شبكة همس الشوق - عرض مشاركة واحدة

11 - 3 - 2014, 09:40 PM

في مكتب الدكتور تركي ..
كان جالس ويطالع في الثلاث بنات اللي قدامه ..
د.تركي: ياء واحد وقالي في مضاربه في الكافتيريا فييت وبالي كله انه اللي يتضارب هم عيال .. لمن وصلت صدمت ..
طالع في لين وقال: انتي يا لين ..؟! بجد ما توقعت انج جذي ..
انحرجت لين من تغير نظرة الدكتور اتجاهها ..
وسن: دكتور لين مو غلطانه .. هذي هي الغلطانه ..
واشرت ناحية بيشو وكملت: هي كبت على لين الكوفي وما اعتذرت .. بالعكس طولت لسانها ..
بيشو: لين هي اللي بدأت في طوالة اللسان مو انا .. وكمان انا ما اعتذر للاشياء السخيفه زي جذي ..
لين بحده: ما السخيف الا انتي واشكالج ..
د.تركي: شرايكم تكملون المضاربه هني احسن ..؟!
سكتوا وطالعوا فيه ..
اشر الدكتور عالمرايا وقال: بالله عليكم طلوا في اشكالكم شلون صايره .. حتى العيال ما يساوون جذي .. انتم متأكدين انكم بنات ..؟! اشك والله ..
ضرب ايده بالمكتب وقال: انتم عارفين انكم حتتعاقبون على هذا .. هنا جامعــــه .. عارفين شنو يعني جامعــه ..؟!
لين: خلاص يا دكتور هذي آخر مره .. بلييز لا توصل الامر للاداره ..
د.تركي: معليش يا لين بس اللي عملتوه مو سهل ابدا ..
لين: طيب سامحني .. هذه اول مره تشوفني ..
د.تركي: اول مره اشوفج ..؟؟!! ليه انتي جم مره تضاربتي ..؟!
تورطت لين وقالت: لا هذه اول مره .. بس قبل كنت اتخاصم بالكلام بس ..
طالعت وسن فيها بإستغراب وقالت: لا نسيتي هند .. الاسبوع اللي راح تضاربتو بالايادي و....
دعست لين على رجل وسن عشان تسكتها فصرخت وسن: آآآه ليش تدقيني بقوه .. عورتني ريلي ..
رفع الدكتور حاجبه وهو يطالع في لين وقال: يعني تجذبين كمان ..
لين بسرعه: سوري سوري ووعد مني اني ما اعيدها يا دكتور .. صدقني آخر مره بأتضارب وآخر مره اجذب .. واللي يسلمك لا توصل خبر للاداره .. الله يخليلك اهلك وعيالك وكل قبيلتك لا تقول لأحد ..
ابتسم بهدوء وقال في نفسه: "عيالي ..؟! كانت بنت وحده بس ماتت .. الحمد لله على كل حال" ..
لين بفرحه: شفتك تبتسم .. يسس يعني وافقت ..
انتبه لها الدكتور وقال: منو قال ..؟!
لين بإحباط: إلا .. انا شفتك .. انت ابتسمت يعني وافقت .. صح ..؟!
د.تركي: لا ما وافقت ..
لين: دكتوووور اماانه لا تقول للاداره .. بلييييز ..
وسن: دكتور لا تكون فتان ..
رفع الدكتور حاجبه وقال: ليه هذا يسمى فتنه برايج ..؟! هذا اسمه تطبيق قوانين مو فتنه ..
وسن بثقه: إلا فتنه .. اللي يعلم عالناس يسمى فتان .. و الله قال ان الفتنه اشد من القتل .. يعني لو تقتل لين اهون من انك تفتن عليها ..
عقد الدكتور حواجبه وهو يقول: يا وسن يا حبيبتي شذا الحجي ..؟! جم مره بأقولج ان هذا مو فتنه .. هذا تطبيق قوانين .. هــذا مــو فـتـنـه .. وكمان ما يصير تتهمين الدكتور جذي ..
وسن: ليه يعني تبينا نسكت عن الحق ..؟! يا دكتور اللي يسكت عن الحق يصير زي الشيطان الاخرس اللي ما يتكلم ..
تنهد الدكتور وقال: شلون راح اتفاهم معاج ..؟!
قعد فتره طويله وهو ساكت يطالع فيهم بعدين قال: سمعوني .. هذي آخــــــر مره امشيها لكم ..
نطت لين من الفرحه وهي تطالع فيه اما بيشو فكانت تطالع بعدم مبالاه ..
د.تركي: بس ان تكررت مره ثانيه راح يكون عقابكم شدييد جدا .. مفهوم ..؟!
لين بإبتسامه: مفهوم يا احلى دكتور في هالدنيا .. بجد بجد انت افضل الدكاتره في انحاء المجره كلها ..
وسن بإستغراب: ليش في كواكب تانيه عليها دكاتره ..؟!
لين: مدري .. يمكن .. كل شي جايز في هالعالم ..
د.تركي: واللحين اطلعوا برى غسلوا ويوهكم واظافركم اللي كلها دم .. حشى فلم رعب مو بنات ..
لين: حااااضر ..
طلعت هي ووسن وطلعت وراهم بيشو اللي قالت: بجد مافي كرامه .. اذا علي فأنا افضل الفصل بس ما اهين نفسي جدام احد ..
طنشتها لين وراحت هي ووسن للحمامات بعد ما اخذوا شنطهم ..
وقفت قدام المغسله وبدأت تغسل وجهها وبعدين مسحته بالمناديل ..
لين: شكل ليان وسارا بيتأخروا .. كان نفسي انهم يطلعون اللحين عشان اخليج عندهم لأني بروح البيت ..
وسن: ليــــــه ..؟! لين لا تروحين وتخليني بروحي ..
لين: ما اقدر .. بلوزتي كلها كوفي .. لازم ابدلها ..
وسن: طيب بدليها وارجعي .. ورانا محادرتين وما ابي اقعد بروحي ..
لين: والله مشواااااار ..
وسن: عادي ..
لين: تعب .. بروح البيت واصكها نومه احسن ..
وسن: لييييين امانه ..
طالعت فيها لين بعدين قالت بإستسلام: اوكي افكر ..
وسن: لا ما تفكرين .. لازم ترجعين ..
ابتسمت وقالت: اوكي عشانج بس ..
وسن: هههه حلو ..
لين: عيل انتظريني نص ساعه وايي ..
وسن: تيب ..
طلعوا برى الحمامات وراحت لين اما وسن فجلست على احدى الكراسي وطلعت جوالها تدقدق فيه ..
بعد ربع ساعه سمعت احد يقول: كيفج وسن ..؟!
استغربت ورفعت راسها تشوف من هالولد فأبتسمت اول ما شافته وقالت بفرحه: بســـــــام ..
ابتسم وقال: ايه بسام .. هههه شفيج مبسوطه ..؟!
وسن: هههه لأني شفتك .. كيفك ..؟! ومنو هدا ..؟!
لف على صاحبه وقال: هذا رفيجي بندر ..
بندر: اهلين وسن ..
وسن: اهلين .. صار عندك اصحاب بسرعه ..
بسام: هههه تقريبا .. بس انتي شتقصدين لمن قلتي لأني شفتك ..؟!
وسن: انا انبسط اذا شفت احد اعرفه ..
بسام: اها .. طيب شفيج يالسه بروحج ..؟!
وسن: انتظر رفيجتي لين لأنها راحت البيت تبدل هدومها وبترد ..
بسام: طيب انتي عندج رفيجات ثانيات .. وينهم ..؟!
وسن: ليان وسارا عندهم محادره .. ندى واسيل غايبات ..
ابتسم بسام وقال: محادره ..!! حلو نطقها عليج هههه ..
وسن: بجــــــد ..؟! حتى ابوي يعجبه كلامي ..
بندر: واضح انج مدلعه وايد ..
وسن: كل الناس يقولو جذي مع اني احس نفسي عادي ..
بسام: طيب تسمحين لنا نيلس معاج شوي لين ترد رفيجتج ..؟!
وسن بفرحه: ايه عادي ..
جلسوا وقال بسام: كيف الدراسه وياج ..؟!
وسن: مرآ حلوه .. وانت سرت تحب الجامعه ولا لا ..؟!
بسام: هههه لا حبيتها ..
وسن: حلـــــــو ..
بندر: اقولج ليش حبها ..؟! لأني مويود فيها ..
بسام: يا واااثـــــــــق ..
بندر: ههههههههههههههههه ..
وسن: بجد يا بسام ..؟!
بسام: لا لا تصدقينه ذا جذاب ..
بندر: انا جذاب يا بسام ..؟!!! الله يسامحك ..
وسن: بس بندر يقول انو مو جذاب ..
بسام: اقولج لا تصدقيه .. ذا اكبر نصاب ..
وسن: ليه تغير كلامك .. اول تقول جذاب واللحين نصاب ..
بندر: ههههه لأنه انسان مفتري يا وسن ..
وسن: وش يعني مفتري ..؟!
بندر: يعني انسان يتهم الناس بشي جذب ..
وسن: آهآ ..
بسام: وسن لا تكونين صدقتيه ..؟!
طالعت وسن فيه فتره وهي ساكته بعدين قالت: بسام خلاص انتو سرتوا اصدقائي ..
بسام بإستغراب: ماني فاهم ..
وسن: يعني لا تنادوني وسن ..
بسام: عيل شنو نناديج ..؟!
وسن بإبتسامه: نادوني كارلوتا ..
بسام بتعجب: كيرلوتا ..!!!
وسن: هههههههههههههه ..
بسام: شفيج تضحكين ..؟!
وسن: انت تنطق كارلوتا بطريجه غريبه بس وااايد حلوه هههه ..
بسام وهو يجرب الاسم: كيرلوتا .. كيرلوتا .. بجد اسم غريب ..
بندر: انا اشوف ان اسم وسن احسن ..
وسن: بس انا عاجبني هدا ..
بسام: كيرلوتا ..!!! تصدقين .. احسه حلو .. احس في هالاسم شي حلو ..
وسن بفرحه: يعني اعجبك متل ما اعجبني ..
بسام: ايه اعجبتني طريجة نطقه ..
وسن: بس انت ما تنطقه صح .. بس احسن لأن الطريجه اللي تنطقه فيها مررآ حلوه واعجبتني كتييير ..
بندر في نفسه بإستغراب: "كارلوتا ..!! شعجبهم بهالاسم الغريب ..؟! وسن احلى بمليون مره من كارلوتا" ..
اما بسام فسكت وقعد يردد الاسم في نفسه عشان يحفظه ..
طالعت وسن فيه وتتفحص وجهه بنظراتها ..
انتبه لها بسام وقال: شفيج ..؟!
نزلت راسها شوي تطالع في وجهه من تحت فأستغرب اكثر وقال: شقاعده تطالعين ..؟!
وسن: وين الجرح اللي جرحتك في صالة التزلج ..؟!
بسام: اوووه ذاك الجرح .. هههه بجد كان مؤلم بس خلاص راح واختفى ..
وسن بحزن طفولي: مؤلم ..؟! يعني عورك اول وانت تقول ما عورني .. بسام انا آسفه لاني ما كنت اقصد ..
بسام: ههههههههههه اللحين كملت العاشره .. هذه المره العاشره اللي تتأسفين فيها .. قلت لج عادي شفيج ..؟!
وسن: ما اصدقك انت جذاب .. قبل شوي قلت مؤلمه معناته انها تعورك ..
بسام: كنت اتغشمر وياج .. صدقيني ما عورتني ابدا ..
برطمت وهي تطالع فيه بنظرات عدم تصديق وقالت: جذاب ..
ابتسم وقال: تعجبيني وانتي مبرطمه .. بالله خليج زعلانه ولا ترضي ..
بندر: هههههههه شهالطلب المشقلب ..؟!
جت لين في هالوقت وقال: اووه بسام هني .. اهلييييين ..
طالع فيها بسام وقال: هلا .. كيفج لين ..؟!
لين: تمام ..
بسام: اعرفج على رفيجي بندر ..
بندر: شحالج لين ..؟!
لين: تماااام .. وانت ..؟!
بندر: الحمد لله بخير ..
بسام: شذا اللي في ويهج ..؟!
لين: حاولت اخفيه بالميك اب بس بقيت آثار .. ههههه كنت اتضارب مع وحده اكبر مني بسنه ..
بسام: بجد .. عسى ما تأذيتي ..؟!
لين: شوي .. بس من ناحية الشعر كنت مصيطره لأن شعرها اطول من شعري ههههه ..
وسن بعتاب: لا تضحكي يا لين .. انا كنت بموت خوف وانتي تضحكي اللحين .. لا تعيديها مرآ تانيه واللي يسلمج ..
ابتسمت لين وقالت: من عيوني بس اذا احد غلط لازم اوقفه عند حده ..
مدت شفايفها بعدم رضى بعدين قالت: كمان لا .. ما ابيج تتأذي اكتر ..
تنهدت بعدين قالت بإبتسامه: من عيوني .. جم كارلوتا عندي ..؟!
وسن بإبتسامه: وحده ..
قاموا بسام وبندر وقال بسام: ياللا مانبي نزعجكم اكثر .. ورانا محاضره ..
لين: اوكي براحتكم ..
بسام: بااي يا .. كيرلوتا ..
وسن: ههههه باااي ..
راحوا بسام وبندر جهة كلاسهم ..
بندر: اقول بسام ما ياوبتني .. منو ذي ..؟!
بسام: وحده قابلتها هي وشلتها في احدى صالات التزلج الاربعا اللي فات ..
بندر: بصراحه دشت البنت قلبي ..
بسام: ايه صح مرره عسوله وكيوت .. تينن هالبنت ودي آكلها ..
بندر: هههههههههه ..
بسام: كل شي فيها حلو .. حتى دلعها طفولي ويهبل .. خاصتا لمن تبرطم ههههه ..
بندر: هههههه فعلا ..
دخلوا كلاسهم وبدأوا يحضرون للمحاضره الجايه ..

================================================== ==================

في نهاية الدوام كان سامي واقف مع شلته وقال: لا تنسون .. بعد اذان العصر تكونون عندي ..
يزيد: بسألك سؤال واتحداك تياوب ..
سامي: وشو ..؟!
يزيد: جم مره قلت هالكلام ..؟!
سامي: هههههههههههههههه ..
يزيد: اذيتنا ياخي .. خلاص والله فاهمييين .. اقسم بالله اذا عدتها مره ثانيه راح اسحب عليكم وما ايي ..
سامي: هههههه خلاص آخر مره ..
عماد: بجد هالحفله راح تقتل الطفش اللي بداخلي ..
دانا بإحراج: يا جماعه مو لازم انا ما ابي ..
سامي: السؤال اللي وجهه يزيد لي راح اوجهه لك .. جم مره قلت هالحجي ..؟!
دانا: انا ما ابي اكلف عليكم او.....
سامي: بس بس لا تفتح اسطوانه قديمه ومعروفه ..
سكتت وهي تطالع فيهم .. بجد مو راضيه وقلبها قارصها وبقوه .. تحس انه بيصير شي ما تبغاه ..
صالح: عيل مع السلامه انا رايح ..
سامي: لا تنسى تيي بعد العصر على طول ..
صالح: اوكي ما بنسى ..
فراح لسيارته واتجه لبيته ..
دانا: اممم طيب انا ما اعرف طريج بيتك ..
سامي: عادي هذي مو مشكله .. اذا تبيني انا بنفسي ايي لبيتك واخذك عادي ..
دانا بسرعه: لا لا مب لازم .. انت قول لي في اي منطقه وانا ايي واذا قربت بأتصل عليك عشان توصف لي ..
سامي: هههه اوكي .. طيب شفيك رفضت فجأه وبخوف .. خايف اني آكلك مثلا ..؟!
دانا بترقيع: ها .. لا .. بس ما ابي اكلف عليك ..
سامي: ترى انت صجيتنا بما ابي اكلف عليكم .. شفيك ..؟! تراك صاير من الشله لك اكثر من شهرين .. شفيك تحاجينا وكأنك غريب ..؟!
دانا بإحراج: مـ ماكو شي .. ياللا باي بروح البيت ..
راحت فقال سامي: مازال منحرج منا ..
يزيد: فعلا ولد مؤدب .. احسه بيخرب اذا يلس معاك انت او عماد ..
عماد: انا شدخلني ..؟!
يزيد: اخاف سامي يدخل في مخ هالبريء حكاية المغازله والانحراف اللي ماشي فيه .. اما انت محد بهالدنيا قدك في اصطناع المشاكل .. مره مصيده ومره جرو ومرات كثيره اشياء مينونه .. بليييز ابعدوا عنه لا تخربوه ..
سامي: يعني شلون .. نطلع من الشله ..؟!
يزيد: طبعا لا .. بس ابعدوا هالعادات عنه ..
سامي بتسليك: يصير خير ..
هز يزيد راسه وقال: عالعموم باي انا رايح ..
سامي: بااي ولا تنسى تيي بدري .. لا تتاخر ..
يزيد: خلاص انا قررت .. بأسحب عليكم وما بأيي ..
سامي بتفاجؤ: ليــــــــش ..؟!
يزيد: لأني قلت اذا عدت كلامك راح اسحب ومع هذا طنشتني وعدت ..
سامي: هههه يووه نسيت .. سوري آخر مره ..
ابتسم يزيد وراح ..
سامي: مو كأن فيه واحد ناقص في الشله ..
عماد: امبلا .. وين الشيخ ريان ..؟!
سامي: مدري .. قبل شوي كان معانا ..
ريان: انا هنا ..
لفوا فشافوه جالس يدقدق في جواله ..
سامي: شقاعد تسوي ..؟!
ريان بقهر: هيئة الاتصالات الغبيه .. مدري شفيهم يسحبون من رصيدي فلوس يوميا .. لازم اتفاهم معهم بس المشكله ما يردون .. يقولون حاول مره ثانيه لأنهم مشغولين ..
عماد: هههههههه طيب يمكن انت مشترك بخدمه ..
ريان: ما اشتركت ولا احب اشترك في خدمات الموبايلات .. اووف بجد قهر ..
سامي: ههههههههه الله يعينك ..
طالع في ساعته وقال: ياللا شباب انا رايح .. باااي ..
عماد: باي ..
قام ريان وقال: حتىانا رايح بس مو للبيت .. للشركه المعفنه هذي ..
راح ريان وعماد كل واحد لبيته ..
اما سامي فراح لسيارته ركبها وراح لبيته ..
خخخ لا امزح .. وقف قدام باب السياره عشان يطلع المفاتيح ..
.......: يا اخ ..
لف سامي وقال: هلا ..
اشر عالكفره وقال: كفرة سيارتك مو صالحه ..
عقد سامي حواجبه ونزل نظره للكفره فشافها مخروقه بشيء حاد ..
عصب وضرب برجله عالكفره وهو يقول بقهر: غيــــــــداؤؤه الجلبـــــــــه ..
اسند ايده عالسياره وهو يطالع في الكفره بقهر وحقد بعدين طلع جواله عشان يتصل بأحد اصحابه ..
بغى يتصل بس بطل .. اللحين تعبانين وما يبغون غير يوصلون لبيتهم وبس ..
تقدمت منه وقال بنعومه: تعال اوصلك بسيارتي ..
لف وجهه عليها واول ما شافها تنرفز وقال: تقلعــــــــــي عن ويهــــــــــي يا آنسه اروى قبل لا اتهور وأأذيج ..
ابتسمت اروى وقالت: كل شي منك انا ارضى فيه ..
عض على شفته بقوه من العصبيه فجاء في باله شي ..
طلع جواله واتصل وهو يطالع في اروى ..
شوي قال: اهلييين بقلبو ريماس كيفج حياتي ..؟!
ريماس بخجل: تمامو ..
سامي: يالبـــــــــى هالتمام وصاحبة التمام ..
ريماس: ثانكس قلبو ..
سامي: يا حياتي انا .. احلى ثانكس سمعته بحياتي ..
طالعت اروى فيه بحقد .. هي عارفه انه متقصد .. بس ابتسمت بثقه وهي تقول في نفسها: "انت لي .. طال الزمان او قصر" ..
سامي: اقول حياتي انتي وينج ..؟!
ريماس: توني طلعت من باب الجامعه ..
سامي: حلو .. طيب قلبو ابي منج خدمه صغنونه ..
ريماس: انت تؤمر ..
سامي: يا حياتي انا .. بصراحه بغيتج توصليني لبيتي .. سيارتي خربت وما عندي سياره اروح فيها ..
ريماس: بسس ..؟!! من عيوني ..
سامي: تسلملي هالعيون والله .. انا انتضرج في مواقف السيارات .. باااي روحي ..
ريماس: بااي ..
قفل سامي جواله وقال: خلاص مستغنين عن خدماتج يا انسه اروى ..
ابتسمت بإبتسامتها الواثقه وقالت: اعرف انك مستغني عن خدماتي .. بس بيي يوم اكون انا كل خدماتك .. بااي حياتي ..
حركت ايدها تودعه وراحت وسامي يتابعها بنضراته المتنرفزه من ثقتها ..
سامي: هذي شلون تفهم ..؟! يبيلها شي قوي يفهمها ..
ريماس بإبتسامه: هاااي سامو ..
لف عليها وقال بإبتسامه: هاااي يا بعد طوايف سامو ..
ابتسمت بعدين قالت: تعال اركب معاي انا والسايق عشان اوصلك ..
سامي: اكيد حأركب .. وعازمك على غدا في افخم مطاعم الدوحه كلها .. جم ريماس عندي ..
راح معها وفعلا غداها في احدى المطاعم الفاخره وبعدها رجع لبيته وكلم الحراس عشان يجيبون سيارته من الجامعه ..
بعدين دخل وبدأ يشوف التجهيزات اللي صلحتها ريندا عشان حفلة دانا ..

================================================== ==================

في بيت ام فيصل ..
هذا هو اليوم الرابع من وفاة زوجها ..
حالتها النفسيه احسن بشوي من الايام اللي قبلها وبدأت تاكل لها شي ..
وعائلة ابو وائل مازالوا عندها ويمكن يروحون بكره ..
كانوا جالسين يتغدون .. مو كلهم لأن فيصل مو موجود معهم ووائل في المجلس ..
ام فيصل اكلت شوي وبعدين بدأت تدخل في عالم السرحان والافكار ..
اما ام وائل فعرفت من زوجها عن حكاية اسيل بس البنات ما يعرفون واذا سألوها تقول مدري ..
اما وائل فمجبر يقعد عند امه واخواته في البيت مع انه وده يروح يدور عن اسيل في كل مكان ..
ام وائل: احلام ليش ما تاكلين ..؟!
طالعت ام فيصل فيها بعدين قالت: ام وائل ابي ولدج في خدمه ..
استغربوا من طلبها فقالت: فيصل مو مويود وانا ما اقدر انتظر .. قوليله يجهز السياره ابيه يوديني مجان ..
ام وائل: وين يا احلام ..؟!
ام فيصل: في الطريج بقوله ..
ام وائل: انتظري شوي .. كلي بعدين روحي ..
قامت ام فيصل وهي تقول: ما ابي آكل ..
طلعت لفوق عشان تجيب عبايتها ..
ام وائل: غريبه .. وين تبي تروح ..؟!
خرجت للمجلس عند وائل اللي جالس ياكل مع اخته لارا ..
ام وائل: اقول وائل ..
وائل: هلا يمه ..
ام وائل: جهز السياره لأن عمتك تبيك توصلها مجان .. مع اني مدري وين بتروح ..؟!
وائل: يمكن المستشفى عشان تشوف فارس .. ياللا انا رايح ..
قام وطلع برى وشغل السياره ..
رجعت ام وائل للصاله وبعد شوي نزلت ام فيصل بعبايتها فقالت ام وائل: احلام ترى ما يصير تخرجين .. انتي في العده وحرام احد يشوفج ..
لفت ام فيصل الطرحه على راسها وهي تقول: اعرف وعشان جذي بتغطى ..
ام وائل: بس المفروض ما تخرجين إلا للضروره ..
ام فيصل: وانا خارجه للضروره مو للعب او التمشيه ..
تغطت وطلعت الشارع وركب مع وائل ..
حرك وائل السياره بعدين قال: وين تبيني اوديج يا عمه ..؟!
انصدم من ردها لمن قالت: لمخفر الشرطه ..
لف عليها وقال: شنو ..؟! وليش المخفر ..؟! الله يهداج يا عمه شتبين بالمخفر ..؟!
ام فيصل: شي خاص ..
اتجه للشرطه وهو حده متفاجئ ومستغرب ..
فجاء في باله اسيل وقال في نفسه: "معقوله بتبلغ عن ضياع اسيل عشان يطلعوها ..؟! غريبه مع ان عمتى ما تحب اسيل .. يمكن تغيرت بعد موت عمي الله يرحمه وحست بالذنب" ..
كلها دقايق بعدين وقفوا قدام اقرب مركز شرطه فقالت ام فيصل: خلك هنا ماراح اتأخر ..
وائل: يا عمه انـ....
نزلت ام فيصل وهي تقول: ما ابي احد يلحقني ..
قفلت باب السياره وراحت ووائل مصدوم من حركتها ..
ليش صلحت جذي وايش السبب ..؟! شتبي من المركز .. وليش ما خلتني الحقها .؟!
هالتساؤلات كانت تدور في مخ وائل وهو يشوف زوجة عمه تصعد الدرج وتدخل للمركز ..
بعد عشر دقايق دخلت ام فيصل عند الضابط العام ..
تقدمت عند مكتبه وطلعت اوراق من تحت عبايتها وحطتها عالمكتب ..
اخذ الضابط الاوراق وهو يقول: ها يا خاله .. شنهي الشكوى اللي تبين تقدمينها ..؟!
ام فيصل: انا اطالب بحق بنتي اسيل ..
الضابط: ما فهمت قصدج ..
جت بتتكلم ام فيصل بس الضابط قاطعها وهو يقول: اول شي تفضلي ارتاحي ..
جلست ام فيصل وقالت: يا حضرة الضابط .. زوجي غلط بحق بنته في حياته وانا ابي اصحح غلطته ..
طالع الضابط فيها بأهتمام وهز راسه بمعنى استمري ..
ام فيصل: قبل تسع تعش سنه انا ولدت بتؤامين ولد وبنت .. الولد سميناه فارس والبنت اسيل .. بس اسيل كانت تعاني من نقص شديد في المناعه وبعدها بسنه وسبع اشهور يتها انفلونزا حاده وصخنت وزكمت وقعدت على هالحال شهر وبعدها ماتت .. في نفس الليله اللي ماتت فيها خرج زوجي من البيت وهو هموم الدنيا كلها على راسه .. مر من عند احد الاسواق وشاف ناس قطوا طفله وهربوا ..
سكتت شوي بعدين كملت: ياء عندها وكانت طفله صغيره في نفس عمر بنتنا اسيل .. انكسر خاطره عليها خصوصا انه فقد بنته قبل ساعات فأخذها ويابها عندي البيت .. يابها وقالي انه شاف احد يقطها وهرب وانها طفله مسجينه مالها احد في هالدنيا وقال حجي كثير وهو مرتبك تقريبا .. انا قلت له رجعها مجانها يمكن اهلها يبغوها بس هو رفض بثقه وهو يقول لا اهلها ما يبوها ..
الضابط: وبعدين شصار ..؟! اكيد وديتوها لدار رعاية الايتام واللقطاء ..
هزت راسها بلا وقالت: انا اقترحت عليه بس كان رافض وقال ان هالطفله تذكره ببنته اسيل وقالي انه راح .... بصراحه صدمني لمن قال انه ما يبيها تعيش بلقب لقيطه وقال انه راح يخليها عندنا وتكون بديل عن بنتنا اسيل ..
الضابط: بديل ..؟! انا مب فاهم ..
ام فيصل: بنتي ماتت فقبرها ابوها بس ما طلع لها شهادة وفاة ..
استغرب الضابط وقال: ليش ..؟!
ام فيصل: هالطفله اللي لقاها خلاها بديل عن اسيل .. يعني صار جدام الناس هو ان بنتي اسيل ما ماتت وان هاللقيطه هي بنتي .. وعاشت هاللقيطه باسم بنتي وبأوراق بنتي ..
انصــــــــــــــــدم الضابط وقال: شنــــــو ..؟! شلون فكر جذي ..؟! هذي جريمه ويعاقب عليها القانون .. اصلا هالعمل ما يرضى فيه ربنا سبحانه .. وين كان عقله يوم فكر يسوي جذي ..؟! هذا الشي ما يصير والله ما يصير .. هذا اسمه انتهاك لحرمات الآخرين .. هذا اسمه انتحال شخصيه والتلاعب بالقانون ..
ام فيصل: هو كان يعرف هذا بس عواطفه سيطرت على عقله .. واللحين قبل اربع ايام صلح حادث ومات ..
تنهد الضابط وقال: لا حول ولا قوة إلا بالله .. بس اللي صلحه غلط والله غلط ..
ام فيصل: انا يبت كل الاوراق الخاصه ببنتي .. انا ابي آخذ حق بنتي .. ابي اطلع لها شهادة وفاة .. ما يصير تكون بنتي ميته وعندها قبر بس بدون اصل او اوراق .. ميته ولا كأنها ميته ..
طالع الضابط في الاوراق وقال: طيب وين البنت البديله ..؟!
ام فيصل: لمن مات زوجي عرفت انها لقيطه فهربت من البيت ولا ادري وينها ..
قعد الضابط حول نص ساعه وهو يقرأ الاوراق ويتفحصها بعدين قال: عيل راح نوقف كل الاشياء الخاصه باسم اسيل عبدالرحمن الرملي .. بطاقة الاحوال وصرافة البنك وغيرها من الاوراق الخاصه وبأودي هالاوراق للمحكمه عشان يشوفوها ويطلعوا لبنتج شهادة وفاة .. اما زوجك فكان من المفروض يتعاقب بس ما دامه مات فمالنا غير اننا نقول الله يرحمه ..
حط الاوراق في الملف وقال: اطمئني حق بنتج راح يوصلج واسم اسيل عبدالرحمن الرملي راح يلغي من كل الاماكن والمواقع بحكم وفاتها من قبل اكثر من ١٧ سنه ..
ام فيصل بإبتسامه: الله يجزاك خير ان شالله ..
الضابط: بس انتي كمان حتتعرضي للمحاكمه بصفتج عارفه وساكته ..
ام فيصل: بس انا ما بإيدي شي .. كان يهددني بالطلاق وغير جذي انا اعطيتكم خبر اللحين ..
الضابط: ما دام جذي فأطمئني لأنه اكيد ما بيكون عليج شي .. بس لازم تراجعي المحكمه وان شالله السالفه ما بتطول .. اما عن البنت فإذا لقينها راح نشوف في امرها بس اكيد ما عليها شي لأنها مو عارفه ..
قامت ام فيصل وقال: مشكور يا حضرة الضابط ..
الضباط: العفو .. هذا واجبنا .. بس بغيت اسألج عن البنت .. ما تعرفين وين راحت او تشكين في مجان ..؟!
قالت ام فيصل وهي تنهي الموضوع: لا ما اعرف .. مع السلامه ..
طلعت والضابط يطالع فيها فقال: الواضح انها تكرهها ..
نزلت ام فيصل وركبت السياره فطالع وائل فيها بعدين قال: شكنتي تبين من الشرطه ..؟!
ام فيصل: روح للبيت بسرعه ..
تنهد وقلبه مو مطمئن .. شغل السياره واتجه للبيت ..
ام فيصل: وين فيصل ..؟!
وائل: مدري .. بس اكيد عند فارس في المستشفى ..
تذكرت ام فيصل ولدها فارس .. نزلت دموعها وقالت بصوت باكي: كيف حالته اللحين ..؟!
تنهد وائل وهو مو داري ايش يقولها ..
يكذب عشان يطمنها ويخفف عنها .. او يقول الحقيقه وتزيد حالتها سوء ..
ام فيصل بخوف: كيف هي حالة ولدي فارس ..؟!
وائل بهدوء: استقرت حالته .. بس دخل في غيبوبه وبيصحى منها قريب ان شالله ..
شهقت الام وقالت: غيبوبـــــــــه ..؟؟؟!!!!!
وائل بسرعه: اطمئني لأنه بيصحى منها بسرعه يا عمه .. لا تشيلي هم ..
بكت الام وقالت: وائل وصلني للمستشفى ابي اشوفه ..
وائل: ما اقدر يا عمه .. وقت الزياره يبدأ خمسه .. باجي اكثر من ثلاث ساعات .. خلينا نرجع البيت وبعدين يصير خير ..
اتجه وائل للبيت وام فيصل تبكي بصمت ..

وفي مكان ثاني مو بعيد عن ام فيصل ..
عند ام مايد كانت على طاولة الغداء مع بناتها واولادها وزوجها ..
الام: بجد حالة ام فيصل هالايام ما تسر لا عدو ولا صديق ..
الاب: الله يكون بعونها ..
محسن: ابوي لو انا مت شتسوي انت بحياتك ..؟!
الاب: عندي بدالك مازن ..
غيدا: ههههههههههههههههههههه حلوه الكرشه صح ..؟!
محسن بصدمه: ابوي شقاعد تقول ..؟!
مازن وهو يرز نفسه: اثريني طالع مهم وانا مدري ..
محسن: ابوي ياوبني انت شقاعد تقول ..؟! لهدرجه انا زلابه عندك ..؟!
غيدا: انت اعترفت بنفسك ..
الاب: لا انا ماقصدت جذي بس يعني السالفه هي انو .. اممم كنت اتغشمر ..
محسن: اتغشمر ها ..؟! انا قايم من الاكل وماراح آكل .. خل غشمرتك تنفعك ..
وقام فضحكت غيدا وهي تقول: ههههههه روحه بلا رده ..
الام: بجد عقولكم عقول بزارين ..
مازن: على طاري البزارين وين آخر العنقود ما اشوفها ..؟!
الام: بطنها يمغصها فيلست في غرفتها ..
قامت غيدا بسرعه وهي تقول: يوووه تذكرت شي ..
راحت وطلعت لغرفة غاده على طول ..
فتحت الباب وشغلت اللمبات وقالت: غــــــــــــاده ..
غطت غاده نفسها بالبطانيه وهي تقول: اوووف طفوا الليت ابي انام ..
غيدا: اول شي قوليلي انتي يوم طلعتي عشان تحاجين اسيل في يوم العزا شصار ..؟!
سكتت غاده شوي بعدين جلست عالسرير وطالعت في غيدا ..
غاده: مدري شأقول بس انا سمعت شي صدمني ..
غيدا بإهتمام: وشو ..؟!
غاده: بصراحه انا يوم طلعت ما حصلتها بعدين نزلت ودخلت المطبخ عشان اشرب ماي .. سمعت اخوها فيصل وعمهم اللي عنده مزرعه يتكلمون عنها ..
جت غيدا عندها وجلست على حافة السرير وقالت: شكانوا يقولون ..؟!
سكتت غاده فتره طويله لدرجة ان غيدا بدت تتحمس تعرف السالفه ..
طالعت غاده في غيدا وقالت: انا ما ادري ان كان الحجي ذا صح او غلط .. بس كانوا يقولون ان اسيل هربت بعد ما اكتشفت انها ....... لـ لقيطه ..
طالعت غيدا فيها بصدمه وقالت بدون شعور: شيعني اكتشفت انها لقيطه ..؟!
ما جاوبت غاده عليها فلفت غيدا نظرها في انحاء المكان عشان تستوعب الصدمه ..
مرت عشر دقايق وغيدا في حالة صمت بعدين قالت: طيب شلون ..؟! يعني شلون هي لقيطه وفي نفس الوقت بنت عبد الرحمن ..
هزت غاده كتفها .. قامت غيدا وطفت اللمبات وقفلت الباب ..
غيدا بهدوء: اسيل بنت ييراننا لقيطه .. شلون صار جذي ..؟!
بجد هي في مرحلة ذهول ولا هي قادره تستوعب ..

================================================== ==================