شبكة همس الشوق - عرض مشاركة واحدة

12 - 3 - 2014, 07:38 PM

في عصر يوم الجمعه ..
كانت وسن في غرفتها تبدل هدومها بعد ما صلحت لها مربيتها شعرها ..
وقفت قدام المرايه تطالع في نفسها ..
دارت حول نفسها وهي تقول: ونااسسه .. اليووم بيكون حلو ..
اخذت جوالها ونزلت من الدرج بحماس ..
شافت ابوها جالس في الصاله ومعاه اوراق يعدلها ويوقعها ..
وسن: بابي وش تسوي ..؟!
ابتسم ابوها وقال: اوراق وملفات جامعيه اطلع عليها ..
وسن: بابي بابي اسمع وش بأقولك ..
عدلت نفسها وقالت بنبره جاده: كفو والله يا بابي ..
ضحك ابوها على لكنتها الغريبه في نطقها ..
وسن: ها شرايك في كلمة كفو ..؟! تعلمتها من رفيجتي لين ..
الاب: هههه حلوه .. خليج دايم معها يمكن تعدل لهجتج شوي ..
عقدت حواجبها اشاره الى انها ما فهمت عليه فقالت: تيب بأقعد معاها ..
الاب: ههه طيب اللحين وين رايحه ..؟!
وسن: بنروح انا ولين وندى وامل لبيت لبنى .. عندنا بحث جماعي لازم نصلحه اليوم ..
الاب: آها .. موفقه ان شاء الله ..
وسن: باااي بابي ..
الاب: باي يا عيون بابا ..
اخذت وسن اوراقها اللي كانت فوق الدولاب وخرجت من البيت ..
ركبت السياره واتجهت لبيت لبنى لأنهم اتفقوا يتجمعون عندها ..
بعد ثلث ساعه وصلت ونزلت من السياره وقالت للسايق: تعال خذني الساعه ثمانيه تيب ..؟!
السايق: طيب ماما ..
راحت للباب ودقت الجرس ..
شوي فتح بدر الباب وقال: اهليين ..
وسن: اهليين .. هذا بيت لبنى صح ..؟!
بدر: ايوه صح .. منو اقولها ..؟!
وسن: انا رفيجتها ..
بدر: تمزحين ..!!
وسن: لا ما امزح ..
بدر بإستغراب وهو يطالع في شكلها وقال: مستحيل تكونين وحده جامعيه ..
وسن بتأفف: بتنادي لي لبنى ولا شلون ..
بدر: اخسس تهددين .. بأناديها مع اني مو مصدق ابدا انج اكبر مني بسنتين ..
وسن: ياليت بسسرعه ..
رفع حواجبه يطالع فيها بعدين قال: اوكي ..
دخل ودق باب الغرفه اللي فيها لبنى وصاحباتها ..
فتح الباب وقال: لبنى تعالي شوي ..
قامت لبنى من عندهم وجت عن الباب وقالت: شو فيه ..؟!
بدر: فيه وحده اقصر مني وشكلها شكل وحده في الاعدادي او بداية الثانوي تقول انها رفيجتج ..
لبنى: هههه اكيد هادي وسونه ..
بدر: طيب بأسألج .. هي من جد رفيجتج ..؟!
لبنى: ايه طبعا ..
بدر بإستنكار: ذي البزره اكبر مني ..؟!
لبنى: هههه ايوه ..
بدر بصدمه: توني حسيت نفسي اني صغير بزياده .. اووه مااي قاد ..
وراح فقالت لبنى: بدر وقف شوي ..
لف بدر عليها وقال: نعم ..
لبنى: على وين رايح ..؟!
بدر: بأطلع برى .. عندي شغله بأتأكد منها وراجع ..
لبنى: شو هي هالشغله ..؟!
بدر: شغله تخص واحد نعرفه اسمه جراح ..
لبنى: آها .. اوكي مع السلامه ..
بدر: مع السلامه ..
خرج بدر من الباب الخلفي عشان سيارته موفقه ورى ..
راحت لبنى وفتحت الباب لوسن ..
لبنى: اهلين وسن ..
وسن: هلا ..
وسلمت عليها بعدين قالت: ادخلي .. انتي آخر وحده إجيتي ..
وسن: خسساره كنت ابي اكون اول وحده ..
لبنى: هههه مره تانيه ان شاء الله ..
دخلت وسن واتجهت هي ولبنى للغرفه اللي فيها ندى ولين وامل صاحبة لبنى ..
دخلوا وبعد السلام جلسوا ..
ندى: سمعوا .. الدكتوره نوال طلبت ....
قاطعتها وسن: نوال الشريرا .. اكرهها ..
لين: يب يب .. ترفع الضغط ..
ندى: هذا مو وقت مشاعركم .. خلونا نخلص البحث لأنه وايد صعب ..
وسن: خلاص آخر مره ..
ندى: هي طلبت بحث عن قضيه من قضايا المجتمع .. طلبت اننا نلم بالقضيه بكل جوانبها .. ما نترك جانب ما تكلمنا عنه ..
امل: وتقول انها تبيه اكثر من عشرين ورقه ..
وسن: ايه لأنها شريرا ..
ندى: وسن اهجدي ..
وسن: تيب ..
ندى: واللحين اول شيء نسويه اننا نييب قضيه وتكون مميزه وغير مكرره .. ياللا منو عندها قضيه حلوه وتناسب ..؟!
لبنى: اممم فيه قضية المخدرات ..
لين: او الارهاب ..
امل: او التفحيط ..
ندى: حلوه بس معروفه .. ما سمعتم شلون تهدد وتقول ابيها غيير ومميزه ومو من القضايا المعروفه والروتينيه ..
لين بقهر: عمى بشكلها ..
وسن: فعلا .. مررآ شريرا ..
ندى: فكروا في شيء مو كثير الناس يتكلمون عنه ..
رفعت وسن ايدها وهي تقول: انا انا .. انا عندي قضيه مو معروفه ..
لين بهدوء: الله يستر ..
ندى: وش هي ..؟!
وسن بحماس: قضية عن الناس اللي ياكلون العلك وبعد ما يخلصونه يحطونه في الطاوله بدل الزباله ..
حطت لين ايدها على راس وسن وهي تقول: يا حليلج عندج ذكاء يوازي بلد .. ربي يحفضج ويحميج ان شاء الله ويرد لج عقلج المفقود اللي مدري وين ضيعتيه بس شاكه انه انربط مع الحبل السري ببطن امج .. الله يعينج ..
امل: ههههه حرام عليج يا لين ..
وسن بعصبيه: ليين يا حوماره اسكتي .. انتي غبيه وايد .. هادي فكره مررآ حلوه بس انتي اللي ضيعتي عقلج ..
ندى: هي فكره حلوه بس ما تنفع كقضيه يا حبيبتي .. فكري عدل ..
وسن: تيب ..
لبنى: طيب شو رايكم بقضية التزوير ..؟!
ندى: حلوه بس خايفه ان الدكتوره ما ترضى .. التزوير شيء منتشر ومعروف ..
لين: طيب قضية الطلاق ..؟! اعرف اعرف منتشره .. اسحب كلامي ..
ندى: ما دامج بتسحبينه في نفس اللحضه ليش قلتيه ..؟!
لين: ماكو سبب ..
امل: امم وش رايكم في قضية الاخطاء الطبيه ..؟!
ندى: اممم معروفه ..
لين: طيب قضية الارث ..؟!
ندى: كمان معروفه ..
تكتفت لين وقالت: عيل ليه ما تييبين انتي قضيه ..؟! كل ما قلنا شيء قلتي معروفه .. اتحفينا بقضاياج ..
هزت ندى كتفها وهي تقول: مدري .. احسها كلها معروفه ..
لبنى: طيب شو رايكم بقضية الاختلاس ..؟!
ندى: الجماعه اللي كانوا ورانا سمعتهم انهم راح يكتبوا عن هالقضيه ..
لبنى: خساره ..
وسن بحماس: بنات بنات عندي قضيه ختيييره ..
لين: هههه وش هي هالختييره ..؟!
وسن: قضيه عن الناس اللي دايما يقولون يارب يي مطر .. واذا ياء ينخشون بالبيت ..
لين: هههه ونعم القضيه .. يا حبيبتي روحي استردي عقلج بعدين تعالي تحجي ..
بوزت وسن شفتها وهي تقول: ليه مو حلوه ..؟!
ندى: ما تنفع يا حبيبتي ..
امل: عليج افكار خطيره يا وسن ..
لين: ايه فعلا بسم الله عليها ..
ندى: وبعدين انتي وياها .. شوفوا جم مر من الوقت واحنا ما طلعنا القضيه لحد الآن ..
لبنى: طيب فيه قضية العنف الاسري ..
لين: او الثأر ..
امل: او الجمارك ..
ندى: كلها تمام بس معروفه جدا وكثير يتكلمون عنها في المقالات والجرايد ..
وسن: والله العظيم عندي قضيه مرره حلوه ..
ندى: وش هي ..؟!
وسن: قضية القو ... اقصد الميقـ... لا الداقـ...
عقدوا حواجبهم يطالعون فيها وهي تحاول تتذكر الاسم ..
وسن: الطيمـ ... الطاقـ... القونطـ... يوووه اسمها في بالي بس صعب انطقها ..
ندى: طيب حاولي ..
وسن: رايمـ... قيمـ... القوناطيـ... لا لا الناديقرطـ... يووه قربت ..
عقدت حواجبها بقوه بعدها قالت بسرعه: الديمقراطيه .. عرفتها ..
لين وامل: ههههههههههههههههههه ..
ابتسمت لبنى وقالت ندى: هذي القضيه سياسيه واكثر القضايا انتشارا .. مرره معروفه ..
لين: يا زين عقلج .. والله يونس ..
وسن: انت شفيج في كل كلامج تتحجي عن عقلي .. شكلج غيرانا ..
لين: أمممآ غيرانه عاد .. كثري منها ..
وسن: انتي وحده وقحه .. مدري شلون بابي يحبج ..
لين بحماس: وش قال ابوج عني ..؟!
وسن: امم اليوم قلت له كفو فضحك وقال من علمج فقلت لين ..
لين: ايه وبعدين ..؟!
وسن: قال خليج معاج يمكن تعدلج .. ما فهمت وش يقصد فقلت تيب ..
امل: هههه يقصد يمكن تقدر تشيل عنج شوية النعومه الزايده اللي عندج ..
وسن بتفكير: ما فهمت ..
لين: خلاص مو لازم تفهمين لأن ....
قاطعتها وسن تقول: اكيد بتقولي لأن عقلج مو مويود صح..؟!
امل: ههههههه ..
لين: ههههه صايره ذكيه .. افا رجع لج عقلج وما عزمتيني عالحفله ..
وسن: ها ها ترى ما تعرفي تضحكي يالبهلوانيه ..
لين: ههههه اعجبتني بهلوانيه ذي ..
ندى بتأفف: وبعديين معاكم .. لنا ساعه ونص ولحد الآن ما يبنا قضيه .. ترى باجي لنا الكثير ..
لين: طيب شرايكم بقضية البنات المفقود عقلهن منهن هههه ..؟!
امل: هههه خوش قضيه ..
ندى: بطلوا هبل .. ترى اللي طلب البحث هو الدكتوره نوال مو احد ثاني ..
لين: ايه صح خلونا نفكر بجد .. ذي ما ترحم ..
وسن: شرايكم بقضية الدكتورات الحيوانين اللي يعطون الطلاب بحث معقد ..
صلحت لين بإيدها اشارة الاوكي وهي تقول: خوش بحث .. كفو يا بنت عبد الجبار .. منجد بنعطيها بويهها عشان تعرف ان الله حق ..
لبنى: اووه بهيك راح تعصب كتير ..
لين: احسن تستاهل هالجباره .. عليها بحوث صعبه بطريجه مب طبيعيه ..
ندى: ابي افهم جم مره بأقولكم بطلوا هبل ..؟!
لين: بس البحث اللي قالته وسن اعجبني ..
ندى: لييين وبعدييين ..؟!!
لين: اوكي ..
امل: طيب يكون البحث عن التستر التجاري ..
ندى: حلو بس هذا كان احد الامثله اللي قالتها الدكتوره .. يعني ما ينفع ..
لبنى: طيب عن النقد الادبي ..؟!
ندى: ما ينفع لأن الدكتوره نفسها ناقده ادبيه .. يمكن تعصب ..
لين: طيب الجاسوسيه والخلع والهيئه والشيكات بدون رصيد والنفقه .. يبت لكم خيارات واختاروا ..
لبنى: ما بضن فيهن شي بينفع ..
ندى: فعلا ..
لين: عيل مع نفسكم ..
امل: طيب قضية الاسكان او المعلمين ..
ندى: اممم ما تنفع ..
لبنى: طيب شو رايكم بهالقضيه .. قضية الهكر ..؟!
طالعوا فيها فقالت ندى: اممم مناسبه ..
لين بإرتياح: واخيرا ..
امل: ما بغينا ..
وسن: وش يعني هكر ..؟!
تنهدت لين وقالت: حان وقت الاسئله السخيفه والاجابات الاسخف .. اسمعي حبيبتي .. هكر يعني واحد يدخل مثلا من حاسوبه على كمبيوترج ويسرق كل اللي فيه ويخليج ما تقدرين تسوي شيء باللاب ابدا ..
وسن: مو حلو .. هذا شرير ..
لين: اهم شيء وصلت المعلومه وبس ..
ندى: اللحين نبدأ نتكلم عن القضيه بكل نواحيها .. اضرارها واسبابها وفوائدها ومين اللي انتجها واشهر المهكرين بالعالم وقصص من الحياه عن التهكير واشياء زي جذي ..
لين بتأفف: الله يعين .. ورانا عشرين صفحه لازم نخلصها اللحين ..
ندى: اللحين راح ابدأ انا ابحث بالانترنت عن اضرارها وانتي يا امل عن الاسباب .. اما لين فعن فوائدها ولبنى عن المنتجين اللي انتجوها ووسن عن اشهر المهكرين ..
لين: باجي قصص عن التهكير .. مين يسويها ..؟!
وسن: لو اسيل هني جان ساعدتنا ..
طالعوا في بعض وقالت ندى: فعلا ..
وسن: وينها اللحين ..؟!
لين: الله اعلم .. يمكن عند احد اعمامها او قرايبها ..
وسن: تيب ليش ما سارت تدرس ..؟!
لين: يمكن نقلت ..
هزت وسن راسها بلا وهي تقول: بابي يقول ما نقلت ويقول اذا ما يت تدرس بسرعه راح يعطوها الحرمان ..
امل: عيل يمكن حولت انتساب .. يمديها تحول لأنها ما تعدت حد الساعات المحدده وهي انتظام ..
هزت وسن كتفها فقالت لبنى: طيب لو كانت انتظام وغايبه ولحد هاللحضه ما حولت انتساب .. تقدر تحول ..؟!
ندى: ايه تقدر .. ما مر غير شهر تقريبا وباب التحويل مفتوح ..
لين: بس لازم تسرع عشان لا يطوفها التحويل ..
ندى: فعلا ..
وسن: اخاف ما يمديها تحول .. ويمكن تكون ما تدري عالتحويل بعدين تطوفها هالسنه ..
طالعوا في وسن وقالت ندى: ان شاء الله تكون بخير وهذا اهم شيء ..
هزوا راسهم بإيه فقالت ندى في نفسها: "لحد الآن ما عرفت اي شيء عنج يا اسيل .. وش راح اقول لو كلمني وائل" ..
تنهدت وبدأوا يشتغلوا على بحثهم ..