شبكة همس الشوق - عرض مشاركة واحدة

12 - 3 - 2014, 12:19 AM

شلون يحبها وهو دايم يكره طاريها واكثر من مره اهانها بالكلام ..؟!
هالسؤال يدور في بالهم وهم يطالعون في طارق ..
طالع طارق في الجوال بعدها قام وراح ..
انس: طارق وين رايح ..؟!
لف طارق عليه وقال بنبره حاده: فيه وقح يبغاله تربيه ..
وراح متجه لكلاس اسيل ..
وصل للكلاس ودخل وقال: وين الوقح ناصر ..؟!
طالعوا الطلاب فيه وقام ناصر بكل بجاحه وهو يقول بثقه: انا ناصر .. اكيد انت ياي تبارك لي عالخبر الرائع اللي انشرته ..
لكمه طارق بطريقه مفاجئه في فكه بقوه وهو يقول: وااااطـــــــــي ..
طاح ناصر بقوه بين الطاولات وتألم جسمه كله ..
طارق بعصبيه: رائع ..؟! وتفتخر باللي ساويته يالججججلب .. اي قلـــــــــب تملكه هذا اللي سمح لك تطلع اشاعـــــــــه جذب عن رفيجتك بالكلاس ..
قام ناصر وهو يقول: احترم نفسك انا مب جذاب .. اذا مو مصدقني مستعد اعطيك عنوان بيت الرملي وروح تأكد بنفسك ..
فتح طارق عيونه بعدم تصديق ..
يعطيه عنوان البيت عشان يتأكد ..؟!
هذا يعني انه متأكد من السالفه ..
مو معقول الاشاعه تكون صدق ..
لا مو معقول ..
ابتسم ناصر بإستهزاء: ياي وبكل شهامه بتدافع عنها .. شوف ويهك شلون صار لمن تأكدت اني صاج .. اكيد اللحين تلعن اليوم اللي عرفتها فيه صح ..؟! اكيد لأنه ماكو احد يتمنى يكون له صله بوحده لــقــيــطــه مو معروف اصلها ولا فصلها ..
تنرفز طارق من كلامه وانقض بلكمه ثانيه اكبر من الاولى وهو يقول: جــــــــــب .. اسيــــــل اشرف من اشكالــــك فاهــــــم ..؟!
تماسك ناصر بالصعوبه عشان لا يطيح وطالع في طارق بقهر ..
ناصر: سكت لك في المره الاولى بس المره الثانيه لـ....
ماكمل كلامه لأن طارق سكته بلكمه ثالثه على فكه ..
طاح ناصر للمره الثانيه بس مسكه صاحبه جاسم ..
جاسم بعصبيه: انت هيه احترم نفسك ..
قام ناصر واشر لصاحبه بأنك لا تتدخل ..
مسك فكه بألم ومسح الدم اللي نزل من فمه وطالع في طارق بعصبيه ..
انقض بعصبيه عليه وهو يقول: والله لأردها لك يالحيوان ..
بس للاسف ضربه طارق ضربه اقوى من اللي قبل وهو يقول بقهر: تردها ها ..؟! للاسف اوطى منك ما شفت .. والله لأندمك على كل كلمه كتبتها ..
قام ناصر من جديد ودخل في مضاربه عنيفه مع طارق ..
طلع طارق كل قهره وانفعاله وعصبيته في ناصر ..
مقهور من ناصر وفي نفس الوقت مصدوم من حقيقة اسيل ..
يضرب ويطلع كل اللي في قلبه وكأن يرفض هالواقع ..
مو قادر يصدق ان البنت القويه الجاده تكون لقيطه ..
طلاب الكلاس كانوا يطالعون فيهم ولا واحد فيهم فكر يتدخل لأنهم كانوا عنيفين جدا ..
وعند باب الكلاس كان مهند متكي عالجدار ومتكتف يطالع في طارق ببرود ..
في هالوقت مر بسام وبندر من جنب الكلاس وشدهم صوت الصراخ فلفوا وشافوا اثنين يتضاربون ..
بندر: مضاربه ..
بسام: ما علينا فيهم .. ما .....
وقطع كلامه فجأه وهو يطالع في طارق وقال: هذا طارق ..
طالع بندر فيه وقال: تقصد صاحبك القديم ..؟!
بسام بصدمه: يتضارب ..؟! اول مره بحياتي اشوفه يتضاربه .. المهاوشات مو من عوايده ابدا ..
طالع بندر فيه بعدين طالع في طارق ..
راح بسام عنده وهو يقول: تعال نفكهم ..
فلحقه بندر ..
جاء بسام وابعد طارق وبندر ابعد ناصر بالصعوبه ..
طارق بحقد: فج ايدك عني وخلني اعلمه شلون يتحجى عدل عنها .. خلني اعلمه انها اششرف منه واحسن منه مهما كانت ..
بسام: طارق اهدأ .. مو من عوايدك تنفعل جذي ..
وقف طارق ولف يطالع في بسام وقال بدهشه: بسام ..!!!!
طالع ناصر في بسام وقال في نفسه: "مو هذا اللي ضربني عند البحر ..؟! مو معقول يكون طالب عندنا" ..
ناصر: تعال يا جسوم ..
وطلع هو وجاسم برى الكلاس ..
تعدل مهند في وقفته ولف وطلع برى ..
جاء بندر عند طارق وبسام وقال: هربوا ..
طالع فيهم ومحد رد عليه فأضطر يلقط وجهه من الفشيله ..
طارق: معقوله انت بسام ..؟!
بسام: هههه لا اخوه ..
ابتسم طارق وقال: والله من زمان عنك ..
بسام: حتى انا .. كيفك ..؟!
طارق: تمام ....
فسكت شوي وضاق خلقه لمن تذكر اسيل ..
طارق: اعذرني يا بسام بروح .. متضايق شوي .. باي ..
بسام: على راحتك .. مع السلامه ..
خرج طارق من الكلاس ومن الجامعه بكبرها ..
تنهد بسام وهو يقول: مو بس انت المتضايق يا طارق ..
بندر: ليش كان يتضارب مع الولد ..؟!
بسام: مدري .. تعال نطلع ..
فطلعوا ولبنى تراقبهم بنظراتها ..
طالعت للمره المليون في جوالها وهي تقول: شكلو كلام خيي بدر صحيح .. اسيل ..
كملت بحزن: يا حياتي عليها .. والله ما تستاهل ..

[COLOR=royalblue].................................................. ....................

اتجه سامي لشلته وهو يدندن لأحد الاغاني العراقيه ..
وصل عند الشله وقال بمرح: هـــــــــــــــــــــــــــاي ..
ريان: شايفين .. قلت لكم انه راح يخلف وعده .. ما يعرف السلام عليكم ابدا ..
ضرب سامي ايده براسه وهو يقول: نسييييت .. السلام عليكم ..
يزيد: ههههههههههه الله يخلف على ام يابتك ..
ريان: هههه وانت الصاج ..
سامي: شفيكم .. انا سلمت ..
عماد: خلاص ولا تزعل .. وعليكم السلام ..
صالح: هههه وعليكم السلام ..
ابتسم سامي وقال: ايوه جذي ..
لف يطالع فيهم ووقف نظره على دانا ..
ابتسم وهو يقول: هيـــــه السلام عليكم ..
ارتبكت وقالت من دون لا تطالع فيه: وعليكم السلام ..
جلس سامي وهو يقول: امس الليل كله كنت افكر فيج .. واخيرا استوعبت انج بنت ههههه .. بس قسم بالله انج خطيييره ههههه ..
طالع ريان ويزيد وصالح فيه بصدمه ..
عماد ؟؟؟؟؟؟؟ نو كومنت ..
عضت دانا على شفتها وهي تقول في نفسها: "كنت راح اغيب بس المشكله علي اختبار" ..
عماد بإستغراب: شتقصد بحجيك الملخبط ..؟!
سامي: هههه ما سمعت آخر خبر ..
عماد: وشو ..؟!
سامي: عادل طلع ولد ..
ضرب ريان ايده براسه وهو يقول: غبي والله غبي ..
عماد بإستهبال: والله .. معلومه يديده .. تصدق حتى انت اكتشفت انك ولد ..
عقد سامي حواجبه بإستغراب بعدين قال: لا لا اقصد اكتشفت ان دانا بنت ..
غصب عنها دانا ابتسمت على غبائه الغريب ..
عماد: شيء جميل .. حتى انا اكتشفت ان هند بنت ..
سامي: منو هند ..؟!
عماد: وحده ما تعرفها ..
سامي: عماد عن الاستهبال انا اتكلم بجد ..
عماد: هههه يعني الحجي اللي قبل شوي جد ..؟! سوري حسبتك تستهبل .. ياخي انت بطل استهبال مو انا .. مره تقول عادل ولد ومره تقول دانا بنت .. بالله هذا جد في رايك ..
طالع سامي فيه بتفكير بعدين قال: اوووه سوري لخبطت .. صديقنا عادل مو بنت .. امس اكتشفت ..
صفق عماد وهو يقول: برافو برافو .. حتى انا اكتشفت ان صديقنا ريان مو بنت ..
يزيد: هههههههههه والله انك تحفه هههه ..
صالح: ههه الله يقطع ابليسك ..
طالع سامي فيهم وقال بتذمر: انتم شفيكم تستهبلون ..؟! انا اتحجى جد ..
عماد: هههههههه ايه واضح الجد واضح ..
تأفف سامي ولف على دانا وقال: قولي لهم .. مو راضين يصدقوني ..
نزلت دانا راسها وهي تقول في نفسها: "كنت متأكده .. كنت متأكده ان الشيخ سامي بيفضحني لو عرف عكس ريان اللي يحاول يساعدني" ..
سامي: هيـــــــــه ..
طالعت فيه وهي تقول: ها ..
اشر على عماد وهو يقول: خبريه انج بنت .. مو راضي يصدقني مثل ريندا ..
ريان في نفسه: "حتى ريندا خبرها .. ما راح يمر هالاسبوع إلا والجامعه كلهم يعرفون صدقوني" ..
عماد بإستغراب: خبريه انج بنت ..؟؟!!! لحضه لا يكون حجي لينا صج ..
لف يطالع في دانا وقال: انتي بنت او ولد ..؟!
سكتت وماردت ..
بصراحه استغربت من نفسها انها سكتت ..
بالعاده في هالمواقف الحرجه تبكي ..
بس مع هذا تحس انه موقف محرج وبس .. تحسه موقف عادي ..
دانا في نفسها: "انتي يا دانا قاعده تتغيرين .. صايره متماسكه اكثر من اول .. صايره جريئه مع الاولاد اكثر من اول" ..
ابتسمت .. كانت ضعيفه واللحين احسن من اول ..
سامي: ايه بنت يا عماد خخخ انت الوحيد اللي ما تدري ..
طالع ريان ويزيد وصالح في عماد يشوفون ردة فعله ..
عماد بحماس: وااااو كوووول .. بنت تصلح روحها ولد .. حممماااس .. شيء خارج عن الطبيعه .. شيء غير عادي .. لا لا مب مصدق ذا .. عادل هو بالاصل بنت .. وااااااااو والله مافي اخطر منج في العالم ..
الشله: ؟؟؟؟؟؟؟؟؟؟؟
طلع جواله وهو يقول: بأعلم لينا .. لا لا فعلا شيء خارق وما قد شفت مثله .. الحمد لله اني تعرفت عليكم وصرت صاحبكم عشان لا يفوتني هالحدث الرائع .. يارب ان شاء الله ما يكون حلم ..
سامي بحماس: لا لا مو حلم .. حتى انا ما كنت مصدق نفسي .. بس فعلا فرحت .. دانا هي البنت الوحيده اللي اعرفها وما شبكتها .. فعلا خرجت عن قاعدتي الرئيسيه ..
عماد: تصدق يا سامي ان هذا اخطر شي مر بحياتي لحد الآن ..
سامي: انا مثلك تماما .. احس نفسي مميز جدا ..
عماد: وانا كمان .. بتفاخر انا ولينا جدام الجماعه اننا عرفنا بنت صلحت روحها ولد ..
سامي: والله ما اترك احد بالقصر ما اخبره ههههه .. اتخيل شكلهم فاتحيين عيونهم بصدمه وهم يقولون: هذا مستحيل يا سيدي هل انت جاد .. ههههههههه ..
طالع عماد في دانا وقال: اقسم بالله اني احبج .. دخلتي لحياتي نوع من الفله والحماس .. ما راح انسى هالجميل طول حياتي .. بس وش اسمج ..؟!
سامي: اسمها دانا ..
عماد: محد سألك يالملقوف ..
سامي: هههه هذا جزائي اساعدك ..
عماد: محد طلب مساعدتك ..
سامي: عيل اسألها وصدقني ما راح ترد عليك من كثر ماهي منحرجه هههه ..
بجد اللحين انحرجت من كلامه ..
ريان: فعلا محد يقدر يأتمنكم على سر .. كل واحد يعدد الناس اللي بيخبرهم .. يا شباب انتم تعرفون ان الشرطه لو وصل لها خبر وش راح يصير ..؟! اولا بتنفصل من الجامعه وثانيا راح تتعرض للمحاكمه ونهايتها تدش السجن ..
سامي: لا مو كويس بنت تدش السجن .. حرام ..
قفل عماد الجوال بعد مادق للمره الرابعه على لينا وقال: تصدقون ما ياء ذا في بالي .. خلاص ما راح اخبر غير لينا وبس ..
سامي: اوكي انا بسكت مع ان نفسي اسمع كلام الخدم وهم يقولون: هذا مستحيل يا سيدي هل انت جاد .. خساره .. طيب بأخبر ريندا بس ويمكن منسقة الحفلات رويدا لأنها تحب الحماس ..
هز ريان راسه بقلة حيله وقال يزيد: صدقني اهوج منهم ماقد شفت ..
صالح: وانت الصاج ..
تربع سامي وفتح جواله وهو يقول: بأكتب هالشيء واحط تنبيه عالساعه خمسه العصر عشان ما انسى .. ابي اعلم ريندا اليوم بس خايف انسى وعشان جذي بأنبه نفسي ..
يزيد: يارب اعطه ربع عقلي عالاقل .. ابيه يكون ذكي ولو ذكاء بسيط ..
سامي: افا يا زياد تبخل على صاحبك .. ابي عقل كامل مو نص ..
عصب يزيد وقال: خلاص ما بعطيك ولا شيء من عقلي عشان تبطل تقول زياد .. اسمي يزيد يا استاذ ..
سامي: هههه سوري نسيت ..
فتح جواله عالملاحضات عشان يكتب ..
عقد حواجبه بإستغراب وضغط على موافق ..
شوي جته رساله على البلوتوث حقه ..
فتح الرساله وقرأها من اولها لآخرها ..
قرأ كل شيء فيها ..
كل سطر وكل كلمه وكل حرف ..
صدمـــه .. دهشـــه .. تفاجـــؤ ..
اعاد قرائتها من جديد وفي كل مره ينصدم ويندهش ويتفاجئ اكثر ..
ألــ1000ــف سسؤال وألاف الافكار متلخبطه في مخه ..
اسيل عبد الرحمن الرملي لقيطه ..!
عيونها رصاصيه ..!
لها جرح اسفل رقبتها ..!
عمرها تسعة عشر سنه ..!
وفي نفس هالوقت بنت عمه ضايعه ..!
فتح عيونه بصدمه وهو يربط الاحداث ..
رفع راسه يطالع في اصحابه وقال: مو معقول .. مو معقوله تكون هي نفسها ..
ريان: سامي شفيك ..؟!
سامي بصدمه: اسيل .. مو مقول تكون .. لا ..
استغرربوا اصحابه اكثر وهم يشوفونه منصدم ومتفاجئ لهالدرجه ..
يزيد: سامي شسالفه ..؟!
اخذ سامي شنطته وقام وراح عن اصحابه ..
يزيد: شفيه ..؟!
صالح: سمعت قبل شوي صوت رساله .. شكلها هي السبب ..
حرك سامي السياره بسرعه متهوره وهو متجه للقصر ..
سامي: اسيل هي نفسها بنت عمي ..!! مو معقول .. طول هالوقت حولي ولا ادري وبعد ما راحت ادري .. ليش ما انتبهت من اول ..؟! ليش يا سامي ..؟!
هز راسه بعدم تصديق وهو يقول: شلون جذي .. شلون ..؟؟!!!
فحـــــــــط ونزل من السياره بسرعه من دون لا يقفل بابها ودخل القصر ..
طلع الدرج بسرعه وفتح باب جناح ابوه وشافه يقرأ جريده ويشرب كوب قهوه تركيه ..
لهث سامي بتعب وقال: اسيل بنت عمي صح ..؟!
عقد ابوه حواجبه يطالع في سامي ..
قفل سامي الباب وقال: بنت عمي ما ماتت مثل ما قلت صح ..؟!
طالع الاب فيه فتره بعدين ابتسم وقال: يعني عرفتها ..
انصدم سامي من رده وقال: يعني انت عارف انها حيه ..؟!!!!
شرب شوي من الكوب وبعدها قال ببرود: ايه عارف وقد شفتها لمن رحت معاك وقت الاختبارات .. كانت مع ولد عمها ..
فتح سامي عيونه على اخرها من الصدمه وقال: ليه .. ليه جذي .. ابوي ليه جذي ..؟!
رفع الاب حاجبه وقال: ليه على شنو ..؟!
هز سامي راسه بعدم تصديق ..
فار دمه وقال بإنفعال: حـــــــرام عليك .. كنت عارفها وساكت .. ليـــــــه جذي ليييه ..؟! ليه ما خبرتني او خبرت ابوها .. ليه ما رجعتها لأهلها .. ليه قعدت ساكت ليييش ..؟!
الاب بمنتهى البرود: ماهي بنتي عشان اهتم ..
انصدم سامي اكثر من رده وقال بعدم تصديق: بس .. بس انت عمها .. هي من لحمك ودمك .. مستحيل .. انت مب انسان مستحيل ..
قلب عالصفحه الثانيه وقال: اذا كان ابوها وهو ابوها مو مهتم فليش اهتم انا ..
وتتالى الصدمات على سامي ..
كل ما تكلم اكثر جته صدمه اكبر ..
سامي: شتقصد بأن ابوها مو مهتم ..؟!
طالع الاب فيه بعدين قال: ببساطه لأنه له يد في رميها وهي طفله .. ما كان يبيها ..
حط سامي ايده على راسه بألم وهو يحس انه بحلم ..
صــــــــــــــــــداع ..
صداع شديد في راسه من كثر ما سمعه اليوم ..
فيه عم كذا ..؟!
لا السؤال الاهم فيه اب يسوي ببنته كذا ..؟!
حرك سامي ايده بلا وهو يقول: انتم مو معقولين ابدا .. ماكو .. ماكو اهل في العالم مثلكم .. ليه .. طيب ليه .. مو مصدق .. مو مصدق .. مو لهدرجه ..
عصر راسه بين ايده بألم وهو مغمض عيونه ..
مو قادر يصدق انه في عائله كذا ..؟!
طالع في ابوه وقال بهمس وبلوم: الله لا يسامحكم .. الله لا يسامحكم ..
خرج وصفق الباب وراه بقوه ..
ركب سيارته واسرع بأقصى سرعه عنده وهو يحس ان الدنيا ضايقه فيه ..
ضايقه وبقوه ..