شبكة همس الشوق - عرض مشاركة واحدة

12 - 3 - 2014, 12:26 AM

عند المدير ابو وسن ..
توه وصل وعلق البشت حقه وجلس على كرسيه ..
دخل الدكتور مسفر في هالوقت وقدم اوراق للمدير ..
د.مسفر: هذي بعض اوراق المتخرجين خلصنا منها وناقصها الختم بس ..
اخذ المدير الاوراق يطالع فيها فقال: مسفر انت تدرس سنه اولى ..؟!
د.مسفر: لا ..
المدير: طيب وانت رايح قول للدكتور تركي ييب لي طالب اسمه ناصر في كلاس بنتي وسن ..
د.مسفر: يعني وصلتك الاشاعه ..؟!
طالع المدير فيه وقال: لا تقول انـ...
د.مسفر: ايوه ياني الصباح طالب في مكتبي عشان يبلغ عن هالاشاعه وكل الدكاتره اللي في مكتبي عرفوا .. كنت توني حأخبرك عشان تاخذ الاجراء المناسب لهالطالب ..
المدير بقهر: ما اصدق انه فيه طلاب وقحين لهدرجه في جامعتي ..
د.مسفر: طيب اللحين راح اقول للدكتور تركي ييب هالطالب لك ..
المدير: اوكي ..
خرج الدكتور مسفر واتجه لمكتب الدكتور تركي ..
في الطريق قابله وهو رايح لمحاضرته ..
د.مسفر: اهلييين تركي .. كيف احوالك ..؟!
وقف الدكتور تركي وقال: يا هلا .. الحمد لله تمام ..
وتصافحوا فقال الدكتور مسفر: رايح تعطي محاضره ..؟!
د.تركي: اكيييد .. ما تشوف الكتب اللي شايلها ..
د.مسفر: طيب اسمع .. المدير طلب مني اقولك تييب له طالب اسمه ناصر في كلاس بنته .. تعرفه ..؟!
د.تركي: ناصر .. ايه اكيد اعرفه .. بس ليه يبغاه ..؟!
د.مسفر: الطالب هذا انشر اشاعه عن احد الطالبات وعشان جذي المدير بياخذ الاجراء المناسب ضده ..
د.تركي: الله يهديه .. المفروض ما يسوي جذي .. ان شاء الله اللحين اييبه ..
د.مسفر: عيل مع السلامه ..
د.تركي: مع السلامه ..
راح الدكتور تركي متجه ناحية كلاس ناصر ووسن والبقيه ..
دخل وقال: السلام عليكم ..
الطلاب: وعليكم السلام ورحمة الله وبركاته ..
حط اغراضه عالمكتب ولف ناحية ناصر وقال: ناصر المدير يبغاك ..
كـــــــــل الطلبه لفوا ناحية ناصر وبدأوا يتهامسون مع بعض ..
وسن: يستاهل .. انا علمت بابي عليه عشان يضربه ..
لين: كفو يا بنت عبد الجبار .. بردتي قلبي وايد ..
طالعت وسن فيها فتره بإنبهار وقالت: وااااو حلوه كلمة كفو .. من فين طلعتيها ..؟!
ندى: ههه يا حبيبتي هذي كلمه معروفه ..
وسن: بس مررآ حلوآ .. تيب وش معناها ..؟!
ضربت لين إيدها بوجهها وهي تقول بإحباط: بنت مو طبيعيه ..
طالعت في وسن وقالت: بالله عليج في واحد في العالم العربي ما يعرف وش يعني كفو ..؟!
طالعت وسن فيها بعدين طالعت في ندى وقالت بإحراج: خلاص عرفتو ..
وكملت في نفسها: "يا ربييه ليه فيه اشياء كثيره ما اعرفها ..؟! بس المهم ان كفو هدي اعجبتني" ..
قام ناصر وقال: اوكي انا رايح ..
لين بصوت مسموع: روحه بلا رده ..
طالع الدكتور تركي فيها بإستغراب وقال بعتاب: لييين وبعديين ..؟!
ناصر: هههههه مقهوره ..
لين بإنفعال: جـــــــــب .. ان شاء الله يفصلونك عشان بعدين تعرف حدودك .. حققييير ..
د.تركي بحده: ليـــــــــن ..
لفت لين عليه وقالت بقهر: دكتور لا تهاوشني .. قاهرني وابي ابرد قلبي .. غبي ليش يقول عن اسيل كذا ..؟!
د.تركي بإستغراب: اسيل ..؟!
طالع في ناصر وقال: شنوع الاشاعه اللي طلعتها ..؟!
ناصر ببرود: قلت ان اسيل طلعت لقيطه وانا ما غلطت لأنها فعلا طلعت لقيطه وعشان جذي غايبه اكثر من اسبوعين ..
فتح الدكتور تركي عيونه بصدمه وهو يقول: اسيل ..؟!!!!!
ناصر: ايوه ..
طالع الدكتور فيه بصدمه وهو يقلب السالفه في راسه ..
شلوون اسيل لقيطه ..؟!
طيب ليش وكيف ومن متى ..؟!
مو قادر يستوعب ابدا ..
حرك ناصر ايده وهو يقول: باي ..
وطلع من الكلاس والدكتور ما زال في صدمته ..
لف عالطلاب وقال: الاشاعه ذي صحيحه ولا غلط ..؟!
واحد من الطلبه: صحيحه يا دكتور ..
فهز الدكتور راسه بعدم تصديق ..

.................................................. .............

اما عن ناصر فأتجه لغرفة المدير وهو يقول: اوووف مسرع وصلت السالفه للمدير .. اكيد بنته هي اللي خبرته ..
دق الباب فسمع المدير يقول: ادخل ..
دخل ناصر وقفل الباب وراه وقال: انت طلبتني ..
ترك المدير الاوراق وقال: انت ناصر ..؟!
ناصر: ايوه ..
المدير بحده: عيل انت اللي نشر الاشاعه عن الطالبه اسيل ..
ناصر ببجاحه: ايه انا ..
المدير: وبكل وقاحه تعترف .. ممكن اعرف ليش صلحت جذي ..؟!
ناصر: ماكو سبب .. سمعت الخبر ونشرته .. تقدر تقول طيش مراهق .. آسف ..
المدير: وبكل بساطه آسف .. انت تحسب ان الامر هين ..؟!! اللي ساويته لا يمت للاخلاق والآدب بصله .. انت حطيت البنت في موقف حرج جدا .. انت شوهت سمعتها يا استاذ .. الاجراء اللي حيتأخذ ضدك بيكون صارم ..
ناصر في نفسه: "اووووف .. شذي الورطه" ..
المدير: ليه ساكت ..؟! تحجى وقول شهالسبب اللي خلاك تسوي جذي ..؟!
ناصر: كانت لحضة طيش ..
المدير بحده: ناصـــــــر ياوب عدل ..
سكت ناصر وهو حاس بالورطه اللي هو فيها ..
يبي يطلع نفسه بأي طريقه لأن اللي سواه مو شوي ابدا ..
طالع في المدير اللي ينتظر جوابه فتره بعدين قال: هي تحدتني اسوي جذي ..
عقد المدير حواجبه وهو يقول: وشو ..؟!
ناصر: انا ما صلحت كل هذا إلا لمن تحدتني .. قالت اتحداك تطلع اشاعه عني وتكتب اسمك كمان فرفضت فقالت انت جبان ومن هالكلام فأضطريت اوافق ..
طالع المدير فيه فتره بعدين قال: ناصر .. اللي جدامك مدير مو بزر عشان تضحك عليه بجذبه مكشوفه ..
عض ناصر على شفته بعدين قال بإنفعال: احسسن تستاهل .. لو فيه اكثر من جذي جان سويته بعد .. وحده مثلها تستاهل كل اللي يصير لها عشان تعرف منهو ناصر وما تمد إيدها ولسانها مره ثانيه ..
المدير بعصبيه: جـــــــــب قصر حسك ولا ترفع صوتك عالمدير .. عشان سبب تافه زي جذي تشوه سمعتها جدام كل الطلاب واصدقائها ومعلميها .. عقلك صغير جدا وانا بصراحه استغني عن وجود امثالك في جامعتي .. خذ ملفك وانقلع لجامعه ثانيه قبل لا افصلك انا واحرمك هالكورس ..
عصصب ناصر وقال بضبط اعصاب: حاضر .. حتى انا مستغني عن جامعه تافهه مثل ذي ..
المدير بحده: اخرج برى عن ويهي ..
خرج ناصر وصفق الباب بقووه وراه ..
ناصر: كله من ورى راسج يا اسيلوووه .. حمـــــــــاره ..

اخذ المدير كوب مويه يهدي شوي من انفعاله ..
المدير: المفروض اكون اهدئ من جذي .. بس هالولد احرق لي اعصابي ويستاهل ما جاله ..

================================================== ==================

الساعه وحده الظهر ..
وقف سيارته وقال: وصلنا ..
طالعت من شباك السياره وقالت: هنا مجان شغلها ..؟!
هز راسه وهو يقول: ايه .. هي لها فرعين .. مشغل ومحل لبيع الملابس .. انتي قابليها واطلبي الشغله اللي تناسبج ..
هزت راسها بإيه وهي تطالع في المشغل من الخارج وهي سرحانه ..
تردد شوي بعدين قال: اسيل ..
لفت عليه وقالت: نعم ..
سكت صاري شوي بعدين قال: اممم مدري وش اقول بالضبط لأني بصراحه ما اعرف ارتب كلمات .. اللي في بالي اقوله حتى لو كان ملخبط ..
سكت مره ثانيه واسيل تنتظره يتكلم فقال: هو انتي كنتي صاجه لمن قلتي عندج بيت ولا لا ..؟! مدري بس احساسي يقول انج جذبتي علينا فذي السالفه ..
طالعت اسيل فيه فتره طويله بعدين نزلت من السياره وهي تقول: مالك شغل .. خلنا نقابل مديرة هالمشغل ..
تنهد ونزل من السياره وهو يقول في نفسه: "مالك شغل .. ياهي سكتتني تسكيته قويه .. بس هذا دليل انها جذابه" ..
دخلوا المشغل وقابلوا السكرتيره اللي اول ما عرفت مين هم دخلتهم على مكتب المديره مرام ..
دخلوا وقال صاري: اهليين ..
نزلت مرام النظاره الطبيه وقالت: اهليين ذي مو مويوده في لغتنا العربيه يا صاري ..
لقط صاري وجهه وهو يقول: السلام عليكم ..
مرام: وعليكم السلام ..
لفت على اسيل وقالت: هذي البنت اللي كلمت اخوي عنها ..؟!
صاري: ايوه .. اسمها اسيل ..
طالعت مرام في اسيل نظره متفحصه بعدها قالت: اسمعي يا اسيل .. انا اهم شي عندي بالحياه هو النظام .. يعني مو اي واحد اشغله .. لازم يكون عنده الخبره وشهاده جامعيه وشهادة حسن سيره وسلوك وسمعه طيبه .. يعني انتي المفروض ما اشغلج ..
طالعت اسيل فيها وهي تقول في نفسها: "من اولها بتذلني" ..
مرام: بس عشان خاطر اخوي ورفيجه صاري انا راح اشغلج من دون هالاشياء كلها .. لا شهاده ولا خبره يكفيني بس اثبات الهويه .. انا وثقت فيج واتمنى تكوني قد الثقه ذي ..
هزت اسيل راسها بإيه ..
مرام: طيب اسمعيني .. في هالمشغل شغلنا كله عن الخياطه والتطريز والتصاميم وغيره .. عندج خبره بهالاشياء ..؟!
اسيل: لا .. كنت اكره الخياطه بكل شي ..
مرام: عيل ما تنفعي تشتغلي هنا .. طيب انا عندي محل في احد الاسواق المشهوره ابيع فيه الملابس اللي نصممها .. راح تشتغلي هناك كمساعده للمحاسب .. اوكي ..؟!
اسيل: طيب ..
لبست مرام نظارتها وقالت: خلال فترة شغلج لازم تحذري من ثلاث اشياء .. السرقه والخداع والنصب .. إياني وإياج تقعدي تلفي وتدوري من هنا او من هناك .. اقسم بالله وقتها ما راح ارحمج ابدا .. فاهمه ..؟!
اسيل بهدوء: فاهمه ..
مرام: هات هويتج ..
اعطتها اسيل بطاقتها وبدأت مرام تكتب في الدفتر حقها ..
اسيل: لو سمحتي ..
مرام: نعم ..
اسيل بتردد: انا ابغى راتبي كاش لأنه ما عندي حساب بالبنك ..
مرام: عادي افتحي لج حساب ..
نزلت اسيل راسها وقالت: ما اقدر .. عندي ضروف خاصه ..
طالعت مرام فيها فتره طويله بعدين طالعت في صاري اللي ابتسم وهو يأشر لها انها توافق ..
مرام بتنهيده: اوكي ..
رجعت لأسيل بطاقتها وقالت: خلاص تقدري تبدأي شغلج من اليوم .. راح يبدأ شغلج من الساعه خمسه العصر لين ١٢ منتصف الليل وراتبج 1000 في الشهر .. موافقه ..؟!
صاري في نفسه: "مو كأن فترة شغلها طويله" ..؟!
اسيل: ايه موافقه ..
مرام: بجذي اتفقنا .. انت يا صاري تعرف مجان المحل فروح وصلها عشان المحاسب اللي هناك يعلمها شلون راح تشتغل ..
صاري: طيب .. مع السلامه ..
خرج هو واسيل وركبوا السياره ..
شغلها صاري واتجه لمحل مرام الموجود في احد الاسواق الكبيره المشهوره ..
طول الطريق كانوا ساكتين وهادين ..
صاري تفكيره كله كان في اسيل ..
واسيل تفكيرها كله كان في حالتها ..
تنهدت بصوت مسموع فقال صاري: شفيج ..؟!
هزت راسها بـ مافي شي ولفت عالشباك تطالع في الطريق ..
اسيل في نفسها: "بأشتغل وأجمع فلوس وأستأجر لي شقه واعيش" ..
سكتت شوي وكملت في نفسها: "يمه .. ابوي .. انا مو بحاجتكم ابدا .. حتى كلمة يمه خساره فيج يا امي .. حتى كلمة ابوي خساره فيك يا يبه .. انتم ما تبوني .. انا بعد ما ابيكم" ..
خنقتها العبره وكملت: "مو محتاجه لكم .. ما ابي حنانكم ولا اهتمامكم ولا ابتسامتكم ولا حبكم لي" ..
نزلت دموعها وهي تردد هالكلمات داخلها بكذب ..
هي محتاجه للحنان والاهتمام والحب ..
بس خلاص ما تبي هالاشياء ان كانت من طرف اي احد يقرب لها ..
لف صاري نظره لها وقال في نفسه: "حرام .. مسجينه" ..
طالع لقدام وهو يصلح نفسه ما شافها ..
مسحت دموعها بكم معطفها وهي تحاول تتناسى مشكلتها ..
طالعت في ساعتها اللي كانت هديه من آرثر ..
ارتجفت شفايفها وقالت بهمس وضعف: ما راح انساك ..
غمضت عيونها بألم وهي تتذكر ايامها معاه وكلامه وابتسامته وكل شي خاص فيه مر في بالها الآن ..

اخذت نفس عميييق وبدأت تهديء نفسها ..
وقف صاري قدام السوق وقال: وصلنا ..
فتحت اسيل عيونها وطالعت في السوق فتره بعدين قالت: صاري ..
صاري: هلا ..
اسيل بهدوء: شكرا لك ولاختك على كل شيء .. ساعدتوني وكنتم لي مثل الاهل واكثر .. اللحين وصلني للمحل وبعدها تقدر ترجع لبيتك ومن بعدها تصرف وكأنك ما تعرفني ..
ابتسم صاري وقال: كنت حاس انك بتقولي هالكلام .. اسمعيني يا اسيل .. من الان اعتبريني مثل الاخو وراح اساعدج حتى لو كنتي رافضه .. كل يوم راح اوصلج لشغلج وارجعك لبيتج .. اوكي ..؟!
اسيل: لا .. ورجاءا لا تتدخل في خصوصيات الاخرين ..
ونزلت من السياره فتنهد ونزل وراها ..
مشيوا وبعد فتره وصلوا للمحل ..
طالعت اسيل في المحل شوي بعدين لفت على صاري وقالت: شكرا .. مع السلامه ..
صاري: اوكي مع السلامه بس تراني راجع الساعه 12 اوكي ..؟!
لف وراح واسيل تتابعه بنضراتها وهي تفكر ..
دخلت المحل وراحت للمحاسب وقالت: السلام عليكم ..
طالع المحاسب فيها وقال بابتسامه: وعليكم السلام .. يا هلا والله .. شرفتي محلنا ياعسل ..
اسيل: انا اسمي اسيل وارسلتني مرام اشتغل هنا ..
طالع فيها فتره طويله بعدين ابتسم وقال: ايه قالتلي صاحبة المحل قبل شوي انه بتيي وحده تشتغل بس ابدا ما توقعت ان هالوحده تمتلك كل هالجمال ..
طالعت اسيل فيه وهي تقول في نفسها: "لا .. لا .. ان شاء الله ما يكون من هالنوعيه من الناس .. يا رب انا مو ناقصه مشاكل" ..
تكى بإيده عالمكتب ومال شوي ناحيتها وقال: جم عمرج يا قمر ..؟!
اخذت نفس وهي تقول في نفسها: "ان شاء الله يكون هذا ميرد فضول مو اكثر من جذا" ..
اسيل: ١٩ سنه ..
صفر وقال: نايس .. شيء حلو ان وحده بمثل عمرج وجمالج تشتغل معاي .. بجد وناسه ..
ما قدرت تتحمل كلامه فلفت عشان تبعد بس قال بحده: اسيـــــــــل ..
وقفت ولفت تطالع فيه فقال بتهديد: انا هنا الكل في الكل .. اللي يسافهني او يعاندني اندمه .. فاهمه ..؟!
هزت راسها بلا وهي تقول في نفسها: "مستحيل .. كافي اللي فيني مو ناقصه مشاكل .. يا رب ساعدني" ..

** خالد حمدان .. عمره ٢٥ سنه .. ملامحه وجهه حاده وتدل على الخبث الشديد .. قاسي ونذل وقمه في الخبث والمكر .. ذكي جدا وعنده اساليب ملتويه يستخدمها دايما في الحصول على اللي يبغاه **

================================================== ==================