: وين راحوا هذولا ..؟!
ندى: مدري ..
وسن: واخيرا راحت الشريره الكبيره .. ندى امانه .. انا تعبت وابي ارتــــ...........
سحبتها لين من ايدها وراحت تتزلج وهي ساحبه وسن وراها ..
ندى: ليــــــــن وقفــــــــي .. يالله خايفه يصير لوسن شي من تهور هالبنات ..
وسن: آآآه .. لين هديني .. خايفه اتركيني ..
لين: من عيوني ..
سحبتها من ايدها بقوه ودفتها على قدام وقالت: هههههههه يالله خليج شجاعه ووقفي نفسج بنفسج ..
فتحت وسن عيونها بصدمه وصرخت: آآآآه ابعــــــــــــدوا من طريجــــــــي .. ابعــــــــــــــــــــدوا بأطيــــــــــــح ..
فتح هذاك الولد عيونه بصدمه وهو يشوفها جايه بأقصى سرعه لجهته ..
طلع ايده من جيبه وحاول يبتعد ولكن .. طاح الفاس بالراس ..
طــــــــــــــــــــــــآآخ .. صقعت وسن فيه بقوه وطاحت هي وياه وتشغلبوا ..
وسن بصراحه ما صار لها شي لأن معظم الاصابات جات في الولد ..
الولد: آآآه قومي من فوقي ..
وسن: آسفه ..
قامت بس ما قدرت تحافظ على توازنها وطاحت فوقه مره ثانيه وحافة الزلاجه جت في خده ..
بعد الولد رجلها وهو يقول: آآآه اذا ما تعرفين تتزلجين فليش ييتي ..
بعدت نفسها عنه وهي تقول: آسفه ..
جلس وهو ماسك خده وظهره وكتفه ورجله التوت وتعوره ..
الولد بألم: آه آه كسرتي اعضاء جسمي ..
وقفت وسن وهي تقول: آسفه ما كان قصـ....
ما قدرت تحافظ على التوازن للمره الثانيه ..
الولد بصدمه: لا لا لا تطيحين فوقي .. بلييز لا ..
تزحلقت رجلها وطاحت فوقه بقوه ..
جوا ندى ولين ومسكوا وسن ووقفوها ..
الولد: آخ آخ .. جسمي تكسر بسبتج .. ليش تطيحين ..؟!
وسن: آسفه ..
الولد: وانتي ما عندج غير هالكلمه ..
ندى: والله سوري ما كان قصدنا انه يصير جذي ..
وقف بالصعوبه وهو يقول: لا عادي ماكو مشكله ..
لين: طيب البنت صارخت فليش ما بعدت عن طريجها ..؟!
مسك كتفه بألم وهو يقول: مدري .. ما كنت مستوعب الامر ..
وسن ببراءه: كتفك يوجعك ..؟!
طالع فيها شوي بعدين ابتسم وقال: طبعا يوجعني ..
وسن: والله آسفه .. ما عاد اعيدها ..
طالع فيها مره ثانيه بعدين قال: انتم في الصف جم ..؟!
ندى: اول جامعه ..
الولد: مو مبين عليج ..
وسن: الا في جامعة الـ****** ..
الولد بإبتسامه: نفس الجامعه اللي سجلت فيها ..
وسن بحماس: من جد .. تيب منو انت وصف جم ..؟!
ابتسم: انا بسام في الصف ثالث .. وان شاء الله بابدأ الدرراسه يوم السبت ..
وسن: خساره ..
ندى: متى سجلت عندنا ..؟!
بسام: الاحد ..
ندى: طيب ليش ما بديت تدرس من الاحد ..؟!
بسام: كان عندي شغله .. اليوم حسيت بضيقه وييت هنا استمتع بس ما كنت ادري اني ياي اتكسر ..
وسن: آسفه .. ما كان قصدي ..
ندى: والله آسفين عالازعاج ..
بسام: عادي ماكو مشكله ..
لين: اللحين جسمك يعورك بجد ..؟!
بسام: يعني شوي .. بس كلها يومين ويختفي الالم ..
ندى: طيب احنا نستأذن ..
بسام: ياللا باي وانتبهوا لا تكسرون ولد غيري ههههه ..
ندى: هههه ان شالله ..
لفوا ووسن تطالع فيه وقالت: بسام انا بجد آسفه ..
بسام بإبتسامه: قلتلج خلاص عادي ..
فلفت وراحت مع ندى ولين ..
لف بسام وطلع اصابعه يعد وهو يقول: جم مره قالت آسفه ..؟!
اما عن ندى فقالت: شايفه حركتج الغبيه وش سوت ..
لين: عادي .. الولد ما خاصم ..
ندى بعصبيه: بس حركتج كان بجد بايخه .. لو انا مجانه جان صفقتج ..
وسن: خلاص ذي آخر مرآ اروح فيها لذا المجان .. ما عاد ابي العب بالتزلج ..
لين: هههههههههههههههههههههه ..
جت اسيل وسارا في هالوقت وقالت اسيل: ضحكوني معاكم ..
لين: وسن توبت تيي لهالمجان ..
اسيل: ههههههه من الويل اللي شافته منا ..
سارا: هههههه حزنتني ..
ندى: السبب الرئيسي ان الاستاذه لين دفتها على الناس وطاحت فوقهم ..
اسيل: هههههههههههههههه ..
سارا: هههه خساره فاتتنا ..
وسن: بس الولد ما هزأني .. لو هزأني جان حقدت على لين طول عمري ..
ندى: طلع طيب ومتفهم .. ايه ويقول انه بيدرس في نفس جامعتنا ..
سارا: طيب وينه .. ابي اشوفه ..
ندى: خلاص طلع ..
اسيل: خلاص طنشوا السالفه وخلونا نلعب ..
وسن: مابي العب ..
اسيل: للمره المليون اقولج .. مو بكيفج ..
وفعلا بدأوا اللعب مع انواع من الصراخ والاستهبال والضحك نسيت فيها اسيل سالفة سميه ..
بس دوام الحال من المحال ..