شبكة همس الشوق - عرض مشاركة واحدة

11 - 3 - 2014, 09:57 PM

في ايطاليا وفي روما بالتحديد ..
فتحت عيونها ببطء فشافت دكتور واقف ويكتب في الدفتر اللي في ايده ..
لفت بعيونها عالمكان بعدين طالعت في الدكتور وقالت بخفوت: دكتور ..
طالع فيها الدكتور وقال بالانجليزي: لقد صحوتي .. هذا رائع .. اسمعي يا ريما .. نحن ولله الحمد استطعنا التخلص من السموم التي كانت تملأ جسدك وطبعا هذا بمساعدتك .. واردت ان أقول انتبهي في المرة القادمه وحاولي الابتعاد عنها قدر المستطاع ..
غمضت ريما عيونها بتعب وهي تقول في نفسها: "وش يهذر هذا بعد .. اللي فهمته اني خلصت من المخدرات .. واخيرا بطلع من هالمستشفى اللي بجد شفت فيه ايام سودا" ..
الدكتور: والآن يمكنك الخروج متى ما اردتي .. متى تريدين الخروج ..؟!
ريما بالانجليزي: عندما يأتي المعتوه اللذي احضرني الى هنا ..
استغرب الدكتور من ردها بس ما علق ..
اخذ الدفتر وخرج من الغرفه ..
ريما: اوووف متى يي ذا .. ما يكفي انه اول ما وصلنا المطار حطني هنا .. حتى هدومي ما قدرت اغيرها ..
تنهدت وقالت: المهم اني افتكيت من هالمخدرات اللي كانت كابوس بالنسبه لي ..
قعدت حول اربع ساعات تتأمل المكان وتتذكر حياتها قبل وتقارنها بحياتها اللحين ..
تتذكر امها وابوها وفيصل وفارس .. واسيل ..
لمن تذكرت اسيل جاء في بالها آرثر ..
ريما: يا ترى تزوجوا ولا لا ..؟!
سكتت شوي بعدين قالت: اوووف وذا منصور متى يي ..؟!
انفتح الباب بهالوقت ودخل منصور ..
ريما: واخيرا ييت .. جان تأخرت شوي احسن ..
طالع فيها فتره بعدين قال: باجر راح اطلعج عشان نروح عالمطار على طول ..
ريما: يا سلاام .. يعني بنام هنا كمان ..؟! مستحيييل انا خلاص ملييت وطفشت .. ابي اطلع اليوم ..
منصور: انا استأجرت غرفه وحده لي انا .. اذا طلعتي ماكو مجان تنامين فيه ..
تنرفزت ريما وقالت: مو انت غني يا حضرة المنصور .. تقدر تستأجر غرفه ثانيه صح ..؟!
سكت شوي بعدين قال بهدوء: خساره فلوسي تروح في وحده مثلج .. يكفي مصاريف المستشفى ..
عصبت بس ضبطت نفسها وقالت: النوم في المستشفى احسن بمليون مره من مذلة انسان مثلك ..
ما جاوب عليها .. لف بيطلع بس تذكر شي ..
لف عليها وقال بهدوء: نسيت اقولج .... احسن الله عزاج ..
طالعت فيه بسرعه وقالت بخوف: شتقصد ..؟! منو ..؟! منو مات ..؟!
منصور بحزن: ابوج ..
انصدمـــــــــت من رده ..
ريما: شـ شـ ـنو قلـ ـت ..؟!
منصور: في اليوم اللي سافرنا فيه مات بعده في الصبح .. الله يرحمه ..
دخلت ايدها في شعرها من الصدمه وشوي صرخت وهي تقول: لاااااااااااااااااااااااااا .. ابـــــــــوي ما مااااااااااات .. ما مـــــــــااااااااااات ..
جاء منصور عندها بسرعه وقال: ريما اهدئي .. ما يصير تسوين جذي .. ادعي له مو تصرخين ..
ريما بصراخ: لاااا جـــــــذاااب .. ابوووي ما ماااات .. حبيبي ما ماااات .. هذا ابووي هذا دنيتي كلهاا .. مستحييل .. مستحييييل .. ابــــــــــــــــــوي ..
بعد ايدها عن ملابسها اللي بتقطعها وهو يقول: ريما خليج عاقله .. اللي تسوينه حراام وما يرضي ربنا .. اهدئي ..
بعدت ايده عنها وهي تقول: مابي اهدأ ابـــــــــي ابوووووي .. ابي اشووفه .. ابعـــــــــد ابي ابوووي ..
وحطت ايدها على وجهها تشاهق وتبكي ..
طالع منصور فيها بألم .. كسرت خاطره بقوه ..
جلس على طرف السرير وقال بهدوء: ريما بسج صياح .. ادعي له بالرحمه وان الله يغفر ذنوبه .. كلنا ماشين على هذا الطريج ومحد بهالدنيا بيبقى حي .. احمدي ربج انه عندج ام واخوان .. غيرج ناس كثير مشردين في الشوارع .. انتي في نعمه يا ريما .. فقدتي ابوج بس .. غيرج فقدوا الاهل والامان والصحه .. صدقيني انتي في نعمه ولازم تشكري ربج عليها وتصبري على هالمصيبه .. قل لن يصيبنا إلا ما كتبه الله لنا .. هذا مقدر ومكتوب وصياحج ما راح يرجع لج احد ..
حطت ايدها على اذنها وتهز راسها بلا وهي تبكي وتقول: ابعــــــــــــــد ما ابيـــــــــك .. ابــــــــــــوي .. ابــــي ابــــوي ..
منصور: ريما خلاص انتي ....
قاطعته بصراخ: قلـــــــــت ابعـــــــد يا الجـــــــذاب .. ابـــــوي ما ماااات ..
غطت وجهها بايدها وهي تبكي وقالت بضعف: ما ماات .. شلون يموت وهو قايل لي ان شاء الله تردين بالسلامه ونشوفك .. شلــــــــون يشوفني ان كان ميت .. هذا يعني انه ما مات ..
تنهد وهو يطالع فيها .. بعدها قام وتركها لوحدها يمكن تهدأ ..

⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊ ⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊

فجاة تركني وغاب ..

ذاك القمر اللي ملكني بكل احاسيسه ..
تركني لاخبر منه ولا حتى جواب ..

كنت اسعد انسانه في الدنيا بوجوده ..
كنت املك العالم وهو مني قريب ..
كانت همومي شي مستحيل ..
كان الفرح دايم معي ..

حتى الدموع لا تعرف طريق لعيوني ..

ما كنت اعترف بشي اسمه حزن ..
كنت اجهل طعم الآلم ..

فجاااااه تركني وغاب ..

اااااااااااااااااااه والله غاب ..
تبدلت حالتي لحظه غيابه ..

صار الفرح عندي حزن ..
ذقت الآلم اللي كنت أجهله ..
ضاق بي هالكون اللي ملكته بوجوده ..
صارت حياتي مابين الآلم وبين الدموع ..

فجأه تركني وغاب ..

رفعت راسها وطالعت في البحر اللي قدامها ..
من امس خرجت وقعدت تجري لين وصلت هنا ..
كانت تحاول تهرب من الواقع بس للاسف ما قدرت ..
فعلا الشخص الوحيد اللي بنظرها حيساعدها مات ..
مات آرثر .. اول شخص تحبه بحياتها مات ..
تألمت بقوووه من موته ..
بس ألمها هذا ما فرق معاها ..
من يوم واكتشفت انها لقيطه وهي عايشه بآلآم ..
مو قادره تستحمل اكثر .. هذا فوق طاقتها ..
كرهت حياتها وكرهت كل شي في هالعالم ..
تبي تموت هي بعد عشان ترتاح ..
الانتحـــــــــار ..
اكثر من مره تجي هالفكره في راسها بس هي تقاوم ..
هي عارفه انه حرام وعشان كذا تحاول تتجنب التفكير فيه ..
صرخت بألم وحطت ايدها على بطنها بقوه ..
لها ايام مادخل اي اكل لبطنها ..
حاسه بألم فضيع بسبب الجوع وجسمها ينتفض كمان ..
كل ما تذكرت انها ما اكلت تبكي ..
من فين لها فلوس عشان تاكل ..؟!
بطنها بيتقطع من الجوع ويمكن تموت .. ما تدري من فين تاكل ..
ما عندها فلوس .. ما عندها اكل .. ما عندها احد تلتجئ له يساعدها ..
هي في هالعالم لوحدها بس ..
محد عندها ابدا ..
نزلت الدموع على خدها ..
كالعاده تبكي لأنه مافي ايدها شي غير البكاء ..
تقدم احد من وراها وقال: اسيل ..!
تفاجأت ولفت راسها شوي تطالع في هذا الشخص الواقف بس ما قدرت تميزه بسبب الظلام والدموع اللي بعينها ..
طالع فيها وقال: فعلا انتي اسيل ..
بعدها ابتسم وتقدم وجلس قدامها وقال: شمقعدج عند البحر ..؟!
لحضه .. عرفته من صوته وكمان لمن جلس قدامها شافته ..
لمن شافها ما ردت قال: لا يكون نسيتيني ..؟!
ابتسم بخبث وقال: ليه ما تردين ..؟! ايه صح نسيت اسألج .. صح اللي سمعته ولا لا ..؟! سمعت انج لقيطه يا اسوله .. ها صح ولا لا ..؟!
هزتها كلمته فنزلت دموعها اكثر وما ردت عليه ..
رفع حاجبه وقال: هذا يعني انه صح .. ههههه شفتي انا كنت حاس من اول انج مو من عائلة الرملي .. فيه ادله كثير كانت تؤكد انج مو منهم واولها كلام البنت اللي اسمها وصايف .. من يوم ما قالت انج بنت سميه بديت اشك .. ومن هنا بديت احاول اطلع الحقيقه وفعلا طلعت الحقيقه .. ناصر ما يجذب يا استاذه اسيل ..
وكمان ماردت عليه .. لأنها ببساطه ما عندها شي تقوله .. اكتفت بالدموع وبس ..
مد ايده وبعد خصلات شعرها عن وجهها وهو يقول: اسيل القويه اللي لسانها كان اطول منها صارت انسانه مقززه .. يا سبحان مغير الاحوال ومع هذا مازلتي حلوه واايد ..
بعدت جسمها على ورى شوي عنه فأبتسم وقال: فعلا انتي غريبه .. المفروض انا اتقرف منج مو انتي .. لحضه عندي سؤال يدور في مخي .. انتي وين تنامين وشلون تاكلين وتشربين ..؟! ما عندج مجان صح .. يا حرراااام تكسرين الخاطر ..
نزلت راسها وغطت خصل شعرها على عيونها وبدت تبكي بصمت ..
ابتسم ناصر وقال: عندي خطه يمكن تساعدج .. شرايج تفتحين شقه ليليه وتتكسبين من ورى الشباب اللي ييونج .. لأن بصراحه كل مقومات الجمال عندج .. جسم وشكل وعيون .. آخخ على هالعيون بس طبعا انا اول زبون هههه ..
طلعت شهقاتها غصب عنها .. ما تقدر تتحمل اكثر ..
ناصر: غريبه ليش تبجين ..؟! اطمئني ترى سمعتج ما راح تتلوث لأنها بالاصل خرباااانه .. بالعكس اللقيطه المفروض بالعقل يكون هذا مستواها وهذه شغلتها عشان تقدر تعيش ..
مدت ايدها تمسح دموعها .. تلقت اهانات فوق طاقتها ..
والمشكله الاكبر انها مو قادره ترد .. تحس نفسها ضعيفه جدا ..
دخل ايده في جيبه وطلع محفضته وفتحها يدور فيها ..
ناصر: اقول اسيل جم تبيني اتصدق عليج .. عندي عشره وجم خمسات وعندي ميتين .. جم تبين ..؟!
خلاااااااص ستوووب مو قادره تتحمل ..
قامت ولفت عنه بتروح .. كافي اهانات .. لا تزيدونها فوق طاقتها ..
مسكها من ايدها وجلسها غصب وهو يقول: وين رايحه ياآنسه قذره .. انا باجي ما تصدقت عليج ..؟!
اسيل بإنفعال وهي تبكي: اتركنـــــــــي كافـــــــــي مو قـــــــادره اتحمل اكثر .. ارحمنـــــــــي واتركنـــــــــي ..
ناصر ببرود: بس انا باجي ما تصدقت عليج ..

فعلا كافـــــــــي مو قادر يسكت اكثر ..
كان حاس بتعب وخرج للبحر عشان يشم هوا ويريح نفسه بس ما قدر يرتاح ..
لف وجهه يطالع في البنت اللي تبكي والولد اللي يتكلم ببرود ..
ما سمع شي كثير بس اللي فهمه هو ان هالولد يضايق هالبنت وهي تبي الفكه منه ..

اما عن ناصر فأبتسم وقال: اوكي شكل الصدقه ما تكفيج .. باجر راح اييب لج الفين .. شرايج ..
رمى الميتين في وجهها وقال: عالاقل خذي هذا عشان يكفيج لهالليله عالاقل ..
ارتجفت شفتها بألم فتفلت في وجهه وهي تقول مابين دموعها: اككرررهك .. انسسان واطي وحقققققير .. شتبي مني .. اككرهـــــــــك ..
فتح ناصر عيونه بصدمه يحاول يستوعب هالتفله اللي جت عليه ..
عصب ومسك فكها بقوه وقربها منه جدا وهو يقول: انتي قد الحركه هذه يا اسيل ..؟! اوكي يا الوسخه انا حأندمج وحأخليج الآن تعضي على اصابعج نددددم .. بجد راح اخلي سمعتج مشوهه اكثر ماهي مشوهه ..

خــــــــــــــــــلاص الولد ماقدر يستحمل يشوفه يمد ايده على البنت ويكلمها بالطريقه هذه ..
قام من مكانه ومسك ناصر من بلوزته من ورى وبعده بقوه عن اسيل واعطاه لكمه خلى ناصر يدور حول نفسه من قوتها ..
مسحت اسيل دموعها بإيدها وهي حدها كارهه نفسها وكارهه كل شي حولها ..
طالع ناصر في الولد بعصبيه وقالت: انت شلوون تمد ايدك علي ..؟! اصلا منو انت وشتبي ..؟!
طالع الولد فيه وقال بتهديد: اسمع .. ان ما ابعدت عن هالمجان اللحين راح تندم .. فاهم ..؟!
عصب ناصر اكثر وهجم عالولد بقوه من القهر ..
مد الولد رجله وضربه ضربه قويه من جانب رقبته خلت ناصر يطيح عالارض ..
تألم ناصر فقام بعصبيه وهجم مره ثانيه عالولد وهو يوجه له لكمه قويه ..
مد الولد ايده ومسك ايد ناصر قبل لا توصله ورفع ركبته وضربه في بطنه بقوه فتألم ناصر وانحنى بجسمه شوي فأعطاه ضربه على راسه من كوع ايده الثانيه فطاح عالارض ..
الولد: لا تحاول تمد ايدك علي لأن اللي جدامك واحد ماخذ دروس في التايكوندو والدفاع عن النفس .. واللحين تلايط عن ويهي قبل لأعلمك منو بسام ..
وقف ناصر بالصعوبه وهو ماسك بطنه بألم وقال: ابي افهم شي واحد .. انت شدخلك .. ما اضن ان هالبنت تقربلك عشان تدافع عنها .. تراها حدها لقيطه مقطوطه بالشارع مثلها مثل اي زباله ..
حس بوخز في قلبه من هالكلمه فعصب ومد رجله وضربه بقوه وقبل لا يطيح مد رجله الثانيه وضربه عالجهه الثانيه بأقوى ما عنده ..
فطاح ناصر عالارض وقال بسام بعصبيه: اسكـــــــــت .. حتى لو كانت لقيطه ما يصير تتكلم عنها جذي يالججلب .. انــــــت الززباااله مو هي .. تراها اشرف منك ومن امثالك .. بجد انسان قذر .. ابعد عن ويهي قبل لا تشوف يوم اسود ..
رفعت اسيل راسها وطالعت في بسام فتره طويله ..
بالصعوبه وقف ناصر على رجوله وطالع في بسام بقهر وحقد ..
لف نضره وطالع في اسيل وقال: هين يا اسيلوه .. انا اعرف شلون اربيج يالوسخه ..
بسام بعصبيه: انقلع قبل لا امد ايدي واييب خبرك هني ..
طالع في بسام بقهر بعدين ابتعد عن المكان ..
اخذ بسام نفس يهدي نفسه بعدين لف على اسيل وشافها منزله راسها وكأنها تبكي ..
تقدم شوي منها وقال: خلاص لا تبجين .. صدقيني بعد اللي شافه مستحيل يضايقج مره ثانيه ..
ما ردت عليه وما زالت تبكي بصمت ..
طالع فيها بحزن وتذكر كلمة ناصر ..
"حدها لقيطه"
بسام في نفسه: "مو هي الوحيده .. في كثير غيرها لقطاء ويعيشون جذي .. الله لا يسامح كل اهل يرمون اولادهم عشان يعيشون هذي العيشه الصعبه .. يا ترى سجى تعيش مثلها" ..
شوي تذكر سجى وطالع في اسيل فتره طويله ..
جلس قدامها وقال: اسمج اسيل صح ..؟! سمعت هالحقير وهو يقول اسيلوه ..
ما ردت عليه ابدا ..
بسام بتردد: ا .. أ ط .. طيب جم .. جم عمرج ..؟!
وقفت دموعها وهي مستغربه من سؤاله ..
طالع فيها فتره طويله ينتظرها ترد او ترفع راسها عالاقل بس للاسف ما صار شي ..
بسام: اسيل .. اسيل ممكن تياوبيني ..
نزلت راسها اكثر وما ردت عليه ..
اسيل في نفسها: "جم عمري ..؟! الله هو وحده اللي عارف .. يمكن اكون اصغر او اكبر من عمري الحالي .. آآه" ..
مسكت بطنها بألم وتحس نفسها بتدوخ في اي لحضه ..
طالع بسام فيها وقال: تحتاجي دكتور ..؟!
هزت راسها بلا وقالت بهمس: ابعد ..
بسام: طيب بروح بس اول ابغى اطمئن عليج .. انتي بخير ..؟!
هزت راسها بإيه وهي شاده على بطنها اكثر ..
بسام بهدوء: ما اصدقج .. بطنج يمغصج صح ..؟!
اسيل بهمس وضعف: ابعد واتركني بلييز ..
بسام: اسيل صدقيني ما أقدر .. ما اقدر اروح واتركج .. ما اعرف ليش بس ريولي مو راضيه تمشي وتتركج ..
فبكت وقالت بصوت باكي: بلييز اتركني بحالي .. شتبي مني .. انا حدي وحده لقيطه .. ابعد عني ..
ابتسم وقال: طيب وإذا كنتي لقيطه وش فيها ..؟! عادي انتي انسانه مثلي .. ماكو اي فرق بيني وبينج .. اللقيط مثل اليتيم ومثل اي انسان بهالوجود .. كلنا في النهايه ابناء آدم ومن تراب ..
وقفت دموعها ورفعت راسها تطالع فيه ..
قعدت فتره طويله وهي تطالع فيه بدهشه ..
يتكلم معها عادي وما تقرف منها او ابتعد عنها ..
نزلت دموعها وارتجفت شفاتها وهي تقول: صج ..؟!
ابتسم وهو يقول: ايه صج ..
شوي هديت ابتسامته وهو يطالع في عيونها ..
العالم من حوله توقف لحضات وهو يطالع في هالعيون الرصاصيه ..
يطالع فيها وهو مو قادر يصدق ان قدامه بنت عيونها رصاصيه ..
نزلت اسيل راسها بألم وشدت على بطنها اكثر ..
تحس معدتها بتتقطع من شدة الالم ..
غصب عنها اطلقت صرخة ألم من فمها ..
صحي بسام من افكاره وقال بسرعه: فيج شي ..؟! تحتاجي دكتور ..؟!
اسيل وهي تتألم: لا مابي آآه ..
قام بسام وقال: كلها دقايق وراح ارجع بالدكتور .. بلييز لا تتحركي وخليج مجانج .. ما بتأخر ..
وراح بسرعه لسيارته وانطلق بها ..
طالعت فيه اسيل لين ابتعدت السياره بعدها حاولت توقف على رجلها عشان تمشي ..
وقفت بالصعوبه ومشيت خطوتين بعدها ما تحملت وطاحت ..
جلست ومسكت خدها بألم لأنه احتك بالحجار اللي عالارض ..
طالعت في ايدها وشافت فيها دم ..
اسيل بهمس: دم ..!
حاولت تمسح الدم بس ما قدرت .. كل ما لمست خدها يحرقها من الجرح ..
تحاملت على نفسها وحاولت توقف ..
وقفت ومشيت وهي تجر الخطوه جر ..
جسمها تعبان ويرتجف من الجوع والتعب ..
اسندت نفسها عالجدار واخذت لها نفس ..
مشيت خطوات بسيطه ومع هذا تعبت ..
بس ضغطت على نفسها ومشيت وهي تسند ايدها عالجدار ..
وهكذا مشيت ومشيت وكل مالها تتعب بس كانت تضغط على نفسها ..
في النهايه تعبت بجد وطالعت حوليها عن مكان ينفع ترتاح وتنام فيه ..
شافت قدامها مصنع صغير وباين انه مهجور ..
تقدمت بالصعوبه لعند الباب وحاولت تفتحه بس كان مقفل ..
بكت وهي تقول: لا لا .. تعبت ابي ارتاح ..
اسندت راسها عالباب تبكي فلاحظت شي بين الاحجار جنب الباب ..
جلست واخذته .. ابتسمت براحه لأنه كان مفتاح ..
فتحت الباب ودخلت وكان المكان مظلم ومليان سيارات خربانه بس كانت نضيفه جدا ..
غلقت الباب وراها من دون لا تقفله بالمفتاح ومشيت كم خطوه وهي تنسد ايدها عالجدار ..
بس خلااااص ما عاد فيها طاقه تتحمل ..
جلست عالارض بتعب ..
اخذت نفس وبعدين نزلت معطفها البني .. انسدحت عالارض وحطت المعطف غطاء لها ..
غمضت عيونها وهي تقول في نفسها: "ريال طيب وايد .. ما تقزز مني ابدا وكان راح ييب لي دكتور .. صحيح طيب بس ما قدرت اتحمل نضراته لي .. كانت نضرات شفقه ورحمه .. طول عمري وانا اكره هذه النضرات واللحين صرت اكرهها اكثر .. ما قدرت اقعد في المجان اكثر .. اخاف يي الدكتور ويعرفون ان اللي فيني بسبب الجوع .. راح يصر اني ايي معاه عشان يتصدق علي ويأكلني .. مستحييل .. مستحيل اسمح بهذه المعامله حتى لو كنت لقيطه" ..
نزلت دموعها لمن تذكرت كلام ناصر ..
دفنت وجهها في ايدها اكثر وبكت بصمت لين نامت ..

في هالوقت وقف بسام السياره ونزل منها بسرعه ..
وقف فتره يطالع في المكان اللي كانت فيه ..
تنهد وقال: وربي كنت حاس انها حتروح ..
نزل الدكتور وقال: وين المريضه يا استاذ ..؟!
مشي بسام بهدوء وقال: راحت .. بجد مينونه .. شلون تروح وهي تعبانه ..؟!
سكت شوي وهو يتذكر عيونها ..
بسام: عيون رصاصيه ..
كمل بقهر: انا شلون سمحت لها تروح .. منو قالي أروح واخليها .. مينوووون .. يمكن تكون سجى ..
الدكتور بقلة صبر: وبعديييين .. يعني جيتي هنا من دون فايده ..؟!
طالع بسام فيه شوي بعدين هز راسه بإيه ..