شبكة همس الشوق - عرض مشاركة واحدة

12 - 3 - 2014, 12:20 AM

في احد الاحياء القريبه من شاطئ البحر ..
في بيت جدا عادي ورايق ..
كانت جالسه عالسرير ومسنده ظهرها عالمخده وفي ايدها كوب حليب حار بالشوكولاته ..
كانت لابسه بجامه زرقا شوي وسيعه عليها وتطالع في الكوب وهي سرحانه ..
تفكر في كل شي بحياتها اللي انتهت بمجرد ما اكتشفت هالحقيقه المره ..
دخلت وحده عمرها ٢٣ للغرفه وقالت بإبتسامه: ليه ما شربتيه ..؟!
ابتسمت اسيل بهدوء وقالت: سوري نسيت ..
رفعت الكوب وبدت تشربه شوي شوي ..
جلست البنت وحطت عالطاوله اغراض وهي تقول: هذي الاغراض كانت بملابسج ..
اسيل بإحراج: تعبتج معاي وايد ..
البنت: هههه لا لا عادي .. والله اعتبرج مثل اختي الصغيره ..
طالعت اسيل في البنت فتره طويله ..
من اول ما جت امس اكلوها وشربوها وخلوها تاخذ دش وغسلوا ملابسها .. وبعدين دخلوها لغرفه ترتاح ..
كانوا مريحينها للآخر وما سألوا ابدا مين انتي ولا من فين جايه ..
ابتسمت البنت وقالت: لهدرجه ويهي حلو ..؟!
شالت اسيل عيونها بإحراج وهي تقول: سوري ..
البنت: ما شاء الله عيونج جدا روعه ..
اسيل: ميرسي ..
البنت: بس فيها نضرة حزن مو راضيه تروح ابدا ..
اسيل: ...........................
البنت بإبتسامه: حكيني .. حكيني عن مشكلتج وصدقيني راح اساعدج .. قولي كل اللي في خاطرج واعتبريني اختك الكبيره ..
رفعت اسيل راسها تطالع في البنت والعبره خانقتها ..
اخت ..!! تتمنى هالشي ..
تتمنى انها عايشه مع عائله ولها ام واب واخ واخت ..
تتمنى ان لها بيت وغرفه وخصوصيات ..
تتمنى يكون لها اعمام وعمات وخالات ..
لا ما تبغى ذي الحياة اللي هي عايشتها اللحين ..
وكمان ما تبغى اهلها اللحين ..
ما تبغاهم ولا تبغى تشوف وجه فرد منهم .. لا اب ولا ام ولا اخ ولا اخت ولا اي احد من اقربائها ..
تكرههم كلهم .. ولو بإيدها كان قتلتهم مثل ما قتلوها ..
مثل ما قتلوا حياتها وقلبها الصغير ..
مثل ما حطموها ..
مثل ما عيشوها كذا ..
مشرده .. ضايعه .. وحيده .. قذره بنضر الناس ..
انذلـــــــــت بسببهم ..
تحطمـــــــــت بسببهم ..
انهانـــــــــت بسببهم ..
تألمـــــــــت بسببهم ..
اي قلب يملكون هالاهل ..؟؟!!
اي مشاعر يملكونها ..؟؟!!
وين ضميرهم ..؟؟!!
وين حنانهم على قطعه منهم ..؟؟!!
شهقت وبكيت غصب عنها ..
مالها ذنب .. مالها ذنب فليش هي تعاني بسببهم ..؟!
ليش تتعذب بسببهم ..؟!
طالعت البنت فيها وجلست عالسرير جنبها وحضنتها وهي تقول: خلاص ياحبيبتي .. خلاص اهدأي ..
تشبثت اسيل فيها وانفجرت بالبكى وهي تشاهق بصوت مسموع ..
مسحت البنت على شعرها وظهرها وهي ساكته ومخليه اسيل على راحتها ..
جاء صاري في هالوقت عند الباب وكان بيدخل بس وقف فجأه لمن سمع صوت بكى ..
حط اذنه على الباب فتره بعدين قال: هذي الضيفه تبجي .. ليش ..؟!
رفع حاجبه بفضول لمن سمعها تتكلم مع اخته الكبيره ناديه ..
اسيل بهمس وهي تشاهق: ما اقدر .... ما اقدر اتحمل ...... ابـ ـ ـي امـ ـــ ــوت وارتـ ــاح ..
ناديه: لا يا حبيبتي ما يصير جذي .. لكل مشكله حل .. ما يصير نقنط من رحمة الله ..
نزلت دموع اسيل اكثر وهي تقول: إلا مشكلتي .. إلا مشكلتي مالها حل .. والله مالها حل .. تعبت ..
تنهدت ناديه وضمتها اكثر وقالت بهمس: اهدئي يا حياتي اهدئي ..
بعد فترة عشر دقايق هديت اسيل فأعطتها ناديه كوب مويه كان عالطاوله اللي جنب السرير فشربته اسيل ..
ناديه: ها كيف حالج اللحين ..؟!
اسيل بهدوء: تمام ..
طالعت ناديه فيها فتره بعدين قالت: حبيبتي انتي شفيج ..؟! ليش خلقج ضايق جذي ..؟!
رفعت اسيل راسها تطالع فيها فحطت ناديه ايدها على ايد اسيل وهي تقول: انتي تعاني من مشكله جايده .. راح اساعدج .. علميني وراح اساعدج ..
نزلت دموع اسيل وقالت بصوت مرتجف: ما تقدري .. ما تقدري تسترجعي انسانيتي اللي تحطمت ..
استغربت ناديه بس ابتسمت وقالت: شسمج حبيبتي ..؟!
اختنقت اسيل من الدموع وهي تقول: ما اعرف .. مدري وش سموني .. حتى لو عرفت فراح اكرهه .. راح اكره الاسم لأنهم هم اللي اختاروه ..
طالعت فيها ناديه فتره طويله بعدين قالت: شتقصدين ..؟!
مسحت دموعها بظهر كفها وقالت: اسمي المزيف هو اسيل .. اما الحقيقي فما ادري .. لأني ببساطه ما اعرف منهم اهلي ..
ناديه: تقصدين انج يتيمه ..؟!
شهقت اسيل وهي تقول: ياليت .. ياليتني يتيمه ..
استغربت ناديه وهي تقول: عيل وشو ..؟!
طالعت اسيل فيها بعيون دامعه وقالت بضعف: لو قلتلج ما راح تتغير نضرتج لي ..؟!
ناديه: اكيد ما راح اغير نضرتي لج ..
اسيل بألم: انا .. انا لقيوني مرميه وانا طفله ..
فتحت ناديه عيونها بصدمه وهي تقول بهمس: انتي .... لقيطه ..؟!!!
نزلت دموع اسيل وبكت بصمت وهي تهز راسها بإيه ..
طالعت ناديه فيها بحزن ومدت ايدها وحضنت اسيل وهي تقول: يا قلبي عليج .. خلاص اهدئي ..
اسيل بصوت باكي: اول ما عرفت هربت .. ياليتني ما عرفت .. ياليتني ما ولدت اصلا .. ما عاد ابي شي .. ابي ارتاح وبس ..
ناديه: لا ما يصير تقولين هالحجي ..
هزت اسيل راسها وهي تقول: وليه ما اقوله ..؟! من بعد ما عرفت اني جذي تعذبت .. تعذبت وايد .. محد يبيني خلاص ابي ارتاح ..
ابتسمت ناديه وقالت: اذا الناس ما يبونج او نسيوج .. ربج فوق ما نساج يا اسيل .. ربج هو اللي بيساعدج ويوقف معاج .. ما عليج من حجي الناس مادام ربج معاج ..
طالعت اسيل في ناديه فتره فكملت ناديه كلامها وهي تقول: ربج هو اللي خلقج وما راح ينساج .. هذا ابتلاء يا اسيل ولازم تصبري عليه .. إن بعد كل عسر يسرا .. صدقيني في نهاية الامر بتلقين الفرج .. لا تبتعدي عن ربج وقوي إيمانج فيه ..
جفت دموع اسيل وهي تطالع في ناديه وفي كلامها ..
ناديه بإبتسامه: خلي ثقتج بالله كبيره .. ربج ان ابتلى عبده فهذا يعني انه يحبه .. هذا ابتلاء من الله سبحانه ولازم تصبري ..
طالعت اسيل فيها فتره طويييييييله جدا وهي تفكر في كلامها ..
بعد فتره ابتسمت وقالت: شكرا ناديه ..
ناديه بإبتسامه: العفو حياتي وخليج دووم قريبه من ربج ..
هزت اسيل راسها بهدوء ..
ناديه: اللحين وش ناويه تسوين بحياتج ..؟!
هزت اسيل كتفها بـ مآدري ..
ناديه: طيب عندج فلوس ..؟!
هزت اسيل راسها وهي تقول: ايه بس ما رضت الآله تصرفها من البنك .. وفوق هذا انا رميت بطاقتي ..
ناديه: يعني ما عندج شي ..؟!
هزت راسها تقول: لا .. سوري بس انا ما راح اقبل منج شي ..
ناديه بإبتسامه: ما شاء الله شدراج اني بقول جذي ..؟!
اسيل: .........................
ناديه: طيب شرايج تبدين حياة يديده وتشتغلين ..؟!
طالعت اسيل فيها فتره وهي تردد: اشتغل ..؟!
ناديه: تصرفي على نفسج وتكملي حياتج .. مو فكره حلوه ..؟!
طالعت فيها فتره وهي مدهوشه من كلام ناديه ..
بس لحضه شلون تشتغل وهي بدون اصل او شهاده او اوراق ..
فتحت فمها بتسأل ذا السؤال بس سبقتها ناديه تقول: اعرف بتقولين شلون اشتغل وانا ما عندي اي ورقه اقدمها لجهة العمل ..
هزت اسيل راسها بإيه ..
ناديه: مو لازم تشتغلي شغله تحتاي لأوراق .. فيه شغلات بسيطه ما تحتاي لشيء ..
اسيل: مثل وشو ..؟!
ناديه: امم مثل ..... ههه والله مدري .. لحضه ..
رفعت صوتها تنادي: صـــــــــآآري ..
عدل صاري وقفته بعد ما دخل كل نقاشهم في اذنه وهو يردد في نفسه: "التجسس عيب يا صاري .. ههه صح النوم عقب ما سمعت كل شي" ..
مد ايده بيفتح الباب بس وقف شوي بعدين قال في نفسه: "مسجينه .. الله يعينها" ..
فتح الباب ودخل يقول: اهليـــــــــن ..
طالعوا فيه فقالت اسيل: هلا .. وشكرا عالمساعده اللي امس ..
صاري: هههه عفوا .. كنت قوي صح ..؟!
اعطته اخته نظره فسكت ..
ناديه: اقول صاري نبغاك في خدمه ..
صاري: وشو ..؟!
ناديه: اسيل تبغى تشتغل بس ما معاها اوراق او ثبوتات ..
صاري: اسمج اسيل .. خساره لمن قلتي لي امس سمني بأي اسم كنت مزهب اناديج بـ ليلى .. فتصيرين ليلى وناديه الذئب هههههه ..
ابتسمت اسيل فقالت ناديه ببرود: عيل انت يدة ليلى .. العجوز ذيج تتذكرها ..
صاري بسرعه: لا لا واللي يعافيج لا .. خلاص اسحب كلامي ..
ناديه: يصير خير .. المهم ياوب على سؤالي ..
جلس صاري فوق الكومدينه الصغيره واخذ محفضة اسيل يقلبها في ايده وهو يقول: انتي من صجك ناديه تسألين هالسؤال .. ماكو شغله تخلي الواحد يشتغل من دون اثبات هويه عالاقل ..
ناديه بإحباط: يعني ماكو شي ..؟!
صاري: اكييد ماكو .. بس ....
ناديه بسرعه: بس وشو ..؟!
صاري: يمكن اتوسط لها بما اني مشهور في هالحي بعلاقاتي الاجتماعيه الجيده بين اصحاب المحلات والاسواق والمطاعم والنوادي ..
ناديه: حلو ..
صاري: هذاج انتي قلتي حلو .. عيل ليش كل يوم تخاصميني وتقولين شفيك اربع وعشرين ساعه برى البيت .. انت ريال البيت والمفروض ما تغيب عنه .. شايفه ان طلعاتي يابت فايده ..
تنهدت ناديه بعدين لفت على اسيل وقالت: وين حابه تشتغلي ..؟!
هزت اسيل كتفها وهي تقول: اي مجان ..
صاري: اسمعي شرايج محاسبه في سوبرماركت ابو عقاب ..؟!
ناديه: لا لا صاحبها واحد استغلالي ومتسلط .. وغير جذي له سوابق في السجون .. ييب شي ثاني ..
صاري: طيب عند العطار راجو .. اتذكر انه محتاج احد يهتم بترتيب المحل ..
ناديه: لا .. هذا صاحبها بنقالي ومافي غيره بالمحل .. الشغله تخوف .. غيرها ..
صاري: طيب خليني اتذكر ناس علاقتي وياهم حلوه .. اممم ايه تذكرت .. محل عفاف لبيع الملابس .. هي محتاجه لأحد يوزع الاعلانات عشان تشتهر .. شرايج ..؟!
ناديه: لا .. نبغى شغله مستقله وفي مجان واحد مو تدور في الشوارع جنها حجيه ..
صاري: ابي افهم منو اللي بيشتغل انتي ولا هي ..؟!
ناديه بحده: ييب شغل ثاني ..
صاري بتأفف: طيب ..
سكت فتره يفكر بعدين قال: لقيتها .. شغله جدا روعه .. في مشغل جواهر النسائي يبـ...
ناديه تقاطع: لاااا .. ذا المشغل بالذات لا .. صاحبته وحده مافي اخبث منها بالعالم .. الشغلات اللي قبل اهون من هالشغل ستين مره ..
صاري: عيل ما بجي مجان ..
ناديه: معليش حاول تعصر مخك ..
سكت صاري يفكر شوي بعدين قال: صاحبي ولد صاحب مطعم المعالي .. اقدر اتوسط لها هناك وكمان المجان فيها بنات يشتغلوا بس اكثرهم اجنبيات ..
ناديه بتفكير: امممم مدري بس الشغله ما دشت مخي ..
صاري: عيل ما باجي أي مجان ثاني ..
ناديه: معليش يا بابا حاول تشغل مخك اكثر ..
صاري: صدقيني ما عاد في راسي شيء ثاني ..
سكتت ناديه فتره طويله تفكر بعدين قالت: لحضه .. مو رفيجك سامر عنده اخت تمتلك مشغل خياطه ..؟!
صاري بتفكير: اييه صح .. انا شلون نسيته .. اوكي إنا راح اكلمه يتوسط لج واكيد راح يوافق ..
ناديه: ها شرايج يا اسيل ..؟!
هزت اسيل راسها تقول: طيب ..
ناديه: طيب عندج بيت تنامين فيه ..؟!
لا ما عندها .. بس هي ما تبي تقول لا ..
يكفي انها حاسه نفسها ثقيله عليهم ..
اسيل: ايه عندي ..
ناديه: عيل زهبي نفسج عشان باجر تروحي مع صاري للمشغل و.....
وكملت كلامها مع اسيل وصاري يطالع فيهم وقال في نفسه: "وحده اكتشفت انها لقيطه وهربت من اهلها .. شلون لها بيت ..؟! اشك في حجيها" ..
قلب محفضتها بإيده وهو سرحان يفكر فيها ..
صاري في نفسه: "سمعت عن اللقطاء كثير بس هذي المره الاولى اللي اشوف فيها حالتهم .. بصراحه يكسرون الخاطر" ..
ناديه: صــــــــآآري ..
صاري: ها ..
ناديه: اترك محفضة البنيه ولا تفتش فيها ..
رفع حاجبه وقال: ما فتشت .. كنت العب بس ..
اسيل: لا عادي خليه ياخذ راحته .. ما فيها شيء مهم ..
ابتسم بإستفزاز وهو يقول: سامعه ..
طالعت فيه ناديه نظرة تهديد وقالت: حسابك بعدين ..
فتح صاري المحفضه وهو يقول بلا مبالاه: راح اهرب كالعاده ..
طلع الهويه وهو يقول: عندج بطاقة احوال ..
اسيل: ايه بس اكيد بيوقفونها مثل الصراف ..
طلع بطاقة شحن وبعدها طلع ثلاث اوراق .. هذا كل اللي في المحفضه ..
طالع في الاوراق وقال: عادي اقراها ..؟!
اسيل: خذ راحتك لأني انا بنفسي ناسيه وش فيها ..
فتح الاولى وقال: هني كاتبه رقم وحاطه اسم لبنى ..
اسيل بإبتسامه: ايه هذي اللي يحبها فـ....
وقفت كلمتها فجأه وكملت بألم وهمس: فارس ..
طالعوا فيها فتره فقال صاري يغير الموضوع: وااااو روعه .. الورقه الثانيه مكتوب فيها جمله رائعه ..
طالعت اسيل فيه وقال: وش مكتوب ..؟!
صاري وهو يقرأ: خذآ من بسمتي » لمحه .♥. خذيت اسلوب » ضحكاته ..
اسيل: ايه تذكرت .. شفتها بأحدى المنتديات فكتبتها في ورقه لأنها اعجبتني ..
صاري: فعلا حلوه ..
فتح الورقه الاخيره وقعد فتره يتأملها بتفكير شوي فتح عيونه من الصدمه ..
رفع راسه يطالع في اسيل وابتسم وهو يقول: معقوله ..؟!
طالعوا فيه ناديه واسيل بإستغراب ..
رجع نضره للورقه يتأكد شوي ضحك وهو يقول: ههههه ابدا ما توقعت انج تعرفينه ..
اسيل: شتقصد ..؟!
صاري: انتي تعرفين طارق العالي صح ..؟!
عقدت اسيل حواجبها شوي تتذكر بعدين فتحت عيونها بصدمه ..
اسيل في نفسها: "لا يكون يقصد المغرور الغبي طارق ..؟!" ..
صاري: هههه فعلا هو .. مستحيل انسى خطه ..
ناديه: منو طارق ..؟!
صاري: هذا صاحبي ايام تدريبي في النادي .. كنت انا وهو وبسام من اعز الاصحاب بس بعد ما انتهينا فرقتنا الضروف والايام ..
ناديه: اها ..
صاري: فعلا مو قادر اصدق اني شفت وحده تعرف طارق ..
ناديه: ليه وش مكتوب في الورقه ..؟!
صاري: مدري .. مكتوب عنوان وتحته مكتوب بيت شهد ..
فتذكرت اسيل ان هالورقه اللي كانت في جاكيت طارق ..
ناديه: عيل شلون عرفت ان هالورقه تخص طارق رفيجك ذا ..؟!
صاري: قلت لج مستحيل انسى خطه وخصوصا في طريجة كتابة الهاء وكمان عادته اللي ما يبطلها يرسم فيس يعبر عن حالته في نفس الوقت .. هههه راسم اللحين فيس واحد طفشان ههههه مسجين ..
طالع في اسيل وقال: انتي شلون تعرفينه ..؟!
لفت وجهها وهي تقول بضيق: ما اعرف احد بهالاسم ..
صاري بإستغراب: إلا اكيد تعرفينه ولا شلون يت هالورقه في محفضتج ..
سكتت اسيل فتره طويله بعدين قالت: هالورقه ما تخصني ..
صاري باستغراب: اذا كان ما يخصج فليش في محفضتج ..؟!
اسيل بانفعال: وانا وش اللي يدريني ..؟! قلت لك ما تخصني معناته ما تخصني ..
طالع صاري فيها فتره بشك بعدين قال بخيبة امل مصطنعه: يا خساره كنت اتمنى تكوني تعرفيه .. ياللا خيرها في غيرها ..
نزل من فوق الكمدينه وقال: اوكي إنا طالع وباجر جهزي نفسج عشان نروح للمشغل ..
هزت راسها بايه وهي ساكته ..
طالع صاري فيها فتره بعدين خرج وهو يقول في نفسه: "اكيد ومتاكد انها تعرفه بس ليش تنكر" ..
وقفل باب الغرفه وراه فقالت ناديه: ياللا انا باتركج ترتاحي شوي واذا بغيتي شيء ناديني .. اوكي ..؟!
هزت راسها بايه وهي ما تزال ساكته تفكر ..

================================================== ==================

في العصر .. الساعه تقريبا خمسه ..
وقف بسام سيارته قدام فندق الشيراتون ونزل منها بهدوء ..
دخل الفندق بخطوات خفيفه جدا .. حدده تعبان ..
راسه يدور فيه من الصداع ..
وقف قدام باب المصعد وضغط الزر ..
اسند ظهره عالجدار جنب المصعد بتعب ..
دخل ايده في شعره وهو مغطي عينه بطرف ايده ويطالع فوق ..
بسام بهمس: تعبت يا سجى .. بليييز ريحيني .. بليييز قوليلي وين القاج ..
غمض عيونه وكمل بنفس الهمس: ابي اعرف .. انتي اسيل اللي بالجامعه او انج وحده ثانيه ..؟! ياوبيني يا حبيبتي .. بلييز ياوبيني وريحيني من اللي انا فيه ..
انفتح باب المصعد فابتسم بسام وهو يقول: يعني ما تبين تردين علي ..؟!
تنهد ودخل المصعد واتكى عالجدار وهو حاط ايده في جيبه ..
كل يوم يتعب اكثر من اللي قبله ..
كل يوم تضيق فيه الدنيا اكثر من قبل ..
هذا الشيء فوق طاقته ..
ليل ما ينامه مرتاح ..
اكل ما ياكل عدل ..
عقله دايم مشوش وملخبط ..
يبي يرتاح مثل باقي الناس ..
يبي الراحه ..
غمض عيونه وبدأ يغني بهمس: وفي ليالي عذابي معاك .. كنت بكلم نفسي واقول .. ديما وانا في مرار ع طول .. امتى هلاقي الحال معدول .. زي بقية خلق الله ..
تنهد وكمل: قلبتي لي حياتي يا سجى .. وينج ..؟! وين القاج ..؟! في اي حي .. في اي مجان بالضبط ..؟!
وقف المصعد وانفتح الباب ..
طالع في الباب فتره طويله وبعدها خرج واتجه ناحية جناحه ..
لمح من بعيد مصعب واقف قدام باب جناح بسام ..
تنهد وقال: يا رب ساعدني ..
جاء وقال: نعم يا مصعب .. شفيه بعد ..؟!
طالع مصعب فيه وقال: وينك ..؟! الجامعه مخلصه لها اكثر من ثلاث ساعات .. لا يكون تدرس مسائي بعد ..؟!
بسام بهدوء: كان عندي شغله ضروريه .. ها عندك سؤال ثاني ..؟!
مصعب: وش هالشغله الضروريه اللي ما جت غير اليوم ..؟!
بسام: شغله خاصه ..
مصعب: شغلاتك ما تخلص ..؟!
بسام: لا ما تخلص .. بليييز انا متضايق فأبعد عني ..
مصعب: وش هو اللي مضايقك ..؟!
بسام بإنفعال: مصعب ابعد .. لصبري نهايه ..
رفع مصعب حاجبه وقال: اوووه متضايق وبقووه .. لا يكون قاتل لك قتيل ..؟! حبيبي بسام قولي ولا تخاف .. صدقني راح اساعدك على تسليم نفسك للمخفر ..
طلع بسام مفتاحه وابعد مصعب بحركه حاده ودخل للجناح ..
مصعب بعصبيه: هين يا بساموه .. هذا يزاتي اهتم فيك وفي ادق امورك .. انا اراويك ..
اسند بسام ظهره عالباب وجلس بهدوء ..
دخل بسام اياديه في شعره وهو يغطي على اذنه بقوه ومغمض عيونه يتذكر اللي صار اليوم ..

:::::::::::::::::::::::::::::::::::::::::::::::::: ::::::::::
بسام: لو سمحت البنت اللي في كلاسكم واسمها اسيل وينها ..؟!
الطالب: هههههه مدري عنها .. بس اكيد هاربه من سواد ويهها ..
:::::::::::::::::::::::::::::::::::::::::::::::::: ::::::::::
طالعة الطالبه في بسام وهي تقول: اسيل ..؟!
بسام: ايوه .. ابي اعرف وش مواصفاتها ..؟!
الطالبه: اممم شعرها شوي قصير واسود وبشرتها بيضا .. هههه باين ان اهلها اجانب لأن لون عيونها خطيير ..
:::::::::::::::::::::::::::::::::::::::::::::::::: ::::::::::

بسام بهمس: هذا اللي قدرت اعرفه عن اسيل .. لها غايبه فتره طويله ولون عيونها غير .. فيه احتمال كبير تكون هي سجى ..
فتح عيونه بهدوء وقال: لازم اسأل اكثر .. بس ليش بعض الطلبه يستخفون بالسالفه ويسبوها ..؟! مو هي كانت رفيجتهم ..؟! لهدرجه قلوبهم مافيها رحمه ..؟!
جت راما وقالت: بسام انتا ليش يجلس هنا .. جلوس على سيراميك مو كويس .. ياللا قوم ..
رفع بسام راسه وطالع فيها شوي بعدين مد ايده وقال: اسحبيني ..
مسكت ايده وسحبته فوقف وراح لجهة غرفته ..
راما: بسام انتا ....
قاطعها يقول: بلييز مابي ازعاج .. خليني بحالي ..
دخل الغرفه وقفل الباب وراه ..
راما: هدا سجى سبب مشكل كبير ..
جلست عالكنبه واخذت جوالها تتصل بأهلها في اندونيسيا ..
رمى بسام نفسه بطريقه عشوائيه على السرير وتنهد تنهيده طوييييله ..
قعد فتره طويله ساكت شوي ابتسم وقال: اشتقت لأمي ..
دخل ايده في جيبه وطلع جواله ..
نزل على رقم امه بس .. بس تردد ..
دق عالرقم وهو يتجاهل التردد ..
"ان الهاتف المطلوب مغلق الرجاء الاتصال في وقت لاحق"

تأفف وقفل واتصل بمدير اعماله ..
شوي رد وقال: اهلا بسيدي طويل العمر ..
بسام: اهلين مروان .. اقول مروان امي كيفها ..؟!
مروان: ما اخفي عليك الوالده طويلة العمر حالتها في تدهور ملحوظ .. وعشان اكون صريح اكثر هي حاليا منومه في المستشفى ..
بسام بصدمه: شنـــــــــو ..؟؟!! شـ شـ شــلون منومه ..؟! اكيد تمزح ..
مروان: آسف سيدي بس هذي هي الحقيقه .. حاولنا الاتصال بك اكثر من مره بس هي رفضت .. تقول خلوا ولدي براحته ولا تزعجوه ..
قفل بسام التلفون في وجهه وقام بسرعه من فوق السرير وفتح الدرج يطلع جواز سفره ..
راح يسافر لها ..
وبالصدفه طاحت عيونه على صورة اسيل ..
رفع الصوره وطالع فيها فتره ..
طالع في ملامح وجهها ..
طالع في عيونها الرصاصيه ..
شسالفه .. مخه اضطرب بقوه ومو قادر يفهم ليش انصدم اول ما شاف عيونها وملامحها ..
ايييه انصدم بس عقله مشوش ومو عارف ليش انصدم ..
مو قادر يفسر السبب ..
اخذ الصوره بسرعه واخذ كرت الجواز وخرج من الغرفه وتفكيره كله في امه ..
صحيح هي غلطت بس مهما كان فهي ما تزال امه ..
اغلى شي في الدنيا ..
مر من عند راما وهو يقول: انا بسافر .. انتظريني هني ..
خرج من الباب وراما توها تستوعب السالفه ..
اول ما خرج شاف في وجهه مصعب ..
تأفف بصوت مسموع وراح ..
مصعب: ليش معاك جواز سفر ..؟! لا يكون ناوي تدفن الجثه في رمال اهرامات مصر عشان اذا اكتشفوها يقولون انها احد الآثار .. صج انك اخبث واحد قابلته بحياتي ..
ركب بسام المصعد وهو يقول لنفسه: وانت ألقف واحد قابلته بحياتي ..
بعدها راح المطار وحجز له على اقرب طياره لأمه ..