شبكة همس الشوق - عرض مشاركة واحدة

11 - 3 - 2014, 09:49 PM

.. العصر وفي قصر سلطان الراهي ..
كان جالس في غرفته وحاط إيده على خده بطفش والإيد الثانيه كان يقلب فيها الراديو في المسجل الكبير في غرفته ..
اغاني .. اناشيد .. قرآن .. اخبار .. برامج .. كل شي في هالراديو ومافي شي اعجبه ..
كان يلف عشوائي من شدة الملل ..
سامي: اوووف يلعن ابو الطفش اللي يي جذي ..
ترك المسجل ومسك جواله يلفه حول نفسه ..
تنهد بقوه وقال: لا لا انا اذا قعدت اكثر راح انفجر ..
قام وخرج من غرفته ونزل من الدرج وبدأ يلف في البيت بطفش ..
فتح جواله واتصل على ريان فكان مشغول ..
تأفف واتصل على دانا وبعد كم رنه ردت وقالت: هلا ..
سامي: اهلييين كيفك ..؟!
دانا: بخير ..
سامي: اقول عادل انت فاضي ..؟!
ارتبكت دانا شوي بعدين قالت: يعني ..
سامي: ما تقدر تأجل الشغل شوي ..؟!
دانا: ليش ..؟!
سامي: طفشان وابي امرك في قصرك ..
دانا بسرعه: لا لا انا مشغوله .. مشغوله وايد ..
سامي بإستغراب: مشغوله ..؟! عادل شفيك ..؟!
انصدمت دانا لمن تذكرت انها نطقت حرف الهاء ..
ومن الخوف والربكه والتوتر قفلت الجوال في وجهه ..
بعد سامي الجوال عن اذنه وطالع فيه بإستغراب ..
سامي: شسالفه بالضبط ..؟!
" لا لا انا مشغوله .. مشغوله وايد .. "
" لا لا انا مشغوله .. مشغوله وايد .. "
هز راسه وهو يقول: عادل فيه شي .. بس وشو هالشي بالضبط ..
نزل من الدرج ولمن شاف سامي قال: انت هني ..؟!
لف سامي وشاف ابوه كاشخ بالثوب والغتره البيضاء وطبعا البشت اللي ما يفارقه ابدا ..
كان طالع شكله رزه مثل عادته .. اكيد بيطلع رزه دامه من اغنى اغنياء قطر ..
سامي: ايوه ..
الاب: لك خمس دقايق روح جهز نفسك وتعال ..
سامي: ليش ..؟!
الاب: بنزور ولد عمك في المستشفى ..
سامي بقهر: البزر ..؟! اووف ..
طالع الاب فيه وقال بحده: سامي .. اقص لسانك لو طولته واحنا في المستشفى .. فاهم ..؟!
عض على شفته بقهر بعدين قال بإنفعال: مابي اروح .. ما احبه .. احس بالنقص كل ما اشوفه .. وطبعا انــــــت السبب ..
طلع الدرج رايح لغرفته بس وقفته نبرة ابوه الحاده وهو يقول: ســـــــــامي .. لك خمس دقايق .. فاهـــــــــم ..؟!
وقف سامي فتره بعدها طلع ..
وفعلا بعد خمس دقايق نزل .. مهما كره ابوه مستحيييل يعانده ..
شخصية ابوه القويه والمرعبه تخليه ما يفكر بالعناد اصلا ..
ركب السياره السوداء جنب ابوه وحرك السايق متجه للمستشفى ..
بعد عدة دقايق وقفت السياره قدام مستشفى الـ***** الخاص ..
نزلوا وسألوا عن الغرفه وبعد ما عرفوا طريقها ركبوا المصعد ..
الاب: لمن ندخل اعتذر لعمك عن اليوم اللي رحت وما سلمت عليه ..
هز سامي راسه وهو ساكت ..
الاب: واعتذر عن الحركه البايخه اللي صلحتها لولده ..
ضبط سامي اعصابه وقال: جذاب .. إياد جذاب .. اوكي انا دفيته بس دفتي كانت بسيطه ومستحيل تآذيه جذي .. جذذااب ..
خرج الاب من المصعد وهو يقول بهدوء: نفذ الاوامر بدون اعتراض ..
عصب سامي بس ضبط نفسه قد ما يقدر وراح ورى ابوه لين وصلوا الغرفه ..
فتح الاب الباب ودخل هو وسامي ..
كان إياد منسدح عالسرير وجنبه ممرضه تضبط كيس المغذي وماكان فيه اي اثر لأبو إياد ..
ابتسم الاب وقال: سلامات إياد ..
طالع إياد فيه وقال: الله يسلمك يا عمي ..
قفل سامي الباب وراه وبعدين لف يطالع في إياد بحقد ..
إياد بإستفزاز: اووه سامي ياء بعد .. يا هلا والله يا هلا .. كيف الاحوال يا ابن العم ..؟!
سامي بدون نفس: تمام .. سلامات ..
إياد بزعل: ليه تقولها بدون نفس ..؟! ما توقعت هالمعامله منك يا سامي .. الله يهديك انا ولد عمك مو عدوك ..
فتح سامي عيونه بعصبيه وجاء بيرد بس تذكر كلام ابوه وسكت ..
جلس ابو سامي عالكنبه وقال: وين ابوك يا إياد ..؟!
إياد: قبل خمس دقايق خرج وقال عنده شغله بيسويها ويرجع ..
ابو سامي: يعني بيطول ..؟!
إياد: لا ما اتوقع ..
صلحت الممرضه المغذي بعدين قالت: ممكن تعطيني إيدك عشان اخذ عينه من دمك ..
فتح إياد عيونه بصدمه وقال: بتعطيني ابره ..؟؟!!
الممرضه: اكيد عشان اقدر اسحب العينه من دمك ..
إياد: لا بلييز واللي يخليج انا عندي فوبيا من الابر .. اخاف منها ..
هنا فقع سامي من الضحك: هههههههههههههههههههههههههههههههههههههههههههههههههه ههههههههههههه ..
طالع فيه إياد بقهر وقال: اسكت ..
ابتسم سامي بفرحه .. هذه هي المره الاولى اللي يشوفه فيه مقهور ..
سامي: لا لا لا تخاف من الابر ..؟! يا حراام ..
إياد: ما ودك تحط في فمك كرتون وتبلعه ..
الممرضه: ممكن تعطيني إيدك لو سمحت ..
لف إياد عليها وقال: لازم آخذ الابره ..؟!
الممرضه: إيه لازم ..
إياد: طيب اعملولي بنج ونوموني عشان ما احس ..
سامي: هههههههههههههههههه .. اللهم لا شماته ههههه ..
الممرضه: اوكي حأعمل لك بنج .. بس للمعلوميه البنج حيحتاج اكثر من ابره ..
إياد بتفاجؤ: شنـــــــو ..؟؟!!!
ابتسم ابو سامي وقال: ما عمري شفت احد يخاف من ابره ..
إياد: امبلا .. ابوي يقول ان امي كانت تدوخ اذا شافت ابره او دم حتى لو في التلفزيون ..
الممرضه: لو سمحت انت تعطل شغلي .. ممكن تعطيني إيدك عشان اخلص ..
إياد بعناد: مابي ..
تنهدت الممرضه وقالت: بطل عناد واعطني إيدك خلني اخلص ..
إياد: انتي ما تفهمين .. قلت مابي ..
ابو سامي: خلاص اتركيه ..
الممرضه: بس هذا شغلي ولازم اخذ العينه عشان اكمل الاوراق ..
ابو سامي بحده: قلت اتركيه ..
طالعت فيه وبعدين شالت اغراضها وطلعت برى الغرفه ..
إياد: واااااااو طلعتها بكلمه بس .. مرره خطييير ..
طنشه ابو سامي وقال: وش اللي دخلك المستشفى ..؟!
إياد: تضاربت مع ضاروه الملعون ..
ابو سامي: منو ضاري هذا ..؟!
إياد: واحد ثقيل طينه وغثيث ..
سامي: مشكلجي .. هذا دليل ان الضربه ذيج مو انا السبب فيها ..
إياد: ههههههههههههههههههههههههههههههههههههههههههههه ..
عصب سامي ولف وجهه وهو يقول في نفسه: "ينرفز .. عمري ما شفت واحد استفزازي اكثر منه" ..
سكت شوي يقلب السالفه في راسه بعدين قال في نفسه: "إيه صح نسيت .. قال إياد في اول لقاء بيننا انه هذه هي المره الاولى اللي اشوفه فيها ويشوفني فيها .. بس .. بس انا واثق ومتأكد اني قد شفته قبل جذي .. والله قد شفته كثير بس مدري وين وخصوصا عيونه الرصاصيه .. انا متأكد اني قد شفت هالعيون بالذات" ..
وقف تفكيره فجأه بعدين قال بهدوء: عيون رصاصيه ..؟؟!!
جاء في باله طيف اسيل فقال بدهشه: فعلا مثل عيون اسـ.....
انفتح الباب في هالوقت ودخل ابو إياد ..
لف سامي عليه يشوف مين دخل بس انربط لسانه من الصدمه وهو يشوفه ..
ابو سامي: اهليين .. كنت توني حأروح ..
ابو إياد: حلو لحقت عليك ..
ولف على سامي وقال: هذا اكيد سامي صح ..؟!
إياد: ايوه يا يبه .. هذا سامي اللي ضربني اول ..
طالع في سامي فتره وقال: كأني قد شفتك في بريطانيا ..؟!
هز سامي راسه بإيه وهو مازال مصدوم ..
"هذا الشخص المفروض يكون ابو اسيل"
هذا اللي يدور في باله .. لأنه لمن قابله في بريطانيا عرف على طول انه ابوها ..
فكككيف يكون ابوها وعمه في نفس الوقت ..؟؟؟!!!!!
إياد: يبه متى شفته في بريطانيا ..؟!
ابو إياد: لمن سافرنا في الاجازه الصغيره .. شفته في السوق ..
إياد: آها .. طيب انا كنت معك في السوق بس ما شفته ..
ابو إياد: هذا لأنك رحت تتمشى لحالك وتاركني ..
إياد: هههه ايه صح نسيت ههههه ..
سامي في نفسه: "عمي وولده .. يشبهون اسيل كثير .. شي غريب" ..
انتبه لنظرات ابوه فتذكر اللي قاله ..
طالع في ابو إياد وقال: ايه صح نسيت اتأسف لك ياعمي عن اليوم اللي خرجت من البيت من دون لا اسلم عليك ..
إياد: اعذره يا ابوي كان مره مرتبك وهمه هو الهروب من موقع الجريمه ..
سامي بقهر: ياليتها جريمه عشان افتك من ويهك .. القتل فيك حلال ..
إياد ببراءه: سامي ليه تحاجيني جذي .. انا ولد عمك يا سامي .. عالعموم الله يسامحك ..
طالع سامي فيه بعصبيه وقال: غبي ..
إياد: الله يسامحك يا ولد عمي ..
عصب سامي والود وده يقوم ويسدح إياد من الضرب ..
جلس ابو إياد وقال: ههههه إياد انت متى بتبطل حركاتك ..؟!
إياد: وش فيها حركاتي ..؟! ان سبيت احد قلتم هذا وقح وان قلت له الله يسامحك قلتم بطل حركاتك .. مدري شلون ارضيكم ..
رفع سامي حواجبه وقال: لا لا بجد مسجين .. والله انك اكبر نذل شفته ..
إياد: اها يعني فيه نذالى اصغر مني .. عيل ليه مقروشني وتقولي بزر ..؟!
لف سامي وجهه وفضل السكوت قبل لا تفور اعصابه ..

⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊ ⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊

صباح السبت ..
فتح انس باب الغرفه على طارق بعدين تنهد بتعب وقال: طااارررق انا خلصصت .. قوووووم ..
كان طارق جالس عالسرير وعيونه نعسانه وقال بطفش: قلتلك قمت .. شفيك ما تفهم ..
انس: شلون قمت وانت يالس فوق السرير ..؟! ياللااااا عشان نروح الجامعه ..
طارق: اووووف انت محد يقدر يفتك من حنتك ..؟!
انس: لا .. ياللا انا خلصصت ..
قعد طارق فتره بعدين قام واتجه للحمام وهو يقول: ترى بطول .. بأستحم وافطر واطبع البحث حقي واجهز نفسي ..
انس بصدمه: طارق لا تقول .. اووووف بتأخرني ..
طارق: خلاص انت روح وانا لمن اخلص بأيي ..
انس: طيب اسرع عشان لا تتأخر عالمحاضره ..
دخل الحمام وهو يقول: طيب ..
قفل انس باب الغرفه واخذ مفتاح سيارته وشنطته وخرج من الشقه ..
انفتح باب المصعد وخرج فشاف قدامه رئيس العماره سالم يتكلم مع الموضف المسؤول عن العماره ..
سالم: من الاسبوع الياي يتنفذ هذا الامر .. مفهوم ..
الموضف: حاضر ..
لف سالم وطلع من باب العماره وانس يطالع فيه ..
انس: يا ترى شهالامر اليديد يا حضرة السالم ..
خرج وركب سيارته واتجه للجامعه ..
بعد دقايق وقف في المواقف ودخل الجامعه ..
على طول قابل في وجهه الدكتور راكان ..
انس بهمس وقهر: شهالصباح الزفت ..؟!
ابتسم راكان وقال: اهلييين بأنس ..؟! ما توقعت ان مقابلة ويهي في الصباح يحول الصباح الى صباح زفت ..
انس بدهشه: شلون سمعت ..؟!
د.راكان: سمعت وبس .. كيف حالك ..؟!
انس: مالك شغل ..
د.راكان: وين رفيجك طارق ..؟! اللي اعرفه انك انت وياه في شقه وحده ..
انس: كمان مالك شغل ..
د.راكان: الى الآن تكرهني .. توقعتك نسيت ..
فارت اعصاب انس وقال بحقد: انسى ..؟! صج انك ما عندك ضمير يأنبك .. ماكو احساس في قلبك موليه ..
مشي من جنبه وراح فقال الدكتور راكان: انس .. انت دايم عصبي ومتسرع وما تسمع الطرف الثاني يقول اللي عنده ..
تجاهله انس وراح عند فهد ..
تنهد الدكتور راكان وقال: مطولييين كثيييير ..

في هذا الوقت خلص طارق من تجهيز نفسه واغراضه كلها ..
خرج من العماره وطلع مفتاحه عشان يفتح سيارته ..
فلاحظ عالشارع المقابل بنت وولد يمشون وهم شايلين شنطهم ..
طارق: مو كأنهم ييراننا اليدد .. الوقت متأخر جدا .. اللحين اكيد بدأوا الحصه الاولى ..
ركب سيارته وشغلها ..
مشي طوالي ومع اول لفه لفها لين جاء للشارع الثاني ووقف جنب الرصيف اللي يمشون فيه ..
فتح شباك السياره وقال: يا بطل ..
لف وسيم عليه وقال: نعم ..
طارق: رايح للمدرسه صح ..؟!
وسيم: إيوه ..
طارق: بس الوقت متأخر .. الساعه صارت سبع وعشر ..
وسيم: صحينا متأخر ..
طارق: طيب اركبوا اوصلكم .. المدارس بعيده وجدامكم خطوط سريعه وخطيره ..
وسيم بفرحه: من جد ..؟!
اثير بسرعه: لا لا مو لازم مشكور ..
طارق: إلا لازم .. انتم صغار وهذا خطر عليكم .. اركبوا ..
طالعت اثير فيه وهي رافضه في قرارة نفسها انها تركب مع واحد غريب بس المشكله انها ترتبك وما تقدر ترفض ..
طارق: ياللا اركبوا ولا تخافوا .. اعتبروني اخوكم ..
وسيم: ياللا يا اثير نركب ..
راح وسيم وركب قدام جنب طارق .. ترددت اثير بعدين فتحت الباب وركبت ..
حرك طارق السياره فقال وسيم: واااااو السياره حلوه من داخل .. تشبه سيارة الدب المتغطرس ..
طارق: هههه ومين هذا الدب المتغطرس ..؟!
وسيم: هذا واحد شرير مرره ..
ابتسم طارق عالتعبير .. يحس انه يصف شخص من الشخصيات الكرتونيه ..
وقف قدام مدرسة الابتدائي وقال: ياللا وصلنا ..
وسيم: شكراا .. بس انت شسمك ..؟!
طارق: اسمي طارق .. شقتي مقابله لشقة ييرانكم ..
وسيم: انت معانا في نفس الشقق ..
طارق: ايوه .. اسمع حبيبي .. اذا احتجتم اي شي تعال وخبرني اوكي ..
وسيم: حاضر ..
نزل وسيم ونزلت اثير لأن مدرستها قريبه جدا ..
طالع طارق فيهم لين دخلوا لمدارسهم وبعدين حرك السياره واتجه للجامعه ..
وقف سيارته في المواقف ونزل ودخل للجامعه واتجه للكلاس لأنه باقي خمس دقايق على بداية المحاضره الاولى ..
جلس عالكرسي وهو يطالع في انس بإستغراب ..
لف على فهد وقال: شفيه سرحان ..؟!
فهد: مدري بس السالفه فيها راكان ..
طارق: انس ..
اما انس فكان سرحان في كلام الدكتور راكان ..
شيقصد لمن قال انت دايم عصبي ومتسرع وما تسمع الطرف الثاني يقول اللي عنده ..؟؟!!
انس في نفسه: "معقوله اكون غلطان ..؟! بس انا متأكد انه انسان جبان واناني .. مستحيل اكون غلطان" ..
طارق: انــــــــــــــــــس ..
انس: نعم ..
طارق: اصحى من سرحانك .. الدكتوره شوي وتدخل ..
انس: انا صاحي ..
فهد: صح انس بغيت اسألك .. شدلع انس .. ولد اختي سموه انس ومدري شلون ادلعه ..
طارق: مافي دلع .. يمكن ننوستي ..
انس: يععع شهالدلع ..؟!
طارق: عيل نسوسي او سنوني ..
فهد: ههههههههههههههه ..
انس: طططاااارق شهالاسماء الغبيه ..
طارق: هههههه والله هذه مشكلة اسمك مو مشكلتي ..
انس: إلا مشكلتك .. ما تعرف تييب دلع عدل ..
طارق: طيب ورنا شطارتك وييب ..
انس: مثلا سوسو او انوسي ..
طارق: سوسو .. ياخي احسه دلع بسه مو انسان ههههه ..
فهد: هههههههه اممما بسه عاد هههه ..
انس: اغبيـــــــاء .. الشرهه علي انا لمن اتكلم مع جهلاء مثلكم ..
طارق: فهد لا يفوتك يقول جهلاء هههههه ..
فهد: ههههههههههه اسمها جهله يا استاذ انس مو جهلاء هههه ..
فتح انس فمه بيتكلم بس دخلت الدكتوره في هالوقت ..
فسكت وبدأ ينتبه مع المحاضره ..

⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊ ⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄