شبكة همس الشوق - عرض مشاركة واحدة

11 - 3 - 2014, 09:53 PM

كانت جالسه في السياره ومتردده تنزل ..
حاولت تتقبل الامر وهي تقول: عادي وش فيها لو عرفوا انج بنت .. جدا عادي .. صلاح كان يعرف انج بنت ومع هذا كنتي إيزي معاه .. شمعنى هذولا خايفه منهم ..؟!
تنهدت وقالت: ببساطه لأني ما صارحتهم من البدايه .. وكل هذا كوم ومكالمتي امس مع سامي كوم .. بجد غبيه وما اعرف امسك لساني شوي ..
بعد فتره قالت: خلاص يا دانا انزلي ..
فتحت باب السياره ونزلت ..
دخلت الجامعه واتجهت لمكان الشله فشافت الكل ..
دانا: السلام عليكم ..
سامي: هلا بعادل .. كيفك ..؟!
عماد: سلامات ليش غايب ..؟!
جلست بإحراج ونظرت نظره سريعه ليزيد وصالح ..
دانا: كـ كنت تعبان ..
ريان: ما تشوف شر ان شالله ..
سامي: هيه عادل بسألك سؤال .. امس ليش قلت انا مشغوله .. المفروض تقول انا مشغول ..
طالعوا يزيد وصالح في سامي بعدين لفوا يطالعون في ردت فعل دانا ..
ارتبكت دانا وفتحت فمها بتتكلم بس سبقها ريان اللي قال: غلطه مطبعيه يا استاذ سامي .. وكمان قد حصلت معاي قبل جذي وممكن تحصل مع اي واحد ..
سامي بإقتناع: آهآ ..
ريان في نفسه: "يقتنع بسرعه" ..
تنهدت دانا بإرتياح .. انحل الموقف بسهوله ..
سامي: صح تذكرت شي .. في احد منكم شاف اسيل ..؟!
عماد: منو اسيل ..؟!
سامي: البنت اللي كرشتني اول ..
ريان: ههههههه واخيرا اعترفت انها كرشتك ..
سامي: هههه خلاص تقبلت الفكرة ..
يزيد: شتبي فيها ..؟!
سامي: سؤال يقرقع في راسي وابي اسألها ..؟!
صالح: يمكن مع شلتها ..
سامي: اليوم شفت شلتها بس ما شفتها ..
طالعت دانا فيهم وقالت: منو اسيل ..؟!
عماد: والله اسيل هذه يا طويل العمر وحده كان سامي يبي يشبكها بس هي رفضته رفضه أليييمه هههههه ..
سامي: عدل جملتك .. كنت ومازلت ابي اشبكها ..
يزيد: هههه انت ما تتوب .. البنت رافضتك تماما ..
سامي: هههههه لا .. تتذكرون حكاية الغاز اللي انتشر .. ذاك اليوم حسيت انها تحبني ..
ريان: اووووه يا الواثق .. تحبك مره وحده ..؟!! لا هذي كثر منها .. قول بدت تتقبلني او تعجب فيني .. اما تحبني فهذي مستحيله ..
سامي بثقه: هــه لا مو مستحيل .. اولا لمن كنت بروح اساعد عادل تعرف شنو قالت لي ..؟!
ريان: شنو ..؟!
سامي: قالت سامي انتبه على نفسك ..
صالح: لا تصدقونه ..
سامي بدفاع: إلا والله قالته .. ورب المصحف انها قالته وماني جذاب ..
يزيد: هههههه خلاص صدقناك .. كمل ..
سامي: غصب عنكم تصدقوني .. المهم لمن دخلت المختبر وشلت عادل عشان اطلعه سمعت وراي صوت ولمن لفيت لقيت دولاب كبيير ومحروق يطيح علي .. في ذاك الوقت ماتحركت من الصدمه .. ههههه يت اسيل في ذاك الوقت وساعدتني .. ها شفتم قد ايش هي تحبني ..
ريان: الله يعطيك عقل .. اللحين اللي يساعدك يصير يحبك .. شهالتفكير ..
يزيد: اما سامي فعنده تفكير مدري شيبي ..
عماد: ههههه اذا كنت بمشي على حسب تفكير سامي عيل كل بنات عمي مصلح يحبوني لأنهم ساعدوني قبل جذي ..
صالح: هههههههههههه ..
سامي: ها ها ها مافي شي يضحك ..
اما دانا فكانت تطالع فيهم وهي تفكر ..
من كلام سامي تذكرت سالفة الورقه اللي لقيتها ومكتوب فيها لقب الراهي ..
طالعت في سامي وقالت في نفسها: "اسأله .. يمكن الورقه تخصه" ..
ترددت شوي بعدين قالت: سامي ..
لف سامي عليها وقال: هلا ..
دانا: آآ انت مضيع شي ..؟!
سامي بإستغراب: مضيع ..؟!!! لا ما اتوقع .. شتقصد ..؟!
دانا: لمن صحيت من العمليه اللي سووها لي لقيت في اغراضي ورقه مب لي .. الورقه كان مكتوب فيها لقبك ..
سامي: مكتوب لقبي ..!! وش في الورقه بالضبط لأني صراحتا ما اتذكر اني ضيعت شي يخصني ..
دانا: مدري مافهمت شي .. يعني كان طلب لشي وموقعه في بريطانيا وكمان كان مكتوب اسم سيلينا ..
فتح سامي عيونه بصدمه وهو يقول: شنـــــــــو ..؟!!! وينها هالورقه ..؟!!
انفجعت دانا وقالت: في البيت ..
طالعوا الشله في سامي بإستغراب ..
يزيد: شسالفه ..؟!
سامي: اسمع باجر تييبها .. فاهم ..؟!
دانا: حـ حاضر ..
سامي في نفسه: "كيف وصلت له هالورقه كيــــــــف ..؟!" ..
فعقد حواجبه لمن تذكر ..

:::::::::::::::::::::::::::::::::::::::::::::::::: ::::::
مشي خطوه وحده وصدم في دانا وطاح بقوه عالارض لدرجة ان الورقه اللي بجيبه طاحت جنب ايد دانا ..
اول ما طاح لف بسرعه يشوف السبب اللي خلاه يطيح ..
فتح عيونه بصدمه وهو يشوف دانا ..
سامي: عـــــــــــــــــــــــــــادل ..
جاء عندها بسرعه وقلبها على ظهرها وهو يقول: عادل انت بخير .. عادل حاجني وتكلم .. عــــــــــــــــــادل ..
هزها بقوه وبخوف وهو ينتظر منها رد ..
بس كانت هادئه تماما وكأنها ميته ..
رفعها وسندها على ركبته عشان يقدر يشيلها بسهوله .. فأنتبه للورقه اللي طاحت منه ..
اخذها وحطها في جيب عادل وهو يحسب انها حقته ..
:::::::::::::::::::::::::::::::::::::::::::::::::: ::::::

عماد: هيـــــــــه يابو الشباب وين رحت ..؟!
طالع سامي بسرحان وهو يقول: في ذاك الوقت .. غببببي ..
يزيد: سامي شفيك ..؟!
سامي: ها .. لا ماكو شي .. لا تشغلوا بالكم ..
دانا في نفسها: "عيل الورقه له وشكلها مهمه وايد" ..
عماد: يا شباب ..
ريان: نعم ..
عماد: انا طفشششاان ..
صالح بتذمر: لا حوووول .. شتبي ..؟!
عماد: كالعاده ابي شي حماااااس ..
تحمس سامي وقال: اوكي ياللا نسوي شي ..
يزيد: وش نسوي ..؟!
عماد: اي شي المهم اخرج من حالة الطفش المستعصيه ..
ريان: احمد ربي اني ما غبت عشان لا تدبسون المشاكل فيني كالعاده مثل حكاية المصيده والجرو ..
يزيد بتفاجئ: جرو ..!! بس مو احنا اللي يبنا الجرو ..
ريان بتسليك: اعرف اعرف انه انتم بس خلاص السالفه قديمه ..
طالعوا في بعض فقامت دانا في هالوقت وقالت: انا استئذن وراي محاضره ..
سامي: يا خساره ما راح تشارك معنا ..
عماد: ايه صح انت عمرك ما شاركت معنا في حركاتنا ..
دانا بصوت منخفض: يكفي انكم صدتوني بمصيدتكم ..
ابتسمت وراحت لناحية كلاسها ..
طالع فيها عماد لين راحت بعدين ابتسم بخبث وقال: شرايكم نسوي فيه مقلب ..؟!
سامي بحماس: وااااااو حماااس ..
يزيد بسرعه: لا لا مو لازم ..
صالح: ايه صح هو مسجين فهدوه بحاله ..
طالعوا فيه سامي وعماد وهم رافعين حواجبهم والابتسامه على وجههم ..
عماد: شفيكم ..؟! سؤال ابي اعرف اجابته ..
سامي: مرتبكين وحجيكم ملخبط وخصوصا اذا كان الامر يخص عادل ..
عماد: انا ملاحظ هالشي عليكم امس وكلمت سامي بالموضوع وقال انه حتى هو لاحظ ..
سامي: ياللا ياوبوا شفيكم ..؟!
يزيد بترقيع: ههه انتم شفيكم الله يهداكم .. عادي الامر مافيه شي ..
صالح بهدوء: إلا فيه ..
لفوا كلهم يطالعون فيه ..
سامي: طيب تحجى ..
صالح: الامر خطير ويخص رفيجنا عادل ..
يزيد في نفسه: "وش بيقول ذا المعتوه .. لا يكون ناوي يفضحها" ..
وريان عاقد حواجبه يطالع ..
عماد: وشهو هالشي ..؟!
صالح: عادل .. عنده مشكله وطلب مساعدتنا انا ويزيد ..
سامي: وش هالمشكله ..؟!
صالح: ما اقدر اقول لأنه امنا اننا مانخبر احد ..
يزيد: ايه صح فأتركوه لحاله وبلاش من مقالبكم السخيفه هذي ..
طالعوا فيهم فتره عشان يستوعبوا السالفه ..

اما عن دانا فكانت في هالوقت متجهه لكلاسها ..
وقفت فجأه وهي تطالع في شخص واقف مع شلته ..
شوي بدأ الحقد والقهر والكره يشتعل في قلبها وهي تشوف قاتل احلام اخوها قدامها ..
من جد تتحول دانا الخجوله الى شرسه اذا شافته ..
انتبه لها راشد اللي اول ما شافها تذكر اللي سوته فيه فعصب جدا ..
وعصب زياده لمن شاف الدكتور راكان واقف قريب منهم ..
يبغى يروح يأدبها بس المشكله فيه دكتور ..
ترك اصحابه واتجه ناحيتها وقال بحده: واخيرا قابلتك يا ويه البومه ..
دانا: اصص .. شخص حقيير مثلك المفروض ما يتكلم ..
عصب راشد بزياده .. هو حاط في باله انه ماراح يمد ايده مادام الدكتور موجود بس ما قدر يستحمل اهانتها ..
لكمها في وجهها بقهر فترنحت وصقعت في الجدار وطاحت شنطتها عالارض ..
قفل الدكتور راكان جواله ولف يطالع فيهم وقال: سلامات .. شايفين دكتور جدامكم ومع هذا تتضاربون ..
شالت دانا شنطتها وقالت بحقد: تضرب ها .. يصير خير ياولد امك يالجبااان .. تصصصدم وتهههرب .. والله اني راح اندمك ..
رفع الدكتور راكان حاجبه ولف يطالع في راشد ..
راشد: تندمني .. لا يا بابا ما عاش من يندمني فاهـــــــــم ..؟!
صفق الدكتور وقال: برافو برافو .. شرايكم تتضاربون بعد عشان يكتمل المشهد ..
لفوا يطالعون فيه فقال بحده: ممكن اعرف شنهو هالوقاحه اللي فيكم لدرجة انكم تتهاوشون جدامي وكأني مو مويود .. ياوب انت وياه ..
دانا بإحراج: آسف ..
د.راكان: لا لا ما تمشي عندي كلمة آسف .. ابي اعرف شنهي هالسالفه اللي خلتكم تتهاوشون ..
راشد: يا دكتور بطل شغل اللقافه ومالك شغل ..
رفع الدكتور حاجبه وقال: استاذ راشد ممكن تشرف معي عالاداره عشان تبطل طوالت اللسان ..
راشد بطفش: ياليييل ابو لمبه .. اوكي بروح للاداره ..
د.راكان: امش جدامي ..
مشي راشد ومشي وراه الدكتور راكان فأنتبه لبيشو وهي داخل ..
عقد حواجبه بإستغراب وهو يشوف لصق الجروح بجانب فمها .. هذا غير الرضوض الخفيفه بوجهها ..
د.راكان: بشررى ..
وقفت ولفت عليه وقالت: خير شتبي ..؟!
د.راكان: بغيت اعطيج خبر انج باجر راح تنفصلي ..
بيشو: اووووف بجد انسان حققود ..
مشيت بقهر وهي تقول: من فين طلعلي هالراكان .. اوووف شكله من جد بيفصلني ..
اتجهت لشلة غيدا وهي تقول: المهم هو اني آخذ حقي من غيدا وبس ..
وقفت قدام الشله وقالت: وين الجلبه غيدا ..؟!
الشله: ؟؟؟؟؟؟ نو كومنت ..
غدير: عيدي شكلي سمعت غلط ..
بيشو: اقول وين الحقيره غيدا ..
غدير: كمان عيدي لأني مو قادره استوعب ..
خلود: معقوله انتي بيشو ولا وحده تشبها ..
بيشو: انا اسأل واقول وين غيداؤؤه ما تسمعون ..
تهاني: لا فعلا انينيتي .. مو كأنج تسبي غيدا ..
بيشو: اسبها واسب ابوها وكل قبيلتها كمان .. وينهـــــــــا ..؟!
غدير بإستغراب: شكل السالفه جايده .. عالعموم هي غايبه ..
بيشو بقهر: عمى ..
وراحت وخلتهم وهم في قمة الاستغراب والتفاجؤ وعدم الاستيعاب ..

⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊ ⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊

في الحديقه الخلفيه من الجامعه كان بسام جالس ومتكئ تحت شجره شوي كبيره ويتأمل الطلاب بسرحان ..
جاء بندر ومعاه كوبين سلاش .. اعطى بسام واحد وجلس عنده ..
بندر: ما مليت ..؟!
بسام: ها ..؟!
بندر: اقولك ما مليت من الجلوس هنا ..؟!
بسام: لا ..
بندر: طيب انا طفشت .. اولا المجان جدا هادي والطلاب قليل .. ثانيا انت سرحان ومو معطيني ويه ..
بسام: قاعد افكر ..
بندر: تفكر في منو ..؟!
بسام: في سجى ..
بندر: منو سجى ذي ..؟!
سكت بسام فتره طويله بعدين قال: بندر بقولك سالفه وابيك تساعدني فيها ..
بندر بإهتمام: تكلم ..
شرب بسام شوي من كوبه بعدين قال: اختي سميه عندها بنت اسمها سجى وعمرها حاليا ١٩ سنه ..
بندر: بس اللي اعرفه من ابوي هو ان بنت سميه ماتت ..
بسام: حتى انا كنت احسب جذي .. بس هي في الحقيقه ما ماتت ..
بندر: كيف ..؟!
تردد شوي .. ما يدري يقوله الحقيقه ولا لا ..
بسام: لا هي ضاعت قبل لا يكمل عمرها سنتين .. وبعد مده طويله من البحث اكتشفنا انها ماتت ..
بندر: اها .. طيب انت شدراك انها حيه ..؟!
تورط بسام وقال: لان امي تعرف من اول .. امي تعرف انها ما ماتت بس قالت لنا انا واختي انها ماتت عشان لا تتعب نفسية اختي اكثر .. وفي الاجازه هذي قالت لي انها ما ماتت ..
بندر: حرام .. المفروض امك ما تسكت جذي ..
بسام: اعرف .. هي غلطانه واايد ..
بندر: وش بتسوي اللحين ..؟!
بسام: هههه بدور عليها ..
بندر: وليش تضحك ..؟!
بسام: من الحاله اللي انا فيها .. مدري شلون راح ادور عليها ..
بندر: ايه صح .. صعب تدور عليها بعد مرور سنوات كثيره قد جذي ..
بسام: ومع هذا فأنا دورت عليها .. هذا الاسبوع الرابع وانا ادور .. تعبت واايد ..
بندر: اسمع .. مو هي ضاعت وهي صغيره .. عيل اكيد بتكون مجهولة النسب .. دور في دار الايتام او اللقطاء ..
بسام: دورت بس ماكو احد ..
بندر: طيب بنت اختك مافيها شي مميز يميزها عن الباجي ..؟!
بسام: ايه ..
بندر: حلو .. وش هو ..؟!
بسام: عيونها رصاصيه .. وكمان فيه جرح قديم في رقبتها ..
بندر: طيب هذا شي جميل .. دور عن بنت بهالمواصفات ..
بسام: وين ادور ..؟!
بندر: ها .. مدري ..
بسام: ما تركت مستشفى ما دورت فيه .. ما تركت مركز شرطه ما دورت فيه .. ما تركت شركات حكوميه و فنادق وشقق في الدوحه ما دورت فيها .. مالقيت ابدا .. اصلا مالقيت وحده مجهولة النسب بعمر ١٩ سنه ..
بندر: طيب .. طيب يمكن تكون ماتت ..
بسام بهدوء: يمكن .. ويمكن كمان تكون حيه ومحتاجه لأحد يساعدها ..
سكتوا فتره طويله فقال بندر: يمكن في عائله اخذتها وربتها ..
بسام: لا مافي .. سألت دور رعاية الايتام عن الاطفال اللي اخذوهم العوائل عشان يربوهم بس محد بمواصفات بنت اختي ابدا ..
بندر: اقصد يمكن في الوقت اللي ضاعت فيه بنت اختك لقيوها عائله وربوها وعشان جذي مالقيت لها اثر ..
بسام: مستحيل .. البنت اذا كبرت شلون حتدخل المدرسه بدون اوراق ثبوتيه .. اي عائله تلقى احد لازم تخبر الشرطه عشان يدوروا عن عائلتها واذا ما حصلوا يطلعون للبنت اوراق واثباتات عشان تقدر تكمل حياتها ..
بندر: ايه صح معاك حق ..
بسام: سألت كل مراكز الشرطه بس محد بمواصفات سجى .. خلاص ما عاد ادري فين ادور ..
بندر: يمكن ما تكون في الدوحه اصلا ..
بسام: ههههه كنت خايف من هالأمر بس سألت الجوازات وشركات الطيران .. مافي وحده بمواصفات وعمر سجى طلعت برى الدوحه ..
بندر: يمكن بسياره ..
تنهد وقال: يمكن ... والله تعبت يا بندر تعبت ..
حط بندر ايده على كتف بسام وقال: توكل على الله وان شاء الله تلقاها .. خل املك بربك كبير ..
بسام: انا متوكل على الله بس .....
سكت وكمل في نفسه: "الله لا يسامحج يا سميه .. والمشكله الاكبر من الاب القاسي هذا" ..
شرب شوي من الكوب وهو يطالع في الطلاب بسرحان ..
شوي قال بندر: طيب دور في الجامعه .. بنت اختك على حسب عمرها المفروض تكون سنه اولى جامعه ..
بسام: سألت المدير فقال ما عندنا احد بدون نسب .. عيل مو هنا ..
بندر: الله يعينك .. بجد السالفه صعبه ..
سكت بسام فتره طويله بعدين قال: تعرف خدامتي شنو قالت .. تقول يمكن واحد بنته ماتت وفي نفس الوقت لقى سجى فأخذها وقال للناس انها بنته ..
طالع بندر فيه فتره بعدين قال: صح .. يمكن صار جذي .. يعني بنت اختك صارت تعيش على اوراق البنت الميته .. ما شاء الله عالخدامه ذي .. من فين يابت هالاحتمال ..
بسام: مدري .. يمكن هالاشياء منتشره عندهم في اندونيسيا ..
بندر: هههههه الله يقطع ابليسك .. المهم اسمع ترى كلامها يمكن يكون صج ..
ابتسم بسام وقال: طيب وين بدور عنها اذا كان كلامها صج ..؟!
بندر: ها .. آ آ في ذي الحاله تعقدت الامور اكثر ..
ابتسم بسام بهدوء وهو يطالع في الطلاب بتفكير ..
شوي انتبه لأحد وقال: مو كأن هذا مهند ..؟!
بندر: شتقصد ..؟!
بسام: الريال اللي واقف هناك يتحجى بالموبايل هو مهند صح ..؟!
بندر: مدري هذه اول مره اشوفه ..
قام بسام وراح له ..
بندر: شفيه راح ..؟!
وقف بسام قدام مهند وقال: اهلين مهند ..
عقد مهند حواجبه بعدين تذكر وقال بتفاجؤ: بسام ..!!
بسام: يعني فعلا انت مهند .. كيفك ..؟!
مهند بنفس التفاجؤ: تمام .. انت من امتى هني .. اللي اعرفه انك تدرس برى الدوحه ..
بسام: ههههه ضروف ..
مهند بهدوء: ورفيجك طارق وينه ..؟!
بسام: اللي اعرفه انه يدرس في الخور بس قبل فتره شفته هنا كلمحه ..
مهند بصدمه: هني في الجاامعه ..؟!!
بسام: مدري بس يمكن .. انا متأكد اني شفته بس يمكن يكون واحد يشبهه ..
مهند في نفسه بقهر: "الحقققير" ..
بسام: بس بصراحه انصدمت لمن شفتك .. المفروض تكون تخرجت السنه اللي طافت .. يعني انت رسبت سنه ..؟!
مهند بهدوء: لا .. انا سنه ثاني جامعه ..
بسام بصدمه: شنـــــــــو ..؟! شلون رسبت ثلاث سنوات .. اللي اعرفه من ابوك هو انك شاطر وايد ..
مهند: بس انا ما رسبت .. انا تركت الدراسه اربع سنوات تقريبا ..
بسام بإستغراب: وليش ..؟!
تقدم مهند كم خطوه وقال وهو معطي بسام ظهره: اسأل رفيجك طارق ..
وبعدها مشي وراح وبسام يطالع فيه بإستغراب ..
بسام: طارق ..؟! ليه وش دخله طارق ..؟!
جاء بندر وقال: بسام منو ذا بعد ..؟! ما شاء الله عليك .. طالب يديد ومع هذا عارف نص الجامعه .. وسن وشلتها وطارق واللحين مهند هذا ..
بسام: هذا واحد كنت اعرفه في النادي اللي كنت مشترك فيه انا وطارق ..
بندر: آها ..
بسام: ما سألت عن طارق ..؟!
بندر: ايه صح نسيت اقولك .. سألت واحد فقالي ايوه فيه طالب اسمه طارق العالي في الكلاس حقه ..
بسام: حلو .. وين كلاسه ..؟!
بندر: هم حاليا عندهم محاضره ..
بسام: اوكي عادي ننتظرهم لين يخلصون ..
بندر: بس بعد ربع ساعه عندنا محاضره وبعدها بننصرف لبيوتنا وبيكون هو قد راح ..
بسام: اوووف والله انك نكد ياخي ..
بندر: هههههههههههه ..

⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊ ⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊

في الليل وفي احد الفلل الفاخره ..
حاطه رجل على رجل وفي ايدها كوب كابتشينو والايد الثانيه تقلب فيها صفحات احد مجلات الازياء ..
طاحت عيونها على جوالها ..
تركت المجله والكابتشينو واخذت الجوال ..
ابتسمت وهي تقول: بأتصل عليه .. انا وراك يا سامي وما راح تحب غيري ..
دقت عليه وحطت الجوال في اذنها ..
ابتسمت وهي تسمع اغنية صعبه لاحمد الهرمي كان حاطها كصدى لجواله ..
من جهه اخرى كان سامي وابوه جالسين على طاولة العشا ..
طالع سامي في ابوه وقال: عمي يشبه وحده اعرفها ..
رفع الاب راسه يطالع في سامي وهو يقول: ايش ..؟!
سامي: اقول ان عمي وولده يشبهون وحده اعرفها في الجامعه ..
الاب بلا مبالاه: يمكن تكون بنته ..
سامي بصدمه: وشو ..؟! لا لا مستحيل .. اسيل عندها اخوان وعائله ..
الاب بنفس اللا مبالاه: عيل مو بنته ..
طالع فيه سامي فتره طويله يفكر .. بس قطع تفكيره صوت الجوال ..
طلعه من جيبه واعتفس وجهه لمن شاف انها اروى ..
طالع في الشاشه فتره بتفكير بعدين رد وقال: نعم ..
اروى بنعومه: هااي .. شلونك سوسو ..؟!
سامي بعصبيه: انتي ما تفهمين .. انا شنو قلت لج في الجامعه ..؟! والله يا اروى ان ما بطلتي العبط حقج راح اعلمج منهو سامي ..
اروى: انت اللي مو راضي تفهمني .. أنا احبك يا سامي ..
سامي: حبج برص .. انـــــا ما احبـــــــج فاهمـــــــــه ..؟!
اروى: ماني فاهمه ولا راح افهم ابدا .. سامي بليييز حس فيني .. انا من دونك في ضياع .. مستحيل اعيش اذا انت رفضتني .. بلييز افهمني .. ولا تنسى انك انت اللي علقتني فيك ..
سامي: اوكي انا عارف اني غلطان بس كماااان انتي عارفه اني لععععاب .. يعني الغلط الاساسي منج انتي مو مني صح ولا غلط ..
اروى: ايوه صح ..
سامي: حلو يعني اعترفتي .. هيا قفلي التلفون ولا عاد تتصلي ..
ابتسم الاب وقال: اسمه موبايل مو تلفون ..
طالع سامي فيه وقال وهو يضغط على اسنانه: قفلي الموبايل ولا اشوفج متصله مره ثانيه ..
اروى: اوكي انا راح اقفل الموبايل بس لعلمك انا راح اتصل مره ثانيه وعاشره كمان .. بس قبل لا اقفل الموبايل بغيت اسألك .. انت رافضني وبقوه لييش ..؟! اكيد تحب بنت ثانيه وعشان جذي مو متقبلني صح ..؟!
سامي بقهر: لا .. انا لا احبج ولا احب غيرج .. اصلا انا شايل فكرة الحب والزواج من راسي .. مستحيل اعلق نفسي بوحده او اتزوج وحده فاهمـــــــــه ..؟!
اروى: لا .. انا مو قادره اصدقك .. وكمان انا متأكده انك تحب اسيل صح ..؟! لا تنكر لأني تأكدت في يوم حادثة الغاز ..
سامي بثقه وهو يرز نفسه: لا .. هي تحبني بس انا لا ..
اروى: ليه تجذب ..؟!
سامي بعصبيه: احبها او ما احبها انت شعليج ..؟! طسي عني ولا عاد اشوفج داقه مره ثانيه لأني راح اعصب بجد ..
قفل الجوال في وجهها وهو حده مقهور ..
الاب بإبتسامه: منو ذي ..؟! وحده من خوياتك ومبتلش فيها صح ..؟!
حط سامي الجوال في جيبه وما رد ..
الاب: سمعت كلام شدني شوي .. سمعتك تقول اني مستحيل احب او اتزوج .. ممكن اعرف ليش ..؟!
طالع سامي في ابوه شوي بعدين قال: ببساطه مستحيييل بنت او عائله يقبلون فيني كزوج ..
الاب: بس انت ولد الراهي .. لقب مو هين ..
سامي: ايه انا ولد اكبر تاجر في قطر .. وفي نفس الوقت انا ولد ....
سكت شوي وقال بألم: ولد سلطان وسيلينيا ..
كمل بإنفعال: ولد احققققر نااااس عالأرض ..
رمى الملعقه وطلع بسرعه من الغرفه ..
طالع الاب فيه لين طلع بعدين كمل اكله بلا مبالاه ..

اما اروى فقفلت جوالها وقالت: ما اصدقك .. اكيد تحبها .. بس ما اكون انا اروى ان ما خليتك تحبني غصب عنك يا ولد الراهي ..
حطت جوالها عالطاوله بهدوء وقالت: انا مو شرسه بس من جد انا احبك وانت مو مقدر ولا مهتم فيني ..
فتحت مجلة الازياء وطالعت فيها شوي بعدين حست بطفش وقفلتها ..
اخذت جوالها وطلعت فوق لغرفتها ..
دخلت الغرفه فطاحت عيونها على صورته ..
مستحيل احد يشوف صورته وما يحبه ..
كان لابس تيشيرت واسع ولاف شال على رقبته ولابس كاب اسود وعامل حبتين بإيده ومبتسم للكاميرا ..
اروى: احبك ومستحيل اكرهك .. راح آخذك حتى لو على حساب غيري ..
ابتسمت له وبعدين أخذت لها ملابس ودخلت تاخذ لها دش ..

⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊ ⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄