شبكة همس الشوق - عرض مشاركة واحدة

11 - 3 - 2014, 09:14 PM

في فله متوسطة الحجم تقريبا تعيش فيها وحده مع ابوها رجل الاعمال اللي ٢٤ ساعه برى ..
كانت جالسه وحاطه رجل على رجل تتابع فيلم رومانسي يناسب مزاجها حاليا ..
هذا مو الفلم الاول .. قد شافت افلام كثيره وكلها رومانسيه ..
وفي كل فلم كانت تتخيل نفسها البطله اما البطل فكان هو الشخص اللي شاغل تفكيرها وحياتها من سنتين ..
محد هزها وهز كيانها غيره ..
هي تحبه .. لا هي تعشقه .. كمان لا هي ادركت انها من دونه ولا شي ..
رفعت نظرها لفوق التلفزيون ..
يمكن تستغربون لكن فعلا كانت حاطه صورته في برواز ..
ولو دخلتم غرفتها كان شفتم الصور المكبره والمعلقه عالجدران ..
شكلها مجنونه فيه فعلا ..
تحولت نضراتها لحزن وهي تطالع في التلفزيون .. لا مو متأثره بالفلم ..
عشانها تذكرت كلمته اللي آلمتها ..
" انا ما احبج "
فعلا .. كان هذا الحب من طرف واحد .. يعني حب فاشل ..
سنتين وهي تحبه وفي النهايه صدمها بهالكلمه ..
في المطعم صارحت له بحبها وبأنها ميته فيه فقالها ابعدي عني لأني مستحيل اتزوج ..
اتوقع ان معظمكم عرف مين هي ومين هو اللي تحبه ..
ايه اروى .. اللي حبت سامي فأبتعدت عنه عشان تنساه بس اكتشفت انها حبته اكثر ..
هي نفسها اروى اللي ابعدها سامي عنه بكلام قاسي ..
المفروض تكرهه لأنه علقها فيه وبعدين تركها ..
بس المشكله انها مو قادره ابدا .. تبغى سامي لها بأي طريقه ..
ايه تبغاه لها يا بالطيب او بالقوه ..
نظراتها الحزينه تحولت لنظرات خبث ..
بتسوي المستحيل عشان يحبها ويتزوجها ..
بتسوي كل الطرق الممكنه عشان يكون ملكها هي .. يا بالطيب او اللين او القوه او العنف او الـغــصــــب ..
هذي مشكلة اللي يحبون بجنون .. يسوون المستحيل عشان يوصلون لمبتغاهم ..
وقفت أروى وقالت بإبتسامه: احـبـــك وراح اخليك تتزوجني انا يا سامي ..
اخذت صورته وطالعت فيه وفي ضحكته ووسامته ..
كل المواصفات اللي تعجبها فيه .. غني .. وسيم .. خفيف دم ومرح .. رومانسي حيل .. يخقق ..
باست صورته وضمتها لصدرها وهي تقول: حتكون لي انا يا سامي ..
رجعت الصوره مكانها واخذت جوالها وأرسلت له رساله لأن على بالها انه ما زال في بريطانيا ..
لو تدري انه في قطر كان اتصلت فيه وقلبتها سوالف مع انها ملاحضه انه بدا يتجاهلها في الايام اللي سبقت سفره ..
ابتسمت وقالت: فديته وفديت طاريه .. اكيد بريطانيا منوره بوجوده ..
هزت رجلها وهي حاسه ان الدنيا مو سايعتها من الفرحه ..
اروى بإبتسامه: اعرف .. اعرف انه ما يفكر بالزواج ابدا .. بس انا راح اخليه يفكر .. بيننك يا سامي لين تتزوجني انا واصير حرم الاستاذ سامي سلطان محمد الراهي هههههههههههههههه ..
انسدحت عالكنبه وغمضت عيونها وبدت تتخيل نفسها وهي مع سامي ..
هم الاثنين وبس ..

================================================== ==================

كانت جالسه بألم وهي حاضنه اختها الصغيره ودافنه وجهها في راس اختها وتبكي بشكل عنيف ..
تبكي خوف على اخوها الصغير اللي ما تدري عنه اي شي ..
من يوم ما طلع من البيت ما رجع ابدا ..
طالعت اثير فيها وقالت: خلاص يا شهد اهدأي ..
شهد بصراخ: مابي اهدأ مابي اهدأ .. ابي وسيم .. ابيه اللحين ..
اثير: ان شالله سعود يلقاه .. انتي اصبري وانتضري هذاك السايق وان شالله يلقاه ..
حضنت اختها شادن اكثر وهي تهز نفسها وتبكي ..
شادي: شهد .. اذا تبيني افقع ويه ذاك المتغطرس فأنا حاضر ..
شهد: لاااا .. والله لأضربك يا شادي اذا ساويت جذي .. فاهم ..
شادي بقهر: بس انا بصراحه مقهور وابي احط كل حرتي فيه .. ودي اقطعه بأسناني ..
شهد بصراخ: شــــــــــــــادي بـــس اسكــــــــــــــت ..
اثير: خلاص يا شادي اسكت .. اللي فينا كافينا ..
سكت شادي وقال في نفسه: "هين يالجلب .. والله لأراويك منهو شادي العالي" ..
قعدوا هادين ينتضرون اي اتصال من السايق القطري سعود اللي طلبت شهد منه يساعدها وهو ما قصر لأنه متعاون كثير معها ..
اخذ اجازه كم يوم من راشد بحجة ان زوجته بتولد فأعطاه راشد ..
واللحين هذا هو ثاني يوم وهو يدور بس ما حصل احد ..
دق جوال شهد فتركت شادن واخذت الجوال بسرعه وردت عالطول لمن شافت ان المتصل هو سعود ..
شهد بلهفه: ها لقيته ..؟!
سعود: افتحي الباب الخلفي عشان ادخله ..
صنمت شهد لفتره من الفرحه .. بصراحه ما توقعت انها بتلقاه ..
اثير بخوف: شهد شفيج ..؟!
قامت شهد وطلعت بسرعه من الغرفه واتجهت للمطبخ وطلعت من الباب الخلفي ..
فتحت باب الحوش الخلفي فشافت سعود واقف وقدامه وسيم ..
نزلت دموع شهد وجلست على ركبتها وحضنت وسيم بقوه وبدت تبكي ..
شهد: ليه جذي يا وسيم ليه ..؟!
بكى وسيم وقال: شهااد كنت خايف وايد ..
سعود: لقيته عند صاحبة وحده من الكافتيريات القريبه من هنا ..
مسحت شهد دموعها ووقفت وقالت: والله مدري شلون اشكرك .. انت قدمت لي خدمات مستحيل انساها ..
سعود: لا عادي .. انا ما ساويت شي ..
شهد: كل هذا اللي سويته وتقول ما سويت شي .. بجد مشكور ..
سعود: العفو ..
سكتت شوي منحرجه بعدين قالت: سعود .. ممكن خدمه اخيره صغيره ..؟!
ابتسم وقال: ايه ممكن .. اطلبي ..
شهد: عيل انتظر دقايق ..
سحبت وسيم ودخلت داخل واتجهت لغرفتها ..
دخلتها واول ما شافوا وسيم راحوا يسلمون عليه ..
اما شهد ففتحت الدولاب وطلعت صندوق صغير وطلعت كل الفلوس اللي فيها وبدأت تعدها ..
جلس وسيم وبدأ يحكي لأثير وشادي اللي صار له ..
قفلت شهد الصندوق وحطت الفلوس في جيبها وطلعت الشنطه الصغيره اللي فيها اغراض اخوانها وبدأت ترتب ..
شادي: والله انك جبان .. لو انا بدالك جان ما خليت عضو سالم في ذاك الدب المتغطرس ..
وسيم: بس كان يخووف مرره .. وكمان هو كبيييير وانا صغير .. ما اقدر عليه ..
شادي: عالاقل طول لسانك واغسل شراعه ..
اثير بعصبيه: ايه عشان تنفصل شهد من الشغل ها ..؟!
شادي: بالعكس احسن .. مدري شلون تحملت ذاك المتوحش ..
لفت شهد عليهم وقالت: اسمعوا ..
طالعوا فيها وكملت: انا عندي فلوس تكفي ايجار شقه لمدة ثلاث شهور تقريبا ..
فتحوا عيونهم من الصدمه وقال شادي بإعتراض: لاااا .. انا ما راح اتحرك من هنا ..‎ ‎بقعد معاج يا شهد ..
اثير: شادي اسكت .. اللي تقوله شهد يمشي ..
طنشها شادي وقال لشهد: شهد انا مابي اروح .. اخاف عليج تقعدين لحالج مع ذا الدب .. شهد امانه .. وكمان لا تصرفين فلوسج عالفاضي .. لازم تجمعين عشان تشترين بيت ونطلع كلنا من هنا ..
ابتسمت شهد وقالت: خلوني اخلص حجيي بعدين تكلموا ..
اثير: تكلمي ..
سكتت شوي بعدين قالت: صدقوني انا مو راضيه عن اللي بيصير بس غصب عني .. صرت اتوقع دخول راشد لهالغرفه في اي وقت .. هذي المره هزئ وخاصم وهاوش .. الله العالم وش بيصير المره الثانيه .. اللحين الحمد لله عندي فلوس تكفي ايجار شقه لثلاث او اربع شهور .. لميت اغراض وسيم عشان يروح هناك .. وحتروحين معاه يا اثير عشان تهتمين فيه .. بغيت اوديكم كلكم بس شادن طفله صغيره وما راح تقدرين عليها يا اثير واخاف تشغلج عن دراستج وغير جذي انتي مو متعوده تهتمين فيها .. شادن حتقعد عندي لأني بجد حأقعد احاتيها اذا راحت .. شادي كمان حيقعد عندي عشان يسكت شادن اذا بكت وانا مو مويوده .. بليييز انا قررت هذا القرار وانا متألمه كثير فما ابغى اسمع اي اعتراض ..
طالعوا فيها بعدين سكتوا وبعضهم ما اعجبهم الوضع بس احترموا رغبة اختهم الكبيره ..
طالعت شهد فيهم فتره طويله بعدين شالت الشنطه وقالت: اثير وسيم الحقوني ..
طلعت فطلعوا وراها وراحوا عند سعود اللي كان ينتضرهم ..
اعطت شهد سعود الشنطه وقالت: اعرف اني تعبتك كثير بس مالي غيرك يساعدني ..
سعود بإبتسامه: لا تقولين هذا الكلام يا شهد .. انتي مثل اختي الصغيره ..
شهد: مشكور .. بغيت منك تستأجر شقه لاخواني عشان يسكنوا فيها .. ماهمي جم سعرها بس المهم تكون سمعتها وااايد طيبه وتكون قريبه من مدارسهم عشان يروحون لها مشي ..
سعود: من عيوني ..
لفت شهد عليهم وشافت وسيم على وشك البكاء واثير تطالع فيها بحزن ..
ابتسمت وقالت: اثير .. اعتمد عليج كثير .. اهتمي بنفسج وبأخوج وسيم .. انا واثقه فيج وخليج قد الثقه هذه .. انا بحاول اترك الشغل هذا واشتغل في مجان ثاني واقعد معاكم على طول .. اوكي ..؟!
هزت اثير راسها وهي ساكته ..
جلست شهد قدام وسيم وحطت ايدها على كتفه وقالت: لا يا حبيبي لا تبجي .. راح نلحق فيكم .. خلك ريال ولا تبجي .. اهتم بنفسك واسمع كلام اثير عشان ما ازعل منك .. وحافظ على دروسك .. اوكي ..؟!
وسيم وهو يبكي: طيب .. بس انتم تعالوا بسرعه ..
شهد: من عيوني حبيبي ..
وقفت وطلعت ورقه واعطتها اثير وقالت: هذا رقم موبايلي .. اذا احتجتم شي دقوا علي من التلفون الثابت حق الشقه .. وخذي هذي الفلوس اصرفي على نفسك واخوك ..
اخذت اثير الورقه والفلوس وقالت: مع السلامه شهد ..
شهد: مع السلامه ..
ركبوا مع السايق سعود وابتعدوا عن المكان ..
دور سعود عن شقق تكون سمعتها طيبه وقريبه من مدارسهم ..
وبعد ساعتين حصل شقه .. صحيح انها غاليه شوي بس كانت انسب شقه لهم ..
كانت الشقه في "السالم للشقق المفروشه" ..
سميت العماره بهالاسم لأن صاحبها اسمه "سالم" ..

================================================== ==================