شبكة همس الشوق - عرض مشاركة واحدة

11 - 3 - 2014, 09:45 PM

مع بداية صباح يوم الاربعاء ..
دق جرس الشقه فقام وفتح الباب واخذ اكياس الفطور اللي طلبها من المطعم القريب من عمارتهم ..
قفل الباب وقال: انـــــــــس بســـــــــرعه الاكل ياء ..
خرج انس من غرفته وهو شايل شنطة الجامعه ورماها عالكنبه وجلس عشان ياكل ..
انس: اقول طارق نسيت اسألك عن شي ..
طارق: وشو ..؟!
انس: قلمي الازرق المخطط بالرصاصي ضاع .. ما شفته ..؟!
طارق: لا ..
انس: يا ربيي وينه .. دورت وما لقيت ..
طارق: طيب اشتري واحد يديد ..
انس: لا .. كل شي إلا هذا القلم .. لازم القاه .. وكمان انا عندي ازرق غيره بس هذا مهم ..
طارق: طيب دور هنا او هنا يمكن تلقاه ..
انس: قلبت الشقه فووق حدر بس ماكو فايده ..
هز طارق كتفه وقال: يمكن ضاع في الكلاس ..
انس بدهشه: لا مستحييييل .. ان ضاع في الكلاس فهذا يعني اني مستحيل القاه ..
طارق: لهدرجه هالقلم مهم ..؟!
انس: اكثر مما تتصور .. القلم هو بالاصل لأختي إيمان بس اعطتني إياه .. بجد يا طارق هذا شي غالي بالنسبه لي ..
طارق: طيب اليوم نروح الجامعه ونسأل الطلاب وندور في الكلاس .. ان ما لقيناه نرجع هنا وندور من يديد وان شالله نلقاه ..
انس: ان شاء الله ..
افطروا وبعد ما خلصوا رفعوا الاكل ونضفوا من مكانهم وبعدها خرجوا من الشقه ..
نزلوا من المصعد واتجهوا ناحية سياراتهم فشافوا بنت وولد نازلين من العماره ومعاهم شنطهم المدرسيه ..
انس: طارق منو ذولا .. اول مره اشوفهم ..
هز طارق كتفه وقال: يمكن ييران يديد ..
انس: لحضه لا يكونون هم اللي تكلمت عنهم ميار قبل امس ..
طارق: يمكن .. بس وين رايحين ..؟!
انس: شهالسؤال البايخ ..؟! ما تشوف مريول البنت من تحت العبايه ..؟! اكيد رايحين للمدرسه ..
طارق: بس المدارس بعد الشارع العام .. شلون يروحوا له ..؟! الشارع خطير مره ..
انس: يمكن ما عندهم فلوس عشان يركبوا تاكسي ..
طالع طارق فيهم وقال: بصراحه انا اوافقك الرأي .. اختهم الكبيره انسانه مستهتره جدا .. اوكي المدارس قريبه بس بينهم شوارع خطيره .. المفروض ما تروح وتتركهم .. هم صغار وما يقدروا يدبروا نفسهم ..
انس وهو يقلده: لا لا تظلمونها يمكن عندها ضروف ..
طارق: هههههه ..
انس: ها تأكدت ان كلامي انا وميار صح ..؟!
طارق: كلامكم صح بس احس انها مظلومه في نفس الوقت احس انها قاسيه ومستهتره .. بجد انا محتار في امرها ..
انس: هههههههه طيب امش نروح الجامعه واترك هالحيره على ينب ..
راح انس لسيارته .. اما طارق فوقف شوي يطالع في البنت والولد وهو يفكر بعدين ركب سيارته واتجه للجامعه ..
كلها ربع ساعه حتى دخل طارق وانس للكلاس لأن وقت المحاضره قرب ..
جلسوا على كراسيهم وقال طارق: اللحين ماكو وقت .. بعد المحاضره راح نبدأ ندور على قلمك ..
انس: اوكي وان شاء الله نلقاه ..
لف طارق جنبه وقال: غريبه وينه فهد ..؟!
انس: طبعا غايب لك يومين فأكيد ما راح تعرف وينه ..
طارق بخوف: انس فهد فيه شي ..؟!
انس: لا اطمئن .. بس عشان ابوه تنوم في المستشفى فراح مرافق له ..
طارق: سلامات شفيه ابوه ..؟!
انس: ارتفع السكر عنده بدرجه فضيعه فعشان جذي تنوم في المستشفى ..
طارق: ومتى بيطلع ..؟!
انس: الخميس ..
طارق: الله يقومه بالسلامه ان شاء الله ..
انس: ان شاء الله ..
ابتسمت عهد بهدوء وقالت: طارق ..
لفوا انس وطارق عليها فشافوها متكشخه لآخر درجه وفي إيدها سله حلويات ..
عهد بإبتسامه: اليوم هو عيد ميلادي فحبيت اوزع عالكلاس حلويات .. تفضل ..
ومدت السله لهم .. ابتسم انس واخذ نوع من باونتي وقال: مبروك وكل عام وانتي بخير ..
عهد: وانت بخير ..
طالع طارق في الحلويات وقت طويل بعدين اخذ نوع من تويكس ..
ابتسمت عهد وقالت: تويكــــــس ..!! ذوقك مثل ذوقي لأني اموت في التويكس ..
ابتسم طارق وقال: انا احب سنيكرز بس اخذت تويكس لأني تذكرت ان اختي تموت في التويكس ..
زادت ابتسامته وقال: سبحان الله ذوقج مثل ذوق اختي ..
ظهرت علامات الدهشه على وجهها بعدين ابتسمت بترقيع ..
طارق: وبغيت اقولج شي .. اعياد الميلاد حرااام ..
هزت عهد راسها وقالت: اعرف .. بس انا ما اصلح عيد ميلاد .. اسوي حفله عاديه مو عيد ميلاد ..
طارق بإبتسامه: وليه اللف والدوران ..؟! ترى انتي بجذي تضحكي على نفسج وعلى ربج .. فاهمه ..؟!
انحرجت وما قدرت ترد عليه ..
طارق: خلاص تقدري تروحي ..
وقفت فتره متردده .. تبي تكلمه في سالفه بس خايفه ..
طارق بإستغراب: شفيج ..؟!
عهد: ها .. آ ا ه لا ولا شي ..
لفت ورجعت مكانها ..
طارق: واضح انه كان عندها كلام تقوله ..
انس: ايه صح بس شكلها ترددت وبطلت ..
هز طارق راسه وبعدها دخلت الدكتوره عليهم واعطتهم المحاضره الاولى في هذا الصباح ..

⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊ ⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊

في الكلاس كان راشد سرحان في عالم آخر ولا هو جنب المحاضره ابدا ..
وطبعا يفكر في عادل عبد العزيز ..
طالع في الساعه وقال في نفسه: "حلو باجي خمس دقايق على نهاية المحاضره .. خلوني بس اطلع من هالمحاضره وشوف وش حأسوي لك يا عادل" ..
اما بسام فكان حاط خده على ايده ويطالع في راشد ..
بسام في نفسه: "وش هالنضره الشريره اللي طالعه من عيونك .. شكلك ناوي تتهاوش مع واحد زي دايم" ..
دقه بندر وقال بهمس: انتبه للمحاضره وبطل سرحان ..
طالع بسام فيه وقال: اقول بندر .. راشد ليش يحب المهاوشات ..؟!
بندر: مدري .. بس يمكن لأن انسان عصبي او مزاجه غريب او هو جذي طبعه .. والله مدري ..
بسام: طيب ليش ما يفصلونه على كثر مهاوشاته ..؟!
بندر: اولا الطلاب نادرا يبلغون عنه عشانهم خايفين منه .. ثانيا الجامعه لها شراكه مع وحده من الشركات اللي كانت لأبوه وصارت له .. عشان جذي مرتاح ..
بسام: آهآ ..
بندر: واللحين انتبه للدكتور واترك السرحان في راشد وغيره ..
فتذكر بسام شي وقال: بندر انت من امتى في هالجامعه ..؟!
بندر: ييت السنه اللي طافت ..
بسام: طيب تعرف واحد اسمه طارق العالي ..؟!
بندر بتفكير: طارق العالي ..؟؟! لا ما اعرف .. يمكن في قسم غير قسمي ..
بسام: متأكد ..؟!
بندر: ايه متأكد .. بس منو طارق هذا ..؟!
بسام: هذا واحد اعرفه .. اول يوم لي في الجامعه صك فيني واحد وكان مستعيل فقال سوري وراح .. كان نسخه طبق الاصل من طارق .. بس ما ادري هو ولا لا ..
بندر: انا اعرف واحد في القسم اللي في المبنى ج .. بسأله يمكن يكون طارق في قسمه ..
هز بسام راسه وقال: اوكي ..
في ذا الوقت انتهت المحاضره وقام الطلاب وبدأوا يخرجون ..
خرج راشد من الكلاس هو وخويه ايمن .. بس راشد ما اتجه ناحية الشله ..
فأستغرب ايمن وقال: راشد وين بتروح ..؟!
راشد: بروح لشلة ولد الراهي .. عندي حساب مع واحد منهم ولازم اصفيه ..
ايمن بحماس: حلو .. مين هو ..؟!
راشد: لمن نوصل راح تعرف ولد الجلب هذا ..
ايمن: اووف واضح انك مقهور منه ..
راشد: جدا .. والله ما راح ارحمه ابدا .. بخليه يعض الارض من شدة الندم ..
ايمن: ما اقول غير الله يعين هالولد .. شكله راح يلاقي حتفه على ايدك ..
راشد: في ذي الحاله اطمئن .. ذا قطو بسبعة ارواح ما راح يموت ..
ايمن: هههههههههه ..
راشد: تتذكر الولد اليني اللي حاجيتكم عنه ..؟!
ايمن: ايه اذكره ..
راشد: هو نفس الولد اللي ابي اصفي حسابي معاه ..
ايمن: اوووه حماس ..
عقد راشد حواجبه وهو يطالع في الشله من بعيد ..
راشد: ما اشوفه معهم ..
ايمن: يمكن في محاضرته ..
راشد: ويمكن غايب .. امش اسألهم ..
وقف راشد قدام الشله اللي طالعوا فيه اول ما وقف ..
سامي: خييير ليه ياي ..؟!
راشد: انا ما ييت عشانك ياولد الراهي .. انا ييت اسأل عن عادل .. وين هالجلب الجبان ..؟!
سامي بتهديد: احفظ لسانك قبل لا اقطعه لك .. إياني وإياك تسب عادل جدامي .. فاهم ..؟!
طالع فيه راشد بإحتقار وقال: احترم نفسك قبل لا احطك في بالي .. كل اللي حطيتهم في بالي كرهوا نفسهم .. اوكي ..
سامي: لا خوفتني يا شيخ ..
راشد بحده: انا مو ياي عشان اضيع وقتي معك .. ابي اعرف وين عادل ..؟!
ريان: غايب ..
راشد بقهر: الحققييييير ..
لف وراح هو وايمن ..
سامي: بجد انسان تافه ..
عماد بإستغراب: شيبي من عادل ..؟!
هز سامي كتفه وقال: مدري .. قبل امس شفتهم يتهاوشون فدخلت وساعدت عادل ..
عماد بصدمه: عادل يتهاوش ..؟! اكيد تتغشمر ..
سامي: حتى انا مصدوم انه يتضارب .. واضح عليه انه هادي ومسالم ..
ريان: اكيد فيه سبب جايد ..
عماد: يزيد صالح شفيكم ساكتين .. ادخلوا معنا بالسالفه ..
يزيد: ها .. ا ا طيب ..
صالح في نفسه: "كلام سامي ما دش مخي .. شلون دانا هالبنت تهاوشت مع هالاهوج .. لا لا ما اصدق" ..
سامي: بصراحه انا مستغرب من صالح ويزيد .. اليوم هادين ومرتبكين شوي .. ليش ..؟!
يزيد بسرعه: لا لا ماكو شي ..
ابتسم صالح وقال: بصراحه انا تعبان شوي وعشان جذي هادي ..
عماد: كلامكم ما دش مخي ..
طالع ريان فيهم بعدين قال: المهم اللحين هو عادل .. احد عارف منكم ليه غاب .. مو من عادته ابدا ..
سامي: مدري .. يمكن عنده ضروف قويه ..
عماد: اكيد .. عمره ما غاب بدون سبب ..
يزيد في نفسه: "يمكن غابت بسبب اللي صار امس .. ايه اكيد" ..
طالع صالح في ساعته وقال: عماد هيا محاضرتنا حتبدأ بعد ست دقايق ..
عماد: ههههه دقيق في الوقت ..
ضحك صالح وقام هو وعماد على محاضرتهم ..

في مكان مو بعيد عنهم ..
كانت غيدا جالسه مع خويتها بيشو ..
بيشو بدلع: حمودي ..
غيدا: يا عيون حمودي وربعه ..
بيشو: اممم كلمت الدكتور راكان عن سالفتي ..؟!
غيدا: ايه ..
بيشو بفرحه: يااااي تسلمي ..
غيدا: لحضه خليني اكمل ..
بيشو: كملي ..
غيدا: هالدكتور داهيه يا بيشو .. عرف انج خويتي مو رفيجتي .. وعشان جذي سكت وطلعت .. خفت انه لو كلمته في موضوعج يعلم علينا الاداره ..
بيشو بضجر: اوووف اقسم بالله انه ملعون وجلب ..
غيدا: طيب روحي انتي كلميه وتفاهمي معاه بالطيب واكيد حيمر الامر على خير ..
بيشو بإستنكار: مستحييييييييل .. انــــــــا بشــــــــرى استسمح منه ..!!! لا يمكن ..
غيدا: بس بجذي يمكن يفصلج ..
بيشو: اتحداه ... المهم خلينا نغير السالفه ..
تذكرت غيدا سالفة اسيل فقالت: يوووه نسيت اخبر الشله عنها ..
بيشو: شتقصدين ..؟!
غيدا: تتذكرين اسيل ..؟!
بيشو: ايوه ذيج المليقه ..
غيدا: اكتشفت عنها شي خطيير ..
بيشو: وشو ..؟!
غيدا: اكتشفت انها لقيطه ..
بيشو بدهشه: احلفــــــــــــــــــي ..
غيدا: اقسم بالله ..
بيشو بإبتسامة خبث: هههه وعشان جذي غايبه .. حض ذي البنت بجد اقشر ههههههه ..
غيدا: ههههه الله يستر منج .. ضحكتج مو طبيعيه هههههههه ..
بيشو: على طاري اسيل .. بغيت اسألج سامي ما رد من السفر .. ودي اشوف الولد اللي حبيتيه بيوم من الايام .. ابي اشوف شالمميز فيه ..
غيدا: صح صح نسيت .. ايه رد من السفر وهو يدرس الآن ..
بيشو بحماس: بجد ..؟! ياااي مرره فرحانه ..
غيدا: شهالفرح كله ..؟!
بيشو: ابي اساعدج في عملية الانتقام .. واااااو ..
غيدا: امشي لمجان الشله اشوف اذا هو مويود ولا غايب ..
بيشو: اوكي ..
قاموا واتجهوا لمكان شلة سامي ..
وقفت غيدا وقالت: اهو يالس مع الشله ..
طالعت بيشو عالجهه اللي اشرت عليها غيدا وهي تقول: اي واحد فيهـ....
بس ما كملت كلمتها ابدا ..
كانت تطالع في سامي بصدمه كبيره ..
غيدا: هو ذاك اللي لابس جاكيت زيتي ..
بس بيشو ما انتبهت لكلامها ابدا ..
كل اهتمامها كان في سامي وبس ..
كانت تطالع في الانسان اللي كان جالس وسط شلته وهو يضحك ويستهبل معهم ..
هالانسان اللي جالس قدامها خلى لسانها ينربط ..
شكله .. ملامحه .. ضحكته ..
بجد جذبها من اول نضره ..
بجد عجبها من اول نضره ..
بيشو في نفسها: "كل اللي تتهاوش معهم غيدا خطييرين بجد .. راشد جسمه رياضي وحلو .. طارق ملامحه جذابه وبقوه .. وآخرهم سامي بجد يهبل .. وهو من النوع اللي يدخل مزاجي" ..
غيدا: بيشــــــــــــــــــو ..
صحيت بيشو وقالت: ها ..؟!
غيدا: فين كنتي سرحانه ..؟!
بيشو: في سامي .. يهبببل ..
غيدا: بيشو .. انتي خويتي وما اسمح لج انج تطلي في غيري ..
ابتسمت بيشو وقالت: بس سوري .. سامي اهم منج يا غيدا .. شكلي بتركج ..
كلمتها كانت كالصـــــــــاااااعقه اللي اصابت غيدا بقووووه ..
غيدا بصدمه: شتقصدين ..؟!
هزت بيشو كتفها بلا مبالاه وهي تقول: مليت منج .. اولا احسج مهايطه وكل ما شفتي واحد حلو تهاوشتي معه .. ثانيا ما منج فايده .. طلبت منج مساعدتي في سالفة راكان بس ما ساويتي شي .. ثالثا انتي انسانه مملــــــه جدا ..
طالعت غيدا فيها بصدمه تحاول تستوعب الموقف اللي هي فيه ..
لا .. تحاول تصدق ان اللي قدامها هي حبيبتها مو وحده ثانيه ..
تلخبطت الامور في راسها وتصارعت الافكار كمحاوله لتحليل الموقف ..
مو قادره تصدق الكلام اللي قاعده تسمعه من فم اقرب الناس لقلبها ..
إيه هي حبتها وحبتها بجنون كمان ..
هذه هي تجربتها الثالثه في الحب ..
وللاسف فشلت مثل ما فشلت التجارب اللي قبلها ..
خلخلت اصابعها في شعرها الناري ومسكت بخصلات شعرها وشدت عليها وهي تحس راسها بينفجر ..
غيدا بألم: مستحيل .. مستحيييل ..
تكت بيشو على رجلها وهي تقول: اوووه حالتج صعبه .. لهدرجه كنتي تحبيني ..؟! هههههه ما توقعت اني شي مهم بحياتج .. بجد وحده ساذجه ههههههه ..
طالعت غيدا فيها وقالت وهي تتألم من داخل: تمزحين ..
بيشو: لا يا ماما انا ما امزح .. اصلا منو تكونين عشان احبج .. غبيه وهبله وتافهه وايد .. اصحي يا ماما وشوفي ويهج في المرايه .. بالله قولي شنو المميز فيج ..؟! ولا شي ..
كلامها احرق قلب غيدا من داخل ..
معقوله لهدرجه كانت هبله وصدقتها انها تحبها ..
لا مو معقول ..
تحولت نضرات غيدا الى نضرات ناريه وهي تقول ما بين اسنانها: حققييييرره ..
بيشو: هههههههههههه من زمان يالتافهه ..
وبدون سابق انذار هجمت غيدا على بيشو تسحب شعرها وتخمش وجهها وتستعمل كل شي ..
تحاول تبرد النار اللي اشتعلت داخلها ..
تبي تنتقم منها عن كل يوم عاشته معها ..
قاومت بيشو بس غيدا كانت شرسه للغايه ومستحيل تقدر عليها ..
واذا استمرت غيدا بهالشكل احتمال كبير انها تقتلها ..
انتبهت شلة سامي للصوت فلفوا على جهتهم وانصدموا من اللي يشوفونه ..
سامي بصدمه: غيدا ..!!!
قام بسرعه ودخل بينهم ومسك غيدا من خصرها وابعدها بقوه عن بيشو ..
في هاللحضه قام ريان ويزيد ووقفوا بيشو اللي كانت مصابه وبقوه من غيدا ..
غيدا قاومت سامي وهي تقول بعصبيه: اتركني يالججلب .. والله لأقتلها .. والله لأذبححـــها ..
حوطها سامي عدل وهو يقول: مستحيل اتركج لين تهدين .. مينونه انتي ولا شنو .. البنت حتموت على ايدج ..
غيدا بقهر: احسسسن .. انا ابيها تموت هالوسسخه .. هالجلبه والحققيره .. ابي اذبحها اتركننننننننني ..
مسحت بيشو الدم اللي سال من فمها وقالت: مقهوره .. مقهوره مني يا حبيبة الماما ..؟! احسسن .. وتراج ما تخوفيني .. مثلج مثل احقر حشره في هالكون .. هذا هو مستواج ..
فتحت غيدا عيونها على اخرها من الصدمه والعصبيه ..
مسكت ايد سامي بقوه وعضتها بأسنانها فسحبها سامي بسرعه من الالم ..
جت عند بيشو وهي تقول بعصبيه: والله لأراويج يالواااطيه يالسـ##### ..
وبسرعه مسكت شعر بيشو بقوووه وطيحت وجهها بالارض وضربتها برجلها وايدها بقوه وبقهر ..
جاء ريان ويزيد يسحبون غيدا بالقوه بس كانت غيدا تدفهم وتضربهم وتستعمل اظافرها الطويله ضدهم ..
طالع سامي في غيدا بصدمه .. بجد ماهي غيدا اللي يعرفها ..
هذه وحده شرسه ومتوحشه ..
هذه اوحش من الاسد نفسه ..
غيدا وهي تضربهم صك اصبعها في عين ريان بقوه فتراجع بألم وهو يمسك بعينه وجاء يزيد عنده بخوف ..
لفت غيدا على بيشو وطيحتها بقوه عالارض وجلست عليها وهي تستعمل كل اساليب القتال اللي تعرفها ..
بجد قهر قلبها مو شوي ابدا ..
هالبنت حطمتها بقوه وبشكل مؤلم ..
هالبنت دمرت مشاعرها وقلبها ..
كانت بيشو تدافع بس كل خليه بجسمها صارت تصرخ بألم وكأنها تستنجد بأحد يفكها من الوحش اللي قدامها ..
شوي وقفت بيشو عن الحركه وغيدا مازالت تحاول تطفي النار اللي مشتعله جواتها ..
انتبه سامي للي يصير قدامه فجاء بسرعه ومسك غيدا وسحبها بقوه من فوق بيشو اللي صارت بين الحياة والموت ..
سامي بعصبيه: بـــــــس كافـــــــي يالمينونــــــه كافـــــــــــــــي ..
دفته غيدا بالقوه وهي تقول بهستريا: لا مو كافي .. ابي اذذبحهـــــــــا .. والله لأموتهـــــــــا .. حقققييــــــــــــــــــررره ..
بس سامي ابعدها بالقوه عن بيشو وصفقها كف جامد وقال: اصحي يالخبله .. البنت حتموت .. فاهمه شنو يعني حتمووت ..؟! بتصيرين قاااتله .. حتنشنقي وتموتي .. اصحي يا غيدا ..
غصب عن غيدا نزلت دموعها وقالت بقهر: طعنتني .. طعنتني بنت اللذين .. اككررههااا .. آآآه اكرررررررها ..
انصدم سامي منها .. اول مره بحياته يشوفها تبكي ..
معقوله غيدا القويه تبكي ..؟!
مو قادر يستوعب ..
مسحت دموعها وراحت جري عالسياره ..
قفلت الباب ورمت نفسها تبكي بحرقه ..
يمكن هذه هي ثاني او ثالث مره تنزل دمعتها وتبكي ..
بس اللي صار لها مو سهل ..
ابدا ما تقدر تتحمله ..
.... بس بصراحه تستاهل .. هذا هو مصير الحب المنحرف ....

اما سامي فراح عند ريان يطمئن عليه بس ريان قال: لا اطمئن .. ما صار شي ..
وبيشو فراحت للمستشفى لأن حالتها كانت بجد صعبه ..

⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊ ⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊

في الظهر .. كانت الام في المطبخ تجهز الغدا ..
كان الاكل جدا بسيط لأنهم من طبقة الفقراء تقريبا ..
جهزته وحطته عالطاوله اللي بالمطبخ وبعدين خرجت ودقت الباب ..
الام: دنو حبيبتي الغدا جهز ..
دانا: مابي ..
الام: عشا ما تعشيتي وريوق ما تريقتي ما يصير جذي حابسه روحج في حجرتج وما تاكلين ..
دانا: قلت مابي .. اذا جعت بأخرج بنفسي وآكل ..
الام: انا لله وإنا اليه راجعون .. طيب ابي افهم وش فيج ..؟!
دانا: ما فيني شي بس انا اقعد بروحي ..
تنهدت الام وراحت تصحي ولدها عشان يتغدون ..
اما دانا فكانت جالسه وضامه رجلها بإيدها تطالع بسرحان ..
دانا: لا مستحيل .. مستحيل ارجع الجامعه من بعد اللي صار .. شلون بيطالعون فيني .. يادوب قدرت اتقبل فكرة ان ريان عارفني .. اللحين اكيد كل الشله عرفوا ..
سكتت شوي وقالت: بروح لجامعه ثانيه ..
هزت راسها وهي تقول: لا لا لا انا تعودت على هالجامعه وعلى هالشله ..
وهذا هو حالها من امس ..
تبغى تغير الجامعه وفي نفس الوقت ما تبغى ..
بجد هي في حيره من امرها ..
ما تدري وش تختار ..
تنهدت وقالت: خلاص يا دانا قرري وخلصينا .. اوووف مدري شسوي ..
فكرت انها تتصل برهف فأخذت جوالها واتصلت ..
" ان الهاتف المطلوب مغلق الرجاء الاتصال في وقت لاحق " ..
دانا: اوووف هذا وقته تقفل موبايلها ..
رمت الجوال قدامها ورجعت على نفس جلستها تفكر ..
دانا وهي تكلم نفسها: طيب عادي واذا عرفوا شفيها .... لا لا هذا احراج وما اقدر .... طيب برضوا هالامر تافه وعادي .... لا لا بطلع جدامهم وحده جذابه و و واكيد بيغيرون معاملتهم معاي .. آآآه يا ربي بجد احترت ..
شوي كملت بقهر: كله بسبب هالبزر إيادوه .. دايم يحطني في مواقف محرجه .. اولها مع رفيجه اللي مدري شسمه وثانيا امس .. لا وولد عم سامي بعد .. كملت ..
دق جوالها فأبتسمت واخذته عبالها انها رهف بس انصدمت لمن شافته ريان ..
ترددت مدري وش تسوي ..
قوة نفسها وردت: الو ..
ريان: اهلييين .. كيف الصحه تمام ..؟!
دانا: الحمد لله ..
ريان: امممم بدش في الموضوع بسرعه لأني اكره اللف والدوران .. دانا انا قدرت اسيطر عالموضوع تقريبا .. بس صالح ويزيد اللي يعرفون ووعدوني انهم ما ييبون سيره لأحد .. حتى إياد وعدني انه ما يفاتح سامي بهالموضوع .. انتي غايبه اليوم بسبب الاحراج اللي صار لج امس ولا انتي قادره تواجهين الشله .. دانا ترى الامر جدا عادي .. تعالي وخليج طبيعيه ولا كأنه شي صار .. اعرف انج تفكرين تغيرين الجامعه بس تراه تفكير جدا غبي .. اتمنى انج تيين باجر .. اوكي يا دانا ..؟!
لسان دانا انربط من شدة صدمتها بكلام ريان ولا قدرت ترد ..
ريان: اوكي عالعموم انا ما ابي ازعجك وخذي راحتج .. بس بلييز لا تغيري الجامعه لأنج وحده مهمه بيننا .. اوكي .. ياللا بااي ..
قفلت دانا الجوال وهي ما تزال منصدمه من كلام ريان ..
هذه هي المره الاولى اللي يكلمها على اساس انها بنت ..
حطت الجوال بهدوء جنبها وسندت راسها على ايدها تفكر ..