شبكة همس الشوق - عرض مشاركة واحدة

12 - 3 - 2014, 07:40 PM

اما عن اسيل فبدأ وقت شغلها قبل نص ساعه وتوها وصلت ..
دخلت المحل فأستقبلها خالد يقول: صح النوم .. جان تأخرتي شوي بعد ..
اسيل: يتني ضروف ..
خالد: وش هي الضروف اللي اهم من شغلج مصدر رزقج ..؟!
اسيل: ضروف خاصه ..
تكتف خالد وقال: ما راح تدخلين إلا لمن تقولين وش هالضروف ولا ترى بأحسب لج غياب وطبعا الغياب ينقص من راتبج نهاية الشهر ..؟!
طالعت اسيل فيه فتره طويله ..
هذا بدأ يتقصد يذلها ..
اسيل: اخذت وقت على ما لقيت تاكسي ..
خالد: آه يعني ما عندج سياره ولا عندج احد يوصلج .. طيب من ذاك الولد اللي ياء قبل امس ..؟!
اسيل: واحد اعرفه ..
خالد: يعني مو اخوج ..؟!
اسيل: ................................
خالد: خساره كنت احسبه اخوج .. بذي الطريجه راح تتبهذلي يوميا مع التكاسي وانتظار التكاسي .. شرايج من اليوم وصاعدا انا اوصلج وبدون مقابل ..؟!
ضاقت عيونها وهي تطالع فيه بإحتقار ..
خالد: وشهو رايج ..؟!
اسيل: تخسى توصلني يالحقير ..
ومرت من قدامه ودخلت المحل وخالد واقف مكانه ..
عض على شفته وقال في نفسه: "البنت بدا يطلع لسانها ويبيلها تربيه .. راح تندمي كثير يا اسيل" ..
جت ليلى عند اسيل وقالت: انتي شلون تردين عليه جذي ..؟! ترى خالد ذا ما يرحم ابدا ..
اسيل: ما يهمني ..
ليلى بخوف: شلون ما يهمج .. هذا خبيث بشكل ما تتصوريه .. اللي يعانده ويوقف في ويهه يدخل السجن بطرج ملتويه ..
طالعت اسيل فيها فتره بس طنشت الامر ..
اسيل: معليش .. في البدايه كنت اخاف لأني مازلت في صدمتي بس مستحيل اسمح لأحد يذلني ..
وراحت عند احد الاشخاص اللي دخلوا عشان تعرفه عالملابس اللي يبغاها والاسعار ..
ليلى بهدوء: اسيل لازم تصحي .. لا تستهيني بخالد ابدا .. تراه ماكر من الدرجه الاولى ..
بعدها راحت تشوف شغلها حتى هي ..
اما خالد فكان جالس على كرسيه ويراقب اسيل بعيونه ..
خالد: راح اعطيها فرصه ثانيه .. بس لو تمادت وطولت لسانها حأدفنها .. صدقيني لو وقفتي بويهي راح ادفنج يا اسيل ..

اما عن اسيل فقالت: هذا هو اصغر مقاس ..
لفت الام على بنتها تجرب اللبس عليها ..
الام: طلع مضبوط عليج يا حبيبتي ..
البنت: طيب اشتريه مرره حلو ..
لفت الام على اسيل وقالت: جم السعر ..؟!
اسيل: السعر مكتوب عليه .. هات اشوف ..
طالعت في السعر وقالت: بخمسه وستين ..
الام: مو كأنه غالي ..؟!
اسيل: لا ابدا .. مرره نايس وينفع على البنوته ذي كثير ..
البنت: امي ابغاه ..
الام: بس يا سميه اخاف ابوج يخاصم ..
يــا سمــيــــــه ..
يــا سمــيــــــه ..

دق قلب اسيل بقوه وهي تسمع هالاسم ..
نفس الاسم .. نفس الاسم اللي كانت تقوله البنت صاحبة الملابس السودا ..
كانت دايم تناديها ببنت سميه ..
هذا يعني ان سميه هو اسم امها ..
جلست على احد الكراسي وهي تتذكر كلام البنت اللي اسمها وصايف ..
كل كلامها يدل على انها تدور عن سميه هذي ..
ليش تدور عنها ..؟! مو داريه ..
بس كان واضح انها كانت تكرهها ..
اسيل بهمس في نفسها: "من حقها تكرهها .. فيه ام بالعالم تصلح مثل اللي صلحته امي" ..
خنقتها العبره لمن نطقت هالكلمه ..
امها ما تستحق تناديها بأمي لأنها مو ام ..
مافي ام ترمي بنتها مهما كان السبب ..
تكره امها ..
تكره ابوها ..
تكره كل اقاربها ..
ودها تنتقم منهم ..
ودها تنتقم من كل اللي كانوا لهم ايد برميها ..
ايه بتنتقم منهم لأنهم هو اللي جنوا على نفسهم ورموها ..
ما كانت تبي تعرف مين اهلها لأنها ما تبغاهم ..
بس اللحين تبي تعرف مين اهلها عشان تنتقم منهم ..
والشخص الوحيد اللي يعرف هي ...
وصايـــــــــف ..!!
اسيل في نفسها: "وين القاها .. مستحيل اروح لها الجامعه لأني كرهت الجامعه بكل ما فيها" ..
تبغى توصل لوصايف بأي طريقه ..
تبغى لو خيط صغير يدلها على مكانها ..
فجأه تذكرت شيء ..
في ذيك الليله لمن راحوا المستشفى هي ووصايف ..
في ذيك الليله اتصلت وصايف عليها ..
هذا يعني ان رقم وصايف ما زال في جوالها ..
طنشت اسيل سالفة الام وبنتها وراحت تاخذ جوالها ..
دورت في الرسائل واخيرا لقيت الرساله اللي ارسلتها لها وصايف ..
حفضت الرقم في الاسماء واتصلت عليها ..
بس للأسف الجوال كان مقفل ..
اتصلت مره ثانيه وبرضوا كان مقفل ..
رجعت اسيل الجوال وهي تطالع فيه ..
معقوله تكون غيرت رقمها ..؟!
هزت راسها بلا وهي تدعي بداخلها انها ما تكون غيرته ابدا ..
قطع تفكيرها صوت دق جوالها ..
رفعته بسرعه تطالع فيه وانصدمت لمن شافت انه ندى تتصل عليها ..
قعدت فتره طويله تطالع في الشاشه ..
خنقتها العبره وهي تتذكر صاحباتها ..
استهبالهم ورجتهم ومضاربتهم ..
تتمنى ذيك الايام ترجع من جديد ..
وحشوها وبقووه ..
حطته عالصامت وما ردت ..
نفسيتها حاليا ما تأهل انها ترد على احد ..
راحت للكرسي اللي كانت جالسه عليه عشان تجلس لأنها تعبت من الوقفه بس شافت وحده كبيره بالسن جالسه ..
لفت بالمحل تدور كرسي ثاني بس ما كان فيه غير كرسي المحاسب بس خالد ما كان موجود لأنه راح يستلم الطلبيه مع جواد ..
راحت وجلست عالكرسي فتره ..
شوي جتها ليلى وقالت بهمس: اسيل ..
اسيل: نعم ..
ليلى: لو خالد شافج يالسه في مجانه راح تتعرضي للتفتيش ..
اسيل بإستغراب: انا مو فاهمه شيء ..
ليلى: هالمكتب فيه كل الفلوس اللي يدفعوها الزبائن غير عن فلوس الطلبيات المرسله وغير عن عقود المحل وبعض الشركات والمصانع اللي متعاقدين معاهم .. لو ضاعت ورقه وحده راح تكوني انتي المتهمه الاولى والاخيره .. وراح تتعرضي للمحاكمه ويمكن السجن كمان ..
اسيل: وليش ما يكون هو نفس سرقها ..؟!
ليلى: هو خارج الاتهام تماما لأنه يشتغل هني من خمس سنوات وواثقه فيه الرئيسه مرام ثقه عمياء .. قد حصلت عملية سرقه السنه اللي طافت واتهموا واحد يشتغل هني لأنهم لقيوا بصماته عالمكتب وانسجن ولحد الآن مو دارين ان كان هو فعلا اللي سرق ولا لا ..
قامت اسيل وهي تقول: انا واثقه من نفسي ان صار شيء واتهموني .. بس بوجود خالد اخاف أتورط منجد ..
وابتعد عن الكرسي ..
فأنتبهت للأم وبنتها سميه واقفين وكأنهم ينتظروها ..
فراحت لهم تكمل شغلها معهم ..

================================================== ==================

في المستشفى وعند فارس ..
كان فيصل واقف يكلم الدكتور جنب سرير فارس ..
فيصل بإبتسامه: انت تقصد انه بدأ يستجيب للي حواليه ..؟!
الدكتور: الاجهزه الخاصه بدأت ترتفع مؤشراتها بأنه في مرحلة الاستيقاظ من الغيبوبه بس لحد الآن ما صحي ..
فيصل براحه: الحمد لله .. ان شاء الله يصحى في اقرب فرصه يا رب ..
الدكتور: ان شاء الله .. بس هو محتاج حاليا تكونون كلكم بجنبه لمن يبدأ يستيقظ ..
فيصل: ان شاء الله .. امي اللحين يايه مع اختي وزوجها ..
الدكتور: ياللا ان شاء الله يرجع لكم سالم .. مع السلامه ..
فيصل: مع السلامه ..
خرج الدكتور وجلس فيصل عالكرسي ومسك ايد اخوه بين اياديه ..
فيصل بإبتسامه: واخيرا بتصحى يا فارس .. لك وحشه والله ..
قعد فتره يتأمل اخوه بأبتسامه ..
شوي اختفت ابتسامته ..
وش راح يصير اذا صحي فارس وما شاف لا ابوه ولا اسيل ..؟!
وش راح يصير اذا عرف ان ابوه مات واسيل هاربه ..؟!
اكيد راح يتألم كثير لموت ابوه ..
بس وش بتكون ردة فعله بالنسبه لأسيل ..
تنهد وغمض عيونه وهو سرحان ..
في هالوقت دخلت الام ووراها ريما ومنصور ..
جت الام عند فارس وقالت: يا حبيبي والله .. متى تصحى وتنورنا بطلتك ..
ابتسم فيصل وقال: الدكتور يقول انه بدأ يستجيب لكل من حوله ..
ريما بصدمه: بجـــــــــد ..؟!
فرحت الام وهي تقول: الحمد لله الحمد لله يا رب ..
ابتسم منصور بعدم تصديق ..
فرحان .. واخيرا بيشوف صاحبه ..
تنهد وهو يطالع في ام فيصل ..
وش بيصير له عرف فارس ان امه طردت اسيل ..؟!
تحركت اصابع فارس بهدوء وحس فيها فيصل ..
فيصل بصدمه: تحرك ..
كلهم تجمعوا حوله يطالعون في عيونه اللي قاعد يغمضها بششده ..
فتح فارس فمه وبدأ يهمس بأسم اسيل ..
انصصدمت امه وقالت بإستنكار: اسيل ..؟؟!!! شمعنى ما نطق غير اسم اسيلوه الجلبه ..؟!
فيصل: يمه خلاص ..
الام: شنو اللي خلاص .. مالقى ينادي غير اسيلوه .. انا امه وانا لي الاحقيه انه يناديني مو اسيل ..
فيصل بحده: يممه شفيج ..؟! المفروض تكوني فرحانه انه صحي مو جذي ..
فتح فارس عيونه وهو يقول بهمس: وينج ..؟!
دمعت عيون ريما وهي تقول: الحمد لله على سلامتك ياخوي ..
بدأت الرؤيا تتضح قدامه ..
امه .. اخوه .. اخته .. صاحبه .. و ...
لحضه في ناس ناقصين ..
فيصل بحنان: الف الحمد لله على رجوعك لنا يا فارس ..
منصور: ما تشوف شر يا فارس ..
نقل فارس عيونه بينهم بعدها قال بضعف: وين ابوي واسيل ..؟!
كل واحد طالع في الثاني بعدها محد رد ..
الام: ابوك في البيت ..
فارس براحه: يعني ما صار له شيء من الحادث ..؟! الحمد لله ..
طالعت ريما في امها وكأنها تسألها ليش كذبتي عليه ..
فارس بصوت خافت من التعب: طيب وين اسوله ..؟!
سكتوا كلهم ولفت ريما تطالع في امها ..
فارس: غريبه كانت قبل فتره هني .. وينها ..؟!
الام بصدمه: شتقصد بأنها كانت هني ..؟! متى يت هالجلبه ..؟!
عقد فارس حواجبه وقال: امي .. اسيل مو جلبه ..
الام بإنفعال: إلا جلبه ولا اسمح لك تدافع عنها جدامي .. خلاص ما صدقت انتهيت منها تيي انت بعد تسأل عنها ..
فيصل: يمه مو وقته هالحجي ..
فارس بدهشه: شتقصدين بأنتهيت منها ..؟!
الام: اقصد انها واخيرا افتكينا من ويهها وطلعت من بيتنا بعد ما طردتها .. تستاهل هاللقيطه اكثر من جذي .. احسسن ..
فتح فارس عيونه بصدمه من كلام امه ..
طردتها ..؟؟!!!
فارس بعدم تصديق: مستحيل .. يمه ليه جذي ..؟! هي مالها احد في الدنيا فكيف راح تعيش ..؟! اسيل اختي .. خلاص هي صارت وحده من العايله .. شلون ابوي سمح بهالشيء ..؟!
طالع فيهم ينتظر جوابهم ..
اما منصور فقرر انه ينسحب لأن الكلام خاص فيهم ..
لف فارس على فيصل وقال: فيصل صحيح هالحجي اللي اسمعه .. انت شلون تسمح بهالشيء ..؟! حتى لو كنت تكرها مستحيل ترضى لها هالحياة ..
فيصل بهدوء: فارس اهدأ .. ان شاء الله تكون بخير ..
طالع فارس فيه بصدمه وبعدها نقل نظره لأمه ..
طالع في ريما وقال: ريما شصار بالضبط ..؟!
هزت ريما كتفها وهي تقول: كنت مسافره ولمن رجعت عرفت ان اسيل عرفت حقيقتها وهربت وانت في غيبوبه وابوي ما...
وقفت كلمتها فجأه فقال فارس: وابوي وشو ..؟!
مسك فيصل ايده اخوه وقال: فارس خل ايمانك بالله قوي .. ابوي اللحين صار تحت رحمة الله .. الله يرحمه ويغمد روحه الينه ..
جف الدم في عروقه من شدة الصدمه ..
ابوووه مـــــــــات ..؟!!!!
شلوون مـــــــــات ..؟؟!!!
اختنق صوته وهو يقول: مات في الحادث صح ..؟!
هز فيصل راسه بهدوء اما ريما فنزلت دموعها غصب عنها وخرجت من الغرفه ..
ما راح تستحمل تشوف ردة فعل اخوها ابدا ..
هز فارس راسه وتجمعت الدموع بعيونه وهو يقول: يعني انا السبب .. انا اللي صلح الحادث .. يعني ذاك الوقت هو آخر مره شفت فيها ابوي .. ماراح اقدر اشوفه مرره ثانيه ..
ضغط فيصل على ايد اخوه وهو يقول: استهدي بالله يافيصل ..
فارس بصوت باكي: شلون استهدي بالله واللي مات هو ابوووي .. عارف شنو يعني ابووي .. احنا من دون الاب ولا شيء .. صرنا مثل الايتام ..
ونزلت دموعه فجلست فيصل عالسرير وحضن اخوه عشان يخفف عليه ..
اما الام فما زالت واقفه تطالع فيهم ..
شد فيصل على اخوه اكثر وهو يمسح على ظهره وتارك له الحريه يبكي على صدره ..

يازمان الآه عشت المستحيل ..
وانتهى حلمي بطعنات الرحيل ..

وانتثر دمعي على خد النحيل ..
وينه اغلى الناس وينه يامعين ..

هو امل عمري وهو نبض السنين ..
هو طفوله عشتها شوق وحنين ..

هو مشاعر عانقت قلب وعين ..
وينه اغلى الناس وينه يامعين ..

كيف اعيش اليوم وافرح بالجديد ..
كيف اقبلها كفوفه ليوم عيد ..

كيف اطفي الشوق واشواقي تزيد ..
كل حب ينولد في قلب ابوي ..

وين ذاك الحضن ياليته يعود ..
وين راس المجد مع ساس الجدود ..

وين نبع الحب موثوق العهود ..
وينه اغلى الناس وينه يامعين ..

في غيابه التهب كلي جمر ..
واطلب الرحمن كل ساعه تمر ..

اجتمع وياه اخر العمر ..
وينه اغلى الناس وينه يامعين ..

لاذكرت اللي مضى زادت جروحي ..
وانزف العبرات للمولى وابوح ..

وان رجعت لوحدتي ابكي وانوح ..
وينه اغلى الناس وينه يامعين ..