شبكة همس الشوق - عرض مشاركة واحدة

11 - 3 - 2014, 09:37 PM

صباح يوم الثلاثاء .. يوم جديد وصباح جديد يطوي اليوم اللي قبله والصباح اللي قبله ..
وهذه هي احدى ابطالنا نزلت من سيارتها ومعها شنطتها الجامعيه ..
قفلت باب السياره وحطت المفتاح في شنطتها ولفت رايحه للبوابه ..
بس وقفت لحضه وهي تطالع في سياره بانوراما زرقاء تميزها وتميز صاحبها عدل ..
ايه هي فعلا سيارته بس السؤال اللي محيرها شلون جت هالسياره هنا ..
تقدمت من السياره عشان تتأكد لأنه مستحيل تكون هنا ..
فتأكدت لمن شافت تعليقة المرايه .. كانت تعليقه فخمه ومنحوته بإسمه كمان ..
ميلت فمها بقرف وقالت: فعلا ذي سيارة ساموه المليغ ..
نزلت نظرها للكفره وابتسمت بخبث .. ودها تفشها مثل ما فشتها اول ..
ضحكت وفتحت شنطتها وطلعت مقص منها وجلست قدام الكفره ..
وبما انها بويه فقدرت تفشها بسهوله ..
وقفت وطالعت فيها وقالت: المره اللي راحت رحت مع ريان .. المره ذي مع منو ..؟! مع اني مستغربه متى رجعت من بريطانيا ..
ابتسمت ولفت فطاح نظرها على التعليقه حقت سيارته ..
طالعت فيها مره ثانيه .. قبل سنتين كانت تعشق هالتعليقه وصاحبها كمان ..
قبل سنتين كانت ما تطالع قدامها غير سامي وبس مع انها مخطوبه لولد خالتها سمير ..
وطبعا هالسامي كان يطالع في غيرها كثييييير ..
ضربت رجلها بقوه وحقد على كفرة السياره وهي تقول بقهر: هيـــــن .. هيـــــن ياولد سلطان .. هيـــــن ياولد سيلينيا .. والله لأندمك على لعبك بمشاعري .. والله لأعلمك منهو غيـــــدا بنت منصـــــور ..
لفت ودخلت للجامعه وجذبت انتباه الكل بلون شعرها الاحمر الصارخ الملفت للانظار ..
دق جوال غيدا برساله فوقفت وكانت وراها بنت منشغله بجوالها وتوها جايه .. ما انتبهت البنت لوقوف غيدا فصقعت فيها ..
رفعت راسها عن الجوال وقالت: هيه خير وقفتي فجأه ..
لفت عليها غيدا عشان تهزئ بس قالت بتفاجؤ: ليــــــن ..!!
طالعت لين فيها وقالت بطفش: هذا انتي ..؟!
حركة يدها بلا مبالاه وكملت طريقها وهي تطالع في جوالها ..
طنشتها غيدا وطلعت جوالها تشوف مين اللي ارسل لها رساله من الصباح ..
في ذا الوقت لفت عليها لين بحركه حاده وكأنها تذكرت شي ..
لين: صح نسيت اقولج .. بطلي جذب يا ماما ..
رفعت غيدا حواجبها وقالت: وشو ..؟! ابطل جذب ..؟! اصلا انا متى جذبت عشان ابطل جذب ..؟!
لين: لا تقعدي تلفي وتدوري ترى المسأله واضحه .. لمن رحتي للعزا رفيجتنا ما كانت مويوده فليش تجذبين وتقولين حالتها سيئه وتحتاج لكم .. بطلي جذب اوكي ..؟!
لفت وراحت وغيدا تطالع فيها بدهشه ..
غيدا: ذي شتقصد ..؟!
قعدت تقلب الامر في راسها وبدت تفهم كلام لين ..
غيدا: شلون اسيل ما كانت مويوده ..؟! إلا مويوده .. غاده طلعت لها في غرفتها ..
سكتت شوي تفكر بعدين قالت: لمن ارجع باسأل غاده ..
طالعت في الرساله وكانت من احدى الشركات ..
قفلت الجوال وحطته في شنطتها وهي تقول: صاحين من صباح الله خير عشان يرسلون .. صج فاضين ..
مشيت واتجهت لجهة الكلاس فجاء في بالها سالفة خويتها بيشو ..
تنهدت واتجهت لمكتب الدكتور راكان ..
دقت الباب ودخلت فشافته هو لحاله جالس وحاط رجل فوق رجل فوق طاولته ويدقدق في الجوال ..
طالعت فيه مستغربه من جلسته والمشكله انه مو منتبه ان احد دخل .. حاط السماعات في اذنه وطاير في عالم ثاني ..
وقفت قدام المكتب وقالت بصوت شوي مرتفع: دكـتــور راكــان ..
عقد حواجبه ورفع راسه .. لمن شافها نزل رجله وشال السماعات عن اذنه ..
د.راكان: ليه ما دقيتي الباب قبل لا تدخلين ..؟!
غيدا: دقيته بس ما سمعت رد فدخلت ..
د.راكان: المفروض ما تدخلين إلا لمن احد يسمح لج بالدخول ..
تنهد وحط السماعات والجوال في الدرج وقال: ها شكنتي تبغين ..؟! لا تقولين انج ما حليتي الواجب وتبيني اسمح لج .. ما راح اقبل اعذار ..
غيدا: لا .. انا ابيك بموضوع خصوصي ..
عقد حواجبه بإستغراب وقال: طيب ايلسي وقولي شعندج ..
جلست وسكتت فتره بعدين قالت: اسمع يا دكتور انا ابي احاجيك بخصوص رفيجتي بيشو .. اقصد بشرى ..
ابتسم بإستهزاء وهو يقول: رفيجتج ..؟!! على مين يا غيدا ..؟! انا عارف انها خويتج فمالو داعي اللف والدوران والجذب ..
فتحت عيونها بصدمه وتلعثمت وما دريت وش تقول ..
طالع فيها فتره طويله ينتضرها تتكلم بس كانت ساكته ومتلخبطه ..
د.راكان: شكلها شكت لج عن اللي انا سويته ويايه عشان تتوسطين لها اني انسى السالفه ..
هز راسه وقال: لا .. يوم الاحد ان ما يت تعتذر فراح اتسبب في فصلها وهذا آخر كلام عندي ..
طالعت فيه وهي تسأل نفسها: "هذا شدراه ان بيشو خويتي .. مصيبه اذا وصل هالخبر لأدارة الجامعه" ..
د.راكان: اللحين تبين شي ثاني يا غيدا ..؟!
غيدا: ها .. لا ..
د.راكان: عيل لا تنسين تذكرينها .. وكمان ياليت ما اشوفها في كلاسج مره ثانيه يكون احسن ..
وقفت وقالت: ان شالله .. بااي ..
خرجت وتكت عالجدار وهي حدها مرتبكه وخايفه ..
غيدا: بجد شي محير .. ذا شدراه عن بيشو ..؟! ان شالله ما يوصل خبر لأي احد ..
طالعت في ساعتها واتجهت لمحاضرتها ..
فتح راكان الدرج وطلع الجوال والسماعات .. فدق منبه جواله في هالوقت ..
د.راكان: اوووف هذا وقته ..
قام واخذ كتبه واوراقه وراح للكلاس لأن وقت المحاضره بدأ ..
دخل الكلاس وقال: السلام عليكم ..
ردوا الطلاب: وعليكم السلام ..
راح للمكتب وحط الاوراق والكتب وقال: اللي ما حل الواجب يوقف ..
بدأوا الطلاب يطلعون واجبهم قدامهم و الدكتور راكان يطالع فيهم ..
د.راكان: يعني الكل حل ..؟!
ردوا بأصوات مختلفه: ايوه ..... اكيد ..... انا حليت .....
ابتسم وقال: هههه شي حلو .. صايرين شطار وتحلون الواجب ..
قالت وحده من البنات: هههه اللي يشوف عقابك مستحيل ما يحل .. حتى لو كان على فراش الموت ينسى سالفة الوصيه ويحل الواجب هههههه ..
الطلاب: هههههههههههههههههههههههههههههههههههههههههههههههههه ههـ.....
وقفوا ضحك على صوت فتح الباب ..
دخل واحد واول ما شاف الدكتور ابتسم ابتسامة ترقيع ودخلوا اصحابه وراه ..
رفع الدكتور راكان حواجبه وقال: يا سلاااام صح النوم .. تبوني اجهز لكم الريوق يا حبايبي ..؟!
ابتسم وقال: والله فيك الخير يا دكتور بس احنا متريقين وما نبي نتعبك ..
د.راكان: لا يا شيخ .. احلف ..
ضحك وقال: ههههههه الله يقطع ابليسك ذكرتني بأسيل .. دايم تقول جذي ..
د.راكان: ومنو اسيل ذي يا سامي .. اكيد وحده من خوياتك ..
فقع الطلاب ضحك على شكل سامي المصدوم .. حتى يزيد وريان ضحكوا عليه ..
ريان: هههه المفروض تكون خويته بس هي .....
قاطعه سامي: محـد كـرشنــي ..
د.راكان: لاا وكارشتك بعد .. ياللا احسن عشان تبطل مغازله ..
سامي: دكتور انت شدراك ..؟!
د.راكان: عبالك اني غشيم ما اعرف شي .. واللحين ممكن اعرف ليش التأخير ..؟!
سامي: ما تأخرنا كثير ..
د.راكان: عشر دقايق يا بابا .. ياللا قولوا ليش التأخير ..؟!
سامي: اممم كنت انتظر واحد من اصحابي تأخر ..
د.راكان: منهو ..؟!
سامي: رفيجي عادل ..
د.راكان: في اي قسم ..؟!
ريان في نفسه: "ذا الدكتور ما يبطل لقافه" ..
سامي: قسم عن الكيمياء بس ما اعرف وش هو ..
كمل بحماس: هذا عادل اللي اخذ الاول عالدفعه الترم الاول ..
د.راكان: ما سمعت عنه .. المهم ليش كنت تنتظره ..؟!
لقط سامي وجهه وهو يقول: كنت ابي احاجيه قبل لا ادخل المحاضره ..
د.راكان: تبي تكلمه .. طيب وش كنت تبي تقوله ..؟!
سامي في نفسه: "يا ربييي متى بتخلص يلسة التحقيق هذي" ..
يزيد: وقت المحاضره بيخلص يا دكتور ..
د.راكان: ما راح تدخل يا زياد لين اعرف وش كان يبي من رفيجه ..
سامي: هههههههههههههههههههههههههههههههه ..
طالع الدكتور فيه وقال: شفيك تضحك ..؟!
يزيد بهدوء: دكتور انا اسمي يــزيــد مو زياد ..
د.راكان: ماكو فرق .. المهم ياوبوا وش كنتم تبون تقولون لرفيجكم ..؟!
ريان: كلام خاص يا دكتور ..
رفع الدكتور حاجبه بعدين قال: والكلام الخاص هذا اهم من محاضرتي ..؟!
سامي: لا ..
د.راكان: عيل يا انكم تقولون شسالفه او اكتب لكم غياب .. ياللا بسرعه ولا تعطلوني ..
طالعوا في بعض فقال سامي: بغيت اتسلف منه شوية اقلام ..
طالع فيه الدكتور نظره تقول ان كذبتك بايخه ..
طالع في ساعته بعدين قال: ادخل ادخل يا جنط انت وياه .. وبعدين اجذبوا جذبه صاحيه مو سامجه .. اوكي ..؟!
ابتسم سامي وقال: سوري ..
دخلوا وراكان يطالع في سامي بإستغراب .. في وجهه آثار تبين انه متهاوش ..
بغى يسأله بس بطل وراح للمكتب وبدأ محاضرته ..

اما عن دانا اللي كانوا ينتظرونها كانت في سيارتها موقفتها في مواقف الجامعه ..
ماسكه الدركسون وحاطه راسها عليه ومغمضه عيونها وفي عالم ثاني ..
وطبعا تفكر في راشد الشعلان ..
مقهووووره .. اخوها عالكرسي وذا يتمشى وبكل عربجيه ..
اخوها يدفع دم قلبه عشان يتعالج وذا يلعب بالفلوس لعب ..
اخوها متحطم في كل شي بسببه وهو ولا هامه ..
بجد مقهوووره منه وتبي تنتقم بس ما تدري كيف ..
ودها تبرد قلبها بس مو عارفه شلون ..
تنهدت ورفعت راسها وتذكرت اللي صار امس بينها وبين راشد ..
دانا: ما راح يسكت .. انا كمان ما راح اسكت ..
ابتسمت غصب عنها لمن تذكرت جرئتها وهي تكلم راشد .. بجد ماهي مصدقه نفسها انها وقفت في وجه واحد مشكلجي مثله ..
دانا: كنت اذا سمعت اسمه ارتعب .. بس اللحين لا ..
كملت بقهر: والله لاراويك وما راح اطلع جبانه جدامك .. انا اعترف انك تخوفني بس عادل اهم من نفسي .. هذا تؤامي ..
سكتت فتره بعدين نزلت من السياره ودخلت للجامعه واتجهت لمكان الشله فشافته فاضي ..
دانا: شكلهم في محاضراتهم ..
طالعت في ساعتها واتجهت للكلاس لأنه باقي عشر دقايق على بداية محاضرتها ..

================================================== ==================

الساعه عشره وفي احدى كلاسات الصف الاول .. كان اللي يلقي المحاضره هو الدكتور تركي ..
كتب ملخص المحاضره عالسبوره فقالت وسن للين: لين اديني قلم اخضر ..
لين وهي تقلدها: اديني قلم .. شذي الرقه ..؟! قولي اعطيني مو اديني ..
وسن: اوووف بتديني ولا شلون ..؟!
لين: اخسس صايره تهددين .. طيب بعطيج لا تاكليني ..
اعطتها القلم فقالت وسن: لين ..
لين: ها ..
وسن: ندى ليش غايبه ..؟!
هزت كتفها وهي مشغوله في كتابة الملخص ..
وسن: تيب بسألج اسيل متى ترجع تداوم ..؟!
لين: مدري .. بس اكيد الاسبوع الياي ..
وسن: اممم تيب اليوم ايش ..؟!
لين: الثلاثاء .. ها خلصت اسألتج ..؟!
وسن: تقريبا ..
كتبوا الملخص وبعد ما خلصوا بدأوا يطلعون لأن محاضرتهم انتهت ..
خرجت لين ووسن فقالت وسن: سارا وليان متى بتخلص محادرتهم ..؟!
لين: قبل عشر دقايق دخلوا .. يعني مطولييين ..
وسن: تيب انا يوعاااانه ..
لين: امشي نروح للكافتيريا لأني يوعانه كمان ..
اتجهوا للكافتيريا وقالت لين: يا ربيييه نسيت بحث الدكتوره نوال .. اللحين وش يفكني من لسانها وتهزيئها ..
وسن: بس هي تيينا باجر مو اليوم ..
لين: بجــــــــــــــد ..؟!
وسن: ايه ..
لين براحه: حلو ..
دخلوا الكافتيريا ووقفوا قدام الشباك ..
لين: وش نفسج ناكل ..؟!
وسن: مدري .. اي شي يشبع ..
لين: اممم شرايج ناكـ....
وما امداها تكمل كلامها لأن وحده صقعت فيها صقعه قوويه لدرجة ان الكوفي اللي في إيد البنت انكب نصه على لين ..
فارت اعصاب لين ولفت عالبنت وقالت بعصبيه: عميــــــــــــا انتي ما تشوفــــــــي .. هبلــــــــــــه غبيـــــــــه ..
تنرفزت البنت من صراخ وسب لين فقالت: حشمــــــــــــي لسانج ولا تسبــــــــــي ..
انتبهت البنت للين فقالت: هذا انتي رفيجت بنت ييران حمودي ..
تكتفت لين وقالت: طول عمري وانا اقول ان حمودج خايس بس اكتشفت انج اخيس منها ..
عصبت بيشو وقالت بصراخ: كلــــــــــــي تبن ولا تسبـــــــــي حمـــــوود ..
تنرفزت لين وقالت بعصبيه: ما ياكله إلا انتي واشكالج يالمعفنه .. بجد انج بنت واطيه ..
بيشو بعصبيه: زودتيها يا لينـــــــــوه وراح اراويج من منا هي الواطيه يالزباله ..
عصبت لين وصفقت بشرى كف وهي تقول: زبالــــــه في ويهـــــــج .. قبل لا تسبين اعرفي مع منو تحاجين يا الجلبـــــه ..
انصدمت بيشو من الكف الجامد اللي اخذته ففارت اعصابها وهجمت بقوه على لين تضاربها ..
دخلت لين مع بيشو في تشابك بالايدي وشد الشعر والسب واللعن ..
خافت وسن وبعدت عنهم وقالت بخوف: ليــــــــن خلاص وقفــــــي ..
بس ابدا لين مو جنبها .. بجد خافت وسن وبدأت الدموع تتجمع في عيونها ..
كل طلاب وطالبات الكافتيريا كانوا واقفين يراقبون هالمضاربه الجججاممده ولا احد فيهم فكر انه يتدخل ..
اصلا مجنون اللي يفكر يتدخل لأنهم كانوا متوحشات وكل وحده فيهم عملت خريطه في وجه الثانيه ..
وسن بصراخ: ليــــــــــــن اللــــــه يخليكــــــي وقفــــــــــــي ..
وطبعا صراخ وسن طار في الهواء ..
سمعت جنبها ولد يقول لصاحبه: يا سلام امس اولاد تضاربوا واليوم بنات .. اخاف باجر يتضاربون دكاتره ههههههه ..
لفت وسن عليه وقالت: لو سمحت ادخل وفرق بينهم .. اخاف على لين ..
الولد بإستنكار: لا لا انا اخاف على روحي .. بالله طالعي زين فيهم شلون يتضاربون .. حتى العيال ما يتضاربون جذي .. شوفي شلون كل وحده سيلت دم الثانيه .. سوري ماني بايع عمري ..
لفت وسن عليهم وحست بالعبره تخنقها وهي تشوف الدم وهو يسيل من لين ..
نزلت دموعها بخوف من شكل الدم .. غصب عنها تبكي اذا شافت قطرة دم ..
مسحت دموعها بظهر كفها فسمعت صوت ..
لفت على ناحية الطلاب فشافت ولد يدخل من بينهم ولمن وصل وقف مصدوم وهو يطالع في المضاربه ..
بجد انصدم الولد .. من متى والبنات يتضاربون كذا ..
تقدم من عند لين وبيشو ومد ايده وفك الاشتباك اللي بينهم بقوه ودف كل وحده في جهه ..
الولد بعصبيه: بنـــــــــات انتو ولا شنـــــــو ..؟!
لين بعصبيه: انت شدخلك .. ابعد قبل لا احفر قبرك ينب قبر هالحقيييره ..
بيشو بصراخ: انجبــــــــــي وحشمــــــــي لسانج يا بنت الميانين ..
انفجرت اعصاب لين بقوه وجت بسرعه لجهة بيشو وهي تقول بعصبيه: لا تسبــــــــــي اهلــــــــــــي يالملعونــــــــــــه ..
فتحت بيشو عيونها بعصبيه وهي تقول: انا ملعونـــــــــه ..؟؟!!!!
ودخلوا في مضاربه والولد يطالع فيهم بعصبيه ..
دخل بينهم واعطى كل وحده فيهم ضربه محترمه عنيفه وبعدهم بقوه عن بعض ..
طالع فيهم وقال بتهديد: اتوقع اني فكيتكم قبل جذي .. واللــــــــه لو دخلتوا في مضاربه ثانيه راح اعطي كل وحده ضربه على راسها عشان تفقد وعيها واريحها ..
كل الطلبه اندهشوا وانصدموا من حركة هالولد لمن مد ايده عليهم وضربهم بقوه ..
بجد ولد جريء ..
واللي ادهشهم اكثر انهم اول مره يشوفون فيها هالولد ..
اما لين وبيشو فتوهم انتبهوا للولد .. وبعد تهديده هذاك سكتوا بخوف ..
نبرة صوته ونضراته الحاده بجد حسستهم بخوف ورعب ..
جت وسن عند لين وقالت بخوف: لين انتي بخير ..؟!
هزت لين راسها وهي تطالع في الولد بعدين لفت نظرها ناحية بيشو وطالعت فيها بنظرات شرسه ..
لفت وسن على الولد وقالت بصراخ: انت ليييش تمد ايدك على لين .. هذيج البنت هي الغلطانه مو صديقتي ..
طالع الولد فيها بنظرات باااارده بعدين لف وخرج من الكافتيريا وخرجوا وراه اصحابه الثلاثه ..
ابتسم واحد منهم وقال: هههه بجد لفت الانظار لك يا مهند ..
ضحك الثاني وهو يقول: حرام كنت شرس في معاملة البنات ههههه ..
مهند بهدوء: احسن ..
قال صاحبهم الثالث: ياخي بجد هالبنتين غريبات .. وين النعومه والرقه والانوثه .. بجد بديت اخاف من الزواج ..
ضحك الاول وقال: هههههه شكلك بتظل عازب يا احمد ..
احمد: ههههههه والله العزوبيه حلوه .. شرايك تخاويني يا لؤي ..؟!
لؤي: لا لا مستحيل .. شوف مهند او مازن يمكن يخاونك ..
مازن: صحيح اني بديت اخاف من عنصر البنات اليديد بس مستحيل اظل عازب .. الاستقرار حلو ههههه ..
لؤي: ههههههه وانت يا مهند شرايك ..؟!
طالع فيهم بعدين قال ببرود: الزواج مو من اهتماماتي ..
احمد: هههه عيل ماكو غيرك يخاويني ..
ابتسم بهدوء وعقله طاير بعيد ..

** مهند عبد الحليم .. عمره ٢٤ سنه في الصف الثاني جامعه .. درس لين الترم الاول وحصلت له ظروف واللحين رجع بعد اربع سنوات عشان يدرس الترم الثاني .. انسان باااارد وعليه نظرات حاده تخوف اللي قدامه .. انسان جذاااب وبقوه بملامحه وجسمه الرياضي وشكله .. واكثر شي يجذب فيه هو جرح صغير يقسم حاجبه اليسار من الحافه **

================================================== ==================