شبكة همس الشوق - عرض مشاركة واحدة

11 - 3 - 2014, 09:16 PM

الساعه عشره ونص الليل ..
الجو هادي ورايق جدا ..
هدوء وسكون كان يعم المكان ..
منظر البحر وامواجه كان ممتع وحلو ..
اي واحد يدور عن الراحه وهدوء الاعصاب يجي هنا ..
قطع هذا الصمت والهدوء صوت رساله ..
طلع جواله وفتحها وكان نصها::
(( تعـــال ...
إغفي على صدري مودع زحمة الإرهاق .،
تعـــال ...
بخاطري لهفة تزيد فيني إرهاقي .،
تعـــال ...
وعانق إحساسي مدام إن غرامك فاق .،
سكنت القلب والأعماق إلا قل لي وش الباقي ؟؟ )) ..
عقد حواجبه وطالع في اسم المرسل وقال بإستغراب: اروى ..!!!!
قرى الرساله مره واثنين وثلاثه وهو حده مستغرب ..
حط الجوال في حضنه واسند ايده على ورى وطالع في البحر بتفكير ..
تنهد وقال: قلت لها ما احبج ومستحيل اتزوج .. طيب ليه ارسلت ذي الرساله .. وش ناويه عليه يا اروى ..؟!
سكت شوي بعدين قال: قلبي مو مرتاح لهالانسانه .. لازم احاجيها باجر وافهمها عدل ..
طالع في البحر شوي بعدين قال: اوووف انا ييت هنا عشان انسى سالفة ابن العم اليديد اللي مدري من وين طلع فتييني اروى بعد ..
سكت شوي وقال: ابن العم ..؟؟!!
تذكر وقال: اووه نسيت عمي ابو بنت عمي ..
قام بسرعه وراح لسيارته وانطلق بسرعه متهوره للقصر ..
فعلا انطلق بسرعه متهوره وهو ناسي ان هالسرعه يمكن توديه في ستين مصيبه ..
لكنها فعلا في يوم من الايام راح تندمه قد شعر راسه ..
المهم وقف سيارته في كراج السيارات فشاف ان السياره الخضرا الرياضيه ما زالت موجوده بس السودا راحت ..
عض على شفته وقال: اخاف يكون راح ..
مشي ودخل لداخل القصر فشاف ابن عمه نازل من الدرج وفي ايده حبة توست ياكلها ..
اول ما شافه سامي فرح لأن عمه مازال موجود وفي نفس الوقت عصب ..
سامي بعصبيه: اللحين انا هارب من ويهك فيستقبلني ويهك بعد ..
بلع إياد لقمته وقال: لا يا سامي مو جذي .. اللي يدخل البيت يسلم ما يهاوش .. ما اخذت هالشي في كتاب السلوك في الابتدائي ..
تنرفز سامي بس هدأ نفسه وقال: تاكل توست ..؟! انت متأكد انك من عائلة الراهي ..؟!
إياد: ليه عائلة الراهي وش ياكلون ..؟! صامولي يعني ..؟!
سامي: وين ابوك ..؟!
إياد: في جيبي هههههههههه ..
نزل من ورى إياد ابو سامي اللي قال: اخيرا ييت ..
طالع سامي في ابوه وقال الاب: وين كنت ..؟!
سامي: عند البحر ..
الاب: اللحين عمك ياي عشان يتحمد لك بالسلامه فتتركه وتروح البحر ..
سامي: سوري بس نسيت ..
الاب: نسيت ها ..؟! طيب ممكن اعرف وش سويت لإياد ..؟!
طالع سامي فيه بإستغراب وطالع في إياد اللي يبتسم ابتسامه استفزازيه ..
سامي: ما سويت شي ..
إياد بدهشه مصطنعه: اللحين تهاوشني وتضربني وتسيل دمي ومع هذا تقول ما صلحت شي .. اتق الله يا سامي ..
سامي بصدمه: انت .. انت شقاعد تخربط وتقول ..؟! انا ضربتك وهاوشتك وسيلت دمك ..؟!
إياد بمكر: احلف انك ما سويت جذي ..
سكت سامي وقال: ايه صحيح اني خاصمت ومسكتك من جاكيتك ودفيتك بس ....
الاب: يعني تعترف ..
طالع سامي في ابوه وقال: بس الامر مو بذي الدرجه .. انا ....
الاب: هذي هي مقابلتك لولد عمك .. وش بيكون انطباعهم ناحيتك ..؟! تعرف انهم قالوا عنك عدواني .. ها رضيتها على نفسك اللحين ..؟! فعلا طلعت جدامهم اني ما اعرف اربي عيال .. ربيت واحد عدواني وشرس ومتكبر .. ايه متكبر .. عمك ياء يزورك فرحت وتركته .. يصير خير يا سامي ..
ابتسم إياد وهو يطالع في سامي بإنتصار ..
عض سامي على شفته وقال في نفسه: "وش قال لهم هالبزر .. والله لآراويك يا إيادوه" ..
الاب: عمك رجع لقصره وإياد حيقعد هنا يومين عالاقل ..
فتح سامي عيونه وطالع في إياد بصدمه ..
الاب: طبعا السبب الرئيسي هو انت .. ولد عمك انجرح بسببك جرح عميق ويبيله راحه تامه .. فرجاءا خلك مؤدب ومسالم ..
نزل من الدرج وهو يقول: الحقوني عالعشاء ..
وراح لغرفة الطعام ..
سامي بعصبيه: انت شقايل لأبوي ..؟! اللحين انا السبب في هالجرح العميق يالجذاب ..
إياد: تتذكر كلمة احسن .. رديتها لك ههههههههههه ..
سامي: بجد بزر وتافه واهبل ..
إياد: هيه سامي لا تنسى .. ابوك قال خلك مؤدب ومسالم هههههههههههههههههههههه ..
انقهر سامي من اسلوبه المنرفز ودخل لغرفة الطعام وجلس عالكرسي ..
شوي ودخل إياد وبدأوا ياكلون عشاهم ..
طالع سامي في ابوه وقال: ابوي بطلب طلب ..
الاب: ايش ..؟!
سامي: رفيجي اخذ الاول عالدفعه وودي اسوي له حفله في القصر ..
تذكر إياد شي وضحك وقال: هههههههه اقول سامي بلييز خلها حفله تنكريه هههههههههه ..
طنشه سامي وقال: بتكون حفله بسيطه وهاديه .. ها شقلت ..؟!
الاب: مين اللي اخذ الاول ..؟!
سامي: رفيجي عادل ..
الاب: اول مره اسمع اسمه ..
إياد بتفكير: كأني سمعت مثل هالاسم ..
سامي: هذا رفيج يديد .. دافووور مع ان قسمه صعب .. قسمه عن الكيمياء ..
الاب: ومتى بتسويها ..؟!
سامي: يوم الثلاثاء .. يعني بعد باجر ..
سكت الاب فتره فقال إياد: اقول سامي .. انا معزوم ولا لا ..؟!
طالع سامي فيه بقهر وبغى يقول لا .. بس خاف من تهزيء ابوه ففضل السكوت ..
إياد: آآه سكت .. المثل العربي يقول السكوت علامة الرضى ..
عصب سامي بقوه .. اذا جاء هالولد للحفل اكيد بيقلبها نكد عليه ..
لف إياد على عمه وقال: عمي اعرف انك بترفض صح ..؟! ياللا عشاني وافق .. يكسر خاطري ولد عمي ..
سامي بقهر وبهمس: كسروك بالمكنسه ان شالله ..
إياد: اووبس .. حاقد علي ..
الاب: اوكي بس بيكون آخر حفل هنا .. المره اليايه صلح في اي قاعه او فندق ..
ابتسم سامي بفرحه ..
إياد: اووه سامي مبسوط .. لا لا حلفت لا تشكرني هذا واجبي ..
سامي: ومنو قالك اصلا اني ابي اشكرك ..؟!
إياد: هههههههههههههههههههههههههههههههههههههههههههههههه ..
لف سامي وجهه بعصبيه وقال في نفسه: "ودي اعرف هذا شلون يتنرفز .. امنيتي اشوفه معصب" ..
إياد بإستهزاء: تعــــال اغفي على صدري مودع زحمة الارهاق ههههههههههههههههه ..
لف سامي عليه بصدمه وشافه ماسك جواله يقرأ رسالة اروى ..
سامي بعصبيه وهو يسحب الجوال: غبــــــــــــي .. كيف قدرت تاخذه من دون لا احس ..؟!
إياد: ما ياوبت على سؤالها .. البنت تقولك قلي وش الباقي ..
سامي: لا تتلقف يا الملقوف .. اهبل ..
إياد: عمي ولدك منحرف .. ادبـــه ..
سامي بهمس: انت اللي يبيلك تتأدب ..
إياد: عمي ولدك يسبني ..
الاب: .........................
سامي: احسن طنشك ..
إياد: اقول سامي لا تقول احسن عشان لا تندم زي اول هههههههههه ..
سامي: سخييييف ..
إياد: هههههه اقول سامي لمن تعصب تعرف تذكرني بمين .. هههههه تذكرني امممم نسيت هههههههه ..
سامي بحده: شبعت ..
وخرج معصب .. إياد: هههههههههههههههههههههههههههه .. احب هالولد وايد هههههههههه ..

================================================== ==================

.. صباح يوم الاثنين ..
.......: بسام .. بسام ياللا قوم .. بسام ..
بسام بصوت كله نوم: راما اطلعي برى ابي انام ..
راما: ما اطلع .. انت لازم قوم ..
تأفف بسام ولف الجهه الثانيه وكمل نوم ..
راما بعصبيه: بسام اذا انت مافي قوم انا يكب مويه بارد عليك ..
بسام بقهر: يا ربيييي .. انا الغلطان اللي يبتج معاي ..
راما: بسام قووووم ..
جلس بسام عالسرير بتأفف وقال: هذاني قمت ..
راما: ياللا قوم غسل وجهك وكل فطورك ورح مدرسه ..
بسام: مدرسه ..؟! اسمها جامعه جـــامــــعـه مو مدرسه ..
راما بتسليك: طيب طيب ياللا قوم ..
بسام: عشتو .. حتى الخدم يعرفوا يسلكوا .. اوووف والله ما ودي اروح .. الجامعه ممله وتسبب لي الطفش القاتل ..
راما: كلو ناس اول يوم يقولوا جامعه طفش جامعه مو حلو .. بس بعدين يحبوا جامعه ..
تنهد بسام بعدين قام اخذ له دش وبدل ملابسه وراح ياكل فطوره ..
بعد ما خلص طالع في ساعته وقال: باجي على محاضرتي ساعه .. عيل بنتظر هنا احسن من ملل الانتظار في الجامعه ..
جلس على الكرسي وشغل اللاب حقه وبدأ يلفلف فيه ..
جت راما عنده وقال: بسام انت ايش يسوي ..؟!
تنهد بسام وقال: سجى ومنو غيرها .. قاعد احصي الاماكن اللي ممكن تكون فيها .. فكرت حاليا اني ادور في الجامعات والكليات لأنها المفروض تكون سنه اولى .. عيل بدور عن وحده سجلت وهي بدون اصل ومواصفاتها مثل مواصفات بنت اختي ..
راما: طيب يمكن واحد لقى سجى وصار اسمها مع اسمه ..
بسام: فهمتج .. تقصدين واحد لقاها وتبناها وصارت كأنها بنته .. يا ماما في الاسلام ما عندنا شي اسمه تبني .. البنت اللي يلقونها طايحه تصير بدون لقب او اسم اب .. فاهمه ..؟!
راما: طيب يمكن واحد بنته ضاعت فشاف هذا بنت وحسب انها بنت هو فأخذها ..
عقد بسام حواجبه بعدين قال: لا لا .. في شي اسمه اوراق وتحاليل .. اذا البنت صلحت كشوفات وتحاليل فبيلاحضون الفرق ..
راما: طيب يمكن يكون رجال يعرف ان هذا مو بنت هو .. فأخذها وقال انها بنت حقه وكل السنوات اللي راحت ما خلى هي تسوي اي تحاليل عشان ما يعرفوا ..
طالع بسام فيها بتفكير بعدين قال: لا لا مو ممكن .. احسه شي نادر الحدوث ..
راما: طيب يمكن صار حقيقه ..
بسام: لا بجذي البحث شي مستحيل .. لا ما اضن .. اقصد اني ما اتمنى هالشي يصير .. خلينا على سالفة انها بدون اصل احسن ..
سكت شوي يفكر ويحس ان هالفكره يمكن تكون صارت من جد ..
يعني يمكن واحد ضيع بنته وشاف هالبنت وقال للناس انها بنته ومشي على هالسالفه وطول هالسنوات ما صلح لها اي كشوفات او تحاليل ..
بسام بتعب: لا بجذي السالفه بتكون صعبه واايد .. آآه بجد تعب ..
سكت فتره بعدين قال: عيل كل بنت عمرها ١٩ سنه بطالع في لون عيونها واذا كانت رصاصيه فبطالع في رقبتها .. اذا كان فيه جرح قديم فراح تكون هي بدون شك ..
عقد حواجبه بعدين قال: بس بعض البنات يتحجبون .. احسها صعبه ومو حلوه بحقي اقولهم افتحوا على رقبتكم عشان اشوفها ..
ابتسم بإستهزاء وقال: والمشكله الاكبر هي انه فيه احتمال تكون مو بالدوحه اصلا .. لا فعلا تطمنت اني بلقاها ..
قفل اللاب واسند ظهره عالكرسي وسرح في تفكيره ..
قامت راما من عنده وراحت تشوف لها شغله تسويها ..
بعد نص ساعه قام واخذ شنطته وطلع من الجناح حقه اللي استأجره في افخم الفنادق ..
اول ما طلع لقى في وجهه واحد فتأفف وقال بصوت منخفض: اللهم طولك يا روح ..
طالع فيه ذاك الشخص وقال: فعلا اللهم طولك يا روح .. تحسب اني بتركك بعد اللي سويت ..
بسام: يا ابن الحلال والله ما كان قصدي .. وآسف اذا ضايقك هالامر مع انه عادي جدا ..
عصب وقال: عادي في عين اهلك .. مين سمح لك اصلا انك تطالع .. والله ما اسكت لك وراح اراويك ..
تنهد بسام وقال: اقصر الشر وخلنا ننسى السالفه يا استاذ مصعب ..
استاذ مصعب ..!!
استاذ مصعب ..!!
استاذ مصعب ..!!
معقووووله ..؟؟!!
معقوله هالآدمي هو نفسه اللي كان جيران اسيل لمن كانت في الفندق ..؟!
هذا يعني ان الجناح اللي استأجره بسام هو نفسه الجناح اللي كانت فيه اسيل ..
يا سبحان الله .. وين ما راح بسام يقابل شي يتعلق بسجى ومع هذا ما يدري عنها اي شي ..
مصعب بعصبيه: نعـــــــم .. ننسى السالفه ..؟! انت فعلا تستخف دمك .. يعني تشوف اختي بدون طرحه واسكت لك ..
تنهد بسام للمره الثانيه وقال: قلت لك ما كان قصدي .. هي كانت واقفه قدام الباب وانا مريت فشفتها .. وكمان يا ابن الحلال هي توها صغيره ..
مصعب: ١٥ سنه وتقول صغيره .. اقولها بصراحه هي ما تلبس طرحه ابدا بس ما اعجبتني حركتك انك تمر وتقز فيها ..
بسام: اللحين لك اسبوع ناشب بحلقي عشاني شفت اختك بدون طرحه واللحين تقول انها اصلا ما تلبس طرحه .. تستهبل حضرتك ولا شنو ..
مصعب: بس يكفي انك قزيت فيها بطريجه مو حلوه ..
بسام بفقد اعصاب: وانت شدراك عن نوع النضره اللي طالعت فيها .. انت ما شفتنا اصلا .. طالعت فيها نضره عاديه مثل اي نضره ..
مصعب: ما اصدقك ..
بسام: ليه هي قايله لك حجي غير جذي ..؟!
مصعب: لا ما قالت شي .. بس قالت انه في واحد شاب استأجر الجناح اللي ينبنا له ولخدامته .. انا اللي استنتجت هالشي ..
ضرب بسام ايد بإيد وقال: ياربي اعني على هالعله .. انت شلون استنتجت اني قزيت فيها قز غير محترم على قولتك ..؟!
مصعب: ببساطه .. مادامك شاب ومعاك خدامتك فهذا يعني انك غير متزوج والغير متزوجين دايم عيونهم طويله ومنحرفه ..
كل اللي سواه بسام انه ضحك ضحكة غريبه تصف حالته حاليا ..
بسام: اقول وراي جامعه .. مع السلامه والله يكملك بعقلك ..
مصعب: اسمع .. صدقني انك بتكون رقم ٦٠ اللي اطرده من هالجناح .. قبل شهر طردت رقم ٥٩ .. كانوا ولد وبنت ولسانهم طويل ..
وقف بسام من الصدمه وقال: ستيـــــــن ..؟!!!!
لف على مصعب وقال: انت جم لك يالس في هالجناح ..؟!
مصعب: سنتين ..
بسام: سنتين كثيره والايجارات غاليه .. لو استأجرتم بيت مستقل ارخص ..
مصعب: مو احنا ندفع .. زوج خالتي صاحب هالفندق ومسكنا ببلاش ..
بسام: آها .. طيب بااي ..
وراح بسرعه قبل لا يوقفه هالآدمي اللزقه ..
ركب سيارته واتجه للجامعه الممله بنضره ..
بعد فتره وقف السياره ودخل الجامعه واتجه لكلاسه لأن باقي عالمحاضره عشر دقايق بس ..
دخل وجلس في مكان فاضي وطلع كتابه يراجع شوي قبل لا يدخل الدكتور ..
شوي جلس جنبه واحد ومد ايده وهو يقول: اهلين بسام كيفك ..؟!
ابتسم بسام وسلم عليه وقال: الحمد لله تمام وانت ..؟!
الولد: بخير .. انا اسمي بندر الـ***** ..
بسام: وانا بسام العاصي ..
بندر: اعرفك .. انت اخو سميه صح ..؟!
بسام بإستغراب: ايوه .. شدراك ..؟!
بندر: ابوي اسمه مصلح الـ***** تتذكره ..؟!
عقد بسام حواجبه يتذكر بعدين لف عليه بتفاجئ وقال: انت ولد الدكتور مصلح ..؟؟!!!!
بندر بإبتسامه: ايوه .. ما توقعت انك تتذكره ..؟!
بسام بعدم تصديق: ما اصدق صراحتا .. ها كيف ابوك ..؟! ووين يشتغل الآن ..؟!
بندر: الحمد لله بخير ويشتغل في مستوصف خاص .. امس لمن سمعت اسمك تذكرتك وقلت لأبوي فقالي سلملي عليه وكمان سأل عن حالة اختك .. كيفها اللحين ..؟!
سكت بسام فتره بعدين قال: الله يرحمها ..
بندر بتفاجئ: بجـــــــــد ..؟!! الله يرحمها ان شالله .. ما توقعت ..
لا يكون هو نفس السبب ..؟!
بسام: ايه نفسه ..
بندر بتنهيده: الله يعين ..
قعدوا ساكتين فتره فقال بندر: تحس ان الجامعه ممله صح ..؟!
بسام: هههه جدا .. شوي واطق من الطفش ..
بندر: هذا شي طبيعي .. انا لمن ييت السنه اللي طافت كنت بموت من الطفش وبغيت ابطل دراسه بس بعدين بديت اتعود واتأقلم ..
بسام: ان شالله اتعود انا بعد ههههه ..
بندر: ان شالله ههههه ..
دخل الدكتور وبدأت المحاضره الاولى .. اما بندر فأصبح صديق لبسام بسبب المعرفه القديمه بين ابوه واخت بسام ..
وش هالمعرفه وكيف كانت وعشان ايش ..؟! ان شالله مع الوقت تعرفون ..

================================================== ==================